رواية قصة وجدان الفصل الثالث والعشرون 23 بقلم انين الليل

هو باوعلي متفاجئ وسالني بعيونه هزيت راسي = اي انت اكبر ظالم وشرير واني اكرهك

ليش لان ضربتج

هزيت راسي = اي انت ضربتني بدون سبب

وابوج ما جان يضربج

بلعت ريكي واتجمعت الدموع بعيني بلحظتها اتذكرت ابويه شكد ظالم من كان يضرب امي وهشام شكد ظالم من قتل رامي

وخلى امي تموت من قهرها ورامي الي ظلم نفسه وظلم هشام وامي

وكلهم هذوله ظلموني اني وعلاوي حتى امي ظلمتنا من تركت كل شي وصار همها هشام

:: ها شو سكتي انا شرير

  = اي شرير حتى من تسولف كله مغنتب وتخزر وما بيوم شفتك تضحك كلنه نخاف منك ونكرهك

هز راسه :: لا تجمعين تخافون مني يجوز ولو ما ادري ليش لكن اتكرهوني. (هزراسه )لا احجي عن نفسج

وكعن دموعي رغم جاهدت ان ما يوكعن لكن وگعن هو اخذ كلنسايه وصار يمسح بدموعي وهو ايگلي

:: كافي بابا بعد ما اريدج تبجيين امس من رديتي على مهدي عرفتج انتي مو قليله وما ينخاف عليج وشفتج

استهضمتي من سب اهلج

جاوبته بصوت متكسر =. ايي و انت انت سك تت ما دافعت عني

:: منو يكول

= اني شفتك

  هز راسه :: لا انتي ما شفتيني انتي طلعتي ما سمعتيني شلون حچييت ويه مهدي ولو انا موجود ما اخلي يوصلج لكن اجه

عليه رجال ورحت يمه وانشدي علاوي راح وياي للديوان

  = لعد لويش ضربتني

اتنفس بعمق :: ما اريد اسمع منج اطلع خلوني ارووح مادام هذا ( اشر على خشمه بااصبعه واتنفس بعمق ) مادام

هذا يشم الهوى انتي تبقيين اهنا هذا مكانج وانا مسؤول عنج على ما تكملين كليه ويطلع هشام وتقررين مستقبلج

بس ما طول بعدج بالمدرسه انا مسؤول عنج

  = بس اني ما مرتاحه ايهنا

:: تتعودين شويه شويه بعدين شنو تردين اتطلبينه مني وحالج من حال كل الموجودين اهنا

  دنكت وصرت اسحب خشمي هو رد بهدوء:: ياالله ما اريد اشوفلج دمعه تطيح وانا موجود

  باوعتله واني مبرطمه = ليش

    :: شني ليش ؟

بقيت ساكته هو رد :: احچي لا تبقيين ساكته

    = دا احس بس انت تحبنا الكل يكره ابويه وامي

   :: لان انتي بت (اتحسر ) بت اخوي الله يرحمه

   = سعاد تكرهني ومهدي هماتين

  رفع اصبعه :: گولي عمي مهدي وعمتي سعاد

اتقرب عليه وهو يبتسم بخبث :: ابيناتنا سميهم سعاد ومهدي حتى لو تسمينهم اسعيده ومهيدي بس ابيناتنا

گدام الباقيين عمي وعمتي

ابتسمت :: ها هسه رضيتي

هزيت راسي بالنفي :: شتردين وترضيين

  = اكولك وما تضوج

   :: كولي

    خليت زندي على كتفه = حباب عمو من تروح البغداد اخذني وياك اريد اشوف خاله ام احسان ومنار

لملم حلكه وحك ذقنه :: تدللين من اروح اخذج وياي بعد شتردين

  = هسه حكولك شكرا وابوسك هماتين

وبسته هوابتسم وكلي ::اتطلعين للبستان

    هزيت راسي = اي

   :: ياالله

    ااشرت بايدي على لبسي = هالشكل

   :: اي هالشكل ما نروح لبعيد بستانه اليم البيت بس عدلي حجابج

نزلت فرح //. ها وين شنو هالخيانه

     ابتسمت هي اتقربت //. ها حجي عاصف وين طالعين وعايفيني

  = مو دا تكولين عندج امتحان

   فرح // اي تا اكول بس شويه اطلع وارجع اغير جو

=اصلا احنه وين رايحيين ايهنا بالبستان

   • خوش وياكم

تستمر القصة أدناه

طلعنه كان الهوا يخبل والهدوء فد شي باوعت الفرح =يراد حبل ،

عمي كال :: وين حبل بهالزلك

فرح وهي تضحك // بعدهي بويه بعدهي ما شايفه الزلك الحقيقي بس تسمع بي

:: اي خلي تمطر وتشوف الزلك على اصوله

= هاي كلها لان كلت يراد النه حبل

- - وين تلعبين بي ما تشوفين الكاع كلها طين وبزيز

= انظفها

- -ها وشلون

لملمت حلكي = امم يعني اكنسها واشيل كول هاي الاشياء الزايده ونجيب (صرت احسب بايدي) رمل انطشه ايهنا وحبل

