رواية اغفري لي الفصل السادس والعشرون بقلم أوتار حزينة
كسرة روح
هي مو وجع عابر
هي شق بالنفس
مو مثل جرح اليد
ينزف ويلم
كسرة روح
تجي من نظرة خذلان
من وعد انقال وانمحى
من ضحكة كانت أمان
وصارت ذكرى مؤلمة ما تنسى
كسرة روح
لما تصحى الصبح وتدور على سند
وما تلكاه
لما تصير غريب وانت بوسط ناسك
وتبتسم وجواك صراخ
كسرة روح
مو بس دمعة تنزل
هاي تنهيدة
وجع ساكن بكل نفس
يحجي بلا صوت
ويصرخ بلا صدى
يمامه
ابويه شد ويايه على سالفه الملهى وقويدر
ويا ومنيره تحرك بيهم سايستهم
وكلت
«،،،،الما اجيب حنين ونروح اني وياها
سوه مااريد اروح وحدي
الا هي وياي
قبلو بهل الشي وعافوني جنت اريدها بس
اجيب حتى اخذها وننهزم من ذوله
الي بله شرف
بس القدر جان اله رأي ثاني وكسر ظهري
رجعت المغرب هي بالي ومااعرف شبيه مخنوكه واريد بس ابجي طبيت للبيت
بعدني بالباب منيره كالت
«،،،روحي لاختج كاعده اجيب
صحت بذهول
«،،،شنوو شلون وهي بالسابع
«،،،ياا ليش،،،،هي بالسابع
عفتها وطلعت اركض لبيت سعيد خايفه
عليها وگلبي نغزني وصلت
سمعت عياطها واصل
لشارع
طبيت لجوه اخته سماره كاعده ولاويه
رجل على رجل سعيد يمها لازم جهازه
ولا دايرين بال سالت بخوف
«،،،اختي شبيها
«،،،،كاعده اجيب شبيها يعني
«،،،شلون وهي بالسابع
«،،،ماادري هي على غفله اجاها الوجع
ردت اطب لغرفتها صاحت بيه
«،،،وين مووليه الجده جوه هي وامي،
وكاعدين يجيبوها
«،،،ولييش،مااخذتوها للمستشفى
«،،،ووهي وينها الفلوس
ردت عليه وفرت ايدها گلبي هبط من
سمعتها عاطت كلت بدموع
«،،ولكم سوه شي اختي جاي تموت جوه
«،،،مابيها شي هسه اجيب وادكوم حالها
حال النسوان
هو جاوبني بروده حنين صرخت
«،،،ولكم راااح اموت
هديت على الباب اريد افتحه مقفول
دكيته بقوه محد طلع وفتحه
اليه رجعت ليوره وصحت
«،،،،حنين ااني هنا ااجيت لااتخافين صيري
سباعيه وجيبي ابنج
كل صرخه تصرخها احسها تجرح گلبي
وروحي كمت اروح واجي يم
الباب اردد
«،،،،يارب كومها بالسلامه
روحي فرفحت عليها وكمت ابجي وذوله
ولا تحركو من مكانهم ولا بين
عليهم هم مهتمين الها
صرخت
«،،،يمااامه الحگيني راح اموت
رحت للباب دفرته اصرخ
«،،،ولكم اافتحو الباب وخلونا ناخذها للمستشفى
سعيد كام وكال
«،،،اي جيبي فلوس وخلي ناخذها
طلعت الدخل وشمرته كدامه وصحت
بي
«،،،هاااك بس امشي خلي نوديها للمستشفى
فر ايده واشر لاخته وكال
باستهزاء
«،،،شوفي هاي عبالها المستشفى تستقبلها
بكم الف وربع
«،،،،،يمممه الحگيني
صرخت كمت اضرب بالباب بأيدي
الاثنين اسمعها تصرخ بس
ماابأيدي كلشي
اسويلها
كعدت يم الباب اتوسل برب العالمين
يطلعها من هالشده
وره لحظات سمعتها صرخت صرخه
قويه وصوت بجي طفل
وياها كمت وكلت
«،،،،يالله
«،،،جابت سعيد
اخته حجت ردد ضايج
«،،،اي خلصنا يمعوده
دكيت الباب اريدهم يفتحو اليه تاخرو جوه
اسمع الطفل يبجي صحت
«،،،ولكم اافتحو وخلوني اشوف اختي
تاخرو هوايه يله فتحو طلعت امه وجهها
مخطوف صاحت بي
«،،،ولك هااي ماجاي يوكف نزفها
طبيت بسرعه عليها الجده ام غايب
يمها وصايره فد مره وجهها
اصفر صاحت
«،،،،اام سعيد ودوها للمستشفى تره البنيه
راح تموت
كعدت يمها الوجه صاير اصفر كركم
وتتنفس بصعوبه عيونها
جانت تباوع لفوك
شلتها من الفراش لحظني وصحت
بخبال
«،،،،ولك سعيد جيب سياااره اختي
راح تروح من اايدي
ام غايب لمت غراضها وطلعت
من يمنا بسرعه
كمت اضرب على خدها واتوسل
بدموع
«،،،،،حنين باوعي عليه هسه ناخذج
للمستشفى وتصيرين زينه
حسيت هدومي تنگعت باوعت فزيت من
شفت دم وخرت الغطه اختي
غركانه بدمها
عطت
«،،،ولكم وووينكم اختي راح تموت
امه طبت بسرعه لابسه عبايه وياها
سماره وهو
«،،،يمامه
سمعت صوتها شهكت جاوبتها
«،،،هاا حنين
بلعت ريكها وكالت بصوت رايح
«،،،بنتي امانه عندج هي يمامه يماا
غمضت عيونها وراسها وكع ليوره صفنت
عليها مذهوله ومصدومه هزيتها
بهداوه اردد
«،،حنين اكعدي
بعدين هزيتها بقوه اصرخ
«،،،، ولج ااكعدي باوعي عليه
هي بحظني حسيت شي،انسحب من جوه
روحي وجرحه جرح جبير وصوت
صاح بادني بقوه
«،،،اختج ماتت
ماكعدت عبالي،،،،فقدت الوعي شالوها
بسرعه اني وياهم كعدت
ليوره هي بحظني
ابوس بيها واتوسل تفتح عيونها وصلنا
المستشفى اخذوها من ايدنا
سابحه بدمها واني وياها
اردد بخبال
«،،راح تكعد اي هي فقدت الوعي بس
