رواية نارا حيدره الفصل السابع والعشرون بقلم نمارق رحيم
- وجهك علاجي يصير كل ما اشوفه
⭐⭐⭐⭐⭐⭐
تقرب وهمس بٲذني :- ناردين انا احــ
سئلته بأستغراب :- أح شنو ؟
راد يحچي ويكمل الكلمه ،سكت ،طاح علئ صدري ،ضربته بخفه واني اسئلة :- حيــدرا شنوو شبيك احچي ،اگعد ..
باوعتله مغمض عيونه نايم ..
بعدته مني علئ كيف خليت راسه جوا المخدة
متفاجئة والصدمني اكثر كلامه مخربط وماعرفت شديحچي وكلمته الراد يحچيها ونام بالوقت الخطٲ
بقئ بالي مشغول منها شنوو يقصد بـ أح ؟
زين هو ما شارب لعد ليش هيج اتصرف عبالك مكبسل لو شارب منوم؟!
ضليت افكر واتگلب يمنه ويسره ما اجاني نوم ابد وهو يمي نايم بصفي ..
صافنه علئ السگف چان يتگلب علئ ظهرة وخلئ ايده عليه ..
فزيت من حركته وصفنت بوجهه حسيته گاعد لو ديمثل ويچذب عليه
ابد موطبيعي عجيب رح اتخبل
غفيت فجأة وگعدت ثاني يوم الصبح ماموجود بالفراش
عدلت گعدتي تالي انفتح باب الحمام طلع البخار ورا لابس بس بنطرون وبيده الخاولي ينشف بشعره..
حيدرة:- صباح الخير..
-هلا صباح النور
-شبيچ صافنه حسبالك اول مره تشوفيني؟..
-لا بس شسمه ماكو شيء
-رح يجي الدكتور أستعدي..
-اي تمام خل يجي اگلك حيدرا..
-گولي يناري..
-هو سؤال شسمه البارحة..
-شنو البارحة ؟
-ما ادري شبيك وشصاير بيك احچيلي؟..
- مابيه شيء وداعتچ شنو بيه مثلاً؟..
-انت اجيت للشقه وتباوعلي وتحچي عبالك سكران لو شارب شيء وردت اتگولي كلمة بس ماكملت ونمت رئستاً..
-شنو سكران دخيل ربچ استغفرلله آي وتالي ما عرفتي الكلمة معقولة؟..
-لا شلون اعرف اذا انت گلتلي ناردين انا وسكتت غفيت..
-والمطلوب چَا ؟..
-غير تكمل الي كلامك دام گعدت مداگدر انسى هلكلمة صارت براسي بعد جيب الي يطلعها..
-مشكلتچ مو مشكلتي انتي كمليها
-لا والله ؟
-ناري سدي الموضوع
-والكلمة ؟
-فكري بيها انتي
غمزلي وضحك .. اندگ الجرس دخلت العاملة بدلت وهيه راحت تسويلي ريوگ گتلها ما اريد لا تسوين..
حيدرة:- لازم تتريگيين يابه..
-ما أريد
-ناردين
-ها
-لخاطري اكلي بدون عناد..
حچاها بنبرة حنيه ما گدرت اگول لا..
التفت للعامله وگالها روحي سويلها..
-شبيك انت مو طبيعي ساعة تعاملني بحنيه ساعة لا ، ساعة احسك تحبني ساعة ما تعرفني تريدني اكل واهتم بصحتي وبنفس الوقت ما هامتك اني..
-شنو هالحچي منين جبتي شلون ما تهميني؟..
-اذا اهمك گولي شنو الكلمة الي ردت تگولها الي؟
-انتي اعرفيها فكري..
-مخبل انت شنو اشم ايدي واعرف؟..
رص على اسنانه وباوعلي بخزره وهو يگول..
- تخبلت موو؟؟..
-شحچيت قابل يعني تصرفاتك مال واحد عاقل لو مخبل؟..
-ودين محمد اذا عدتي هلكلمة لأسوي شيء تتندمين عليه افضلچ تسكتين..
-ههه احد لازمك؟..
-حلوو گد كلمتچ؟..
- اي ما خايفة تره كافي تصرفاتك وكلامك كلش يحز بخاطري وانت ولا كأنو تجرح واداوي مليت من الوضعية..
