رواية اغفري لي الفصل السابع والعشرون بقلم أوتار حزينة
يمامه
كملنا كلشي وظل بس الكراج طلعت اغسله
الجرس اندك الحجيه طلعت
وكالت
«،،،يمه شوفي منو بالباب
«،،،،اي خاله
رحت فتحت الباب شفت واحد
منطيني ظهره كلت
«،،تفضل منو رايد
اندار گلبي فز وهبطت من
شفته ذاك الضابط اندار عليه نزلت راسي
بسرعه رد
«،،،،،انتي منو يابه
مارديت خفت احجي ويعرف صوتي
الحجيه طلعت كالت
«،،هلا بالدايح
«،،،هههه
ضحك فات من يمي احس بنظراته عليه
مشى الها ذب جنطه بالگاع
وباسها من راسها كال
«،،،شلونج يمه
«،،،زينه يبعد امك شلون اربيل والحبايب
«،،حجيه جنت بواجب
«،،اي صدگت
سديت الباب مرتبكه وگلبي
يدك بسرعه وخايفه
لا يعرفني
درت وجهي عليهم من شفته يباوع عليه
نزلت راسي بسرعه ،، طبو جوه رددت
بخوف
«،،،يااربي شنو هالصدفه من دون كل
البيوت يطلع هذا بيت الضابط الي
انهزمت منه مرتين خرب حظي اي والله
صدك من كال الفقير صعد فوگ
البعير وعضه الچلب
جنت مااريده يعرفني خفت لا يحقق وياي
ويسأل عن اهلي واني شارده منهم
وحاجيه غير سالفه
«،،،حنين
فزيت من سمعت صوت خاله كالت
«،،،اسم الله يمه شبيج
«،،،ها مابيه شي
«،،،تعالي سوي ريوك لابن الحجيه
«،،،ها اني
«،،،اي يمه اني اروح واسوك وارجع يله
كملي بسرعه يريد ريوك وجاي
«،،،اي اي
جااوبتها بارتباك طلعت من يمي ردت انهزم
بس يمامه نايمه جوه وغراضي
كلها يمها
لميت الصونده اهدي بروحي واردد
«،،،هو ماشافني ،،،،جنت ملثمه بالمرتين
ودنيا ليل اي ماراح يعرفني
طمنت روحي ومشيت للمطبخ بس
اقدم رجل واخر رجل طبيت
سمعته يحجي بضوجه
«،،،وين الريوك تره ميت جوع
«،،،،اجتي البنيه يمه حنين سويله مخلمه
«،،،،اي خاله
كامت طلعت باسطرمه من المجمدة
خلتها على السنك اخذت تخته من يم الخلاط
وسجين وكفت اثرم ومنطيته
ظهري سأل وگلبي فز
«،،،هاي منو
«،،،بنيه كرايب ام ياسين
«،،ها
سكت سمعت طگه الجداحه كالت
«،،اتريك بالاول وبعدين اشربها لهل التتن
«،،،،،،راسي يوجعني وكمت الوب عليها
«،،اي من السهر وو
سكتت وكملت
«،،،استغفر الله يارب
«،،،،يابنيه صبي جاي
حجه ورحت صبيت كوب اريد اروح
اله خايفه يعرفني تأخرت كال
«،،،جايج يمعوده
انداريت جان ملتهي بجهازه يكتب
مشيت ليم الميز خليته بسرعه ورجعت
ليم الطباخ الحجيه
كامت وطلعت من يمنا گلبي كام
يدك سريع من ظليت
وحدي ويا
«،،،ريوكج يابه تره جوعان
«،،،اي
بسرعه سويت المخلمه الحجيه طبت
وكالت
«،،،شوف مهيب هاللعابه الحلوه
انداريت شفتها شايله يمامه وكاعده
كملت
«،،،شوفها شكد حلوه
صفن عليها وطول سأل
«،،،هاي بنتها
««،اي
رفع راسه وباوع عليه عيونه صارت
بعيوني بسرعه انداريت
خايفه وگلبي يدك
سريع
«،،،،انداري بله خلي اشوفج زين
ردت اموت من الرعب كلت عرفني صاح
«،،،،يولي،،،مو جاي احجي وياج
«،،،هاي شبيك مهيب
«،،،،لحظه يمه
انداريت هو وكف
اجه ليمي تجنبت اخلي عيوني
بعيونه قرب وصار
كدامي كال
«،،ارفعي راسج
هاهيه عرفني بعد شكو كاعدة اتجنبه
رفعت راسي عيوني بعيونه تفرس بملامحي بتركيز رجع ليوره يباوع لطولي عكد حواجبه وكال
«،،لا مو هي
دار وجهه ورجع كعد يباوع عليه ردد
«،،،،ذيج عيونها بيها شراسه وقسوه
واضعف منج بهوايه وانتي عيونج طافيه
مابيها ذيج النظره
انداريت والنفس،،،،الي كتمته طلعته
بتنهيده مخنوكه
«،،،،منو هاي
«،،،البنيه الي انقذتني من ذيج العصابه
«،،،،ها عبالك حنين
«،،،،اي بس هاي وين وذيج وين
خليت المخلمه على الميز رفعت راسي
يباوع عليه كال
«،،،اسف شبهت عليج
«،،،ماصار شي
جاوبته عكد حواجبه سأل
«،،،انتي عندج خوات
«،،،لاا
يمامه بجت رحت اخذتها من امه كالت
«،،روحي رضيعها خطيه اكيد جاعت
«،،،،،اي خاله
جاوبتها احس نظراته عليه مشيت من
يمهم امه حجت
«،،،،يمه على كيفك وياها خطيه يتيمه
وترملت وبعدها صغيره
طبيت للغرفه الصغيره وسديت
الباب ورايه اتنفس بقوه
وگلبي يدك سريع
يمامه سكتت
وغفت
جان ميز تواليت گبالي صفنت على
روحي وكمت شايلتها رحت
وكفت گبال المرايه
خلقتي صرت نسخه ثانيه من اختي بس العيون ،،،،تختلف وصدك طافيه
راحت ذيج النظره الشرسه والقويه
وانكسر كلشي بيه من ماتت
حنين
دمعتي نزلت ورجعت كعدت اباوع لبنتها
الي عافتها امانه عندي بستها
وشميتها بنفس طويل
احس بيها ريحتها
الباب انفتح طبت الحجيه مبتسمه
كالت
«،،،يمه لاتزعلين من مهيب تره نقيب بالشرطه
ويحب يدقق بكلشي وهو تره
شبه عليج
«،،،لا خاله مازعلت
اجت ليمي كعدت تباوع ليمامه كالت
