رواية عشك أل فراس الفصل السادس والعشرون بقلم زينب نور
أسمي فرح من محافظة البصرة عمري 16 طالبة رابع علمي أني من زمان امشي ويَّ بنت خالي سَحر رغم هيَّ اكبر مني بس دائمًا وياها وعندي صديقات اربعة نورس ونورهان ومريم وطيبة
دائمًا يكولولي ليش ممرتبطة ؟؟ بس اني معليه بهاي السوالف واحاول اتجاهل الموضوع
نورس:لج ولد عمج واحدهم يطكك بالكاع شبيج
فرح:شعليه بيهم كلهم مثل اخواني واني بعدني صغيرة على هاي السوالف
نورهان :لج صغيرة شنو مو احنه بكدج وكلنا مرتبطين الا انتِ شنو ناقصج
مريم:عززاا اني شايفة ابن عمج هذا الجبير زوج اختج يخبللل
فرح:انجبي مريم
طيبة :لا صُدك يعني ليش ممرتبطة
فرح:معلية بهاي السوالف اريد اكمل دراسة
نورس :دباع هاي اول وتالي احنه كل وحدها لـ بيت زوجها درسنا او لا لفي على واحد واخذي شبيج
ماجاوبتهن سكتت بس ضلت الشغلة براسي أني ليش ما ارتبط ؟ شنو ناقصني هذا كان تفكيري
بيوم حنة أسيد صادف عدنا امتحان فـ اضطريت اداوم اني وياي شهد وانوار خلصت امتحان ومحد اجه علمود يطلعنا فـ واكفة اني وصديقاتي بالممر مال المدرسة وشفت علي دخل اتوقع من الدوام واجه هو كان لابس مدني تشيرت ابيض نص ردن وبنطرون اسود والمسدس ابين دخل يم المديرة
فرح:هذا علي ابن عمي
نورس:عززااا شو هذا ماشايفتة يخبل
فرح:جان ببغداد ساكن
نورس:متزوج
فرح:لا بس صارت مشاكل وطلع وقبل كم سنة رجع واغلب وقتة بالدوام قليل يتواجد بالبيت
مريم:لج يخبل لا تروحينا من ايدج
فرح:مو سهل
نورس:انجبي شنو مو سهل بسرعة لفي عليَّ واذا ماكو ندورلج سالفة نلزك بيَّ ويضل يموت عليج
عجبتني الفكرة علي من النوع اللي شخصيتة تچذب المقابل وهو حلو وحطوا الفكرة براسي طلع من الادارة شافني ابتسم
علي:وين شهد
فرح بأبتسامة: بالصف جاي علينا
علي:اي حتى نطلع وتلحكون على الحنة
باوعت على صديقاتي يباوعن ويضحكن ماعرف شنو صار بيه بس شعور بداخلي حلو والبنات يباعون علينا رحت لـ شهد صحتلها
علي:چا انوار وين
شهد:هسه تجي بس راحت تشتري
فرح:واحنه شعلينا بـ انوار وشعليك حتى تسئل عليها
علي: جاي اطلب اجازة حالها من حالجن يلا كدامي لـ سيارة اجت
طلعت اول وحدها كالبة خلقتي كعدت بالسدر شهد باوعت عليه هو اشرلها تصعد ورا عساس احنه ورا اني وانوار وهي لـ كدام بس سبقتها وكعدت
علي: شلونجن بالامتحان
شهد:زينين الاسئلة سهلة
علي: انوار راهب البارحة اجه للبيت
انوار:اي اجه الفجر ومن اجيت لـ دوام تركتة نايم
علي:تمام
بودي الزم انوار اموتها شصار بذيج الساعة ماعرفت وصلنا للبيت دخلت سلمت وصعدت لـ غرفتي واني كالبة خلقتي
أسيا:شبيج
فرح: مبية شي بس تعبت حارة
سبحت وبدلت ونزلت جوا جان بالي اخلي يشوفني بس هو ابد ما دخل بالحنه وحتى بالعرس شفتة بس ما اعرف شافني او لااا
ومر العرس على الخير ومرت ايامنا وضليت كل الايام اتخيل علي الي وزوجي كنت ما اشوف غيرة وصديقاتي انترس راسي من كلامهن
فرح:بديت احس احبه بس خاف مرتبط
مريم:وشنو يعني مرتبط من يشوفج ينسى ذيج وانتِ كلتي اغلب وقتة دوام وين يلحك يرتبط يلا شوفينا شطارتج وخلينا نفرح بيكم
فرح:ان شاء الله
ضليت كل ما اشوفة ابتسملة او احجي ويا بموضوع حي الله شي بس هو كان صنم لا احساس ولا مشاعر
اجه عدنا وحطيت حجتي انُ يدرسني رياضيات ورحت بليل كالوا نايم رجعت ثاني يوم هو دز عليه فرحتي كانت ماتنوصف ابد رحت يمه هو يشرحلي واني صافنة بيَّ وبكلامهن
ورا فتره مرت اسيد شمس صارت حامل ووردة هم وغزل بنت عمي قبل لا تولد وردة بكم يوم اجت يمنا وحجيتلهن انُ اني معجبة او بداية حب بس وردة وامي واسيا صاروا ضدي وهنا اشتعلت النار اكثر واكثر بكلبي
ورا ما ولدت وردة واجه هو علمود يسلم عليها عيني تراقب كُل تحركاتة لحدما انتبهه وسلم وبعدهي طلع من كالت وردة انُ يحب قمر وراح يزوجون