تقدم يمشي اتجاهي كل خطوة يكزبر جسمي
تقرب مني اكثر لزم خدي ببرودة ايده غمضت عيوني بخوف وارتباك من قربه عبالي رح يبوسني..
تالي ابتسم ورفعني ،شالني بحركة سريعة تعلگت برگبته بخوف..
-عقاباتي تكون قاسيه مو مريحه الچ..
-شكوو شبيك نزلني..
-مو كلتي ما اخاف ليش تراجعتي؟..
-اهوووو
مشى بأتجاة الحمام..
-هااااا هلوووو خييير خو ماكوو شيء حبااب نزلنيي شسويلي بالحمام…
فتح الباب وباوع علئ البانيو المتروس مي محضرته العامله حتئ يسبح بي حيدرة..
-امداني شحچي عليها شگول ومحضره المي همم نزلنيييي يا حيدراا..
-عيونه لحيدرتچ..
-باع اني شسمه..
-لا تگولين باع
-اي ماشي ما اگول اسمعني اول شي خليك ريلاكس وروحك رياضية بداعتي اني اتراجع عن الگلته يا كلمة وردي لمكانچ..
ضحك وهو يتقدم وكفني يم البانيو ورفعني ليفوگ.. بمعنئ استعداد رح يشمرني بي..
-ممممم شتسويلي وانزلچ؟..
- كلشي اهزلك خوصر وركبه
ضحك ضحكة مسموعة..
-ايباا ما ادري متزوج رقاصه..
-لي شعبالك لعد هندي علئ تركي وهز يابه هز..
ضحك وهز راسه بموافقة طلعني من الحمام..
-الحلوة تريد تركصلي بعز مرضها..
رجعني علئ الچربايه مددني على الفراش..
-عود شنو هاي تصرفاتك هاا تريد تمرضني؟
-ولا تعجبچ تصرفاتي عاجباتني انه ومتونس صراحة..
-ونوب انت مخبل وين اكوو واحد يسبح بالمي البارد والجو ثلج وبارده بنبي مخبل..
- نااااردين بطلي هلكلمة شگلتتت؟؟..عجيييب
دنحچي اندك الباب راح فتحه دخلت جابتلي الأكل.. سكتت وظل يوكل بيه لحدما شبعت.. وگلت كافي.. شالني غسلني ورجعني گعدني بالصالة..
شوي واندگ الجرس راح فتح الباب دخل الدكتور..صار وقت علاجي..
بدا يحچي وياي ورح يبدي بالعلاج وحيدرة ظل واگف يمي اباوعله صفح ومخوزره ضايجة وهو يرفعلي حاجبه ويبتسم..
...
طيبة..
بعد ما سافر حيدرة لعلاج ناردين صارله بقرابه الشهر واكثر وامي عدنه بالبيت جابها حسن بنفس اليوم السافرو بي
من شفتها اتفاجئت بجيتها صارلي اهواي ماشايفتها حيل بچيت بوقتها.. چانت مسويه حادث لذلك جابوها
..رگبتها ملفلفه وتمشي علئ عكازه وايدها مچبسه
ما عرفو منو السوا الحادث والدعمها .. قضية مجهوله والشرطه ما حققت لان هيه ما ماتت والدعمها مجهول شارد بؤقتها ،
صرت اسويلها الأكل وانطيها ادويتها بؤقتها بس ما اطول حجي وياها لان ماخذه موقف منها من قبل سنتين..
بس حسن يتصرف عادي وطبيعي بس يسئل عنها ويگعد وياها شوي ويروح يطلع..
اتصل علئ ناردين بين فترة وفترة اعرف اخبارها.. تسولفلي علئ العلاج الجاي تسوي ومرتاحه بلندن..
رحت مرتين لبيتهم ؛ اجواء بيتهم متكهربة بسبب اخوهم الچبير سالار ونور مقهورة صارله شهرين متغير عليهم ومايدرون شنو السبب؟..
...
