رواية ارحموني ولو رحمة مرة الفصل الثامن والعشرون بقلم فراقد حسن علي
ثانية واحدة... لدينا فيديو إشهار قيد التحميل.
منى/صعدت فوك رتبت حالي
يادوب كملت ودخل أركان،،
الصراحة بعدني أستحي من عنده
وما متعلمة وميانة يشوفني بهيجي لبس
اركان/من فديت الله الخلقج
يولي شنو صينيه كيمر كدامي
لو امج مخثرتج بحليب جاموس
يمكنك الآن الانتقال إلى الفصل التالي
-نزلت علاليك الحلويات والعشى بالكاع
وطلعت شريط حب المانع من جيبي
*هاج أشربي حبايه بين ماابدل
واتعشى بيج يلا أتعشى
منى/حباب بس أنطيني مجال شويه نسولف
وبعدين نحجي
اركان/ههههه شلون بلا نسولف
وبعدين نحجي ،،هااا قصدج
منى/سديت حلكه بيدي
لا لا مو قصدي انت فهمتني غلط
اركان/جريتها عليه وحظنتها
يولي بس تعاي مو أشتعل شيب ابو أسلام
بس أبوس يولي مااعندي صبر بين ماابدل
دشربي الحبايه شبيج
منى/اي اي هسه بس روح بدل
خلي أصبلي كلاص مي
بس أندار طلعت الحباية بسرعة وشمرتها جوه الكومدي وشربت كلاص المي
بالجذب علساس شربتها
-يمه كمزتني ،، حظني من ظهري
شبسرعة بدلت باوعت عليه لابس بس شورت
*ترى باردة لا تتمرض
اركان/تؤ ،،ميحتاج تنزلين جبت ويايه
شوفي العلاليك جبت لفات كباب وكص
شوفي شنو تحبين
وجبت عصاير ومشروبات غازيه
*جيبهن هنا وتعاي وكليني مثل ماتوكلين اسلام
منى/وانت ليش مخلي عينك على الولد
بلكمته وبكعدته وبحركاته راح تحسده
اركان/يولي من جعلني حركات أصابع أيده
اني متكلوط بضيم الفراك
وحتى فلوس اجره الكوستر مال عرس ماطلعتها
واسلام أفندي نايم هنا بالعسل
منى/يااااا شبيك وخر ،،هههه
اااي لحيتك خشنة عورتني
-بس سؤال /شنو قصدك أجرة الكوستر
مال عرس ماطلعتها؟؟
اركان/هسه اني اجاوبج
منى/هسه شلونها انخلصها اليوم بس تثرد بيه مو جوعانة
-ياااا راح أغص باللكمة محد يكول تاكل وتضحك لا يكولون لكمتها جبيرة وغصت بيها
-لملمت الغرفة من هوسة العلاليك
*يلا ننزل جوة ساعة نشوف شكو ماكو ونرد نصعد
اركان/تعاي بابا هنا أكعدي وأستجني
شعندج نازلة تلحكين على جرش الحجي
ويه فارة النضد ،، وتكابلين بوز الثانية شرشبيل
منى/بقينا كاعدين الوكت متأخر ونسولف
ونضحك
ويحجيلي شلون جان يدربوهم بالكلية العسكرية والمواقف اللي تصير وياه هو وجماعته وبيوم الجالديهم بالتدريب
وبيوم الشامريهم من الجسر بالشط
يوووو طلعت كليتهم صعبة
-بنص الليل ردت أنزل للتواليت
فتحت الباب وأسمع رفل ترمي مو تضحك
صوت ضحكها يجب التايه
أركان /شكد أكره الصوت العالي
وشرشبيل يومية أسمع صوت ضحكها
وحتى صوتها ب.... استغفر الله هسه اكوم ألغي واكل تبن ،، حاجيت رجلها الاغم
يابه ترى صوت مرتك أسمعه
وصوت الليل مسموع بس ماكو فايدة
منى/طفيت الضوه وأجيت أنجطلت
نومني بحظنه ،، يادوب غفيت
واسمع باب تندك وصوت ابويه
يصيح على محمود
-أركان طافي ويشخر
كمت لبست دشداشتي وطلعت
//ها يابه خيرك شكو خوفتني
عادل/يابه نزلي لاخيتج عدها ولادة
وهذا النذل صار ساعة ادك بالباب وما يرد عليه
منى/يابه اكيد غاطين بالنوم
دكها عليهم مره ثانية
فرح/اي اليوم اليه أسبوع بالسابع
اركضي صيحيلي أركان خلي يوديني للمستشفى راح أموت
منر/اي هسه أصعد أصيحه
بس أمي وين
فرح/بغرفتها اطلع من هدوم أسلام مال أنفاس جم قطعة ناخذيهن ويانه
ما ادري بحظي اجيب بالسابع
وكلشي مامحضرين هدوم للطفلة
منى/بس تعاي اكعدي هنا
بين ما اصحي اركان وانزلج ركض
فرح/ما اكدر اكعد روحي لايبه
وبطني تكطعت امشي روحي كعدي اركان
منى/صعدت ركض
لاكاني محمود بنص الدرج نزل يركض لابس بس برمودا ،، وابويه نزل وراه
ورفل طلعت من غرفتها تشد بحزام الروب
-دخلت للغرفة اركان نايم جفي
وماد رجل ،،وعاكف الرجل الثانية
ومدخل أيديه جوه المخدة
-اركان ،،اركان شو أصحى
اركان/يولي نعسان وبعد مابيه حيل
المعمل متوقف عن الانتاج حتى بوسه
