رواية بنت الكهوجي الفصل الثامن والعشرون بقلم احمد
ياقوت : دا نحجي وصارت هوسة خارج البيت وصار صوت سيارات وارتفع صوت الزلم ومجرد سمعنا صوتهم عرفنا انو صاير شي
رفعت نفسي على اطراف اصابعي شفت سيارات هواي گدام المضيف ومتجمعين ابو تميم والعشيرة گدام باب المضيف
ياسمين : يا ربي سترك منو ذول
اية : اكيد من طرف الي صوبو تميم جايين يسوون گعدة لو يطلبون عطوة
رشى : هسا اخابر الولد واشوف
اية : اي استعجلي
ياقوت : طلعت تيلفونها رشى وخابرت زيد گاللها العشيرة الي صوبو تميم جايين عود اشوف شيصير واخابركم وسكرت منو
تميم : من گعدت بالستشفى گالولي اهلي ان زيد من دفر الولد مكسور عندو ضلعين ومن شافو اهلي اجو وكلهم بايدهم اسلحة ماگدرو يحجون لو يسوون اي شي
بعدها طلعت للبيت لان ما تحملت گعدة المستشفى وجان ابوي مقرر يسوي عزيمة على طلعتي بالسلامة وهم علمود ينجمعون الگرايب كلهم
باليوم الي صارت بيه العزيمة رحت للمضيف حطولي فراش بيه وتمددت بيه وبعد الغدا بشوية سمعت صوت سيارات خارج المضيف
طلعو الموجودين يشوفون شكو واني بحكم اني ماگدر اتحرك بقيت انتظر ومن دخلو عرفتهم اهل الولد الي صوبني
تصرفنا احسن منهم رحبنا بيهم وضيفناهم ومثل ما يگول المثل ليس من الحكمة ان اعض الكلب الذي عضني
الشيخ : الحمدلله على سلامتك شيخ تميم
تميم : الله يسلمك
- اعذرنا عالي صار جانت ساعة غضب وما تحكمنا باعصابنا
- شيخنا احنا صرنا شيوخ لان نتحكم باعصابنا بمثل هالضروف لو اني غلطان
- حشاك من الغلط بس من تذكرت وضع ابني وحسيتك جيت تبرر للي صوبو فما گدرت اتحمل الموقف
الجد : بس تهجمكم على تميم بديوانكم وهو ضيف يمكم كلش جبيرة ويمكن لو ما واصلين احنا جان كتلتوه وخلصتو عليه
- اعرف شيخنا شتحجون حقكم على راسنا واحنا جاهزين لاي شي تطلبوه
الجد : الي يطلب هو تميم مو اني لان هو الي تصوب
- واحنا جاهزبن لكلشي
تميم : اول شي سالفة حازم الي دعم ولدكم تنسوها وتنسون حازم من الاساس واي شي يصير للولد انتو تتحملون مسؤوليتو
- هاي هي اعتبر نسيناه
- الشي الثاني تنتقلون من الانبار وتشوفولكم غير ديرة تسكنوها
- شنووووو
تميم : بقى فاتح عيونو ومصدوم لان ما توقع انو اطلب منهم ينتقلون وخصوصا ان هو شيخ العشيرة وعشيرتو كلها ساكنة يمو يعني لازم كلهم ينتقلون
- بس يا تميم اني عشيرتي كلها هنا واراضينا وشغلنا كلو هنا وين نروح وشلون نعيش
- بالنسبة لعشيرتك ما عندي اي مشكلة وياهم بشرط واحد وهو انو ما يبقى منهم احد من الي هجمو علي بالمضيف باقي العشيرة مو مشكلتي
اما وين تسكنون شنو تشتغلون هاي انتو تدبروها واراضيكم مسموحلك انت فقط تجي ترتب امور الاراضي ايمتى ما تحب
- بس هيج ما يصير
- وهجومكم علي ما يصير فانا گلت الي عندي وبكيفكم بعد
بقو يتناقشون هو وجدي وابوي ويحاول بكل الطرق ان نلغي شغلة رحيلهم من الانبار بس اني جنت مصر على هالشي اصرار مو طبيعي
صحيح صعبة الانتقال من مكان لمكان بس اني اريدهم يطلعون خارج الانبار لان هيج شخص راح يعكس سمعة مو حلوة عالمنطقة
تخيلو يكون متخالف ويا واحد من الوسط او الجنوب ويتعدا عليه بمضيفو وهو ضيف يمو غير يخسف سمعة الانبار لاسفل السافلين
لهذا السبب ما اريدو يبقى بالانبار ومن يروح لغير مكان ماراح تكون عندو الجرأة او القدرة انو يتهجم على احد لان عشيرتو ماراح تكون كلها وياه