وكرة سله

- - وخماسي ما تردين

= ل تستهزءين هياته الارض واسعه كول شي نلعب بيها

باوعت شفت البيت الي موجود بنفس بيتهم يعني ما بيناتهم سياج من الترك الوره الحد الباب الرىيسي عمو كعد

على جربايه حديد موجوده ودووم بيبي تكعد عليها واني سالتها الفرح

= هذا البيت المن

  فرح// عود صدك ما تدرين هذا النه

     = منين اعرف دا اسال المن

    فرح // هذا بيتنا امي اتگول البهاء يتزوج بي

   = وهسه هو فارغ

  هزت راسها // اي كامل بس فارغ

   =تدرين مشايفته

  • حلو من داخل تعاي

  = يعني ممقفول

• لا لويش انقفله هو بداخل بيتنا

دخلت شفته بيت عادي يعني حاله حال البيوت ما بي شي مميز الغرف مالاته. كبار ومبين جديد كان مليان تراب

  فرح // ها شنو رايج

= حلو بس مليان تراب

• اي طبعا محد گاعد بي

= فد يوم نجي وانظفه

فرح //. هم ايرد ينترس اتراب ما دام محد ساكن بي

صفنت اتذكرت بيتنا واتساءلت ويه نفسي =. هسه هماتين مليان تراب وهالشكل موحش

فرح //. ياالله نطلع

هزيت راسي طلعنه رحنه يم عمو اجت عمه نهاد هي وساره /. ها انتن اهنا

  فرح // اي خاله ضجنه وطلعنه

   نهاد // اشلونك ابو فرح

نفخ. الدخان :: هلا حياج الله

    باوعتلي // اشلونج وجدان

رديت ابرود = الحمد لله

ساره //. اشلونك عمي

ابتسم بوجهها :: هله عمي هله بيج

فرح // خاله ما. دريتي

    نهاد تهز بايدها // شني

جاوبتها وهي اتاشر عليه وتضحك // وجدان تريد تسوي اهنا ملعب وتجيب حبل وانا كتلها خلي تمطر احسن ونلعب

  هزت راسها وتباوعلي بخبث // ايي بالمطر يخبل اللعب

اتقربت منها وحاچيتها = تره عمه اني اعرف كولش زين ايهنا بالمطر اصلا ما نطلع لان نتحمل طيانه

   نهاد //ها يعني تدرين بيه اتشاقى واضحك

  هزيت راسي = اتضحكين اي بس تتشاقين اشك

   ردت وهي تهز بايدها // يمووي ثاريج مو اوحيده انتي

   فرح اتاشر بعيونها // خاله

رحت گعدت يم عمو ع الجربايه اشوف الحزن بعيونه بالضبط مثلي حزينه واكابر وهو ايحاول ما يبين حزنه لكن

عيونه فاضحته بس ياترى شنو سبب حزنه

  فرح //. راح ادخل باجر عندي امتحان اروح ادرس

ساره /./. تانيني جايه وياج

نهاد //. اخذني وياچن ،

الي فاجاني عمو عاصف من حچت فرح وساره راحت وياها ما صدر عنه رد يعني بالعقل ابنيه عدها امتحان 

وتريد تدرس شكو بت عمها تروح وياها اكيد ما حتساعدها بالدراسه لان. هي تاركه واكيد يخلصنها سوالف

زين عمو لويش سكت ما لفت نظرها او امرها ان تدرس مو هذا مستقبلها

الي شفته انو عمو ما مهتم هواي الفرح او هو هالشكل

طبعه بحيث مرات ما احس عنده عاطفه اتجاه احد او ما يحب احد بس بيبي

لكن تصرفه وياي او ويه علي يختلف صافن ويدخن بحيث ما ينطي النفسه مجال صرت احرك بايدي واكح

  = عمو اختنكت اني انت ما اختنگت

نفخ الدخان وگلي :: منين اختنگتي

  = من هذا الدخان

كح بقوه. جاوبته= شوف عمو حتى ات جاي تتاذى

  اتنفس :: المتعلم ع المطر ما يخاف يتبلل وانا اتعلمت صارت الجكاير حالها حال الماي والاكل ويجوز حتى الهوا

