رواية عشك أل فراس الفصل السابع والعشرون بقلم زينب نور
علي: نزل من عدها شخص مو غريب علية شكلة وكف سلم وكال
_انتَ ابن محمد صح
علي:اي نعم منو حضرتك
_ههه حقك ماتذكرني انا صديق ابوك سابقًا كنت دائمًا اجيكم
علي:أهلًا وسهلًا
_ أنا اتصلت بوالدك وكال راح اجيك ان شاء الله يكون قريب
علي:بلي بالبيت
اجه ابوي سلم عليَّ وراحوا لـ بيتنا
نمر:منو هذا
علي:صديق ابوي اسمة سالم جان دوم يجي
نمر:وشيريد هسة
علي:هذا مايذكرة الا اذا عندة مشكلة او يريد فلوس
نمر:ابين وانتَ شبيك كلبت خلقتك
علي:من زمان اكره وما اطيقة واحد مادي وطماع بشكل مو طبيعي
راهب:من شفتة عبالي من ذولك اجانة
علي:منو
راهب:التجار وجماعتهم
علي:غير بالسجن شعليه بيهم بعد
نمر:وبعد التهديد تتوقع يتركونك
علي:أنا أديت واجبي فقط خيولون همَّ ونعالي
نمر: الله كريم
راهب:انت شصار وياك
نمر:بخصوص شنو
راهب:خطبتك
نمر:قافل ومدري شسوي
علي:نطبلهم مثل جسار
نمر:ابوي معارض يكول ولد ديره وحدها يجي يوم ويقتنع
رجعت للبيت بـ 12 جانوا كلهم موجودين بالصالة
علي:شعجب كاعدين
الجد: باجر عدنا كعدة واريدكم كلكم تحضرون
علي:تخص منو
الجد:طرف محايد احنه وان شاء الله تنحل الشغلة
علي:اها خير ان شاء الله
ترخصت وصعدت لـ غرفتي بدلت ملابسي واجيت انام وصلتني رسالة من رقم غريب مكتوب مرحبا !
علي:مراحب
_شلونك
علي:منو ؟
_ شخص عزيز عليه
علي:تحجي منو لو شلون ؟
_انتَ وحدك اعرف منو
علي:فارغ
راسلت قمر حجيت وياها ومن بعدهي كالت راح اروح انام بالفترة الاخيرة قمر صارت تتهرب مني بـ حي الله حجة ومن اكلها خل اشوفج اطلع الف عذر وعذر ماكنت اضغط عليها أبدًا
كعدت ثاني يوم بـ 9 الصبح الشيخ وجدي وابوي بالديوان واسد وصهُيب معزومين وامير وشهد بالدوام بس وردة بالمطبخ تنظف وامي وبيبيتي كاعدات بالصالة ويمهم صكر
علي:صباح الخير
الجدة ،ام فهد :صباح النور
كعدت يمهم راسي يوجعني حيل باوعت على صكر كان يباوع كعدت العب ويا
ام فهد :يوم اللي اشوف ابنك بيدك وافرح بيك
وردة:امييين يارب العالمين ازوجووا شبيكم
علي: ما تساااعدج لا تلحين ازوج واخليها فوك بالغرفة ماتنزل
وردة :يااا شفتوا بعدهي ما اجت تغير علينا
علي:اي ما تساعدج عود بالبيت ومدري شنو مرتي ما تشتغل رقيقة وشوفي حتى ابنج يضحك
اجاني صوت سَحر بنت خالي من الباب وهيَّ ادكول
سَحر:قصدك مريضة مو رقيقة
علي:محد مريض غيرج ترحيلها فدوة
ام فهد:راح يتعاركون
سَحر: شلونكم
رحت للمطبخ اسوي كهوتي مثل العادة دخلت غزل من باب المطبخ
علي:يابه هلا وكل هلا هسة نور البيت
غزل:منور بوجودك شلونك
اخذت ابنها منها وسلمت عليها
علي:چا ابو الفهد وين
غزل:راح لـ ديوان منو يمنا
علي:الغاكة بنت خالج
غزل:هههههه استغفر الله خل ادخل اسلم
راحت هيَّ طفيت الكهوة وابوس بالفهد بعدين خليتة يم امه ورحت اسلم على غضب
علي:عاش من شافك
غضب:وانتَ العايش عمي ماتنشاف
علي:جني هلال العيد بالشهر مرة
غضب:هههه مشتاقلك
علي:بعد عيني داعيك اشوق
نص ساعة وبعدهي راح ماقبل يبقى للغده كال عندي شغل اجت شهد من الدوام امير يتأخر سَحر ضلت يمنا على الغده
ابو فهد :غزل بوية شلونهم عيالج وياج
غزل:كُلش زينين
ابو فهد :الحمدلله
الشيخ : اسد وصهُيب شوكت يجون
الجد:والله مادري كالوا ورا الغده
الشيخ:علي اذا ماعندك شي سوي كهوة واخذلك فره على الديوان خاف ناقص شي امير يجي تعبان واسد وصهُيب خاف يتأخرون ، لا اطلعن للحديقة وشباك المطبخ وباب الصالة والاستقبال والمطبخ ممنوع ينفتحن
كملت غده وطلعت لـ ديوان مابيَّ كلشي كامل كعدت اسوي كهوة لان الكهوجي مريض مدري شبيَّ
أمير:ايباااا الزنكيل يسوي كهوة
علي:دسلم مال الغسل لهل الوجهه
