رواية جراح قلبي الفصل السابع والعشرون بقلم جوهرة
نرجس /
بقى ساكت مارد علية اكيد يحس بالذنب لأن ظلمني واذاني وكفت اريد اطلع / محتاج شي
مارد غمض عينه اني هم عفته وطلعت
من صار العشا عمتي لكيتها مجهزة صينية صغيرة صاحتني / تعاي اخذيها لصعب خل يتعشى
وديتها للغرفة جان عمو و حذيفة والجهال محاوطينه ويسولفون وياه من دخلت اجت وراية علا طلعت الجهال وصاحت عمو وحذيفة عالعشا
بقينا وحدنا خليت الصينية عالطبله وعدلت كعدتي صرت قريبة عليه سحبت خاولي حطيته على صدره وبديت اوكله جان العشا تشريب لحم ومشاوي وزلاطة انطي تشريب يشربه بالخاشوكه وعينه علية كل هذا اني ساكته سويتله لفات لحم صغيرة واخلي بحلكه ما اكل هواي ماقبل اكتفى بالقليل سحبت الخاولي وطلعت كلينس مرطب مسحت شفايفه بارتباك
صعب / انطيني مي
فتحتله بطل صغير وأخذه بيده شربه ورجعه
شلت الصينية للمطبخ جانو مكملين عشا والمواعين عالسنك محد غاسلهم علا مدري وين ولينا ملتهية بعصومي ذبيت الصينية عالسنك عايفيلي عشا بماعون وفوكاه كرصة خبز كعدت عالميز تعشيت و رحت وكفت عالسنك اغسل المواعين كملت كولشي وخدر الجاي صبيته ورحت وديته جانو بغرفتنا كاعدين علمود صعب يونسونه خطت الجاي وانطيته لصعب ماقبل يأخذه عفتهم وطلعت بالمطبخ كعدت
ورى العشا اجو بيت عمتهم ام غزوان الولد راحو بالمضيف لأن غزوان ماقبل يدخل يمكن لان داخل البيت وبغرفة النوم اكو هيج ناس حتى لا يحرجون أهل البيت بس عمته بقت كاعدة وتسولف اني كاعدة على جهة ما اشترك باي حديث بس اسمعهم انتبهت من عمتهم حجت بطاري عرس صفا بعد يومين عمتي ردتلها / خل تتزوج شتنتظر اجرجر بروحها
علا من سمعت طاري صفا راحت اعرفها تنحرج رفعت راسي صعب عينه علية دنكت راسي وذبيت شالي على راسي جنت عايفته لان ولد طابين طالعين للغرفة علمود صعب وهالشي كاعد يضوجني اريد اكعد بمكان ارتاح بي البيت هوسة تالي الليل يلة ارتاح من امدد بفراشي عالكاع ما انام عالجرباية انحرج إذا يدخلون ويشوفوني ولو محد يدخل الا تندك الباب
راحو بيت عمتهم واني تنهدت بقوة ونزعت شالي ذبيته عالكرسي هو جان منتبه علية
صعب / ضايجه من شي
التفتت / لا ليش
صعب / احس ضايجه شنو مجاي تأخذين راحتج
دنكت العب باصابيعي / اصلا حرام ارتاح كلما اكول صفت انجبح على راسي يلة الحمدلله
رفعت راسي .. محتاج شي راح اصلي وانام
صعب / صلي وتعاي جتفي يوجعني أحسه خدران من النوم افركيه الي
طلعت توضيت ورجعت حتى اصلي طولت بصلاتي اسمعه كام يتأفأف طبكت السجادة والحجاب ذبيتهم عالكرسي ورحت سديت الباب واجيت كعدت بصفه ..
