رواية ارحموني ولو رحمة مرة الفصل السادس والعشرون بقلم فراقد حسن علي
عادل/شديت أحزامي ويه أذان الفجر
وطلعت أهبد وأدور على أبو ايوب البدوي
ومن ناس الناس وللساعة ب ٣ الظهر
أوصل لبادية السماوة نشدت عنه ولكيته
أااوف حالي نفس المخنوك وحصل الهوى
هيجي صارت فرحتي من حصلته
-صارلي سنين طويلة ما شايفه ولا ملتقين
رحب بيه الرجال وستقبلني وكرمني
كعدت بمضيفه وسولفتله ضيم عايلتي
أبو أيوب /أمشي وياك لبغداد وتأمر وتدلل
بس من بادئ الأمر أكون صريح معاك
وتعرفني أنا لا دجال ولا عراف
أنا رجل صاحب خرز نورانية اساعد بيها خلق الله
-بمثل ما اكرمك بمساعدة الخرز العندي
تكرمني وتردلي المساعدة بنوگ صحتها زينة ومتعافية
عادل/أبشر أبو أيوب على لسانك شتطلب وشدكول بس ساعدني وفك وليدي أركان من الضيم البيه تدلل عيوني الك
وانت بعد أصل الكرم وعساها بميزان حسناتك
-رجعنا سوية لبغداد
وطول الطريق ينشدني بالتفاصيل شنو وشلون وليش
-طلب حليب هوش فطير
يعني بعده ما مغلي ومحطوط على نار
-اتصلت على محمود وبلغته حصلت الرجل
ويدبرلي حليب من جوه الكاع
-وكل الموجودين بالبيت يغسلون ويتوضون
لان يخاف على الخرز من النگاسه
تطفر وتختفي من عنده
محمود/بس غلقت الخط من أبويه
بلغت الجميع يغسلون ويتوضون
-أركان شلون ترهم وياه ؟؟
شلناه اني وامي وجدي سليم ورفل وفرح
وهو يزكط بينا ويدفر وهو مربوط
دخلناه للحمام والبنات طلعن
واني وجدي سليم وامي غسلناله
بس بالشافعات شبعنا دفرات وتفال وغلط ومسبه
فرح/اني ما سبحت ولا منى
ولا جدة صفية ولا رفل
فقط توضينا لان نظيفات
-جدي سليم ،،ومحمود ،،وامي
لان سبحوا أركان دخلوا بالسره غسلوا
-عدنا بطل حليب بالمجمدة جامد
خليته بجدر بسنك المواعين وفتحت عليه المي الحار وانوب غليت قوري مي حار وصليته فوكاه وتركته لحد ما ماع
-وره الصلاة دخل أبويه وياه الزلمه
وكعدوا بالديوانية يمهم جدي سليم ومحمود
ابويه سودة عليه غادي تراب من التعب
حضرتله امي هدوم دخل سبح
-حضرنا العشه
وأسمع صوت الزلمه يسولف بصوت عالي ويحجي سريع نفس حجي اهل الخليج
ونص كلامه ما افهمه
-بعد ما تعشوا الزلم بالديوانية
وصبينالهم جاي
طلبنا الزلمه كل احنا حتى أسلام ويانه
يريدنا نحضر يمهم
عاد تسترنا ولبسنا ألعبي وراحنا كعدنا يمهم بالديوانية
-كعدنا وحده بصف الثانية اني ومنى
وجده صفية و رفل
وامي بالاخير بحضنها أسلام
وكبالنا أبويه ومحمود وجدي سليم
واركان نايم ،،محمود شربه حب منوم
وهو زلمه كعد بالوسط
-طلب من امي جرجف مال مخدة نظيف
ويكون لونه فاتح واذا ابيض بعد احسن
كامت امي جابتله وجه مخدة لونه وردي فاتح
-طلع من جيبه جيس قماش صغير
فتحه وقلبه على الجرجف طلع رمل وياه خرزة صغيرة
وبدأ يقرأ قران بصوت عالي وسريع
عبالك يخوف وأحد ويشخط بالرمل بالخنجر ويقلب بالخرزة
-وجان يصيح/
زلمتكم مسحور وماضي عليه شهور
وعامل السحر مشعوذ خارج عن دين محمد عامله على نجاسة زلم ،، ودم حيض حريم
*مطعوم بدسم او حلو بهل هفت هالوكت ومن أجل تفرقة وعاملاتة من خبائث الحريم
*وعلى فراشو مرشوش تراب المكابر تفاقم عليه السحر وكضب بجسمو من تفاقم عليه أثر الطعوم
ولمس التراب لجسمو
*ومن نوم الغروب مسو أللعين الرجيم
عادل /أبو أيوب بعد أخوك خلصني
وخلص ووليدي الله يخلصك من نار جهنم
أبو أيوب/أبو محمود أنا أتفقت معاك وكان كلامي واضح وبقوة الله اكدر أساعدك وأزوعوا الطعم
وأذا تحب تشرب كل العايلة ما ينضرو لكن بدل هل المساعدة تكرمني ب ناقة وحده وتكون بصحة جيدة
فرح/ابويه ومحمود بقى واحد يباوع بوجه الثاني
عاد جدي سليم كال /توكل على الله أخي العزيز وساعدنا وفك الولد من ضيم شر النساء وتدلل ..