امير:من الصدمة نسيت السلام
علي:روح بدل واتغده وتعال كمل ذني هواي
امير:خاب والزهرة ام الحسن لو مدري شيصير ما اجي شني عمي مطي اريد انام اريد ارتاح الدكاترة يرطلون براسي من الصبح لهسة واجي لديوان شني تسودنت
عافني ودخل جوا كملت كلشي وصعدت الغرفتي الكعدة بـ 4 باوعت على الساعة بـ 2 ونص اتصلت على قمر وراسلتها بس ماتجاوب تشوف الرسائل وماتجاوب
علي:ماشي خل تخلص الكعدة وانا الج
ضليت كاعد ومتخبل ليشش تغيرت بين يوم وليلة شسوويت مسوي شي مرتكب ذنب ؟ الف سؤال وسؤال اجه براسي بـ 4 نزلت لكيت هواي ناس موجودين والعركة كانت على مراة
_ انت ماد ايدك عليها وكاسر ايدها واحنه بناتنا محد يمد ايده عليهن
"بتكم هي الماتحترم وتستاهل المراة الترفع ايدها على ام رجلها هاي عيب تسمى مراة
_ ام رجلها لو خوش مراة چا ما وصلتها
الجد:اهدوا ياجماعة الخير وخلونا نعرف نتفاهم
_بنتي ايدها مكسورة واريد فصل وفوكها حاضر وغايب
"بيا حق انطيك بالقانون بتكم هي رايده الطلاك ومالها شيء والحاضر احنه بالبداية خلينا بيدك
الجد:بويه انتم اهل وولد عم ماتسوا تصير بينكم بالتفك علمود نسوان هاي مو حلوة بحقكم الغلط من الطرفين يابو عماد مايصير البنية ترفع ايدها على مراة بكد امها
ابو عماد:ياشيخ المراة تتدخل بكلشي
الجد :هذا مو عذر كلنا تربينا على انُ احترام الجبير واجب والمراة جبيرة بالعمر وبنتك طاكتها حيل
ابو عماد:أمجاد كاسر ايد بنتي وهذا مو حق
الشيخ : أولًا الحق على الطرفين مو من حق البنية ترفع ايدها على عمتها مهما كان السبب اكو اهل وزوجها موجود احجي ويا ما فاد احجي ويَّ اهلي واتفاهم وياهم المراة ادخلت بينهم ميخالف ام وادخلت احجي وياها اتفاهم وياها مو ادفعها من الدرج وهي مراة جبيرة بالعمر ، ولا الك الحق يا أمجاد ترفع ايدك على مرتك امك وحقك لكن مالك حق انتَ لازم تكون من البداية عادل بين الطرفين ومرتك مو جارية عندك وانتَ اكثر من مرة يوصلني مرتك تزعل
أمجاد:شيخ المراة ماتحترم امي ما اريدها وامي من حقها تتدخل
شاهين:امك من حقها تتدخل بالبيت بس مو حقها تتدخل بغرفتكم انتَ ومرتك هاي خصوصية بين الرجال ومرتة همًّ يتفاهمون
الجد:مطلبك شنهي يابو عماد
ابو عماد:حاضر وغايب وفصل
ابو فهد :هاي وين صايرة همَّ الهم حق يمكم نسوان ثنين مضروبات والحاضر بيدك
أمجاد:الغايب انطي وكلشي تريد خل تاخذهوبس فصل غير الغايب ماانطي وفلس احمر ما تشوفون
بالاخير انحلت بالصلح بين الطرفين وراحوا
امير:هيَ هاي ماخليتوني انام من سليمة اطمكم انتم ونسوانكم كون بكبر واحد
ابو فهد:اسكت ولك العالم بعدهم واكفين
امير:خيولون
اسد:لا تسويلنا فصل
امير:فصليش
جاسر:يالفهيم اذا سمعوك تحجي عليهم يطكوك كوامة معدلة
امير:دخيلك يالحسن شنهاي العشاير ولا تشاقة
صار اليل وماكدرت اشوف الطركاعة العندي الليل كلها افتر واراسل وهم ماكو ماتجاوب
علي:باجر انتظرج بالبستان واريد من الله ماتجين وحك علي اجي لـ بيتكم اهجمة على راسج
خلصت الليل صليت صلاة الليل وقريت قرأن لحد الفجر صليت الفجر ونمت كعدت بـ 8:30 ماطايق روحي شفت التيلفون نفس الرقم مراسل داز صباح الخير ماجاوبت رحت شفتها ماكو ما مراسلة ابد
العصر رحت كعدت أنتظرها بالبستان بـ 5:15 يلا اجت
علي: ياهلا بهل الطول يابة
باوعت عليه وابتسمت
علي:شصاير بيج
متغيرة حيل ضعفانة وجها صاير اصفر
علي:قمر شبيج
قمر:تعبانة
علي:اسم الله من كل تعب لو جاس روحج من شنو
كعدت على طرف النهر وبچت
قمر:علي عوفني وروح شوف حياتك اني مالي علاج اني مريضة وقلبي يوم عن يوم يزيد ويا دكتور اللي اروحلة يكولي ماتصيرلج عملية استمري على العلاج الى ان تفرج ومعنى تفرج يعني اموت لذلك شوف حياتك اني ما اريد تتعلعل وياي اكثر من هيج