مااعرف شنو صارلي بالضبط طلعت لـ بيتنا واني دمي فاير والغيرة كاتلتني كتل
أسيا:شبيج
فرح:احبه ليش مايفهم
اسيا:عزا عزا صوتج أسر كاعد بالصالة
فرح:يحب هاي المريضة كم يوم وتموت شحب بيها
محسيت غير انسحلت من شعري باوعت امي
ام اسيد:أنا ماعندي بنات تستهر هالكد تأدبي وامشي عدل لا احطج بيد ابوج واخوانج واخليهم يربوج من جديد طايحة الحظ
أسر:شكو شبيكم
أسيا:ماكو شي ماكو شي بس فرح مجاي تقرا وماما حجت عليه
تركتهم وصعدت فوك والغيرة كاتلتني كتل ماكنت اعرف راح اشمر نفسي بداهيه سودة اتصلت على مريم ونورس ونورهان وطيبة
فرح:هذا اللي صار
مريم:شوكت لحك يحبها
طيبة:بس الصراحة قمر كُلش حلوة وهادئة وحبابة
فرح:انجبي طيبة
طيبة:الواحد يحجي الحق
نورس:تعالي اكُلج شتسوين وراح تلزكين بيَّ كوه
فرح:شنو احجي
من حجت اول شي خفت بس بعدين تشجعت وانغسل عقلي فد مرة ثاني يوم
اسر وياسر طلعوا وبابا وماما واسيا راحوا يم وردة واسيد بيتة وحده فـ بقيت وحدي
اجتني فرصة بدلت لبست ملابس ضيكة حيل يعني جسمي برز وخليت مكياج قوي نزلت تيلفون ماما كان بالبيت طلعت رقم علي اتصلت عليَ وسويت نفسي ابچي
فرح:انتَ وين
علي:بالبيت شكو
فرح:حباب تعال قريني باجر عندي امتحان وهواي تحاضير عندي مالحك بس اشرحلي
علي:ليش ماتجين انتِ
فرح:لا امي متقبل كالت اكعدي اقري وصار ساعة مجاي اكدر استوعب
علي:ماشي
سديت التيلفون وابتسمت كعدت انتظرة بالاستقبال اجه من الباب الداخلي الباب اللي بينا وبينهم
علي:فررح
فرح:تعال بالاستقبال
دخل حسيتة انصدم ابتسمت وكتلة
فرح:هلا عمري
دنك راسة وراد يطلع لزمت ايده
فرح:تعال
نتر ايده مني وصاح بيه صوت
علي:حطيييي عقلججج براسجججج واحترمييي نفسج
فرح:ماشي
مثل ماكالت نورس اذا ما استجوب شككي ملابسج سويت بالضبط هو ضل صافن عليه
فرح:والله الم عليك الدنيا كلها واكلهم ا
قاطع كلامي ضربني راشدي من قوتة وكعت بالكاع بهاي الاثناء دخلت اسيا شافتني بالكاع وملابسي واني ابچي رفع اصبعة بتهديد
علي:انا زلم مشروبة ماتخوفني مو انتِ بكد النعال جاية تهددين والله امحيج من الوجود وحسافة انتِ بنت عمي
اسيا:شكووو
علي:خلي اختج تحط عقلها براسها
عافنا وطلع كعدت بالكاع انحب والطم تقدمت عليه اسيا لطمت على وجها
اسيا:ولج يمصخمة ولج تردين تخزينا شسويتي ولججج شسويتيييي صخم الله وجهج
صارت تضرب بيه وأني مااعرف شنو صارلي بذيج الساعة صعدت لـ غرفتي بدلت ملابسي وغسلت وجهي وكعدت سمعتها تحجي ويَّ وردة
صرت اصرخ
فرح:اني مسويت شي غلط اني حبيته ومستعده كلشي اسوي
اسيا:اني الج انتِ مو مال احترام وعيني واغاتي خل يجون اخوانج وهمَّ يتفاهمون وياج تذبين على الولد هيج سالفة تعرفين شنو يعني هاي اذا باوع بوجهج بعد انعم الله عليَّ اذا ماحجه الله لا يوفقج منين تعلمتي هاي السوالف منينننن شجابج على الحببب يمصخمة
فرح : معليج انتِ والله اذا حجيتي اقتل نفسي
اسيا:ويطبج مرض ماله علاج
مرت اربع ايام هدوء محد يعرف بس اسيا ووردة الخوف كان مستوطن كلبي نزلت جوا لكيت اسر وياسر كاعدين بالصالة ويمهم ابن اسيد متيم صغير مكمط ونايم رحت للمطبخ شمس واسيا يسون كيك
فرح:هلاو
شمس:هلا حياتي شلونج
فرح:تمام
كعدت اباوع عليهن وهنه يشتغلن اسيا متحجي وياي ابد
شمس:اسيا شبيج
اسيا: بعدين احجيلج
فرح:شتحجيلها
فزيت من مكاني اني اعرف اسيا متضم شي عن شمس ووردة صديقتهن حيل
شمس:شكو اسيا
فرح :ماكو شي معليج بيها
اسيا:انتِ معليج وذني صديقاتج اذا بعد تمشين وياهن والله العظيم اطلع خياساتج كلها افتهمتي والله احجي لابوي اذا تمشين وياهن
فرح:انتِ معليج افتهمتي
شمس:يمعودات شبيجن
أسيا:حماتج سوتلها سالفة سودة تسود الوجهه