من شافو ماكو فايدة ترخصو وراحو وباوع علي جدي گال هيج راضي كلتلو اكيد وابتسم لان يعرف ان الموضوع مو شخصي ويا الشيخ
عمي : بسبب قلة عقلو وتهورو دمر نفسو وفوگ هاي ما گدر حتى ياخذ حقو من الي اذى ابنو
ابوي : يستاهل علمود مرة ثانية يعرف يتصرف ويعرف انو مو كلشي يجي بالقوة
الجد : زيد
زيد : جدي بروح ابوك اذا تريدني انتقل انقلني لبغداد
- شمعنى بغداد
- جدي غير بيها العافية وهم اخطبلكم عافية وياي
- بمزح .. يعني بيها عجايز حلوات
- اووووووو غير يطگن بالگاع بس تغمزلك بعينها تبيع تميم والي خلف تميم
- ههههههههههه هاي هي اتفقنا حضر نفسك
- جاهز
- المهم تروح هسا تنطي خبر لاهل حازم ان مشكلتهم انحلت واذا يريدون يرجعون لبيتهم توديهم لبيتهم وتتأكد انهم ما محتاجين شي
وانت رشيد تروح للمستشفى وتتأكد من صحة حازم اذا يگدر يطلع تسجلو خروج وتنطي مصاريف المستشفى والعلاج كلهن وتوصلو لبيت اهلو
رشيد وزيد : تمام جدي
تميم : رشيد جيب وياك السويج من حازم علمود نوصلو سيارتو للبيت
- تمام من ارجع يكون وياي إن شاء الله
تميم : راحو اثنينهم وجانو العشيرة متجمعة فبقينا نحجي بمواضيع مختلفة واكثر شي حجينا عن الليلة الي تصوبت بيها
تعرفون بهيج مواقف الناس تحب تسمع السالفة بكل تفاصيلها ومن حجيت اني دفعتهم لو ضربت ابن الشيخ شبعو ضحك
واكو كم واحد من ولد عمامي يعرفوني ما اجذب بس يجذبوني بالشقى على گولتهم تلطيف جو وهيج صارت الگعدة بعد احلى
زيد من وصل اهل حازم اجى يمي وشاورني گال اهل مازن ماكو شي ببيتهم علمود ياكلون وبصراحة الفلوس الي وياي ما يكفن اشتريلهم شي
گلتلو روح عالبيت اخذ شگد ما تحتاج واذا ما تعرف شتاخذ خلي امي تگولك گال تمام وراح
جدي : شعندو زيد
تميم : ماكو شي جدي سالفة وصيتو بيها
- مو توگعنا ويا شيخ ثاني
- هههههههههه يا شيخ جدي هو اني اگدر امشي علمود اوگعكم ويا غير شيخ
ياقوت : من خلصت الگعدة وراحت السيارات اجى زيد وطلب اختو يارا وخلاها توصل خبر لام حازم ان موضوعهم انحل ورشيد رايح يجيب ابنهم
وقتها ما تتخيلون شگد فرحت امو خطية صارت تبجي من الفرح وطول الوقت تدعيلنا ان الله يوفقنا ويفتحها بوجهنا لان گدرنا نساعدهم
ودعتنا كلنا حتى اني واية ما طلعت قبل ما تودعنا وتبوسنا وتدعيلنا بالتوفيق وبعدها راحت ويا زيد وفرحنا كلش ان انحل موضوعهم
بعدها بدن النسوان ينسحبن شوية شوية ومن فرغت الصالة صفية خابرت زيد گالتلو ترا اهل الولد ما عندهم شي ياكلوه
طبعا بوقتها جان حازم داعم الولد قبل فترة ولان خايف من اهلو صاير ما يطلع من البيت وباقين يدبرون نفسهم بالمواد الي عندهم
اخير شي مو باقي اكل عدهم نهائيا وطالع بالليل على امل ان ماكو احد يشوفو ويجيب مسواگ لاهلو وطلعو ولد الشيخ ينتظرونو
ومن عرف بيهم دا يلحگونو منهزم باتجاه بيتنا علمود يدخل عند تميم والباقي بعد تعرفونو وامو وصلت هالكلام لصفية
ورا شوية اجى زيد گال للحجية على كلام تميم وراحت ياسمين جابتلو فلوس والحجية صارت تگلو على الاشياء الي يحتاجها البيت وهو يسجل بالتيلفون
من كمل القائمة راح واني وخوات تميم تساعدنا كلنا بتنظيف البيت ورشى وليالي استلمن مهمة الطارمة لان دمروها الجهال
قبل المغرب راحت زوجة الحجي والجدة لبيتهم وبقن البنات يمنا واتصل تميم عالحجية گال جهزولي فراش بالصالة