«،،،بنتج تنحب
«،،،اي
صفنت عليه وسالت
«،،،،،يمه شلون اهلج زوجج وانتي بعدج
صغيره
«،،اني يتيمه خاله وتربيت يم عمي وهو مو خوش
بس كبرت شويه زوجني حتى يخلص
مني
«،،،حسبي الله علي ولاتزعلين مني يمه
«،،،،لا ماازعل خاله
«،،،عيالج وينهم ليش،،،،عافوج وعندج بنيه
من ابنهم
«،،،،عيالي هم مو خوش وشفت اذيه منهم
وتالي من مات رجلي طردوني اني
وبنتي للشارع
«،،،،شلون مات
من صدك ام نقيب بالشرطه لان بس تسأل
«،،،،غرك خاله
«،،،ها الله يرحمه
سكتت تباوع ليمامه بحنيه كالت
«،،،جيبها يمي بالمطبخ ونظفي لان مهيب
اكيد هسه كمل
«،،اي خاله
كمت شايلتها،،،،، ساكته مابجت رحت
وياها للمطبخ فاتت واني وراها
اتجنب اباوع اله حجت
من خليت يمامه
بحظنها
«،،،،،عفيه جگاره ماتوكع من ايدك
«،،،،،حجيه فگي ياخه مني توني اجيت
شتريديني ارجع
«،،،اي وانت ماصدك مو
«،،،انتن النسوان يردلجن گلب مو مدشن
«،،،،،هم صدك لان انت گلبك صار مدشن
وزنجر من النسوان
«،،،هههه ها يمه بدينا بالقصف
واكفه اجلف واسمع حوارهم كمل
««،،حجيه اني سر مهر
«،،،اي نعم بعدك بالباكيت
ههههه
خرب ضحك يمامه كامت تناغي سمعته
كال
««،،هاي الحلوه مالها اسم
هي جاوبته
«،،،،اسمها يمامه
«،،،هلو ولج حمامه
الحجيه ضحكت وكالت
«،،،،يمامه احلى
مسحت الكاونتر اتجنب
اباوع اله كام وكال
«،،،،اروح اتمدد لان تعبت من الطريق
«،،،اكعدك على الغده
«،،اذا نايم لاحد يكعدني
«،،،تمام
راح من يمنا وگلبي ارتاح وجسمي المشنج فك
شويه خاله ام ياسين طبت وره مشوار شايله
علاليك خلتهن على الميز سالت
«،،،اجه ابو نسر بسلامه
«،،،،اي والحمد لله
الحجيه جاوبتها خاله سالت
«،،،،ام منير شنطبخ اليوم
«،،،،جبتي الباميه
«،،،،اي
«،،،،سويها لان مهيب يحبها
«،،،،تمام
«،،،حنين يمه سويلنا كباب للعشه
«،،،اي خاله
التهينا بالطبخ خاله ام ياسين طبخت باميه
وتمن وسلكت لوبيا اني ثرمت كباب
ونظفت الخضره
الحجيه كالت
«،،،،حنين اصعدي جيبي الهدوم والجراجف
من فوك هسه يبسن
«،،،،اي
مشيت من يمهم صعدت لفوك مشيت
لباب البيتونه فتت من يم الغرفه مالته بابها مفتوح
اجنبت اباوع طلعت للسطح لميتهن
كلهن بالسله ورجعت مشيت
بسرعه اريد انزل صاح
«،،،يابنيه
جمدت بمكاني لان جان بعده مو نايم
كمل
«،،،تعالي اخذي هاي الهدوم الوصخه
ترددت بعدين كلت خلي اتصرف طبيعي
حتى لايشك بيه عفت السله
بالگاع رحت لغرفه طبيت
متمدد وساند ظهره
على الجربايه جهازه بايده
كال
«،،،،اخذي ذني
اشر على كوم ملابس على الجربايه
مشيت بتردد لان من السمعته
من امه وهو وشكله
خلوني اعرف
هذا مو راحه وابو نسوان شلتهن
اتجنب النظر اله
انداريت كال
«،،،طفي الضوه من تطلعين
مشيت حجه
«،،اوكفي
ياربي لعب باعصابي لعب انداريت
علي كام ،،،،،گلبي هبط لان جنا
وحدنا بالغرفه
قرب ماتحركت كلت اذا بين عليه الارتباك
والخوف راح يعرفني هم ركز
بعيوني سال
«،،،عندج كرايب يبيعن كلينس بالتقاطع
«،،،لاا
«،،،اكيد
«،،،اي
تفرس بملامحي وهز راسه وكال
«،،،ابد مو هي
رجع للجربايه مشيت صاح
«،،طفي الضوه
رجعت طفيته ونزلت بسرعه ذبيت هدومه الوصخه
بالحمام طلعت خاله ام ياسين
من المطبخ كالت
«،،يمه حنين صفطي الهدوم بالغرفه
«،،،،اي خاله
شلت السله وطبيت لجوه
وكفت يمها اصفط واخلي على صفحه
كملت طلعت وديت السله للحمام
شفت هدومه كلت خلي اسال
امه شلون اغسلهن لان
شفتهن زي شرطه
رحت الها للمطبخ يمامه بحظنها فرحانه
بيها سالت
«،،خاله شلون اغسل هدوم ابنج
،،،،اغسلي الزي وباقي الهدوم وحد والبياضات
وراهن بس شوفي الجيوب مالته
خاف اكو شي
«،،،،اي
مشيت من يمها ورجعت للحمام شلت الزي فاح عطر قوي وي ريحه جگاير دورت بجيوبه لكيت
ضبه فلوس وسماعه خليتهن على
صفحه وذبيت الهدوم بالغساله
خاله ام ياسين علمتني من اجينا شلون
تشتغل لان غسلنا جراجف وبردات
شغلتها وطلعت رجعت للمطبخ
مديت ايدي بيهن
وكلت
«،،،خاله لگيت ذني بالجيب مال الزي
««،،اي مو اعرف سووالفه ليش گتلج دوري
ها شوفي شلون ناسيهن
اخذتهن من عندي وخلتهن على صفحه مدت ايدها لجيبها وطلعت خمس وعشرين
خلتها بحظينه يماما كلت
««،خاله هاي شنو
«،،،هاي حگ جيتها علينا لان اول مره اطب
بيتنا
«،،،،هوايه خاله
«،،،لا مو هوايه على هالحلوه
حجت هيج وباستها كملت
«،،،بنتج تنحب ودمها يلعب وطبت بگلبي
وحبيتها كلش لان احنا ماعدنا جهال
ذبت حسره وكملت بحزن
««،،ولدي الكبار هاجروا منا واستقروا بامريكا