  = وليش كل هذا؟

  :: ما اكدر اعوفها

  = بس عمو مو زين على صحتك وبعدين انت حتى اكلك قليل

باوعلي وهو رافع حواجبه :: انا اكلي قليل ؟

  هزيت راسي = اي متاكل بس شويه خبز وياها شويه لحم لو دجاج متاكل بعد شي

   ابتسم :: تدرين منتبهه الاكلي اكثر مني

  = لا بس يمكن لان شفتك مره او مرتين اكلت ويانه صدوك عمو ليش تاكلون ابحدكم اقصد الرياجيل

   :: هاي العشاير ياكلون الزلم ابحد والنسوان ابحد

    = اوكي بالعزايم بالمناسبات اذا موجود خطار اكلو ابحدكم بس بالايام العاديه اللمه حلوه

صفنت واني اذكر شلون كنه نلتم وناكل سوا

     :: ما تشوفيني هلجبت الطاوله والكراسي

ابتسمت = صدوك عمو يعني حناكول سوا

  :: اي بس تظل مشكله

   = شنو ؟

ابتسم :: مهدي وفروخه يجون يستولون ع المطبخ

عكشت وجهي = هم مهدي هذا شنو ما يحب بيته

  :: لا بس مرته وحده ما اتعب نفسها

=. اي مبين عليها

ابتسم :: تدرين انا قابل عليج

باوعتله هو بتفس ابتسامته :: من چعمتي نهاد ورديتي عليها

=. ولو ما اعرف شنو معناة اول كلمه بس اني بعد ما افوت الها لو حجايه

:: عفيه عليج هيج اريدج بس مو ادنى حجايه تردين وتصير مشكله اتعلمي يمته تردين

= اي اني ما افوت حجايه بس ات الزم ايدك من خدي

هز راسه وابتسم هو راح يتمشى واني رجعت للبيت وبالليل سوينه مقالي واني ساعدت عمه رجاء وبيبي شوينه الها باذنجان

وخلينه بالسفره وكلنه كعدنا كانت بيبي وعمو متواجهين اني كعدت يم بيبي وبصفي فرح وبهاء كعد يم عمو وبصفه علي

وعمه رجاء

   عمو مد ايده :: ياالله بسم الله الرحمن الرحيم خلي ناكل كبل لايجي .... وجنوده

   بيبي // يا شبيك عاصف

:: يمه ما گلت شي ما تحسينهم اله دخلو علينه واكلو الاخضر واليابس

   رجاء // گبل ما جنت تحچي

    رد بدون ما يباع الها :: ضاكت عيني مو بيدي اتبدلت يجوز انغسل راسي

حاجاني ( كومي عمو وجد صبيلي جاي بكوب )

  رجاء // شنو بطلت الاستكان

  :: اي اشرب فد نوب الاستكان للخطار

  فرح حاچتني // زين طلع بيج نفع ابوي صار يشرب بكوب بدل ما كل ساع صبيلي استكان

خزرها وراد يرد بيبي سالته // باچر ترحون اتخطبون الغزوان

:: اي يمه همزين ذكرتيني باجر يجون عليه جماعه غداهم يمي

  بيبي // ياهمه ؟

  :: رجال سيد صديقي وبيت حجي مزبان وبيت ابو عظيم وملا ميمون وجابر

  بهاء // شنو نذبح ذبيحه

بيبي // لا عليمن اشوو سمج ودجاج

:: هو انا گلت اذبح بس الملا ذممني گال مشتهيين سمج

بهاء //. السمج احنه نشوي

  :: وحتى الدجاج اهنا بس اطبخن تمن

بيبي //. وحشو ومرك شني بس تمن

گامت بيبي وكالت /$ الحمد لله

بقيت بالمطبخ الم بالصحون وهمه كعدو بالصاله لمن ما سمعت عمو عاصف حجى :: تعاي فرح وينج

فرح // ها بابا چنت اغسل

:: ليش بت عمج ابحدها بالمطبخ مو ساعدت امج بالعشا

فرح //. بابا مو عندي امتحان اريد اقرا

  :: ها ومن اجتج ساره ورحتي انتي وياها صعدتن فوك ما گلتي عندي امتحان

بهاء // اسمعي ولج تشتغلين حالج من حالها

   بيبي // هي يمته فرح مشتغله شو كله على رجاء هسه امك صارت تريد احد ايساعدها

  رجاء // عمه ما ردت احد يساعدني مو انتي كلتي ما طول البنيه ما عدها مدرسه علميها تشتغل

