رواية ارحموني ولو رحمة مرة الفصل التاسع والعشرون بقلم فراقد حسن علي
محمود /من أم أيوب اخذت امي وفرح
وراحت تعالج أفراح بقينا نسولف اني وابويه
ويه الرجال
-وهو سألني عن حياتي وعن دوامي
وعن حياتي شخصية مرتاح لو لا
وشلون مكضيها وعايش ويه أثنين نسوان
-ما أنحرجت من عنده لان رجال طيب وخيرأخذت وأنطيت وياه بالحديث
-ما أنحرجت من عنده لان رجال طيب وخير
أخذت وأنطيت وياه بالحديث
-وهو رجال أمين رجع محبس الذهب لابويه
وابويه ما قبل ياخذه كاله
// هدية مني لاخيتي ام أيوب
-تفاجأت من كال /أم أيوب أخيج كرمج
كرمي وجيبيلي حليب نوك
ابو أفراح بعده مطعوم والشر تارس عيونو
محمود/العفو عمي ما فهمت عليك
ياطعم يا شر التقصد عليه
أبو أيوب /اسألك وجاوبني بالصدك
ولا تستحي من حرمتك الكاعدة بجنبك
-أنت تلاحظ نفسك أنك مرتاح وعادل بين حريمك ،
محمود// شكول يا عمي اني نفسي محتار بجواب هذا السؤال
-يعني تجيني أيام أصالح الجبيرة
وأهمل الصغيرة
وتجي أيام أصالح الصغيرة وأهمل الجبيرة
-وشكد أضغط على نفسي وأحاول اعدل
بس ما اكدر لازم أميل لجهة منهن وأظلم الثانية
-والشغلة الثانية واني متندم عليها
أحس نفسي ظالم الجبيرة ،
حتى ما ارغبها بالمعاشرة الزوجية
وهي شكثر تتمنى قربي
-وهل الصغيرة يا كثر حبي الها
بس جارم بمشاعرها أتركها ايام وأستقر يم الجبيرة
-عمي من ألاخير اني نفسي
ما فاهم مشاعري
-خلال ما أني أسولف وياه
أم أيوب جابتله دولكة صغيرة فافون وبيها حليب ،وهو طلع خرزة وبقى يفر بيها بداخل الدولكة وقدمها اليه
أبو أيوب/تهنى عساه بيه الشفاء
وألك مهلة١٠ أيام تحسب من هاذي الساعة
وتحمل ما يجري عليك من عوارض
ولا تفزع لان صوابك مضى عليه الدهور اقل شي من ٥ - ٦ أعوام
محمود/ عمي أذا من ٥-٦ سنوات
أني بعدني ما متزوج
وأستغفر الله اني شكيت بزوجتي الاولى
كلت خاف الشيطان غواها وسوتلي سحر
بسبب غيرة النسوان
-بس سؤال واليرحم أهلك وجاوبني عليه لان أفتر راسي ،، هذاك اليوم من جيتنا البغداد علمود سالفة أخويه اركان
هم شربتنا الحليب
العفو منك أصبح عندي سهال قوي
والدزنتري ذبحني فهمني هذا شنو معناه
أبو أيوب /انا أفهمك يالنشمي
اليزوع أو يتسهل بساع وخلال ثلاث ايام
هذا الطعوم أقل العام من داخل الجسمو
ولكن اللي تمضي عليه الاعوام يحتاج ١٠ ايام
وصدكني أزواعو او خروجوا مراح يكون عادي
-وأنت مطعوم صارلك مدة چثيرة
ومو بيدك ماترغب الحرمتك الاولى
ولا تستطيع ان تعدل بين أثنين حريم
لان شر القائم عليك من أجل زواج حرمة واحده فقط ،،لكن العملته الك ربك كسر شوكتها وما أصبحت من قسمتك
فاأحمد ربك على ما عطاك
محمود/الف الحمد لله والشكر
*سميت بسم الله وشربت الحليب
وطعم حليب النوك أطيب من حليب الهوش
-سلمنا على الرجال وعلى زوجته
وتشكرنا من عدهم ورجعنا البغداد
فرح/كلساع أباوع بوجه أفراح
نايمة لو كاعدة ،هااا أخاف أستبردت
لا بس المراه شاطرة خوش لفتها
-دخلنا للبيت وأسلام اجه يركض
ومنى تركض وراه
يمه ما يسمع صوت السيارة يطلع طاير
وأجه على أبويه يدعيل وفاتح ايديه ويضحك ،، شاله ابويه ومكيف بي
-هو شاف أفراح بيد امي لو تخبل يشمر نفسه من حظن ابويه على امي يغار من افراح ابسط ماعنده لو همشها
-نزلت رفل ،ومنى ،وأركان موجودين
بعد ماسلمنا وكعدنا شرحنالهم كل السالفة
اركان/محمود من ترتاح اريد اسولف وياك
محمود/بس انجطل لان ظهري أنطبك من السياقة رفوله كلاص جاي وياه حبشكلات
لو عشه خفيف
فرح/رحت بوجهي لغرفة امي الحمد لله
شباعنة نوم وشويه جسمي ارتاح
اخذت كل هدوم أفراح وخليتهن بالطشت
وغسلتهن بالبطنج ، ونشفتهن وشريتهن
داخل البيت لان الدنيا ليل وبس يطر عليهن النجم تبقى سهرانة وتبجي ما تنام