نرجس / منين يوجعك
حرك جتفه هذا الجان مابي شي لان الكسر بالايد الثانية بديت امسد عليه من فوك ملابسه
صعب / اقوى شبيج فاهية بعدين مدي ايدج جوا دشداشتي احسن
كورت شفايفي معترضة بدون ما احجي هو صافن بوجهي بقيت فوك النص ساعة وياه
افرك جتفه بس من فوك
صعب / اريد اروح الحمام ساعديني
اني ارتبكت اول مرة يطلب هالشي مني كله الولد يساعدونه
صعب / لا تبقين فاهية ساعديني لو مابيج ماريد تصيحين الولد اكيد كلمن بغرفته ومشغول
استحيت من حجايته فعلا اكيد هالشي والوكت متأخر فوك ال 11
حظرت الكرسي مخليته على جهة قربته يم الجرباية ودنكت سندت ظهره هو تلقائيا حظني تك ايد وأيده المكسورة طلعها من الربطه جانت معلكة برقبته ورفعها حتى لا تتأذى ثبتت الكرسي المتحرك حتى يكعد عليه بصعوبة كدر يكعد والنفس مالته عله دليل على اجهاده بس ما حجى
تنهدت واني متحمله ثكل جسمه لأن صعب طويل وجسمه خشن وين اكدر واني يادوب وزني 60 دفعت الكرسي طلعته من الغرفة للحمام دخلته وسديت الباب وراية ، الحمام على جهة بي تواليت غربي
اني كولش خجلت يربي شلون ادبرها ابقى وياه هو رأسا كال / اطلعي من اكمل اصيحج
طلعت بسرعة وكفت برا انتظره يصيحني واني افكر بالوضعية اخوته يساعدونه عادي متعود عليهم وهو مريض تعبان يحتاج مساعدتهم ويتقبل وضعه
طول يلة صاحني بينما رتب وضعه دخلت ساعدته انطيته خاولي نشف بي لأن مغسل المغسلة قريبة منه ، ساعدته بصعوبة وردت اوكع اني وياه هو صار عصبي زمخ بية لأن بدون ما ادري ضغطت على صدره عنده كسر بالضلع حسيت جسمه تشنج انقهرت والله من اسمعه كام يون اكيد من الوجع
اني لا إراديا دموعي نزلت / اسفه والله مقصدت والله ردت اوكع وضغطت صدرك
همس بقوة / كااافي طلعيني منا
،،،،كعد بالكرسي ورجعته للغرفة ونفس المعاناه من نزل بالفراش مدد وعلى كيفي خليت رجله المكسورة عالفراش وغطيته رجعت الكرسي يم الباب واجيت دنكت عليه تلمست صدره بخفه / صعب بعده يوجعك
فتح عينه وعكد حاجبه / ليش تبجين ؟!!!!
رفع أيده ومسح خدي / شوي بعده هسة يروح الالم
بقى أيده على خدي وعينه بعيني / نرجس
نرجس / هممم
صعب / اااوف روحي نامي هسة
نرجس / محتاج شي
صعب / لاااا روحي
فرشت دوشك ولحاف وجريت مخده من الجرباية طفيت الضوة ومددت بفراشي بس طار النوم من عيني بقيت صاحية ظهري عالجرباية من جهة صعب فريت جسمي صار مقابيلي سألني / نرجس نمتي
/ لا
صعب / خل نسولف لعد اني مابعيني نوم
نرجس / مابيناتنا سوالف على شنو نسولف
صعب / اني اعتذر نرجس جنت فاقد اعصابي واذيتج مجنت اريد اعاملج بالاسلوب هذا شي جان فوك طاقتي
نرجس باستغراب والالم بعيونها بسبب الصار / شوف منو يعتذر معقولة تعتذر مني وانت جنت بكل هاي القسوة
