رواية رهينة لضباط الفصل الثالث والعشرون 23 بقلم مرج البحر

سُوأد اليّل يبقىٰ

وتطفى الالوان وأعَيد

بذكُرياتك والمشاهْد ....

........

فتحت باب السيارة بسرعه ونزلت اركض صرت بين محمد وسند ولزمت ايد سند وبعدها عن محمد .. وامي نزلت وراي وتحجي وياه محمد بس محمد جنه ما يسمعها وخززر بسند ...

نور... سنددد شتررريد من عددددنه بعددد اختك ورجعتلك بعددد شنوو تريدد

سند.... الاريده كلته لخوج هو يفهمج عليه

درت وجهي ع محمد عاصر ع ايده ودمارات بارزه من العصبيه ..

نور.... محمد

محمد.... انته انسسسان مخننث لو ماا خنثث جااان ما خلييت ثااارك بنسسوان روووح اخذذه من خذه اختك ولعب بيها

سند...... محددد غيرك مخنث ومااا عنددده غيررره هسه يلا عررفت عندك اخت وينك عنهاا بذيج الفتره لو هسسه طلعت مراجلك

محمد.... مراجلي اطلعها ع عدهم رجوله مو عليك

هجم سند ع محمد ومحمد ضربه وسند رجع الضربه اله وصارو يتضااربون ... ارريد ابعدهم عن بعضض ما اكدرر ...

امي تصيح وتدك ع راسهااا اني عفتهم وركضت لبيت صار بوجهي حمزه طالع ...

نور.... حمزه الحك محمد وسند جاي يتعاركون

حمزه.... اااخ سنددد والله درينه ما راح يمشي السالفه ع خير

صاح ع خوانه واني سبقتهم ومحمد وسند متلازمين وصياحهم وفشايرهم بنص الشارع والناس طلعت تباوع محمد كلف نفسه يجي يفاككهم ..

اجو خوان سند وكوه وخروهم عن بعض ومحمد يرجع ويهدد وسند ما يقل عنه ...

محمد.... اتطللك اختييي غصبن عليك مثل ما اختك خللينه ابوي يطلكها انته اطلك اختي ولا النه شغل بيكم ولا الكم شغل بينه

سند.... طلاك ما اطلك ع الاقل اختييي رجععت حاامل بسس اختك بعدددهي مااا حبلت تحبل يلا تجوون تااخذووونها

فتحت عيوني ع وسعهن هذا جاي يحجي درت وجهي عليه مصدومه وامي وياي صفنت .. اخوانه باوعلوه ...

محمد.... بس بحلامك اخليلك اختي بعد تطلكها يعني تطلكهاا ونرفع علييك قضيه

سند.... هذيج المحكمه روح الها واذا هما بيهم خيرر خل يطلكوها مني حتى احررك الدنيا ع راسك وراسهم اختتك مرررتي وطلاك ما طلك

محمد.... تطلك وبييناتنه المحااااكم

صارت الشغله مزامط بين محمد وسند .. واحد متحلف لثاني .. سند شااف الناس ملتمه وتباوع عاااط بيهمم كلمن رجع ع بيته ...

                                            

              

                    

حميده ومروه وام سند طلعن بالباب يباوعن .. وسند ومحمد هرجوو المنطقه هررج بصواتهم ...

سند.... شوف ولك اذا انته ابن ابووك وطالع من ظهر ابوك الكوواد ابن سطعش كواد طلكها حتى لوو جاان بنيتي اطلكها لطلبها الشخصي مني بسس هسه عنااد بيك مااا اطلكها

محمد.... مشكلتك مو ويه اختي ومشكلتك ويه زوج اختك لو بيك خير اخذ حقك منه واني ما طاالع من ضهر ابووي لا انيي طالع من ضهر الدنيا ومرراجلي تربيية مررره

جرراني محمد وصعدني بسيارة وامي صعدت وسند نتر روحه من خوانه ويخوزر بينه .. فوخ كلبي بي محمد رغم واضح سند ما راح يسكت ع اي شي محمد عيونه تطلع شراره ويريد ياكل سند ...