نور :- كاعدة بالغرفة الظهر ،فاتحه الكتاب وبيدي القلم والموبايل اترجم بي،
وصلتني رساله ،دخلت علئ الرسائل استغربت واحد مجهول و بدون اسم !،
داز ( يباا شلونچ مشتاقلچ وحگ رموشچ الشگر )
تسائلت نفسي منو هذا و مين يعرفني وراسلني ؟! ،
بسرعه اتذكرت ( رائــد )
رجف گلبي، اكيد هذا هو مستحيل يكون غيره ،
گلت انطي حظر و اختصر الموضوع، احسن
دا احظره چان يتصل عليه
ارتبكت وايدي ترجف ،بمكان ما اضغط ( رفض ) ضغطت ( رد )
شهگت، و اجاني صوته وهو يگولي :- شلونچ حبيبتي
- انت رائد ؟
- اي لعد منو هذا الحيوان الي يتجرء ويكلچ حبيبتي غيري ،ادوس بــبطنه وداعتچ.
- شلوون راسلتني منين جبت الرقم ؟؟
- مو صعبه عليه .. انا رائــد ،
- لا تخابر ولا تحچي وياي فدوة ما اريد مشاكل شتريد مني انت
- اريدچ انتي ، عادي الحياة تجارب و تحارب خلتصيرلچ مشكلة واذا يابه
- رح احظرك
- حظريني من الموبايل مو من حياتچ ،و اجيلچ من غير رقم معندي مشكلة كلش عادي
- شو انت ما تستحي
- اي من زمان كفيلچ غمزتي الي توگع عشره ههههههههههه
- والله رايحه انطي الموبايل لأخوي ..
- سالار ؟ اي انطي
- شنوو شلوون تعرف اسم اخويه
- انطي خلي احچي وياا، مشتاقله
-شنو يعرفك ؟
- اذا انتي گدها روحي لأخوچ
- انت مصختها عاااد ،لو جايلي للمدرسة لو مراسل شتريد بالضبطط ؟؟
- اريدچ افتهمي
- و اني ما اريدك افهمم داتخليني اكرهك رغم ما اعرفك
- اي و بعدين تگولين ( اردت اكرهه لكنني وقعت في غرامه و حبيته اوي) هههههههههههه
- انت مو صاحي
- صاحي لو نايم
- بلوووك
- اي بلكيني
غلقته منه ،مسحت رسالته وسويتله حظر ارتاحيت وراح الخوف شوي
و رجعت لكتبي وصافنه ،سكتت شهر بعد ما بيها مجال لازم اگول لسالار
بس خايفه اكيد رح يرزلني لان ضميت عليه و هاي اول مره اضم عليه هيچ موضوع كبير ،چنه اصغر تفاصيل انسولفها اله ..بعد سالفه ناردين والعيادة حيدرة .
ضميت كتبي بالجنطة ،نبراس نايمة و امي طالعة مااعرف وين رايحه بهل ظهريه ،
و مصطفى دا يلعب بليستيشن لو دايدرس ..
طلعت من الغرفتنه ،وكفت گبال غرفته
هيه خربانه خربانه ،اترزل احسن ما اضم عنه ،خل اگوله احسن نوب لا اتورط وتصير سالفم كبيرة ،
دگيت الباب :- سالاار افتح اني نور
ما جاوب ،دخلت فتت للغرفه شعجب ما قافل الباب
اباوع الغراض مشمره والغرفه مخربطة وجنطه كبيرة مفتوحه ومحطوطه بالكاع وهو كاعد يبدل..