   بيبي هزت راسها // اي كلت بس مو كله عليها

اجيت من المطبخ بيبي كالت // كواج الله

گعدت بهاء رد // شنو ابقى اعلم من احد ايكلج گواج الله ردي وكولي الله يكويج رحم الله والديج

فتحت عيوني ع الاخر وسالته = هاي كولياتها اكولها

  بهاء بضحك // اي ليش شبيها

= طويله وصعبه

  - لعد شدا تكولين

  = اكول شكرا

  بهاء //. هههه حلتها

رجاء // عمه وجدان بعد لا تكضيين بيدج شي

باوعت الها يعني // لا تشتغلين لان حبوبتج تكول انا مخليه الشغل كله عليج

  هزيت راسي = لا بيبي اصلا عمه متقبل اشتغل بس اني دا اقضي وقت

   فرح // خو گالت دا تقضي وقت

احس بعمه رجاء رغم طيبة كلبها ما تحبني وحتى فرح لكن تجاملني يمكن تخاف من ابوها واخوها

الفجر گعدت بيبي تصلي وعرفت بعد الصلا راح اتسوي العمو سياح اني هماتين گعدت صليت ورجعت اتمددت

بقيت بفراشي ما نمت كمت رحت لكيتهم بالمطبخ وبيبي وعمو جاي يتريكون گلت = صباح الخير

ردو // صباح النور

بيبي // تعاي اكعدي اتريكي مسويه سياح

   بيبي خلت السياح كدامي والبيض المسلوك اتريگت وبعدها عمو گلي :: فوتي للمضيف نظفي كلش اريده يلمع

اخذت المكناسه ورحت انظفه كنسته وبعدها فتحت الشباك ومسحت الطبلات وغسلت نفاظات الجگاير وسديته وطلعت

بوجهي شفت عمو عاصف گلي :: اكنسي الطارمه اكنسيها على كيف حتى التراب ما يصعد ليفوك

هزيت راسي كنستها ورشيتها ورجعت للبيت صار بوجهي بهاء ابتسم وكلي // راح اروح للولايه شتردين اجيبلج وياي

   =. يعني وين هتروح

    للسوك

    = ضايجه خلي اروح وياك

    بهاء باستغراب // وين رايحه ؟

   = حباب دا اكولك ضايجه

   • ما يصير

= شنو الما يصير ؟

   • ترحين وياي

  = لويش ؟

• انشدي جدتي

  = اي راح استاذنها انتظرني مو تروح

اجيت لگيت بيبي متمدده بغرفتها كعدت يمها = بيبي گاعده

دارت وجهها // ها جده

  = اريد اروح ويه بهاء

  • وين ؟

= يريد يروح للسوك واني ضايجه خلي اروح ويا

   كعدت على حيلها وهزت راسها // لا ما ترحين

         =. ليش ؟

  • هيج ما يصير ترحين

هزيت راسي هي حچت // بهاء بهاء تعال

  - ها جده

- شوف بت عمك اذا تريد تجيبلها شي وياك

- سالتها وگالت ما اريد

- خوش روح ولا تتعطل واخذ علاوي وياك وشيريد اشتريله دير بالك علي كضه من ايده

- تامرين امر وانتي ما تردين شي احيبلج وياي

  - لا جده عساك سالم بس لا اتعطل خاف تجي زلم

  - صار

راح بهاء واني اتمددت ع جربايتي وبيبي تباوعلي گالت // تعاي جده فرجي رجليه

اتقربت عليها وصرت امرغ برجليها بعصاره على ميزها انسندت وكلتلي // كافي حبوبه روحي غسلي اديج وتعاي اريدنج

رحت غسلت ورجعت يمها هي اشرتلي اگعد ع الجربايه

• شوفي جده انتي تكولين ضايجه وما طالعه وردتي اتطلعين ويه بهاء ومن ما رضيت ضجتي بالزايد

• جده اهنا مو مثل بغداد احنه اهنا عرب عشاير كل شي عدنا عيب وما يصير وهو صدك. ما يصير

شلون ترحين ويه بهاء

= شكو بيها قابل اني وين رايحه

• جده چا المن اتصلين ؟

باوعت الها باستغراب هي هزت راسها // احنه نصلي ال الله والما يصلي حرام مو

ما جاوبتها اكتفيت اباوع الها هي استردفت // بس هم حرام من تركبين ويه ابن عمج وما وياج احد

باوعت الها وانا احك بخدي // اي حرام ترحين ويا ابحدكم بالسياره شلون ايصير اخليكم الولد استحى ما گلج ما يصير

هلكلج روحي انشدي حدتي

  = لعد اذا حرام ليش مخليني ساكنه ويا بنفس البيت

• مو ابحدج امه وعمه واخته وانا واخوج تدرين لو رايحه الوحدج جان الناس دگت النه تنكه حبوبه جده انتي بنيه