هم وولدهم،،،،وبنتي الجبيره مهى هم كعدت
بتركيا وين وين يله نشوفها وميسون اللخ عدها بس ولد واني اموت علىدالبنيه وهاي شوفي
شفت بنتج اليوم. وماكدرت اعوفها
باوعت عليه وكملت بحنيه
«،،،وانتي هم يمه حبيتج ودخلتي گلبي
وقهرتيني لان ترملتي وانتي صغيره بس
شسوين امر ربج بعد
«،،،،الحمد لله والشكر على كل حال
جاوبت
الحجي طب من بره لان طلع من احنا اجينا
وسأل
«،،،مهيب اجه
«،،،اي ونايم فوك
هز راسه بس حسيته ضايج
كال
«،،،حجيه اذن ماتصلين
«،،،اي هسه اكوم اصلي وراها نصب غده
«،،،اي والله لان جوعان كلش
«،،،،يمه حنين طلعي اللبن والزلاطه
«،،،،،،اي خاله
جاوبتها وردت اخذ يمامه منها من
كامت ابتسمت وكالت
،،،،لا خليها اني اوديها للغرفه خطيه غفت
«،،،،،تعالي يابه خلي افرحج بجم فلس
الحجي حجه طلع هم خمسه وعشرين وخلاها
بالحظينة كلت بسرعه
«،،،،عمو خاله انطتها
«،،،اني شعليه بخالتج اني جدو مو ياحلوه
حجه وياها بحنيه عيوني غورگت
ونزلت راسي ماردت يشوفون دموعي
«،،،يله يابه صبي عمج جوعان
«،،،،اي عمو
طلعو من يمي صفنت وكلت
بگلبي
،،،،ياربي شلون ناس طيبه وايدهم مو
الهم
ام ياسين صبت الغده وذاك ظل نايم ماكعد
شفتها كعدت وياهم واشرت اليه
خجلت وكلت
،،،،لا اروح اشوف يمامه
«،،،نايمه يمه
الحجيه حجت واشرت اليه وكالت
«،،،اكعدي تغدي اليوم تعبتي بالشغل
ترددت من شفت خاله ام ياسين اشرت
بعيونها كعدت يمها
«،،،اليوم اضرب ثريد
الحجي حجه وكمل بضحك
«،،،وزني جاي يصعد من وره اكلج الطيب
ام ياسين
«،،،الف عافيه حجي
«،،،الله يعافيج يابه
صفنت علي رجال جبير بس
مهتم، ،، بروحه وصابغ شعره
اكل على السريع كال
«،،،حجيه جايج
كمت بسرعه صبيته اله كالت
«،،،ودي للصاله
«،،،اي خاله
وديته اله كاعد يباوع فلم قديم
خليته يمه كال
«،،،،تسلمين بنتي تعبناج اليوم
«،،،لا عمو ماكو تعب وادلل
«،،،بارك الله بيج والله يخليلج
بنتج
«،،،تسلم عمو
جاوبته مشيت اذكر معامله ابويه اليه
وغصه جبيره صارت بگلبي لان
ابد مو سامعه منه كلمه حلوه
جنت اريد ارجع وكلت لخاله ام ياسين ردت
«،،،لا يمه ورة المغرب نرجع انتي مو تعرفين
هالشي اكمل العشه ونروح هي
الحجيه عاد تغسل بس
المواعين
شلت هم لا يكعد وينزل وهم يبدي
يحقق وياي بس ماكعد من النوم وطلعنا وهو
بعده نايم
جنات
خلص الشهر وهم انطونا مهله 15 يوم حتى
اغير رأي وخلصت وماغيرته بهل الفتره هو ماخله ناس مادزهم عليه ورفضت الواسطات
بيني وبينه وصممت على الطلاك
القضيه انرفعت للقاضي وخليت سبب
طلاكي منه زواجه عليه بدون ماادري
ماحضر باول جلسه
وتاجلت
ثاني مره هم مااجه والقاضي حكم
بالطلاك بعد ماتنازلت عن كلشي وصار الفراق بينا
كاعده ليوره بسياره ابراهيم واختي
ويانا دمعتي تنزل ماامسحها
اشوف روحي اني
ويا بيوم العقد
وعرس وبدله بيضه،،،، وحلم حلو بس
انتهى بكابوس اسود من سوه
السواه
شهكت بصوت وكمت ابجي بقوه
«،،،شادعي عليج ام كريم ماعفتيهم الا هجمتي
بيتهم
اختي حجت وكامت تبجي ابراهيم
كال
«،،،شاحجي والله ماجنت متوقع اوكف
بهل اليوم واشوف طلاك جنات
وكريم بعيوني
وماكدرت اسكت انهاريت بغرفتي هي
يمي وامي اجتي تحجي بغضب
«،،اااي ابجي يولي يالطايحه الحظ يلي عفتي
بيتج الج وطلعتي كلشي ماكو
بأيدج لا مهر ولا بيت
«،،،يمه عوفيها ولاتظلين تحجين هالحجي
«،،،ولج خسرت كلشي لا حصلت بيت ولا
نفقه ولا المؤخر وفوكاها صارت
مطلگه
«،،،،طبهن طووب اهم شي مااخسر روحي
وكرامتي
جاوبتها بغضب ودموع غمتني وصاحت
«،،،،من امدااج اي والله ظلي بهاي سوالفج مال الكرامه الي طيحت حظج وضيعت بيت دافعه
فلوسه من راتبج
«،،،يمه رحمه لاهلج كافي تصيحين منا ابراهيم
كعدت ادك على رجلها تردد بعصبيه
«،،،كتلج لاتسجلي باسمه وانتي لااا رجلي
وابو بيتي وانتي ماعليج ولاا تتدخلين بحياتي
وهاج شوفي ازوج عليج واخذه منج عين تضحك وعين تبجي
مارديت ولا حجيت گلمه تعبت من البجي
ومن القهر وظليت اسمع الملامه
من الكل لان عفت كلشي
اله
اهلي ماجانو سند ولا كدرت اسند عليهم ومن
زمان هالشي مو جديد عليه بنفس اليوم
الي اطلگت بي هو اجه سمعت
صوته يصيح
«،،،،ااني ماطلگت ولا راح اقبل بهل الشي
جناات بعدها مرتي وللموت راح
تظل هيج
صارت هوسه وابراهيم طلع صوته كمت
ورحت للاستقبال شفته واكف بالنص واخوته الجبير والصغير لازمي شافني حجه بتوسل
«،،جنات ليش هيج سويتي شلون هنت عليج
تعوفيني
«،،،،واني شلون هنت عليك تسوي بيه
هيج
«،،،ولج طلگتها والله مااريدها اريدج الج