شمس:عززااا شمسوية ولج
أسيا: ادكول احب علي وتريدة ومخابرة الولد تعال قريني ومن جاي مشككة ملابسها عود أعتدى عليها
شمس:عزززااا صخام الصخم وجهج ولج تعرفين شنو يعني هاي منو علمج
اسيا :نورس الجلبة هيَ هاي سوالفها
فرح بصوت عالي:كااافييي اسكتيييي
أسر:شكو شهل الصوت فرح صاير هواي يعلى صوتج بالبيت
أسيا: صعدت فرح لـ غرفتها واسر توجهه النا
اسر: شبيها فرح
اسيا:مابيها شي
اسر: اسيااااا
اسيا:كتلك مابيها شي روح اسئلها هي لا تسئلني اني مااعرف شي
شمس:اسر ماكو شي سوالف بنات
اسر:لا الضاهر اكو شي اكبر من سوالف البنات
اسيد:خير صوتك عالي
اسر: احجن عاددد شبيها ترا سمعت مقطفات الكلام لا تخلني يطك اخر فيوز براسي واصعد اسحلها سحل
اسيا:كتلك ماااكو شي سوالف بنات وخلص
اسر:وعلي شدخلة
احس جمد الدم بيه ماعرفت شنو ارد صاروا كبالي هو واسيد وامي على صوتهم اجت وراها ياسر باوعت على شمس وهي تباوع بيه
شمس:شنو واكفين علينا هيج عبالك مجرمين ماكو شي
ام اسيد:شمصخمة هالمصخمة
اسيا:صدكوني ماكو شي وخروا عني خل اكمل شغلي
اسيد: عيونجن تحجي غير شي فهمنا السالفة
ياسر:ادري نسحب منجن الكلمة سحب احجوا عاد
اسر:وعلي اصعدلهاااا ترررا
شمس:اهدوا واحنه نحجي
ابو اسيد:ياستار ياربي استرك خير يابة
اجيت انجلط من شفت ابوي بعد ماكو مفر لازم نحجي
أسيا:شلون احجي وانتوا هيج أعصاب
ياسر:فرررررح
صاح عليها بس لا تنزل ياربي دخيلك والله يموتها مو بعيدة مو على سالفة انُ تحبة على سالفة الملابس
شمس:عوف فرح عمو كلهم خل يكعدون واحنه نحجي
ام اسيد:خل نكعد بالصاله ونفتهم وانتم اهدوا
اكثر واحد كان اعصاب اسر وهو اكثر واحد يخوف عصبي نار ميتفاهم ابد مثل الطلقة اذا ثار هاي هي بعد
كعدوا بالصالة والرجفة اخذت جسمي شمس اخذت متيم على انُ تخلي فوك وكالت لـ فرح اقفلي الباب وديري بالج تنزلين
اسر:يلااااا
أسيا:راح احجي بس قبل كُلشي تلزمون اعصابكم ومتخطون خطوة نتدم عليها
ابو اسيد :احجي بابا لا تخافين من شي
اسيا:صديقات السوء هنه اللي ترسنا لـ عقلها كلكم تعرفون فرح شنو
حجيتلهم الموضوع واحاول اخفي كم شغلة بس متنخفي وتبين كوة احجي والكلمة بالف ياعلي تطلع
شمس: طفلة وترسوا عقلها ومتعرف شيء
اسر:طفله وين اكو طفلة تتصرف هيج ويامن ويَّ ابن عمنا يا فشلتنا والله اختنا هيج تسوي عيب على شواربنا اذا نباوع بوجهه بعد
ام اسيد :صخام الصخم وجهي انوب ويَّ ابن اختي الله ينتقم منج الله يسود وجهج مثل ما سودتي وجهنا كدامة
ابو اسيد :يا فشلتنا
اسيد:روحي شمس صيحيلها
شمس:ليش
اسيد :شمسسس
اسيا:عوفهااا كلها تغلط غلطت وراحت الغلطة احنه حجينا حتى مينعاد الموضوع
همَّ كاعدين واني وشمس واكفين كبالهم صايرين بالباب دفعني ياسر وصعدلها
اسيا:عزاا بعيني راحت البنية
شمس:قافلة الباب
اسيا:واذا كسروا
شمس:تعالي
الكُل ضلوا كاعدين صعدنا ورا بس وصلنا دفر الباب انفتحح
ياسر:تبچين مو اليوم انعل يوم يومج تالي وكت اختنا تشك هدومها مو
شمس اختفت مدري وين راحت اني صرت بينا وبين فرح ياسر طويل واني ما اوصل طولة هي صايرة بأحد زاوية الغرفة
اسيا:كاااافي تخبلتتتت عووووف البنيةةةةة غلطت وصاررررت وانتهتتت
ياسر:وخري من وجهي لا والخلق الكون اسحلج سحل انتِ وياها
ابو اسيد :ياسررر
صارت فرح ورا ضهر ابوي هو احتضنها وياسر ضل يرعد
ابو اسيد :ولك تخبلت شبيك
ياسر:ماتخبلت بنتك عمرها 16 سنة وهيج تسوي لو صايرة مذابح من وراها انوب ويَّ علي
ابو اسيد:سدوا الموضوع علي انا اتفاهم ويا يلا كافي
اسيا:هيج احسلك
ياسر:انجبي انتِ تريد تضمها عبالها ماندري
اسر:خافيات شي بعد
شمس:شنو السالفة بنية وصديقاتها لعبن بعقلها وصارت والحمدلله انتهى الموضوع والولد سكت عليمن بعد رجيتوا الدنيا رج
