رواية ارحموني ولو رحمة مرة الفصل السابع والعشرون بقلم فراقد حسن علي
فاطمة/يمه محمود ما دام محد موجود يمنا
اريد منك تعدل بين نسوانك وتكسر الشر ،
وتكسب رضاة ربك عليك
الى متى تبقى هاجر مرتك رفل حرام عليك يايمه .
محمود/الله كريم يمه اني هم مفكر
اكعد وأسولف وياها
فرح/جسمي مكسر تكسر وميتة من التعب
أنام هنا وارد أنجطل هناك
-يادوب اني ومنى هيجي شلون ماجان رتبنا البيت ،، وطبخنا هل قاسمه الله خطية ابويه وكع من الجوع ،، ناس أكلت
وناس قشمرت على أرواحها اكلت بالجذب
-منى كالت/اني اغسل المواعين
ورفل كامت خدرت الجاي
واني أنجطلت على رجل جدة صفية
وهي خطية تقرا على راسي ايات قرانية
غفيت على رجلها
منى/بلشت أعزل بصينية الأكل
وارجع الباقي للجدورة
والباقي قليل أخلي بالثلاجة
سمعت صوت وراية بس أخاف ألتفت
اركان/ماروكو تعاي أكعدي
يمي اريد احجي وياج
-منى كالت/اني اغسل المواعين
منى/منين أجيب الحيل يا أبو سكينة
أريد أسيطر على رجليه من الخوف ما اكدر
أنداريت عليه أشوفه مايكدر يوكف على طوله كعد بالكاع المطبخ امي فارشته زولية ومدة من جهة الباب
اركان/منى عذريني وداعت ابني جنت مو بوعي وعبالي كل الصار حلم
ابد ما تصورته حقيقة
منى/اباوع للباب حتى أشرد
خاف هم يرجع ويكب عليه مره ثانية
//اخاف منك الله يخليك طلكني
بعد ما اكدر أعيش وياك الخوف موتني
بليل ما اكدر أنام كلساع أفز مرعوبة
احلم تخنكني لو تذبحني
الله يخليك طلكني وخليني ارجع لاهلي
أركان/من كل عقلج تحجين
يابه وداعت أبني ما ادري بروحي
ماتشوفيني حتى ما اكدر اوكف على طولي
شوفي وجهي مشوهه محمود من الضرب
وابويه يكولي انت شارب ومعاشر نسوان
وروح اجدادي ما ادري بروحي عبالي كل الصار حلم
وشوكت ما برد كلبج عليه
وأطمئنيتي من ناحيتي حظني مفتوح الج
-لا تبجين من خرب لشة بلقيس
منى/الله يخليك لو انت تروح للهول
لو اني ،، ترى راح أتخربط من الخوف
اركان/اني رايح أنجطل بغرفة امي
وشوكت ماصار عندج مجال بس أصعدي
رتبي الغرفة فراشها مكلوب حتى ارتاح فوك
منى/شبعت بجي
معقولة هذا أركان الجنت أحلم بي
وأحبه وأموت عليه هسه كمت أخاف من عنده،،وكل جسمي يرجف من أسمع صوته
-بعد ماكملت شغل المطبخ البيدي
صعدت للغرفة وبلشت أنظف بيها
مسحتها بمي وملح ،
وخليت نزلة جديدة ،
وطلعت مخاد جديدات وغطه جديد
رتبتها ورجعتها نفس اول وأحسن
محمود/الف الحمد لله
يمكن هاي مساعدة ابويه للفقراء
ما ادري فطارية كلب امي ولسانها الطيب
وهل ابويه حصل البدوي وفكنا من شر السحر ،، اكو ناس خطية تموت بسببه
ومحد يعرف يفكه لهم ويعالجهم من شره
اركان/الف الحمد لله أني دائماً
اردد ((من يتق الله يجعل له مخرجاً))
والحمد لله ربي نجاني من كيد النساء
-بس وداعة خوتنا ، وراس أبويه
متحلف البلقيس الا أدمرها وأطيح حظها
محمود/أركان بالك تتهور
اذا هي عود حبتك وسوتلك السحر مره
وأنت تريد تأذيها ترجع وتنتقم منك
وتسويلك السحر الف مرة
-نصيحتي الك
مو شغلة خوف أو قلة مراجل
لا السالفة رادلها عقل
اول شي ممنوع تتصل بيها
أو تبلغها بسالفة كشف السحر
حتى لا تجدده الك مره ثانية
خليها تبقى على يقينها ان السحر قائم عليك
-وثاني شي غير رقمك حتى لا تضايقك بالاتصال والمراسلة
-وصدكني التمشي بهيجي درب مو شريفة
وزايعة نقطة الحياء والمستحى والعفة والشرف
أركان/يا أبو شكرية خربطت تفكري
بهذا كلامك ،واني جنت ناوي أطيح حظها
محمود/أتركها رب الحق مايقبل بالظلم
هو ياخذ حقك منها
بس كول الحمد لله من ابويه حصل الرجال
وتلاحكك وفكك من الشر
-صدك نسيت أبلغك الرجال البدوي
كال خلي يغسل غسل مس الميت
اركان/هاي سهلة
هسة هو حل السالفة الجبيرة
ماكدر يحل سالفة الصغيرة
مريتي هل خايفة من عندي ومطنكرة عليه
محمود/حقها ترى صغيرة وبعدها عروس