راد محمد يحرك السيارة بس سند منعه ودك ع الجامه محمد تاافف وضل ينافخ ونزل الجامه ..

محمد.... بعد نسييت شيي

سند.... عشر ايام وترجع اختتك واذا ما رجعت لا تلوموني بالراح اسوي ودمكم مهدود

محمد.... رجعه ما ترجع والي تكدر تطوله ايدك سوي ما نخااف بس من الي سوانه وخلقنه وخالنه عايشين

حررك السياارة محمد ومششه بدون ما يسمع رد سند .. حجي سند خوفني لوهله بس رد محمد ريح كلبي وخلاني مطمنه ما راح يصير شي ...

امي بدت تحقق وياي عن معاملتهم وسر اصرار سند ع عدم الطلاك جاوبتها جواب مختصر حتى لا تستمر بالاسئله ... كلتلها جانو زينين وما ادري ليش سند مصر ع بقاءي ...

محمد اخذ الدرب يسب ويلعن بابوي وبالساعه الي عرفنا بيها كل الجاي يصير بينه من وراه هو الي ورطنه وطلع منها سلام ...

اخذت صفنه ع الجامه ساارحه بفكاري لذيج الايام بعد ما تغير سند وصار انسان ثاني ... ويدور رضاي وما يجبرني ع شي ...

فززني صوت محمد هو يحجي وياي ويباوعلي من الجامه جنه بنص الزدحام ...

محمد.... الحلوه وين صافنه وماخذتلها كتر وحدها

نور.... ها لا هيج شويه صفنت

محمد.... لا تفكرين ما راح ترجعين لو يكلفني الامر يكتلوني وما ياخذوج

نور.... اسم الله عليك لا تكول هيج عمرك طويل

محمد.... عمري يرخصلج

ابتسمت وسكتت ورجعت اباوع ع الناس وشوارع خلص الزدحام ومشينه ... وصلنه لبيت من نزلت المن السيارة بقيت صافنه عليه صح بيت سند اكبر من هذا ...

بس الي صدمني اني ادري اهلي ما عدهم هيج فلوس لا يشترون بيت ولا ياجرون ... بعدني صافنه ع المكان ...

ام فاطمه.... يلا نورر يمه تعاي تدخلي

نور... هااا اي اجيت

تمشيت صوبها ومحمد ما دخل نزلنه منا وطلع عنده شغل منا ... فتحت الباب ودخلت واني دخلت وراها .. اجت فااطمه وبنيه يركضن صوب امي اني باوعت ع فاطمه وفاطمه باوعتلي ...

            

              

                    

هيه شاافتني صررخت واني ركضت حضنها وتحاضنه .. هيه تحب عن اشتياقها بالدموع واني اعبر عن اشتياقي بالمعاتب ...

مسحت دموعها اني هم مسحت دموعي ... وامي مخليه حجابها ع وجهه وتبجي ...

بعدت عن فاطمه وخليت عيوني ع البنيه الواكفه وتباوع علينه وهيه مجتفه ايدها وتهز رجلها ...

نور.... منو هاي؟

فاطمه.... اختج سكينه

نور.... سكينه؟

هيه رفعت حاجبها وتباوع ع فاطمه محست غير تقدمت ع فاطمه ودفعتها بيدها ...

سكينه... ترا عندي لسان واكدر احجي وعرف عن نفسي انتي مدخله روحج شكو

فاطمه.... وهسه شحجيت

كطعت حجيهن من حضنت سكينه وسلمت عليها وهيه بادرت بسلام بكل رحابت صدر ...

لاحضتها خزرت فاطمه وامي تسكت فاطمه وفاطمه عكرت وجهه استغربت العداوه الي بينهن ...

كعدنه بالصاله وامي حاضنتني وفاطمه فرحانه وسكينه تبتسم من اباوعلها ومن ادور وجهي عنها احسها تعكر وجهه ...