نتر ومبين ضايج / شتردين اسوي بلحظتها زين ما ذبحتج وفوكاها تطلعين بدون علمي
نرجس / مو تعتدي علية ، تاخذني بالقوة مثل أي همجي اي عاملتني بهمجية خليتني اكرهك
صعب / عدلي اسلوبج بالكلام احسلنج صوجي جاي اعتذر
نرجس تكز سنونها / سويت فضل على أساس هو اني المظلومة بيناتكم انت وبنت عمك الله لا يوفقها أن شاء الله حوبتي تطلع بيها
صعب / طلعت حوبتج واني اول واحد رغم اني ما متعمد هالشي لأن السويته بسبب الصار وشفته
نرجس / اني ما دعيت عليك هذا قدر وصار
صعب / بس بعدج شايلة بگلبج
سكتت مارديت ضميت راسي جوا الغطا هو هم بعد ما حجى شي
الصبح كعدت ولميت فراشي وعطرت الغرفة وطلعت اتوضى البيت صنطة بعد وكت محد كاعد كملت صلاه وبقيت بغرفتي بدلت ملابسي وعدلت روحي شوية التفتت على صعب جان نايم تقربت عليه الغطا مبعده جريته غطيته خطية بارده وطلعت احظر الريوك واشعل الصوبة نزلت لينا مستعجلة وبيدها ممية عصومي صبحت علية ودخلت المطبخ رحت وراها هي ملتهبة تغسل الممه وحضرتها لابنها
خدرت جاي وطلعت بيض وجبن عجبني اسوي طماطه وبيض حميس
ايهم / صباح الخير اكو ريوك لو اطلع
نرجس / صباح النور تفضل خير من الله
ايهم / اي والله خيتي لأن مستعجل وهاي ملتهبة بأبنها
كعد يم الصوبة حضرتله صينية رتبتها
وحطيتها كدامه / تفضل ابو يوسف بالعافية
ايهم / الله يعافيج خيتي
ورى شوية كلها التمت جهال حذيفة دوام همة وابوهم
ابتسمت علا / عفية والله شنو هالنشاط من الصبح اليوم اني كعدت متأخرة همزين لكيت كولشي حاضر
نرجس / ههه ادللي ..والله كعدت صليت وبعد ما نمت كلت خل أحظر الريوك
علا / اي احسن اكلج شلونه صعب
نرجس / بعده عنده وجع
علا / اي خطية مو الحمدلله طلع صاحي من الحادث ابو ملاك يكول السيارة ياهو اليشوفها يكول قادر الله اذا صاحبها عدل
نرجس تتنهد / الحمدلله
بقوا يتريكون اني تريكت ورجعت للغرفة جان كاعد صبحت عليه / صباح الخير
رد بثكل يمكن ضاج من كلام البارحة / صباح الخير
نرجس / تروح حمام
صعب / صيحي ايهم
نرجس / طلع قبل شوية اني اخذك يلة خل اجيب الكرسي
صعب / لا تتعبين واتعبيني متكدرين شوفي منو موجود
طلعت أصيح حذيفة بعده مطالع خطية اجى بكل سهوله طلعه للحمام ورى شويه رجعه اني رحت احضرله ريوك عمي وعمتي راحو كعدوا بغرفتنا يونسونه لأن يضوج
جبتله الريوك وبديت اوكله عمتي عينها علينا
ام حذيفه / عفية بالاصيلة الله يرضى عليج يمه
حجي عبدالله / اي والله أصيلة وبنت اوادم الله يرحم والديج
نرجس بهدوء / الله يرحم موتاكم
كعدوا شوية وطلعوا عمي راح بشغلة وعمتي راحت يم البنات بالمطبخ اعرفهم يردون ينطوني مجال ابقى وية صعب
كمل و مسحتها شفايفه بكلينس مرطب شلت الصينية صاح وراية / ارجعي لا تتأخرين