ثاني يوم الها وتشوفك هيجي مخبل
شتتوقع منها مو زين ماهي تخبلت
ترى انت كفرت بحالها
يول لا تخليني أللغي فرح تبجي عليها
تكولي متملخة وحالتها صعبة
وامي أخذتها للدكتورة النسائية ورادت تكتب بيها تبليغ للشرطة ان هي مخطوفة ومغتصبة
أركان/وداعت أبني أسلام مو بوعي
وارجع وأكول عبالي كل الصار حلم
محمود/هسه بيك زود فكر شلون ترجع ثقتها بيك ، تحايل عليها بكلمة طيبة
بسالفة حلوة ، بهدية صغيرة
بحظن دافي وترجع علاقتك وياها
بس ممنوع تصرخ عليها لو تخوفها منك
اركان /الله كريم نشوف شلون ترهم
محمود/هسه اني صاعد يم رفل
اريد أتفاهم وياها ، اريد راسي يرتاح
فرح/فزيت جدة صفية ماكو ولا جدي سليم
واني بعدني نايمة بالهول بس جوه راسي مخدة ومغطيني بطانية
واسلام نايم بصفي
وامي مجطولة على القنفة بدون غطه خطية
-كمت أجيب بطانية أغطي امي
مريت على غرفتها
شفت أركان مجطول بالكاع
وأبويه على جربايته
أخذت بطانية ورجعت غطيتها
-يعني جدة صفية وجدي سليم
رايحين لبيتهم
-رحت الغرفتي محمود ماكو
هذا وين راح
-صعدت فوك على منى
وأسمع صوت ضحك رفل ترمي مو تضحك وصوت محمود يشاقه وياها
يابه نار وشعلت بيه
صح حقها وهو رجلها نفس ماهو رجلي
بس بعد نار الغيرة ما ترحم
-خليت ونزلت لغرفتي شبعت بجي
يجوز تكولون عليه انانية بس شي مو بيدي العدها شريجة لو اللي رجلها مصادق عليها وعارف عليها مراه ثانية تحس بالنار الشاعلة بصدري
-صار وكت العشه ومحمود ما نزل
لا هو ولا رفل
امي ومنى جهزن عشه بسيط
محد اكل كلنا تعبانين ومالنا خلك
نزلت رفل أخذت ماعون فاكهة وصعدت
-اني ناديت على منى جابت وياها أسلام
ونمنا بغرفتي
وأركان صعد الغرفته
منى/هاي شنو ليش هيج أسلام يخلي
ايده بصدرج
فرح/من هو بعده جاهل حيل صغير
امي معلمته لو يمد أيده بصدرها
لو طلعه اله يضم وجهه عليه وينام
وحتى رفل معلمته نفس الحالة من ينام يمها
لو من يجي ينام يمي يخلص الممية
يشمرها ويدور حنان صدر ألام يلا ينام
يمعودة ينام هيجي ولا يلج هزوني على رجليكم ويبقى ساعة يبجي يلا ينام
خلي الله هادي علينا
منى/اكول خاف حرام تخلي يمد أيده عليج
فرح/شوف هاي يول هذا أبني
وهو طفل ما يعرف شغلات خبث وفساد
هو جاهل يدور حنان صدر أمه
منى/شويه وشفت فرح غفت
وأسلام نام بحظنها
-بقيت أتكلب وأفكر هسه أركان نايم لو لا ،
وهم يفكر بيه نفس مااني أفكر بي
محمود/بعد ما حاجيت اركان
ومشوا بيت جدي سليم وجديتي صفية
والكل أخذله كسرة نوم
صعدت فوك يم رفل أريد أفتهم منها
وتفتهم مني
-بقيت أتكلب وأفكر هسه أركان نايم لو لا ،
وهم يفكر بيه نفس مااني أفكر بي
-كعدنا وسولفنا وخلينا النقاط على الحروف
ممنوع بعد تندك بفرح
ولا تعيرها
ولا توصل يمها
ولا تسوي مشاكل لا وياها ولا ويه منى
-وتعاتبنا لان ضربتها وسقطت الطفل
وكتلها//اني صحت عليج ألزمي الطفل
وانتي تركتي وأنسحك بسبب فهاوتج وسكتت كلت قضاء وقدر
بس من سمعتج بأذاني تجذبين وشمرتي سحكته براس فرح
لا حقدت عليج وضربتج
-وبعد الكلام و العتاب تصافينا ،
سحبتها لحظني وعيشتها أحلى أوقات
وعوضتها أشتياق الاشهور
لان هي بينت شوگها اليه
و أشوفها ملهوفة عليه
ومجلبة بحظني
عيشتها بليلة العرسان
بقينا كاعدين لوكت متأخر
فرح/كعدت الصبح ومنى كعدت ويايه
متعلمين على شمرت أهلنا العرب
طلعنا بوجهنا للحوش وغسلنا كل الفراش والزوالي المشمورة بره من يومين
وشلناهن على قناني الغاز ،
وبعدها غسلنا الحوش ونشفناه
-دخلنا على البيت اني أستلمت التنظيف
ومنى أستلمت المطبخ تنظيف
وكملت الريوك
بلشت من الكلدور للهول للديوانية
كنس وارجع أمسح الكاع الطالعة بديتول
ورجعت على الدرج والحوالي
هم مسح بديتول
وأنوب دخلت للحمام غسلت الهدوم
منى خلصت شغلها وأجتي شرت الهدوم على أيدي