وأحنا مانعرف بالجمال والنوگ
تاخذ حق فلوس الناقة من عندي
-الزلمه كال /على بركة الله أتفقنا
راد الحليب وكال/ صبوا ب أناء واسع
امي طفرت وفرغت الحليب بسراحيتين كزاز شفاف اللي يصير غلكهن لونه أحمر بلاستيك
وجابتهن وخلتهن كدام الزلمه
-طلع جيس مال قماش ثاني
وخلاه بحظنه وبقى يكلب بالخرز وهن بداخل الجيس ما طلعهن ولا شفناهن
بعدين طلع خرزة لونها رصاصي وبيها نقاط
حجمها أكبر من بيضة الحمامة تقريباً بحجم بيضة الفروجة وحابسها بقضبان فضة
وبنهاية القضبان زنجيل طويل هم فضة وبالاخير حلقة،،صايرة بنفس شكل الميدالية
نزلها بداخل أول سراحية وبقى يخوط بيها
الحليب وانوب خاط الثانية
وكال /الجميع تهنو منو
-ابويه اول واحد شرب
وأنوب محمود ،،
وجدي سليم ،،
وامي ،،وجدة صفية ،،
واني ،،ومنى ،،ورفل ،،
وامي خلت لاسلام بالممية شربها وسكر بيها
-كال /صحو الزلمه وشربو بالغصب عنو
يردون يصحون أركان ماكو طافي
اذا محمود خدره لان هواي غلط وفشر
وكفر وصرخ وعيط وسب
يبووو صرنا سينما بلاش
عاد تركوا نايم
كال /شوكت ما يصحى اول شي يشربو الحليب لان معدتو فارغة
وأنتم جميعاً لمدة ثلاث أيام من هاي الليلة
لو تزوعون دود،،حياية،،عكارب لاتخافون
او تسهل بطونكم لا تشربون علاج للاسهال
لحد ما تنظف معدتكم من الطعوم اذا صدك مطعومين
واذا ما مطعومين ما يحصللكم شي من الذكرته
-بعد هاي الأجواء الغريبة كل واحد راح لغرفته من صدك مفتقدين الراحة
بات وياه بالديوانية ابويه وجدي سليم
واركان بقى على نومته يمهم
منى نامت يم أمي بغرفتها وياهن اسلام وجدة صفية
ومحمود نام يمي
ورفل صعدت الغرفتها
-قبل الفجر وأسمع أسلام يتوع ويبجي
طلعت من غرفتي وأشوف امي و منى حايرات بي خطية بطنه سهال وحايس روحه
انوب يزوع وسودة عليه جاهل ويخاف لان يختنك تفرفح
أنغسله نودي لغرفة امي نبدله
يرجع يحوس روحه ويزوع علينا
-دخل محمود علينا مطفي ونعسان
بس لان سمعه يبجي كلبه ما انطاه يتركه وأجه يشوفه //يمه ليش هيجي الطفل متفرفح خاف مستبرد
فاطمة/ما اعرف شنو سالفته
ماتنشد الزلمه خاف من الحليب الشربه
محمود/يمه الزلمه نايم
هسه أشعل الصوبة الجن بالهول وكعدن هناك
وشغلن التلفزيون بلكت يهدى خطية فرفحت روحه
فرح/صدك رحنا وكعدنا بالهول
وشغلنا التلفزيون،،بس ما يفيد شي ما يسكت بس يبجي ويتلوى وكلساع مزوع علينا وطالعة بطنه ،،احتارينا شلون نسكته
-أذن الفجر كعد الزلمه للصلاة
محمود أخذه للتواليت
وبعدها توضى وراد يصلي
محمود سأله عن حاله أسلام
كال/اي الحمد لله ما خاب ضني بذخري
حتى هذا الطفل مطعوم
تركو بحالو وممنوع تعطو شي يوقف الزواع او الاسهال خل تفرغ معدتو من الطعم
-تقريبا للساعة ب ٨ كل البيت كعد
حتى ما بينا حيل نكوم على حيلنا
لا مرتاحين ولا نايمين
كعد اركان يعربد على روسنا يفشر ويكفر
-الزلمه كال/جيبولي الحليب أنا أشربوا
وتكابل عليه محمود وأبويه والزلمه وياهم شربوه بالغصب يمكن شربوا كلاصين
وهو أستغفر الله هلكثر كفر
حتى تفل على الزلمه وغلط عليه
بس هو ما زعل كال /مو بوعيه
-بعد ما تريكوا بالعافية
أبويه توسل بلزلمه يخلص اركان من السحر
محمود/الرجال صريح
هو مو دجال او مشعوذ
بس أتوقعه حاكم جن ،، ويشتغل بالخرز
احنا نتريك طلب شكر جبتله العلبة مال شكر