وكل شي محسوب عليج ديري بالج تطين على روحج لزمه ما شفتيني خليتج يمي بالحجره

  = اني اسفه ماعبالي هالشكل

  • وين عمتج رجاء

      رفعت اكتافي = ما ادري ما شفتها  

وگفت ولزمت ايدي // امشينه خلي نطلع بالحديقه اخذيني على القريوله

بقيت صافنه سالتني // شبيج حبوبه

  = بيبي ما اعرف وين اوديج

   عكفت وجهها // شني ؟

= بيبي امين اعرف هاي الگلتيها واخذج الها

شني شكلت

=. هاي الاخذج الها

  ضحكت // ههههه ما تعرفين قريوله

  هزيت راسي = اي شنو يعني وين اخذج

   • خيبه القريوله يعني جربايه هسه عرفتي

  فتحت عيوني = صدوك

   • اي صدوك على گولتج

اخذتها ورحت وسالتني // نظفتي الديوان

  = اي بيبي وحتى الطارمه الكدامها هم كنستها ورشيتها

   • عفيه بالمعدله

كعدت واني كعدت يمها

اجه عمو گعد وهو ايكلها :: ها اجيتي اهنا ليش ما درتي للمضيف

   • گلت خافن يمك ناس

   :: لا محد يمي ( طلع جكاره ) ها يمه بوجهج ضحكه

فرت ايدها // اي يابني على هالفرخه هاي (وتاشر عليه )

  :: شبيها

  • ضلت ساعه صافنه ماتعرف القريوله

  ابتسم :: شني ؟

   - اي وداعتك گتلها اخذيني بره ع القريوله تسالني شنو قريوله

   :: خطيه

اجه الخروف الزغير يمهم اني رحت صرت العب ويا بيبي تحجي

  هزت راسها // اي يابني خطيه انوب رادت تروح ويه بهاء

     دار عليها :: وين ؟

   - اتگول اريد اشوف السوك عبالها يمنه

صار ينفخ وبيبي تگلي // ولج عوفي شتردين منه

   :: خليها يمه

   - ما تشوفها اتخونك بي

   :: اشوفها بس خليها

شلت الخروف الزغير واجيت يمهم =. خطيه جوعان شنو ياكول

  بيبي //. جده يرضع ما ياكل

= مين يرضع

من امه

= اي لعد ليش ما تجي ترضعه خطيه

هدي وهو يروح الها

= لا اني اخذه هذا خروفي الزغير ( وصلت يم عمو ) يراد انسمي

ابتسم بدون ما يرد جاوبته =. امم راح اسمي خروفي الزغير

هز راسه بدون ما يحچي

اخذته يم امه ونزلته وفجاه طلعلي ديك رومي بس كبير وحتى البط واني ركضت بسرعه واجيت يم بيبي

وعمي عاصف

وهي اتگلي // شبيج اسم الله الرحمن

  = بيبي الديك والبط وراي دا يركضون

بيبي هزت ايدها //. وخفتي منهن شني ياكلنج

فلت وجهي بس الصدك خفت منهن اجه بهاء وجاب علاليك خلاهن بالكاع وگلي // تعاي تناوشي مني

عمو عاصف :: اخذهن للمطبخ ليش جايبهن لهنا

-

رجع شالهن وعلاوي هماتين شايل علاگه اتاخر شويه ورجع // السلام عليكم

:: عليكم السلام

بيبي //هلا جده شجبت

- هوجبت فواكه اخذتهن للمطبخ ما لكيت احد

باوعتلي // • روحي جده اغسليهن وخليهن بصواني تلاثه وزعيهن بالصواني الزغار وجيبيلج ماعون لهنا العمج

وابن عمج

هزيت راسي ورحت للمطبخ شفت بهاء جايب عنب وموز ولالنگي هواي اني هماتين غسلت الفواكه كلش زين خصوصا

العنب بعدها وشلتهن من الماي واخذت بصحن فواكه وصحن ثاني ازغر خليت بي البيبي ورحت قدمته الهم