وأنوب أستلمت الحمام والتواليت جلف وغسل بديتول
-أخذت هدوم ودخلت سبحت
طلعت لفيت شعري وشلعت الصوبة بالهول
ومنى أخذت ملابس من عندي وهم دخلت سبحت ومن طلعت بس لفت شعرها
وره الريوك نمشط
كعدنا يم الصوبة أثنيناتنه ذبحنه البرد
عادل/صباح العافية يابه
من انداريت فدوة للبنيات
منى،،فرح/صباح النور
منى/عمي هسه بس أشيل شعري
أصبلك ريوك
عادل/ما احب كلمة عمي
ربي مارزقني ببنيات حلوات مثلجن
فعوضني بيجن تصحيلي يابه حالج
حال فارة النضد هههه
منى/ههههه اي ان شاء الله
فرح/ها بويه ضحكتها عليه
عادل/لا يابه شلون أضحكها عليج
وهي زنبورة صفرة هههههه
منى/ههههه اي ان شاء الله
فرح/ههههههه هاي قوية مال زنبورة صفرة
منى/هم تضحك فارة النضد
فاطمة/يمه صباح ودعوات الزهرة ام الحسن
الجن بالصحة والعافية وعسنهى ضحكة دايمة
عادل/صباح العافية
شفتي بناتج وحده فارة النضد
والثانية الزنبورة الصفرة
شلون نادرات ومعدلات طالعات على أمهن ملكة النحل
أركان/حجي على كيفك ويانه
وبالذات ويه القزل من الصبح
ترانه طاكنه الجفاف وحتى قزل ماكو مطنكرين علينا
-صباح الخير عموماً للجميع
وصباح القزل للزنابير الصفر خصوصاً
منى/من رخصتكم اروح بغرفة فرح أمشط شعري خاف يوكع هنا شعر وابويه يضوج
عادل/تعاي يابه أستجني بمكانج
ولا تشردين من وره زنبور أصفر
نخاف لا يكب علينا ويلدغنا كل احنا
فرح/أبويه كمش بيد منى وضمها جوه جنحه وهي بعدها ماتعرف طبعه تستحي من عنده ،
-اركان راح يغسل وجهه على المغسلة
-وامي اسمعها أطكطك بالمطبخ يمكن تحرر الجاي
-وابويه كعد على القنفة يكلب بالتلفزيون
-أجى اسلام يدعبل الممية بيده فارغة يريد نم نم يعني جوعان
-واني ومنى بعدنا على كعدتنا لان تعبانات وبعد ما عدنا طاقة نكوم
خميت الكاع بيدي خاف وكع شعر
منى تريد تشرد من اركان
أخذت أسلام بدلت حفاظته
وغسلت وجهه وشويه بللت شعره ومشطتله
رجعت للهول شايلته على خاصرتها نفس كعدت الكرسي
امي وابويه واركان واني كاعدين بشكل دائرة
اجتي وكعدت بصفي واسلام كعد بيناتنا
فرح/اي هو يحب هيجي ياكل
واذا اخذتي شويه من عنده يكوم يبجي النحس طالع جلف على أبوه
اركان/هااا فارة النضد هاي اني جلف
عبالي من اروح العصر للكاظم ابو طلبة ازور
اجيب ويايه شامية حمرة وحلاوة دبسية
بس من سمعت هذا الكلام بطلت حتى نستلة ما اجيب
فرح/لا تجيب واني أصلاً زعلانة عليك
خوش خارط عليه حجي ماصخ
اركان/يالمخبلة
هسه صدك ثبتلي انتي صدك مخبلة
يول جنت بحلم جايف وانوب سكران
كمت أمزج هندي وعربي
فرح/ما أرضى أذا متجيبلي باجة
و دجاجة مشوية للعشه ولا تنسى كثر مقبلات
اركان/اكول يمه مو هذولك العرب
صايرين كونية طحين من الاكل
ما يبين الهم لا ايد ولا رجل من السمن
فاطمة/يا يمه عساها بالعافية هي دجاجة قابل شطالبة منك
وهذولك العرب لان حامل وبيها بنية منفشة
اركان/اني ما قهرني غير حظ البنية
اللي راح تنام على كلب جدو عادل
لانها راح تطلع جلحة ملحة على أبوها
عادل/وعليش أنت مقهور وأسلام ابن عمها
موجود ياخذها وتصير من نصيبه ومريته
اركان/اكول يابه اكو ناس عايشين ويانه بس خرسان شو ما سمعت صوتهم
عادل/هههههه اصبر على ما أبتليت بي
فرح/منى مطنشة الموضوع ولا يمها الحجي
وتاكل هي واسلام بنفس الكلاص
لكمة بحلكها ولكمة بحلكه
وهو حبيبي بالاكل بسرعة يتألف ويه الواحد
-كملنا الريوك بالعافية
ابويه طلع للشغل
وامي عجنت شويه صار كم يوم ما خابزين
منى مشطت بغرفتي وبقت تلعب ويه اسلام شردت من أركان
واركان بدل ملابسه وطلع ،
دخلت لغرفتي مشطت احب دائما اسوي جذيلة نازلة على ظهري
وانوب رحت يم امي بالمطبخ
-يمه اريد أسولفلج شي بس مو تضوجين من عندي
فاطمة/كولي يمه اسمعج
فرح/امي تعجن واني كاعدة بصفها اسولف وياها بصوت ناصي وحجيتلها عن شكي بسالفة سحر الطعم بسبب رفل وام علاء