أخذ بيده حفنة من الشكر وشمرها بجيس الخرز ورجع ضمه بجيبه
كال/ما اجذب عليكم ولا أغشكم
بمكدوري أجيب السحر ليمكم لكن الشغل متعب ومكلف
عادل/سمي شتأمر أحنا حاضرين
أبو أيوب/عدنا ناقة بالسابق متفقين عليها
حك تعب تفريغ الطعوم
واذا تردون أفك السحر كلفته ناقتين
وحده حك أخراج السحر
والثانية حك أحضاره وأجيبه لعدكم
محمود/ما شاء الله يتعامل بس بالنوگ
مكايل شي يعني يصيرن ٣ نوگ
وأصغر ناگة أذا مو أربعة فهي بخمس ملايين
-أبويه أنسطر وبقى يباوع بالوجوه
ويعرف الرجال مايجذب ولا يغش
وأركان حالته صعبة هو والمخبل سوه
والحالة المادية الحمد لله مستورة بس كل العدنا ما يجيب حق ناگة وحده
//فرح تعاي انتي وامي ورايه للغرفة سولفتلهن على حجي الرجال وشنو الطلب
//يمه نريد نشتري أركان شعندج ذهب أنطينياه ،،وانتي فرح هم أنطيني ذهبج
ووعد رجل حر أرده الج أضعاف بس أشتري أخويه
فرح/امي بعدها واكفة جبت ذهبي
هو محبس وترجيتين وكلادة
بقيت لابسه بس الحلقة
وأنطيتهن لمحمود
وامي عدها بس حجل واحد
لان الثاني نطته المنى هدية عرسها
محمود/ما اتوقع هذا الذهب يجيب
حق ٣ نوگ يمه دبريني
-يمه لا تبجين فدوة أروح لتراب رجليج
فاطمة/يمه مستعدة أبيع الثوب الساترني
بس كون يفك أخيك من ضيمه
يمه هذا الهيبة هيجي يصير بحاله هو والبدون عقل سويه
فرح/يمه لا تبجين فدوة أروحلج هسه أصيح على منى هي مرته بعد شلها بالذهب ورجلها مريض
-طلعت وصحت على منى أجتي دخلت للغرفة وسولفتلها عن طلب الزلمه
واني وامي نطينه ذهبنا
هي خطية ماكالت شي نزعت كلادتها ومحابسها أثنينهن وتراجيها والحجل
ونطتهن بيد محمود بقت نفس حالي بس الحلقة لابستها
محمود/أخذت ذهب امي والبنات ودخلت للصالة ،، وخليت الذهب كدام الرجال
-عمي هذا ذهب امي وزوجتي واختي
وبقن لابسات بس حلقات العرس
غير هذا الذهب ما نملك
وعن القسم زوجتي الثانية ذهبها عند أمها وهي غريبة ما اريد أخذ منها لان ما اعرف ظروفي شلون تصير
اذا تساعدنا لوجه لربك الكريم وتاخذ
هذا الذهب حك ألنوك جزاك عند رب كريم
أبو أيوب /أبشر وأنا عمك
وبقوة الله الواحد الاحد
السحر محصول عليه وجايبه لعدكم
-اول شي أحبسولي الحريم بحجرة
لان بس يخافن ويبدن يصرخن يخربن تعبي
-ومحتاج معجن نظيف وطاهر (نجانة عجين) وترسو ماي بارد
واحتاج ايزار نظيف ما متغطي بي بشر
وحبل طويل أجتف بي الزلمه أركان
محمود/يابه ومو هل رابطين أيديه ورجليه
شلون بعد نربطه
أبو أيوب /هذا ما يتسمى أجتاف
الزلمه مسحور ويصير أقوى مني ومنك
جيبلي حبل وجتفوا مثل كماط الصبي
لان بس يحل جتافو يذبح كل الموجودين
بالبيت وما يوعى على نفسو
محمود/هسه صدكت هذا الرجال حاكم جن
-رحت على امي أنطتني قروانة العجين
مليتها مي بارد من البوري وخليتها كدام الرجال
رجعت على الغطه
فاطمة/يمه ما عدنا غطه ما منيوم بي
كل الفراش ناموا بي خطار عرس أخوك
سودة بوجهي حتى ما اتهنى بعرسه
منى/يمه انتي مو سكمتيلي فراش بعده جديد محد نايم بي موجود فوك الكنتور
محمود/يلا كومن كلجن بغرفة امي
واخذن أسلام وياجن
وانتي جدة صفية هم أدعبلي وياهن
وكعدن سبحن وأستغفرن ربجن
لا تحشن بالرايحة والجاية
-دخلتهن بغرفة امي وقفلت عليهن الباب
صعدت فوك لغرفة أركان ونزلت اللحاف
بعده جديد بخيوط الندافة ،،نزلته للرجال