الصوت الي صرخ بأذني سمعته من طلعو
وكالو
«،،،البقيه بحياتكم
«،،،لااااا
صرخت من گل گلبي وحسيت روحي
رادت تطلع وي هاي الصرخه طبيت عليها
اصرخ
«،،،،لاااا حنين لاااا
جانت نايمه على السديه ومغطين وجهها
وخرته وحظنتها لصدري اصرخ
بخبال
«،،،ووولج ليييش عفتيني حنين ااكعدي
ولج مااااكدر اعيش بلياج
يمممه ليش ماعفتيها
اليه
تخبلت وكمت ابوس بيها اتوسل برب
العالمين يرجعها اليه بس،اختي
مارجعت طيبه رجعت
جنازه
بنص البيت خلوها اني ملخه روحي
ونايمه عليها ابجي وكل ساع اصرخ
«،،،يمممه اجتج حنين اجتج الغاليه
منتضر يمي يبجي ويشهك
،لميتها بجفنها الابيض لصدري اريد
روحي الاخذتها وياها ترجع اليه وهي وياها
بس مارجعت اخذوها ودفنوها
جوه التراب
ماخلوني اروح وياها ابويه الظالم هو وقويدر
الي مانزلت دمعتهم عليها دفعوني
وقفلو الباب من بره
اصرخ
«،،،ولكم اخذوووني وياها
حنين المن عفتيني لو ميته اني ولا ااانتي
صرخاتي جانت تطلع من جوة گلبي
كمت اصرخ بالنسوان
«،،،ولجن هلهلن اختي رااحت عروس
اريد اهلهل الها تطلع صرخه نسوان
لزمني يبجن عليها صرخت
«،،،راااحت اااختي وخلتني يتيمه
ملخت روحي ولا سكتت حيلي راح وكعدت
بالمخزن اشهك بصوت قوي اردد
«،،،ولج لييش،،،رحتي مو كتلج راح اخذج
وننهزم
الليل اجه اسمع بس صوتي ابجي
محد من ذوله الگواگيد بجى عليها بس
منتضر يمي يردد
«،،،خلصت يمامه
«،،،اااي وخلتني للعذاب
«،،،يوما اليه
حجه بدموع واجه ليمي حظني بجيت
علي وعلى اختي الي راحت طفله
ماشافت شي من حياتها
وعلي لان هم ماشاف من عمره شي
عايش بالصناعه ومانعرف شيصير بي بهل
الوكت الاغبر
وره مشوار نام يم رجلي واني ولا غمضت عيوني
دمعي ينزل مو مصدكه اختي
راحت من ايدي
اردد هذا كابوس وهسه اكعد منه بس لاا
جان صدك لان سمعت
ابويه صاح
«،،ولج يماامه
منتضر كعد وراح علي رجع كال
«،،،،،يمامه كومي حتى نروح يم بنت حنين
خلوها بالخدج ومحد من اهل سعيد
يقبلون يظلون يمها
صوتها اجه براسي
«،،،بنتي امانه عندج هي يمامه يماا
لميت روحي اشهك بصوت منيره طبت
وكالت بضوجه
«،،،كوومي خاتون وروحي يم هاي بنت اختج
الي ماتت وعافتها وراها
ماجان بيه حيل احجي كلمه صوتي
راح من الصراخ والبجي
كمت اسمع اختي توصي،بيه عليها
لبست عبايه سوده وشال
اسود سعيد بره
يروح ويجي
جان صاير فد مره عبالي من
وره اختي بس العار كال
«،،،عواد اني مااكدر اربي البنيه اخذوها
انتو وربوها
«،،،منو يكول راح تعيش،،،،وهي اجت بالسابع
يجوز تموت وتلحك بنتي
جاوبه بضوجه ولا عبالك بنته الماتت
واشر اليه
«،،،اخذها وروح
«،،امشي امشي يمامه
ماحجيت كلمه ردت اروح اشوف بنت حنين
گلبي نار عليها صعدت اني واخويه
بالتك توك اخذنه هو للمستشفى
الي هي بيها طبيت
امشي وراه ومنتضر
بصفي وصلنا ردهه الخدج شاف
امه واكفه بره سال
«،،،ها ماتت
«،،،لا بعدها
صفنت عليهم من شفتهم يريدوها بس
تموت كالت اله
««،،روح سوي شهاده الوفاه والبيان
««،،اي وهاي مايريدن فلوس
«،،،هاك هاي خمسين
منتضر انطاه اخذهن بسرعه سال
«،،،شراح اسميها
سال امه صاحت بي
«،،،شمدريني ولك انت مو ابوها سميها
اي شي على اساس،هي راح اطيب
«،،هي وينها
«،،،جوه
اشرت طبيت بسرعه جانو كم طفل نايمين
ممرضه جبيره اجت صفنت عليه بعدين
سالتني
«،،،،شتريدين ماما
«،،،اريد اشوف بنت اختي
جاوبتها وشهكت سالت
«،،،انتي اخت الماتت
«،،اي
دموعي نزلت كالت
««،«استغفر الله ياربي تعالي ذيج بنت
اختج
مشيت لجهاز شفت طفله نايمه ونفسها
سريع خفت وسالتها
«،،،راح تموت
«،،لا اسم الله هي صلاوت رغم اجت بالسابع
بس،وزنها زين مال تسعه اشهر
بس لان الرئه بعدها
مو كامله خليهن
بهذا الجهاز
«،«يعني راح تعيش
«،،اي بأذن الله
سمعت صوت العار
«،،،هاي شراح نسميها
انداريت علي صافن عليها بضوجه
جاوبته بدموع
«،،حنين رادت تسميها يمامه
«،،اي هاهيه هي وحده ولاعبه طوبه
بينا النوب تصير اثنين
سكت وبعدين رد
«،،،اني شعليه قابل اني الي راح اربيها هي
بنتكم اني مااريدها
حجه هيج وطلع كلت بگلبي
«،،الله هم يحاسبني اذا هسه قتلتكم كلكم
ردت اسوي هالشي بس ماكدرت جنت شايله
هم اختي وراحت وخلت هم بنتها
برگبتي الصار بيها سدوه
بفلوس وراحت بذنبهم
ويم الله الحساب
ظليت بالمستشفى وي بنتها وادعي من
الله ماياخذها لان شفتها من ريحتها
سعيد بعد ماشفته لا هو ولا امه
بس منتضر كام يروح ويجي عليه
