رواية نارا حيدره الفصل الثاني والعشرون 22 بقلم نمارق رحيم

-شنو ناري؟

- اليوم حسيت بيچ ! ،وصرت نار عليج ومنج ..وهل نار ماتطفى بصدري من اليوم العرفتج بي ..خفت عليج ،انتي ناري من كل الجهات و وين ما اروح،

-يعني راح تسميني نارك ؟

- اي بعد ما اگلچ ناردين ،بس ناري .. ناراحيدرة'

-ياعمرها لنارك.. 

أبتسم وهمس:- احلى نار بالنسبة الي 

ابتسمت فرحت من كلامة حيل ،رفعت راسي واتجرئت بسته بخده وعينه ذبلت وحاوطني بيده

-هاي شسويتي؟

-بستك

-آي وشسويتي بحيدرة ؟..

-هههه شسويت ؟

- سطرتيني سطر 

ضحكت بقوا وهو صاح بيه ..

- ولچ ضحكتج نصيها 

- غير سطرتك سطر ههههههههههه 

ضحك علئ ضحكتي ..رجعت راسي بركبته 

وايده علئ خصري ..

نسيت الخوف كله واني بحضنه شوفه عيونه كافيه تحسسني بالأمان ويا وتنسيني الدنيا كلها ..

اتصل علئ سالار وفتح سبيكر :- ها ولك موبايلي راح يعلگ من ورا اتصالاتك.. 

سالار :- خر* * بالاتصالات ،لك حيدرة المخطوفه هيه اختي قطعة مني شتريد اسوي اهدى ؟شلون اهدى والله يعلم هسه شنو حالها يالله راح انجلط والكعبة

ابتسمت ودمعت عيوني اخذت الموبايل من ايده - عمر عمري هنيالي اني هنيالي اروح فدوة الك أخوية فدوة ليخاف عليه وراح ينجلط بسببي 

سمعني وبقى ساكت اتفاجئ مني ..

-ها وينك ؟

سالار :- داضحكون عليه لو شنو؟ وينج انتي؟

حيدرة :- بحضني

سالار :- شنو بحضنك اهووو حيدرة ناردين وينها مو مخطوفة اشو كاعد يمها لكيتها لو تجذب عليه؟

- لا ولك شجذب عليك ،اي غير نقذتها

سالار :- دحلف گول والله

- والكائنات

- بداعتي حيدرة ناردين بخير ؟

- وعلي بخير الحمدلله مابيها شيء

أسمع هسه ما اگدر احچيلك علئ الخط فد ساعة واجيك واسولفلك ،أنت اطمئن وأرتاح 

نارديـن يمي وبٲمان لا تخاف عليها ...

سالار :- هاهيه اذا يمك شيء اكيد ارتاح 

يلا لعد رايح راجع للبيت انتظركم 

- آي، الله وياك

            

              

                    

غلقه الأتصال واجه شرطي گـال لحيدرة:

- هسه شنو نسوي حيدرنه نروح لو شنو ؟

- وديتهم للمركز مو

- اي وديناهم 

-تمام ،انت اخذ السيارة وروحو للمركز 

و انه رايح أوديها للبيت واجيكم 

- حاضر ..

راح ونزلنه كتله - هذا شنيه ويگلك حيدرنه ؟چا، انت حيدرتي اني وبس

ضحك وكرص خدي ..

- تغارين بوية ؟ 

هاهية انه حيدرتچ الچ بس أنتي

- يا روحي

حيدري هسه شنو أسوي أني ؟

- ربج ستر وخلانه نوصل بلحضه الاخيرة

چان هسه ما اعرف شنو صاير بيچ ؟

- حيدرا لا تعوفني 

- ما اعوفچ هيهات اعوف ناري

اخذ السيارة من الشرطي، ركبنه

وصلني لباب بيتنه وطلع سـالار يركض

اجه حضني وباس راسي والخوف 

باين بعيونهُ ، خايف عليه

حيـدرة :- خليها يمك ترتاح بليل أجي لاتضغط عليها بعدهي مصدومة بالصار وياها 

هز براسه "أي"

حركت السيارة متوجه للمركز 

أتصلت علئ رائد ..