«،،،بعديش كريم بعد ماكسرتني وخليتني
اصير علج بالحلوك
اخوه الجبير بكر حجه
«،،جنات تره هو صبر هوايه ومن حقه يزوج
ويصير عنده اطفال
«،،،اي صح ومن حقي اني هم اطلك
هو صاح
«،،ولج ماااطلكتج اانتي بعدج مرتي
«،،،لا كريم اطلكنا وانتهى كلشي
«،،،،لااا ماانتهى اني بعدني ااحبج واموت
عليج ولج شوفي حااالي شلون
صرت من وراج وارحميني
من هالعذاب
دانيه كعدت تبجي نزلت راسي ودموعي
نزلت توسل
«،،،،،جناات اني غلطت واسف والله مااريد
جاهل اريدج الج
باوعت اله اذكر شلون طلع من يمها وهي
تباوع عليه بشماته دست
على گلبي وكتله
«،،،روح كريم وانساني لان اني مستحيل
ارجع بعد لواحد باعني برخص
مشيت من يمهم اسمعه يصيح
«،،،خرررب بيكم وخرب بيه من سمعت كلامكم
وكلام الناس وخليتوني اهجم بيتي
تعبت وتمرضت من وراه ومن السواه بيه
وبروحه ونمت بالفراش لان جانت عندي شقيقه
من زمان من القهر والبجي كامت تهيج
عليه وتصير عندي نوبات قويه
الا اضرب ابر يله شويه
يهدأ الالم
وجان لازم ادوام لان خلصت رصيد والمدير
بعد ماينطي ولا يلتمس عذر
وكفت كدام المرايه مااشوف
روحي نفسها
كلشي طفى بيه والروح عبالك انسحبت مني
وضعفت كلش وبين التعب والقهر
بوجهي وذيج الجانت
تضحك انباكت ضحكتها وخلت الدموع
بالعيون بدالها
دوامت ووضعي محد عرف بي لان كلت لاسماء
لاتحجين شي لاي احد كولي مريضه ومرضها تعبها حتى مااشوف نظرات الشفقه واسمع اسئله مااريد اجاوب عليها رحت من وكت وصلت نزلت سياره سوده عاليه وكفت كدامي نزل منها استاذ
ارشد عيونه صارت عليه صفن
وعكد حواجبه للحظه
بعدين اندار اخذ
جنتطه وراح
لجوه
طبيت وراه رحت لغرفتنا واستمرت حياتي بهل الشكل دوام وبيت وقهر مستمر وغصه
بالگلب
كريم هم دز ناس حتى ارجلعه ورفضت وسمعت
صايرلته مشاكل وي اهل مرته
الثانيه لان طلكها وابوه
وامه متعاركين وي
امل اخته حجتلي وجانت الوحيده الي
من اهله الواكفه وياي وماقبلت
على الصار
الايام مشت وبعد ماشفته يتصل من رقم
غريب وانطي حضر وظل هيج ولا تنازلت ولا
حجيت ويا بس الهدؤ الجنت بي
راح وصار بداله غضب
واعصاب وكمت
مااتحمل حجايه من احد
بالدوام
كاعده اشتغل بالحاسبه طب عمو
جمعه شايله صينيه
اجه ليمي وكال
«،،،وهاي الكهوه ست جنات حلوه مثل
ماطلبتي
ابتسمت ابتسامه باهته وجاوبته
«،،تسلم عم والله مااعرف اشتغل اذا مااشرب
الكهوه مالتك
«،،،الف عافيه بنتي
«،،،ست جنات شنوو الفلم تحتاجين بريد يله
تجين عليه
كمت من مكاني اني واسماء ولبنان من طب
استاذ ارشد علينا بزوبعه ومبين علي
عصبي جاوبته بهدؤ
«،،،شنو الموضوع استاذ
ضرب المكتب مالتي بفايل وصاح
«،،الموضوع ياست جنات هوو شغلج هذا
الكله غلط بغلط
جاوبته بعصبيه
«،،ااستاذ انت ليش تصيح تره اني مو طرشه
وكاعد اسمعك كلش زين
سكت وخزرني بعدين رد وره لحظه
«،،،اانتي حرامات بيج هذا المكان لان ابد مو كد هالمسؤوليه واني اعرف شلون اخليج ترجعين
للمكانج القديم الي هو اصلا جان
جثير عليج
جاوبته بغضب ناسيه هو مديري
«،،،،لاا اني كد المسؤوليه واعرف شغلي زين
ومستحيل اغلط بي
«،،،وهذااا شنو
اشر بالفايل بوجهي وخرت بقوه
وخزرته، ،،،لبنان ادخلت وكالت
«،،،ممكن اشوفه استاذ
«،،،شووفي
نتر وشمره على الميز اخذته گلبت كم ورقه
كالت
«،،،استاذ هذا مو شغل جنات
«،،،،،عجل شغل منوو
صاح جاوبته
«،،،،هذا شغل هبه البنيه الجديده الي اجتي
واشتغلت بدلها
«،،،،عبالي يعتذر يكول اسف بس
اخذه منها بضوجه ووشمره كدامي وكال
«،،،،،،تفضلي صححي الغلط
حجه هيج وطلع من يمنا لبنان حجت
«،،،،،اادري شدعوه هالعصبيه والله فزيت
من مكاني عبالي صاير
شي مو زين
ماحجيت شي فتحت الفايل بقوه
وبديت ادقق
غاده
من رجعت ادوام حمزه ماقبل وقنعته
من اولد راح اخذ اجازه امومه طويله
واكعد بالبيت
اخذت سونار مرتين اخر واحد جان بالسابع
ماعرفت شنو بيه لان مابين بالمستشفى من جنت بالدوام هم اخذت بنص شهر الثامن
وعرفت بيه ولد
فرحت كلش ليلى كالت مبتسمه
«،،،طلع كلام رانيه صدك
«،،،،اي
جاوبتها بفرح وانتظرته يجي حتى ابشره
من خلص الدوام خابرني وطلعت
اني وليلو شافنا مثل كل
مره يسلم عليها ويدز
سلام لقائد
«،،،باي حب
سلمت عليها وصعدت يمه
اجه وكعد يمي باوعت اله مبتسمه رفع
حواجبه وسال من ابتسم
«،،،خير بويه اشوفن وجهج يضحك
«،،،سونار رانيه طلع مضبوط
الملامح تغيرت بسرعه وعاين لبطني
سال بصوت متغير
«،،،علي موو
هزيت راسي باي الوجه ضحك والعيون