غسلت المواعين والصينية وبقيت بالمطبخ رتبته لأن علا راحت تنظف ولينا ملتهية بجهالها كابة اليوم عيطتهم بس يبجون حتى يوسف معاجبه شي سواله زعله عالريوك
كملت المطبخ ترتيب ورحت طلعت لحم من المجمدة حتى يفك وفاصولية خليتها عالنار وكلت اسوس من اللحم تشريب علمود صعب
فتت للغرفة عندي ملابس يحتاجن غسل وطلعت ملابس لصعب حجيت وياه إذا يحب يغير ملابسه خزرني نافخ روحه ضايج لأن تأخرت عليه
نرجس / كيفك اروح اغسل ملابس
طلعت وما اسمع الا صوت شي تكسر بالباب فززني رجعت اشوف شكو طلع شامر فازة جانت عالكومدي مالت الجرباية فكيت عيني اجيت احجي بس سكتت ذبيت الملابس من أيدي ولملمت الكزاز ذبيته بسلة الزبل رفعت راسي وخزرته بدون اي كلمة انطقها
صعب بغضب وهو ما طايق روحه / شكووو لا يكون ماعاجبج
نرجس / انت تريد تتعارك خل اطلع
شلت الملابس وطلعت واني ضايجه من تصرفه
تعمدت ما ارجع للغرفة بقى وحده ادري هالشي مو حلو ورب العالمين يحاسبني لأن هو محتاجني بس طك عناد براسي اضوجه يعني انت مريض ليش تحب اتضوج غيرك
كملت طبخ ونصيت جوا الجدورة وصيت لينا تشوفهن ورحت حتى اسبح
عمتي موجودة بالغرفة وياها جهال ايهم من شافتني / ها يمة كملتي الغدا
نرجس / اي عمة ونصيت جوا الجدورة خل اسبح هسة
اخذت ملابس ومنشفة وطلعت للحمام بدون ما اباوعله اعرفه عينه علية
صعب /
شلون راس يابس وصيتها ترجع وساعتين هي ماكو وانوب تتصرف كأنما ماكو شي اعرفها متعمدة لأن الصبح ضوجتها
قربها مني ومداراتها جاي يريحني من حظنتني تساعدني واني رغم الالم الكاعد احس بي بس حظنها حيل ريحني البارحة بالليل جانت قريبة علية احتاجيت ابوسها مشتاق لشفايفها واتراجعت باخر لحظة
الصدك مجنت متوقع ترجع بسهولة ورجعتها الي دليل على طيبة گلبها
مراعاتها اليومية واهتمامها بكولشي يخصني يعلقني بيها أكثر صرت اضوج من تهملني مثلما سوت اليوم
امي طلعت هي والجهال كالت كافي نبقى ارتاح الجهال دوخوك
صعب / لا يمة خلهم مونسيني شو انطيني عصومي خل ابوسه
شالته وتقربت بوسته بخدوده يوسف من شافني كمز عالجرباية عنده شوية غيرة
صحته / تعال بابا
سحبته بسته براسه وامي حجت / لاتعور عمك يلة انزل خل نطلع
طلعت امي والجهال ودخلت نرجس لافة راسها بمنشفة والخدود وردي اويلي يابة منظرها سطرني
سدت الباب وراحت يم ميز تواليت ترتب بروحها أراقب بيها تحط بهالكريمات وتعطرت وانوب فتحت الشعر تسرح بي ما اجذب الكاعد تسوي اعتبره ونسه كملت وتقربت عالصوبة تتدفى
صحت متوجع اريدها تجي عندي / ااخ تعاي شوية هنا
كمزت من شافتني أتوجع وتقربت علية بخوا سالتني / شبيك صعب
صعب / عدلي المخدة ورى ظهري
دنكت وشعرها نزل على وجهي وجتفي اخذت نفس بقوة عطرها تغلغل بكل حواسي لفيت أيدي وحظنتها جسمها جمد بحظني باوعتلي فاكه عينها وجها كولش قريب سحبتها أكثر وبستها بخدها وشميته بلهفة حاولت تبعد