بعد مابيه حيل أبوس لا تتحارشين ماافيدج
منى/خرب حظي شوف بيش يفكر
يمعود اركان يابوس يا معمل
أصحى فرح وشلت مي الطفل كوم بسرعة
اركان/صوجهم ليش ما شربتوا السطح
قبل الشته وهسه أتذكروا المي يبش عليهم
منى/اركان شبيك بس أصحى
فرح عدها ولادة راح تجيب
وكلهم موجودين جوه
كوم اخذها للمستشفى
-يمه شبيك خرعتني
فز مخروع وكف على حيله
اركان/كلشي ولا يكولولي مراه عدها ولادة
لو عدها نزف ،، اتخبل لان صارت بيه عقدة نفسية من هذا الموضوع
*امي من جابتني للدنيا متعسره ولادتها
وصاير عدها نزف وشايلين رحمها
ومتلاحكيها بشفاعة العباس
*ورسل ركضت بيها من مستشفى المستشفى
وتولات عليها سوالف النزف وراحت من ايدي
*صاحبي بالدوام زوجته خطية هم توفت بالولادة
-وهسه أجتني الصفيرة مالتي تكعدني من النوم شكو فرح عدها ولادة
هسه بس اشوفها تطلك يمكن أتخربط كدامها
-بين ما أبدل جيبي محفظتي وسويج السيارة
*اكول هي مو بعد وكتها لو اني غلطان
منى/اي سودة عليه الها اسبوع بالسابع
-بدل اركان ونزلنا ركض جوه
نزلت وراه اركض بيدي المحفظة والسويج
كلهم واكفين باب غرفة فرح
محمود/من ابويه دك الباب بقوة فزيت عبالي امي تخربطت
*بس من كالي فرح عدها ولادة تخبلت
هسه دخلت بالسابع ،بقيت اكل بروحي
خاف لان دفعتها وكعت صارت عدها الولادة
-نزلت اركض دخلت لغرفة فرح
اشوفها مفرفحة روحها وتتلوى وتبجي
//عيوني انتي بس حاجيني لا تبجين
بس كوليلي لان دفعتج صارت عندج ولادة
فرح/ما اعرف بس اني من الظهر عندي
لويات خفيفة وهسه فزيت نازل المي
محمود/يمه وينج
فرح/لا تصيح كاعدة تطلع من هدوم اسلام
للطفلة ناخذهن ويايه كلشي ماعندي الها
عادل/ها بويه نمشي للمستشفى
فاطمة /بس أصبرولي خلي ألملم جنطة هدوم للبنية وللطفلة ترى أنثولت ،
-يمه رفل ليش واكفة وتتفرجين تعاي ساعديني وطلعي هدوم لخيتج
اركان/نزلت وشفت ابويه واكف باب غرفة فرح من وصلت اشوف رفل وامي ومحمود
كلبي أنعصر من الخوف
-هاا فريحة عبالك الفيران مالتج مستعجلات على الجيه مو بعدلج شهرين
-دفوتي يالصفيرة لا دفعين حقج يابه
كلبج على أخيتج خو ما على اركان الفقير
منى/دخلت ركض للغرفة مو وكت شقى اركان ،، وهو جذاب يسوي هيجي
بس مبين عليه خايف وقلق
محمود/منى طلعيلي هدوم من يمج
نمشي للمستشفى غير
اركان/محمود سالفة المستشفى
كطن وخلي بأذنك ما اخذها للمستشفى لو هسه تجيب هنا وحدها
محمود/مو هي بكيفك المستشفى احسن شي أمنة ونظيفة
اركان/هسه أكوم ألغي واكل نعل فوكاها
يابه بالمستشفى الكح...يكصبنها من جوه
وهم يلتهب الجرح ويصير عدها نزف
وتروح من ايدينه
للمستشفى متاخذها لو على كص اركبتي
عادل/لا الا تتعاركون جدامي بالتفك
بدون حجي ماصخ هسه ناخذها للداية
وتجيب بسلامة وفضت راحت
فاطمة/اي وشبيها الجدة
مو هل أغلب النسوان يجيبن عند الجدة أعرف هنا الجدة ام نصير خوش جدة ونسوان تمدح بيها
اركان/ام نصير ،أم حقير
المهم أجيبها وداريها
وكوليلها ممنوع تكصبها
والعباس أكصب زردومها
فرح/خلصتوا عرك ترى راح أموت
وانتوا كاعدين تتعاركون
محمود/فرح ترحين تولدين عند القابلة
لو أخذج للمستشفى
فرح/وديني للجدة على الاقل تستر وداريني
المستشفى اخاف منها
-أخذني محمود بسيارته وراح ويانه اركان
وامي أجتي ويايه ،،
-يابه روحي طلعت أحس من الوجع والالم هوى ماكو ينكطع بصدري
من تجيني الطلوكة تضرب نهاية ظهري
ونهاية بطني وأكوم أرجف من الوجع
خرمشت ايدين امي سودة عليه
وكل ما أصرخ من تحضرني الطلوكة تسد حلكي بشيلتها
-وصلنا لبيت ام نصير الجدة بالشافعات
بقى محمود يفوت بالفروع ما طلع على الشارع العام
كسرنا الباب عليهم
طلعوا علينا أثنين شباب مسلحين
من شافوا حالة ولادة فتحوا الباب النه
ودخلونا جوة
-ورة شوية أجتنا الجدة مو حيل جبيرة
مراه وسطة عمر ، بيضة وشعرها مليان شيب
وكل ملامحها ناعمة