-ربطنا أركان من الاكتاف لحد الرجلين
نمنا بي نوم اني وابويه
و الرجال كمطه نفس اكماط الطفل
-الرجال خلى القروانة المليانة مي كباله
وشمر بيها خرزة
وفتح اللحاف وغطى حلك القروانة
وبعدين لفلفها وغطاها من جميع الجهات
وطلع الخنجر وبقى يشخبط على اللحاف
ومره يردد ايات قرانية
ومره يسكت
ومره يحجي كلام ما مفهوم
صاير يطلع من حلكه وغف نفس مريض الصرع ،، وبقى يدردم ويصيح ويعيط
هواي تعب صرخ /طفو النور ،،أسرع أطفي
طفرت وطفيته
-صارت الصالة ظلمة ،، لان البردات نازلة
من صدك عشت بحالة رعب
ما اكذب حسيت بخوف
حسيت جو الصالة أنشحن بطاقات مختلفة أيجابية وسلبية
شويه وأسمع صوت ربدة قوية ،، بالضبط
((صوت وقوع بلوكة من السطح للكاع ))
كال بتعب /يبا نور المكان
ونوروا قلوبكم بذكر محمد وال محمد
-طفرت وشعلت الضوه
اباوع عليه منتهي تعبان ويزخ عرك
ويرجف من التعب تكول راكض ١٠ كم
-تمدد بنفس مكانه ما كدر يتحرك
وره شويه ابويه انطاه كلاص مي
كال /أطلق أجتاف الزلمه خلص شروا
-كمت وفتحت اجتاف أركان
وهو بعده يجز بسنونه عليه
كام عليه الرجال وشال الخنجر بوجه يهدده
-لا تكولون خرافات ،،وماكو سحر ،،
وأنت مثقف وشلون تأمن بهيج شغلات
ليش أأمن لان السحر مذكور بالقران
وهاي سوالف مابيها مثقف وجاهل
بيها الطيب والخبيث هي التحكم بيها
-الرجال كشف القروانة ومد أيديه واخذ الخرزة من المي
وأشوف صرة مال جلد ملفوفة بخيوط
وصاير بحجم طوبة الگريگر
-كال/أنسف ماي المعجن بالمجرة
وارجعلي من دونها
كمت وأخذت القروانة وصبيت ميها بالمغسلة
وخليتها بالمطبخ
رجعت للصالة شفته بدا يفتح بالصرة على اللحاف ،، تقرب عليه أبويه وجدي سليم
كعدت كباله
هو ابد مالزم الصرة بيده
مزق الخيوط بالخنجر ، وفتح الجلد
بداخله خامة بيضة مكتوب بكل ركن منها اسم ،، ٣ اركان منها أسماء نسوان
والركن الرابع أسم رجال
اعوذ بالله من الشيطان الرجيم
شنو يجي على بالكم موجود بهاي الصرة
اللي اتذكره ((ماشة ،، دنبوس كبس
دنبوس ابو راس ،، دكم ،، أبرة ،، خيوط
أظافر ،، شعر ،، قطع قماش صغار ملونة
حفاظة نسائية وسخة ،،
كلينيكس ماء الرجال ،،
ذبان ،، سنون يمكن مال باجة ،،
قفل من شكل والمفتاح من غير شكل
قطن بي صخام ،، قلم مكسور ،، بسمار معوج قطع كزاز ،، اوراق بيها شخابيط وكتابات مو واضحة ،، وبعد شغلات تشيب الطفل
والمصيبة الاكبر كل هذن الشغلات محفوظات
بنص الطبقة اليسرى لقفص صدري مال طفل
-ألاسماء ما عرفناهن
الرجال هواي بقى يعيد با أسماء النسوان والرجال الوياهن على أركان
هو صاح// اي عرفت وحده بس ((بلقيس))
ابويه طفر عليه وكعد كدامه
//يابه من انداريت فدوة الطولك بس أصحى وردلي أركان وليدي هذاك الحيد الاولي
-منو هاي بلقيس؟؟
أركان/وحده عرفتها بالتلفون
اتصلت بيه رقم غلط ولطشت
وصارت بيناتنا علاقة حبجيات
وهي عرفت بيه ضابط وأرمل
شكثر لمحتلي على زواج واني طنشتها ابد ما نطيتها مجال
أبو أيوب/هل حرمه عدها علم
أنك متزوج جديد
أركان/أي بلغتها بعد ما خطبت
اتصلت عليها وكتلها خطبت وراح أتزوج
وبعد ما اكدر اتواصل وياج
وهي بقت تبجي وتعاتب شلون اتركها
وهي حبتني وتعلقت بيه
أبو أيوب /ملتقي وياها طاعمتك
بمأكل لو مشرب
أركان/أبد لا ملتقي بيها ولا شايفها
فقط اتصال بالتلفون
-بس البارحة ب الحلم !!!
