رواية ليتك كنت سندي الجزء التانى الفصل الثالث و العشرون بقلم اسماء عبد الهادى
أخذت الملابس التي انهتها ابنتها بسرعة ومهارة فائقة ..لتسلمها لصاحب المصنع بنفسه كما طلب منها فهو يريد أن يفاتحها في موضوع هام لذا جعل أمر الملابس تلك حجة لكي يستطيع أن يتحدث معها بحرية عما يريده
_اتفضل يا أستاذ ناجح ده شغل بنتي بتاع امبارح زي ماحضرت طلبت
أخذ يدقق في قطع الملابس واحدة تلو الأخرى بإعجاب شديد
_لا برافو برافو... البنت شغلها فوق الممتاز رغم صغر سنها.
ابتسمت عفاف لتقول بفخر
_ليلى بنتي طول عمرها بتحب التطريز والخياطة علشان كدا دخلت القسم ده في الثانوية الصناعية وكانت من الأوائل كمان .
_ماشاء الله ماشاء الله ...طيب لما هيه شاطرة كدا... مدخلتيهاش ثانوي ليه يمكن كانت تطلع حاجة كويسة تفخري بيها.
هتفت عفاف برضا
_مش شرط بنتي تكون أخدة كلية يا أستاذ ناجح علشان أفخر بيها.. بنتي بحبها وبفخر بيها في كل حالاتها أخدت كلية مأخدتش دي أرزاق من عند ربنا ونصيب قبل كل شىء... الكلية مهياش كل حاجة دي مجرد بوابة علشان تقدر تدخل مستقبلك مش أكتر ..لكن أنا شايفة أن الإنسان الناجح يقدر يدخل مستقبله ويبنيه من أي مكان حتى لو معاه ابتدائية حتى.
رفع ناجح حاجبيه وهتف باستنكار
_قصدك أن التعليم ملوش لازمة يا ست عفاف.
_لا أبدا ..ده العلم اساس كل شىء ...اللي اقصده يا أستاذ ناجح إن اللي عايز ينجح ويتفوق ويكونله مكانة عالية في المجتمع يشتغل على نفسه ..مهياش الكلية هيه اللي هتعمله المكانة دي...بمعنى أن لو واحد حصله ظروف قهرية وخلته يسيب تعليمه ويمسك صانعه ..بإمكانه أنه يطور نفسه بالعلم والتثقيف وساعتها هيكون حاجة كبيرة أوي. ومش شرط قدام الناس ..إنك تكون فاهم وواعي لكل حاجة حواليك ده ف حد ذاته انجاز مقدرش يوصله ناس كتير من أصحاب الكليات.
أراحه كلمات السيدة عفاف كثيرا وشجعه لما يود قوله لذا قال بدون تردد
_كلام جميل يا ست عفاف ..وعلشان كدا أنا يشرفني إني أطلب إيد بنتك ليلى لابني سعيد .
تفآجئت عفاف بطلبه فاكتفت بالصمت
ليردف هو
_سعيد ابني محاسب في بنك وماشاء الله بيقبض كويس أهو وهيعيش بنتك في مستوى كويس ..ها قلتي إيه ؟
_اللي فيه الخير يقدمه ربنا يا أستاذ ناجح
_مستني رأيك يا ست عفاف بعد يومين علشان اجيب سعيد يقعد مع ليلى
_بمشيئة الله يا أستاذ ناجح ..بس بعد إذنك هسلم طلبية ليلى بعد كدا لمس شيرين المشرفة
_اللي يريحك يا ست عفاف .
___
جلست عفاف على الطاولة الخاصة بها والتي عليها ماكينة الحياكة التي تعمل عليها ..لكن فكرها لم يكن صافيا فكلمات ناجح أصارت ضجة برأسها فأخذت تدور كلماته في رأسها تزنها جيدا ...ترى هل يصلح سعيد لابنتها ام لا ..هل تلك العائلة مناسبة لابنتها الوحيدة.. ولم وافق سعيد على خطبة فتاة معها دبلوم وتعمل في مصنع رغم أنه يستطيع أن يتجوز من خريجة الجامعة مثله... أسئلة كثيرة دارت بخلدها فلم تفق سوى على صوت جعلها تشخص أبصارها وتتصنم مكانها وتنصت جيدا لذلك الحوار السائر.