صعب يهمس / اششش لا تأذيني
كلمتي هاي خلتها تخنس تخاف تتحرك لا صدك اتأذى اني استغليت هالشي وأخذت شفتها طفيت شوكي الها مابادلتني بقت جامدة وشفايفي تتحرك بشفايفها حررتها وابتعدت أيدها على شفتها وانطتني ظهرها محرجه من السويته بيها اباوعلها راحت كعدت يم الصوبة ودنكت راسها
تنهدت واني اطلق نفس بقوة وإحساس بالراحه غزا جسمي عيني عليها / نرجس شي حلو هذا حيل ارتاحيت والله
رفعت راسها وعيني على شفايفها المليانه عضيت شفتي / تعاي هنا لاتبقين بعيده
نرجس / صعب انت تعبان تحتاج راحه
صعب ضيك حاجبه / وهاي شلها دخل تعاي محتاجج والله
كامت وسحبت شالها ذبته على رأسها / اروح احضرلك غدا وراجعه
طلعت بسرعة تنهزم مني ادري بيها
ـــــــــــــــ
نرجس /
العرس مالت صفا اليوم كلهن راحن البارحه بالحنه عمتي مراحت اني كملت شغلي ونظفت كولشي اندكت الباب رحت للغرفة لبست حجاب الصلاه صعب جان يتفرج عالتلفزيون من شافني سالني / ليش مستعجلة
نرجس / الباب تندك
ضيك حاجبه / شنو ماكو احد يطلع رايحه انتي
نرجس / كلهم راحو للعرس وعمو بعده مراجع من برا
عفته ورحت طلعت رنا هي وجهالها سلمت علية وبوستني ودخلت اكيد جاية علمود العرس لأن قبل اسبوع جانت عدنا
بوست وليداتها واني أرحب واهلي بيهم
نرجس / منو جابكم
رنا / حماية ذبنا ورجع اكلج راحن بعدهن
نرجس / من الصبح راحن تعاي عيني ادخلوا باردة
رنا / اي والله اليوم باردة
رنا / صعب شلونه
نرجس / الحمدلله شوية احسن
رنا / اي الف الحمدلله فدوة نرجسة ديري بالج عليه ترى اخوية من النوع اليكتم بگلبه مرات لو حتى مريض ميحجي
نرجس / والله مراعيته ومهتمه بي
رنا / حبيبة الله يسعدج اي امي هم تكول مرات من اخابرها تكول الله يحبه انطاه مرة مثل نرجس
دخلنا البيت والجهال راحوا قبلنا يسلمون على خالهم
فرح من شافهم وكعد يبوس بيهم
رنا سلمت واطمنت عليه وكعدت بصفه عالجرباية تسولف وياه اني طلعت اجيب ضيافة سويت عالسريع كاكاو وجبته الهم .. رنا اليوم غداج هنا انتي وجهالج
اخذت الفنجان / مشكورة حبيبتي بس كلت اروح لبيت عمي خاف يجي رجلي كال حدج للعصر
انطيت الجهال وكعدو عالزولية وخليت الصينية كدامهم وأخذت فنجان لصعب حتى يشربه
صعب / وليش متبقين اليوم
رنا / صعب انت مو تدري بي نحس ميحب اطلع
صعب / اي صح بس خوش ادمي هو
رنا / يلة شسوي خوما اتعارك وياه بعدين الحجي بيناتنا اني لوما علا تخابرني ورانيا هم ولا اجي بعرسها خل تولي طلعت من عيني ورايحه لخاطر بيت عمي
صعب / اي والله صدكتي هالبنت هاي مصيبة عمي راد ينجلط من وراها ضغطه علك
رنا / المهم انكشفت وظلت بصخام وجهها عمتي ايمان من خابرتها كالت علمود الناس رايحين لعرسها وعيب من عيالها لأن بعد ما الها أي قيمة خل تولي