علي:يعني انتِ متجاهلتني كل هاي الايام وماتردين على الرسائل ولأ المكالمات علمود هذا السبب
قمر:اي والله اي ليش اضلمك انت بعدك بأول حياتك وميت بنية تتمناك
علي:انتِ ليش ما تفهمين ليش محسستني الحب هيج سهل وبسهولة نكدر نحب مرة ثانية وكلشي طبيعي ليش ماتفهمين أنا احبج ورايدج بكل حالاتج افتهمي يابنت الناس افتهمي رايدج بكل حالاتج وماكو مرض مالة علاج مو بكيف القنادرة اكو رب ارحم واحسن منهم شهل اليأس هذا
قمر: راح تتعب وياي أني اعرف راح تتعب وانتَ تعبت هواي كافي لازم ترتاح
علي: لو تحجين حجي بيَّ حظ لو تسكتين وياج ما أتعب أتعب من الكل وراحتي يمج بكل حالاتج فـ كافي عاد تسوين هيج
قمر: صار لازم اروح لا يجي احد اراسلك بليل
علي:خوش روحي وديري بالج على نفسج والتزمي بعلاجج ولا تفكرين بشيء وانا وياج للموت لاخر لحظة بعمري أنا وياج ما راح اتركج يلا روحي وجهج صار احمر من البرد
قمر:هههه ماشي
راحت لـ بيتهم رجعت للبيت بالطريق صادفني ماهر صديقي
علي: لا يابه هلال العيد بين اليوم
ماهر:هههه حقك حقك بس والله مشغول
علي:شعندك مشغول لدرجة ماترفع التيلفون
ماهر: الوالدة مريضة والله ومن طبيب لـ طبيب
علي:سلامتها خيرها
ماهر:من استشهد اخوي ياسر لليوم هيَ ماصحت وضربتها جلطة وهسة علك عدها سكر وهي عدها جلطة
علي:الله يصبرها ويشافيها محتاج شي
ماهر:سلامتك ياحبيبي ماتقصر
علي:بخدمتك
دخلت للبيت لكيت اهلي كلهم كاعدين بالصالة الجو كان مغيم ومطر خفيف مشغلين الصوبة وكاعدين
الجد:چا وين جنت بوية
علي : بالبستان
كعدت يمهم همَّ يحجون وانا بالي مو يمهم لحدما دغاني أمير
علي:ها
أمير:يحجون وياك وين صافن
الجد:شبيك بوية شو جنك ضايج
علي:مابيه شي بس تعبان وراسي يوجعني
الجدة:منين تعبان اليوم حتى دوام ماعندك
علي:بداية صخونة
الجدة:اي چا هاي العرفناها اكو واحد بهل البرد يسبح ويلبس نص ويطلع
علي:البصرة مابيها برد لو تشوفين صحراء الانبار
الجدة: يمه شنهي ماكو برد الدنيا باردة بس انتَ مدري شجاك
شهد:شتردون عشه
أمير:قوزي
شهد:متريد ويا باجة ومندي
أمير:ياريت
شهد:قوزي يريد دبس وراشي وهاي هي لان الدنيا باردة ومطر
أمير:بكيفج هيَّ
ضلوا يتعاركون على العشه أنا تركتهم وصعدت فوك صار الاذن صليت بغرفتي سالفة قمر ضلت براسي الخوف زاد بكلبي عليها والدكتور ماجاي ينطي اييي كلام ايجابي اكثر من دكتور نفس الكلام متأخرة وماتصيرلج عملية جنت نايم على فراشي وصافن انفتح الباب دخلت امي
ام فهد:شبيك يايمه مادكلي شبيك دوم وحدك ومالك خلك وتعبان
علي:مابيه شي يمه دوامي عليه ضغط وراسي هالايام يوجعني
ام فهد:أنا امك واعرفك اكثر من روحي التعب ابين عليك انتبهة لـ نفسك وشوف شصاير بيك من يوم ما مات صديقك وانتَ ماصحيت يوم واحد وحتى ضحكتك صارت امنيتي
علي:الله يرحمة
ام فهد :كافي ادمر بـ نفسك ادري بيك سبع شد حيلك وهسة كوم انزل أتعشى ويانه جدك مايرضى ياكل الا تجي
علي:ماشي هسة اجي
نزلت هيَّ شفت تيلفوني ماكو ما مراسلهه دزيتلها رسالة ونزلت لجوا
أمير:اجه هلال العيد خلونا ناكل زرازير بطني كامت تركص هجع من الجوع
توني اجيت اكعد واندك الباب رحت فتحتة نسوان ثنين دخلت لجوا صحت لـ امي
امير:حلوات
علي:انجب واكل
امير:ياهنه
علي:شعرفني
امير:وين عايش لو كايم انا اعرف نسوان المنطقة كلها
علي:روح اكعد وياهن واسمع شيحجن
امير:خل اشبع واروح
من اجت امي كالت خطابة لـ شهد ومثل العادة شهد ترفض اكيد
ورا أسبوع بالضبط اشتغلت على قضية تجار مخدرات كـ شغلي
السيارات تعبر بليل على طريق همَّ كل مرة يعبرون منا خلينا سيطرة اجاني أمر انُ السيارات من تعبر ما افتشها!! أمر من أحد القيادات اوالضباط الاعلئ رتبة
