رواية قصة وجدان الفصل الرابع والعشرون 24 بقلم انين الليل

مثل الحلم شالني واني دااحس بدگات گلبه وبيبي تساله // وك جده شبيها الفرخه

  - ما بيها شي زالكه

فتحت عيوني ولگيت روحي نايمه بالغرفه على فراشي وبلاعيمي مطبكات باوعت لابسه دشداشه عريضه مو دشداشتي

حاولت اركز شفت عمو عاصف متمدد بالكاع على دوشك على صفحته ،ما اعرف بيش الساعه وريكي يابس اريد

اشرب ماي ما اكدر احرك جسمي من كد التعب حچييت بتعب = بيبي مي

اتصور كام عمي عاصف وجابلي ماي من يم ميز بيبي وكلي ::هاج بابا اشربي

ما گدرت انهض جاوبته بتعب = بابا تعبانه

اتقرب مني وسندني وكال :: شو اكعدي واشربي

شربت الماي واني احس بنار بكل جسمي هو خلاني على فراشي واتحسس كصتي ::انا اخو بدر البنيه كابه ناار

بيبي // ها يمه

:: يمه البنيه مصخنه نار كابه

شني تاخذها هسه للمستشفى

:: مو اخذناها وضربوها ابره باجر اخذها للطبيب

   بيبي // دروح نام ومن اصبح افلح

:: شنام هاي البنيه كلساع تريد ماي ومصخنه

     انا يمها

::يمه انتي منيلج الحيل

   بيبي // ااخ يمه هي الهبطه شخلت بيه كلت اله حافنها الجلاب وغركت وانوب من جابها بهاء وهو شايلها لدالي ماتت

هالطحت وما دريت بروحي اله لمن رديتني من المستشفى

:: حجيه بوكتها ردت انجلط من خابرني وكلي جدتي ارتفع عدها السكر كل ظني مخابر امه وجايتج انوب من دخلت

للبيت ولگيتج انتي طايحه والبنيه طايحه ما دريت شسوي خليتجن بالسياره واخذتجن للمستشفى بهاء يحوگل بيج وانا

شايل وجدان 

بيبي // اي يمه الله ستر چا صرنا سالفه

:: همزين خابرتي

    بيبي // يمه الله لا يراويك صار بيه فلم من كعدت ما لكيتها بالحجره صحت عليها لدالي بالهول صحت صحت

ماكو طلعت ما لكيتها خايبه جده شو تعاي ماكو طلعت بالحديقه جده وين رحتي انوب حتى فوك بيه لا بيه صعدت

حسيت كلبي وكف مامش الفرخه ما الها اثر ظليت ارعش من الخوف كلت اله طلعت للبستان وهي تخاف من الجلاب

تكرم نبحن عليها خافت وشردت منهن وطاحت بالنهر وغركت خابرت بهاء گلت انت گاعد ويه الزلم ما يصير اخابرك 

يمه وعساك لا اشوفها من جابها شايلها گلت الفرخه ماتت

:: ياهو دخلها للحمام

   اتحسرت / /. ااه يمه دخلتها انا ويا بثوبها جوه الماي وانوب جابها للحجره وذبيت هدومها انا چا شلدالك

:: ما لدالي شي انتي تدرين بالحجي اليصير

   - ادري يمه وشني بهاء راح يسفر ويحجي فرخه ما شايفه طين وزلگت عجبه

:: لا مو عجبه والكتلني هذا مهيدي اخابره اگله بساع جيب النسوان وتعال يكلي جايلك وهو كاعد يدك سوالف وضحك

وياهن ولا يكبر ولا تصيرله چاره

    بيبي // يمه شتسويله هذا حد معرفته

:: كل شي يعرف حجيه بس الخاتون متلوهته

صار ينفخ بيبي سالته // وين رايح

::بالهول ادخنلي جكاره

  • روح نام بحجرتك هي هسه نامت

::لا اتمدد بالهول.

    بيبي // احنه ابختك هي غير حجرتك بيناتنا بس هالحايط

::مي خالف انتي تعبانه وذنيج حسابهن عسير

    بيبي // عاصف على كيفك مو وكتها عوفهن رووح ارتاحلك شويه

:: اي انام بالهول وكل شويه اجي اشوفجن

تستمر القصة أدناه

حسيت بي طلع واحس بالحراره كسرت اعظامي صرت مره ازيح الغطا عني ومره ابرد وعمو كل شويه يجي

يتحسس كصتي ومرتين خلالي كمادات ومن تخف شويه حرارتي يطلع للهول

بيبي نامت وعمو كعدها للصلا واني ما گدرت اكعد الصخونه بيها وما تكثر عليه اتقرب مني واتحسس كصتي كنت