ولسانها حلو ، وملكاها طيب
هي قابلة مأذونة عدها رخصة طبية
وتشتغل بمستشفى اهلي
-دخلتنا بغرفة نفس غرف الفحص النسائي
اللي أشوفها بالرعاية ،، موجود بيها سرير
وجهاز مال قياس دكات قلب الطفل
وهواية غراض طبية ، وكلشي نظيف
-بعد ماسوتلي فحص وتأكدت عندي ولادة ،،خلتلي كانونة وعلكتلي بطل مغذي وخلت بي أبرة صغيرة
وره شوية والطلوكة كالت جيتج
أحس روحي طلعت الوجع ميرحم
المراه راحت جابت كلاص جاي وبطل مي لامي
وجابتلي كلاص شربت ،بس اني وين روحي طالعة هي مال شربت
اركان/بقينا كاعدين بالباب
يمكن ختمت القران من الخوف
انوب محمود قلقني حرث الشارع روحه رجعة
-دكعد رحمه لجدك ناصر مو خبلتني
من القلق اني الي راح اجيب بدل فرح
محمود/لا تصير ملكوف خايف عليها
وكلبي معصور عليها وعلى الطفلة لان سبيعي
اركان/طلعنا شاب جايب بيده صينية بيها كلاصين جاي وماعون كليجة ، وبطلين مي
اجه الجاي بوكته الجو بارد
-وميكدرون الناس يدخلونا جوه
بيتهم كلش صغير ( مشتمل بنائه بالطول )
فرح/بعد ما بيها مجال توازيت كعدت بالكاع
على ركبي صرخت صرخة طلعت روحي
امي سدت حلكي بيدها
-ولج يمه راح أموت
المراه وامي رادن يصعدني على السرير
ماكدرت ،هي فارشة الكاع زولية
جابلتي مندر ونايلون جبير وخلتني على راحتي ، من لأخير لحد ما أستويت
ما شاء الله ايديها عافية ،ولسانها طيب
تصلي وتسمي وتشجع بيه شكثر حبابة
-الحمد لله بعد عناء ويه الطلوكة ولدت بسلامة
فرفحت روحي على البنية نسيت الوجع
بقيت اباوع عليها شلون الجدة وامي يلبسنها
الهدوم ،
-كلش ناعمة حتى ما تبجي ماعدها صوت
الجدة طوتها طوي طلعت بس خشمها وحلكها
-بعد ما أهتمت بيه وخلصتني وبدلتلي
ولبستلي هدومي النظيفة ،ولملمت كل الهوسة راحت جابتلي كنداغ دافي
-وزنت البنية بنفس ميزان الرعاية
كالت /وزنها كيلو و ٤٠٠ غرام
رادت المستمسكات حتى تكمل البيان
امي طلعت على محمود
-المراه خلتها بحظني أباوع عليها حيل ناعمة وصغيرة وخفيفة نزلت دموعي لان حسيت بيها نقص ،، حلكها حيل صغير ومتطلع صوت بالبجي سألتها// ليش ماعدها صوت !؟
كالت /لان سبيعي تنوص بالبجي ما تصرخ داريها الجو بارد ولفيها بكطن حتى تبقى دافية كون تحسبيها بعدها بطنج رادلها مدارة شهرين ترى صحتها وجسمها مو نفس الطفل الكامل
محمود/طلعت علينه امي تضحك
وبشرتي الطفلة وفرح بخير وعافية اثنياتهن بوست راسها على هاي البشارة الزينة
-واركان حظني وباركلي الصدك خفت عليه
صوفر وجهه والقلق واضح عليه
كلت راح يتخربط عليه وين اودي
-انطيت المستمسكات لامي
وكتلها تمسي الطفلة (أفراح )
فرح/المراه سجلت كل المعلومات
وسجلت اسم الصغيرة ( أفراح )
وكالت // بعد ٣ أيام تعالوا أخذوا البيان
اخذت أجور تعبها وياية (٢٥٠) الف لان بنية والولد تاخذ عليه (٣٠٠) الف
-امي لفت أفراح جوه عبايتها
والمراه رحم الله والديها ساعدتني وتمشي ويايه على كيفي ، وشايلة جنطتنا بيدها
وصلتني يم محمود وباركتله
ودعتلنا بالبركة والرزق والله يكفينا الشر
-رجعنا للبيت واركان كلساع وكال//يمه ليش ماتبجي الطفلة شو ما اسمع صوتها
فاطمة/يمه غير سبيعي ما تبجي هسه
بس تنوص من تقبط التاسع يلا تكوم تصرخ
اركان /يمه حلوه ينطلع بيها
حتى من هسه احجزها لاسلام
محمود/رجاء وبدون زعل ممنوع تحجون كدام الجهال ولا تطرقون هاي السالفة افراح محجوزة لاسلام
بطلوا من هاي السالفة والعادات التعبانة
محد يعرف الوكت شضام
هذوله أطفال وعقولهم خام
ويحفظون كلشي
وتبقى السالفة بالهم لحد مايكبرون
وتنعجن بكلوبهم المحبة
ومنو يكول يصيرون لقسمة بعض
وبعدين يتعذبون
واحنا نشيل خطيتهم
وهم يبقون يشعلون بينا
اركان/على كيفك يمعود أكلتني بكشوري
قحط بنات لو ما هي زركة جان سويت
خليها محمضة على كلبك محد يكلبها
-وصلنا للبيت
بس شنو غديت خركة من التعب والوجع والنعاس