رحت لشقة ولد صاحبي وجماعتي جابو نسوان وشرب واكلت وشربت وياهم
بس المشكلة ما اتذكر تفاصيل الحلم مااااااتذذذذكر راسي مشوش
محمود/أباوع على أركان قلق
ويحجي نفس ألأنسان ألالي
عاد أبو أيوب كال /أبو محمود يا أخي فقط الباقي من جثة الصغير أحسن تغسيلها وتكفينها ودفنها لان روح هل صغير متعذبة ومتعرف تنام بلحد وتهيد
-وباقي الشغلات مع هل الغطى
أريد مكان أحركهن بي
-عاط أركان /متحرررررك شي أحررررككم واحرك البيت وياكم
رجعنا ربطناه لان تخبل علينا
ويعيط// متحرك شي
-الرجال طلع القفص الصدري للطفل
وحتى ما لزمه بيده كله شغله بالخنجر
ولزمه بطرف اللحاف ولفه بعلاكة
وتركه على جهة
-صعدنا للسطح وتركنا أركان جوه مربوط وتعال أسمع الصايح والفشار والغلط
الرجال بدأ يحرك بالشغلات الموجودة بصرة الجلد ،، وحرك حتى اللحاف وياهن
-وأركان طيح دهر بالعياط
اباوع الجوارين يباوعون علينا من السطوح
ما ادري لان شافوا نار بالسطح من أحترك اللحاف ،، ما ادري لان يسمعون صياح وعياط أركان
عاد هو أبو أيوب كال /هذا يصرخ
لان أحترك السحر وسقط عنو يتاذه
بس تخمد النار يرتاح ويستقر
-نزلنا جوه هو بيده غسل القفص الصدري مال طفل بالمغسلة ،، لبس علاكة يلا لزمه
وقرا عليه أيات قرانية
وبقى يردد كلمات قرانية معينة
ويتعوذ من بليس
راد خامة نظيفة يكفن صدر الطفل
صفنت منين أجيبله
رحت لنضدة فرح ونزعت وجه مخدة وأنطيتهيا ،، كفن القفص الصدري بالصحيح ويسولف وياه// يالصبي بريني الذمة وأشفعلي يم ربك لان فكيتك من هذا العذاب
عاد كال لابويه//أدفنه با اقرب مقبرة يمكم
خطية صغير وماله ذنب بجرم الحريم
-بعدين تقرب على أركان وطلع خرزة من الجيس وخلالها بين رجليه هو بعد مربوط ومتمدد ،، واركان أنصك صار خشبه
وره شويه نام وكام يشخر
أبو أيوب /يا أخي أبو محمود طلعت من خطيتكم و وفيت بوعدي الكم
حلال عليكم الصحة والعافية
وحلال عليه ذهبكم واتمنى يكون من نفس طيبة ( بدال النوگ )
السحر طلعتو وجبتو لعدكم
وعرفتو منهي فاعلتوا
وسحر الطعوم بعد جدامكم شروقين للشمس
انتظروا فرج ربكم
اركان سحبت منو مس اللعين الرجيم
جدام عينك بهل الخرزة المباركة
بس يصحى من نامو يرجع أنسان طبيعي
بلغوا يغسل غسل مس الميت
واي شي من ذاتو يقذفو بالنفايات
او يحرقو أتركو براحتو يعمل اليحلالو
-تشكرنا من عنده ،، وتبارينا الذمم
سلم علينا من طيب خاطر
أبوي أخذه بسيارته وطلع يوصله لمكانه
-رحت فتحت الباب للنسوان
وسولفتلهن عن كلشي صار
جدة صفية وامي تخبلن يسمن بسم الرحمن
ويتعوذن من بليس
-يمه هسه أركان ترى طبيعي بس نايم لان تعبان