صاحيه فاتحه عيوني هو سالني ::اشلونج هسه

باوعتله وجاوبته بتعب = راسي وكل جسمي يوجعني

خليت ايدي على كصتي وصرت اضغط من كد الالم واكول = ااه

عمو لزمها وصار يضغط عليها واني متوجعه

يمكن من گد ما مرغها الي هدئت اشويه ونمت صحيت على صوت عمو ورجاء وهي اتكله

وهي مني كاللها تغسل الجدوره وتصير نادره

:: انا على غسل الجدوره لو عليج انتي وبتج من اجيتن ما كلفتن حالجن اتمرن وتشوفنها

رجاء // وشمدريني بيها تالي من كالي بهاء عبالي بس زالكه كلت الصبح اجي اشوفها واحنه هم تعبانات

:: حگجن تعبانات من الركص

   رجاء // خلف الله عليك اتعيرنه

:: هو العتب مو عليجن بس المن احجي

فرح // هسه بابا ما صار شي كلنه نصخن ونصير زينين

:: هاا هالشكل اتصيرين زينه

رجاء//اگلك عاصف تره مهدي هم عمها ومرته وبناته ما شاالله خلي ايخدمنها

:: شني طالبه منجن خدمه البنيه مريضه والاصول تجين انتي وبتج تنامن يمها اتشوفنها مو مخلياتها يم مره عجوز

وسكرها مرتفع ياساعه تنجلط

     رجاء // ما ندري اجينه بالليل لدالنه نايمات شمدرينه

:: ما كدرتي تفوتي اتشوفين المره الجبيره خاف محتاجه شي

    رجاء // نسينه عاصف اعذرنا منا وهيج كل ما نطلع ونرد انمر انا وبتي انقدم فروض الطاعه امشي ولج خلي انسوي

ريوك للمسعدات.

اجه للغرفه وهو ينفخ بيبي تكله //. عوفها يمه

::هسه هاي من اطيح حظها احد يلومني

   بيبي // اسكت يمه عيب من ابنها

::هو انا شكاسر ظهري غير ابنها

- مي خالف يمه هي المره من اوانها كالت مالي شغل لابيها ولا بااخوها

:مو سمعتها شلون تحجي وياج

    - ما نشاده بيها وادري ليش تسوي هيج بس انا ساكته ما اريد تصيرمشاكل وتطيح براس هاي المسكينه

:: بت مره التگرب عليها اله انسيها حليب امها الرضعته

   بيبي // على كيفك ويه روحك انت من اجيت وانت داعي بارود دا تعال اكعد وسمي بالرحمن

نفخ :: استغفر الله حجيه من خابرني بهاء ما دريت شسوي انوب اجيت ولگيتج طايحه والبنيه هم اتخبلت

  بيبي // اي يمه چا منين طحت لدالي ماتت

  :: وهالتصرفات

     بيبي //. انت من اجيت من الخطبه وانت ما ادري شبيك باالله ما تسولفلي شصار

:: خلي ابرد شويه ما الي خلك السوالف

      بيبي // تروح ارتاح بحجرتك البارحه انشلع كلبك من نومة البره

:: لا يمه شبيها نومتي قابل نايم بره لو ع الگاع لو كاتلني البرد

         سمعت صوت الجداحه وبيبي اتكله // هسه فك ريكك تالي عود احرك جكاير

حجى بهدوء :: هم شفتيها شلونها ،

    - هالصخونه ما فكتها

:: شتفكها رحمه الاهلج اذا تلث ساعات وهي بالطين اخذها للطبيب العصر

    - هسه ما تاخذها للمستشفى

:: شيطيها المستشفى مو البارحه اخذناها ما سوالها شي العصر اخذها الاخصائي

         بيبي // تخابرمن ؟

:: الو. اشلونج اموله

:: الله يسلمج بخير هاي كاعده يمي

:: اكلج ام غانم تعالينه اليوم

:: ماكو شي هسه اذا تكدرين

:: ما صاير شي وداعتج بس اريد اخذ وجدان للطبيب

:: امس من احنه بالخطبه زالگه وطايحه بالطين وهسه حييل مصخنه

:: اي الطبيب اخصائي واريدج تمشين ويانه

:: ما يامر عليج ظالم

:: وره الغدا اجي اخذج

::: خوش بس مو تتعطلين

:::هلا بيج يوصل

:: اي انا اكللها

بيبي // ها يمه ليش خابرت امل

:: حجيه تاخذ البت وياي للطبيب

- ليش مو رجاء ؟

:: لا عمتها احسن

     - بكيفك يمه

حسيت ان الجو مشحون وسمعت صوت الاستكان يعني جابولهم الريوك صارو ياكلون وهمه. ساكتين بيبي كالت العمه رجاء

جيبيلي كوب حليب. دافي

جابته وهي ساكته اتقربت بيبي مني وهي اتكلي // شو حبوبه اگعدي شو فكي عيونج

درت وجهي هي مدت ايدها على كصتي وكالت // يمه عاصف الفرخه گابه نار شو ياجده اكعدي اشربي شويه حليب