اني ساكته واسمعهم يحجون ورى شوية اخذت جهالها وراحت لبيت عمهم صالح طلعت وراها سديت الباب ورجعت صاحني صعب
رحت للغرفة / محتاج شي
صعب / اريد اسبح ساعديني
نرجس / انتظر الولد من يرجعون
صعب / لا يتأخرون بعد ساعتين يلة
نرجس / خل احضر ملابسك والحمام وارجعلك
جهزت الحمام ودخلت كرسي يكعد عليه من يسبح وطبله يحط رجله المكسوره عليها اني شفت حذيفة من يساعده بالسبح يغطي رجله وأيده بجيس نايلون ويلفه عليه لاصق
كولشي حظرت وأجيت لصعب قدمتله الكرسي حظنته حتى يستند علية طبعا بصعوبه يله كدر يكعد وكفت أخذ نفس .. صعب ميحتاج تسبح ريحتك طيبة والله وبعدين الجو بارد وانت مريض
صعب / كولي ماريد اساعدك وخلص
ضجت من كلامه شبي هذا كل عقله هيج يحجي
نرجس / فوك ما خايفة عليك هيج ترد علية بكيفك لعد
طلعته من الغرفة ودخلته للحمام ساعدته ينزع دشداشته وسندته بقوة خفت لا يوكع بالحمام كعد عالكرسي جنت محضرته شلت رجلة عالطبلة وجبت نايلون لفيتها وضغطتها من فوك بلاصق وأيده نفس الشي اشتغل واني محرجه من الوضعية كاسرتله مي بالطشت وبرمت ردان ثوبي وأخذت ليفة وصابونه يخصنه جنت محظرتهن نكعتهم بالمي سويت رغوة درت مي على جسمه واني اسمي بالله وبديت أليف بهدوء متقربت للكسور مالته حتى صدره بهدوء ليفته سكبتله مي وأخذت شامبو بديت افرك فروة راسه شعره مابي طول قصير
كملت واني احس خدودي اشتعلت نار موقف محرج بالنسبة إلي وهو لا أبالي أحسه متونس عالحمام من كملت جبت منشفة جبيرة ونشفت جسمه وهو بيد وحدة بدى يساعدني عينه بعيني حظني حتى يقربني أكثر نفسه قريب يضرب خدي / تسلمين حيل ارتاحيت
نرجس / نعيما
باسني بشفتي ورفع رأسه يلة خل البس واطلع
كملنا ودخلنا الغرفة جانت دافية صوبة مشغلة بيها مدد بفراشه وغطيته وجبت عطر أخذه تعطر واني كعدت امشط شعره ولحيته هو ساكت بس عينه علية واني بكيفي رتبت شعره
نرجس / كملت اروح اسبح اني وبعدها اجيبلك الغدا
صعب / ليش ماسبحتي وياية
فتحت عيني / لا بلة خل اروح اسبح احسن
طلعت وهو أخذ الريمونت يكلب بالقنوات
عالغدا انتظرت عمي والولد حتى احضر الغدا صعب غديته وانطيته علاجه همزين اجو صبيتلهم كعدو بالمطبخ يتغدون وشربو جاي وراحو يم صعب بالغرفة اني كملت غسل المواعين ورتبت المطبخ وكعدت عالقنفة اخابر خالة ام عقيل مشتاقه احجي وياها
سولفتلها على كولشي صار من رجعت لهنا وهي شجعتني وحمدت بتصرفي بس مارضت على اسلوبي البارد وية صعب بقت ترزل بية اني نهيت الاتصال وبقيت وحدي بالمطبخ افكر بكلامها صح اسلوبي بارد بس مهتمة بأدق تفصيل يخص صعب هو يتقربلي ويحاول يخليني اتواصل وياه يفاجئني من يبوسني لو يحظني اني ما ابتعد عنه اعوفه بس اعامله ابرود ورغم هذا هو يصر يتقربلي