تغيرت ردد بصوت مخنوك
«،،،الف الحمد لله والشكر الك يارب
مااعرف شصار بيه من شفته تاثر وفرح
شفت بعيونه شي خله گلبي يكوم يدك
سريع
نزلت راسي ولهيت روحي اعدل
بعباتي
«،،،انتي وهو زينين
افتهمت شيقصد
«،،،اي لايظل بالك اني ويا مثل الورد
تنهد بصوت باوعت اله بعده صافن عليه
ابتسم وكال
«،،،،راح اصيرن ابو علي
هالفرحه الي هو بيها خلتني اتاثر كلش
واصفن علي بعيون مغوركه
ردد
«،،،تمنيت ابويه وامي طيبين حتى يشوفون
هالفرحه الي انه بيها
دموعي نزلت شافها ابتسم وكال
«،،،ها هم الهرمون ضرب
ماعرفت اجاوبه لان انقهرت علي كلش ردد
«،،هالخبر الحلو يردله طلعه حلوة شدكولين
اخذج ترتاحين وبعدين نطلع
انه وياج حتى
اجهزين اله ونتعشه اليوم
بره
جنت مو مجهزه لان ماعرفت شنو بيه
مسحت دموعي وجاوبته
«،،،ااي
الوجه فرح بعد اكثر ورد
«،،يله خلي نعكب حتى تاكلين لگمه وراها
ترتاحين ساعه زمان ونطلع
«،،تمام
حرك وطلعنا كال
«،،،حبوبه وعمه راح يفرحن بهل الخبر
«،،،ورانيه هم
«،،هههه اي هاي طلعت اضبط من السونار
«،،اي عرفت من البدايه بيه ولد
«،،،الله يرزقها ويعوضها هي وجعفر عن الراح
«،،،امين يارب
ترددت بعدين سالت
«،،،حمزه هي ليش يعني شلون صار هالشي
سكت شويه بعدين رد
«،،انتي عشتي يمنا وعرفتي نسوان عمامي
عرمات وگويات
مارديت كمل
«،،وامه ماجانت تريدله رانيه رادت بنت
اختها اله
«،،،منو
«،،،بتول
«،،،ها
جاوبته وجانت اخت كوثر كمل
«،،اي وهو جان يحب رانيه ودك رجل عليها
وخذها غصب عنها ومن صارت
يمها لعبت بيها چوله
هي وبناتها
ذب حسره وكمل
«،،،من جانت شايله صارت مشكله جبيره من وره
شي مايسوه تريد منها تشتغل وهي
جانت ماتكدر لان تمرضت
وصار بيها تيفو
«،،،،اي
«،،سعده داست بطنها وكالت الها هي ماجانت
تريدها لجعفر وحجايه منا وحجايه
منا وكبت بينهن وذيج
عدالك جانت متحلفه
بيها جتلتها ومن دافعت عن نفسها بنواتها
جتلنها وي امهن ومن اثر الچتله
طاح ضناها
«،،هذني شنو وحوش شلون كدرت تسوي هيج
باابن ابنها
«،،،برنو وسعده انجس من الوحوش وحدتهن
عگربه صفره تلدغ وتضم راسها
جاوبني وكمل
«،،محد سلم من شرهن ولسانهن وعمامي صاروا
مثلهن وولدهم هم
«،،اني يعني اشوف جعفر وموسى وعلي ولد
عمو مهدي يختلفون عنهم
«،،،اي جعفر مو مثل اخوته يختلف ذولاك
يسمعون كلام امهم وهم من راح
ياخذون بنات برنو
راح يطيح حظهم
بعد اكثر
«،،اي لاحظت هالشي بس يعني منصور وعقيل
اخوته راح ياخذون بنات عمك صالح
«،،،اي
غير الموضوع وسال مبتسم
«،،حرمه قائد عرفت
«،،اي لعد شلون هي جانت ويايه من اخذت
السونار
«،،اكلج ماصار عدهم شي
هي كالت الشهريه فاتتها بس تريد تنتضر بعد
كم يوم يله تحلل جاوبته
«،،،ادعيلهم حمزه لان يمكن راح اسمع خبر حلو
بعد ايام
««،يالله يارب تفرحهم وتفرح جعفر ورانيه
«،،امين يارب
جاوبته وصفنت علي عيونه على الطريق
ومبتسم والوجه كلشي اختلف بي
ليش گلبي فرح من شافه
فرحان ماادري
كال
«،،،غاده اخذي اجازه قبل لاطبين شهرج
«،،،اي لعد شلون بس ادخل بشهري اخذ
اجازه
«،،،اي بويه ارتاحي وخليني ارتاح ومااظلن
شايل همج
اعرف بي صادق بخوفه عليه وثبت هالشي
من زمان والسواه اليه طيب گلبي من
يمه ظلينا نحجي بسوالف عاديه
الما وصلنا للبيت الحجيه وعمه عرفن
وفرحن كلش رانيه جانت بيتها ماعرفت
تغديت اني
ويا وهم سوالف حلوه
نمت ساعه وهو كعدني من اتصل عليه
لبست فستان لونه احمر فاتح مال حوامل نازك
اول مره البسه وويا شال افتح منه مكياج بسيط
بس رسمت عيوني وطوخت
الگحل
طلعت شايله عباتي ورحت للمطبخ اعرفه
هسه هناك يشرب جاي طبيت هو
كاعد منطيني ظهره بيبي
يمه وعمه سالته
«،،،ها نروح
«،،،،،اي بويه
رد وكام اندار صفن وباوع عليه من
فوك لجوه كلت خاف مطوخه المكياج
لان اعرفه مايقبل حجيت
بسرعه
«،،،ماطوخت بس الكحله
صفن عليه بذيج النظرات الي تخربط
وضعي عمه كالت
««،،صلاوات على النبي هاللون غير يلوك
الج
خجلت منها ومن نظراته دار وجهه
وكال بصوت متغير
«،،يله امشينا
طلع من يمي بسرعه عيوني راحت لبيبي
مبتسمه هي وعمه وخلوني اخجل
بعد اكثر
سلمت وطلعت من يمهم رحت اله كاعد
وصافن من شافني عدل حاله
صعدت يمه اتجنب اباوع
اله سمعته ذب حسره
وكال
«،،،،يالله
حرك طلعنا هو ساكت واني هم وره
مشوار كال
«،،،وين نروح
«،،،،بكيفك
سكت وبعدين كال
«،،،نروح لمول بغداد
«،،،هسه هوسه وازدحام هناك
«،،،،اي هم صدك
«،،،خلي نروح للمنصور هناك كم محل يبيع
