رواية بنت الكهوجي الفصل التاسع والعشرون بقلم احمد
ياقوت : ومن بلشت عطلة الامتحانات مالتهم اعتكفت اية بالغرفة 24 ساعة دراسة يادوب تنام كم ساعة وتگعد تدرس مرة ثانية
لدرجة مرات انام وهي تدرس واگعد وهي تدرس ومن اسألها تگول نمت وگعدت وانتي بعدج نايمة واكلها وشربها اوصلو الها للغرفة
بس مرات تطلع العصر ترتاحلها فد نص ساعة لو ساعة ومرات بوقت استراحتها تناملها شوية علمود ترتاح من تكون تعبانة حيل وبقت على هاي الحالة الى ان اجت امتحاناتها
من بلشت امتحانات اية البيت دخل انذار تگول داخلين حرب مو امتحانات ممنوع احد يروحلها للغرفة ويلهيها عن دراستها
طبعا هذا الشي باتفاق بيني وبينها شكو احد يريد يروحلها امنعو وخصوصا زيد لان هو اكثر واحد يحب يخبث ويانا اني وياها
بس ما جان يروح مجرد يحرگ باعصابي ويضحك من اصير عصبية عليه وخلال هالفترة هاي من صدگ تعودت عليهم تعود مو طبيعي
بس لحد الان ممنوع تميم او اخوانو يلمسوني حتى لو بشقى واخر مرة لمسني تميم من فقدت الوعي ببغداد وبوقتها للضرورة
صلاتي التزمت بيها التزام مو طبيعي بحيث اول ما يأذن اروح اصلي وافتر على اهل البيت اوصيهم عالصلاة واكثر وحدة تفرح من اذكرها هي الحجية
بقيت على هالروتين وجان الوحيد يروح لاية عالغرفة هو تميم لان هو الوحيد الي من يروحلها ما يلهيها واذا تحتاج شي هو يشرحلها
جنت اتمنى عندي اخ مثل تميم يهتم لامري هيج ويخاف علي من الهوا بس الحمدلله على كل حال والله يرحم باسم الي جان بالنسبة الي يسوا الدنيا وما بيها
مرت الايام بتوتر مو طبيعي وكل يوم اية تذبل اكثر من القبلو لان لا اكلها مثل العالم ولا نومها مثل العالم وكاتلة نفسها بالقراية
حتى من تگعد عالاكل تاكل لگمة وتقرا وتگول هاي النص ساعة تفيدني بالامتحان وجان تميم يوديها للامتحان ويبقى ينتظرها لحد ما تخلص ويجيبها
بس من ينجبر يروح للجامعة ياخذها وياه واذا يتأخر يخابر على اي احد من اهلو يجيبها واذا يخلص بوقت يرجعها وياه
جنت من اشوفها هيج اخاف من السادس وخصوصا انو مقررة السنة التجي ارجع لدراستي واكمل السادس
اخر يوم اجت اية گوة تمشي وجانت الليل كلو مو نايمة سلمت علينا وبوجهها للغرفة وصلت يم الدرج وگعدت على اول درجة
ياقوت : ها اية شبيج
اية : ماگدر اصعد
- باستغراب .. ليش
- رجليني ما تعيني وربي خايفة اوگع من الدرج من التعب
- تعالي خلي اسندج
تميم : عوفيها اني رايح لغرفتي خلي اخذها
- تمام
اجى تميم بدال ما يسندها شالها بحضنو وهي تعلگت برگبتو وتباوع لياسمين وتطلع لسانها وياسمين شبعت ضحك عليها
تميم گاللها ضمي لسانج لا تگرطو بزونتي ويقصد ياسمين گالت ياسمين تطمن اختك بس الله يگدرلها گاللها تربية اخوها غير
اخذها للغرفة وطگتها بنومة من الضهر لثاني يوم الصبح من صدگ عوضت كل الايام الي راحت ومن گعدت تگول بعدني مو شبعانة نوم