ياسر: سالفة مثل هاي تعرفين شنو يعني تشك ملابسها كدامة
شمس:نعرف بس خلص انتهت وبعد مراح تنعاد وتعرف الصح من الغلط
نزل ياسر واسر راح لـ غرفتة واحنه كعدنا بالصالة الفوك
اسيا:انتِ وين عفتيني وطفرتي
شمس:لج رحت صحتلهم اخوج صار جداحة
ابو اسيد: انا لا راح اضربج ولا راح اتغير وياج انا اريدج انتِ تعرفين غلطج شنو وتعرفين انُ هذا الصار غلط والشغلة هاي اللي سويتيها يابابا بيها كتل وغسل عار تعرفين شنو يعني غسل عار ابن عمج سكت وترك الموضوع لان يعرفج شنو انتِ وكلنا نعرفج
فرح:اني مو قصدي هيج اسوي
ابو اسيد:اعرف بابا اعرف صديقات السوء ترسنا لـ عقلج بس افهمي غلطج
اسيد:فرح حبيبتي مو كل صديقة صديقة ولا كل شخص ينطي نصيحة ناخذها قبل لا نفكر بيها والحب مو كلشي بالحياة وانتِ بعدج صغيرة والحياة كُلش طويلة كدامج وتلحكين على الحب وعلى كلشي السويتي اكبر غلط واحمدي ربج علي سكت لو واحد غيرة الله يعلم شسوا وهاي السالفة بعد ما تنعاد وصديقاتج ذني بعد ممنوع تمشين وياهن
فرح:حاضر حاضر
كانت تحجي وتشهك بالبچي راحت لـ غرفتها ابوي حط ايده على راسة وكعد
ابو اسيد:شروح شكلهه اعذرني عمي لو شنو بالضبط والله ماعايز الولد يخلص من ابو تطلع فرح
ام اسيد:هم حظه اعوج
بليل جدو دز علينا فرح صاروجهها اصفر
فرح :بس لا عرفوا
اسيا:بدلي ملابسج وخل نروح ولا تحسسينهم بشيء
بدلنا ورحنا امير فتح الباب سلمنا طبيعي عمامي كلهم موجودين وخالي ابو ادم هم موجود
فرح:اسيا والله خفت بس لا يحجي
اسيا:سدي حلكج واكعدي
نزلت وردة كانت فوك سلمت علينا وكعدت شوية ودخل علي كان بالدوام سلم طبيعي وصعد فوك بدل ونزل
الجد:شبيَّ نمر بوية
علي:ها مابيَّ شي من الشمس راسة ضل يوجعة
الجد:هو هم بعده يشرب
علي:لا بطل وبدا يرجع لـ طريق الصح
الجد:الحمدلله والشكر
علي: شوكت تعرسون لـ اسد
الجد: هالجمعتكم حتى الكل يصير عنده خبر ونبدي نحضر بفرحة الزهرة
ورا اسر وصهُيب نخطبلهم
محمد:چا انا وعلي شني هنا
علي:النا الله محد يذكرنا
الجد:ولكم غير انتم ما تردون هسة
علي:احنه مرة وحدها حجينا وانتم جلبتوا بيها
الجد: هاي هي چا نزفكم اربعتكم سوا
محمد:ادري قحط لا يابه نشاقة انا عوفني ما اريد هسة
ضلوا يحجون بس ابوي كان ساكت وعينة على علي شوية والولد طلعوا للحديقة كلهم
ابو اسيد:بوية عندي موضوع اريد الشيخ وعلي وبناتي كلهن وجنتي حاضرات
ابو فهد:خير ان شاء الله اصعدن بوية فوك وردة بوية صيحي رجلج وابن عمج
وردة :حاضر
ابو اسيد :لا بويةأسيا انتِ كومي
كمت أني جانوا كلهم كاعدين سوا
أسيا:شيخ
الشيخ:ها بوية
أسيا:يردوك جوا انتَ وعلي
علي: شكو
أسيا:مااعرف
كاموا كدامي واني دخلت وراهم دخلنا للاستقبال وسدوا الباب فرح صابتها رجفة مو طبيعيه امي وخالتي وبيبي وعمامي ونسوانهم وخالي ومرتة واحنه يعني حقها يكدر ابوي يحجي بينا وبين علي بس مااعرف شنو براسة بالضبط
الشيخ:خير يابه
الجد:احجي بوية شعندك خوفتنا
ابو اسيد:والله يابوية مسود وجهي
ابو فهد :ياستار ياربي
حجالهم ابوي السالفة علي كان كاعد مدنك عبالك هو المذنب محجه شي
الجد:افااا يبوية ليش هيج
فرح بدموع:والله مو قصدي مو
علي:خلص كافي ياريت تسدون هذا الموضوع غلطة وصارت وانتهت ياعمي مالها داعي ابد الموضوع انا نسيتة ولا كنُ صاير ياريت تنسون وتخلون البنية تعيش حياتها وكفاها خوف
الشيخ: سد الموضوع عمي فرح غلطت وتعلمت الغلط شنو وهذا اول درس الج بالحياة علي نسى الموضوع وياريت الحاضرين ينسون تمامًا ومايفتحون الموضوع وحتى يتذكروا
ابو شاهين :عاشت ايدك ياعمي كافي عمو كافي بچي هاي هي انحلت بس كافي
وردة:كومي غسلي كافي
إنتهى الموضوع وانسد تمامًا من بعد ذاك اليوم فرح اخذت درس وابتعدت عن صديقات السوء والحمدلله
.....................