علي:بس أنا عندي أمر بتفتيش كل سيارة تعبر
_جاي اكلك لا تفتش نفذ ثم ناقش
غلق الاتصال وأنا شياطين الدنيا صارت براسي اجت سيارات اول شي تلاث سيارات سود وراهم ثنين سيارات كبار وبالاخير سيارتين هم سود وكفت كبال السيارة وكفت كلها كان مبتسم السايق واثق انُ ماكو تفتيش
علي:فتشوا السيارات كلها انكثوهن نكث ولا سيارة تبقى كل برغي وكل سيارة تتفش فووورًا
نزل السايق اجه بـ اتجاهي
_انتَ شسويت شنو تفتيش والله تيلفون واحد الا اخليهم يشيلون الرتب من عندك
ضربتة راشدي وصحت عليهم اخذوا
علي:شكو سايق نزلوا وعلى التفتيش مباشرةً شكو شي بالسيارة نزلوا
صرت افتر بين السيارات وانطي الأوامر نزلوا اطنان من المخدرات كلها بالكاع خلوها اجه ضابط برتبة لواء ضربت التحية
_عاشت ايدك يابطل
ابتسمت ومن بعدها بدوا يحققون ومن خلال التحقيق تبين الهم سند قوي يشتغل وياهم وحتى ضباط وياهم كدرنا نفكك هاي الشبكة لكن من خلال التحقيقات اللي وصلتني واكف ويَّ الضابط وشفت الملف بيده
چذبني الاسم اسم ابوي!!! الثلاثي
علي: هذا منو
_لحد الان مامعروف وجاي نحاول نوصلة
ضليت صافن بوجهه ابوي شما يسوي بس مستحيل توصل بيَّ لـ هاي ممكن تشابهه اسماء
علي:متأكدين من الاسم
_اكيد سيدي
علي: لازم اكو خطأ
_ليش
علي:خليني أتأكد من الاسماء
طلبت اجازة زمنية اخذت الملف اللي يخصهم ورجعت للبيت لكيت ابوي كاعد بغرفتة دخلت وسديت الباب
ابو فهد:خير لونك مخطوف
علي:حقي يابه سؤال وعليك رسول الله جاوبني بصراحة الشغلة مو سهلة لا عليك ولا علينا
ابوفهد:شكو ماتحجي
فتحت الملف طلعت صورهم وادعي ربي خطأ بالاسماء او تشابهه
علي:ذول تعرفهم ؟
ابوفهد:هذا جان يشتغل ويَّ سامي بس ذول مااعرفهم
علي:يعني الك صله بيهم
ابوفهد:حاليًا لا بس سابقًا من جانت علاقتي بـ سامي قوية التقيت بيَّ اكثر من مرة ليش
علي:القينا القبض عليَّ ومن ضمن الاعترافات اسمك وياهم
ابوفهد:بس انا مااعرفهم
علي:الك سوابق
ابوفهد:السوابق التحجي عنهم بوقتها كان عمري صغير ومن بعدهي تركت الموضوع هي سنة وحدها وابتعدت وانا ماكنت اتجار فقط ساعدات بدخول بضائع
علي:وتساعد هيج نماذج بسهولة اسمك هسة طلع اذا اخذوك شنو موقفنا وانتَ شنو موقفك حسب مكانتك وصيتك بين الناس
ابوفهد:ماعندي شيء أنا خل ياخذوني طلع اسمي بس ماعندي شي كتلك كبل سنين هاي السالفة ومن بعدهي انتهت ليش تزيد وتعيد
علي:لا ازيد ولا اعيد انت هسة اذا اجوك واخذوك شنو موقفي أنا او عوفني انا من دخلت بضائع مافكرت شكم شخص راح يدمر من ذاك الوقت لحد ما لزمناهم همَّ على نفس الطريق
ابوفهد:علييي لا تحط السالفة براسي كتلك ماضي وانتهى
علي:ما انتهى الموضوع هسة رجع واسمك وياهم
ابوفهد:خلي وياهم شسويلهم يعني
علي:والله راح تخبلنيييي
ابوفهد:لا تصيح ولا تخبصني شيصير خل يصير انا ماعندي شي
علي:ماعندك شي بس تعبر كواويد وسرسرية مثل ذول ماعندك شي كم شاب وكم شخص دمروا وانتم حاطينكم حماية تالي طلع حاميها حراميها
ابوفهد:لا تخليني اثور عليك وحك هو علي اكصبك كصب
علي:هذا الشاطر بيَّ
تركتة وطلعت من الغرفة مااعرف شسوي أنا اركض وراهم ومعرض حياتي للخطر تالي ابوي اله ايد بالموضوع
ام فهد:هايمه شعندك ويَّ ابوك
علي:ماعندي شي يمه راح ارجع لـ دوام أنا
ام فهد:الله وياك
طلعت لـ دوام طلبت التقي بواحد من اللي اعترفوا وكدرت التقي بيهم
علي:صارلك شكد بهاي الشغلة
_10سنوات
علي:وحاليًا شكد عمرك
_29 سنة
فتحت تيلفوني وطلعت صورت ابوي
علي:تعرف هذا او ملتقي بيَّ سابقًا او حاليًا او تربطك بيَّ علاقة
_لا أبدًا اول مرة اشوفة
علي:اول مرة !!