دخل اياد سلم علية .. ها شو وحدج وين الجماعه
نرجس / بالعرس وعمو والولد يم صعب
دخل للغرفة واني رحت طلعت حليب وكاسترد عجبني اسوي كملته وصبيته بمواعين وضفتله مبروش خليت على عددهم بصينية وخواشيك وديتلهم
عمو حمدني / اي والله عشتي
انطيته لعمو / بالعافية عمو
حجي عبدالله / الله يعافيج بنيتي الله يرضى عليج
وزعتلهم وأخذت ماعون وخاشوكه وكفت يم صعب حتى اوكله رفع راسه وسأل .. شنو هذا
نرجس / كاسترد طيب
صعب / لا ماريد ما أشتهي
اياد / اكل يمعود حيل طيب يأبه نرجس فد ماعون أخذه وياي للبيت
نرجس / ادلل ابو اسد اصلا طلعت حصتكم
اياد / والله معدله عاشت ايدج
نرجس / الف عافية
ادحك على صعب عكد حاجبه ومركز علية اني مديتله الخاشوكه / يلة ضوكه طيب
اكل وبدى يتذوقه هز رأسه وتك ابتسامة على خده / دزيلهم جدر لبيت اياد لا يروح يفضحنا ابو كرش
اياد / ههههه اي اسمعي كلام رجلج
نرجس / والله هسة اسوي بجدرية صغيرة مخصوص الكم
اياد / تسلمين خيتي جاي اشاقى والله بس اذا حابة تكرمينا بجدرية زيادة الخير خيرين
بقوا فترة كاعدين بعدين راحو اني اخذت المواعين غسلتها وسويت جدرية كاسترد لبيت اياد ورحت وديتها ما فرغتها بمواعين خلها مثلما كال صعب اودي جدر هههه صحت على شهد جانت توها جاية من العرس كالت توهم زفوها
اخذت الجدرية وهي تتشكر مني رجعت توضيت وصليت العصر وبقيت بالغرفة التفتت صعب ماله حس ثاري نايم رحت غطيته وبقيت كاعدة عنده
سمعت صوت بالبيت وجهال يتراكضون اكيد رجعوا من العرس ماحبيت اطلع شعلية اني اكيد راح يبقون يسولفون بيها عشتو أن شاء الله لا تتهنى
عجبني امدد جسمي عدلت المخدة وسحبت الغطا علية ومددت بصف صعب
صعب /؛
اخذتني نومة ورى ماطلعو أبوية والولد ماحسيت الا قريب المغرب فتحت عيني واني احس انفاس دافية قريبة علية التفتت نرجس نايمة بصفي حبيت شكلها وهي نايمه بهدوء
مديت أيدي اريد احظنها ماكدرت هي حست ورفعت جسمها اني استغليت هالشي وسحبتها بحظني ماانطت ردة فعل بست خدها بقوة وبقيت ضاغط عليه بشفايفي
نرجس /صعب اريد انزل ابتعد شوية
جريت حسرة وذبيتها واني اشوف خوفها مني
صعب / نرجس الى متى ترى اني رجلج
نرجس / رجاءا صعب عوفني هسة
صعب / لا ماعوفج ااخ لوما حالتي جان عرفت شلون اتصرف وياج
عكدت حاجبها / شنو قصدك
غمزتلها بعيني بدون ما احجي هي شهكت من فهمت القصد دفعت الغطا ونزلت وهي ترتب بشعرها ذبت شال على رأسها وطلعت من الغرفة
بسيطه نرجس اعرف شلون اجيبج
ـــــــــــــــــ
نرجس / خالة مو هواي تأخروا
ام سما / لا يمة اكيد ازدحام بالعيادة هسة انتي ليش مخبوصة ماتشوفيهم الا اجو
لينا / عمة هاي نرجس داخلة حالة طوارىء صار شهر
نرجس / لينا لعد شسوي والله خايفة عليه خطية