فاطمه.... بعد ما تروحين مو راح تبقين يمنه

رفعت راسي لامي اريد احد يطمني هذا الكلام لا بد راح يصير اريد اجاوبها بس احس غصه بنص كلبي ..

قبل لا اجاوبها اجانه صوت

محمد.... راح تكابلج وتكعد وين تروح يعني هاي جيتها وبعد ما الها رجعه

فاطمه.... اي والله بعد لا تروح خليها بقه

اجت فاطمه حضنتني واني بتسمت وعيوني راحت ع محمد حجيه طمن امي وفاطمه بس ما طمني لان اعرف سند ما راح يسكت والحجي مو مثل الفعل ..

صعدت فاطمه تحضر الي غرفه وسكينه صاحت عليها امي وراحن ثنينهن ومحمد ما اعرف وين راح بقيت كاعده وحدي ...

وافكر شنو راح يصير بعد بينه رفعت عيوني اباوع ع الحايط صارت عيوني ع صور واكف بيها مجتبى ومحمد وثنينهم ضاحكين ومحمد خال ايده ع متن مجتبى ...

بقيت اتفحص الحيطان بعيوني بس بالي مو يمهن يم سند شنو راح يسوي بعد عشر ايام وليش انطلني عشر ايام ارجع بيهن؟ وليش؟ وليش؟ وليش؟ ...

بالي صار يردد بس كلمت ليش هيج وليش هيج ع ساعة اتخبل ... درت راسي ع حماس فاطمه وهيه تكول ...

فاطمه.... خللصت وغرررفتج جااهزه صعدي ارتاحي وبعدها ورانه سوالف لصبح

ابتسمت وكمت وهيه صعدت تدللين ع الغرفه امشي جسد بلا روح وخوفي وقلقي من سند جان ما مخلي مجال للفرحه ...

حتى بشوفت اهلي حرمني من الفرحه وخله داخلي خوف وتوتر منه من نواياه .. وكفت ع بايات الدرج بعد ما شفت نفسي صرت بطابق الثاني ...

            

              

                    

نور.... يمته اشتريتو هذا البيت ومنين الفلوس؟

فاطمه.... سالفه طويله اسولفها الج من ترتاحين

نور.... واضح صاير وراي هواي سوالف لازم اسمعها؟

فاطمه.... هواي حيل ما راح تصدكين احداثها وبنفس الوقت تنصدمين بحياتنه

نور.... خير ان شاء الله

دخلت لغرفه جانت حلو شكلها عادي مثل اي غرفه كعدت ع الجربايه وفاطمه طلعت .. تنهدت وجريت حسره ...

ليش ربي ما جاي احس بروحي مرتاحه واني بنص اهلي مو هاي الحياة الجنت اتمناها مو جنت اريد اهلي وما اريد شي غيرهم شنو الختلف هسه؟ ..

مشاعري متخربطه ما اعرف شنو اريد ولا شنو ما اريد .. تمددت ع الجربايه بالعرض وركزت عيوني ع السكف الي جان مخليله سقف ثانوي ...

ابتسمت وضحكت بنفس الوقت افتح الباب عدلت كعدتي ودخلت فاطمه شايله بيديها ملابس ..

فاطمه.... عساها دوم الضحكه

نور... حبيبتي فطوم شكرا

فاطمه.... جبتلج ملابس خاف تردين تبدلين وما عندج ملابس

خلتهن ع الجربايه واشترلي ع باب ثاني داخل الغرفه ...

فاطمه.... وهذا حمام اذا تردين تسبحين وترتاحين

نور.... اي هو اريد اسمع انشط جسمي احس اكو كسل صابني

ابتسمت هيه وفأجئتني من باستني من خدي وطلعت تمددت وخليت راسي ع المخده ... وغمضت عيوني .. وتخيلت نفسي بعدني يم سند وهسه شويه وصيح باسمي ...

فتحت عيوني وباوعت ع الغرفه محد يمي .. بعدت الافكار من بالي وكمت اخذت الملابس الجابتهن فاطمه ودخلت لحمام تفحصت من البارد من الحار وفتحت الماي وبديت اسبح ...