_اي نعم
علي:محمد فراس **منو
_محمد فراس ** شخص قديم وتاجر مخدرات من زمان وحاليًا هو شخص مهم بالدولة
علي:من المخدرات صار شخص مهم بالدولة
_اي
علي:تمام
طلعت من يمه التقيت بأحد الضباط
علي:أكو خطآ بالأسماء
_سيدي رائد رافد هوَ المسؤول ومو من المعقول انُ يغلط بالأسماء وتعرف أنت احنه كـ صنف من المستحيل يصير عدنا هذا الشيء
علي:اها يعني رائد رافد بيده الشغلة
_نعم سيدي
علي:موجود هوَّ
_اي موجود
علي:ماشي
توجهت لـ رافد فتحت الباب ودخلت عليَّ مباشرةً
رافد:وين كاعدين احنه بيا حق تدخل بهاي الطريقة
علي:شوف ولك رافد اقسم بالله اذا ماتكف بلاك وشرك عني اشوفك جدك مصلخ
رافد:اذا ماتحترم فارق العمر احترم الرتبة اللي بيني وبينك شلون تجاوز على ضابط اعلى منك رتبة
علي: كلمتين الك غيرتك وحقدك وحقارتك وخرهم عني لا تخليني احطك براسي وماتخوفني لا رتبة ولا غيرة هاي أولًا ثانيًا اسم ابوي ومخلي بالملف وتريد تحطنا بورطة وتحط نفسك اقسم بالله اذا ماتتعدل وتصلح الموضوع لا تلوم حتى نفسك اخليك تمشي بـ شارع مصلخ افتهمتتت
رافد:انتَ تعرف ويامن چاي تحچي
علي:ويَّ واحد حرامي سوالفك يمي دير بالك تحط راسك بـ راسي
دخل راهب ضرب التحية وكال
راهب:محتاجينك بشغلة
رافد : اخذه وخل يروح راح امشيها الك لانُ ولد عشيرة وحدها تجاوز عليه وانا رتبة اعلى منك
علي: لا ولد عشيرة ولا ولد حمولة ابتعد عني احسلك
طلعت من يمه وراهب وراي
راهب:تخبلتت تجاوز على هيج رتبة
علي:انعل ابو الرتبة
راهب:امشي نطلع لا تخزينا وجنه بـ وحدها نصير بـ ثنين
مسحت وجهي وطلعنا برا المقر
راهب:صار خطأ بالأسماء وسبحان المايغلط مالة داعي هاي العصبية وتتهجم عليَّ بهل الشكل هذا وين عايشين شو تخبلت فد مرة لا جبير ولا صغير ولا رتبة خلصت منك شبيكك
علي:بعمرنا ماصار عدنا هيج رافد تعرفة كلش زين شنو هو لا تصير محامي عنه
راهب:لا تضل تمضرط لا محامي ولأ شي انت تصرفك غلط تتجاوز على ضابط اعلى منك رتبة من يشمرك ورا الشمس وتاكل خرا زايد وصار خطا وراح يصحح وينتهي كلشي بطل عصبيتك
عافني ودخل لـ جوا يومين يلا رجعت للبيت صادف يوم الجمعة فـ الكُل كان يمنا صعدت بدلت ونزلت يمهم رغم جنت كُلش تعبان
أمير كان فوك شوية ونزل ويا ديچي حطة بالحمام وسد الباب شوية وشغلة بصوت عالي لطمية أنت لو دربك جمر
اسد:استلم اجتكم الهوسة
ابو شاهين :شيسوي
صهُيب:مايسبح الا يشغل شيء حتى يصيرلة واهس يطيح الوصخ
شغلها وصوتة اعلى من الطمية
انت لو دربك جمر نمشي على جمرة ياحسين
انت يالحتى العرش طاف على كبرة ياحسين
على الكمي نصير احنه ماية ياحسين
للحشر هاي الولاية ياحسين
احنه من نثور كل حاجز نكسرة ياحسين