-تلكاني ابويه بوسني وتحمدلي بسلامة
-ومنى اجتي حظنتني تبجي وخايفة عليه
-ورفل بوستني وباركتلي
-امي نومتي يمها بغرفتها
ماقبلت انام بغرفتي
تكول/ نفسه مايصير تنامين وحدج
-جابوا الصوبة بغرفة امي
وكلهم اجوي يباوعون على افراح
امي كشفتها وبقت تتفحص بجسمها
تكول /خاف بيها زيادة لو نقص بجسمها
اسم الله ،، يمه هلكثر صغيرة وناعمة
خلف الله على الهدوم نافشاتها شوية
-اريد أنام بس ما اكدر عندي مغص
يروح ويرجع ،محمود نطاني مكسن الآم
-امي عدلت مهد أفراح
وهي كل هدومها وغراضها مالات أسلام
خطية كلشي ماعدها ولا مجهزيلها
عود كلت من أطب بشهري أجهزالها
الحمد لله المهم عايشة وتشتم الهوى
-امي خلت جوة مخدتها سجينة صغيرة تبعد عنها التابعة
وخلت كسرت خبز للأمان حتى ماتفز بنومها
ولفت بكلينيكس شوية شكر وتمن لرزقها
وخلت حلقتي الذهب بكماطها للبركة
ودنبوس جبير وهاي الخضرمة ام سبع عيون عن الحسد
-وأنطتني اليه سجينة أخليها جوه راسي من أنام من أروح للحمام والتواليت أشيلهه ويايه تبعد عني التابعة
-ومن بطني تلويني بس أجكها براس السجينة من وره الهدوم على كيفي يروح المغص
-امي كالت /رضعيها للبنية ترى ميطلع صوتها وتبجي
امي علمتني شلون ابدي ارضعها
بس المصيبة متعرف ترضع وحلكها صغير
شكثر حاولنا وياها ماكو متعرف
كمت ابجي عليها لان تحرك بحلكها وتنوص
بس متعرف واحسها جوعانة
-امي صاحت على محمود
فاطمة/يمه هاي شلون البنية جوعانة
وماتعرف تاخذ صدر امها وتنوص
محمود/هي خلي تعصر الحليب بحلكها
وبالذات الصمغة تفيدها وتقوي عدها المناعة
فرح/تعبت احاول وياها وماكو
وامي كالت /البنية فجوجها باردة
وماتعرف ترضع ومو زين تبقى بدون رضاعة
راح اسويلها كنداغ واجي
-اجه محمود وكعد يمي يعلمني شلون ارضعها حاولت انزل الحليب بحلكها
بس متعرف تبلع وتنوص تحرك بحلكها
-أجت امي واخذتها مني
تخليلها كنداغ هم متعرف تبلع
شبعت بجي شلون هسه خاف مو زين عليها تبقى بدون رضاعة شنو قابل تبقى جوعانة
-كام محمود جاب صحن مال جاي
وقطرات مال أذان يصير لون شيشة جوزي
والقطرة بداخلها طويلة بيضة كزاز شفافة ومرقمة عقمها وجابها نرضعها بيها
-عصرتلها حليب بالحصن
ومحمود يسحب بالقطرة ويخلي بحلكها
شكد حاول وياها يلا شويه شربت
-بعدها طفيت ونمت لان هواي تعبانة
منى/سبحان من خلقها ونفخ بيها الروح
ناعمة وزركة وكلها شعر
وملطشة بالحظينة
حسيت بيها نقص او خلل بس ما حجيت
ما تبجي بس تنوص ونشوف حلكها من يتحرك
شكثر حاولو وياها يلا اخذت الحليب
رفل صعدت فوك ،
محمود وابويه نامو بالهول ،
واركان يصعد وينزل
اني هم غفيت يمهن
-فزيت وره ساعة اكثر الكل نايمين
اباوع هاي الطفلة تحرك بحلكها
سويت نفس ما سوه محمود وقطرتلها حليب
وره شوية وهدأت
-كمت وصعدت فوك اخذت تلفون اركان
واتصلت على ابويه باسم وبشرته بولادة فرح
-اخذت ملابس نزلت غسلت
ومن طلعت بس لفيت شعري
لملمت البيت بسرعة وسويت ريوك
كعد اسلام يريد ممية سويتله
رجعته يم امي لكيتها هسه كاعدة
وهو شاف الطفلة لو تخبل
حار شيسوي عباله لعابة
كلساع وماد اصبعه يتلمس وجهها
لو خلوها بحظني ،، لو يريد يلزمها
فرح/كعدت على لجة اسلام
يريد يخلي افراح بحظنه
وامي خلتها بحظنه بس كون يسكت
محمود/يمه وخريها من حظنه وممنوع
تسولفون وياه بالموضوع السولفنه بي
فرح/امي هم وخرتها من حظنه
تكول /حجي محمود صحيح
الواحد ما يعرف الدنيا شضامتله
فللتها وبدلت ملابسها وتسولف وياها عبالك
وحده جبيرة
-كمت للحمام غسلت وبدلت ورجعت لفراشي
كلنا كاعدين بغرفة امي وتريكنا سويه
اركان مخلي اسلام بحظنه
ومنى كاعدة بصفه
ومحمود كلساع مباوع بوجه افراح ويبتسم
امي وابويه فرحانين بلمتنا وكعدتنا سويه
-محمود اخذ امي وراح للسوك
يشترون هدوم وغراض واحتياجات لافراح
-واسلام شيب كلب منى
يريد يشيل افراح ،،