سالار :- ما رديت عليچ ليش دخلتي ؟
- لأن اريد احچي وياك ضروري
- ما عندي وقت لكلامچ
- شنو رح اتسافر ؟؟
- اي
- صدوك تحچي و ليش ما انطيتنه علم ما گلتلنه ؟،
- نور الأفضل اطلعين بره
- لا ما اريد اطلع قبل ما تحچيلي سالار ،انت بس فهمني فدوة اروحلك ليش هيچ ما تحچي ويانه ؟ .. ومتغير
اني اختك احچيلي شنوو السبب ليش متغير فدوووه
- نور اطلعي بدون توسل ،متنرفز حيل و ما اگدر احچيلچ مااكدرر و اريد اضم غراضي واروح اطلعي من الغرفة
ركضت حضنته ، :- بس احچيلي قبل ما تروح ،والله الليل ما انامه وكله افكر بيك خويه انت، احچي وريح گلبي وريح نفسك
- اذا احچيلچ انطيني وعد ما تگولين لأحد ،مليت واني ضام وساكت من مدت طويله ،علئ لحضه اطگ و انفجر
رحت سديت الباب كعدنه :- اي احچي
تنهد وجر نفس :- اسمعي ،
قبل ما تسافر ناردين بيوم ،امي چانت تريد تخرب السفره ،منعتها وحجزتها بالبيت
بس طلعت و هددتني ان تحچي الچن سر ضامته من سنين وهل سر ما تتحملنه انتن
ضحكت بوجها ،عبالي مثل كل مره تهدد وما بيدها تسوي شيء وتسكت
گلتلها وشنو هذا الموضوع؟
والسر التافهه
چان تحچيلي كلام ،سطرتني سطر ،ماخلت عقل براسي عبالي چذابه و تٲليف منها
بس حلفت ،وجابت صور وتسجيلات تثبت هذا الشيء صح
وبليلتها طلعت وخابرني حيدرة
رحنه لدجله ،وسولفتله لان شافني مهموم
وهو هم انصدم مثلي
وكتله لا تگول لأحد
وخليته يستعجل بالسفر
حتئ امي ما تگول لــ ناردين
- اي صح حتئ حيدرة من اخابرة حسيته يعرف وضام شيء
بس احچي سالار طگن مصاريني واني افكر واريد اعرف
رح اموت احچي فدوه شنوو گالتلك ؟؟
- لچ نور ،ابوي چان
اندگ الباب ،دخلت نبراس وقاطعتنه ..
نبراس :- شدتحچون ولكم شدسون واني ما اعرف شهل الخيانه
- اسكتي ولچ هم اجيتي بلحضه مهمه، معليك بيها سالار احچيلي ليش سكتت؟
گام ورجع لكنتوره يلم بملابسه للجنطه ..
- لاا سالاار كمل شنوو كالت شبي ابووي چان يسوي ؟؟
نبراس :- عزه شنوو ابوي شدتحجون ؟؟
سالار :- خلص نور سدي الموضوع ما اريد اكمل هسه،
و اطلعن بره اريد ابدل ..
- اي بدل واحچي شبيك شنو مستحي قابل ما شايفينك بلا قميص
- نبراس اطلعي
نبراس :- اي عيني اني اطلع ونور تبقئ شهل طائفيه
عاط بينه بعصبيه :- اثنينچن اطلعن داگوووول
جلفنه بمكانه،من صيحته ..بسرعه طلعنه وسدينه الباب ،
- امداچ اي والله ،يلعوبه هسه انتي الا تجين بلوقت ..مو چنتي منطمره ونايمه شكعدچ يلحمززه
- بعد فزيت ما لگيت احد دورت عليچ واجيت شچنتوو تحچون ؟
- معلييچ
- خاف ما عندچ انچبي واحچيلي
- سولفتلها
- اه صدك لعد حقج فگر اني ،لو متٲخره 10 دقايق چان حچالچ كلشي
- اي والله دائماً تخربين اللحضات
- ديلا عادي يابه وذا علئ كوله تؤامي المشتاقتلها ،راجعه انام سي يو بيبي
- دولي روحي انطمري
راحت للغرفه ،واني بقيت بمكاني
,ضجت عود رحت اله حتئ اگوله علئ هذا الي اسمه رائــد المخبل ،يلگالي حل ويوكفه عند حده
..كلش مصخهاا وياي
تالي لا گلتله ولا عرفت شبي وابوي شدخله وشنو الموضوع ؟
طلع سالار ولازم الجنطه وبيده المفتاح وگف يقفل بغرفته ..
- صدك عود رح تسويها وتسافر لأربيل ؟
- ما رايح لشغل اني، عندي شيء ثاني و ما اتٲخر
- لعد و الملابس الكومه الأخذتها والجنط والغراض
- مع السلامه
سكتت نزل ،نزلت ورا
وصئ مصطفئ ما يطلع ويبقى بالبيت
وراح ،
وخلانه بحيره
...
ناردين
حيدرا طفي المكيف تره بارده والقران..
-مشغله الي مو الچ واذا بارده عليچ تغطي..
باوعتله بضوجه :- رب الخباثه ونبي
شوي وگام راح طفا ورجع تمدد باوعتله وهزيت ايدي شمر عليه باكيت الكلينكس وهو يگلي خاف ما عاجبچ..
سكتت نعسانه ما اريد اتعارك وياا..
رن موبايله مشى للمطبخ دايريد يخابر
گلتله… وليش ما تخابر يمي مستحي؟..