- الوو لك وينك

- ها بالمستشفئ واكفين حراسه

علئ الغرفة العمليات 

- هلكلب أدعي ما تنجح العملية صدگني إذا اتشافه من رصاصات افرغ مسدسي كله براسه

- گول يا الله، يمعود هيه صدگ السالفه موهينه بس المحروسة خطيبتك مابيها شيء ومامتقرب منها و وصلنه بالوقت المناسب 

رديت بتنهيده: " الحمـدلله 

- وين رايح هسه ؟

- رايح طريقي للمركز ، لأهل العارات

- آي اتصلنه 

- يلا جاي انه 

- بالسلامة

- الله وياك 

غلقتة وگفت السيارة ..

ما اگدر أسوق أكثر وايدي ترجف 

من طلعت من ديالى واجيت الصبح لبغداد واني عقل ماضال براسي من ورا هلحيوان 

شتغلت بمهمه وطلعت أخذت الحماية 

وماخليت منطقة بــبغداد مارحتلها

فريتهن كلهن ،واندز ابلاغ علئ هاي المنطقة 

چان مشكوك بيها وفعلاً طلع الشك صحيح

عرفته بيها شقة لدعاره واحد منهم 

هو "عبد الرحمـن"

اقتحمه الشقة وصار الي متوقعة

وهو ناردين موجودة بيها 

أرتاح گلبي من عرفت ما لمسها ..

تعبت بعد ما اگدر اضم عليها بس!! 

إذا اكلها علئ الضامه راح اخسرها 

يا الله لا انه للسما ولا انه للكاع ..

الحل شنو ؟ 

            

              

                    

الحـل شنو يا نـااااري ؟

يا نـار تـعبي ..

...

نـارديـن

"سـالار" ما صبر وسولفتله هو هم تخبل وخاصتاً من گلتله راد يعتدي عليه ، بس من گلتله حيـدرة وصل و دوريه الشرطة بالوقت الصح أرتاح

سـالار :- الف الحمـدلله والشكر الك يا الله 

حيـدرة ماغلطت من انطيتچ اله 

- اي زلمتي بظهري دائمًا

- بس فرحني حيل ، من ضربة طلقتين

لو ما ضاربة چان موته علئ أيدي وحق الله

- سالار فدوة اني ما اخلص ؟ تعبت ماصدگت خلصت من لؤي وتالي هذا طلعلي يعني لا ماضي أرتاحيت ولا حاضر ؟

- لا تخافين گلبي المستقبل ويا حيدرة

ترتاحين بعد .. راحه أبديهٌ

- إن شاءالله 

...... امي سمعت وما اهتميت ولاعبالك بنتها مخطوفه،

بقيت گاعدة ونور ونبراس يمي احچيلهن 

كل ما اتذكر الصار أموت بچي كلش واحمد أشكره نقذني منهم ومن وحشيتهم وقذارتهم

بالليل اجه حـيدرة وگعد وياا سالار ..

سوينه عشه وجبته الهم للديوانية

وگعدت اتعشى وياهم ..

حيـدرة :- ها بوية شلون صرتي ؟

- الحمدلله بشوفتك عمري 

سـالار :- عوفيچ من عمرچ 

حيدرة عبدالرحمن طلع من العمليات؟ 

حـيدرة :- آي

سالار :- صدك ،مات لو شنو ؟

حيدرة :- مـات يابـه

صحت بتفاجئ :- شنووو ؟؟

حيـدرة :- يابـه مـات ما نجحت العملية

- عزه صخام گـول والله 

- هاي شبيج انفعلتي ؟

- مابيه شيء ،بس تفاجئت

ما ادري أفرح لو احزن 

- لاتسوين شيء خلص مات

ورب العالمين راح يحاسبه

- أمين الله ينتقم منه 

- كافي انسي إلي صار 

سكتت ..

گام سالار راح يغسل ..

- حيـدرا وتـالي ؟؟

- الله العالي يناري

أبتسمت ..