واركان عاجبه المنظر خربان من الضحك
يكول /نفس ما عمه حجز مريته من الصغير
هو هم يريد يحجز مريته
يابه حتى هاي سالفة طلعت وراثة
-رجعوا امي ومحمود من السوك
بس مادخلوا علينا بقوا كاعدين بالهول
وبعدها غسلوا ورتاحوا يلا دخلوا
امي تكول/ ميصير الواحد يجي تعبان من بره
ويدخل على طفل نفاس يبقى يون بليل وميكدر ينام يندار التعب عليه
-وأذا أجه واحد تعبان من بره ودخل على الجاهل ،، نشيل الجاهل هو بكماطه ونخلي فوك جتاف الشخص حتى لا يتحول بي التعب ويبقى ملهود ويوون
-امي شالت افراح وخلتها فوك الغراض الجديدة علمود لا تخورس وتتاخر بالحجي
لازم اي شي جديد نجيبه للبيت
أنمرر الطفل من فوكاه
احنا العرب هاي عاداتنا وتقاليدنا
-واذا الجاهل بقى يلج وماينام بليل
ناخذ قطعة هدوم من عنده كون لابسها
ونعلكها بكرن الجبش (الخروف)
هو مار بالقطيع مال طليان
ونكول /ياعجة أخذي اللجة
-واذا ما سكت الجاهل وبقى يبجي أندخله بين حزام الرشاشة ،، والرشاشة نفسها
(( هذا الشريط او الحزام الي يصير
بالرشاشة العسكرية حتى يشيلوها الجنود على جتفهم هو هذا )) أندخل الجاهل من خلاله ٣ مرات ونكول /هَوود وتخورس وألك الامان
-وأكو جاهل أسم الله تصير بي لجة ويبقى
يبجي ليل نهار
هذا نجيبله هاي الخنفسانة السودة المدعبلة الصغيرة ،، ونشدها بوصلة ونخليها بالمهد
شوكت ماتموت هو يسكت وتروح من عنده اللجة
-قبل الغدة وصلوا اهلي شكثر فرحت بجيتهم
وامي فرحانة بشوفة افراح بعد صارت جدة
وابويه طاير من الفرح
كلساع وكال /وين عيون جدها خل أشوفها
عندي ٧ بنات والله رزقني بالثامنة
-وابويه عادل يكله/ لا هاي مالتي اتسجلت بسمي عود اوليد هالة اخذه الك
وابويه باسم يرد عليه /افراح اقرب اليه من اوليد هالة ،، شلون نحلها هسه
لو ترجع وتشيل يمنا
لو تفرغلي طابق الفوك اشيل يمك
وابويه عادل كاله/عين غطة وعين فراش
-نزلت رفل وسلمت على امي والبنات
ونزلت وياها ملابس جاهزه لافراح
بس بيضات مابيها الوان بعدها بجيسها
-بس طلعت امي لفتهن وخلتهن بجنطة هدومهم // عينج منها ،وممنوع توكلين لو تشربين البنية لو تلبسيها اي شي من عدها استغفر الله كلشي تسوي
الله يكفينا شر النفوس
-ابويه للعصر رجع للبيت لان عنده شغل
امي بقت يمي يومين
ومن رادت تروح رادت تاخذني وياها
بس محد وافق لابويه ولا امي ولا محمود حتى منى ما قبلت
كالوا /قابل احنا ما نداريها ولا نهتم بيها
-بهاي اليومين شيبنا من وره افراح
نحير شلون نشربها حليب
محمود بالدوام وكلساع وخابر //ها رضعت لو بعدها
-واركان يصعد وينزل
هو أستلم اسلام شايله لان يهمش أفراح
وهم سأل/ ها ما رضعت بعدها
-منى تركض هي وأمي
أيد بالبيت وأيد للنسوان التجي تبارك
-ورفل هم تساعدهم
وتجي تشوف افراح
ومرات تخليها بحظنها
وتكمطها ، وتسولف وياها وتناغيها
حتى بليل تصعد متأخرة تبقى كاعدة ويانة على لمتنا وسوالفنا
كل احنا النسوان نجمع بغرفة امي
والولد وابويه يكعدون بالهول
-مصيبة افراح بجهة ما تعرف ترضع
وبالشافعات ندخل الحليب لبطنها
ولجة أسلام بجهة ثانية يريد يشيلها عباله لعابة ،،منى تفكنا من عدنه الظهر وتصعده فوك
-امي خطية كلشي ما جابت لافراح
لان اتفأجوا مثل حالنا بجيتها ،
نزعت محبسها وخلته بيدي هدية ولادتي ومباركية افراح
عاد رجعهن ابويه عادل للديرة
-محمود يجي من الدوام بس يرتاح شوية بالهول ويدخل علينا يكابل افراح ويكعد مايشيلها يخاف
يكول //ترى حيل ناعمة كلها بجف ايدي
اخاف أشيلها لا املص منها ايد لو رجل
ما اعرفلها لا أخربها
-واركان يضحك عليه يكولي
//يعني انتي مقتنعة بيها
على كل هذا السمن وهاي اللشة كلت راح تجيب دينصور طلعت من صدك فارة
وجماله سودة ولاطشة بالحظينة
-أنوب يضحك ويه محمود يكله/
*اكلك محمود بس سؤال هاي افراح
مشروع كامل لو نص مشروع