(نرجع بالوقت لورا )
أسيد: من ازوج صهُيب اجوا كرايب جدي من بغداد بيت ابو سلام اول مرة اشوفهم والتقي بيهم
شفت بنتهم نزلت وياهم دخلوا لجوا عيني ضلت عليها بالضبط مثل مايكولون حب من اول نضرة جنت ما اصدك بهذا الشيء بس من شفتها صدكت وبالدليل هم
اسد ابن عمي جان يمي واكف
اسد:شبيك عينك
اسيد:جنها العافية بس طكت الكعب كافي
اسد:هسه انتَ عجبتك طكت الكعب
اسيد:طكت الكعب واللي لابسة الكعب جنها حورية
اسد:اسكت لا تفضحنا
ضلوا يمنا البنية بعد ماشفتها ثاني يوم بيوم العرس الصح دخلت للمطبخ شفتها واكفة ويَّ البنات نسيت المن جاي او شنو اريد دخلت لـ جوا جانت امي وخالتي كاعدات
اسيد:يمه اريد ثلج احط بيَّ السطل
اسدوهوَّ يدخل : هههههه ااخخ يابه شتريد
اسيد:اهووو اقصد سطل احط بيَّ ثلج
اسد:يابه انطوا ثلج يحط بيَّ السطل
اسيد:منين طلعت انتَ
اسد: شجاك خالي انتبهه على نفسك لا تنجلط
اخذت السطل وطلعت مدوهن حالي عرفت اسمها شمس ورا ماخلص العرس رادوا يرجعون ابوها واخوها رجعوا بيوم العرس بليل راحوا وهي وامها ومرت اخوها ماقبل جدي ضلوا لـ ثالث يوم
الجد:هسة واحد من الولد ياخذكم وين تروحون صدك جذب
اسيد:انا اوصلكم
ام سلام :ياخاله ماريد اتعبكم
اسيد :تعبكم راحة خاله صدك جذب
اخذتهم لـ بغداد امها كانت كاعدة بالسدر وهيَ صارت وراي خليت المراية عليها نص الطريق امها نامت ومرت اخوها التهت بأبنها وهم نامت هي ضلت تلعب بتيلفون ضليت عين عليها وعين على الطريق لحدما وصلنا بغداد
اسيد:وين بيتكم بالضبط
شمس: بالفرع
اسيد:يافرع
شمس:فرعنا
اسيد:وين هو
شمس:بيَّ اشجار وبيوت
اسيد: اها عرفتة الفرع ابو الاشجار والبيوت مميز الافرع البقية بيها غنم وصخول
شمس:هو هم صوجي ادليك
كعدت امها سئلتها كالت بفلان منطقة وصلتهم لـباب نزلت مرت اخوها وامها وهيَّ ضلت علمود تاخد الجنطة نزلتها
اسيد:تفضلي اغاتي
شمس:شكرًا تعبناك
اسيد:ولو بالخدمة
دخلت هيَ لجوا واني صعدت السيارة اريد اطلع طلعت تركض
شمس:اووووكف
اسيد:ها
شمس:نسيت تيلفوني
التفت لورا لكيتة على الكشن نزلت اخذته الها
اسيد:تفضلي
شمس: شكرًا
اسيد:العفو
رجعت للبصرة وانا فرحان واغني شغلت اغنية يمه كرصتني العكروبة لحدما وصلت البصرة حتى الطريق ماحسيت بيَّ
ضلت شمس براسي انام اطلع اكل اشرب بالدوام بالديوان بين اهلي بين اصدقائي شمس براسي ماغابت ولا دقيقة رغم المشاكل والانشغالات هي براسي
ورا فترة وردة اختي اجت يمنا فتحت وياها الموضوع كالت يمي اني اقيسلك النبض وضليت انتظر وردة لحدما اجتني وجها مايبشر بكل خير
وردة:اسيد
اسيد:ها بشري
وردة: شوف حياتك البنية متريد تزوج واهلها مينطوها وهي مرتبطة
اسيد:شنو ؟
وردة:الله يوفقك مو نصيبك
اسيد:شتحجيننن انتِ منننن كل عقلجججج
وردة:لا من نصه طبعًا من كل عقلييي
تركتها واجيت اطلع وصلت باب الصالة صاحت
وردة:جذذذب والعباس جذبببب
اسيد:وردددة
وردة:شبيك واحد ميشاقة
اسيد:احجييييي عاد اعصابي تلفانا ترا
وردة:احم اي موافقة
اسيد:احلفي
وردة:يا والله
طلعت من البيت من الفرحة مااعرف شسوي ثاني يوم اخذت رقمها وضليت اتواصل وياها بس هي تختفي وكل ساعة حاضرتني لحدما صارحتها انطتني حضر مدة الحياة
عقل ماضل براسي اجت خطوبة جسار وجاسر وعرسهم وعرس شاهين ومشاكل الدوام ومشاكل البيت الماتخلص فتحت الحضر رجعت حجيت وياها احبها وتحبني رحت لـ شيخ لكيت يرش بالحديقة
اسيد:ولككك فهددد
الشيخ:فرحان مادام بيها ولك فهد لا الشيخ ولا ابو صكر