علي:كسروا عضامك كااافي ولك
أمير:والله لم تمحوا ذكرنا
علي:وعلي اطبلك للحمام ازوركك كافي عاد هريتنا هري
امير:فـ كد كيدك واسعى سعيك فـ والله لم تمحوا ذكرنا لبيكك ياحسينننن
علي:يسطرك كون كااافي طفيييي
امير:ليلة يلطم على الوجة ماي الفرات
لا سيوف ولا رماح ولا رماد
لو جمر دربك نسير أعليَّ حفاي
نعتني ونسحك دروب النايبات
ماتوكفنا سيوف المرهبات
نوصل المرفوع راسة على القناة
ياحبيبي ياسفينة النجاة
نورَ عيني ياذبيح العبرات
هذا عهد الجعفرية..ياحسين
مايهابون المنية ..ياحسين
ماهوَ شيعي المانذر للمات عمرة..يااحسين
شوية وطلع ينشف بشعرة بالخاولي
علي:الوصخ
امير:وين اكو وصخ توا طالع من الحمام
علي:تبقى وصخ ومرة ثانية من تاخذ ملابس تعلم الترتيب مو تعوف كلشي هوسة وتولي وتبديل لا تبدل بالغرفة جنك ابو فانوس
امير:بالخدمة بخدمة الزناكيل احنه
الشيخ:تعال فهمنا ليش اليوم جايكم انذار وفصل من الجامعة
امير:دخيلج يالزهرة شدراك
الشيخ:شعليك شدراني
اجه امير تربع بالكاع والخاولي على راسة وكعد
امير:بويه رحت لـ جامعة لكيتها صايرة مناحة وطالبات خطية هم ويانة وطلاب كلنا مفصولين بسبب الغيابات
امير :بوية طولوا بالكم صلوا على محمد
كالوا نروح لـ رئيس القسم ونحجي ويا وانتَ تحاجي بـ نيابة عنة كتلهم عمي أحاجي چا شسوي طبيت لـ رئيس القسم
أمير :السلام عليكم
دكتورعلي:وعليكم السلام
امير:لقد جئتك ومعي لفيفُ من الأراملِ واليتامى يتسكعون من قاعةً الى قاعة يحوي الذراء وجوههم
واطكلة هاي الخطوة الرنانة باوع عليه وكال
دكتور علي:كملت
أمير:اي دكتور
دكتور علي:تاخذ اللفيف مال الارمال واليتامى وتطلع برا والله لرقن قيدكم والله لـ اسويكم فرجة لامة محمد
امير:دكتور طول بالك صل على محمد
دكتور علي :أنا أبن جلاء وطلاع الثناء يامتى أضع العمامتةً فـ تعرفوني لـ كيدكم شرًا مكيدا
امير:بوية وأنا وجت روحي وتفشلت كدام الطلاب كتله
فـ كدك كيدك وأسعى سعيك
فـ والله لم تمحوا ذكرنا
وطلعنا واجانة انذار وبعد أتوبة اذا احط روحي بـ هيج سالفة
صهُيب:الأرامل واليتامى صاير خير
امير:چا شمدريني راح اتفشل
علي:هذا اليحط روحة بشيء اكبر منه
امير: المهم ما انفصلنا بس انذار واذا نغيب بعد يوم واحد ننفصل
ابو فهد :بس انتَ كل يوم اداوم
امير:ها
ابو فهد:وجعا وين تروح
امير:مرات اداوم ومرات اديح بالشوارع عبالك واحد مستهتر واهله متبرين منه
ام فهد :وانا اكول ليش من ترجع كالتك الوصخ
امير:انعم الله عليج أنا كاتلني الوصخ
دك تيلفوني طلعت بالحديقة حتى اجاوب اجاني صوت نمر كوة يحجي
نمر:تعال بسرعة أنا بـ حي الانتصار
.....................................