فاطمة/يمه تردين الصدك والحجي بيناتنا
اني هم شاكة بالسالفة
وحجيت كلشي لابوج بس هو بعدها من بالي
كال /مادام هي أكلت وياكم معناها الحلويات ما بيها شي
فرح/يمه شنو نسيتي هي أختارت الحلقومة لنفسها ،، اكيد هاي الوحده جانت نظيفة
وهي بيدها الوزعت علينا يعني عرفت شنو انطتنا
فاطمة/اي يمه هم كلت لابوج هذا الحجي
يكول /سدي سالفة ولا تكبريها ما اريد اتخارب ويه أخوي ابو علاء من وره مجهلة وخباثة النسوان
الحمد لله من الله رسلي البدوي وفك عيال بيتي من خبث الخبائث بعد عليش ندور مشاكل سدود الباب عن هذا الموضوع
فرح/اني هم سكتت بس أحجي هسة يكولون هااا لان شريجتها وتريد تسوي مشاكل
-رجع اركان متسوك للبيت
وجايب بدال الباجة الوحده ٣ باجات
//أشعل أبليسك اركان كتلك وحده
هسه شيكسرها اليه
*هي الباجة وكراعينها وكرشتها أنظاف
بس عوزها غسل وتكسير
-صعد أركان بدل ونزل لابس برمودا
والفانيلة البيضة الداخلية
فاطمه/يمه لا تتمرض الجو بارد ألبسلك هدوم
اركان/بس خل أطبر الباجات لفارة النضد
كامت تبجي وبعدين أسبح وابدل
فرح/اجه اسلام يدعبل وكعد يمنا بالمطبخ ومكابل الباجات ويضحك
يمد أصبعه عليها ويضحك ويكول ميع ،،ميع
مره يلزم عينها ،، ومره اذانها
وامي تضحك وياه ،
-رحت جبت الصوبة من الهول خليتها بالمطبخ شوية يدفى بارد الجو
وصحت على منى تجي تساعدني
-منى اني اعزل المسواك لان انتي بعدج
ما تعرفين أماكن الغراض وفرة المطبخ
بين ما امي ترد العجين ودثره
انتي بس الزمي الرجلج الباجة يطبرها
حتى بس اكمل اغسلها واضمها بالمجمدة
-اركان زنبور عود المخ اليه
اركان/تحلمين فارة النضد
منى/مالج علاقة المخ مال ثلاثتهن أحمسهن وبس اني وياج علينا بالعافية
اركان/هاا بيت عادل صايره بي
محاصصة أحزاب وقوميات وطوائف
وانت اركان الفقير الك الله
فرح/بلشت اعزل وارتب بالمسواك
واركان ومنى بدوا يطبرون بالباجات
واسلام يباوع ويضحك
ومنى خلت بيده ماعون
تكله /هسه اسويلك نم نم
وامي كاعدة بصف الصوبة ردت العجين ودثرته وبلشت تلكط الخضرة
محمود/صباح الخير
شنو هل نشاط والحيوية
الجميع/صباح النور
محمود/فروحة حبابة ريوك
واذا تحمسيلي الامخاخ بعد انت معدلة ميحتاج نمدح بيج
فرح/اني شايطة عليه من البارحة
وكاتلني القهر لان ما كالي راح اصعد فوك
وانوب اسمعها تضحك الزرافة
نار الغيرة حركتني
-عندي شغل خلي مرتك النادرة هي تسويلك ريوك
اركان/ههههههههههههه مو كتلكم بيت عادل صاير مثل البرلمان العراقي كله درب المحاصصات وألاتفاقات الحزبية
محمود/بس جفيني شر صواب عيونك
الما يطيح للكاع
منى/هاج فرح ضمي المخ بالفرن هسه
بس اكمل أسوي
اركان/عود للعبد الفقير لفة صغيره وياج
فرح/كملت كلشي
اني ومنى وكفنا على السنك نغسل بالباجات
محمود راح غسل واجى كعد بصف الصوبة
وامي بعدها على كعدتها خلصت تلكيط الخضرة نكعتها بعدين اغسلها من اخلص الباجات
واركان سبح ورجع هم كعد يم الصوبة
واسلام كعد بحضنه يلعب وياه
-وشلت الباجات بمصفي جبير وانطيتهن
لامي تقسمن حتى اظمهن بالمجمده
صار الظهر والخاتون بعدها نايمة
ومحمود كاعد منتظر الريوك
-منى بلشت أجهز مخلمة ريوك المحمود
-شفت العجين صلوات مختمر
خوش خمرة ومي العجن دافي
ومدثر يم الصوبة صلوات بساع شال
شعلت التنور
وأمي ساعدتني شنكت العجين
وبلشت اخبز
منى/خلصت ريوك محمود وخليته كدامه
وجبتله خبز حار كعد يتريك بالعافية
واركان تشارك وياه على الواهس
كمت ساعدت فرح أخبز وياها
صلوات ما طولنا بساع خلصنا المعجانة
-هي كعدت تسفط بالخبز
واني اخذت المخ وحمسته
وطلعت طماطة سويتها شياف رفيعة
لكيت عمبة نكعت الطماطة بيها
جهزت الصينية وكعدنا كل احنا
كل واحد وكعتله لفة
عزلت لاسلام وانطيته بس ما حب الاكل
ولا طعم العمبة يمكن لان بيها حرورة