- حلوة ناري منك، هذا دلعي ؟

- هيچ شيء 

- فدوة جعل محد يدلعني غيرك 

أبتسم:- شلون بيه ويا لسانچ انه ؟

- لساني حلو للحلو

ضحك ضحكة مسموعة:- ايبـااااا 

- دوم الضحكتك إلي أحبها 

صدگ باچر اداوم أو لا ؟

- بعدچ خايفة ؟

            

              

                    

- أي

- وياي تضلين خايفة ؟

- طبعًا لا

- خلص چا باچر داومي و أنه وياچ

- صدگ

هز حواجبه وابتسم بمعنئ (اي)

- تدري ما مصدگة احسك متغير مدري اليوم حسيت وياك أحساس غريب اول مره حسيته

- انا هم

سكتت گال:

- باقي بـ بغداد بس أسبوع وتالي اسافر 

استغربت :- ليش شنو تسوي ؟ وين مسافر ؟

شرب چاي وگـال: 

- لمكان

- يا مكان ؟

- ما يخصچ

صفنت بوجهه وساكته .. 

- صدگ تحچي أنت خبلتني واني ماناقصة أخبال ساعة وياي وساعة عليه من حقي اسئلك غير خطيبتك ؟

-منو گال ؟،

- حيـدرا

- ها يبعد عيونه

ضحك :- لچ بابا مسافر وخلص يعني

شنو يفرق اذا تعرفين بيا دولـة ؟

- مسافر خارج العراق يعني ؟

هز راسه بمعنئ (اي)

- شتسوي ؟ ، وشكد اطول ؟

- شسوي هاي لا تددخلين بيها ، وشگد اطول اگدر اجاوبچ بحدود الشهر تقريبًا

- صدگ وشلون تعوف اختك وبيتك

- شعليها أختي شنو قابل اول مرة اسافر؟

عادي حسن يمها متعودة

- لعد واني ؟

-شبيچ انتي؟

- راح اشتاقلك 

- اشتاقي براحتچ

- هاي شبيك

حيدرة :- كلشي بيه 

أتاخرت مع السلامة ناري

طلعت رحت لبيتي حظرت ملابسي بالجنطة السفر ..من يصير الوقت المناسب اطلع للمطار

ما متأمل ابقى اسبوع اهنا

بس الله كريم ..

رجعت علئ لابتوب اشتغل 

وانطيت علم برائد بالي صار 

تمددت أنام وبالي يجبرني أفكر بنـاري

أغرس القلم علئ جبيني ،وصافن بالسگف

برائتها ،،،جرئتها ،،، كُل شيء خبلني 

قوية رغم ضعفها بلحظة خوف 

خبلة بعناد وجريئه بقربي

بريئة بكلامها وتصرفاتها

تبقئ طفله وسودنتي

ما أعرف شگد راح ابقى وياها 

واتمم الزواج منها أو افسخ الخطوبة

تذكرت من حضنتني وشفايفها 

تلمست خدي بنعومـه ..

شلتني شل بنت اللذين لا بقئ گلب ولا عقل يصفى من التفكير بيها 

ثاني يوم رحت لجامعتها انتظرت تخلص محاضراتها ..

            

              

                    

گاعد بالكافتريا أراقب حركاتهم وضحكهم وكلامهم وموبايلي مشتغل يمي ..

بهدوء ...

لمحتها طلعت وتمشي ويا صديقاتها ومدنگة راسها وتضحك بخفه أبتسمت وانه أشوفها أنتبهت وگـف يمها شاب انطاها دفتر ..

عقچت حاجبي مباشرةً أخذت السويچ

گمت مشيت وگفت يمهم ..

باوعتلي نـاردين و گالت ..

- هذا أنت يمته اجيت ؟

- قبل شويه

باسـل:- هذا منو ناردين تعرفي ؟

ناردين:- اي طبعًا أعرفه ، هذا حيـدرة 

ردت أحچي قاطعني وكمل كلامي بشده وحزم

-خطيبها وحبيبها ،رايد شيء ؟

باسـل:- اها ما چنت اعرف بيچ مخطوبة 

نارديـن:- اي لأن ماصار هواي من أنخطبنة 

باسـل:- الف مبروك علئ الخير موفقين بحياتكم

حيـدرة:- أشكـرك. 

نارديـن:- 

سحبني من أيدي وطلعني بره الكافتيريا

أستغربت شبي ..