____
في المنزل
هتفت بفرحة عارمة وسعادة بادية على وجهها بينما اجتمعن لتناول الطعام
_مش هتصدقي ياماما ..ملك النهاردة لقيتها بتطلب مني تتعلم تشتغل على الماكنة .
سعدت عفاف كثيرا لذلك الأمر لكنها لم تبدي الحماي التي كانت تتوقعه ليلى ...فعلمت أن أمها تفكر في شىء ما ..أرادت سؤالها لكنها فضلت أن تسألها في وقت لاحق ربما أمها لا تريد أن تتحدث أمام ملك بهذا الشأن.
انتظرت بعد أن خلدت ملك للنوم ودلفت لأمها غرفتها لتعانقها من الخلف
_الجميل بيفكر ف إيه كدا وشاغل باله وواخده مننا .
التفتت لها أمها وهتفت بجدية
_ليلى أنا لقيت طرف الخيط اللي هيوصلنا لأهل ملك.
اتسعت حدقتي ليلى بسعادة
_بجد يا ماما ..رغم اني زعلانة أن ملك هتسيبنا لاني حبيتها أوي ..إلا إني نفسي ترجع لأهلها ..بس قوليلي لقتيه ازاي؟
قصت عليها أمها عندما كانت تعمل بالمشغل فاستمعت للحوار التالي
____
##
مد يده ليصافحه بحرارة وشوق
_ وانت خلاص بقيت تسافر وتقول عدولي ..مبقتش تيجي ليه يابني زي زمان.. ليك وحشة والله.
تنهد ماجد بهم
_وانت أكتر يا ابو حميد والله ..بس انت عارف بقا الشغل بيحكم وكمان اليومين دول المزاج مش مظبط والدنيا ملخبطة حبتين .
_خير يا ماجد في إيه انت كنت محتاج فلوس فرقبتي سدادة يا بني انت بس قول .
_الحمد لله مستورة يا صاحبي..كل الحكاية أن بنت خالتي مختفية من فترة داخلة على شهر ومحدش يعرف عنها حاجة.
ضرب صديقه كفه بالأخرى وهو يحوقل بأسف
_لا حول ولا قوة الا بالله ...طب وعملتوا إيه بلغتوا باختفاءها .
_لا خالتي رافضة الموضوع ده تماما قال إيه خايفة من الفضيحة وان الناس هنا لو عرفت أن بنت اتخطفت يطلعوا عليها كلام يسىء لسمعتها...بس احنا سألنا في كل المستشفيات والمراكز والاقسام وكل حتة تخطر على بالنا لكن مفيش فايده
_لا إله إلا الله ... طب قولي البنت اسمها ايه ولو معاك صورة ليها وأنا هدور عليها أنا كمان أو شوية اصحابي هنا معرفة أوي هيسدوا في الموضوع ده ولو البنت هنا هيلاقوها بعون الله.
أخرج ماجد هاتفه ليريه صورتها
_اسمها ملك وصورتها أهي... يارب تقدروا تلاقوها .
_تمام ي صاحبي ربنا يطمنكم عليها
_تسلم يا نسيم... عطلتك عن شغلك
_لا يا عم لا عطلة ولا حاجة ده انت واحشني يا راجل.
____
##
باااك
هتفت ليلى بحماس وتسرع
_طبعا إنتي ياماما روحتي قولتيله إنك عارفة مكان ملك صح.
_لا طبعا متحركتش من مكاني... ملك مش عايزة ترجع لأهلها أخاف أهلها يكونوا ناس مش كويسين والبنت شايفة الويل معاهم ويمكن اللي حصل علشان ربنا يخلصها منهم .