فرح/يمه اني شوية أنجطل طفيت كاعدة من اذان الفجر
شنو تسوين لابويه غده
فاطمة/روحي يمه ارتاحي
اني اخابره يجيبله كباب وياه
بالعافية الولد شو اكلوا مخلمة
وحميسة مخ وساعة ب ١ بعد عليش نطبخ غده
منى/لملمت المطبخ وكل الهوسة الصارت بي ورحت الغرفة امي استحيت اروح لغرفة فرح خاف محمود يريد يروح يمها ،
-امي هم اجتي وتمددت
منى/لملمت المطبخ وكل الهوسة الصارت بي ورحت الغرفة امي استحيت اروح لغرفة فرح خاف محمود يريد يروح يمها ،
اسلام يريد ينام مد ايده عليه كشت روحي ما قبلت كام يبجي
اخذته امي ونومته بحظنها
فرح/بس أنجطلت غفيت
حسيت على محمود يبوسني
سويت نفسي نايمة ما اريد احجي وياه حتى بالجذب ما كالي راح اصعد فوك
محمود/ترى ادري بيج كاعدة
شو اكعدي شوية خل أشوف شبيج زعلانة
فرح/بس عوفني وروح يم رفل
خلي اطعمك السحورة الزينة
محمود/بدون لغوة زايدة شلج بهل حجي الجايف لو بلشنا على وجع الراس
فرح/كعدت على حيلي واندارت عليه
-اني ما مجذبة هي وامها اللي خلن سحر الطعوم بالحلويات وكل أحنا اكلنا من عنده واتزقنبنا بي حتى الطفل ما سلم من شرهن
محمود/ليش تلغين زايد مو امها اكلت ويانه
وبعدين اذا صدك سحر شلون كلبهن ينطيهن يسحرن أسلام مو تابع الهن !؟
فرح/بس أنتبه شوية وركز زين
ام علاء هي اختار الحلقومة النفسها واكلتها اكيد نظيفة ومابيها سحر
وأسلام ابد ما أنطنه شي هو لطش على منى واخذ الحلقومة من ايدها واكلها
محمود/أنتن النسوان من أدكن على سالفة وتخلنها بتفكيرجن من الحباية تسونها كباية
فرح/هاي لان الحقيقة متقبل اصدكها
محمود/تعرفين تلصمين وماتسويلج مشكلة
واعرف شبيج لان البارحة صعدت يم رفل سويتيلج هاي السالفة اليوم
فرح/بعد ما جادلت خليته كاعد وأنجطلت ولفيت راسي بالغطه لان مايفيد الحجي وياه هو وأبويه مقفلين
-دك على راسي بأصبعه
محمود/خل أشوف منو يحترمج بعد مو صوجج صوجي اني نزلت نفسي وجاي أراضيج
بعد ما نترتي بيه تكول زعطوط كدامج والكل موجود بالمطبخ
فرح/طلع من الغرفة وطبك الباب بقوة
فزيت العصر ،، رحت للهول الكل كاعدين
يشربون جاي ،كعدت وياهم
اركان/لاتسون عشه عشاكم عليه
بمناسبة أرضاء الخاتونة فارة النضد
وأرجاع العلاقات الأخوية لمجاريها التي تحمل الميانة الجايفة
فرح/عووووع شنو هل الوصف
يابه قابلين بلفة فلافل بس لا تلعب ارواحنا
-صدك راح اركان للشارع واخذ اسلام وياه
وجاب دجاجتين شوي ورجع للبيت
أتلكته رفل وأخذت الدجاج من عنده
لان محمود كاللها// كومي جهزي العشه
فرح/منى كومي سوي الرجلج العشه
عيب غيرج يخدمه وانتي موجودة .
غمزتلها هي أفتهمت ان رفل مو امان
كامت وراحت للمطبخ لحكت رفل
اركان/عفية بالذيبة خوش صاكرتها
تخاف من عندج أكثر ما تخاف من عندي
محمود/انت ما تعرف شنو سالفة
مو سالفة خوف ،بس الخاتون براسها موال
وتخاف من غير شي
فرح/اي براسي موال وأغني بعد
ياعيني ياليل نفس شيرين عبد الوهاب
محمود/فرح أحترمي نفسج لو أهينج
والموضوع البراسج الغي وأنسي نهائياً
فرح/جابن البنات العشه ،اكلت بالجذب
مخنوكة لان كلساع يرزلني لخاطر مرته
اني متأكدة هي وامها سون السحر
بس ميريد يصدك
-وانوب هو زعلان من زعلت الركة على المي
مصيرك ترجع الحضني
صعد بليل يمها بات
-منى نامت يمي هي واسلام
ومتقبل تقرب اسلام منها تستحي وتكش
أستغليت فرصة زعل منى واركان
وزعلنا اني ومحمود
وبقيت أسولف ويه منى حتى تقرب أسلام الها ومهما يكون هي اللي راح تصير أمه
وأم أخوانه الجايين
ورفل تبقى خالته ومرت عمه
-امي ماكدرت تسوي حفلة سبعة لمنى
لان وجهها صاير قوس قزح
وحتى من تباوع بالمرايا تكوم تبجي
خطية عروس وماتهنت بعرسها
-أهلي عدهم علم بحال اركان
بس اليسمع مو مثل اليشوف