شايفين من واحد يبتعد فترة عن اهلو ويضعف ويصير وجهو اسود ويبين عليه اثر الغربة اية جانت هيج حالتها خلال الامتحانات
من صدگ حالتها جانت كلش صعبة بس من خلصت الامتحانات بدت ترجع لطبيعتها شوية شوية وبقى بس انها تستلم النتيجة
مرت الايام بروتين طبيعي ماكو اي شي يذكر بس بالفترة الاخيرة صار تميم دائما ينطلب بگعدات العشاير وحتى اهلو مستغربين من هالشي
فمرة اجى زيد وسأل عن تميم وگالتلو الحجية طلبوه بگعدة ودا يحجون هو والحجية واجى تميم سلم وگعد ويانا
تميم : ياسمين ستكانة جاي باليرحم والديج
ياسمين : من عيوني
زيد : شنو القصة تميم شو كثران طلبك بالگعدات
- اي عادي شنو المشكلة هاي زينة النا
- اعرف زينة بس مو غريبة انو هالفترة صارو يطلبوك
- لا مو غريبة هم يعرفون شسويت الهم
- شسويت بالضبط
- من جبرت الشيخ الي صوبني ابنو ينتقل من الانبار جان هالشي علمود سمعة الانبار وشيوخ الانبار قدرو هالشي الي سويتو
فصارو يطلبوني بالگعدات لان يعرفوني دائما احكم بالشي الي يفيد الطرفين وخصوصا بعد ما حكمت بكم گعدة وانتشر الخبر وعرفوني بقية الناس
- بس هالشي احتمال ما يكون بصالحنا
- ليش
- اذا واحد من الطرفين ما عجبو كلامك وانجبر ينفذو راح يحقد عليك
- اني مدا اجبرو اني دا انطي رايي بالي اشوفو مناسب ولحد الان ما شفت واحد من الي حكمتلهم رفض رايي
- الله يسهلك بس دير بالك منهم
- تطمن إن شاء الله ماكو الا كل خير
- عن اذنكم اروح للتواليت
-اذنك وياك
الحجية : كلام اخوك صحيح ابني انتبه لا احد يحاول يأذيك
- تطمني يا روحي محد يأذيني إن شاء الله
زياد : يمة ام حازم (الولد الي تصوب) وبناتها اجن
الحجية : اي يمة هلا بيهن دخلهن
زياد : تفضلن حجية
تميم : طلع وتواجه وياهن عند باب الصالة الخارجية .. حياكم الله تفضلي ام حازم
ام حازم : شلونك وليدي شلون صرت
- الحمدلله حجية مابي الا كل عافية
- اعذرنا مقصرين وياكم بس نعرف بنيتكم عدها امتحانات وانتظرنا تخلص امتحاناتها واجينا
- هلا بيكم ايمتى ما تجون البيت بيتكم تفضلو
- يزيد فضلك
ياقوت : مجرد سمعنا انهن اجن ياسمين شالت گلاصات الماي الموجودات وستكانة الجاي اخذتهن للمطبخ وانطت خبر لزيد علمود يطلع من البيت
اية گمزت من فوگ القنفة وراحت ركض عالغرفة علمود تبدل ملابسها لان جانن ملابس بيت وتگول مو حلوة اللبسهن گدام الناس الغربة
بقينا اني والحجية بالصالة شلون دخلن للصالة صار زيد بوجههن ومن گد ما تخربط على شوية ويدعم وحدة من البنات حتى هي مثل الي فزت
اني گوة كتمت ضحكتي لان اول مرة اشوف زيد الي ما ينگدرلو هيج متخربط ومجرد گال السلام عليكم وكمل طريقو وهو مدنگ
استقبلناهن وجانت وجوهن متغيرة كلش عن اخر مرة البنات بعد ما اجننا ذيج المرة وهن ما يحجن كلشي هالمرة صارن يحجن ويانا ويضحكن