حيدرة: جاي احچي وي عثمان..
-صديقك؟
-چَا ابوي؟..
-كوميدي اسم الله عليك..
-شششش سكتي..
ورا ربع ساعة رجع خلا موبايله على الميز وتمدد طفى الضوة..
حضن المخدة ونام عضيته بأيده..
فرك ايده وصاح.. هاي شسوويتي لچ..
-ما تنام خوش ليش حاضنهااا..
-شنوو منيه..
-المخده
صفن بوجهي بتفاجئ وضحك بخفه..
-ما انلام بيچ من اگلچ طفلتي..
باوعتله مخوزره ومبرطمه شفايفي..
رجع تمدد وتقرب مني خلا راسي على صدرة مسح على شعري وگال..
-تغارين؟..
-لا
-واضح زين منو الخلا حاجز بيناتنه وما راد انام يمه؟..
-اني..
-چاا هنياالي..
-اهووو اگول دامك دتضحك هسه انت مزاجك وردي مو؟..
-لا برتقالي
-بدون شقة اريد اسولف وياك نعسان انت؟..
- لا مانعسان
-عادي نحچي ساعة..
-بس ساعة ؟ انتي الچ العمر كله..
-ايباه صدمتني..
-ههههههه ابدي احچي..
-هوواي اسئلة
-بلشي اول سؤال..
-صراحة مو؟..
-اكيد.. شعندي مجذب عليج
-زين.. شنو شغلك ؟
- ناري ما اريدچ تتدخلين بٲشياء تخصني بالذات هذا الموضوع.. اسئلي غيره فدوا اروحلچ..
-لعد اسئلك عن نفسي ليش ما اتدخل لعد غير اني مرتك..
ضحك وگال.. انتي شتگولين ششتغل برائيچ ؟
بسرعه گتله :- مافيا
انصدمت من ضحك قوي احس من كل گلبه عيونه صارن حمر من الضحك..ضحكت من شفته ديضحك..
-بربچ شكلي من المافيات ؟
-اي طبعاً هواي اسباب خلتني اشك
-غرديلي بله بالأسباب اريد اسمعهن..
- شوف انت ،تارك عائلتك واقاربك من سنوات وعايش بغير محافظه بعيده عنهم ،وشسمه تلبس گوله اسود بٲسود ،
ودائماً تنقذني بالاوقات ولحضات المناسبه يعني عبالك شون مراقبني ومراقب تحركاتي
ونقذتني من وداني لبيت الدعارة چنت لازم مسدس
وعرفت حسابي بالفيس بدون ما اگولك اني منو،
ودائماً اسمع اشخاص غريبين يگولولك سيدي
وتشتغل من الصبح لليل
وموبايلك صار جزء من ايدك هلكد ما تخابر بي
وتسافر من دوله لدوله
والشيء الاهم الخلاني اشك انو تكتل ناس مثل عبد الرحمن و لؤي ،
وما يسجنوك الشرطه
وبعدك حر مايحبسوك وهــ ..
-بس بالهداوه اخذي بريك..
-اي شرايك بشكوكي..
-اي انا من المافيا اشتغل..
-گول والله؟..
- ما احلف بالله على هيچ اشياء مايجوز..
-لعد جذاب.. يفيدك هالحچي..
-بكيفچ حولي علئ سؤال ثاني قبل ما انام طفيت رح اغفى..
-ماعندي اسئلة بعد تصبح على خير..
-زعلتي لان ما جاوبتج؟..
-لا ما تهمني..لا تجاوب براحتك
أبتسم وگال.. ادري مو من گلبچ هيچ گلتي..
ظل صافن على عيوني درت وچهي رجعني لحضنه مسح على شعري وظل يهمس بأذني كلمات غزلية تالي باسني تجمدت بمكاني.. ظليت ساكتة صافنة بوچهة..
بعدني عنه خلاني علئ المخده اسمع صوت نبضات گلبه السريعة ونفسه الي يجره گوه..
استغربت شبي..يتغزل فجأة ويبوسني مو من عوايده؟..
دقيقه وگام ،راح للحمام
نص ساعه وطلع ،
-شبيك صار شي؟..
-لا ماكو شي رجعي نامي..
بدل واخذ موبايله ومحفظتة وطلع.. قفل الشقه وراح..