من أجوي يسلمون وشافوها هيجي متفلشة أمي تخبلت ورادت تاخذها وترجع للبيت بلحظات جيتهم
وابويه باسم بقى يعاتب باابويه عادل
ليش هيجي اركان كافر بيها
وشنو ذنبها حتى هيجي يعدم حالها
-عود امي فاطمة رادت تركع السالفة
لان خالتي جايه ويه اهلنا
كالتلهم/جماعته مقشمرين عليه وشارب وياهم ورجع للبيت سكران ومايدري بروحه وضربها
-محد صدك بكلامها لان الكل يعرف
ان اركان يصوم ويصلي
وحتى ما عنده درب نسوان
لو عين وسخة تبصبص على البنات
-ابويه عادل ماحجه كدام الكاعدين
اخذ أبويه باسم للديوانية ومسولفله كل تفاصيل الموضوع
وهي منى سولفت لامي بيناتهن شنو الصار
وامي تخبلت من رفل وكالت لامي فاطمة
//هي صاحبة السحر ،، هي وامها طعمتكم بالحلويات
-للعصر أبويه اخذ اهلنا ورجع للبيت
رجع مغثوث وضايج والدنيا طالعه من عيونه
على حال منى بس ما يكدر يسوي شي
اني ومنى شبعنا بجي وراهم
لا شفناهم ولا شبعنا من كعدتهم
-مشت الايام ومحمود خلص أيام الإجازة كلها يم رفل يبات فوك
وهي يومية تنزل متأخرة الظهر تدخل للحمام تغسل يلا تسويلهم ريوك
وكل شغلها يادوب تغسل مواعين ريوكها هي ورجلها
الحمد لله اني ومنى ما عايزين على شغلها
-تقريبا خلصت أسبوعين منى تبات يمي
واسلام ينام يمنا
واركان متكنص لمنى بس يريد فرصة يلكفها بس هي تخاف من عنده بس تشوفه تنهزم وتركض تختل بغرفتي
شكثر امي تعلمها وتحجي وياها
بس هي خطية تخاف من عنده تبجي
حقها الصار بيها مو قليل
-اسلام طفل ومنى عرفت شلون تكسبه الجانبها تغسل ،،وتبدل ،،وتحفظ ،،وتلعب
وتوكل ،،وتشرب وكلشي على مزاجه
وهو يعشق شي اسمه كعديني بحظنج وكرزيلي حب عين الشمس يريد اللب ،
هي تكعد بالهول على القنفة
وتخلي بحظنها تكعده على رجليها
يصير وجهه على وجهها وتكرزله
وهو ويه كل لباية ياكلها يكيف بيها
ويصيح هأأأ ويبقى يصفك
اركان/بكثر فرحتي ان منى كسبت أسلام وهو تعود عليها والاحظ أهتمامها بي وشلون مداريته بكثر مافاير عليها ورايدها
-اراقب كل حركاتها ،،وسوالفها،، وضحكها
مذهب الحلو تسولف ويه الكل الا ويايه تصير خرسة ،، أريد بس فرصة لحتى أحصرها واتقرب منها بس تخاف وتشرد من عندي
ربي ارزقني بصبر أيوب،،
-انوب إجازة العرس راح تخلص وكلشي ما افتهمت منها
فرح/دخلنا بشهر الثالث وبعده الجو بارد
والكراكيع تشلع الكاع
وصوت زخ المطر بليل وفحيح الهوى يخوف
ندثر اني ومنى واسلام بالغطه ونام ثلاثتنا على الجرباية
-دخلت بشهر السابع بس عندي مشكلة الطفلة ماعدها حركة نفس قبل أحسها خاملة
-من رحت للرعاية الصحية
والطبيبة جيكتني بهذا الجهاز اليطلع صوت دكات قلب الجاهل كالت //كلشي طبيعي ماكو شي يخوف ، بس لان تتعبين بشغل البيت هي هم تتعب وتخمل وياج
-كعدنا الصبح الكهرباء طافية
البيت بارد و اظلم فتحت كل البردات على ضوء الفجر
وشعلت فانوس الهول بين ماطلعت الشمس
اتذكرت امي عدها ٤ مخاد صوف ريحتهن خامة نكعتهن بالطشت بالحمام
وخليت وياهن شويه نفط وملح
وعفتهن وره الريوك اتلهى بيهن
كملنا شغلنا اني ومنى
يلا كعدوا ابويه وامي واسلام
-بعد ما تريكنا
وما عندي بعد شغل
وضوجة الكهرباء بعدها طافية
رجعت على الصوف و كعدت اغسل بي
ومنى هم أجتي ويايه تساعدني
غسلنا كل الصوف وتركناه ينشف على صفحة
-اسلام كام يبجي يريد يغفى
وصاير نحس لان منشول وعنده صخونة فرشتله منى مندر بالهول وتمددت بصفه
وهي هم غفت وياه
-ابويه طالع للشغل
محمود بدوامه منى ريكته الصبح
مرته ما تكعد الا الظهر
-وامي كاعد تتفرج مسلسل كويتي
أسمها (الفطين ) اعاده على قناة الراي
-واني مجطولة على القنفة اباوع ويه امي
بس أحس عندي لويات خفيفة ومغص بسيط
اركان/دخلت الهول أظلم ودافي
بس ضوء التلفزيون مشعول
وفارة النضد وامي يتابعن مسلسل
-وأسلام نايم بحظن منى
اوووف من جعلني أسلام وأنام هيجي نومة