ارتخه جسمي من ذبيت عليه الماي وكعدت جوه الدوش والماي ينزل عليه واني مختنكه واريد ابجي بس ليش اريد ابجي ما اعرف وليش مخنوكه وشنو سبب الخنكه هم ما اعرف ...

كمت من جوه الدوش وسبحت ع السريع وطلعت من الحمام ونشفت شعري شلون ما جان ورحت لتلفلفت بالبطانيه ونمت ...

كعدت ع شخص يمشي ايده ع شعري خصله ورا الثانيه .. فتحت عيوني واني بعدني نعسانه ... بتسمت بنعاس من شفته سند كاعد ع الجربايه يمي ..

ابتسمت ودرت عليه وحضنته ونمت واني دافنه راسي بحضنه ... كعدت من انوم واني شبعانه وتمقطت براحه ومبتسمه ...

ركزت ع الغرفه تذكرت اني عد اهلي مو يم سند بس هو البارحه شجابه ...

بهت وجهي البارحه ما اجه صدك حلمانه ايي اكيد حلمانه شلون يكدر يجي ويدخل لبيت هو ما يندل بيت اهلي اصلان ...

نزلت رجليه من الجربايه والف سالفه وسالفه بالي سمعت صوت دعاء الصباح ... كمت من الجربايه عدلتها وصارت المرايه كبالي باوعت عليها وعدلت شعري ...

            

              

                    

ورحت للحمام غسلت وتوضيت وطلعت باوعت ع الساعه ب 10 اووف شكد متأخرة بنوم ليشش محد كعدني للصلاة الصبح اني متعلمه اصليها بوقتها الفجر ...

رزلت روحي شلون ما كعدت لصلاة الصبح وراحت عليه فرشت المصلايتي الحمدالله جبتها وياي هيه ومحرم الصلاة ...

صليت وكملت ومثل العاده القران ما ينسي اقرا وبعدها اكوم .. لميت مصلايتي وفرقت جنطتي ع الجربايه ما ادري يمته جابوها لان من صعدت الغرفتي ما جبتها ...

باوعت ع ملابسي الي اخذتهن من الي جابهن الي سند .. بتسمت واني اباوع عليهن وتذكرته حجايته من كتله هذا الملابس المن جاوبني نيشانج ...

صار كدامي التلفون الي خلاه بيدي قبل لا اروح ويه محمد وامي ... بدون سابق انذار نزلن دموعي ما اعرف ليش بس اجتاحني شعور الخيبه ...

مسحت دموعي وفتحت خانه من الكنتور وخليت بيها الملابس والتلفون الي ما تجرءت افتحه ...

نفخت هوا ع وجهي حتى ما ابجي وفتحت باب الغرفه ونزلت ... امشي وفكر هاي احلامي بدت تتحقق بيت يلمنه غرفه وحدي وكلشي بيها اثاثه حديث ...

هاي اهلي يمي وما محتاجه شي وماكو قوانين ولا تعقيد بحياتنه ليش ما جاي افرح ليش ...

نزلت البايات بثكل واحس نفسي امشي ع جمر وجاي يحركني و يلجمني ... رفعت راسي وبتسمت مجامله ع ملكه امي ...

ام فاطمه.... صبااح الخير يا اخر بناتي

نور.... صباح النور والعافيه

فاطمه.... هاا يمه بديتي تنحازين خوش هيج صارت بعد منو يكعد وياج ويسولف

نور.... من شوكت فطيم صايره تغارين؟

فاطمه.... من هسه ههههههه

نور.... ههههههه

ضحكت وحضنت امي وفاطمه اجت حضنتها من الجهه الثانيه واحنه نضحك ... اجانه صوت ... فريت راسي ع مصدر الصوت ...

سكينه.... الله يزيد علاقتجن ويكملجن بعقلجن

عافتنه وراحت للمطبخ وهيه تهز بيدها اني ستغربت وبعدت عن امي وباوعت ع امي وفاطمه ...