دفي معدتج

هزيت. راسي وغمضت لن ماعندي قابليه حتى احجي

   عاصف :: خليها يمه

  بيبي // شني اخليها لاماكله ولا شاربه من امس الظهر

:: بهاي الصخونه تكدر تاكل تشرب احنه ابختج

   - ادري يمه بس لازم اتشد حيلها الصخونه من الواحد يناملها تنام علي وما تهده

:: حجيه. البنيه مو بس صخونه ما شفتيها البارحه كلساع تتفزز

    - خافنها ما تحمل تظل للعصر

:: تحمل يمه بس خلي نطيح الها بالكمادات

گام ورجع وصار يخليلي كمادات بيبي گالتله //اطيني يمه انت تعبت

:: لا هذا هو بعد شويه وارجع اسويلها

بيبي //. وين رايح

:: طالع شويه وارجع

مرت فتره واني نفس الشي نايمه على صفحتي بس ما غافيه سمعت صوت بهاء // جده

فوت

صباح الخير

هلا بيك

اشلونها

بعدهي كابه نار وكل ساع انسويلها كمادات

وانتي شلون صرتي

مالي لون من هبطة امس

الله يساعدج

عمك شفته

اي بالمضيف ومبين عصبي ما يتحاجى

خلي براحته

هسه وجدان ما اكلت شي

ابد بس شويه ماي

جا ليش ساكتين عليها خلي ناخذها للمستشفى

العصر عمك ياخذها

رن تلفونه /$ الو

هسه جايلك

بيبي // ها جده

جماعه جايين علينه

الله يرزقكم

يمكن بيبي طلعت وطفت الگلوب واني متمدده ما اعرف شكد مره انام ومره اصحى بعدها انفتح الضوه وسمعت صوت

عمه امل وهي اتكلي // شو عمه احبيبه اكعدي وشدي حيلج

   خلت ايدها على كصتي // يا يمه البنيه داعيه نار كبره

    بيبي // اي يمه مكروده چا راحت بيها

امل // اسم الله عليها

اجت نهاد وباوست عمتي امل وبيبي اتگلها // اليوم ما بينتي

اي عمه تعبانين من امس

حگج

عمه شو مالج خلك

ليش ابني ما گلج مرتفع عدي السكر

عمه ما نشدته بس وصلت نمت ما دريت بروحي شو هسه محمد ايكل الابو وجدان طايحه ما ادري شني وماخذينها للمستشفى

امل //. يا هاي انتي الخطوتين عنهم ما تدرين شصاير

  نهاد // خيه امس التهينه الصبح خطار وغدا والعصر رحنا البيت سعده وكضت بينه للعشا رجعنا تعبانين ما ندري بروحنا

   امل // اي هم صدك

  نهاد // فاتتج ام غانم ذيج الونسه واللمه الحلوه

    امل // عليكم بالعافيه

    نهاد // وصدك وجدان طايحه ؟

  امل // اي مو هلتشوفينها

   نهاد // خطيه عود خليناها يم جدتها اتدير بالها انوب المره جا ماتت من وراها

بيبي //. لا ما خليتيها هي ما تروح بنيه حزينه

نهاد // چا عمه محد منعها ما تروح

بيبي // هي منعت روحها عمن الرايح الها مو طير دجاج

    امل // اگلج يمه هي شلون طاحت

  بيبي // راحت للمطبخ البراني وشافت المواعين والجدوره ثاري متشكله وفاكه الصونده وصايره تغسل وتجلف من كملت زلگت

من الدچه للطين ما عارفه شلون اتطلع روحها

اتقربت مني عمتي امل ونشغت //. يايمممه شوفي شصاير بديها متزلغه من الكاع

بيبي // اي يمه لكيتها شويه و تنتهي بس ربج شفك انوب انا لدالي ماتت لطمت على وجهي وارتفع عدي السكر

   امل // وهسه اشلونج

احسن على الله

نهاد // وانتي من سمعتي اجيتي

    امل. //. انا منين سمعت عاصف خابرني حتى ناخذها للطبيب

عمه رجاء // ركض خابرج لو انا لو بتي ما يكلف خاطره يگول اشلونهن ما لونهن

امل //. شلج بيها هاي رجاء عاصف صدك ما ياخذ احد للطبيب بس امي ياخذها من تطيح بس عليج الله بيوم اتمرض احد

بيكم من زغيركم لجبيركم ما انطا فلوس وتروحون الاحسن طبيب

نهاد //. يا رجوه هم تحجين على عاصف امس ما نزل عينه عنج عبالك اول مره يشوفج

بيبي باستهزاء //. ياهو هذا عاصف

  نهاد // اي عمه غير جابته سعده وسلم ع الجايات ويباوع الرجاء وهو صافن عليها

امل // الله يديم المحبه

نهاد // فاتتج اموله ليش ما اجيتي

  امل // المن اجي

    نهاد // الخطبة ابن اختج هم كدام الناس وانتي خالته

     امل // لا انا ما اروح

   

نهاد // وليش غير. هي فرحتنا كلنه

    امل // فرحتنا نهاد تره احنه ما رايحلنه طير دجاج اخوي صارله ست. تشهر ومرته وابنه صارالهم شهرين