ابن الجلب نايم مرتاح حتى ايده مرتاحة
من أشتعلت لشة بلقيس على هذا الفراك
خليت وصعدت فوك لان اذا بقيت كاعد واراقب بيها يمكن اشحطها واخليها من صدك تتخبل وتشرد مني
فرح/خصلت المسلسل كمت للحمام
خليت الصوف بالطشت وشلته
بس ما كدرت بعده رطب وهواي ثكيل
بعد هو صوف وهن ٤ مخاد
رجعت وشلت الطشت بكل حيلي
صارت حافة الطشت بين صدري وفوك بطني
يعني على مكان معدتي
وصعدته بالكوة فوك بالسطح
وشريته بالكاع على جادر سيارة قديم ميحتاجو الولد حتى ينشف على الهوى وحرارة الشمس
-للعصر محمود ما رجع للبيت خابر على امي
كاللها اتأخر لان معزوم على عرس صديق ويانه بالدوام
واركان هم بدل وطلع
وابويه بعد ما تغده وأنجطل شويه
رجع للشغل
-الضوجة تذبح
وبس أحنا النسوان بالبيت
رفل كاعد تصبغ اظافرها
واسلام يلعب هو منى
وامي تكلب بالتلفزيون
-طلعت اغنية بهاي الجلسات الخليجية اليركصن بيها البنات
واسلام يلعب هو منى
//يمه عليج الله بقيها ضوجة
كومي منى نركص وياهن هجع وكاولي
منى/يااا وبطنج ياهجع ياركص الكاولي
فرح/جريت القراصة من شعري
ولفيت الدشداشة بملابسي الداخلية
وجريت منى وكومتها هي هم فتحت شعرها وركصنا ويه الأغنية ونقلد ركص البنات
ونهف بالشعر
وامي تصفك وتضحك
وأسلام يكمز ويانة
وصوت التلفزيون شويه عالي
اركان/طلعت ضايج رحت يم جماعتي
شويه ورجعت وللشارع طالع صوت الاغاني من بيتنا ، عيوني طفرن بكصتي
-تركت سيارتي بالشارع ودخلت للبيت فاير
أشوف فارة النضد والصفيرة مالتي يتمركصن
وامي تصفكلهن ،، واسلام يركص وياهن
دكيت بيدي بقوة على باب الهول
//يمه شنو محولات البيت لملهى ساجدة عبيد وربعها
فرح/يمه وكع كلبي من صوت اركان
دخل علينا يرعد هو يتخبل من الصوت العالي
بسرعة عدلت دشداشتي
وكعدت على القنفة الملم بشعري
-وهو دخل متخبل علينا سحل منى من أيدها
وهي خرطت العافية خافت من عصبيته
وامي تتوسل بي يتركها
بس هو بعد تخبل ويسحل بيها
-واسلام كام يبجي خاف من صياح ابوه
شالته رفل تسكت بي ،،
جان تكول /هسه أرتاحيتي يالكاوليه من صارت هوسه
-هو سمعها اركان ورجع عليها
وكف كدامها يريد يسطرها راشدي بس ماضربها
وبقى يرجف لازم أعصابه
ويحاجيها صاك على سنونه
اركان/رفل أحترمي نفسج ولملمي السانج
لو تصير مو خوش وياج ،
مو عرض اركان ينكال عنه كاولي
خليها بالج تعيدها مرة ثانية اكص السانج واخلي بيدج افتهمتي عليه لو لا
-اني روحي فارت على هاي بنت الجلب
وهي بسرعة اختفت بس تركت أيديها
عرفتها ختلت بغرفه فرح
//يمه حاجيها خلي تطلع اريد احجي وياها
منى اطلعي احجي وياج
فرح/وخر اركان من الباب اني احاجيها
ترى هي ماقبلت تركص بس اني جبرتها
اركان/هسه بس خل تطلع اريد احاجيها
فرح/هو صعد فوك
وبقينا اني وامي واكفين فتحت النا الباب وبقينا نحجي وياها
وامي قنعتها هو ما يضربها
بس يريدها تصعد تسولف وياه
منى/أخاف من عنده يابه مو اعصاب عنده
نار ويحرك شكو كدامه صعدت بالكوة وامي وفرح يقنعن بيه ،يخافن لا يعصب
ويرجع يضربني
-دكيت الباب وبقيت واكفة بره اخاف افوت
هو فتح الباب وتركها مفتوحة
وراح للكنتور يبدل هدومه
اركان/فوتي شبيج ما اكل بشر
بس احجي وياج وعود نزلي وختلي بغرفة اختج
منى/دخلت للغرفة وبقيت واكفة بصف الباب حتى خاف يضربني انهزم جوه
اركان/بدلت ملابسي ولبست برمودا
وبقيت بالفانيلة وعيني عليها اشوفها خايفة
واكفة بصف الباب ،
تقربت عليها وهي ترجع ليوره تخاف
/شبيج ما اذيج وداعت ابني اريد اطبك الباب
واسولف وياج وعود نزلي جوه
-طبكت الباب ولزمت ايدها
//لاتخافين ماأذيج بس تعاي نكعد نسولف بقيت اسولف وياها واعتذرت منها
وهي بس تبجي
-خلص دور الحجي هسه دور التنفيذ
اني مو مثل البرلمان العراقي بس حجي
بل أقول وافعل ،،
-ماروكو ترى هواي مشتاقلج
يالصفيرة انتي من صغر معجونة بروحي