مال تجهيزات اطفال مريم وهيفاء دائما يجهزون
منه
«،،،هاهيه نروح نجهز مناك ونتعشه
«،،اي
هم صار صمت بينا وتوترت من هالشي
اريده يحجي مثل كل مره ماحجه
ولا اني كدرت احجي
درت وجهي على
الجامه صفنت
علي
كلام ليلى يدك براسي هذا يحبج گلبي
ليش كام يدك سريع من ذكرت ماادري بس
لاا هو گلي ماراح يصير بينا الي
يصير بينا مره ورجال
نظراته جانت مبينه اعجاب وهالشي وترني
كلش وخلاني احس اكو شي
اختلف بي
واني هم حسيت اكو شي اختلف بيه من يمه
كمت مااشوفه من مثل قبل ومن يجي
بالي السواه بيه اشوفه ضباب
وعبالك واحد صار
براسي يمسح
اذيته منه
ارتاح لوجوده يمي ومااريده يروح من يمي
الافكار سكتت للحظه ورجعت تحجي
لان كمت اشوفه امان اليه وسند وهو ماقصر وياي
بشي عوضني عن السواه بيه ودللني
دلال مو صاير
سأل
«،،،نمتي مو
«،،،اي انت نمت
«««انه ماانام الظهر تغثني هالنومه
«،،،،ها اي صدك اعرف هالشي
جاوبته متوتره سال
«««،بيج شي
باوعت علي وجاوبته
««،،ها لاا
هم صفن بعيوني بس دار وجهه
وسكت جهازه دك
جاوب
«،،،،هلا مهيب الحمد لله اسال عليك
خالتي شلونها
سكت بعدين كال
«،،،ها تمام اشوفن الاهل اذا يكدرون
واردلك خبر تمام خويه الله وياك
سد الخط وكال بدون مايباوع عليه
«،،،مهيب عازمنا الجمعه على العشه احنا والاهل
تكدرين تروحين
«،،،،اي عادي بس رانيه ويانا مو
«،،،،اي
«،،،شنو المناسبه
«،،،خالتي تريد تشوفني وعاتبه ادگله رحت اله
وهم مااجه
«،،،صدك اي اجتي علينا من انتلت تذكررر
سكتت من اجه بالي شلون انقذته وخدودي
اشتعلت نار درت وجهي بسرعه
وبعد ماباوعت اله
هو رد بصوت متغير
،،،اي وصار برگبتي دين اللخ وثگيل
گلش
ردت اگله بريتك الذمه بس هو كال
«،،،خلي اشوفن الحجيه وعمه وبيت جعفر
يرحون واردله خبر لان ينتضرني
اردله جواب
اتصل عليهم ووافقو يرحون للعشه وانطاه
خبر لمهيب وصلنا وره مشوار
نزلت ومشيت ويا وهم شفت العيون علي وعليه
بنيه صغيره اجت تركض طخته
لزمها وكال
«،،،،الله بويه
شافته وجان تصرخ وانهزمت من يمه وراحت
لامها تبجي وخايفه
صفن عليها والوجه انطعن نزل راسه وبين علي
القهر من شفته هيج مااعرف شصار بيه
روحي اختنگت وعيوني غورگت
ردد
امشي
مشيت ويا اباوع اله صار فد مره قبل لا نطب للمحل لزمت بطني وكتله
«،،،حمزه خلي نرجع
باوع عليه العيون دم وسال
«،،،ليش بيج شي
«،،،اي تعبت ومااعرف شبيه خلي ناخذ عشه ونرجع واني بعدين اطلب من البيج مالتهم
«،،،امشي
رجعنا لسياره هو يمي ماعافني الا كعدت
رفع العبايه ووانطاها اليه عيوني
صارت بعيونه سال
قلق
«،،اوديج دكتوره
«،،،لاا مايحتاج اصعد خلي نخلص من هالهوسه
والازدحام
«،،،تمام
سد الباب واجه صعد يمي حرك وطلعنا
هم سأل
««،،غاده اكيد مابيج شي
«،،اي والله بس هيج اختنكت من الازدحام
«،،،اخذ عشه للبيت ونعگب
«،،،اي
حرك وطلعنا
«،،،ها شلون وضعج هسه
«،،،زينه لايظل بالك
بس بداخلي مقهوره علي گلش ومخنوكه
كلت وي روحي من جان جاهل شلون عاش
وشلون تحمل كلام الي بعمره ونظرات الناس اله
وهو هسه جبير وكاعد اشوفه شلون
ينقهر من نظراتهم ويضوج
نزل يم مطعم صفنت علي من راح اله
ودمعتي نزلت بذيج اللحظه كرهت روحي كلش
لان سمعته كلام قبيح واذيته بي
كلش
اندار يباوع عليه درت نزلت راسي مااريده
يشوف دموعي لان بس يشوفها
ويسأل اعرف بروحي
راح انهار واكوم
ابجي
رجع وره مشوار خله العشه ليوره واجه
صعد يمي هم سال
«،،،ها شلون وضعج هسه
«،،،مابيه شي
ماتحرك درت وجهي على الجامه مااريد
اشوفه وجهي ويعرف البيه
سالت
«،،،شجبت
«،،،كباب لحم
«،،تسلم يله خلي نرجع للبيت قبل لا رانيه
تبدي بالعشه
«،،،اي
جاوبني وحرك بين عيوني هاي الطفله
شلون خافت منه وقهرته
هذا تصرف بريئ وهيج
ضاج ووجهه انطعن
الجبير من جان يقهره شيسوي بي كتمت
دموعي بس بداخلي شهكات تريد
تطلع
««،،لو ادري مو كايلج خلي نطلع
حجه بحنيه وسال
««،متاكده انتي زينه
ردت اصرخ اكله لااا اني مو زينه من الحجيته
عليك والكاعد اشوفه يصير بيك
من وره شي انت مالك ذنب
بي
بس جاوبت
«،،،اي حمزه هسه نرجع وارتاح
«،،،تمام من نوصل كلشي لاتسوين تعشي
وتمددي
«،،،اي
جاوبته ومااريد اي حوار خايفه من نفسي
لا اطلع شهگاتي كدامه واحجيله
الي كاعد احس بي
واقهره بعد
اكثر
وعبالك الله سمع كلامي لان اجاه اتصال
والتهى بالحجي وي واحد وطول
وصلنا وهو بعده يحجي
ويا بشغل نزلت كال
«،،،روحي ارتاحي
«،،،اي
مشيت للمطبخ طبيت رانيه وحدها واكفه