_يا ماما بتقولي بيدورا عليها بقالهم شهر يعني أكيد هيموتوا عليها ..بعدين أنا فاهمة وجهة نظر ملك... ملك خايفة ترجع وتقولهم اللي حصل ميصدقوهاش ..وخوفها ده شىء طبيعي اللي حصلها مش شوية ومش كل الأهالي بتتقبله ولا بيكون رد فعلهم زي بعض.
تنهدت عفاف بحيرة
_طيب وبعدين يابنتي هنعمل ايه
حطت ليلى رأسها بتفكير
_طب سيبيني أفكر كدا وامخمخ واطلعلك بالمفيد
ضحكت أمها ودفشتها في كتفها
_طيب ومن هنا لحد ما تمخمخي يا لمضة عندي ليكي خبر حلو .
_ايه يا ماما نجحت في الثانوية العامة
ضحكت عفاف كثيرا حتى تعبت
_يخرب عقلك يا ليلى هتموتيني ناقصة عمر بجنانك ده...
ثم هتفت تسأل باهتمام بعد أن ضيقت أعينها
_ إوعي يابت تكوني لسه نفسك تدخلي ثانوية عامة زي بقيت زمايلك.
هتفت ليلى بجدية
_مخبيش عليكي يا ماما بيجيلي ساعات أقول كان نفسي ... لكني الحمد لله راضية باللي ربنا كتبهولي..واللي شفته وتعبي اللي تعبته في آخر سنة من اعدادي خلاني أقول الحمد لله رب العالمين على نعمة الصحة ..ومش مهم أي حاجة تانية ..أنا مبسوطة يا ماما باللي ربنا كتبهولي ومتأكدة أن ربنا دايما عاينلنا الأفضل
ربتت أمها على كتفها بحنان
_ربنا يراضيكي ويرضى عنك يابنتي ويسعدك دنيا واخره قادر يا كريم.
داعبت ليلى ارنبة أنف أمها
_ها يا ماما فين الخبر الحلو ..إوعي تقولي جايلي عريس.
ضربتها أمها على رأسها
_لماحة يا بت ...استاذ ناجح كلمني النهاردة وعايزك لابنه سعيد .
جلست ليلى على الفراش ووضعت قدم فوق أخرى
_ااه وأنا اللي بقول أستاذ ناجح عمره ما بيخرج مكن برا المصنع وافق كدا بسهولة إزاي أكيد في إن... اتاريه بيرسم على كبير.
_وانتي رأيك إيه يا كبير في الرسم بتاعه ده!!!
_هو أنا اعرف ابنه ياماما إنتي حتا مقلتليش اسمه ايه .
_وربنا قلتلك إن اسمه سعيد بس انتي الفرحة اللي طيرت برج من دماغك ومبقتيش مركزة.
ضحكت ليلى بحرج من أمها
_يووه يا ماما بقا..
جلست أمها جوارها
_اللي أعرفه أنه شاب مش كبير في السن يعني مناسب ليكي وبيشتغل محاسب في بنك.
زمت ليلى شفتيها وانطفأت حماستها
_بنك!! جت الحزينة تفرح ملقتلهاش مطرح...بنك يعني كل شغله بالربا... لا ياماما الله الغني عن الحرام.
_صدقي يا بت يا ليلى طلعتي جدعة أنا مأخدتش بالي من النقطة دي ..طلعتي جدعة يابت تربيتي مراحتش هدر.
_في ناس أول ما تسمع أنه بيشتغل في بنك ..تفرح وعنيها تزغلل وتقول يبقى بيقبض كتير.. ميهمهمش بقى هل الفلوس اللي بيأخدها من البنك دي فيها شبهه ولا لا ..المهم انه بيقبض كويس وخلاص ...لكني مش هسمح أدخل بيتي قرش واحد مشكوك في أمره .
ربتت أمها على ظهرها باعجاب وهتفت لتواسيها
_ معلش...ربنا يرزقك الزوج الصالح اللي يستاهلك يابنتي قادر يا كريم.