-اني وجدي سليم نروح ندفن باقي جثة الطفل خطية ،، والله ما يرضى بالظلم
-وانتن بعد أطلعن من الغرفة أخذن راحتجن
فرح/وداعت أهلي شكيت من كال سحر الطعوم،،بس ماكدرت أحجي واكول أم علاء ورفل من وزعن الحلويات هن طعمنا
خاف يكولون لان شريجتج وتدورين حجة عليها وتردين تسوين مشاكل،،خليت وسكتت
-بس الصراحة الفار لعب بعبي منهن
رحت للمطبخ الحلويات أخذتهن لفيتهن بعلاكة وشمرتهن بحاوية الزبالة البره
-صعدت الغرفة منى سحبت النزلة من الجرباية بعد ما تأكدت هي ٦ قطع نفس النزلة مالتي بس غير لون
وخليتها بالسطح وشعلتها فوك بقاية الشغلات المحروكة ،
-أستغليت فرصة رفل ومنى وامي حايرات ويه اسلام المسكين غدى خركة من التعب من كثر ما زوع وطلعت بطنه اسهال
-رحت صلخت شلتت المندر مال جرباية بقى على الاسفنج ،،وهم رجعت حركته وصلخت شلتات المخاد وبقى بس القطن وهم حركتهن،،
-نزلت جبت السيت اللي منى جانت لابسته ودشداشتها،،وملابس اركان الجان لابسهن وهم حركتهن احسن حتى ما ابقى بشك
ولو اني متأكدة هاي سوالف رفل
محمود/رحنا اني وجدي سليم دفنه بقاية جثة الطفل ،،
-بالطريق حسيت بطني بدت تلويني
شوية شوية زاد عليه المغص
رجعت للبيت وسكنت التواليت
بطني طلعت دم صار عندي (دِزنتري)
كمت أفوج بالكاع من كثر المغص والالم
فرح/سودة عليه أشوفه يتلوى وممغوص امي بقت الهول دافي علمود أسلام للعصر يلا شويه خف وكدر ينام
وهم علمود محمود بقى مجطول ومدثر بصف الصوبة
-للمغرب وبلشنا أني ومنى نزواع
هي تطلع من الحمام اركض وادخل أني وراها
-أمي ،،وأبويه ،،وجدي سليم،،وجدة صفية
أبد ما صار عدهم لا زواع ولا سهال
-رفل سمعناها مرتين توع بالحمام
استغفر الله صدك لو جذب بعد ما نعرف
بس الله يعرف بنواياها بعد
-امي أنثولت متعرف شسوي بقت تفر براسها
على منو تلتفت ومنو اللي أداري
اسلام غدى خركة من التعب بس مسنح ويباوع بعيونه
ومحمود يلوب وذابحه المغص عنده دِزنتري
واني ومنى كعدنا باب الحمام
اني خفت على حملي لا أسم الله يصير شي بالطفلة
-عاد امي طبختلنا جدر شوربة فركاعة بصل شوربة بيضة بس تمن ابيض ما خلت وياها غير شي مثلا عدس او ماش هاي للمرضى
وللصاحين طبختلهم أكل عادي
أركان/احجي الصراحة كل هذا اللي أنذكر من قبل منى و فرح
ومحمود والاهل ما اتذكره !!!
-اتذكر من كعدت بمصباح العرس
ومن تريكنا من جانت ام علاء موجودة بعد ألريوك أختنكت واحس نفسي ثكيل يادوب سبحت وصعدت نمت
بس أنجطلت حسيت دود ويمشي على جسمي ،، غفيت وهي النومة
حسيت كل الصار والسولفوا بي عندي حلم !!