شفت بهاء يضحك وهو يگلي //خلي الصينيه ع القريوله

عمي عاصف اتنفس وكال :: تؤ

وبيبي تبتسم بهاء// چا جده لو گايلتلها اتدشش الهوش بالمراح شتسوي

• مدري

بهاء//فد يوم اخذج واوديج على زوره تنسين بيها اسمج

ابتسمت = صدوك حباب كولش ضايجه اخذني الها

بهاء// تدللين

عمو عاصف لم حلگه وهز ايده عرفت بهاء جاي ايصنف عليه رحت كعدت يم عمو وحاچيته

  = بهاء لا تصنف اني ما عايشه ايهنا وما اعرف هواي كلام اتو دا تحجونه

  بهاء//. هسه انا منا ورايح راح اسمي جدتي فرحه بيبي

= اي سميها بيبي احلى ويلوك الها

عاصف :: كافي بهاء

صرت احرك برجليه ع الجربايه مثل المرجوحه عمو عاصف اخذ صحن الفاكهه وكال البهاء :: تعال انت وعلاوي

كام بهاء ومن ابتعدو شويه بيبي حاجتني // جده انتي تدرين ليش عمج گام

رفعت چتفي بيبي ردت //. انا اگلج ما يصير من اتكعدين اتهزين رجليج گدام عمج لو ابن عمج وحتى گدام اخوج ما يصير

= ليش بيبي ؟

• يا جده عيب فشل عمج اله احترامه وابن عمج شاب وحتى اخوج مو ازغر منج بس ما يصير الولي اله هيبه

شفتي عمج ضاج وراح

= يعني زعل

هزت راسها // اي زعل

= خلص بعد ما اسوي اني شمدريني

• وهسه دريتي

= اي بعد ما اعيدها

ظلت تسبح وتستغفر واني كاعده خطر ابالي اسئله اتحرج اسآلها اتشجعت = بيبي اتي شنو اسمج

باوعتلي باستغراب // ليش تنشدين على اسمي تردين تطلعيلي جنسيه

= ههههه لا بس هالشكل

شلج بهالعياره ما تعرفين اسمي

=يعني صدوك اسمج فرح

لا اسمي فرحه فرح اسم بت عمج

=. ها بيبي زين ليش سميتو عمامي بدر وعاصف

اتحسرت // بدر صار بالگمره وهو حلو مت عيني وسما جدج

شفتها رادت تبچي = وعاصف

  اتنفست بعمق وغمضت عيونها // صار بليلة هوا ومطر وبرد وبليلتها تدولبنا بعد شتردين تعرفين

  اهنا اتجرأت وسالتها = انتي هماتين تكرهين ابويه

  باوعتلي باستغراب // شلج بهالحجي هذا

= اي بيبي لان دا احس الكل دا يكره ابويه حتى اني داىما اسمعج من تبچيين تبجيين بس على عمو بدر. وعلى جدي دا احس

انتي متحبين بابا ولا حتى امي

هزت راسها // لا متوهمه بس بدر (وحجت بعبره وبرطمت ) بدر راح وهو شاب كل شي ما. شاف من الدنيا بدر عزيز كلبي

اشبيب ما تهنى بشبابه

شفت دموعها وكعن حسيت بان اني السبب اتقربت اكثر منها وحضنتها وبعدها خليت راسي بحضنها وهي صارت تمسد بشعري حسيت بحنيه عدها اتجاهي لكن اكو شي يمنعها حتى تبوسني او تحضني حاچيتها

=تدرين اني كنت اخاف منج بس انتي گلبج حنين يابيبي

• شلون عرفتي گلبي حنين

= من حضنتج حسيت بدگات گلبج

• هاي عيارة البنات كومي

وكفت واتخوصرت = اي كايمه بس خلي اگلج شي دا احس اتحبيني اكثر مما تحبين فرح

+

لزمت. العكازه وهيه عاضه على شفتها // روحي من يمي عياره

ابتسمت = رايحه يابيبي يا حبيبتي

عدلت شالي وصار بوجهي بهاء //منو حبيبتج

= ما عليك شتريد

اريد تسوون چاي اجونه زلم

هزيت راسي ورحت للمطبخ واجه بهاء كلي //اريد ماي

=اشرب هذا البراد

-مو الي للزلم

=ها اي

-ياالله

طلعت. الدولكه وغسلتها وخليت ماي بيها واخذ كلاص وراح وهو ايكلي // سوي جاي زين

خدرت الجاي وخليته بترمز. وطلعت الاستكانات اجه وكلي ليش ما صبيتي

= لان اكيد حتطلبون مره لخ هاك هاي كل شي حضرت بدل ما تروح وترجع 

• شنوخايفه اتعب

= لا بس الجاي يبرد وما حلو اذا كل شويه احمي

• بس يمكن هذا ما يكفي

= راح اخدر مره لاخ

خدرت الجاي وما رجع بهاء اني مسحت الكاونترات والطباخ بعدها رحت للغرفه شفت بيبي جاي اتصلي واني هماتين اتوضيت وبديت اصلي ومن كملنه اجت ساره جابت صينيه بيها صحن تمن وخبز وسمجه مشويه وتشريب فوكه نص دجاجه وخضره