..ليش هيچ يتصرف ! دخيل الله رح يخبلني..
بقيت منتظرته فتح الباب رجع مثل وقت البارحه الچان عبالك شارب شيء..بس چان طبيعي مابي شيء ..
-وين چنت؟
-تمشيت واجيت عبالي نمتي..
-لا چنت انتظرك..
-ليش
-شلون انام وانت طلعت فجأة بدون ماتگلي وين..
تنهد وما گال شي اخذ مخده وراح تمدد على القنفه ونام وايده علئ عيونه ويجر نفس..
ضليت مصدومة من تصرفة تغطيت جوه البطاينه ..ميته بچي
ابچي بصمت ما اريده يسمع شهكاتي ،، گلبي بعد شنو يتحمل؟..
اباوعله مامتغطي ولا لابس شيء بس شورت والمبرد عليه والغرفه باردة..
خفت عليه لا يتمرض ردت اگوم اغطي بٲستعجال..
تالي اتذكرت نفسي مشلوله ماگدر امشي على رجليه..
بچيت من هل موقف الي كسر گلبي اكثر..
ما نمت بقيت افكر ودموعي على خدي
گلبي محروگ ،،، ونار اشتعلت بصدري ،،، ومادترضى تنطفي ،،،
حياتي ما جاي افهمها شنو جاي يصير؟ ليش احس كل الناس ضدي حتى الاحبهم احسهم يمثلون عليه..
حيدرة شبي اني شبيه؟..
مرت فترة لا اني احچي وياا ولا هو..
ماخذه موقف منه وما اباوع بعيونه ولا جربت احچي وياه..
بس رسميات.. اكلتي ؟ شربتي ادويتج ؟ نامي لا تبقين سهرانة..
شهرين ونص خلص العلاج الفزيائي وتعالجت وصرت اگوم علئ رجليه وامشي الحمدلله
بالأول علئ عكازه وتالي مشيت بدونهاا.. حيل فرحت وما صدگت من مشيت مسافه صغيرة بعد 5 اشهر مشلوله.. اصعب فترة چانت
چان شعوري بوقتها مثل الطفلة عمرها سنه ومشت اول خطوة بحياتها..
گالي نضل بعد فتره ونرجع للعراق.. بعدما خلص العلاج بقيت اسبوعين فتره نقاء ارتاح وامشي بس بالشقة..
وما گلت لاحد على تمام علاجي گلت اسويها مفاجئة من نرجع لبغداد..
چنت بالمطبخ اكل كالي بدلي امشي نطلع نتمشئ وتشمين هوى..
ما گلت لا لان ملل بالشقه لو انام لو اكل..
لبست بنطرون وبلوزه فوگها قمصله فرو زرگه رفعت شعري وطلعت من الحمام بعد ماخلصت تبديل..
شافني وصفن بعيوني همس ..شلون بيه ما لگيتي غير قمصله زرگه چان لبستي سوده؟؟..
-عاحبني اطلع بعيون زرگ اذا ما عجبك خل انزع وانت روح..
-لا عاجبني عمي..
طلعنه من الشقه وماخذت شيء لاجنطة ولاموبايل ماريد الزم شيء بيدي اتقيد..
امشي علئ كيف بعدني اخاف لا اوگع..
وداني للمطعم تغدينه تالي گال وين تريدين ترحين؟..
-هيج مدينه الالعاب واذا ماتريد خلنرجع..
- لا عادي يابه هاي الملاهي قريبة بس اخاف عليچ لا تتأذين
-لا صرت زينة وامشي طبيعي مثل قبل ما يأثر..
-تمام اذا حسيتي بألم او وجع گليلي حتى نرجع..
-ماشي..
وصلنه ونزلنه مدينه چبيرة اكبر من مدينة الالعاب بغداد بهواااي..
حيدرة: خل نتمشى افضل بعدين الله كريم..
اشترالي غزل بنات شعرية.. ضليت اتمشى واكل دمرته بخده وظل يضحك ومسحه..
اباوع عليهم شگد حلوو المكان وهمه حلوين..
تالي گلتله خل نركب بالسكه الكبيرة سكه الموت..
-ماتخافين؟..
-انت وياي مو؟..
ابتسم وگال.. رح اركب وياج من هالعيون..