مر شهر واني
وياها اروح للبيت اخذ من الفلوس
المضمومه اغسل ابدل وارجع الها اخويه
هم ساعدني بمصرفها يجيب حفاظات
وحليب والاكل مالتي
من المستشفى لان جان حكومي
ردتها من الله واستجاب اليه ومااخذها
يم امها وطلعوها من شافو
وضعها زين
اخذتها للبيتنا خايفه عليها وخليتها
يمي بالمخزن بنفس اليوم
بليل ابويه صاحني
«،،،،يمامه
طلعت اله شفت سعيد يمه ومنيره
وقويدر منتضر راح لشغله
وبعد مايجي لان ابو
الشغل كام
يحجي علي لان عافه بهل الفتره والتهى
وياي بنت حنين
«،،،ها
جاوبته حجه
«،،اسمعي زين هالخميس اعقدلج على سعيد
فگيت عيوني وصحت
«،،شنووو
«،،مثل ماسمعتي اني مااريد اربي بنت
غيري بيتي وحجيت ويا كتله اخذ يمامه
وهي تربي بنتك وهو اقتنع
صفنت على سعيد ولا عبالك اختي
ميته صارلها شهر مزين
ومرتب روحه ويباوع
عليه بكره صحت بي
«،،ولك انت مو تكرهني شلون تريد هسه
تاخذني
«،،،شاسوي ابوج مايقبل يخلي بنتي يمكم
وانجبرت اخذج حتى تربيها
اشرت بأيدي بوجه وصحت
بي
«،،،لووو تموت سعيد ماراح اخذك
كام وكال
«،،،سمعت عواد بنتك ماتريدني خلي البنيه يمك
وانتو ربوها
«،،،ااااكعد
ابويه صاح بي بقوه وكمل يخزر
بيه
«،،،اذاا ماازوجتي اذبها بالشارع
صفنت علي واعرفه الظالم يسويها
قويدر كمل
«،،لا يابه نبيعها شدكول سعيد
«،،بكيفكم شتريدون تسون سوه بس
فگو رگبتي منها
«،،،ولكم ااانتو شنو وحوووش
صحت وكملت
«،،هاااي بنت اختي ومستحيل اخليكم
تسون بيها هيج
«،،اانجبي ولج ولاتظلين ااتصيحين
قويدر صاح بيه انهديت
بي
««،اانجب اانت ياعارر
اني حجيت هيج وهجم عليه كفخ
وراجديات تخبلت وطلعت قهر اختي
بيهم كمت اضرب بيه واسب
وافشر بس التمو عليه هو
وابويه وكتلوني كتله
موت
وكعت بالگاع خشمي ينزف وحلگي
مابجيت صرخت
«،،،الله ياااخذكم ياكوووايد
قويدر جرني من شعري للمخزن وشمرني
بالگاع بقوه اجت گصتي
بالگاع وانجرحت
الدم كام ينزل على عيوني وبنت حنين
كامت تبجي
مادرت بال لروحي زحفت الها اسمعه
يفشر عليه هو وابويه الي كال
«،،،سعيد باجر نسويلها هويه مثل ذيج
وهالخميس اعقد عليها تاخذها
هي والبنيه
اخذتها لحظني اهز بيها سكتت باوعت
الها وشفت حياتي اني واختي
بيها هم راح تكبر وتعيش
مثلنا بضيم وقهر
كلت مااظل الا انهزم بس خلي اسايسهم
وابين الهم اني موافقه
وسويت هالشي جانت هويه حنين عندي
هي والبيان قبل المهر بيوم هم
نايمين لميت غراض بنتها
بجنطه واخذت باقي الفلوس،المضمومه
لبست عبايه وشال شلتها نايمه
وغافيه
طلعت امشي بهدؤ خاف يكعدون
ويشوفني عيوني مره على غرفه ابويه
ومره على قويدر
وصلت الباب فتحته وطلعت بس
خليت رجلي بالشارع ركضت بيها بسرعه
اسمع صوت الجلاب تعوي وهي
عندي ارحم من اهلي
قائد
ظلينا عشرين يوم بأذربيجان ورجعنا
لبغداد بهل كم يوم شفت ليلى ورد وجهها
وزاد وزنها وهالشي خلاها تحلو
بعد اكثر
استقريت وياها بيتهم وصار الجناح الفوك
النا اخذت راحتي بي لان محد
من اهلها يصعد يمنا
هي بدت ادوام واني هم التهيت بشغلي
لان عفته هوايه رجعت العصر
طبيت واكفه
يم باب المطبخ مبتسمه مديت
ايدي الها اجت تركض
وشمرت روحها بحظني
لميتها لصدري بقوه وشميتها بنفس
طويل كلت
«،،،،افيش ياريحه هلي جنه انتي وعطرها
وخرت مني تضحك وكالت
«،،شفت سويتها الك وماخليتها بنفسك
باوعت للبيت وسالت
«،،عمي وينه
«،،بابا جوه
«،،،احم لايشوفج
«،،،خلي يشوفني عيني انت رجلي
مو غريب
ابتسمت وعضيت شفتي كلت
«،،،طالعه عيونج ولج
«،،،ابطل
«،،،لا يابه اشاقه
«،،هههه لا خلي ابطل
«،،،اذبحج والله ولج لاتلعبين باعصابي
وخليني فرحان بهل اللحظه
خلت ايدها بايدي،وكالت
«،،،شدكول اعزمك اليوم
««،«اي،ليش لا لازم استلمتي الراتب
«،،،،اي واريد اخذك نتعشه سوه
«،،،هههه بس لا فلافل
«،،،ههه لا راح اعشيك الي يعجبك
«،،،العب قوزي اريد
«،،،طار الراتب
«،،،ههه اساعدج والله
«،،،مااريد يله الخير هوايه قوزي قوزي
اعرفك ابو بطن وعظام
طبينا سوه للمطبخ خالتي كاعده
تشرب جاي يمها عمي سلمت
«،،،الله يساعدهم
«،،هلا قائد
خالتي كالت
«،،،ليلى حضري،الغده لقائد
«،،مااريد خاله اكلت بالشغل شي قليل وهسه راح
نطلع نتعشه بره
«،،شكو بيها اطلعو وتونسو
ترخصت وكمت من يمهم صعدت لفوك
هي اجت ورايه ادفع بظهري
ضحكت وكلت
«،،،سياره عاطله اني
«،،،ههه اي
صعدنا سوه طبينا سوه للغرفه كلت