وخلتهن كدام بيبي الي من خلو النعمه گدامها گالت اللهم صل على محمد وآل محمد بعدها سالتها //صبو للخطار

•اي حبوبه صبو هسه وهاي خالتي ام بهاء ودته اتكول غداج انتي وجدان

   سالت ساره = اشو ما همه بالمطبخ يعني عمه وين صبت

   جاوبتني // مو عمه الي صبت جابر وبهاء

  = بس لا فرح ولاعمه موجودات

بيبي // ملتهيات عدهن شغل

ولان مو اول مره يجون خطار البيت جدي ومن سالت على اخويه گلولي ما عليج حاله من حالنه ياكل ويه الزلم صرت

اكل اني وبيبي ومن كملنه بيبي كالت شيلي الصينيه وجيبيلي چاي

رحت للمطبخ وخليت الصينيه وصبيت الها چاي هي صارت تشرب واجت عمه نهاد مبدله ومتكيجه

-ها عمه شلونج

بخير ونعمه

عساج

بيبي //كملتن خطارجن

اي عمه الزلم صبو والمواعين من نجي نغسلهن

هواي اجو زلم

اي عمه المضيف انترس

وكفه الاكل ؟

نهاد // يا عمه عود ما تدرين عاصف ذبح ذبيحه للسيد وجاب طباخ

بيبي // شعجب مو كال سمج ودجاج

اي اول مره كالو نشوي سمج ودجاج تالي من اجه السيد ويا واحد عاصف ذبح ذبيحه وخابر الطباخ

بيبي //. وانتن كل شي ما سويتن

نهاد //. عمه عاصف گال هو كل شي يطبخ

بيبي // وديتن البيت جابر غدا

هو ياهو ظل شو جابر اهنا وسميره ويانه بالبراني وفروخهم وياهم

اجن عمه رجاء مبدله ولابسه ذهب وخاله مكياج وفرح هماتين مبدله لابسه بدله ماروني كلش حلوه ومخليه مكياج خفيف

ولابسه ذهب واجت ساره وهاجر هم مبدلات

نهاد حجت //. اليوم شطالعه رجاء تخبلين

عيونج الحلوات

شعيوني انتي هالوكت كله لابسه احمر

باوعت البيبي وهي لازمه مداليتها وتعلج//. اي ناذره

  

اجت سميره مرت جابر وباست بيبي وابتسمت بوجهي باوعت البيبي

نهاد //. ياالله عمه امشي ويانه

رجاء /\ شني ما تعرفين عمتي ما تروح لا لخطبه ولا العرس

-ادري بس اگول من زمان بدر الله يرحمه هم آن الاوان شويه تطلعين واتونسين

بيبي // روحن انتن انا اظل اهنا وياي وجدان

  سميره //چا ليش البنيه ما تروح

    بيبي ردت // حزينه

سميره //اي ادري بس اكول حالها من حال البنيات

بيبي // لا ما تروح شتسوي

نهاد //. عمه خافنها تريد تروح

بيبي سالتني // ترحين وياهن

هزيت راسي بالنفي وبيبي جاوبت //. وينها او وين الروحه الميت ما صارله احترام

محد جاوبتها اجه بهاء //. ياالله اذا جاهزات خلي نروح ،

نهاد // خوش اخذ امك واختك وساره بسيارتك وانا وسميره وباقي البنات شوف ويامن نروح

بهاء//لا خاله اجرت كيه تروحن بيها كلجن

سميره //زين اتسوي

  -ياالله لا تلتهن بالسوالف اريد الحك ع الزلم

طلعن وهو يباوع وگال الفرح //عدلي شالج

فرح//مو تخرب التسريحه

  هز. راسه //لا ما تخرب عدلي

عوجت حلگها من طلعن بقه ايباوعلي انا دنكت ما حچييت هو اتقرب من بيبي وحاجاها

- - جده لاتزعلين هاي حال الدنيا والعتب مو على بناتنا العتب على بتج الما خلت احترام الاخوها وابنه ومرته

بيبي ما ردت وشفتها شلون مدنكه ومقهوره رد ت // صحيح العتب على بتي الي ما مسويه اعتبار الاي احد

طلع بهاء حاجيته = بهاء

دار عليه اني كتله =. حباب دير بالك على علووش

ابتسم ورد //. لا تخافيين علاوي وياي

بقيت كاعده شويه يم بيبي الي اتمددت وخلت شيلتها على وجهها عرفتها تريد اتنام واني هماتين اتمددت وحاولت انام