   نهاد // يا اليسمعج ايكول اخوج يوميه. يصابح ويماسي وينشد عليج

  امل // لا ما يصابح ولا يماسي بس الاصول اصول بعد هسه اتبدل الاصول ما ادري

سمعت صوت عاصف :: هاي شلون اتبدل الاصول

  امل // هله خويه الله يساعدك

:: هلا بيج ام غانم شنو هذا التبدل

بيبي //. يمه هسه احنه نظل بالسوالف الماصخه اخذو البت للطبيب

:: ياالله راح اغير هدومي وانتي بدليلها بالعجل

   امل // صار يمه وين هدومها

 

نهاد //. الله يساعده ابو فرح مره ياخذ الفرخ الزغير لطبيب ابغداد وومره يروح للمسجون وهسه محتار بهاي البت

بيبي //. الله يسلم رجلج ايساعد بااخو ليش ذاب كل شي علي

نهاد //. عمه انا شكلت وانتي لديتيني على حلكي

- انتي حامله هم ابن عمج عاصف وانا حجيت على ابني شني قابل انتي مانعته يجي ويعاونه

امل // وين الكى اهدومها بالكنتور

بيبي // مكروده حتى ما لحكت اتصفط اهدومها بي بعدهن بالبوفيه ياالله انتي بدلي البت اخوج بساع سمعتي كالج بالعجل

امل // اي يمه اطلعن وانا ابدل الها

اتقربت مني عمه امل //. شو اكعدي خلي ابدلج واخذج للطبيب

فتحت عيوني سالتني //. ترحين للحمام

هزيت رااسي لا لبستني جبه فوك البجامه وخلت على شعري شال وسالتني بيج تمشين

هزيت راسي هي ردت //. شو اكعدي ع الچربايه خلي اشوف عمج وينه

راحت عمتي غابت شويه واجت وهي اتكلي // ياالله كومي

وكفتني وانا مغمضه ما اگدر افتح عيوني وخلت ايدها على ظهري وصارت اتمشيني وصلت للسياره وعمي فاتح الباب

ركبت وعمتي ركبت يمي وصار ايسوق وعمه اتكله // عاصف مو زين هلكد تسحك جكاير

بقى ساكت ما اعرف ليش حسيت بعمي عصبي وصلنه للطبيب عمي گال :: ابقن اهنا خلي اشوف يمته ايدخلنه

بقيت وعمتي تعدل بشالي لمن ما اجه عمي وكللها :: نزليها ام غانم

نزلتني شفت عمي جايب عربانه گعدوني بيها ودخلني ع الطبيب بعد ان سلم علي وصار يحجيله كله صعدها ع السديه

اجه عمي وسالني :: تكدرين تصعدين

هزيت راسي صعدت وعمتي نيمتني واجه الدكتور صار يفحصني فتح حلگي وعيوني وفحص صدري وگلي كحي وانوب ظهري ونفس الشي طلب مني اكح وكتب ورقه لازم اشعه وتحليل دم. واخذني عمو للاشعه والتحليل انتظرته شويه طلع التحليل وانطو الاشعه ورجعنه للطبيب الي شافه وكتبلي علاج ابر وحبوب وشراب وگله اربع تيام اذا ما تحسنت نعيد الاشعه والتحاليل واحتمال كلش قوي تنام مستشفى وهسه تاخذوها تعلكولها مغذي ويا هاي الابره ولازم تاكل زين وكثرو سوائل

اخذني هو وعمتي للمضمده الي نيمتني وعلكتلي مغذي تقريبا ساعه اله ربع كمل وايضا زرقتني ابره بالعضله

رجعنا للبيت اخذوني للغرفه عمتي راحت تسويلي شوربه وعصير وبيبي صارت تضغط على كصتي وعمو كعد بالصاله

عمه امل وكلتني شوربه وشربتني عصير ما اكلت شويه لان ما اكدر من بلاعيمي كامت طفت الضوه وسدت الباب

بعد ان غطتني سمعت صوت عمي مهدي ويه مرته وبناته بقو ايسولفون ويضحكون حتى ما عرفت شنو سوالفهم

لان دايخه ويمكن نمت

حسيت بيهم اجو يمي بعد ان دخلت عمتي واتحسست كصتي وعدلت غطاي وگالت // فوت عاصف

يمكن كعد ع الجربايه وبيبي اتعاتب بي // مو هالشكل ويه اخوك

:: يمه شسويتله

ما انطيته وجه

:: عاد هو كلش خطيه شنو بعينه بحاجبه

   بيبي // بعد شنسوي هذا حد عرفه

عمه امل // والله يمه هذا مهدي لو ماكاظه عاصف جا شفتي هسه شنوه

    بيبي // بعد هذا حظي ما الي بالولد

امل // لا يمه بس جبتيله نهاد حيه تگرص وتضم راسها

    • لا تسمعج اختها

  امل // وخلي تسمع انا مكابلتها اكثر من مره وكايلتلها كل هذا البي مهدي من جوه راسج

   بيبي // ونهاد سكتت لج

  - اي سكتت من لمن اجه الابو غانم وگله مشتريلي اتريلتين ومحتاج فلوس وعاصف ما كو جوه ايده وتالي ما ادري وين وداهن وعاصف خسرهن