لينا / هههه ها شو صار خطية وانتي ماسمعنا منج غزل لو كلام حب لحضرة صعب
نرجس باحراج / ياه وترديني اتغزل لا عيني اني ماحب هاي السوالف
ام سما / لينا لاتبقين ناصبة عليها هذا طبعها البنت هادئة
لينا / اي كلنا جنا هيج بعدين نتغير وعيونج همة يغيرونا ويتغيرون هم هههه
ردت ام سما وهي تضحك
/ اي اني اشهد بهاي واكبر دليل ايهم
لينا / اي والله عمة شفتي شلون تغير سبحان الله
نرجس / صدوك لينا كم مرة سمعت على الصار بس مافهمت شنو السبب
لينا / يووه اشكال السوالف ادوخين والله
هسة احجيلج
دخلت عمتي جانت أبيت ابو معتصم راحت تشوف ام صهيب سلمت وكعدت .. ها مارجعوا
نرجس / لا عمة قبل شوية لينا خابرت ايهم يكول دخلنا يم الدكتور
ام حذيفه / ان شاء الله يارب يكون الكسر لاحم
نرجس / ان شاء الله
بقيت انتظر رجعة صعب من الدكتور بخوف صارله شهر يعاني قبل هالمرة رجع للدكتور وباقي ماجبر كسره كاعد يتضايق لأن محبوس بالغرفة مرات يطلع عالكرسي بس قليل لأن ميرتاح
صار الليل يلة رجعوا تلكيتهم من دخلو السيارة للكراج نزلوا صعب بالكرسي
سالت ايهم / شكال الطبيب
ايهم / الحمدلله كسر الايد والظلع جابر شوفي أيده بس ملفوفة باندج اسبوع ويتركه بس رجله بعد يحتاجلها وكت
تقربت على صعب ابتسمت له احاول اشجعه
هو بقى عينه علية بس ماحجى
دخلو للبيت وحذيفة أخذه للغرفة رحت حضرتله صينية عشا والبنات بقن يرتبن بالسفرة حتى يتعشون
دخلت وخليت الصينية كدامه / اي مشكورة تعبتج وياي اكدر اكل بيدي الحمدلله شغله ايام وابدي استعملها بسهوله بس تعودت على الاكل من ايدج غير طعم يصير
ابتسمت وسويتله لفة صغيرة وانطيته اخذها ومدها الي / اكلي وياية
نرجس / ما أشتهي والله
صعب / ميخالف عضة صغيرة
ماحبيت اكسر خاطره اكلتها واني احس نفسي لعبت حاولت اسيطر على نفسي لحدما يكمل العشا بقى ياكل واني ماتحملت ماكدرت عفته وركضت للحمام
تقيأت لدرجة حسيت روحي طلعت
اسمعه يصيح عليهم شوية واجت علا .. خير شبيج
طلعت من الحمام ورحت للمغسلة غسلت وجهي وتمضمضت وأخذت فرشة ومعجون غسلت اسنوني
بصوت تعبان / معدتي كلبت
علا / تعاي خل اسويلج ليمون بلكن يريحج
نرجس / لا خليني هيج ماريد شي
عافتني واني رجعت للغرفة رحت كعدت عالجرباية وانتجيت عالمخده وغمضت عيني
صعب بصوت خايف / نرجس انتي مريضة شنو صار
مارديت عليه
دخلت عمتي تطمن علية / ها يمة نرجس شبيج
أشرتلها وبصوت ضعيف /؛ماكو شي شوية لعبان نفس
شالت الصينية من كدام صعب كال ما أشتهي بعد
ام حذيفه / ارتاحي يمه انتي هم جاي تتعبين
من طلعت عمتي صعب سحبني بحظنه وغطاني باللحاف / ارتاحي مبينه تعبانه وجهج مصوفر
اني فعلا جنت محتاجه ارتاح غمضت عيني واني افكر بقلق احتمال اطلع حامل ؟
شكرا لزيارتكم عالم روايات سكيرهوم