جابتلو فراش ياسمين وورا شوية جابوه مالك ورشيد وصلوه لفراشو وراحو لبيتهم وگالتلهم الحجية عالعشى گالو ما نشتهي
ياسمين وليالي ويارا تكفلن بالعشى واني جنت تعبانة كلش فگالتلي الحجية ابقى ارتاح يمها واجن يمنا اية ورشى وويا اذان المغرب اجى زياد
زياد : السلام عليكم
الكل : عليكم السلام
- ها بشر ولد لو بنية
تميم : توم
- جيري
الحجية : ليش ما رحت ويا اخوك
- يا اخو منهم
- زيد
- شسوي اروح وياه .. بس صدك وين راح هو
- راح يودي مسواك لاهل حازم ماعدهم اكل
- عاشت ايدكم والله يجزيكم خير
- واياك
- والله يمة مادري بيه جان رحت وياه اكسب اجر بيهم
- يلا خيرها بغير
تميم : زياد ما اوصيكم انت وزيد انتبهو الهم هاي الفترة زوروهم بين يوم ويوم وشوفو شيحتاجون بين ما يگوم ابنهم بخير وسلامة
- إن شاء الله لا تشيل هم
اية : مشتهية ارگص
- اللهم ثبت علينا العقل والدين
- ولك لا تخبث والله مشتهية ارگص
- ترا بعدني ما تزوجت
- عود بعرسك هم ارگص
رشى : هسا اشغلج احلى اغنية
شغلت اغنية رشى بتيلفونها وجان المغني يگول
زفوها بثوب الابيض .. مجنون اني خلوني
مجنون اني خلوني
ياريت مو شايفها .. جان اعميت عيوني
جان انعميت عيوني
هذا اكثر جزء بيها حفظتو من گد ما عجبني وصارت اية ورشى يرگصن وزيد عود يعيب عليهن بالبداية صار يرگص وياهن
بين ما خلصت الاغنية اشتغلت نغمة من هاي الي يرگصون عليها جوبي ودخلت ليالي للصالة بايدها الجفجير ماسكتو بالعرض وترگص
ولحگتها يارا وعالهوسة اجت ياسمين وتميم متمدد وحاط ايديه تحت راسو ويباوع لامو يگول الضاهر الخبال عدهم وراثة جماعية
وخلال هالخبصة وهالرگص اجى زيد باوع عليهم وهو مستغرب وسحبتو اية وصار يرگص وياهم وغمز لزياد واجو عالحجية ثنينهم
سحبوها من ايديها وهي تسوي نفسها عصبية علمود يعوفوها بس ما يفيد بيهم وتميم يگول ترا تريد ترگص بس مستحية مني
اني شبعت ضحك على موقفهم وگفوها ثنينهم وكل واحد ماسك ايد ورافعها ويهزها على اساس ترگص وياهم وتميم يشجعهم
اية اجت تريد تسحبني وامتنعت وتميم گال لا تجبريها لان اولا بعدني لابسة اسود على بابا وثانيا اخوانها موجودين مستحيل ارگص گدامهم
وثالثا اني من الاساس ماعرف ارگص وهم صارت شغلة خبال مو حفلة فاكتفيت بالمشاهدة ومن خلصت الاغنية رجعو گعدو
طفت رشى التيلفون وراحن البنات حطن العشى وگعدنا نتعشى ونحجي بمواضيع مختلفة الى ان صار وقت النوم
ياسمين : تميم وين تنام
- انام هنا مابي حيل انتقل من مكان لمكان
- مو علمود انام يمك خاف تحتاجني
زيد : نامي بغرفتج اني انام يمو
- مو خاف ما ترتاح بنومتك
- هو اني من اجيت للدنيا وشفت تميم اخوي ما ارتاحيت
- هههههههههه كل هاي متعبك تميم
زياد : اصلا جذاب هو يموت على تميم
تميم : انگلع لا بارك الله بيك
زيد : ما انگلع حبيبي اني ببيت امي شدخلك انت
تميم : اي مو هالة جانت تشتغل عمالة وبنت البيت
زيد : ها هالة تسمعين ابنج يطردني من بيتج
الحجية : ولك تميم ترا اطردك انت ومرتك اذا تطرد وليدي
زيد : ولج اموت على ربج
گمز عليها وباسها من خدها وتمدد وحط راسو بحضنها
ياسمين : عمة شدخلني اني الموضوع بين ولدج
الحجية : مو تعرفين لازم التهديد يكون زايد عن الحد الطبيعي علمود الشخص يخاف
ياسمين : وياج حق
ليالي : يلا تصبحون على خير
زيد : ها وين