   بيبي // هنه بس ذني مصايبه هواي هذا حد فهمه شنسويله يابتي

امل // عود صدك عاصف شلونها الخطبه

:: شلونها خطبه عاديه

  امل // چا شو تگول نهوده جاي تسلم ع النسوان وظال وصافن

تستمر القصة أدناه

بيبي //. امل

• شكلت يمه سالت عاصف ليش من مسلم ع النسوان صافن

:: عليمن صافن شني ماكل لحم حمير بالمثل

  امل // لا صدك سولفلي

:: شسولف ردت اجي بس قرو الفاتحه بس نسيبج ادندح واله تتعشون

    بيبي // وشني هاي الصفنه من داخل اتسلم

:: اتعجبت من اختي التوه اخوها ميت ورا ابن اخوها ومرته

   بيبي // ها شسوت ؟

:: وداعتج لزمتني من ايدي تعال خويه سلم على اهل البنيه خلي يشوفن خاله

رحت وهيه الهلاهل والهوسات والركص هسه گلت رجاء ونهاد بنات عمهم ولو السونه عيب بس هاي اخته شتكول

علينه الناس دك وركص عاد سولي احترام كوه لزمت نفسي وسكتت

   بيبي // اي يمه سعاد عنوديه. من يومها

:: تره هي مو احسن من سعدي ما تختلف عنه نفس الشي

   بيبي // اي يابني كلمن. وذاته

امل // حجيه لا تهتميين

  بيبي بحسره // ما دام عاصف سالم ما اهتم

امل // عا صف الله يخلي رافع راسنا ومخلينه هيبه واله لو ترد على مهدي سوده مصخمه

:: ما مسوي شي ام. غانم

   امل // كل هذا وما مسوي چا بعد شتسوي

:: المهم امي ترضى عليه.

  بيبي // راضيه وادعيلك الله يوفقك ويهدي بالك

:: هاي كلش كافي دعائج عدي بالدنيا لا تضوجين يمه

   بيبي // حكي يابني لا تلومني اهم بهاي المسكينه واخوها

:: الهم الله

امل // يمه ما طول انتي سالمه وعمهم فوك راسهم همه بخير وما عليهم شي

اتقربت عمتي امل ولزمت كصتي وكالت // الحمد لله فكتها الصخونه اگعدها

:: لا خليها نايمه ترتاح

امل // انا من شفت اديها ورجليها من. يمي خفت

   بيبي // بينه بخت يمه

   امل // اللهسه الطين. باظافرها بس هي هم صوجها منو گايللها تروح وتتشكل وتغسل الجدوره

    بيبي // رادت تصير شمدريها البنيه فطنه وتستحي

     امل // تحبينها يمه ؟

   بيبي // ما مسويه شي مگروده اشافت بدنياها صدمه. ورا الثانيه ويادموعها من تسمعني انعى

   امل // خطيه

بيبي // عود تكسر خاطري واسكت هنوب ازيدن بالنواعي والبچي

فركت. كصتي وفكيت عيوني وشافتني عمتي // ها عمه

باوعت بعيوني شفت عمي عاصف وبيبي گاعدين ع الجربايه عمتي عدلت شالي وشاورتني // ترحين للحمام

هزيت راسي هي ساعدتني اخذتني للحمام من طلعت غسلت بالمغسله وانا اباوع الاديه شلون مزلغات

عمتي اتقربت عليه // ها حبيبتي تگعدين شويه بالهول

هزيت راسي بتعب

عمتي لزمتني ودخلت للغرفه بيبي سالتني // شلونج حبوبه

رديت اتفاجىت بصوتي مبحوح = الحمد لله

   بيبي // نعمه من فكتج الصخونه

:: الحمد لله خلي يجيبولج شي تاكلينه وينچن

= لا عمو ما اشتهي

:: مشتهيه شي اجيبلج

هزيت راسي بالنفي امل كالت // راح اسويلها عصير برتقال

:: اكعدي هنه وين الخواتين

  امل // عاصف خويه انا راح اشرب ماي واسوي بدربي

امل طلعت وبيبي اتكله // على كيفك اليوم تعارك ذبان وجهك

هو طلع وانا بقيت بيبي سالتني // بعده راسج يوجعج

= اي وكل جسمي

اتمددي واتغطي

اتمددت على صفتحي بعد ان خليت ايدي جوه خدي لكن الم جسمي ورجليه بالذات خلاني اتحرك والظاهر بيبي