«،،،اريد اسبح حتى اتنشط
«««هاي هدومك محضره
غمزت وكلت
«،،،اشو طالعه حلوه
«،««قائد اني حلوه من زمان وهاي سوالفك
اعرفها واعرف شتريد امشي
اسبح واطلع نشف
روحك زين وخلينا نطلع
««،،ههه حافظتني
«،،،اي نعم ومن جماااان
«،،،هههه
خربت ضحك اشرت باصبعي
«،،،بس بوسه
«،،نوو هي وحده وبعدين تتطور الامور
لشي خطير
«،،،حبابه
«،،،لااا
«،،،مو ازعل
«،،،ازعل ترضى بعدين
«،،،مو ااجي اخذها بالقوه
«،،،هههه تكدر مو
هديت عليها ركضت تصيح
«،،يممه قااائد اكعد
گضبتها وكمت ابوس بيها بقوه من وجهها
ورگبتها وهي خربانه ضحك
تصيح
«،،ولك كافي راح اموت من الضحك
خليتها بحظني وكلت مبتسم
«،،«لاااتستفزيني ولج تره اني مخبل
صفنت عليه مبتسمه والوجه صار
دم دحكت الها هايم وميت
عليها ردت
«،،،من جماااان هههه
«،،خرب اهلج والله اليوم فلا اهدج
وصدك نفذت تهددي وعشت وياها احلى
لحظات بحياتي وراها طلعنا وره
المغرب ايدي بايدها
تعشينا وافترينا بغداد وراها رجعنا
للبيت كعدت اشتغل بالحاسبه
هي يمي تحجي وي
غاده باوعت
الها كالت
««،،دوختك مو
««،لا الغي اني احب لغوتج
ضحكت واني هم الي ردته عشته وياها
وجانت الذكريات الحلوه تنعاد
بكل لحظه وثانيه
غاده
الحمد لله وضعي صار احسن وطبيت بشهر
الخامس ورجعت اشتغل وي رانيه مادوامت لان حمزه اخذلي اجازه مره اللخ حاجه جماعه
يعرفون المدير وكدر يمددها شهر اللخ
حياتي ويا ظلت نفسها يجي يمي
شويه نحجي عن اي موضوع وبعدين
يروح من يمي تعودت علي
كلش وعلى دلاله وكمت اخذ
راحتي ويا كلش بالحجي واضحك
بالعشه كاعدين اكلت طاسه الطرشي كلها
وعيوني على كاسته انتبه غمضت
عيوني بتوسل ابتسم شالها
وخلاها يمي ضحكت
وكلت
«،،،تسلم
«،،،،ادللي
اكلت الما شبعت كلها كامت الا اني هو
ظل يمي ياكل زلاطه كمت وكلت
«،،،الحمد لله
جلفت المواعين ورانيه يمي صبت
جاي وودته الهم رجعت بالكوب مالته كالت
«،،،زلمتج بغرفتج اخذي،اله
«،،،تمام
جنت مكمله غسلت واخذته اله طبيت
شفته كاعد على الجربايه يعد
ورق سديت الباب وكلت
«،،،الجاي حمزه
«،،،تسلمين بويه
خليته يمه اشوفه يدقق بسجل
ويعد فلوس كعدت اگباله ولزمت جهازي
فرگ ركبته وجان مبين علي
التعب
سالته
«،،،،تعبان
باوع عليه وهز راسه باي
««،،اي مبين عليك لان جاي اشوفك
تطلع من الصبح ماترجع لليل
«،،،شغل للراس غاده
«،،،انت يعني شنو شغلك بس تبيع
ماطورات
ابتسم وجاوب
«،،،،لا مو بس هاي
سكتت ماردت اساله بس هو كمل
«،،،اني عندي هالبستان اجاني من ابويه
الله يرحمه
«،،،يعني هذا البستان مو باسم جدك
لا جدي قسمهن كلهن وهو طيب وهذا
البستان الجبير كلش صار اليه انه وزهر
بلع اسمها وسكت والملامح تغيرت
كمل وره لحظه
«،،،ابويه الله يرحمه من مات جان عنده فلوس
خير من الله ومن خيره سويت محلات مال ماطورات وشغلت فلوسبالصيرفه وهم
خليت فلوس بمول جبير
الي بي ربع
فكيت عيوني ابتسم وكال
«،،،زلمتج تره مو شويه
«،،،اني يعني عبالي انت بس فلاح
«،،،اي اني فلاح ابن فلاح بس تكدرين
ادكولين تاجر بنفس الوقت
صفنت علي باعجاب وكلت
«،،عمامك وولدهم هم مثلك
«،،،لا بس انه
«،،،ياربي كلت علي مو شويه
حجيت بگلبي وشفت منه نفس،النظرات
لان صفنت علي هوايه نزلت
راسي سال
«،،،تفاجأتي مو
«،،،الصراحه اي بس اني يعني
سكتت سال
«،،،شنو احجي
««،،اني اعرفك مو شويه بس ماعبالي
هيج
«،،،،اي انه مو شويه
جاوب بثقه عاليه وخلاني اصفن علي باعجاب
درت وجهي وغيرت الموضوع
«،،الثلاجه مو عاجبني مكانها هنا
باوع عليها سال
«،،،وين تريدين اخليها
«،،،هناك بصف الكنتور
«،،،تمام هسه احولها الج
«،،،لا اكعد تعبان انت خليها باجر
جاوبته بسرعه صفن عليه ابتسم
وكال
«،،،لا مو تعبان وهي هم خفيفه مو ثكيله
«،،،،اي غير صاحبتها ماجاي تخلي اكل
بيها
جاوبته ضايجه من روحي لان بس اكل
ومن يجيني الليل انفجع وزني
صار ثمانين واني بعدني
بالخامس
ضحك
وراح الها كال
«،،،الف عافيه اگلي بويه الياكل متعافي
حولها بسهوله وجاب بطل مي وعصير
انطاه اليه وكمل
«،،،هاج اشربي اعرفج ماتحبين الجاي
«،،،لا مو مااحبه بس هذا ابنك مااعرف شمسوي بيه لا جاي اكدر اشربه ولا ااكدر اشتم
ريحه عطرك والجگاير
سكتت من صفن عليه سال
«،،،هاي يعني من وراه كرهتي عطري
والجگاير
«،،ها
ارتبكت وكملت
«،،،،اي رانيه كالت اليه هيج
ابتسم والنظرات اختلفت رد