اجت اية سلمت عليهن واخذنا البنات ورحنا للمطبخ تعرفنا عليهن وكلش تونسنا وياهن وجانت نفسيتهن كلش حلوة وكلش محبوبات
البنات جانن وديان واديان وديان عمرها 19 واديان 16 سنة وامهن عمرها 51 واخوهن حازم 26 وابوهن متوفي واخوهن يصرف عليهن وعلى امهن
لاحظت اديان تبقى صافنة ومرات على نص الحجي تروح للصالة وترجع ومن نسألها ما تكون منتبهة الا نعيدلها الكلام يلا تجاوب
وانتظرت لحد ما راحت مرة ثانية للصالة وسألت وديان عليها گالت والله ماعرف اول مرة اشوفها هيج بس يجوز بعدها ما اخذت عليكن
گلتلها خاف منزعجة مننا گالت لا مستحيل اولا انتو ما سويتو ويانا الا كل خير والله يشهد ما ننساكم بالدعاء على الي سويتو ويانا
واديان بنفسها جانت ميتة على التعرف عليكن بس معليكن من اروح اسحب منها الكلام ومن نجيكم مرة ثانية احجيلكن
باوعت من باب المطبخ شفتها گاعدة وحدها بالصالة وصافنة وعفتها گلت ما اضغط عليها يجوز مثل ما گالت وديان بعدها مو متعودة علينا
اجونا بال 2 الضهر وبقو يمنا لل 5 العصر وگلنالهم عالعشى بس رفضو وبعدها ودعونا وراحو بس بقى وضع اديان ببالي لان تعرفون الفضول بهيج مواقف
بعدها مر الوقت ونسيت موضوعها ورجعنا لروتيننا الطبيعي ومرت الايام الى ان صار وقت النتائج والله لا يشوفكم حالة اية
من اعلنو موعد النتائج صار وجهها اصفر ومن شفناها تأكدنا انها مو مجاوبة لان كلش خايفة ومتوترة وكأنو الدنيا واگفة على نتيجتها
الضهر صاحها تميم وتريد تمشي ماتگدر من الخوف گوة راحت من المطبخ للصالة گاللها تعالي احجي وياج قبل ما تطلع النتائج
اية : گعدت يمو .. ها
- ليش خايفة هيج من النتائج
- ماعرف
- انتي مجاوبة لو لا احجي الصراحة
- مجاوبة
- لعد لا تخافين بوية حتى لو مو مجاوبة ودرجاتج كلهن صفر تعيدين السنة وتطلعين المعدل الي يرضيج بس المهم لا تخافين
- مو بايدي
- اعرف بوية اني من جانو يعلنون النتائج شوية وابجي وهسا الحمدلله خلصت وتوضفت وصارت ماضي
- الحمدلله
- يلا روحي اشربي ماي وما اريد اخت الشيخ تميم تخاف هسا يگولون اخت الشيخ جبانة
- ههههههههه اقنع نفسك بهالكلام والله شوية وابجي
- افه لعد الموضوع واصل حدو
- اي والله وعابر حدو هم
- ههههههههه گومي بوية اشربي ماي وما يصير الا الي كاتبو الله توكلي بالله ولا تخافين
- إن شاء الله
راحت شربت ماي وبقينا ننتظر على اعصابنا حتى اني الي ما الي دخل بالموضوع توترت بسبب وضع اية واخير شي المغرب اجلوهن لثاني يوم
جنا بالمطبخ نريد نحط العشى وتميم صاح اية وانطاها خبر خنگتها العبرة وگالت بصوت مخنوگ الله ينتقم منهم وراحت للغرفة
جنت اريد الحگها وگال تميم عوفيها خلي تبجي بلكي شوية ترتاح بس من حطينا العشى ما اكل كلشي ومبين ضايج علمود اية
الحجية : عايفها تتعشى يا تميم بعدين گايللها عالتأجيل
- والله يمة مو قصدي عبالي تتونس لان تأجلت