تباوعلي سالتني جده موجوعه

= اي جسمي كوليته ورجليه حييل دا ياذني

اجت عمتي امل وهي جايبه كلاصين عصير خلت واحد البيبي وجابتلي گلاص بيبي كالت

يمه شلي بي بهالليل

مي خالف انتي حتى ما اتعشيتي ياالله عمه اككعدي

تكول رجليها يوجعنها

من الصخونه يمه

اتقربت عليه وسندتني وهي تكلي شدي حيلج شو اكعدي اشربي

شربتني العصير ورجعتني اتمدد وصارت تضغط على رجليه وبيبي طلعت من الجراره عصاره وحاچت عمتي

هاج يمه فرچيها بهاي العصاره كلش خووش

ياهو جايبها الج

ياهو عشتو يجيبها غير عاصف

يمه تره بهاء بي البركه حتى عيالي ايگولون خوش ولد

اي بهاء الله يحفظه ما يقصر اله انا ما اگله يجيبلي شي

وليش عود

اشبيب وما اريد اكلفه ما طول عاصف سالم ما اكلف احد غيره

الله ايحفظه

  بيبي // اكلج شو من رحتي للمطبخ اتعطلتي وعاصف وين راح

  امل // ماكو شي

   بيبي // شني ماكو شي عاصف لحگج مغضب

يمه ماكو شي رادني اسويله كلاص عصير

عود شني اتضميين عليه ما اعرفه

تالي يمه تالي

سمعت صوت بهاء وهو ايگول // جده

طلعت عمتي امل هلا. عمه

اشلونها البنيه

شويه احسن

فكتها الصخونه

مو كلش بس اهون.

محتاجات شي اجيبلچن

لا يابعد عماتي عساك سالم

شوفي. حبوبتي

لا ما معتازه بس سلامتك

  امل // ليش ضايج

لا شبيه

مبين من وجهك

تعبان عمه من الصبح الهسه واكف على رجليه

الله يرزقك عمه

رحم الله والديج الصبح اروح للولايه اجيب گيمر

بعد گلبي احبيب رووح اسبح وغير هدومك انت تعبان

  من راح امل تحجي ويه بيبي // اجه ينشد على وجدان

بي الخير احسن من امه واخته

صارت. تشاوو باامها وبيبي اتگلها نامت احجي حييل

يمته نامت يمه ؟

بيبي // ما تشوفينها ما الها خلك روحها شني شبي عاصف ايصيح

يمه على رجاء وبته راد يكفر بيهن

  بيبي // هو. من اجه من امس وعيونه بگصته شوف شكو وشيريد منهن

تحچي بهمس لكن اسمعها /. يمه ايگول شبيها ما مرت على البنيه وتشوفها وتنشدها خاف محتاجه شي شيتين

بيبي // شني. ايغشم روحه من اول ما اجت گالتلي وگالتله لا انا ولا بتي النه غرض ابت سعدي

  امل // حتى لو يمه هاي يتيمه ومريضه بس ما ادري شني كره رجاء السعدي وارد واگول انتي وابوي الله يرحمه

كبرتو راسها مثل ما كبرتو راس سعاد

بيبي // هي من عاصف جاب الفرخه وگفت وكالتله حتى ما استحت مني انا.

  امل // شكالت يمه ؟

بيبي // گالتله مالي غرض لا بالبت ولا بخوها وهو رد عليها گلها. اذا ما تردينها اخذي بتج وروحي الذاك البيت بس

هي ما رضت

امل // وشني تريد اتمشي كلامها علينه كافي يمه شو اول مره شتريد صار عمه خلي مهدي ياخذ نهاد وهي اكبر بخمس

سنين ما ادري بيش واختي وفقيره وذيج نهاد هلخلت مهدي. طلي لافهم ولا علم وانوب ابوها راد. ايعرسلها وخاف تاخذ الولد

جبرتو عاصف ياخذها وشني الفايده من شفته وشافني هو بحجره وهي بحجره انوب تريد اترم علينه ما نخلي بت سعدي

وابنه عدنا بكيفها شني

بيبي // يمه هو ياهو شادلها راس

امل // اي محد بس ما تحتم. هذا بيت ابونه والبنيه لو ماصار الصار ياهو شايفها لو ياهو ايعرفها بس على گولة عاصف

صارت امر واقع خو. ما انذبها هاي دمنا ولحمنا وانتي هلتگولين ما بيها اذيه

بيبي // لا ما بيها اذيه لاهي ولا اخوها

عرفت بان عمه رجاء ما تريدني وانو احساسي بمكانه واي شي تسوي هو تمثيل لكن ليش ما تريدني وليش هلگد ايكرهوني

نمت وحسيت على بيبي وهي اتصلي فتحت عيوني وشفتها اتصلي وگفت ورحت للحمام اتوضيت واجيت اصلي رغم

من وگفت دخت لكن غمضت عيوني وصرت اصلي وبعد ان انتهيت من الفرض صليت مال امس قضاء ومن كملت

بيبي تگلي // عفيه بابنيتي الله. يرضى عليج شو. امل اكعدي وصلي

اي يمه هلكعدت

اتمددت وغفيت ما حسيت اله على دكة الباب عمتي فتحته صوت بهاء // شني الهسه نايمات

هلا عمه

ياالله اكعدن. شلون جبت كيمر يستاهل حلكج

ليش اتكلف روحك

ماكو كلافه ياالله. خلي حبوبتي تكعد

اجت عمتي يمي // ها كعدتي

وانا اتثاوب هزيت راسي وسالت = بيش الساعه.