اسر : يمة
ام اسيد:اسر وخر عني
اسر:هسة خل احجي وكولي وخر عني
ام اسيد:ادري بسوالفك
اسر:شبيها سوالفي جنها البخت
فرح:خلي يحجي
ام اسيد:احجي شعندك
اسر:اريد هوس
ام اسيد:انجب
اسر:يمه ترا جاي احجي صدك
ام اسيد:وبعد السويتة هم تباوع بوجهك
اسر:ماسويت شي هي السانها اطول منها
ام اسيد: اطول منها وتمد ايدك عليها ااخخ منك ومن رعونتك
اسر:يعني انا ارعن
ام اسيد:اكبر ارعن انتَ ماتفكر تصرف بدون تفكير
اسر:ديلا مقبولة منج روحي اخطبيها
ام اسيد:ما ينطونها البنية تريد تكمل دراسة تفتهم انتَ
اسر:اي عادي تزوج وتكمل دراسة
ام اسيد:اسر كوم من يمي
اسر:والكاظم رايح لـ ابوي شني مليت منج كل ساعة مطلعة عذر
رحت ادور على ابوي لكيتة يم جدي بالديوان بس هو وجدي
اسر:السلام عليكم
الكل:وعليكم السلام
الجد:عاش من شافك
اسر:وانت العايش مشتاكلك
الجد:ضاهر الاشتياق
اسر:شسوي غير الدولة مطيحة حظنا بالدوام
الجد:هههه الله يعينكم وينصركم
اسر:احم اريد منكم طلب
ابو اسيد :عرفتك والله خيرك
اسر: اريد تخطبولي هوس بنت عمي
ابو اسيد:وبعد سالفتك تقبل بيك
الجد:يا سالفة
نرجع بالاحداث :
جنت يم بيت خالي ورجعت صادفتني بالطريق هوس تمشي وحدها
اسر:وين جنتي
هوس:رحت للاسواق اشتريت واجيت
اسر:ورايحة وحدج ومن شوكت احنه بناتنا تروح بلا
هوس:من اليوم شنو سجن وبعدين رحت اشتريت واجيت
اسر:واخوانج وعمي يدرون بيج
هوس:يدرون او لا معليك
اسر:والله صار لازم نشدهن كلنا شلع قلع
هوس:اي شدهن ولمعهن واكلك لا تلمعهن خلي بيهن فيونكة
اسر:دنجبي يلا وامشي للبيت واريد من الله اشوفج بعد ترحين رجليج اكصصهن
هوس:لا والله خوفتني شوف ترا متخوفني وانتَ كلك خلك ابن عم عندي اخوان وعندي اب وعندي جد همَّ يحاسبوني انتَ عليك بـ خواتك فقط
اسر:غصبًا على راسج ادخل افتهمتي غصبًا
هوس:لا تخليني اغرد عليك هسة معليك بيه وماكو شي يصير غصبًا على راسي حقارتك الزايدة بطلها
اسر:شو السانج طولان
هوس:والله اليدك الباب يسمع الجواب انتَ تجاوز وأني ممحاجيتك
سحلتها من ايدها دخلت لـ بيتنا
هوس:هد ايدي كسر ان شاء الله
اسر:أنثبري واقسم بالله اذا شفتج بعد طالعة حظج اطيحه افتهمتي
هوس:اني مو جارية عندك انتَ اللي افتهم معليك بيه ولا تدخل خليك بـ نفسك فقط ولا تخليني اصيح هسة
اسر:لا والله صيحي ليش مستحية
هوس:وخررر عني خل اروح لـ اهلي وتأدب عاااد
اسر:صوتج لا ترفعينا وجها الجوب
ام اسيد:شكو شبيج عمه
هوس:خلي ابنج يتأدب عمه وكوليله لا يدخل بيه لا من قريب ومن بعيد عندي اهل همَّ يحاسبوني
ام اسيد:ولك شمسوي للبنية
اسر:مغتصبها شمسوي يعني رايحة للمحل كتلها لا ترحين بعد
هوس:لو عندك اسلوب حلو چا احترمتك
اسر:غصبًا عليج تحترمين
رفعت اصبعها بوجهي تريد تحجي لزمت اصبعها ولويته
اسر:أنا محد يرفع ايدة بوجهي مو انوب مراة
ام اسيد:كسررر ان شاء الله عوف البنية ولك
دفعتها ودخلت لـ جوا اجت وراي امي
ام اسيد:انت ماتستحي على شورابك تصيح على البنية وتحجي وياها هيج
اسر بعصبية :ليش ما تفتهمون انُ أنا احبهااا واغار عليها حتى من روحي وتالي رايحة وحدها تفتر كدام خلك الله لا تحطين اللوم عليه
ام اسيد:الحب مو هيج مو عصبية وصياح وضرب تغار احجي وياها وتفاهم حتلو البنية تحبك راح تصير تكرهك بسبب أسلوبك
أسر:هي تجبرني على هذا الاسلوب وتكرهني او تحبني هي الي مو لـ غيري لو تروح بيها ركاب
ام اسيد:ماكو بنية تحب الشخص اللي يهينها افتهم عاد وحط عقلك براسك مو صغير انتَ تريدها وتحبها خليها تحبك مو مخبل وتصيح عليها انتَ دخلت العسكرية بنص عقل وطلعت منها بدون عقل