«،،،بعد ماادخن خافن يزعل علي الغالي
«،،،،،يعني براحتك انت دخن بس بعيد عني
«،،،لا بويه ماراح ادخن يظل اثرها بهدومي
سكتت شرب الجاي وكام رجع الفلوس
بالكنتور كال من طلع ورق
«،،،هذني مصرف الج
«،،،مااريد حمزه انت مو مقصر
وعندي راتبي
«،،،غاده كتلج انتي حرمتي ومسؤوله مني
ومااريدن بعد اسمع منج هالكلام
ماحجيت شي سد الباب ورجع كعد يمي
سال
«،،،شراح تاخذين هديه لحرمه قائد
«،،،،مااعرف والله
«،،،تريدين شي غالي
«،،،والله من زمان ردنا اني وياها نسوي نفس
الكلايد وكلت اسويها مفاجأه الها
شدكول
«،،،اي عادي حلو هالشي
«،،،اني عندي مبلغ زين ضامته
«،،،عوفي عليه هاي الهديه
«،،،لا حمزه اا
«،،،غاده كتلج عليه اني اريدن اهديج شي
من عندي
«،،،مو ماايصير يعني
قاطعني
«،،،،يعني شنو
«،،،اني مااريد اكلفك بشي غالي
ابتسم والنظرات اختلفت رد
«،،،،كلفيني غاده ماراح اضوج ابدا تعرفين
ليش
ترددت وبعدين جاوبته
«،،،،ليش
صفن على بطني بعدين خله
عيونه بعيوني وكمل
«،،لان انتي راح تنطيني اغلى هديه بعمري
گلبي شبي كام سريع وليش عيونه اسرت
عيوني نزلت راسي بسرعه
ومااعرف شصار بيه
كمل
«،،،،،كلشي املكه هو الج ولعلي ومن حجيتلج
شعندي اريدن تعرفين انه شعندي وشاملك خاف يجي يوم والله ياخذ امانته على غفله
رفعت راسي خايفه وكلت بدون
شعور
«،،،،لاا تحجي هيج اني كلشي مااريد منك
الوجه تغير ابتسم وهم رجع كلشي
تخربط بيه كال
«،،،اعرف لچن لازم تعرفين زلمتج شعنده
ماعنده
«،،،حباب عوف هاي السالفه روحي تختنك
منها
حجيت بتوسل وعيوني غوركت نزلت
راسي مخنوكه ومااعرف شصار بيه من ذكر
الموت
«،،،غاده شبيج
سال انهاريت وكمت ابجي بشهكه قرب
يمي وسال بخوف
«،،،،بويه شبيج كمتي تبجين
«،،لاتحجي بعد هيج اني والله مااريد منك
فلوس ولا اي شي اريدك بس
تظل هنا يمي وما تعوفني
«،،،مو عايفج بويه انتي بس اسكتي
حمزه
شفتها شصار بيها وحالي انلعب
بي لعب اعرف تحسني امان سند ستر الها
من هالدنيا وغدرها وقبلت
بي والله قابل
تشوفني هيج مادام تغيرت وياي
وكمت احس من صدك انه مزوج وعندي
حرمه اعاين الها تشهك مثل
الطفله وخايفه اعوفها
اخذت كلينس وانطيته الها كلت
«،،،،كافي لو ادري مو حاجي
حجيت هيج جاوبتني بنتره حلوه
«،،،ااي ماتكدر تخلينا نكعد هادئين الا تطلع
صفح وتخرب الگعده
صفنت عليها وابتسمت جاوبت
«،،،،اسف بويه بعد مااسويها
«،،،،اي بعد لاتسويها ولاتجيب سيره
الموت
«،،،،ادللي من عيوني
سكتت بس تشهك بونه حلوه حتى من
تبجي بزعل اشوفها تخبل
واظلن بس اعاين
الها
«،،،اكلج انه سامع الحامل يضرب عدها
الهرمون يمكن انتي ضارب
عندج
«،،،،كلهن مو بس واحد
جاوبت بنتره وزعل ضحكت بصوت
هي ابتسمت كملت
«،،عرفت مو هسه بعد انتبه لكلامك واشتري
روحك
هددت وكلت بگلبي
«،،،،بس يمج انه اصيرن ضعيف ومااكدر
ارد الچلمه
ذبيت حسره وكمت كلت
«،،ارتاحي واخذي راحتج
عدالي ماتحجي شي لچن كالت
«،،،،،ليش تره بعد وكت اكعد تعلل وياي
صفنت عليها ارتبكت وكملت
«،،،يعني بكيفك اذا
«،،،لا راح ابقى
ابتسمت وكامت كالت
«،،لعد خلي اروح اجيب فواكه واجي
«،،تمام
طلعت من يمي وخلتني صافن ومبتسم
احس براحه وفرح تارس
گلبي وروحي
رجعت وره مشوار شايله صينيه
اخذتها منها وخليتها على الجربايه كعدنا
ناكل ونحجي بسوالف حلوه
يمامه
شفت روحي بالكاظميه شلون وصلت مااعرف
اذكر ركبت سياره وراها هم
اللخ وجوه تخطف من كدامي اشوف
بيها وجه ابويه وقويدر
يريدون يلزموني
احظن بنت حنين لصدري خايفه عليها
مو عليه لايروحون ياخذوها
يبيعوها لو يذبوها
بالشارع
كعدت بحضره الكاظم صافنه ودمعتي
بعيوني وهي بحظني نايمه
اريد ادعي عليهم مااعرف شاحجي
بس اردد
«،،،حسبي الله عليكم الله يسلط عليكم
الظلام ياظلام
بجيت بشهكه خايفه لاول مره ومااعرف
وين اروح اني وياها
من الصبح اني كاعده واجه الليل ونفس
وضعي كعدت وبجت نظفتها
وبدلت الها وسويت
ممه
اني كاعده وهي بحظني مريه عمرها
وسط اجت تدفع كرسي بي
شاب وضعه مااعرف
شلونه
وكفت قريب مني حجت ويا
«،،،خلي نكعد هنا ونتعشه
شافتني اباوع الها سلمت
«،،،،شلونج يمه
«،،هلا خاله
جاوبت بتردد ولهيت روحي بنت اختي
تبجي ماسكتت من كعدت سالت
«،،،،،هاي بنتج
صفنت عليها وجاوبت وره لحظه
«،،،،اي
«،،،يايمه هاي شوكت ازوجتي وخلفتي وانتي
اشوفج صغيره
مارديت اجت ليمي تباوع الها بحنيه
كالت