ليالي : اجى حبيبي
زيد : اي بعد عمج فد مرة گولي صاحبي
زياد : وجان صاحبها وخذاها
اية : جان صاحبها وخذاها
زياد : انجبي اية شهالحجي
اية : هههههههههه عابتلك فوگ ما اشجعك
زياد : يا تشجيع لا والله تموتين عالمشاكل انتي
ليالي : المهم تصبحون على خير
الكل : وانتي بالف خير
وراها راحت يارا وبعدها رشى وراحن اية وياسمين جابن فراش لزيد واخيرا صار اكو هدوء بالبيت بعد هاليومين المتعبات
زياد : يلا تصبحون على خير
الكل : وانت بالف خير
زياد : ها اية ما تروحين
اية : وين اروح
- ما يجي صاحبج ياخذج
- لا هسا نايم يگول باجر الضهر يجي ياخذني
- حرامات جان خلصنا منج انتي هم
زيد : اگولك زياد
زياد : گولي
- لابس ستيل لو ذهب (يقصد گرون)
- لا حديد اصلي شرط ياباني
- هههههههههههه جيب لتميم جوز
تميم : دنعل يومكم زمايل
- ههههههههههههه لا تزعل الفلوس على زياد مو عليك
- ما يكون اسمي تميم اذا ما شويت على اذانكم بصل
- ديلا اسكت لك اريد انام اذا اسمعلك صوت اگوم ادفسك
- يصير خير ولك حيوان
جان تميم يحجي ومبتسم لان يعرفهم يتشاقون وياه بس للامانة تمنيت يكون مابيه شي اريد اعرف شيسوي بيهم بعد كلامهم هذا
اية شلون فد وحدة من شافت الكلام وصل لتميم انهزميت لغرفتها وعافتهم واني من راح زياد صعدت لغرفتي واني متفلشة
اخذتلي دوش احس التعب كلو نزل علي ويا الماي وطلعت احس مفاصلي متفصخة جففتلي شعري اية علمود ما اصخن واندحست بفراشي
بعدها راحت اية اخذتلها دوش ولان هي تعرف تستخدم المجفف فما احتاجتني واني غمضت عيوني وخلال ثواني اخذتني النومة
گعدت ويا اذان الفجر جسمي متشنج من التعب گمت صليت وگعدت اية علمود تصلي ورجعت كملت نومتي وگعدتني اية بال 8
گلتلها تعبانة ما اريد ريوگ ورجعت نمت ولاول مرة ابقى نايمة لل 12 الضهر بس گعدت منتفخة من گد مو نايمة من صدگ شبعت نوم
گمت غسلت وجهي ونزلت تحت جانت اية وياسمين بالمطبخ وتميم وامو بالصالة ورحت عند اية وياسمين
** تسريع للاحداث **
مرت الايام بدون احداث تذكر مجرد اهتمامنا بتميم والروتين اليومي ومگضية حياتي ويا ياسمين واية واكثر شي ياسمين لان اية ملتهية بالدراسة
اهل حازم بقو زيد وزياد يارجعونهم ويتأكدون انهم مو ناقصهم شي لحد ما تحسن حازم ورجع لشغلو وصارو ما يحتاجونا بعد
تصرفات هالعائلة هاي دا تكبرهم بعيني وتخليني احترمهم زيادة يوم بعد يوم وكل ما اگول خلص طيبهم يفاجأوني بعد اكثر
تميم بدا يتحسن شوية شوية وبدا الجو ينقلب من البرودة للحرارة وكل ما تقرب امتحانات اية يزيد خوفها وقلقها اكثر لانها سادس
رغم هي مسيطرة عالمواد بس تعرفون الطالب بهيج مرحلة يبقى طول الوقت خايف وقلق الى ان يخلص امتحانات ويستلم النتيجة
وخوف الطالب وقلقو ينعكس على اهل البيت واكيد شكو شخص يقرا هذا الكلام وعندو طالب وزاري راح يكون متفق وياي 100%
ومن بلشت عطلة الامتحانات مالتهم اعتكفت بالغرفة 24 ساعة دراسة يادوب تنام كم ساعة وتگعد تدرس مرة ثانية
لدرجة مرات انام وهي تدرس واگعد وهي تدرس ومن اسألها تگول نمت وگعدت وانتي بعدج نايمة واكلها وشربها اوصلو الها للغرفة
بس مرات تطلع العصر ترتاحلها فد نص ساعة لو ساعة ومرات بوقت استراحتها تناملها شوية علمود ترتاح من تكون تعبانة حيل
وبقت على هاي الحالة الى ان اجت امتحاناتها
شكرا لزيارتكم عالم روايات سكيرهوم