اسيد:هههه كلش فرحان عندي موضوع وياك
الشيخ:بخدمتك
اسيد:خادم ربك اريد اخطب
الشيخ:ايبا جنك طحت بالحب
اسيد:چفني على وجهي واريدها منك
الشيخ: بنت منو
اسيد:شمس بنت ابو سلام
الشيخ:ونعم الاختيار هسة احجي وياهم
اسيد:ديلا امشي
الشيخ :خل اسد الماي يمعود
كعد الشيخ وحجه وياهم محد جان معارض ابد والكل وافق انطيتها خبر راح نجي نخطب رحنا خطبنا ابوها كان موافق وماعنده ايييي مانع
تمت الخطوبة وضليت الح عليهم يتم الزواج بسرعة والحمدلله تزوجت وكان احلى يوم بحياتي
يمكن قصتنا هي اسرع قصة حب ماطولت سنين خلال سنة وحدها حبيتها وخطبتها وتزوجتها
عشت ويَّ شمسي اجمل ايام حياتي مراة ونعم مراة ورا فترة من زواجنا طلعت حامل وصارت فرحتي فرحتين
اسيد:رااااح اصير اب
شمس:هههه احلى اب اسيدي
اسيد:شمسي وضوء عيوني
ضليت انتظر يوم يوم واعد ساعة ساعة حتى يشرف ولي العهد بيوم كنت نايم وفزيت على صرخة شمس
شمس:ولككك اسيد كوم ابنك راح يجي
اسيد:وييين يجيي
شمس:يجيييي لشيب الخلفني اسيدددد
صرت مااعرف شسوي بيتي وحدي بس قريب على اهلي اتصلت على امي جاوبت
اسيد:يمه الحكي مرتي راح تجيب تعالي بسرعة مااعرف شسوي
ام اسيد:جاية يمه جاية حضر الجنطة جايتك
سديت التيلفون ورحت ادور على الجنطة شمس محضرتها بس طلعتها جبتلها شال وعباية
اسيد:اوكفي خل اللبسج
شمس:يمه راااح اموت ولججج يمه الحكييي بنتج راح تموت خنتكتنيييي ولككك اسيدد
اسيد:لا ادكولين ولككك
شمس:يمه راح انجلط ولجججج يمه بنتج راح تصير ام تعالي يمها
اندك الباب نزلت فتحتة امي وابوي واسيا
ام اسيد:وين مرتك
اسيد:فوك فوك
ابو اسيد :امشي بوية لـ سيارة اسيا بوية جيبي الجنطة يلا كولوا يالله يلا خل نتوكل
اسيد :ابوي يسوق وانا بالسدر واسيا وشمس وامي ورا
شمس:اسيا خاف اموت هذا اخوج ابو النسوان زوجي وحدها موحلوة ولج يمه اااخخ راح اموت
اسيد:خايبة انا بحال المراة اطلعي انتِ بالسلامة
شمس:سلامة لا شافتك عمه راح اموت
ام اسيد:يايمه فدوة اروحلج تحملي راح نوصل
شمس:هسه الدكتورة نايمة وراح يخلوني اموت
اسيد:راح انزع النعال ترا شجلبتيييي بالموووت
شمس:مو همَّ يكولون اللي تطلكك تشوووف الموت وهاي اني جاي اشوفة لعد مثلك
ابوي يسوق وميت من الضحك وأسيا انتهت من الضحك لو مالباب چا راحت بالشارع وامي كوه مصبرة روحها ماتضحك
اسيد:يلا وصلنا
شمس:اااخخخ يمةةة راح انجلط
اجت الدكتورة لـ 4 الفجر كالوا جابت اجت ممرضة شايله الطفل بيدها ولد شلته وبسته اول فرحتي نزلت دموعي وانا شايل ابني بيدي باوعت على اهلي يبچون
ابو اسيد :اللهم صلِ على محمد وال محمد يابوية كل الهلا هلا بجيتك
أسيا:اوي يروحي
اسيد:أذن بأذانه بوية
اخذهه وأذن بأذانة
اسيد:امه شلونها
الممرضة:كُلش زينه بس ترتاح وراح يطلعوها
اخذت الطفل وراحت ومن بعدهي طلعت شمس
شمس:وين ابني انباك مو يبوي انباك ابني
اسيد:ادري طلعوا ابنج لو عقلج شبيج بابا يروحي انتِ اروح فدوة لهل الوجهه هذا الحمدلله على سلامتج
شمس:الله يسلمك ابني وين
شوية وجابوا دخلوا اهلي سلموا وخابرت اهلها كتلهم جابت
شمس:شنو تسمي
أسيد:مُتيم
شمس:اوي فدوة
للعصر طلعنا لان هي طبيعي مو عملية فـ ما يحتاج تبات
ثنينهم حالتهم زينه والحمدلله يوم عن يوم صار مُتيم يكبر وصار اغلى شيء بحياتنا
شمس:تحبة
اسيد:چا شعندي غيره صار روحي من الدنيا
شمس:وانيييي
اسيد:انتِ روحي وكُل حياتي