- شتتونس غير من الصبح حتى اعصابها تلفت من الانتظار
زيد : السلااااااا ولكم خونة تتعشون بدوني
زياد : السلاااااااا ولكم خونة تتعشون بدوني
ياسمين : استلم اجو المخابيل
زيد : وينها العگروگة
ياسمين : تبجي بغرفتها
- افه شصاير
- ما صاير شي بس من الصبح تنتظر النتائج وهي عايشة على اعصابها واخير شي تأجلن
- لوما گدامي نعمة جان فشرت على ابوهم
- همزيت سكتتك النعمة
زياد حط اول لگمة بحلگو وسحبو زيد من اذنو وصارلو صياح گالو زيد خلنا نروح نراضي العگروگة ونرجع نتعشى سوا وعاف اذنو
صار زياد يفرك باذنو وگال شدخلني روح انت راضيها اني عند بطني ما الاعب ومسكو زيد من اذنو مرة ثانية وسحبو وزياد يتعارك وياه
صعدو فوگ تقريبا 5 دقايق وسمعنا اية تگول ولكم عوفوني وتضحك وعرفناهم شايلينها وما خاب ضننا من نزلو عالدرج جانو واحد شايلها من ايديها وواحد من رجليها
زيد : تميم تميم استلم الهدية
تميم : لحضة لحضة
گام تميم نزل شماغو وعگالو ورفع ردانو ووگف گدامهم گال يلا وذبوها باتجاه تميم وويا صرختها صارت بحظن تميم
منظرهم وهم هيج يتشاقون كلش حلو راحو زيد وزياد يغسلون اديهم وتميم جاب اية گعدها يمو وصار يوكلها وهي تضحك
گالتلو خلي اغسل گال ما يحتاج لان ماراح اخليج تاكلين اليوم اني اوكلج وصار ياكل لگمة ويوكلها لگمة وگعد يمها زيد وصار هم يوكلها
بقو يوكلونها الى ان شبعت وراحت تحمي الجاي وهم كملو اكلهم ومن شبعنا شلنا المواعين وبقو يمنا زيد وزياد لان جانو ضايجين
شفت بعيون اية لمعة فرح كلش واضحة بسبب تعامل اخوانها وياها وبصراحة ما الومها بسبب الي شفتو حتى خفت من نفسي لا احسدها
سميت بالله وصليت عالرسول ﷺ علمود لا احسدها لان العين حق وممكن بدون قصد مني احسدها واخرب بينها وبين اخوانها
من خلصنا عشى غسلنا المواعين ورحنا للصالة جانو دا يتابعون الاخبار وطفت التلفزيون اية وباوعولها باستغراب گالت نريد نتعلل عوفو التلفزيون
زيد : شرايكم بفكرة
الكل : شنو
- تنطوني فلوس اجيبلكم حلويات لان باجر ترسب اية وتبقى تبجي مثل البومة اسبوع كامل وما اريد اجي وهي تبجي فتصير تعليلة وداعية
اية : انجب انجب فال الله ولا فالك شطالبني
زياد : انجب زيد شلون تحجي هيج على اختنا الحلوة
اية : يمة فدوة اروح لحبيبي اني
زياد : لا تتخيلين اخلي احد يظلمج انتي تبقين مثل البومة 6 ايام مو اسبوع
من گال هيج جان زيد يشرب ماي الا طلع الماي من خشمو وگام يريد يطلع من الصالة وزلگت رجلو بالماي ووگع بنصنا وانگلب الضحك من اية عليه
حتى تميم صار يضحك بكل صوتو زيد رغم وگع وجهو صار طماطية من الضحك اية مثل الفارة تضحك وترافس وماسكة بطنها
زياد : يلا تميم حرك جيبك
تميم : مسك جيبو وخضو
- شنو هاي
- مو تگول حرك جيبك
- لا تصير لوتي ورق 25 عالسريع
- ايبااااااه وهو ابو الراهي شنو مخلفكم وناسيكم
- لا والله ابوك مخلفنا وتتحملنا يعجبك ولا ما يعجبك