«،،،جيبيها يمه خلي اسكتها الج
«،،ها لا خاله اني اسكتها
صفنت عليه وحجت مبتسمه
«،،،لاتخافين مني واحسبيني امج
دموعي نزلت وشهكت بصوت قوي هي
سالت
«،،،خير يمه احجيلي طلعي الي بگلبج
ماكدرت احجي شي انهاريت بالبجي
وبنت حنين هم زاد بجيها اخذتها مني لمتها
لحظنها تردد
«،،،اش يمه منو وي الحلوه ومنو بجى
عيونها
باوعت الها خلتها بحظنها وتغني
دلول يالولد يابني بنت اختي سكتت ونامت
مسحت على شعرها وسالت
«،،،شبيج يمه هم الضيم لافي عليج
شاحجي قصتي ماتنحجي
فرت راسها وسالت
«،،،انتي وحدج
گلبي لعب هي حست كملت
«،،،كتلج لاتخافين مني واعتبريني مثل
امج
غصه صارت بگلبي والوجع الي بيه اكبر من
عمري بهوايه كلت
«،،،،اي وحدي
«،،،رجلج وين
«،،،ماات
جاوبت وكملت بگلبي
«،،،،،كون تريله وتدعمك سعيد ويلومك
مگطم
«،،،،الله يرحمه
جاوبتني وسكتت تباوع لبنت اختي
بحنيه كالت
،،،،بنتج تشبهج
دموعي نزلت كملت
«،،،شنو اسمها
«،،،يمامه
«،،فدوه لهل الاسم الحلو الله يخليها الج
«،،،،امين
باوعت للشاب صافن للگبه كالت
«،،هذا ابني ياسين من اهل الله يمه
«،،،الله يشفي ويخلي الج
ذبت حسره وردت
«،،امين
سكتنا شويه سالت
«،،شبيج يمه ليش،بجيتي
حجيت شي رتبته بعقلي حتى اخلص
من اسئلتها
«،،،ابجي لان رجلي مات وعيالي طردوني
من بيتهم
«،،،يايمه صدك تحجين
«،،،اي خاله
«،،،واهلج وين
«،،،يتيمه ماعندي اهل
«،،،،عمام خوال
«،،،مابيهم خير
كلتها وكمت ابجي
«،،،يعني هسه انتي مطروده من عدهم وجايه
ليم ابو طلبه فدوه لاسمه
«،،،اي
«،،،سوده عليه من الله لاينيطهم شلون
يطردوج وانتي بعدج صغيره
وبرگبتج هاي الجاهله
مارديت ظليت اني ودمعتي كملت
«،،،اسكتي يمه هي الدنيا صارت هيج والرحمه
انشالت من الگلوب قليل
ظلت مخافه الله
بگلوبهم
حجت هيج وخلت يمامه بحظني
وكالت
«،،،خلي اكوم اخلي العشه حتى تتعشين وياي
«،،،مااريد خاله
«،،،لا ازعل عليج تره
جاوبتني وجابت علاكه كعدت وخلتها
بالنص طلعت حافظات اربعه
وخبز وبطل مي جبير
وكلاص
فتحتهن فاحت ريحه كباب طاوه معدتي
طلعت صوت لان جنت جوعانه كلش صح وزعو
بالحضره بس ماكمت اخذت عزلت
نفسي بزوايه ودمعتي
بعيوني
«،،،،سمي يمه ومدي ايدج
حجت هيج واخذت حافظه وكفت يم
ابنها كامت تنطي شوربه مامديت
ايدي هي كالت
«،،،اكلي اني هسه اكمل ياسين واجي
اكل وياج
«،،،لا خاله مايصير الما تكعدين اكل وياج
ابتسمت وردت
«،،،،براحتج يمه
ظليت اباوع للناس تروح وتجي وافكر
بحالي وين راح اروح وانطي
وجهي
وره مشوار كملت واجت كعدت اگبالي
لفت اليه لفه وانطتني اخذتها
منها هي سالت
«،،،هسه انتي وين راح تروحين
«،،،مااعرف
صفنت عليه وهزت راسها بقهر وكالت
«،،زين احد من گرايبج مايكدر ياخذج يمه
«،،،لا كلهم مو زينين ومايريدون احد
،،،استغفر الله ياربي شلون يمه خما تظلين
هنا تره مايقبلون ويجوز يطلعوج
وين تروحين وانتي مثل
مااشوفج صغيره
وشايله بايدج
جاهله
سكتت سمعت ابنها طلع صوت باوعت
علي صافن علينا اشر على روحه
سالته
«،،ها يمه شدكول
اشر عليه وبعدين عليها وعلى روحه
«،،،،يا تريدنا ناخذها يمنا
هز راسه مبتسم
«،،،مايصير يمه خاف اهلها مايقبلون
وتصيرلنا سالفه
سوه بأيده لااا
ماحجت شي التهت تلف وتنطيني وتاكل
وره العشه شافت ابنها نام كامت
وكالت
«،،،لازم اروح وهذا الاكل
خلي الج اكلي من اجوعين وديربالج
على روحج يايمه
حجت هيج ومشت لابنها دفعته وراحت من
يمي ذبيت حسره ودمعتي نزلت
مااعرف وين اروح
يمامه كعدت وكامت تبجي سويت
ممه ارضعها ماتقبل تشرب
كمت اهز بيها اريدها
تسكت لان العيون صارت علينا شفت
المرة رجعت تدفع ابنها اجت ليمي
حجت بتردد
«،،،،والله ماكدرت اروح واعوفج وحدج گلبي
مانطاني ورجعت عليج
اجت اخذت مني يمامه بس صارت
بحظنها سكتت كملت
«،،،كومي ويايه لبيتي
گلبي هبط وخفت كلش حست بيه
كملت
«،،،لاتخافين يمه اني ماعندي بس هالولد
وهاي شفتي وضعه يعني ماراح
يأذيج
مااعرف ليش گلبي برد من يمها
يجوز شكلها الطيب هو ااي خلاني
مااخاف منها او يمامه الي
بس اخذتها لحظنها
سكتت مرتين
لو ابنها الي بهل الوضع واخذته الغيره
عليه دمعتي نزلت وكلت
خاله اني مااعرف شااحجي
«،،،،كولي يالله وامشي وياي اكعدي يمي
الما الله يفرجها عليج وبلكي عيالج
گرايبج يحنون عليج وترجعين
الهم
وهذا الصار رحت وي خاله ام ياسين لبيتها