صار عمر مُتيم اكثر من شهر صار عند وردة طفل صكر وردة كانت اعز خواتي واقرب وحدها على كلبي استمرت حياتنا بهذا الهدوء والسعادة العايشين بيها
اسيد:شمسي
شمس:ها عيوني
اسيد:اروحلهن فدوة
شمس:حبيبي كول
اسيد:مااريد شي بس هيج من اكلج شمسي تردين عليه بهذا الرد اليهبل
ورا فترة صارت مشكلة اختي فرح
انا اعرف فرح فقيرة بس بنفس الوقت بسرعة تندفع وكلنا نعرف انُ عمر المراهقه عمر جدًا صعب وبهاي الفترة الشخص يندفع ويحب يجرب كلشي بالحياة وخاصةً ينجرف بروجة الحب وهذا اللي صار ويَّ فرح
راحت بسالفة الحب وصديقات السوء اللي هي كانت تسمهين صديقات الطفولة
انتهى الموضوع وكل اللي عرفوا نسوا وراح بيوم رجعت من الدوام فتحت الباب ودخلت البيت هدوء تام بس صوت شمس الحنون الهادئ الياخذني لعالم ثاني تغني كاعدة بالغرفة جوا تنوم مُتيم
صغيرون
بابعد أهلنا وفراكك شلون ..؟
نذراً لـخيط عيوني لمن يرجعون..
وينك يامدلل وينك ما الك بينه!
يابعد أهلنا يابه صبرك علينا!
ياريت بضلوعي اضمك
وبنص العيون
صغيرون
يابعد أهلنا وفراكك شلون؟
اسيد:يابه كلبي
شمس:ياهلا بهل الطول
تقدمت يمها مُتيم كان بين النايم والكاعد بسته بخده
اسيد:يايابه شكد احبكم اغلى من روحي وعلي
خليت راسها على صدري وبستها براسها شمس يشمس ضوء حياتي
..............................
علي: من بعد ما استشهد الولد اخذتهه حتى اوصلة لـ اهلة والتشيع كان جدًا مهيب الله يرحمة
من نزلت وردة كانت والده دخلت سلمت عليها وكانت يمها فرح اختها سلمت وطلعت صعدت لـ غرفتي اكو فلوس هنه مو الي امانة من شخص مخليهم يمي
وخابرني يريدهن كتله بس ابدل واجيبهم الك المبلغ كان 8 ملايين انا ضامهم اجيت اريد اطلعهن مالكيتهن! عقلي طار من راسي
نكثت الغرفة كلها ماكو رحت لـ امير لان سوالفة هاي لكيتة يقرا
علي:ماخذ فلوس مني
امير :اي
علي:كوم جيبهم وانا انطيك غيرهم مو الي ذني
امير:ها
علي:وجعا 8 ملايين مخليهم انتَ ماخذهم كوم جيبهم مو الي امانة
ضل صافن بوجهي
علي:الفلووووس وين
امير: موعندي
علي:شلون موعندك محد ياخذ فلوس مني غيرك
سكت ماجاوبني رحت لـ كنتورة فتحته اول واحد بس ملابس والثاني ملابس وثالث خانة بيَّ فلوس وهداية ومادري شنو لكيت فلوس لكن فقط مليونين ونص !!!
علي:8 ملايين ياخرا وينهن
امير:صرفتهم
علي: ارجعلك بس خل افرغ
شمرت الفلوس بوجهه وطلعت اخذت من العندي سلمتهم لصاحبهم ورجعت
علي:رحت انطيتهن للخاتون مو
امير:ههه ياخاتون
علي:العندك
امير: لا صديقي يطلبني انطيتهه وصلحت سيارتي
علي:الجذب يمشي بدمك
امير:بعد عيني والله
علي:كتلك وارجع اكلك فلوسي وراتبي وتعبي فدوة الك. بس لا تخلي شخص يضحك عليك وتصير سهل
ما انكر انُ ضجت من تصرفهه بس خلصت ورا فترة اتصلت عليه بنت خالتي فرح كالت تعال قريني وعادي مثل كل مرة رحت من الباب الداخلي دخلت للاستقبال انصدمت بـ فرح ملابسها والمكياج شنو ضليت صافن بيها
شهل التصرفات هاي! وكلامها وتصنعها بالكلام والبلوة الرادت تشمرها براسي طلعت من بيتهم حاير بزماني
شنو احجي بالضبط ماعرفت !! مارجعت لبيتنا اتصل عليه راهب كلي تعال للبيت الثاني رحت يمه وانا صافن بهاي المصيبة شجاها وهيج سوت معقولة هاي فرح يطلع منها هيج
راهب:شبيك علي
علي بتنهد: والله ياخويه من كثر صكعات الدنيا ماضل كتر صاحي براسي
راهب:شجاك صاير شيء
علي:لا ماكو شي
قاطع كلامنا دخول نمر
راهب:هلا بالدايح
باوع علينا ورجع باوع ورا أشر لـ شخص انُ يدخل دخلت ورا بنية وكفنا على حيلنا من شفناها
علي ،راهب:منو هاي
نمر:مرتي !!