نور.... هاي شبيها منو يمها؟

فاطمه.... بعدج خيتي ما شفتي شي

نور... شنو يعني؟

ام فاطمه.... عوفن الحجي يمه وانتي يمه نور تعاي تريكي سبقناج بالريوك

نور.... بالعافيه ع كلبكم

تمشيت اني وفاطمه للمطبخ وامي كدامنه جانت تصرفات سكينه غريبه عليه لو لان اني ما عايشه وياها حسيتها غريبه ...

فاطمه ما خلتني اسوي شي سوتلي بيض وخلته كدامي وكلاص جاي ...

اول ما صارت البيضه كبالي صفنت وتذكرت بيوم خليت السند الملح ورتفع ضغطه ...

            

              

                    

فاطمه.... نور وين صفنتي ما تردين بيض الي اعرفه انتي تموتين ع البيض

نور.... هااا لا اريد طبعاً هو اكو اغله من البيض

فاطمه.... الحمدلله عبالي غيرتي نضامج ويه تغير العائله وجتنه نسخه غير الي راحت

نور.... ههههه لا لتخافين كلشي يتغير بيه اله حبي للبيض لا ينتهي

فاطمه.... هههههه اول مره اشوف شخص يحب البيض ويكرهه الدجاج ترا البيضه لو ما الدجاجه ما هسه كاعده تاكليها

نور.... اني مو ما احب الدجاج بعكس اكله بس مو ذاك الاكل ومرات تلعب نفسي منه

فاطمه.... اي تريكي حتى نفتر بالبيت ونروح للحديقه

هززيت راسي وبديت اكل خلصت ريوك واني وفاطمه صرنه نفتر بالبيت وطلعنه بالحديقه ... كعدنه ع قنفات الحديقه ... اني رفعت رجليه وخليتهن ع الطبله وهيه كاعده بصفي ...

نور.... حياتنه نكلبت فوك حدر

فاطمه.... اي والله كلشي بيها تغير

نور.... معقوله اني وجه الفكر الي جنت بيتنه اشو بس طلعت تغيرت حياتكم

فاطمه.... لا مو هيج بس ابوي هو العدمها لحياتنه هو الي غيرها تدرين يمكن الي صار خير انه حتى ابوي ما ياخذ ورث امي ويصرفه ع سوالفه وبعد ما تطلك امي يطلع ورثها

نور.... ورث؟ منين؟

فاطمه.... مو اخوها توفه وابنه جاب ورث امي ما يريد خواته ياكلن اكل حرام

نور.... الله يرحمه بس واحد غير ابنه جان اخذهن وغلس عنهن بس الحمدلله الدنيه بعدهي بخير

فاطمه.... اي والله

بديت اسئلها شلون اجه وشنو صار بعد ما اني رحت وهيه تحجي واني اسمع الها وخذتنه السوالف ... روح وجيب ومن وصلنه السالفت حميده ...

صاحت علينه امي اجت نبأ باوعت ع فاطمه بعلامه استفهام ...

فاطمه.... نبأ الي اكبر مني هم لكاها محمد وعرف عنوانها وجابها وهيه تروح لهلها وتجينه

نور.... يابي ع هالدنيا ع كد ما هيه زغير وباجر وميتين وتشوف بيها العجايب بس الله ساترها علينه

دخلنه ونبأ سلمت عليه سلام بارد واني قابلتها بالمثل لان اللهفه هيه كسرتها وسلمت عليه وكنو وحده غريبه ما تعرفها وتوهن راح يتعرفن ...

والي صدمني انو هيه تحاشت فاطمه وما سلمت عليها عجيب ... كعدنه واني تقصدت اكعد وجر فاطمه وكعدها بصفي ...