تگشر بتيته شافتني سالت بخوف
«،،،هاي ليش رجعتو بيج شي
«،،،لا
«،،چا ليش رجعتو
«،،،تعبت من الازدحام وكتله لحمزه خلي ناخذ
عشه ونرجع
«،،اامشي تمددي واستري علينا
«،،،اي
مشيت من يمها ورحت لغرفتي طبيت
وسديت الباب ذبيت عباتي والشال لان اختنكت
وروحي فرفحت خليت جنطتي على الميز وصفنت
على وجهي صاير دم والعيون مغوركه
هو طب درت روحي منه لان دموعي نزلت
مشيت لجربايه كال
«،،،،تمددي وارتاحي
«،،،،اي
جاوبته وشهكه طلعت
كعدت اجنب اباوع اله اجه ليمي
كعد وسال بقلق
«،،،ولج بيج شي كولي حتى اوديج
للدكتوره
انهاريت وغطيت وجهي بايدي وكمت
ابجي بشهكه قويه
«،،يابوويه والله يوجعج شي وساكته
سكت وبعدين كال
«،،انتي ماراح تحجين خلي اكومن اصيح عمتي
ورانيه
لزمت ايده من كام وكلت
«،،،،لااا لاتروح مابيه شي
حمزه
صفنت عليها من گضت ايدي سحبتها
تجنب تعاين عليه كلت
«،،اذا مابيج شي ليش كاعد اشوفنج تبجين
وصايره فد مره
«««،ماادري
ردت بشهكه ورجعت تبجي وماتخلي عيونها
بعيوني صفنت عليها چن گلبي كلي
هاي تبجي لان شافت البنت
من خافت مني
سالت
««،احد قهرج
شهكه بصوت قوي طلعت واكدت هالشي
سالت بگلب مختلفه دكاته
««««اني الي قهرتج
سكتت لچن دموعها زادت ومارفعت راسها
ذبيت حسره وكملت
«،،بويه تره انه متعلم على هيج شي
والگلب مات وبعد مايحس
بوجع
عاينت عليه والعيون اسرت عيوني وبهذلت
الگلب هو ودگاته نزلت راسها
وخلتني بس صافن
عليها كالت
بخنگه
«،،لا انت تحس لان شفتك شلون تأثرت
مارديت رجعت تعاين اليه الدمعه چن ماتطيح
على خدها لا على گلبي وتجرحه
كملت
«،،اني كرهت روحي لان قهرتك بشي انت
مالك ذنب بي
حجت هيج وشهكت وذبحتني من سمعت الشهكه
طالعه علي انه الي اذيتها ودمرت
حياتها
قربت منها كلت
«،،،،غاده كافي والله انه مااستاهل دمعه من
عيونج
البجي زاد مديت ايدي اريد اخذها لحظني
لچن عگبتها خفت من رده فعلها
الكهرباء طفت ومااشوف
غير هي تجي لحظني
ختلت بي تشهك
بصوت قوي
لميتها بي بهداوه وكلت
«،،،بسج عااد واالله انه
سكتت من گضت هدومي بقوه تردد
«،،،،اسفه حمزة والله ماجان قصدي اذيك
بالكلام
«،،،،ولج انه الي اتاسف انه غاده الي اذيتج
ودمرت حياتج وخطيتج برگبتي راح تظل
ليوم الدين
المولد اشتغل هي بعدها بحظني وخرت
لچن بعدها قريبه كلش مني عاينت
بعيون دم هي والوجه
كالت
«،،،،لاا بريتك الذمه حمزه وسامحتك
چن جنت ميت والله حياني من سمعت هالچلمه
صفنت عليها وابتسمت كلت
بصوت گوة طلع
«،،،،،عيدها غاده اريدن اسمعها مره
اللخ
«،،،بريتك الذمه وسامحتك حمزه
كلت
«،،،كافي بجي لايروح يصير بيج شي
من شفتها غدت فد مره كلت اريدن
الطف الجو
«،،،،ساحت الگحله وصرتي بانده
صفنت عليه والعيون تبجي كملت هايم
بيها
«،،،وانه ماريدن بعد هالعيون تبجي
ولا اريدن اشوف اثر الدموع بيهن
العيون ظلت وحده تعاين للخ وحالي انعلب
بي لعب وهي وقربها والي سمعته
منها خلوني اكول
««،،تأذيني عيونج لو بجت ياغيده
الباب اندك كلت وانه صافن الها
«،،،،تفضل
حبوبه طبت وراها عمه سالن
««،،ها يمه شبيها غاده
«،،،تعبت ورجعنا
«،،،لا اسم الله عليها
كمت هنا كعدن يمها وكفت اعاين الها
ومبتسم وهي مارفعت راسها
ولا عاينت عليه بعد
طلعت من يمها
الفرح تارس
گلبي
يمامه
جنت مااريد اروح لبيت الحجيه من وره هذا الضابط خفت لايعرفني بس كلت لاا
هو ماعرفني لان تغيرت كلش
عن الاول وجنت محتاجه فلوس
ليمامه
لان كلما تكبر تريد حليب اكثر وهم ردت
اضم فلوس للزمن لان ماعرفت
شراح يصير بيه ولا
شنو ضامته الدنيا
اليه
صح اني كعدت يم خاله ومرتاحه يمها
بس جنت خايفه،،،من المستقبل
ومن اهلي خصوصا قويدر الي
اعرفه بس يلزمني مايرحمني وما جنت خايفه
على روحي لا على بنت حنين الي اعرف
بس اروح هم يبيعوها لو
يذبوها بدار الايتام
اكثر من مره رحت لبيتهم ماشفته لان عرفت
هو مايجي هوايه وعنده شقه
يكعد بيها ،،،،وسمعت
من خاله هو طيب كلش
وايده سخيه بس
عنده سوالف مو حلو وهالشي هم سمعته من
امه باول مره رحت بيها الهم
اليوم جان عدنا تعزيله لبييت لان عازمين
ناس بنهايه الاسبوع
نظفت من فوك ونزلت لجوه كملت كلشي
واذن الظهر طبيت للمطبخ
بنتهم ميسون
شفتها مرتين وحبيتها لان طيبه
كلش وبس تضحك
لا عدها تكبر ولا غرور ولا شايفه روحها
مثله هم من شافت يمامه ماتت
عليها وحبتها كلش
كاعده يم امها وهي بحظنها تحجي
وياها
«،،،يمه فدوه لهل البنوته الحلوه وهالخدود
المدنفشه
«،،،خاله كملت كلشي شاسوي بعد