- لا ما يعجبني يلا تدعبل انت واخوك
اية : تمتومي اريد 25 الف
تميم : غير تدللين انتي .. وطلع المحفظة كلها انطاها لاية
زيد : انعل ابو حظج اية ما الله خلقني اية
اية : طلعت لسانها وتعيب عليه
باوع زيد لزياد ولان هم نفس الطبع فهم عليه فورا وهجمو على اية زياد مسكها وزيد اخذ المحفظة وطلعو ركض من البيت
تميم لان يعرفهم ما اهتم للموضوع غابو يمكن نص ساعة خلال هالنص ساعة صلينا العشاء علمود ما نلتهي وننساها وبين ما خلصنا ورجعنا للصالة هم اجو
دخلو كل واحد بيدو علاگتين زيد شايل علاگة جبوس وحلويات وزياد علاگة بيها ببسي وعلاگة حلويات تكملة على الي عند زيد
جان زيد مشغل اغنية بتيلفونو دخل للصالة يرگص هو وزياد ونزلو العلاليك ومسكو ايدين بعض وصار يدبجون عالاغنية
المغني جان يگول
خلي نتعلل يهواي .. انت الشكر واني الجاي
خلي نتعلل يهواي .. انت الشكر واني الجاي
خدره ونشرب سوية .. شماراد الله يسوي وياي
خدره ونشرب سوية .. شماراد الله يسوي وياي
واية گلبها صار يرفرف لان تموت على سوالف الطربگة ومستعدة ترگص اسبوع كامل
كمل المغني
سيرت بنت التجواري .. والكحل بالعين جاري
سيرت بنت التجواري .. والكحل بالعين جاري
ما ذبحني غير جاري .. كل صباح يجر يمين
ميل ابو گذلة دميييييييل
اية تميل علينا وتمسك گذلتها على اساس المغني دا يقصدها صاحها تميم وزتلها السبحة الي جانت بجيبو وصارت تفر بيها وترگص جوبي
بوقتها اني ما اعرف بالجوبي فما جنت اعرف اذا حركاتها جانت متقونة مية بالمية لو بس تتمايل ويا الموسيقى بس الي اعرفو جانو متونسين
الحجية : يااااااا تميم هاي بدال ما تعقل عليهم تشجعهم
تميم : عوفيهم متونسين قابل دا يرگصون للناس
ياسمين : اي والله عمتي عوفيهم متونسين خلي شوية يغيرون نفسية اية
الحجية : دشوفو ياقوت شگد عاقلة ما تصيرون مثلها
ياسمين : اصلا ياقوت لو ما مستحية منج جان گامت قبل اية
ياقوت : بشقى .. لا تفضحيني گدامهم
الحجية من سمعتني حطت شيلتها على وجهها وضحكت هي وتميم والثلاثة البقية مكملين رگص ومو هامهم شي بالدنيا
الاغنية جانت 14:31 دقيقة ومن دخلو جانت واصلة للدقيقة 4:55 وبقو يرگصون لحد ما خلصت الاغنية وبعدها گعدو من التعب
جان نمط الاغنية من اغاني الغربية ونمطهم بالاغاني يخبل يخلي حتى الي ما الو واهس يندمج وياهم ويشاركهم بافراحهم
من خلصت الاغنية رحنا اني وياسمين حطينا الحلويات بصحون والببسي بگلاصات ورجعنا للصالة ووزعناهن وبلشت التعليلة
وهنا استلمونا زيد وزياد تصنيف وضحك لحد ما صارت الساعة 12 بالليل واية نست حتى النتائج يوقتها من گد ما حجينا وضحكنا
من خلصت التعليلة راحو زيد وزياد لبيت اهلهم واني والبنات نظفنا الصالة ورحنا للغرفة ولان تأخر الوقت فورا نمنا اني واية ما حجينا بشي ثاني
شكرا لزيارتكم عالم روايات سكيرهوم