نور.... اي شلون نبأ شخباج

نبأ.... زينه بس شكلج مو مثل ما تخيلته عبالي شكلج يوحي لزغر بس مبينه جبيره وحتى اكبر مني

نور.... حلو ع الاقل اكبر منج شكلاً وزغر منج عمراً والي اعرفه الناس تمشي ع العمر وتحسبه مقياس الإنسان وانتي عمرج يمكن اضعاف عمري مو

            

              

                    

نبأ.... احم لا بعدني زغير كله اكبر منج باربع سنوات

نور... اربع سنوات؟ متاكده؟ اشو اتذكر اني وفاطمه بينه ثلاث سنوات والي اعرفه امي وراج اربع سنوات محبلت بسبب السقاطات بعد منين اكبر مني بس باربعه

نبأ.... بخزره ما شاء الله ذاكرتج قويه

نور.... كلش قويه لا تستهانين بيها

هيه ضاجت وكامت وسكينه لحكتها فاطمه بس تباوع بعيونها ما كالت شي ... درت وجهي عليها ..

نور.... اكلج محمد وين؟

فاطمه... بالكليه وكال اليوم يجي من وقت ع مودج

نور.... فدوه لخوي اليجي ع مودي

فاطمه.... هههههه جا البارحه راح يصيحج ع العشه وراح وما رجع دزتني امي صعدت لكيته حاضنج ونايم

نور.... هاااا يمته؟

فاطمه..... البارحه هههههه من نزل الصبح امي سئلته شعدك حاضنها ونايم هو كال هيه حضنتني واني ما كسرت بخاطرها وما ادري شلون نمت

حجيت بهمس لنفسي ...

نور.... عزااا بس لا جفصت بالحجي يمه صخاام؟

فاطمه..... شبيج؟

نور.... لا هيج ماكو شي اكلج صاعده ارتاح من يصبون غده صيحوالي

فاطمه.... شنو تعبتي؟

نور....اي اروح ارتاح شويه

فاطمه.... تمام بس يخلون الغده اجي اصيحج

صعدت بسرعه للغرفه وسديت الباب عزااا شلون ما نتبهت من حضنته خاف حجيت شي واني حاضنته .. تصخمت اذا اطلع حاجيه كلمه بدون ما ادري اووف اووف سويت بحاالي ...

اخذت الغرفه ذهاب واياب اروح ورجع وعض اصبعي خاف جفصت جفصه كدامه اذا جفصت معناها رحت بيها ...

حاولت اهداء نفسي وقنع روحي اني ما حجيت شي كعدت ع الجربايه واخذتلي صفنه .. سمعت صوت هوسه وصوت محمد عالي ...

اني من سمعت صوته لزمت كلبي وفتحت الباب اريد اسمع ع شنو كاعد يحجي ...

محمد.... يمممه اللله يخلييج وخررري عن وجهييي خلي اطيح حضهااا وكسرهااا لهااي طااايحه الحظ موو عبااالج اكبررر مني اسسكتت والله اكسسر الراااسج ادبسسسزز

ام فاطمه.... وليدي امسحها بوجهي اني ادبها الك وكسر راسها وربيها من جده وجديد

محمد.... وحق الله هاااي اخررر مره رااح اعديهاا الها المره الجايه لو مو امي واكفها كدامي

ام فاطمه.... اي يمه بعد ما تحاجيك وما ترفع صوتها عليك بس عوفها الخاطيري

جان يصيح بصوت عالي محمد شكله رجولي ضخم يبين اكبر من سكينه والي يشوفه يكول هو اكبرنه واحد بس هو العكس اجه ورا ثلاث بنات ...

            

              

                    

وابوي بوقتها سوه ذبيها لان صار عنده ولد .. صعد الدرج من شافني كدامه غير ملامح وجهه وابتسم .. اني رجعتله الابتسامه ..

محمد... شلونها حبيبت اخوها

نور.... تمام بخير انته شلونك وليش جاي تصيح

محمد....لا تفكرين بالي صار جوه وارتاحي راحتج عندي تسوه الدنيا والبيها

نور.... اهااا حمودي تدري الزيادة في الدلال الئ شنو يدي

محمد.... لشنو؟

نور.... الى الغرور وانته جاي تسويني مغرورة

محمد.... ههههههه واحلى مغرورة تعاي

فتحلي ايديه اني ابتسمت بفرحه ورحت حضنته .. جنت متقصده اكله حمودي ردت اعرف رد فعله .. واني حاضنته هو حاضني اجانه صوت ..