_أنا مش زعلانة يا فوفا... إنتي زهقتي مني وعايزة تطفشيني...ولا إيه نظامك.
_ان جت عليا يابنتي عايزاك في حضني علطول متخرجيش أبدا...لكن دي سنة الحياة ..وده يوم المعنى يوم ما أشوفك في بيت السعد مع الراجل اللي يصونك... وان مجاش مش مهم أهو أنا وانتي نونس بعض ..بس قولي يارب يمد في عمري وأقدر أكون الحما والحماية ليكي.
أخذتها ليلى بين ذراعيها وتشدد من احتضانها
_ربنا يطول في عمرك ياماما ويباركلي فيكي يا كل عمري.
____
اقتربت منه تناغشه كعادتها لذا وضعت يدها أمام الكتاب الذي في يده وهتفت بدلال
_قاعد لوحدك بتعمل ايه!!!!
أزاح عويناته عن عينيه ورمقها بضجر
لتهتف هي بمرح وهي تغمز له
_بتفكر فيها مش كدا!
نفخ بضجر وهتف يكز على أسنانه بغيظ منها
_هيه مين يا أخرت صبري؟
_رهف طبعا... اللي شاغلة قلبك وعقلك وكل كيانك.
طرق بكفة يده على الكتاب الذي كان يطالعه
_وبعدهالك بقا يا سها ..قلتلك أنا مش بفكر في جواز وحتى لو فكرت في يوم من الايام مش هتكون رهف .
ضيقت ما بين حاجبيها بضيق وهتفت باستنكار
_ليه بقى يا سي آدم مالها رهف!!
_مملهاش يا سها... سبق وقلت لك أن رهف تستاهل حد يقدرها بجد ويعوضعها عن اللي فات ..أنا لو اتجوزت رهف يبقى هظلمها معايا لإني عمري ما تفكر فيها ولا هعطيلها اهتمم، وهيه بنت رقيقة حرام أجي عليها أنا كمان.
جلست سها بتزمر وهتفت بضيق
_اسمع ياآدم انت هتتجوز رهف لإما مش هتتجوز خالص انت فاهم.
فتح آدم كلتا يديه بتعجب
_لا إله إلا الله...ما ده اللي بحاول افهمهولكم وانتي وماما مصرين.... أنا مش عايز اتجوووز ..اعمل ايه علشان تصدقوا .
هتفت سها على عجل
_لا لا هتتجوز انت وعدت ماما .
_وعدتها... بس التنفيذ إمتا .. الله أعلم .
_يبقى تتجوز رهف
_استغفر الله العظيم يارب
دفش أخته بالكتاب
_انتي يابت قومي نامي .. إمشي.
انخفضت سها لتجلب الكتاب وتضعه أمام أخيها ثانية وهذه المرة هتفت بجدية
_آدم اسمعني... إنت مش هتظلم رهف لإنك عمرك ما كنت ظالم ... إنت هتتجوزها وهتعطيها حقها وهتعاملها بما يرضي الله .
_وهو الجواز حقوق وواجبات بس يا سها ..مفيش مشاعر متبادلة!!... هل البنت مش من حقها تحب وتتحب؟.
_صدقني يا آدم ...المشاعر دي بتتولد بالعشرة ..وانت لما تلاقي رهف حسنة العشرة هتلاقي نفسك بتحبها لوحدك وهتتعلق بيها كمان زي ما قدرت تعلق أيسل بيها وأنا من قبلها.
رفع أخد حاجبيه
_اتعلق بيها مرة واحدة.
_اسمع يا آدم... شيماء الله يرحمها وادعي ربنا يجمعك بيها في الجنة إن شاء الله" فالمرأة لآخر أزواجها "... أما في الدنيا إلحق اتمتع بشبابك يا حبيبي مع البنت اللي هتصونك وتحافظ على بيتك ومالك وتهتم ببنتك ...رهف الوحيدة اللي هكون مطمنة مع أيسل وياها ..هتكون ليها أم مش مرات أب ..ها يا آدم قلت إيه!!!