جان بالدرابين القديمه وكفت
يم بيت قديم اباوع اله بحذر هي
طبت قبلي تدفع ابنها النايم
كالت
«،،،فوتي يمه
سميت وودعت روحي اني ويمامه
يم الله وطبيت
طبيت اقدم خطوه واجع خطوات شفتها
ودته لغرفه على صفحه ظليت
واكفه بنص حوش صافنه
وگلبي يدك بسرعه
مره اكول غلطت من اجيت وهسه يطلعون
عصابه وياخذون يمامه مني
واني اضيع بايدهم
طلعت وكالت
«،،،تعالي يمي نكعد هنا
مشت لغرفه فتحت باب وطبت ماراحت
ولا رجليه تحركت ردت اندار وانهزم
بس هي صاحت
«،،،تعالي يمه ولاتخافين
مشيت للغرفه وكفت يم بابها شفتها
علگت تلفزيون الاثاث بسيطه
كنتور بابين وجربايه
وحده وفراش مصفط بالزوايه كالت
«،،،فوتي يمه واكعدي ارتاحي
فتت ورحت كعدت على الجربايه سالت
مبتسمه
«،،،ماعرفت اسمج
صفنت عليها واجت الهويه مال اختي
بين عيوني كلت خاف تريد
تشوفها جاوبت
بخنگه
«،،حنين
عاشت الاسامي حنينه
دمعتي نزلت لان جانت هيج ادكلي
اختي الحنينه
«،،،لاتبجين يمه واكعدي يمي الما الله
يفرجها عليج
ليلى
غاده عزمتني اني وقائد على العشه
يمهم جنت اعرفها ماتكدر تجي
لبيتنا هي ويا من وره
اهلها وزهره
رحنا عليهم كال
«،،،مخبله انتي حتى تجين وحدج بذاك اليوم لهذا
المكان
«،،،،جنت شايله همها وبس اريد
اشوفها
«،،،،حقج يابه بس غلط هيج تصرف يعني
لو طالعين الج عصابه وخاطفيج اني شاحصل
بله
«،،،ههه فيل
ابتسم وجاوب
«،،،هي گوه مااكدرلج والله
«،،،،ههه من جمااان
«،،،اكعدي وصيري عاقله لا اگلب وارجع
واشوفج من جماان من صدك
«،،،لا راح اكعد واصير عاقله
«،،،هذا الرجال مااعرف ليش احسه
شخصيه رغم السواه بغاده
«،،،اي هو جبير اهله وكلمته مسموعه
يمهم
«،،والله من عزمنا ماكدرت ارده عيب وفشله
منه لان اجه بعرسنا وهي هم بحسبه
اختج وهم ماردتها تفشل
كدامهم
«،،،تدري مشتاقه الها كلش صارلي شكد
مو شايفتها بس بالگام
«،،،هسه تشوفيها وتشبعين شوف منها
«،،يعني مو ضايج لان جبتك عليهم
««،،،،لا يابه ليش اضوج كتلج الرجال
اجه وقدرني شلون اني مااقدره وهو
هم اعتذر من عدنا لان تاخر بالعزيمه
من وره وضع غاده
«،،فديت الي يعرف بالاصول
طبينا للشارع مالتهم وبين البستان وصلنا
بوابه وطبينا وصلنا بيتهم
حمزه وجعفر ومهيب جاي واكفين
بره وياهم رجال جبير
اعرفه عمهم مهدي وشباب
اثنين
قائد نزل واجوي علي سلمو علي
غاده طلعت وجهها يضحك وراها الحجيه
وعمتهم ورانيه
نزلت سلمت بخجل ومشيت الها حظتني
بلهفه واني هم كالت
بعيون مغوركه
«،،،ولج ماتعرفين شكثر فرحت من
اجيتو
«،،واني هم والله
سلمت عليهن
وطبينا للهول قائد كعد
وياهم بالمجلس
جنت خجلانه منهم بس بعدين فگيت
من شفتهم شلون يحجون بحنيه
وراحه
تغدينا يمهم وانطتني هديتي تفاجأت من
شفت الكلايد الي اتفقت اني
وياها نسويهن النا
رجعنا من يمهم فرحانين بهل الكعده
الحلوه قائد كال
،،،،والله رجلها طلع اضرب مني بسوالف
المكاين والماطورات
«،،،شلون بله
،،،،يشتغل بيهن ويعرف الزين من الموزين
«،،،ها اذكر هي هيج كالت مره
«،،اي ومن كعدت ويا وحجيت حسيته
رجال من صدك يعرف شلون
يحجي
«،،اي كتلك هو مو شويه
«،،،اي لاحظت هالشي هي شلون وضعها يمهم
««،،هي مرتاحه يعني هو عوضها عن السواه
بيها بس عمامه مو خوش
وياها لا هم ولا
نسوانهم
«،، وهو يعني مايحجي وياهم
حجيتله السواه بابن عمه وعمامه صفن
وكال
«،،،والله عفيه بي لو اني الا اسوي مثله
اجه بالي من ضرب مهند سجين ذبيت
حسره كمل
«،،،وهي شنو تخاف منهم
«،،اي ادكول من هو موجود اني،مااخاف
وكالت اله حتى كام مايسافر
لاي مكان من وراها
دار وجهه عليه وكال
«،،،هذا يحبها
«،،مو بله قائد كلت الها بس ماصدگت
لان هو هم كايل الها مستحيل
يصير بينا الي يصير
بين اي رجال ومره
،،،هذا حجي ليلى هسه يطلع يحبها وضامه
حبه بگلبه خايف من منها لا
تشمت بي
««،،ماادري والله
«،،،هسه تشوفين شلون ماواحد يحب
اللخ وتصيرلهم قصه مثل
قصتنا الحلوه
«،،،،ياريت لان رغم السواه بيها شفته احسن
بهوايه من معتصم العار
«،،،،اي بكلي ربج اله حگمه يبدل هذا
بهذا
«،،،ونعم بالله
يمامه
كعدت يم خاله ام ياسين وعرفت هي عدها
ولدين ياسين مريض ومرضه
ماله علاج وثابت هذا متبري من عدهم
ومايجي عليهم وهي تشتغل
بيت ناس بشهريه وكلش زينين وياها
لان دائما تجي محمله اشكال
والوان من عدهم
من كعدت وبعد مااطلع للشارع وخلصت
من الشگول القذره والضيم