بالتسعه كومي ياروحي خلي نتريك

انفتح الباب واجت عمه رجاء وهي اتكول شني اليوم الهسه ما كاعده ومتريكه

اي البارحه ما نمنا

ياالله عمه هذا ريوكجن

عاصف وين

ما. شفته كعدت هو ماكو

خاف بحجرته

لا دكيت الباب ما جاوب ولكيتها مقفوله

يالله جده بيج تنزلين

عمتي امل وين بيها هاج عمه هاي صمون وگيمر اكلي واشربي الجاي دفي معدتج

باوعت شفت علاوي بعده نايم عمتي امل // خلي نايم انا اخليله ريوك انتي اكلي

اجت نهاد // صباح الخير

الكل رد سالني // ها اشلونج اليوم

جاوبتها /= الحمد لله. احسن

حسها رايح

اي من گد ما مصيحه ومحد چان اهنا

اي خطيه هي ما فاتلها

شني

الجربايه وميز الاكل همه جابو منا. هي طاحت منا حتى ما تهنت تاكل علي

فرت ايدها امل باستهزاء // شني ماجرينه اليوم تصير زينه وترجع تاكل ع الميز

رجاء// شبيها هجيره

نهاد // هاي بطرانه

ليش

تريدلها ميز وكراسي مثلكم

چا ما تشترون نمونه

منين نشتري اذا مو توقيع

الكل باوع الها هي غيرت الكلام // كامت عليها سويره كطعتها اتكطع

ليش

اتكلها لاتصيرين. غياره وتباعين للناس عدنا انحط ما عدنا ما انجدي

رجاء // عفيه عليها ساره سباعيه.

سمعت صوت مره وهي اتگول // وينكم ام بهاء

تعاي هلا بيج

امل. ياهي

سميره مرت جابر

هلا بيج ام مصطفى

باوست عمتي امل. وبيبيتي طاحت على راسها وباوست نهاد ورجاء واتدنت يمي // اشلونج خاله

الحمد لله

توه. كالي جابر ما دريت ثاري طايحه واحنه بالخطبه

اي

بعد. ردينه بالليل نمنا وامس الصبح التهيت هسه گالي شني شخذج

  امل //. بعد رادت اتصير

نهاد باستهزاء //. عود صارت. نادره كايمه ع الجدوره وتغسلهن ثاري ما تدري زالكه بالطين

امل //. لا هي نادره غاسله كل مواعين العزيمه ومو بس الجدوره

  سميره // صدك ؟

  امل // اي صدك وذاك الغسل والجلف والنظافه

  نهاد // جا احنه ما نعرف نغسلهن

   امل // اتعرفن ونظيفات ومعدلات بس انتي اتمهزيتي بالبنيه. عود تريد تصير نادره گتلج التسوي هيج

ومحد گايللها نادره

   نهاد // وشحصلت هلديها مزلغات ورجليها وجا ماتت

  سميره // الحمد لله على سلامتج حبيبتي

  رديت = الله يسلمج

تستمر القصة أدناه

  بيبي شالت استكان جاي // هاج اشربي واتريگي

لا عمه متريكه

مي خالف اكليلج لكمه

وصارت تاكل ورن تلفون عمتي امل ردت

ها يمه

هسه

بكيفك تعالي

بيبي سالتها // شني ترحين

اي يمه تدرين بعد

نهاد // كلنه ندري ابو غانم ما يفاركج

ما ردت عليها سالتني. // ها عمه اروح.

سميره // روحي شعليها عماتها وحبوبتها يمها وهي غادي شرها

هزيت. راسي وابتسمت باوستني عمتي وهي اتكلي // ديري بالج على نفسج ولا تعبين روحج

  = ان شاالله

راحت عمتي وبعدها راحت نهاد ورجاء وسميره اني عبالي راحت كل وحده البيتها لكن وكت الغدا اجن وجابن الصينيه

وحتى سميره اتغدت

العصر كالت بيبي // خلي نطلع شويه انا وياج حتى احرك رجليه

  = بيبي تعبانه

- تگومي حركي رجليج لاتنام عليج الصخونه

وطلعنه للحديقه گعدت يم بيبي ورغم تعبانه بس الهوى النقي والمنظر الحلو خلاني اصير احسن

رحت اتمشى شافني بهاء اجه يبتسم وهو ايكلي

شلونج وجد

هزيت راسي = الحمد لله

اه صوتج رايح

ما جاوبته رد // الحمد صرتي احسن ما تدرين شكد خفت عليج

  = شكرا

- لا تشكريني انتي ...تدرين شصار بيه من خابرتني جدتي وكالت انتي ماكو ما تعرفين شصار سقت السياره وانا