-وعيت شوكت من هذا الحلم الغريب من صار كبالي رجال غريب يسألني منين تعرف بلقيس !؟
بس احس شلون اكو بداخلي انسان آلي يوجهني ما اكدر أتحكم بنفسي لو بتصرفاتي
-من حرق اللحاف و الشغلات صح اني واعي بس ما اكدر أسيطر على نفسي
حسيته حركني اليه مو حرك هاي الشغلات
نار وشعلت بجسمي
اصرخ أريدهم يطفوني بس محد يسمعني لحد ما تعبت وسكنت وخمدت عندي هاي النار ،، شعور بالالم فضيع ما ينوصف
يعني نار وتاكل بيه شلون ابقى ساكت
-ومن ثبت الخرزة على رجلي أني اباوع عليه
واشوف شنو بايده ،، مو خرزة صغيرة
لا حسيتها بحجم صخرة جبيرة وشمرها على رجلي ،، وبدت تسحب من شعر راسي
الى اظفر رجلي هوى
تشفط من جسمي هوى وتبلع
-صدك أرتاحيت وهدأت روحي
صار مدة يجي ب ٧ أشهر لو ٦ أشهر
ما نايم هيج نومة حلوة
نمت نومة طفل مرتاح وخالي باله
-فزيت ميت جوع وعطش
صحيت واعي ونشط كمت رحت للهول
-فارة النضد وينج حبا...
منى/مابيه حيل أشيل جسمي من الضرب كل جسمي يون عليه ،، خلف الله على المسكنات تهدي عليه
وانوب أجتني سالفة الازواع أنتهيت
كمت أسحل بروحي بالكوة اوصل للحمام وارجع للهول أشمر نفسي على القنفة
-الهول صار عبارة عن ردهة طوارئ
محمود وأسلام فارشيلهم منادر ونايمن بالكاع
واني على هاي القنفة
وفرح على هذيج القنفة الثانية كبالي ورفل نايمة نص نومه بكرسي التخم ومدثرة
وامي وجدة صفية وجدي سليم
كاعدين يشربون جاي
-بس سمعت صوت أركان طفرت
هي ركضة وهي صرخة وختلت بظهر جدي سليم //فدوة جدي ألحكني راح يموتني
محمود فدوة كوم أربطه راح يكب الجن عنده
محمود/ههه مابيه حيل أضحك
لا تخافين بعد صحى متسمعي يكول فارة النضد رجع لخبالاته الأصلية
اركان/صفنت هاي شبيها !!!
كل الموضوع الصار ويايه عندي حلم
-شبيج ماروكو ؟
يمه هاي ويامن متعاركة وهيجي فاني حالها!!
فاطمة/يابعد أمك وأهلها
يبعد العمر وشيب السنين
ماقصر أبو طلبة باب الحوايج حلفته بظلع الزهرة ،كتله هي ام ومكسورة ظلع
واني ام ومكسورة ظهر بوليداتي
أريدهم من الله ومنك لا تردني
جدة صفية/يمه الحمد لله على سلامتك
الحمد لله من خلصت من الجن
ترى ركبك ركوب وسواك مطي وساگك للضلالة
محمود/ههههههه،،مابيه حيل أضحك شلونك أركان جني
فرح/اركان بقى واكف باب الهول يتصفن
ومنى خاتلة بظهر جدي سليم
وامي وجديتي يصيحن على اركان يكعد يمهم ويشرب جاي
ومحمود يضحك ويكول// اركان جني
واسلام شال راسه من المخدة باوع على ابوه ورجع سنح ونام
واني حالي بالضيم بطني طوبة متقلصة
اركان/كعدت يم جدتي صفية
أباوع على منى ترجف وخايفة من عندي
//ترى كل الصار جنت أتصوره حلم
-ماروكو وروح جديتي ما ادري بروحي والصار عبالي حلم
فاطمة/يمه أجيبلك أكل
اركان/يمه ذابحني الجوع والعطش
بس روحي قفلت من شفت هاي
الكوارث البشريه كبالي
فرح/منى أنهزمت بغرفتي وقفلت عليها الباب تخاف من اركان
-وهو رغم ما جوعان وعطشان
امي جابتله الاكل أكل لكمتين
وبقى يتصفن ،،
-بعدها نام بصف أسلام
ونومه بحظه ويمسد على راسه
-من رجع أبويه ما مصدك اركان رجع لطبيعته بقى كاعد بصفه ويسأل بي عن هاي البنية
ويحقق وياه هو ومحمود اللي لحد هسه بطنه زنتري
-رحت على منى الغرفتي
وسولفتلها عن شكي تجاه رفل وام علاء
وكتلها أني حركت كلشي من النزلة
لشلتات المندر والمخاد
لهدومهم الجانوا لابسيها ونامو بيها على النزلة
منى/وروح جدي يا فرح اني من البداية شكيت اكو شي بالحلويات
لان هي وزعت وقسمت علينا