«،،،،اصعدي فوك عزلي غرفه مهيب
جنت اعرف هو مايقبل احد يطب غرفته
سالت بتردد
«،،،،مو هو مايقبل احد يطب غرفته
«،،،لا خابرته قبل شويه وكال نظفوها
بس لاتلعبين باي شي من اوراقه بس
غيري الفرشه وامسحي الاخشاب
وها اجلفي الحمام
بفلاش
«،،تمام خاله
طلعت من يمهن وصعدت لفوك فتحت
الباب طبيت بتردد
«،،،،صفنت عليها المكتب هوسه كله اوراق
ولابتوب بنصهن مذبوب وهدوم مشمره هنا
وهناك اكثر من جواريب مشمورة
بالگاع وكلينس وبطال
مي
فريت ايدي وكلت
«،،،مسعده امك يالضابط لو تكدر تصعد
وتشوف هالمنظره الي توكع
من طولها من الوصخ
الي لامه بغرفتك
كمت الم وادردم علي
«،،،،ادري ماكو سله لو ما بصفك شبيها
ايدك مكسره
لميت كلشي وشلت الفرشه وغيرتها طبيت
حمامه ذبيت فلاش على
الحايط لان بي تكلس
اجلف واغسل بالدوش المتحرك تبللت
وهدومي صارت مي
من كملتهن عصرتهن وفتحت الباب
طلعت هو طب يحجي بجهازه
بنتره
«،،،،اي مثل مااكتلك ااعتقلهم واانعل
والديهم
شافني وباوع عليه من فوك ليجوه
مشيت منزله راسي كال
«،،،،ااوكفي
وكفت منطيته ظهري كمل بغضب
«،،،،موو انت اثول وامشي سوي الي
كتلك علي
«،،،شعندج هناا
سال جاوبته
«،،،جنت انظف غرفتك
«،،،اانداري من تحجين وياي
انداريت اجنب اباوع اله كال
«،،،لعبتي بشي من الاوراق
«،،،،لا
«،،،تمام روحي
مشيت صاح
«،،،لحظه
هم لعب باعصابي لعب كال
«،،،تعالي غيري هاي الفرشه اضوج منها
«،،،اي
جاوبته ورحت بسرعه للكنتور طلعت غيرها
جهازه دك جاوب وكعد يحجي
وي ولد اسمه هاشم
بس جنت احس
بنظراته عليه
ارتبكت وبسرعه خليت الفرشه اريد
اطلع من يمه
صفطتها وخليتها بالكنتور
مشيت من يمه ونزلت
بسرعه لجوه
الحجيه من شافتني مبلله كالت
««،،يمه روحي اسبحي وبدلي هدومج
«،،،ها مو ماجبت هدوم وياي
،،،،،اني انطيج من عندي
بنتها حجت جاوبت
«،،،،،لا مااريد هسه ينشفن واني هم متعوده
على هيج
«،،،،،لا يمه مايصير الجو بدل وخاف تتمرضين
وانتي وراج بنيه صغيره
سكتت من حجت الحجيه بنتها كامت
وراحت لجوه جابت اليه فستان
وكالت مبتسمه
«،،،هاج هذا اخذته وطلع صغير عليه
اكيد يجي عليج لان انتي اضعف،مني
جان جديد كلت
«،،،،بس هذا جديد ومااكدر اخذه
جاوبتها ردت
«،،،مو عيب تردين الهديه حنين
سكتت كملت
«،،،اخذي يله وامشي غسلي وبدلي حتى
نصب الغده لان متنا جوع
««،اي هسه
اخذته منها ورحت طبيت الحمام الجوه
غسلت بسرعه ونشفت روحي
لبسته طلع فيت عليه جان،،،لونه اسود
بس كله مشجر بورد ناعم الوان نازكه
وبي خرطه من يم الصدر
والخصر بس دلعه
لميت شعري گبايه غسلت دشادشتي
وخليتها بالتجفيف لبست
الشال وغطيت صدري
ورحت للمطبخ طبيت هو كاعد
يم اخته ويباوع ليمامه
من طبيت صفن
عليه بنظرات
مو حلوه
نزلت راسي خاله كالت
«،،،يله يمه خلي الزلاطه وطلعي التمر
واللبن
«،،،اي
خليت الي كالت علي اتجنب النظر اله
الحجيه كالت
«،،،،حنين اثردي لمهيب
«،،،اي خاله وانتو
«،،،،،لا اني مااريد وميسون هم
«،،،،اي والله اريد اقلل لان الوزن زايد
ثردت اله بالفي كال
«،،،سوي بصل
«،،،،اي
اخذت من السله ووكفت اسوي كملت
خليته يمه صبينا وماكعدت وياهم
مثل كل مره طلعت حجه
من يمامه بجت وكلت
«،،،اروح انيمها
«،،،اي يمه اخذيها لان تعبت وتريد تنام
رحت للحجيه هو يمها كاعد نزلت روحي
اريد اخذها انتبهت عيونه
على الدلعه بسرعه
غطيتها بشالي
اخذت يمامه ورحت للغرفه
طبيت وسديت الباب
ورايه حجيت
بغضب
«،،،ابو عيون وصخه شكد مايستحي
وماعنده شرف
كعدت ضايجه منه ومن جيته لان من
يجي ابدا ماارتاح لان اعرفه
عيونه وصخه وابو
نسوان
وره مشوار يمامه نامت خليتها
على الجربايه وغطيتها طلعت رحت للمطبخ
طبيت هو ماكو مزقنب وكايم
الحجيه كالت
«،،،تعالي يمه صبي واكلي
«،،،لا خلي اجلف بالاول
«،،،مو طاير الجلف اكلي تعبتي اليوم
بنتها ردت
«،،مااشتهي والله اني من اجوع اصب
«،،،براحتج يمه
الحجيه جاوبت وكامت وياها بنتها
كالت
«،،،ام ياسين مااريد جاي راح اروح اتمدد
«،،،،واني هم مااريد
بنتها هم حجت وطلعن اثنيهن من يمنا
خاله كالت
«،،،اروح اتوضى واصلي
««،تمام اني راح اعزل المطبخ وانظفه
««،،اي واكلي يمه تره تعبتي كلش
«،،،اي خاله
طلعت من يمي وظليت وحدي لميت
المواعين وفرغت بالحاويه
مسحت الميز
ووكفت اجلف افكر بهذا وتصرفاته
الوصخه واجه بالي قويدر
هم هيج جانت نظراته
اليه اني واختي
ذبيت حسره
ومااحس غير نفخه حاره
يم اذني وريحه
جگاير
شكرا لزيارتكم عالم روايات سكيرهوم