ابتسمت وهز راسه وگال تمام اوگفي بمكانج اجيب تذكرة وارجع.. دقايق واجه وصعدنا بالكراسي..
-عزه مبينه تخوف.. يبووو دا احس بالورطة..
-لا تخافين ماتخوف لزمي ايدي قوي ولا تعوفيها..
-ماشي لعد..
ركبنه عبالي مثل ما گال ما تخوف ومثل سكه الموت الي عدنه..
حيلي نهد ،،، خبطت معدتي ،،،ردت اموت ،،،
وهو عادي گاعد وكلش هادئ تالي من شافني اصيح ظل يضحك طلع موبايله يصور بيه وكاتم ضحكتة ويصيح ها فهاوه مو گلتي ما اخاف..
خليت راسي على كتفه ولزمت ايده بقوة وغمضت عيوني بخوف.. وصرخت طفيهاااااااا رح امووووووت..
دقايق وخلصت اللعبة ونزلنا رحت للحمامات غسلت وچهي رجعت لگيته گاعد..
-هاااا شلونچ باللعبة..
-طاح حظي وربي التوبة بعد اذا ركبت..
-خل تصيرلج عبره بعد..
-شسمه عاجبني اركب بالدولاب..
-لا هاهيه واضح تبتي..
-ااشاقة..
ظلينا نتمشى وكل شوي يشتريلي شي.. صار مصور گبالنا صاحله كصالنه صورتين حلوات.. چان صافن بعيوني واني لازمة ايده طلعت الصوره حلوة..
وعلئ كوله المصور ناايس ، بيرفكت..
رجعنه للشقه بليل تعبانين بعدما تعشينه بالمطعم ثاني يوم گعدت راسي بعده يدور ومتأثر من اللعبة..
شفته كاعد علئ الميز ويمه كوب كهوه واوراق ولابتوب وسماعات ..
-صبااح الخير
-هلا صباح النور يناري..
-شدا تسوي..
ابتسم وگال.. اشتغل روحي تريگي موجود الاكل بالمطبخ..
ما جاوبته غسلت وجهي واني اهز ايدي بعدني ضايجة منه..
وگفت يمه اباوع علئ الاوراق دايكتب..
-لا توكفين يمي اتوتر وتتخربط اوضاعي..
ابتسمت وركزت بعيونه بسرعة مسح كصته وظل يكتب..
اخذت ورقه بيضه وبيها كتابة انكليزية..
سحبها مني وگال ولچ جاي اشتغل روحي شوي وتعالي بس خل اكمل هالأوراق مهمة..
-شغلك حتى بالندن ما يوگف..
-اي تعب مو؟..
-اوي عيني رايحه ابقى اشتغل ابو المافيا ابو المهمات المتعبة..
التفت دا ادور چان اطخ ايدي بالكوب واتبدت الكهوة كلها على الاوراق..
شهگت وهو صارت عينه على الاوراق وعين عليه حسيته احتار شلون يموتني..
عصب حيل وصار يصيح ..شنوو من بلوه انتي شنوو الحل وياچ فهميني كلتلچ رووحي الاوراق هااي مهمة وروح العزازز مهمة..
-اسفة والله ما ادري بدون قصد ما اعيدها بعد والله..
-روووحي منااا
-هسه شنوو صار انگلبت الدنيا هنه نجرد اوراق ليش انفعلت وصيحت عليه..
-غلطت عليچ ؟ سبيتچ ؟ سبيت اهلچ ضربتچ ؟؟ عجييب فوگ ما غلطانة ما عاجبها..
-اوووي شسووي يعني..
-ولچ لساانچ..
-شبي خاف ما عاجبك..
تقدم يمي وشالني على كتفه.. ضليت اضرب على ظهرة..
-يا عزززه بعينك نزلنيييي..
تقدم يم البلكونه فتح الباب .. عبالي يشاقه طلع صدگ معصب مني..
-صخاام بوچهك كوون شدسوي نزززلني..
تقرب من المحجر.. حيدرة شدسوي نززلني اهووو تريد اتووسل بيك تحلمم يلااا نزلني وامداك وامده اوراقك المهمة..
-هسه اذبچ هنا وارجع لبغداد واكلهم عجبتها الحياة بلندن ورادت تموت بيها وكتلتها شتگولين؟..