فاطمه.... شوف ع هالشوفه الصبح خليتي امي تنحاز الج وهسه محمد يدلل بيج بعد وبعد شنو نشوف

محمد..... يمه منجن تعااي

اجت فاطمه هو هم حضنها اني كمت وكرصتها من ايدهاا هيه عاااطت

فاطمه.... اااخ شبيج

نور.... حتى المره الثانيه ما تحشرين نفسج بكل سالفه

فاطمه.... لا والله تردين كلشي الج

نور.... اخ وخته متحاضنين انتي شدخلج

فاطمه.... مثل ما هو اخوج اخوي قبلج

نور..... اهووو الساعه السوده الي جابتج اني قبلنه وخلتج تعيرينه عود انتي الجبيره

محمد.... ههههه كافيجن عرك ونزلن حضرن الغده ع ما ابدل وانزل

نور.... لا لا هيج انتم تعاملون خطاركم مع كل الاسف اني نور اشتغل شغل المطبخ واختي الجبيره موجوده

فاطمه....اولاً انتي من اهل البيت مو خطار واني بصفتي اختج الجبيرة امرج تشتغلين

نور.... خاااب دولي لو تمووتين

سمعنه صوت سدت الباب درنه روسنه ثنينه محمد دخل الغرفته وسد الباب ... حضنت فاطمه من متنها ومشينه واني احجي وياها ...

نور.... صدك ما كتيلي شنو صار وشبي محند يصيح وع منو صيح وصار عصبي

فاطمه.... ما عرفتج فضوليه جان سئلتي

نور.... اذكرج من الجان فضوولي احم احم

فاطمه.... ما جنت فضووليه

نور.... هسه اني كلت انتي ليش اخذتي ع روحج

فاطمه....خلي اسولفلج شنو صار

نور.... اي يلا سولفي

كعدنه بصاله الفوك وهيه كعدت كدامي وبدت تحجي ...

فاطمه.... سكينه من اجه محمد صيحت عليه كدامه علمود ابنها

نور.... لحضه ليش هيه عدها ابن؟

            

              

                    

فاطمه.... اوو نسيت اكلج اي عدها وابنها بالمتوسطه

نور.... هااا اشو ما شفته كملي

فاطمه.... اي هما اول ما اجو محمد كلها نقلت ابنج بمدرسه يمنه محمد جبره يداوم وهيه من سمعت هيج كالت لا تجبره واذا يريد يبطل خلي يبطل بس محمد ما قبل وخله يداوم وهيه من شافت محمد مشه رايه ع ابنها حقرة ويه محمد وتدور مشاكل وياه واصلان هيه من البدايه تكرها

نور.... وليش تكرهه من البدايه؟

فاطمه.... مو محمد جابها غصب عنها تريد تبقه كربلاء هيه وابنها

نور..... جا زوجها وين؟

فاطمه.... مطلكهاا وعايف الولد الها

نور.... وليش طلكها؟

فاطمه.... والله ما نعرف

نور.... صدك اكلج مجتبى وين اشو ما شفته من اجيت لحد هسه

فاطمه.... هاا مو هو بايت بره اليوم العصر يجي محمد خابره وكال جاي

نور.... وليش بايت بره؟

فاطمه..... ورا الغده احجيلج هسه راح اروح اساعدهم بالغده

عافتني ونزلت تركض ع الدرج ما اعرف ليش حسيتها تهربت من سئلتها عن سبب نوم مجتبى برا .. كمت ونزلت جوه اشوفهم شنو يسون ...

دخلت للمطبخ جانت نبأ وسكينه ماخذات زاويه وحدهن ويسولفن وامي ما موجوده وفاطمه تغسل المواعين حتى يصبون غده ...

تمشيت برا المطبخ وراحت يم امي للغرفه شفتها كاعده وتقرا قران كملت الايه وصدق واني باوعت عليها ...