وشفتي رفل ابددد ما اكلت
بس هي ام علاء اكلت حلقومة وحده هي أختارتها بنفسها
وملحة رفل على النزلة افرشها على الجرباية جانت مو طبيعية
فرح/شوفي الرجال يكول على اركان موجود على فراشه تراب ميت ما ادري تراب مكابر
اني صفنت منين اسم الله اجانه هذا التراب
بس من تذكرت النزلة جابتها ام علاء كلت ماكو غيرها
منى/واني شعلية انتي وياها شرايج
فرح/مووو الزلمه يكول تفرقة
يعني يخلن عيال البيت ما يتراهمون سويه
-مر الليل واني ومنى نايمين بغرفتي
خف عدنا الزواع بس لعبان النفس موجود
-ومحمود صوفر وجهه من كثر اللويات
-واسلام الحمد لله صحى وامي وكلته شوربة
-للفجر طلعت اتوضى اريد اصلي
واشوف اركان يلوب يروح ويرجع يفتر بالبيت// شبيك شو تلوج شعندك
اركان/فارة النضد بطني كطعتني
اريد اخذ علاج وابويه ورجلج ما يقبلون
يكولون الرجال مايرضى
فرح/اي بلكت الله تصحى من سحر الطعوم
اركان/اااخ يالفارة اني شاك بشغله
بس ساكت وملصوم مااكدر أحجي
فرح/الله على الظالم
حسبي الله ونعم الوكيل على كل بشر مؤذي
-صليت الفجر ، ومنى كاعدة بس متقبل تطلع من غرفتي تخاف من اركان
-وهو كام يفوج بالكاع من الالم
امي وابويه كابلوا وكعدوا
وجدة صفية تقراله قران
-ابويه ماطلع للشغل
وامي مكابلته وتبجي على حاله
وهو انجطل بالكاع ويتكلب يمنى ويسرى
سودة عليه كسر كلبي كام يبجي ما يتحمل الالم
اركان/يمه مصاريني تكطعت
يول محمود بداعة دم الخوه سويلي جارة
يابه عاجبك هيجي وكاعد تتفرج على حالي
فاطمة/نبقى هيجي كاعدين ونتفرج عليه
مو راح يموت اخذوا للمستشفى
عادل/لا مااريد ياخذ علاج
خل يزوع السحر
منى/شكثر ضربني واذاني بس من شفته هذا الرجال القوي شكبره وشكده يلوب بالكاع ويبجي كسر كلبي ،،بقيت واكفه باب الهول بعيدة عليه أبجي واتفرج حاله
حالته بالضبط شبهتها نفس حالة امي من طلكت بالبنات الصغار وجابتهن توم هو هم يطلك شنو يفرق عنها يصرخ ويبجي ويفوج بالكاع
فرح/الحمد لله محمود وكفت بطنه بس
جسمه خاوي من التعب
الحمد لله تقريباً كلنا أستقرينا
كابلنا اركان وكعدنا حالته تبجي اليهودي
-للظهر وبدا يتوع بس هوى
تفرفح روحه لان يختنك
وره شوية وتاع بس شنو هلمرة أختنك وعيونه نطت وتدمع ويدك بيده بالكاع
طلعت روحه المسكين
ابويه يطبطب على ظهره
زاع بكبر جف أيد الطفل الصغير نفس طحال الطلي قطعة مال دم جامدة
المسكين شويه ارتاح
ورجع على نفس الضيم ونفس الحالة وزوع ٣ قطع جبود مال دم
صار وجهه أصفر يرجف ويزخ عرك
محمود قاس ضغطه صار عنده هبوط حاد ومنكدر كلشي ننطي لان ابويه كابله وكعد وميقبل كلشي ننطي غير المي
اركان/المريت بي للكافر وللبوذي اكول خطية
شنو وجع شنو ألم
شي ما ينوصف
مصاريني تمزقت
من تقيأت جبود الدم يلا حسيت روحي
رجعت خفيفة وفك عني الثكل الموجود بصدري ،،
بس شنو تعبت تجنزت
لو مقبليني وقارلي سورة يس
اهون عليه من ذاك اليوم الاكشر
منى/الحمد لله أستقرت حالته
وابويه عادل شمر جبود الدم بتواليت
وكال لفرح وامي اغسلن كل البيت بمي وملح
وشيلن فراش الهول والديوانية واغسلن كلشي بمي وملح ،، وخلن فراش جديد
فرح/مابيه حيل خاوية من التعب
اني وامي ومنى بس شلنا الفراش
وجدي سليم وابويه ساعدونا
شمرنا القديم بالحوش للغسل بعدين نغسل
ومسحنا الكاع بمي وملح وفرشنا زوالي جديدة
اركان/ماروكو تعاي يمي اريد احجي وياج
منِئ/اركان طلكني ........
شكرا لزيارتكم عالم روايات سكيرهوم