-اي عندك الكتل والموت شغله عادية لا حيدرة نزلني اخاف من المرتفعات..
اباوع ليجوه عمارات تقريبا 7 والمكان عالي وسيارات داتعبر وناس تمشي.. غمضت عيوني وضليت اصيح واصرخ..
:- ابوسك بس نزلني دخيلك والله اخااف
-بوسي
قربني لخده ونفخه وهو يهز براسه منتظرني ابوسه لزمته بأثنين ايديه وبسته واصيح نززلني يلااا..
ابتسم وغمض عيونه.. تالي گال
-بشررط هاا ؟
-اهووو كلشييي اسووي بس نزلنيي..
نزلني وهو مخوزر كعدت علئ كرسي لازمه گلبي وايدي لخ علئ راسي من الهبطه
-امدااااك..
-مرة الثانيه انتبهي ولا تتقربين يمي فاهمة
راح وشوي واجه جايب اوراق وقلم ولابتوب..
انطانياهن ،وگال لي :- هذاهو الشرط الوافقتي عليه
-شسوي بيهن ؟
-اكتبي الي علئ شاشة اللابتوب وانقلي بـ20 ورقة
-ليش عيني ناقصك ايد رجل..
-اريد اتعبچ عقوبة الچ..
-مو اگولك انت رب الخباثة..
-شهادة اعتز بيها..
جاب كوب كهوة من جديد وگعد گبالي بالبلكونة رجل على رجل واشرلي بحواجبة..
-ابدي يلاا اكتبي لا تصفنين..
حوالي 3 ساعات متتالييه گاعدة انقل من اللابتوب للاوراق واكرر الاكتبه 20 مره..
تالي خلصت بعد ما انهد حيلي وطاحت ايدي من التعب.. وهو گاعد ولازم موبايلة يتصفح..
رحتله وانطيته الاوراق.. هاك اتفضل حيدرة افندي خلصت..
عاف الموبايل وهو يبتسم بنصر گام اخذهن واتأكد من المكتوب سطر سطر..
تالي اخذ ورقة وحدة خلاها بجيبه..
والباقي لزمهن طبگهن وشكهن بالنص.. كلهن
صحت لااااااا عزززه بعينك لييييش…
حيدرة: ما احتاجهن نسخة وحدة تكفي..
-لعد ليش خليتني اكتب ساعات وايدي راحت من الكتابة عابتلك اي والله
-عقاب الچ
-خبيث حقيررر والنبي
-للمرة الثانية اگلچ شهادة اعتز بيها..
طلع واخذ الابتوب وياا ،
واني مقهورة من الصبح وهيج تعبت لو راجعه نايمة مو احسنلي ،
بقينه اسبوع لخ ،تالي بليل كالي:-
باجر موعد حجزت طيارة رح نرجع للعراق ،
لميت كل الملابس والغراض وعزلت الشقه وهو ساعدني ،
ثاني يوم رحنه للمطار .. و رجعنه لبغداد ،
وصلنه بدايه الظهريه ....للكاظمية
كال - انروح انزور الامام الكاظم عليه السلام وتالي نروح للبيت
فرحت وكيفت ،من زمان ودي ازور واريد اروحله ..
رحنه زرنه وبقينه ساعتين ،وطلعنه
رغم التعب والسفر بس كلش ارتاحيت بالزيارة ،
حمدت ربي وشكرته انعم عليه هلنعم الهواي ورجع رجليه واتعافيت من الشلل غيري ما گدر.. وهاي بحد ذاتها نعمة چبيرة..
طلعنه من الامام سئلته يا بيت رح نروحله؟..
-اوديج لبيت اهلج تشوفيهم
-وتالي..
-ترجعين وياي لبيتي بحضني..
-ماشي..
اجر سيارة تودينه للبيت ..
وصلنه ودفعله الكروه ،وراح
ونرل الجنط ..
دگيت الباب واني مبتسمه ،،،
وحيدرة واكف يمي وعاقچ وجهه ورافع حواجبه ويهز برجله..
حيدرة:- يا يابه حاررة لو باقيين هناك انسمط ابو ابوي..
ضحكت.. اي غير تغيير جو قابل احنه مثل جو لندن هناك باردة..
دنحچي چان ينفتح الباب وطلعتنه امي من شافتني انصدمت
شكرا لزيارتكم عالم روايات سكيرهوم