نور.... يمه عندي سؤال؟

ام فاطمه.... اي يمه كولي محتاجه شي مشتهيه شي هسه ادز اخوج يجيبلج

نور... لا يمه ما محتاجه شي بس اريد اسئلج عن ولد عمي ما جابتهم امهم اريد اشوفهم

ام فاطمه.... عمامج لو صدك عمام ما خلو ولد اخوهم الشهيد بس هما تبرو منهم وخلفله ع امهم خوش بنيه اخذتهم وعافت اهلها الخاطر جهالها

نور.... اووف يمه بالي يمهم هسه شلونهم والبنيه زغيره حتى تتحمل مسؤولية طفلين واحد رضيع والثاني سنه ونص

ام فاطمه.... والله يمه شكلج من اربعينية عمج وهيه محد يعرف عنها شي

نور.... قصدج يمه محد دور عليهم وسئل عنهم لجن اهلها تبر منها من فضلت جهالها ع اهلها وحلفت ما تذبهم وااخ يمه كلبي يوجعني راح يصير ثلاث سنوات ع موت عمي واني احسه البارحه مات

صرت ابجي ونااشق بس تذكرررته ونزلت دمووعي شحاالج هسسه ايات وين صفه بيج الدهر .. حضنتني امي واني زدت اناشق وابجي دخل محمد وخواتي علينه ومحمد جراني من حضن امي وحضني ...

محمد.... يممه شبيهااا ليش جااي تبجي

ام فاطمه.... تذكرت عمك وبجت

محمد.... شوكت تنسين نور ترا عمي راح شهيد وهسه هو بالجنه بدال ما تترحميله وتقريه صوت الفاتحه تبجين

نور.... انتووو مااا تحسووون بيه احسس ناار وشاابه بضلوعييي محددد جااان منكم حنيين عليه ولا يكلف نفسسه يسممعني واولكم وحده امييي جاان ماا بيدهااا شي غيررر تبجي ع اذيتنه محد احتواني وعلمني قييمه نفسسي غيرر عمييي

محمد.... ايي ايي تمام بس هدي ولا تنفعلين تردين اخذج تزورين عمي بمقبرة وادي السلام

نور.... تاخذني والله؟

محمد.... اي والله اخذج بس تغدي ورا الغده نروح ومنها تزورون وتشوفون الزيارة وانتن هم تحضرن اخذجن

سكينه.... حتى اني وفلاح؟

محمد.... اكيد ليش انتي وحد عنهن لو مو اختي

هيه ما جاوبت ومحمد يمسح بدموعي ويرجعن يصبن ... رفعت راسي وبتسسمت ابتسامه من كل كلبي وحضنت محمد وبسته من خده ...

نور.... بحياتي ما راح انسه فضلك هذا لو زرت عمي وشفت ضريح اهل البيت الي من النولدت واني بس اسمع عنهم وما شايفتهم

محمد.... لا تكولين هيج راح تشوفيهم ولو تردين كل جمعه اخذج تزورين وتشوفين عمي

نور.... اللله يخليك الي ولا يحرمني منك

محمد.... ويخليج الي يلاه كومي تغدي حتى نروح

كمت ومسحت دموعي واول مره احس نفسي صدك فرحانه وما مجامله نفسي ... مجرد احساس ازور عمي وحجيله ع الي صار بيه بعد ما مات تكفي عندي عمر كامل ...

خلصنه غده وقررنه نطلع ونتوجه الئ النجف الاشرف ومن بعدها نمر ع كربلاء ومحمد قرر ياخذنه السامراء وومناك لبغداد هم نروح نزور موسئ الكاظم ...

صعدنه بالسيارة وحساس الفرحه ما اريد انطي الاحد ع كثر ما جنت متونسه بروحتي لنجف منها ازور امير المؤمنين ومنها التقي بعمي الجان الي كلشي بالحياة ...

بس يا فرحه ما تمت من انفت الباب ومحمد اشرلي انزل تفاجأة وهنا جانت الصدمه ...

الفصل الرابع والعشرون من هنا 

شكرا لزيارتكم عالم روايات سكيرهوم