صدك المقاولين العراقيين فاشلين
وكل مشاريعهم على النص
-ومحمود بصفه ممية أسلام فارغة شمرها عليه//ألزم السانك البنات منا
وهو يرد عليه يكله/قابل جذب مقاول مو كفوء
شغلك كله غش وخداع هاي تالي شغل
مواد البناء ألزركه كنالك مو خوش نوعيه
*محمود كام عليه يريد يخنكه وهو شمر
أسلام بالكاع وطفر يركض طلع بره
-وهاي بسلامة اليوم الثالث لوجود
افراح بيناتنا ،،بس ماترضع شلعت كلوبنا
وامي لافتها لف ومدثرتها الجو بارد نخاف عليها ،، حتى سبح ثالث يوم مثل كل جاهل ما قبلت تسبحها
-وامي دكت يمي راس بصل دك بيدها
وأنطتني اللبة الصغيرة الي تصير بطن الراس
وبلعتها مو كرطتها لا بلعتها مثل الحباية
وأكول /حرمت أنفاسي عليه وعلى غيري
حتى زفرة دم أنفاسي متأذي أي جاهل خطية
حتى لا يشتم ويتأذه ،وباقي راس البصل امي
شممته او قربته على خشم أفراح ولفته
بعلاكة سودة وشمرته بالزبالة
-بعدها امي فللتها وبدلت حفاظتها
أصغر قياس حفاظة صايرة عليها هدوم كاملة واصلة لأباطها
شو امي بقت صافنة عليه ومركزة
فاطمة/محمود يمه اذا ابوك كاعد
كوم صيحه اليه
محمود/خير يمه شبيج خوفتيني
فرح/كام محمود يصيح ابويه
واني كتلني الخوف اشوف امي شلون تباوع عليها وصافنة
-من اجه ابويه امي كالتله//عادل يجوز اني متوهمة ما تشوف البنية بدالي زين
كعد ابويه وتربع وبقى يباوع عليها
جان يكول /ربي عفوك ورضاك
-كمزت من فراشي واباوع عليها
شو طفلة عادية ما بيها شي
محمود/يابه فدوة اروحلك شبيها البنية
تراها طفلة حالها حال بقية الاطفال
عادل/اني مو شاك وأنما متاكد
بنتك (مكنفذه ) شوف جلدها
فرح/ابويه جر جلد بطن أفراح بصابعه
شلون الاستيك صاير جلدها
محمود/ يمه البنية صاير بيها جفاف
و من أسألجن تكولون ترضع
كومي أخذها للمستشفى
فرح/هو كال مستشفى واني خرطت العافية
// ليش تاخذها للمستشفى شبيها
محمود/من فهاوتجن الطفلة صاير بيها
جفاف
عادل/يول أفهم هذا مو جفاف بنتك مكنفذة
دورلك طبيب مال عرب يعالجها
انتم بالمستشفى ما تعرفولها تكولون جفاف
محمود/يابه ما امشي بهذا الحجي
اخذها للمستشفى يخللوها مغذي
ومحاليل طبية خاصة بتغذية اطفال الخدج
ويخلوها بحاضنة خاصة وتستعيد عافيتها
فرح/بويه فدوة اروحلك شنو مكنفذة
فاطمة/يمه يعني مشتمة أو كارفة
فرح/بس ما تزوع او عدها سهال
فاطمة/لا يمه مو مشتمة لو كارفة ريحة قوية لو نجاسة لو خمة دم نفاس مراه
البنية مشتمة ريحة لحم كنفذ (قنفذ)
وهاي سالفة خباثة لان ريحة لحم الكنفذ تعم على جميع طفل رضيع يشتمها تيبسه
وتكتله ومحد يعرف علاجه
محمود/أستلم الخرافات أنوب لحم كنفذ
تكومين ويايه اخذها للمستشفى لو اوديها وحدي
فرح/ابويه ماقبل ناخذها للمستشفى
كال//نوديها لطبيب عرب
بس محمود قفل الا ياخذها
كمت بدلت ملابسي واخذناها اني وامي ومحمود واركان
رحنا لمستشفى الكاظمية مال اطفال
دخلناها شافها الطبيب كال /جفاف حاد
حولها للطابق الفوك وخلوها بحاضنة حارة
وبيها ضوه قوي
سودة عليه من اجه الدكتور يفحصها
السماعة الطبية بكد صدرها
-أنوب أجه عليها شاب يريد يخليلها كانونة ومحلول تغذية طبي
بقى يدور بيدها ساعة على مكان يخليها ماكو وريد ،، خلاها بيدها بس مانجحت
وهي بس تفتح بحلكها تنوص متأذية
طلعها كال /وريدها ضعيف ماكو
انوب خلاها برجلها اليمنى وهم ماحصل وريد وهي تنوص متأذية الكانونة بكد رجلها
-شبعت بجي عليها
وامي تبجي وياية
محمود مهزوم بره الغرفة ما عنده كلب يشوفها
واركان يفتر يمنا يروح ويرجع يباوع عليها
انوب الشاب حاول على رجلها اليسرى
وهم ماحصل وريد
-وما اشوف الا اركان هجم على الشاب وجلب بي من ياخته وصار العياط والصريخ بفلس وناس تفازع
-ومحمود دخل يركض اسم الله عباله ماتت
وفازع اركان عن الشاب
وهذاك هم يغلط ويتجاوز بالحجي
اركان/من أنعل أبوك لا بو العينك هنا