بس حرامات أكتشفت هذا العجن متأخر
منى/أبجي وأضحك على سوالفه
//شنو عجن شعندك فرن مال صمون
اركان/يحظي روحي فايرة هسة مو وكت
الخبز و العجين
-وين الشريط مال علاج مالتج
منى/ما اتذكر وين خليته
اركان/شوفي اروح أجيبلج شريط جديد
واجي ألكاج صايرة رقاصة من صدك
مو بس تعرفين تهزين كدام امي وتفرجيها
المحاسن الباخلة بيهن عليه ،،
-خو أسلام هنياله مو أني ابوه بس حاسده
من ربي جعلني أيده ويوميه أنام نفس نومته
منى/يااا انوب خليت عينك على أبني
عينك باردة عليه اسم الله
-خو أسلام هنياله مو أني ابوه بس حاسده
من ربي جعلني أيده ويوميه أنام نفس نومته
اركان/حلو هاي مال أبني
//دجيبي بوسة شكد بخيلة ولج أصبر بيها روحي لطريق الصيدلية وارجعلج بطيارة
منى/بوسني وأخذ محفظته ونزل يركض
همزين ماجفصت بسالفة وكتله الحب يم فرح
نزلت جوه واجتي فرح تدعبل من غرفتها
فرح/هاا خو ما انخبزتي
منى/لا ما ضربني الحمد لله تراضينا
وراح يجيب شريط مال حب
كتله// ذاك ما اتذكر وين مخليته
فرح/اي زين تسوين لا تكوليله عندي
ومن يجيبلج هذا الشريط الجديد لا تبلعين الحباية ديري بالج ترى يصير بيج نفس ماكلت امي يصير بيج عقم
-هسه صعدي بدلي ومكيجي
ترى اركان حباب عامة عليه بس عصبيته الگشرة بس ساعة وكلشي يروح
مو مثل العندي يسكت دهر وينطق كفر
يسكت سنة ويكسر العظم ويزعل شهر لو عصب
-صعدت منى الغرفتها
رحت على أمي بشرتها
الحمد لله منى واركان تراضوا
والزرافة نزلت أسلام امي راحت تشتريله
-اجى اركان وبيده علاليك حلويات
خلى وحده بالهول على اول قنفة
كال /هاي لحريم اخويه تقاسمن بيها
وصعد فوك وهي الصعدة حتى على العشه ما صحنالهم
-رفل اخذت كم حاجة من العلاكة
وعافت الباقي وصعدت فوك
-اتعشينا بس اني وابويه وامي واسلام
دخل محمود أفندي بس شفته كمت ودخلت الغرفتي ، وهو صعد بوجه فوك
-بهذيج الساعة واكفة اصلي فرض العشه
وهو دخل للغرفة بس فاير عليه
ويلوب يروح ويرجع يريد بس اخلص صلاتي
//هااا شعجب عطفت عليه ودخلت الغرفتي
محمود/بدون لغوة زايد
عليش متلاغيه ويه رفل
وانوب اركان طابك وياج
فرح/حقك تصدك بكلامها لان عمتك بسحورتها
محمود/بدون لغوة زايد
عليش متلاغيه ويه رفل
وانوب اركان طابك وياج
-تقرب عليه ودفعني من جتفي بظهر أيده
واني لابسه جادر الصلاة طويل
رجعت ليوره من الدفعة
تعثرت بي وكعت بالكاع
هو لزمني من يدي خاف عليه لان وكعت
نفضت ايديه بقوة ونزعت الجادر بسرعة
وطلعت من الغرفة ابجي ورحت لغرفة امي
-هو بعد مادخل ورايه ولا حجه بالموضوع
وره شوية رجعت الغرفتي لفيت راسي ونمت
فزيت بنص الليل شو ناكعة مي
وعندي لويات مو حيل قوية بس اذا تزيد
ما أتحملها وهي من الظهر عندي تروح وترجع
-كمت على حيلي فراشي ناكع مي
من وكفت ضربتني لوية قوية بمثانتي كعدت بالكاع شوية وكمت على حيلي مشيت خطوتين شو عندي ثكل جوه بمثانتي مو طبيعي وبطني بدت تلوني أكثر
-لزمت بطني با أثنين أيديه ومشيت بالكوة وصلت الغرفة امي ودكيت عليها الباب ابويه فتح الباب
عادل/هاا يابه ليش تبجين
فاطمة فاطمة كومي يمكن البت راح تولد
-لزمت بطني با أثنين أيديه ومشيت بالكوة
وصلت الغرفة امي ودكيت عليها الباب ابويه فتح الباب
فاطمة/عزززه كول غيرها شتولد
بعدها بداية السابع
فرح/يمه الحكيني بطني تكطعت
بويه فدوة صيحلي اركان ياخذني للمستشفى
فاطمة/يمه عزززة وصخام يول وشلتي المي الطفلة راح تعمى من شوكت بدت عندج الولادة
فرح/اني من الظهر عندي لويات خفيفة مو كتلج ،، وكلنا لان أستبردت من غسلت الصوف
فرح/اني من الظهر عندي لويات خفيفة مو كتلج ،، وكلنا لان أستبردت من غسلت الصوف
فاطمة/عادل اصعد كعد الولد
البنية عدها ولادة ،،ربي رحمتك أنوب سبيعي ......
شكرا لزيارتكم عالم روايات سكيرهوم