أسر:اها يعني هسة أنا مخبل ماشي اشوفج المخبل شيسوي
ياسر:ما انام احنه من ورا اسر
اسر:اكل خرا انتَ
ياسر:شبيك يابه شبيك دومك عصبي راح تشيب
اسر:حقييي من اشيبب
سالفة وعند امي اجه ابوي حجتله شصار اجه اسيد حجتلة
اسيد:عفية عاشت ايدك
اسر:اسيد لا تزيدها علية ترا محد منكم يقبلها
اسيد:اسر تسرعك وعصبيتك الزايدة ترا ادمرك
ياسر:انتَ نار وهيَّ ثلج شلون تتراهمون مدري
أسيا:هوس هادئ بس مو دوم
اسر : هي كلمة وحطوها براسكم كلكم هوس الي ولغيري ماتصير بالغصب بالطيب الي
ياسر:السبع يطلع دم
ابو اسيد:اكعد عاقل وبسك عاد اذا البنية رفضتك غصبًا على راسك ماتاخذها وتتركها بحالها وهسة عوف الموضوع جاينا محرم
اسر:محررررم بعد 28 يوم
اسيد:لا تصيح كافي عاد اكعد
اسر:وهاي كل السالفة
الجد: اسمع بوية وخليها براسك دوم
اسر:تفضل
الجد:أنا زلمة عندي بناتي وحفيداتي اغلى من الولد مو تفرق لكن أنا عندي البنية مدللة اكثر من الولد وخط احمر من تجي انتَ تمد أيدك عليها وتحجي ترا انا ما ارضى وحتى اذا هي توافق أنا ما راح اوافق ذني المؤنسات الغاليات لا انتَ ولا غيرك اله حق يهينهن او يتعامل وياهن بـ اسلوب مو حلو فهمت بوية
اسر:فهمت انا مو قصدي بس حالة عصبية وصارت
الجد:عصبيتك ماتطلع على مراة وقوتك لا تخليها على مراة اذا هي ماتكدرلك اكو رب سند الها ،وهسة ما راح افتح الموضوع ويَّ عمك الى ان اشوف هوس شني رأيها يلا افتح الموضوع وان شاء الله ورا عرس اسد
اسر:عرس اسد ورا فرحة الزهرة
الجد:اي تحمل واصبر واذا ما تريدك أنا ما اجبرها
اسر:صدك تحجون يعني انا اريدكم عون تصيرولي فرعون
الجد:هذا الموجود واذا ما عاجبك ما افتح الموضوع ابد وخليها تشوف قسمتها بعيد عنك
اسر:هذا الطلع وياكم خوش اصبر واشوف شنو تاليها
ابو اسيد:تعلم الصبر
اسر:متعلم كلش زين
ترخصت وطلعت من يمهم شفت أسيد واكف بالباب شايل ابنة
اسر:ها وين
اسيد:عود جايكم منو بالديوان
اسر:ابوي وجدي جيب مُتيم
اسيد:بيك شيء
اسر:لا
بهاي الاثناء طلعت هوس من بيتهم
اسر:استلم
اسيد:وين رايحة هويسة
هوس:لا كول هريسة فد مرة
اسيد:هههه لا صدك وين رايحة
هوس:يم بيبي
راحت هيَّ وانا اخذت مُتيم ورحت لـ بيتنا مرت الايام بهذا الهدوء التام قبل محرم صار علينا انذار مثل كل مرة العشرة الاولى من محرم انذار وقبل لا تطلع الزوار مشي بفترة معينة كذلك انذار
اسر:رايح انا
ابو اسيد:كبل لا تروح امشي روح لـ بيبيتك زعلانة عليك سلم عليها وروح
اسر:ماشي
رحتلها لكيتها كاعدة بالصالة بس شافتني دارت وجها
اسر:زعلان الاشكر مايكلي مرحبا
الجدة:زين من تذكرتنا
اسر:شلون انساج بكلبي وعقلي انتِ بس شسوي دوام
الجدة:عذر هذا
اسد:وانا اشهد يطلع عذر حتى ما يجيج
اسر:اجه الحاروكة خليك محضر خير رجاءً
اسد:حيللل انذار
اسر:ومرض باجر تلحكني
اسد:المهم مو اليوم
سلمت عليهم من طلعت صرنا وجهه بوجهه بالباب ابتسمت
اسر: فدوة لـ هل الوجه
هوس:وخر عني
اسر:بعدج زعلانة مو
هوس:ممكن تميل عن طريقي
اسر:لا مو ممكن
هوس:اسررر
اسر:يبعد عشيرتي ها
هوس:وخر عني
اسر:ابتسمي عليمن كوة ضامة ضحكتج
هوس: اسر وخر عني خل ادخل
اسر: خايبة يبعد روح اسر شبيج عمي فكي العقدة عاد
هوس:وخر عني وأني افك العقدة
اسر:لا بالله
درات وجها عني وضحكت
اسر:هههه هوسة سنيني انتِ
تركتها وطلعت لان تيلفوني احترك حرك طلعت لـ دوامي عشر ايام انا انذار ليل ونهار احنه واكفين حماية المواكب والطرق
ورا الدفنة رجعت للبيت التعب اخذ ثلثين حيلي فـ نمت مباشرةً كعدت على صوت صريخ نسوان نزلت اركض صارت بوجهي امي
ام اسيد:ولك
شكرا لزيارتكم عالم روايات سكيرهوم