ابن الزمايل طفلة بكد جف ايدي وناعمة وترفة ماتعرف تخليلها كانونة كول ما اعرف
عليش زرفتها تزرف سويتها منخل
-اجوي الشرطة مال مستشفى يريدون يطلعون اركان بالقوة
هو بس طلعلهم مالته الباج ،
ومحمود هم طلعلهم الباج
شو ذوله بدولوا بساع وبقوا واكفين
ويسألون شبيها افراح
وليش صارت العركة وشنو السبب
وره شوية راحوا
-محمود راح جاب بنية حتى صغيرة بالعمر
من مره وحده بس خلت الكانونة نجحت بيدها وعلكتلها المحلول
-بقيت يومين بالمستشفى واسم الله الحالات الشفتها
اللهم أجرنا بحق عرش السموات والارض
حالات تشيب الراس ،،
-محمود يروح ويرجع علينا من الدوام
اني وامي نايمين وياها
واركان يروح ويرجع للبيت
العصر أجاني أبويه ،،
عادل/وينه الطبيب اليقيم حالتها
اركان/يابه هسه اشوف وينه
رحت أفتر بالطابق شفته بوحدة من الغرف
يجيگ بطفل أنتظرته وجبته وجيت على للغرفة البيها افراح
عادل/بويه الله يرضى عليكم اني جد البنية
ماتسولفلي شنو حالتها بالضبط
الدكتور/حجي الطفلة مصابة بالجفاف الحاد
وصار يومين من دخلناها للمعالجة الطبية
وماقصرنا وياها بالعلاج ومحاليل التغذية
وبصراحة اكولها الك ،، للاسف ماكو اي أستجابة للشفاء ،، حنبقيها اليوم هنا
والباجر نشوف بلكت أكو تحسن
واذا ماكو خلوا عينكم بعين الله
عادل/بويه ربك هو أحسن طبيب
عاين على البنية زين واحفظ شكلها واعراضها ومن يجيك رضيع ثاني نفس حالتها لا تستقبله كول لأهله// اخذوا لطبيب عرب
طفلكم مكنفذ يعني شام ريحة لحم كنفذ
تكسب بي أجر وثواب يابويه احسن ما يموت جوه ايدك ،، وهذا طبكم خلي ينفعكم لان تضحكون بي على العالم وتموت بسببه الرضع وهم لا حول ولا قوة عدهم
-اركان بويه خرجهم من المستشفى
اني اعالج البنية ،وخلي اخيك بعناده يبات
فرح/محمود ماقبل على ابويه لان هيجي حاجه الطبيب
اركان طلعنا من المستشفى على مسؤوليته
عادل /انت لا تدخل الك الصافي
بقوة الله بس يطر الفجر اخذها هي ، وامها وامك ونمشي لبادية السماوة
على أبو أيوب هو عنده علاجها
عمي نوري متواصل وياه كايله// جيبها دواءها عندي
فرح/رجعنا للبيت ومحمود ضايج
مكابلها وكاعد بس واحد يكله شبيك يبجي
وكل البيت متكدر وضايج عليها
المسكينة حتى بجي ما تبجي صوت ماعدها بس تنوص
منى/يومين واني ابجي على حظ فرح اختي
وانوب محمود سمى بنتها افراح
وهي من هسة مشلوعة كلب ونوموها مستشفى استغفر الله أسماءهن مو مثل حياتهن
-يومين باتوا بالمستشفى
واني روحي طالعة وافكر بأختي والطفلة
واركان أيدور أحضان مستغل فرصة محد اكو بالبيت ،، محمود بالدوام
وفرح وامي بالمستشفى
وأبويه بشغل
ورفل بغرفتها
تكول مراهق مو زلمه ومتزوج مرتين
ومخلف ولد ،، كلساع وشاحطني
حتى اخاف اعارض لا يعجني وانوب منو يفكني من ايده
-يروح ويرجع عليهن للمستشفى
ويجي ضايج اسأله يكول /نفس وضعها مو زينة
عاد ابويه راح جابهن واجه وقرر ياخذها للزلمه البدوي يعاجها
-استغفر الله ربي عفوك ورضاك
هي ناعمة حيل بكبر جف أيد الزلمه
وانوب زركة وكلها شعر ،
وجلدها مطرك جلد العجوز جنه لأستيك
ولاطشة بالحظينة حتى كيلو مابيها
وانوب تكسر الكلب تنوص أتنوص عود تبجي
فرح/شبعت بجي عليها ،وامي ماتقبل ابجي
تكول/ مايصلح انتي نفسه وتبجين تعمين من وكت
ويضعف نظرج بمرور الايام
بس تعال اليجب الصبر ويسكت عيوني
( 2 )
-محمود اجه وأنجطل بغرفة امي
وأنجطل يمها وسحب مهدها عليه
خلاها بحظنه وبقى يباوع بوجها
محمود/يابه هذا الزلمه صدك عنده علاج الها
اذا صار بيها شي اموت وراها
فرح /غطه عيونه بيده وشهك يبجي عليها
واني ماصدكت هم كمت ابجي
عادل/كول يالله يابه
ربك رزقك ومارزق غيرك وهو اكرم الكرماء حشاه ما ينطي شي ناقص
وهذا أختبار وأمتحان يقيس بي صبركم
وان شاء الله بس يطر الفجر نمشي للبادية
-يابه تكسرت ظهورنا الطريق صار شطوله
أدك بينا السيارة وبعدنا ما واصلين