والقهر الجنت بي
بشرتي رجع لونها وسمنت لان اكل ومااتحرك
هوايه صح اشتغل يم خاله ومااخليها
تسوي شي بس مو مثل
قبل لا مشي هوايه ولا حرگه دم
ولا شفت قهر يمها بس ظل قهر اختي الي
جان يبجي عيوني كل ليله وهي
عبالها ابجي على رجلي
جان تهون عليه البيه بحنيه وطيب وحسيت الله عوضني بيها وشفتها العوض عن امي وهي هم حبتني ،،،،كلش لان شلتها هي وابنها وهم
ماتت على يمامه بنت حنين ترجع ملهوفه عليها
وتريد بس تكعد وتخليها
بحظنها
ايام مرت طويله وحالي تبدل للاحسن بس
الفلوس بدت تخلص وشلت هم
الحليب والحفاظات وهم
شلت همي لان كمت
اخجل اكل من تعبها على العشه كلت
«،،،خاله اني يعني اريد اشوف شغله
حتى اشتغل واطلع مصرف
اليه
«،،،ليش يمه اني مقصره وياج بشي
«،،،لا يعني تعرفين اني صارلي اكثر من شهر
اكل واشرب يمج وكمت اشوفها
صعبه عليه
«،،الخير هوايه حنين ومو محتاجه
تشتغلين اكعدي يم ياسين
وديربالج علي وعلى بنتج
«،،،خاله الله يخليج اني اريد اشتغل
حتى اكدر اصرف على بنتي،ونفسي يعني
تعرفين هي تحتاج حليب وحفاظات
ومصرفهن هوايه
سكتت كملت
«،،وهم فلوس الي عندي ماظل منهن غير
شي قليل
«،،،والله يايمه حقج وراج بنيه تشرب
حليب وتحتاج حفاظات وغير شغلات
بس وين تشتغلين
«،،،وياج اخدم بالبيوت
«،،،والله ماادري
سكتت بعدين كالت
«،،،شوفي باجر الحجيه تريد تعزل البيت
من فوك ليجوة تعالي وياي
ساعدني حتى تحصلين
كم فلس
«،،،اي والله ياريت
«،،،وهي فدوه لعمرها كريمه مو بخيله
وهسه من تشوفيها تحسيها
اطب بالگلب گبل
من طيبتها وكلامها
الحلو
«،،الله يحفظها من كل شر ويطول
بعمرها
«،،،امين
«،،،بس خاله وياسين شلون نعوفه وحده
منو ينطي اكل مي
«،،،قبل لاتجين جانت جيرانه تعرفيها ام
صادق هي تجي وتنطي الما
ارجع راح انطيها خبر تجي
علي الظهر
«،،ها يعني ماعلي شي
لا يمه ماعلي اي شي كاعد تشوفي يوميا
متمدد ويباوع للتلفزيون
«،،،اي اشوفه سوده عليه
جاوبتها بحزن كملت
«،،،باجر من الصبح نطلع اخذي غراض يمامه
ولاتنسين اي شي
«،،،اي خاله
ثاني طلعنا بالسبعه ورحنا لبيت الحجيه عرفت
يصيحوها ام منير وصلنا منطقه
راقيه وحلوه كلش وكفنا يم
بيت حديث وجبير صاير
رگن
دكت الجرس الباب انفتح وطلع رجال
جبير سلمت
،،،،الله يساعدك حجي
«،،،كل الهلا ام ياسين
باوع عليه كالت
«،،هاي بنيه يتيمه راح تساعدني بالشغل
«،،كل الهلا بيج انتي وهاي الحلوه
خجلت منه كال
«،،تفضلو يابه
طبينا وراه كراج جبير وبي مظله وحديقه
تخبل وبنصها نافوره اخذنا
للمطبخ طب وكال
«،،،حجيه اجتي ام ياسين
«،،،كل الهلا بيها
طبيت وراها وشفت روحي بمطبخ جبير
ميز طعام بالنص وكلشي
حديث ويخبل
خاله راحت بوستها وسالت
«،،شلونج اليوم ام منير
«،،الحمد لله احسن
باوعت عليه وعلى يمامه نايمه
بحظني سالت
«،،،وهاي الحلوات منيلج
،،،،هاي الي حجيتلج عليها البنيه اليتيمه
هي وبنتها
«،،،يا طلعت صغيره
«،،،اي والله شفتي القهر ترملت وي بعدها
صغيره
تاثرت بيه وظلت تباوع على يمامه
كالت
«،،،جيبها لهل اللعابه من فدوه للخدود
بنت حنين هالكد مااعتنيت بيها وخاله وياي
دنفشت وصارت دبوبه وطلعت بيضه
والشعر اشكر وعيونها مثلي
انطيتها الها خاله حجت
«،،،حنين سلمي على الحجيه
سلمت من بعيد وكلت
«،،،،شلونج خاله
هي قربت باستني خجلت منها وعبالي
راح تتكبر عليه وماتقبل ابوسها
«،،،هلا يمه
صفنت عليه وكالت مبتسمه
«،،،،صلاوات شلون عيون تخبل بنتج
طالعه الج هم حلوه وهم
العيون بعد احلى
«،،،،،اي عيونها حلوه كلش
خاله جاوبتها مبتسمه حجت
«،،،اليوم جبتها وياي لان ردتي نعزل
البيت من فوك ليجوة وتعرفين اني
مااكدر وحدي
«،،،زين سويتي لان عدي شغل هوايه وانتي
وحدج ماتكدرين علي
حجت هيج وكملت
«،،،يله تريكن وراها ابدن من فوك ليجوه
«،،،ادللي حجيه
تريكنا وجان الريوك من هذا التوب جبن
كيري وكيمر ودبس وصمون
حار وبيض
نيمت يمامه بغرفه صغيره
وراها بلشنا تنظيف جنت اشتغل مبهوره
بالبيت واثاثه مبين عليهم مرتاحين
كلش بس غرفه ظلت مانظفنها
كالت مال ابنهم ومايحب
احد يطب الها
كملنا كلشي وظل بس الكراج طلعت اغسله
الجرس اندك الحجيه طلعت
وكالت
«،،،،يمه شوفي منو بالباب
«،،،اي خاله
رحت فتحت الباب شفت واحد
منطيني ظهره كلت
«،،،،تفضل المن رايد
اندار گلبي فز وهبطت من
شفته ذاك الضابط
شكرا لزيارتكم عالم روايات سكيرهوم