لكن ما كدرت طلعت من الغرفه وبقيت بالصاله بعدها رحت للترك ومناك رحت للمطبخ البراني الي من يجون خطار

هوااي يصير الطبخ بي الصراحه اني كل هاي الفتره ما داخلته بس من بره اشوفه

دخلت كان كلش كبير باوعت شفت البريمزات

متجايات ومن طلعت من الباب الثاني الي يطل على مزارعهم لكيت الجدوره الكبار ويمهن المناسف وبداخل

واحد من الجدوره خالين الصحون الزغار وطوس المرك والخواشيك

اخذت الزاهي والجلافات وقررت اغسل المواعين او الي اگدر اغسله اول مره غسلت الصحون الي بداخل الجدر

والخواشيك وبعدها بديت بالمناسف كانن كبار وبيهن عراوي وقاعده وبصراحه اول مره اشوف مناسف بهالكبر

وچانن ثكيلات لان بهاي الشهرين صحيح عمو سوا ثواب الامي واخويه ومرتين كالو عدنا خطار لكن ابد اني ما عبرت

ولا شفت المطبخ البراني اله اليوم هنه كانن اربع مناسف كبار اني جلفتهن وغسلتهن وهسه اتكولون شلون غسلتيهن

لان شفت حنفيه بره بيها صونده ورحت فتحتها وصرت اغسل بالجدوره ورغم كانن كبار لكن صرت اجلف واشطف

واني ماخذني الواهس مي وزاهي ومكان واسع ولان الكاع طين فما اوصف الكم الوضع يعني غسلت الصحون

والمناسف والجدوره

لكن اتدمرت طين وكل ما احاول اغسل رجليه ينتلفن بالزايد حاولت اصعد الدچه مالت المطبخ وهنالان الدجه كاشي

والگاع طين زلگت بقوه بحيث الزلكه اخذتني لبعيد بالوحل وصارن ملابسي وكلي طين ما عرفت شلون اگوم كل

ما احاول اوكف رجلي تزحلك حاولت حتى ازحف بدون فائده ازحف ويزحلكني الطين مره لاخ وادري

محد راح يسمعني لو شما اعيط لكن عيطت = بيبي الحكيلي

حسيت راح انتهي صرت اصيح بعلو صوتي = الحكوني انقذوني

بس ماكو فائده اصلا محد راح يسمعني ولا احد راح يمر منا لان هذا بيت وبداخل بستان بقيت احاول واحاول بدون فائده

وماي الصونده يصب بالكاع بحيث زاد الطين بردت وصرت ارجف رغم صيف بس لان الماي كان بارد ويا الطين

واني واكعه على وجهي الي رافعته عن الطين حتى ما اختنك عرفت محد راح ينقذني بحيث تعبت حييل واديه تعبن

لان احاول ارفع بيهن جسمي اما رجليه فما اشوفهن عرفت انو اني اذا ابقى هالشكل راح انتهي اموت اتصور طين وماي

ما اعرف اوصف الشي الي اني بي جاي اجاهد اطلع لكن بدون فاىده الكم تتخيلون. المنظر

آيست صار گدام عيوني علي اخويه واتخايلته يشوفني بهذا المنظر شي مثل الحلم اجه بهاء اجه يركض وهو يعيط

وجداان وينج وجدان اسمعيني

رديت واني گوه احجي = هياتني بهاء اني ايهنا

///////////////////////////

فتحت عيوني ولگيت روحي بالغرفه وبلاعيمي مطبكات وعمي عاصف متمدد بالكاع على دوشك ما اعرف بيش الساعه

وريكي يابس اريد اشرب ماي ما اكدر احرك جسمي حچييت بتعب = بيبي مي

سمعت صوت عمو عاصف :: هاج بابا اشربي

ما گدرت انهض جاوبته بتعب = بابا تعبانه

اتقرب مني وسندني وكال :: اشربي

شربت ماي هو رجعني على جربايتي وخله ايده على كصتي :: انا اخو بدر البنيه كابه ناار

بيبي // ها يمه

:: يمه البنيه مصخنه نار كابه

- شني تاخذها هسه للمستشفى

:: مو ضربوها ابره من ناخذها شيسوولها باجر اخذها على احسابي

بيبي // دروح نام ومن اصبح افلح

:: شنام هاي البنيه كلساع تريد ماي

بيبي // انا يمها

  :: يمه انتي منيلج الحيل

بيبي بتعب // ااخ يمه هي الهبطه شخلت بيه كلت اله ركضن وراها الجلاب وخافت منهن وذبت روحها بالشط وغركت

الفصل الرابع والعشرون من هنا 

شكرا لزيارتكم عالم روايات سكيرهوم