انوب وصلنا صحراء عينكم وماتشوف
ابويه هنا بدأ يدلي بمحمود على الطريق
شفنا الناس البدو كلمن خيمته وحلاله
بعد هذاك المشي الزين بالسيارة وصلنا للزلمه ابو ايوب
-خوش زلمه تلاكانه وسلم علينا ورحب بينا
واجتي مرته هم سلمت علينا
دخلونا يمهم بالخيمة مالتهم
خيمة جبيرة وبداخلها غراض بس كلشي مسفط ونظيف
-ضيفونه حليب مال نوگ
طعمه طيب وثخين ودسم
وأطيب من حليب الهوش
عاد الزلمه كال /ابو محمود عن الاتفاق السابق الي جرى بيناتنا للأمانة اشتريت بذهبكم ثلاثه نوك صغار العمر
وحده رحول ،،وحده خوار ،،وحده ذلول
وزاد من ذهبكم خاتم وكنت ناوي ارده لك
لكن سبحان من جمعنا بغير ميعاد
عادل/لا تحلف ابو أيوب صادق وكلامك ميزان
وهل أجيتك ومعتنيك مره ثانية
تشوفلي هل الجاهلة هاي وتعالجها النه
ابو ايوب/ناوليها اليه يل شكحة أنتي أمها أكيد ،، العيون تهمل وبالية من القهر
سهلة سالفتها وأنا عمج
فرح/ أخذها الزلمه وبدا يكلب بيها
ويجر بجلدها ضحك وجان يكول
//هل جاهل مكنفذة وبسالفة خباثة بعد
من هي بداخل أرحمج كارفة زفرة دم او دهن لحم الكنفذ
-انطاها لمرته ام أيوب كاللها //عالجيها
وأنوب كال /وثمن علاجها واصل لوجه الله الكريم هي جاهل ومحتاج شفاعتها يم رب كريم
اخذتها أم أيوب وبوستها وكالت //تعالن معاي
كمنه اني وامي وياها بنفس الخيمة بس رحنا بطرفها
والزلم كعدوا لوحدهم
-طلعت علاكة مال قماش
وطلعت من عدها شلون قطع البيتنجان اليابس
سألتها //شنو هذا ؟؟
كالت /هذه شرايح لحم الكنفذ
عمج ابو أيوب يصيد الكنافذ ويكنصلهن
بليلة كمرية من يطلعن بهل چول
ويذبحهن ذبح الدجاج بطريق الاسلام
ويصلخ جلدهن
واني انظف بطنهن وأملحهن وأيبس لحمهن
نستخدمه علاج لمثل حال أبنيتج
-كامت المراه وأخذت شريحتين
وخلتهن بجدر صغير وخلت عليهن مي
وخلته على الجمر بطن المنقلة
-اباوع عليها حضرت جدر جبير
وخلت بداخله بطنج وشويه ملح
وجابت الكيتلي الموجود على الجمر بي مي حار وكاسرته بمي بارد ودفته
وصار مي الجدر بطنج وملح
-نزعت هدوم أفراح وغطتها بالجدر ابو البطنج ،، يمه كلبي كام يوجعني اخاف عليها وهي ولا تهتم
امي انطتها الهدوم النظيفة ولبستها الها
ولفتها بقطن من عدهم
كالت /حتى لاتبرد انتو الحضر ماتحملون مثلنا البرد والحر
-بعدين كمطتها ولفتها وانطتها لامي
وغسلت هدومها الجانت لابستهن بمي البطنج وشرتهن
وكالت/حت انتي من تردين لبيتج
سالمة غانمة اغسلي بمي بطنج
وكل ثياب الجاهلة غسليهن بمي بطنج
ان شاء الله ثلاث ايام وتشوفين الفرق بيها
-فار الجدر اللي على الجمر
وجابته يمنا مابي استكان مي
كالت/ اكلي شرايح اللحم
ماكدرت نفسي ماتقبلتهن
عاد كالت/أشربي بس الماي لخاطر علاج بنيتج ،،شربت شوية مي عادي مابي طعم غريب
وهي بدت تقطر بحلك افراح من هذا المي
بالخاشوكة مال الجاي ،،يمكن شربتها لو
٣-٤ خواشيك
-وبعدها كامت ودفنت الباقي بالكاع
كالت /ريحة لحم الكنفذ الي يتفور بنفس
هاي الطريقة توكع وتيبس كل جاهل انفاس ورضيع لان تعبر ريحته مسافات طويلة
انتم بغداد ما تعرفولها
بس يشتمها شكو عدكم جاهل بالديرة
وتبقى حسب مناعه الرضيع
اكو شمامه يصير قوي ويتأذه
واكو قليل
واكو ما يتأثر بي
وبالطب عدكم يسمونه الجفاف لان يصير بعض الجهال سهال وزواع
وبعضهم يتيبس جلده نفس حال بنيتج
-يارب شافي بنتي وكل جهال العالم
يمه احترك كلبي عليها
عاد هي كالت /الحمد لله غدى شرها
بعد لا تخافين عليها
-كمنا ورجعنا يم أبويه ومحمود
جابولنا غده صلوات على النبي
صينية شكبرها هبيط لحم غنم ولبن
-من خلصنا الغدة والجاي
الزلمه رجع المحبس لابويه
ابويه ما قبل كاله /هدية مني لاخيتي ام ايوب
عاد هو صاح/ام أيوب أخيج كرمج
كرمي وجيبيلي حليب ناكه فطير
ابو أفراح بعده مطعوم والشر تارس عيونو.....
شكرا لزيارتكم عالم روايات سكيرهوم