وهو يگول:- أمشيي أمشيي

- علئ كيفك حيدرا أيدي شبيك ؟

وگفنه علئ صفحة و گال بخزرة ..

- منو هذا ست ناردين ؟ 

- زميلي 

- الزمال مالچ شنو يسوي يمچ ؟؟

شكو واكفة يمه وتحچين ؟؟

هيچ الموضوع مُهم ؟؟

- شسمه آي غير صار إلي هواي ما مداومة

لذلك هو انطاني دفتر بي مسائل المهمة

سكت وقابض ايده بصبر ..

- هسه أنت شبيك حارگ اعصابك

لأن حچيت ويا ؟

خزرني و رفع حاجبة ابتسمت بحُب وهمست

- ها عُمري تغار ؟ 

حسيته أحتار شنو يرد ..

تالي گـال:- ما أريد سالفة عبدالرحمن تكرر 

- لا ماتكرر اطمئن بس شسمه تغار عليه مو ؟ أعتررف كشفتك هههههه

ظل يمسح بكصته وساكت.. 

- أگول دام راح تسافر وتتركني

خله أيده علئ شفايفي: 

- ششش نصي صوتچ لا تحچين بهذا الموضوع أهنااا ممنوع

- ليش وإذا ؟

- بدون ليش

- ماشي المُهم يعني دام راح تروح خلي نطلع وديني لمطعم او أي شيء نتونس نسولف.. 

صير مثل هذولي المخطوبين كُل يوم بمكان

وأنت ياحضي أشوفك مرة بالأسبوع 

أبتسم بهدوء :- يا حضچ وين رايدة ترحين؟

- ما أدري أي مكان علئ بالك عادي

بس هسة أني جوعااانة وحييل

- ليش ما ماكله شيء ما متريگه مو ؟

هزيت راسي "أي"

- لازم تاكلين نـاري أخاف عليچ ‏

لا أدوخين بالكلية! 

- اساسًا أني دايخه بيك

- هـا ؟

ضحكت و غمزلته:- هـا ؟

ضحك:- خبله أمشي نطلع

- والمحاضرات ؟

- مهمة؟

- لا الصراحة.. 

- چا امشي

وداني لرئيس القسم وگاله يريد ياخذني 

وافق بسرعة وبدون نقاش ..

أستغربت من هذا الشيء شلون وافقو؟..من طلعنه من الكلية سألته ..

- اگلك صدگ أنت شلون دخلت للكلية وبدون بطاقة دخولية ؟ شلون قبلو يدخلونك ؟ وهذا العميد أشو بسرعة قبل وافق ؟

- شنو مشتهية تاكلين.. 

- ليش تتهرب من الجواب ؟

- ما اتهرب من شيء انا

- جاوبني ؟

- مو مهم الجواب ما يفيدچ والله

سكتت وهو سكت نسيت الموضوع بالطريق شفت موبايله بي نت

- أگول يصير اربطه بسيارتك؟

- آي يابه يصير

- زين ، هاك افتحة

هز حواجبه بمعنئ "ليش" وهو يسوق

- أخلي علئ يوتيوب أسمع فد شيء ضوجة 

اخذ المويايل وهو يسوق كتب الرمز على السريع ولاحفظت رقم خرب شنو هذه اليد تكتب أسرع من البرق أو حتئ ما يخليني أعرف الرمز

خله علئ يوتيوب وشكله ..

شغلت أغنية لـ "ناصيـف زيـتون" 

عليت مستوئ الصوت ظليت ادندن بالأغنية ألتفت علية سحب أيدي وباسها بأبتسامة.. 

- عُمـري 

- يا بعدهـم 

صفه السيارة نزلنه لمطعم تغدينه ورجعني للبيت فرحت بهذه اليومين حيل مر أسبوعين ماشايفته والي عرفته صدگ سافر مرات اراسله علئ فيس يقرأ ومايجاوب أعرفه مشغول ومرات هو إلي يخابر 

اداوم عادي ونبراس ونور يداومن وطيبة مرات تجي تدرس وياا نور ..

چنه گاعدين العصر وچان ينزل "سـالار"

وهو يگـول :- راجـع لأربـيل ..... 

الفصل الثالث والعشرون من هنا