أشرلها تروح للغرفة هي راحت هو اجه كعد ودنك راسة يتأفاف
علي:مرتك شنو ماتحجيييي
نمر:مرتيييي مرتيييي تزوجتها
راهب:بس هاي حامل
نمر:اي اي حامل منيييي
علي: الله يطيح حظك
راهب:شسويت ولك دمرت نفسككك
نمر:مادرييي شلوون مادريييي صارت حامل ولكم تورطت تورطت
علي:هذا اليمشي بغير درب الله
نمر:شسوي شسويييي وريام شكلهاااا اذا عرفت متزوج ماراح تباوع بوجهي اصلًا
راهب:چا ليش مافكرت من البداية بـ ريام ليششش
نمر:اخذتني الدنيا والله مو بيدي ماجان الاتفاق والقصد هيج
علي:شراح تسوي
راهب:ابوك اذا عرف شدكلة
نمر:اكله على صخام وجهي على صخام وجهي بيا وجههه اكابل ابوي لا وهو يدري انُ انا ابتعدت عن هاي السوالف اصلي واصوم وانا لا صلاة ولا صوم
ضلينا ساكتين مانعرف شنو نسوي بالضبط ضل اسبوع بالبيت هو ومرتة مرة انا وراهب جنه طالعين اتصل نمر
علي:ها نمر
_اني زوجتة نمر طلع وهو سكران مايندل طريقة وين فدوة الحكوا عليَّ
غلقت الخط
راهب:شكو
علي:سكرااااان وطااالع خررااا بروحكككك
اكثر من ساعة احنه ندور على نمر لحدما لمحنا يمشي بين السيارات بالازدحام يطوطح وكوه يمشي ويصيح احبج ولج احبج نزلنا نركض عليَ انا وراهب كعد بالكاع والناس التمت عليَّ
_خطية شبيَّ هذا
_سكران مدري مخبل
راهب:ممكن تنطونا مجال
ابتعدوا عن الطريق كعدنا يمه وهو يصيح احبج ولج احبج
راهب:نمر كوم ويانة
نمر:انا احبها احبها
لزمني من ايدي وايده الثانية لزم بيها راهب وميل راسة على صدر راهب
نمر:عافتني ولكم عافتني
علي:ترجعلك ياعيني ترجعلك بس كوم ويانة
بالف ياعلي يلا كام رجعنا للبيت مرتة كانت واكفة بالباب تنتظر بس شافها ضل يصيح يغلط ويفشر حط راهب ايده على حلكة حتى يسكت حطينا على الفراش نام وهو يرددد احبها وعافتني
راهب:الله يطيح حظك
تركنا وطلعنا راهب راح لـ بيتهم وانا رجعت للبيت لعب بنفسة لعب دمر نفسة
ثاني يوم من الدوام ورحتلهه
علي:شصاير وياك
نمر:ريام عافتني عرفت متزوج
علي:منين عرفت
نمر: مادري والله مادري
رجعت للبيت لكيت عمامي يمنا بدلت ملابسي وكعدت يمهم شوية وطلعنا للحديقة من طلبنا جدي انا والشيخ عرفت علمود موضوع فرح سديت الموضوع وياهم وانهيت كلشي
نمر مر على زواجة شهرين محد كان يعرف غيري انا وراهب وعلى حسب كلامة ريام
ورا شهرين بالضبط خابرني نمر بليل كلي تعال للبيت بسرعة رحت لكيت راهب موجود
علي:خير
نمر: طلكت هاي البربوك لان طرحت واجتني فرصة
علي:وانت ماناوي تستعدل وتعوف هذا الدرب
نمر:احاول
راهب:داز علينا بهل اليل على شنو
نمر: اريد ريام ترجعلي
علي:اي وشلون
نمر:ماادري تساعدوني
حاولنا ويَّ ريام لكن كانت رافضة مااقتنعت لحدما شافت اوراق الطلاق بعيونها راح نمر مباشرةً تقدملها ومثل العادة اجه الرد بالرفض بدون سببب
من طلعنا من يمهم نمر صعد سيارتة وطلع بأقصى سرعة لدرجة مالحكنا حتى نلحك بيَّ
ابو ازهر :لا حول ولا قوة الا بالله شلون ويَّ هالرجال هذا
وضل نمر يحاول ويَّ ابوها بس مايفيد
نمر:ابن النعال تعبني
علي: تهون تهون ان شاء الله من نصيبك
جنه كاعدين على الشارع العام اكو مصبات كاعدين عليهن ويانة راهب طبكت سيارة بيضة عالية نزل من عدها .....