ما اشوف ومن گد السرعه ردت انكلب واطيح بالبزل

فتحت عيوني باستغراب //ما تعرفين البزل

هزيت راسي هو جاوبني /= البزل الماي المالح

بقى ساكت بعدها اتنفس بعمق // من اجيت الحبوبتي وشلون لكيتها متخبله عليج وهي اتكلي جده البنيه ماكو

رحت دورت عليج بالبيت وحبوبتي اتكلي دورت بكل مكان وماكو ولو تشوفينها شلون تبجي وتگول // بس لا غركت بالنهر

طلعت ادور مثل المخبل وسمعت الماي يجري ومن اجيت وشفتج شلون انتي بالطين شلتج وانا اصيح

لكيتها جده احتاريت شسويلج خليتج بالحمام

حسيت صخنت من جديد بس هالمره خجل هو هز راسه بعدها شلتج بهدومج المبللات وخليتج على جرباية جدتي

وكتلها تطلعلج هدوم وهي تمتحن بيج تالي خابرت عمي عاصف لان حبوبتي اتخربطت

= كله من وراي مو

بهاء // خافت عليج كلنه خفنه عليج خليناجن بالسياره واخذناجن للمستشفى انا محتار بجدتي وعمي عاصف محتار بيج

حكيت خدي وجاوبته = اني اسفه مكنت اقصود ااذيكم

هز راسه // لا انتي ما اذيتينه انتي اذيتي نفسج ماكان لازم تغسلين الجدوره الكبار

= گلت اساعد بالبيت

صار يباوعلي وبعيونه لمعه سالني // تردين شي اجيبلج

هزيت راسي ما حجييت هو رد // وجد ديري بالج على نفسج

  = ان شاالله

سالته = خروفي ماكو

جاوبني بضحكه // چا هذا اليمج منو ( ويأشر على نفسه )

ما رديت هو دخل وجابلي الخروف ويگلي // لا تتعلقين بي هواي اول وتالي نبيعه وينذبح

عكفت كصتي = لا انت شدا تگول

- اي خو ما يبقى العمر كله وياج

  = خطيه عفيه لاتبيعو ولا تذبحو

- بس لا تضوجين وكل شي تردينه يجرالج

اول مره اباوع البهاء وصارت عينه بعيني ما اعرف ليش خجلت من نظرته رجعت يم بيبي لكيتها گاعده ابتسمتلي وكالت

ها حبوبه اشلونج

= احسن الحمد لله

الف الحمد لله والشكر

= بيبي

ها يابيبي

  = اني هواي اعتذر اذيتج وياي بعد ما اعيدها

هزت راسها والحزن ما فاركها

=. بيبي

باوعتلي حاجيتها =. حبابه لا تخليهم يبيعون خروفي

شني

=. خروفي الزغير خطيه لا يبيعو واذا يبعو اني اشتري

هزت ايدها رحعت سالتها = حبابه بيبي

ردت //. لا محد يبيعه شحده

يوميه اكتشف شي جديد بوجودي اهنا عرفت بان رجاء ما تحبني وانو فرح تسمع كلام امها لكن من تشوف ابوها واخوها

تغير موقفها اتجاهي الي سرعان ما يرجع نفس موقف امها مهدي يكرهني ونهاد باقيه بنفاقها وبيبي تحبني اني واخوي

بس ما تبين حبها واحسها تكره ابويه

سعاد تكرهني وتكرهه الامي وابوي وتتمنا تشوفنا بااحوال سيئه

عمو عاصف الحنيه والحب والرزانه والقوه اشوف الكل يهابه ويحسب اله الف احساب مرات اشوفه حنين ومرات احس

كلبه صخر

وصرت اكتشف اشياء جديده ما اعرفها بقيت ويه الكل بمساحه وحده وما احاول اتدخل بااحد ولا اسأل عن اشياء

ما تخصني بقيت بنفس روتيني اخلص شغلي واروح الغرفتي وما اتدخل بيهم كلامي على قدر السلام والجواب

اذا احد سالني وهذا الشي جنبني هواي امور

داىما بيبي من احچي تگلي احجي مثلنه اتعلمي واني احاول احچي بلهجتهم لكن ما ادبرها لذلك كلامي ويه الكل

كلش قليل لان اكثر من مره اشوف ساره وفرح وهاجر يعوجن بحلكهن ويقلدن على كلامي بدون ما يبينن هذا الشي

اخويه هشام كلش اشتاقله لكن ما احجي داىما بالليل اغطي وجهي واتذكر ايامي بوسط اهلي اصير ابچي بسكته

عرفت عمو يروح ايزوره ويجيبلي منه سلام يمكن مرتين خابرني من جهاز عمو

وهو يوصيني ادير بالي على علاوي وعلى نفسي وارجع للمدرسه يحثني ادرس واخذ الشهاده حتى يفتخر بيه

  وبرجوعي للمدرسه راح يبدي فصل جديد من حياتي الي راح اعيشها والي ما متوقعه اعيشها بهالشكل

شكرا لزيارتكم عالم روايات سكيرهوم