-رجعت كعدت يمهم بالهول
ورفل صبتلنا الجاي وياه الريوكات
-منى وأسلام يثردون الخبز بكلاص الجاي وياكلون
وأركان لا يكسب الخبزة على الصوبة
ويغمسها بالجاي
عادل/أركان ربك ما يجمع أثنين مختلفين حتى أكلكم استغفر الله ما ادري شلونه
انتي ومريتك ووليدك هل نعمة موجودة وأنتم تاكلون ثريد بالجاي
اركان/يابه عشق ،هل النعمه أعشقها
وأحبها أكثر من مريتي
منى/هااا أني شكو
وأكيد كلنا نحب نعمة الله
بس اني شكو بالموضوع
محمود/من صغر أنتوا الزنابير الصفر
تاكلون بنفس الكلاص هذا الثريد
-أنتبه عليها أركان كال//اووو عاد تورطنا حجينا يابه أشاقه
اووو اليوم نكيضها جفاف وتخرمش ودفرات
محمود/هههه شكو مكلوبين عتاوي
منى/اني أترخص أكوم أنظف غرفتي
اركان/تعاااااي هناااااا أرجعي
كعدي بمكانج غرفتج مهجومة ونظيفة
لا تسويلج زعله
فرح/كلنا بقينا ساكتين
وابويه وامي ابد ما يدخلون بين منى واركان
لو بيني وبين محمود
لو بين رفل محمود
-يجوز منى حقها تزعل مو لان أشاقه وياها
بس لان فشلها وكال جفاف
الكل أفتهم هي اليوم راح أطنكر عليه
-شويه وكامت لملمت المواعين واسلام راح وراها للمطبخ
عادل/ترى ماكدرت احجي عليك كدامها
شكو هيجي تصيح عليها
يابه المراه أتحب الكلمة الطيبة
كوم راضيها يلا
هاي أبنيتي قبل ما تكون مريتك
فرح/شمر جهاز التحكم على محمود
ولحكها للمطبخ
-اني رحت لغرفة امي أرضع أفراح
أجتي رفل يمي كالت /ميخالف اخليها شوية بحظني اليوم أشتاقيتلها و هواي أفتقدتها
-بديت أحاول وياها واقطر بحلكها حليب
مره تبلعه ومره لا
-دخل محمود //لا تقطرين هيجي بحلكها رضعيها طبيعي وعليمها تاخذ صدرج ،
ما أريد أعلمها على الممية ماتفيدها ووسخة
رادلها حليبج أنظف وأحسن
//ترى شكثر حاولت وياها متعرف
لو أنطيها حليب بالقطرة
لو هيجي أقطرلها
-أجى وكعد يمي ويعاند شلون متعرف ترضع //يابه متعرف
ماكو لطش عباله أجذب عليه
أجتي امي فاطمة أنجطلت يمنا بالكاع
كالت/يمه عجزنا وياها ومتأخذ صدر امها
بس الله يخليها تصير أساس العناد
-هو عاند يكول /انتي فاهية ماتعرفين
شو جري بداية صدرج بقوة وخلي بحلكها
نفذت كلامه بس شنو طلعت روحي وتأذيت ما صدكت هي جلبت وطبكت شفايفها على صدري وبدت ترضع شويه وتوكف وانوب ترجع ترضع
محمود/هااا شكال البهلول
مره ثانية رطبي صدرج وجري وخلي بحلكها تجلب بي نفس الملاهي
فرح/يمه صلوات على النبي
بدت تسحب وترضع صح شكتر فرحت
حتى خفت أتحرك لا توخر حلكها
-الحمد لله حسيتها شبعت وهي يمكن ماشربت خاشوكة مال اكل
أنطيتها لرفل خلتها بحظنها
وتسولف وياها وتناغيها
//اكلج خليها بحظنج بس أسبح بسرعة واجي هسه تنام على ايدج
-كالتلي/ ميخالف روحي
-اني هم أخذت هدومي ودخلت للحمام
وغسلت بمي البطنج
وغسلت هدومي هم بمي بطنج
طلعت ولبست كنتور الهدوم حتى ما استبرد
وتبرد أفراح من أرضعها
-دخلت الغرفه امي وأشوف محمود
كاعد بصف رفل لطش ويبوس بيها
وافراح بحظنها، ما أنتبهوا لجيتي ،
وامي نايمه تشخر ،،وأبويه غافي بالهول
*أحممم
هو أبتعد عنها بسرعه خجل مني
وهي دنكت على أفراح تحاجيها
كالت/لا بالعكس كولش تونست وياها
وبدلت حفاظتها بعد لا تغيريلها
//عاشت أيدج
محمود/أني براسي موال
وكاعد أدك ناعم الرفل
وكبستنا فرح ،، أنكلب وجهها طماطة
وعيونها غوركت رادت تبجي
بس سوت نفسها قوية
وكان الموقف عدها عادي
-يلا رفوله قفلت كومي أنام
ورايه دوام من غبشه
-فروحة نفس ماعلمتج من ترضعين أفراح اكول محتاجة شي
فرح/أنحمست قهر أريدهم بس يطلعون
ما اريد ابجي كدامهم وافشل روحي
// لا سلامتك
-كلموا صعدوا فوك الغرفتهم
كمت ندهت ابويه اجه نام بمكانه
وامي بقت على نومتها بس غطيتها
-خليت راسي على مخدتي شبعت بجي ونمت
منى/اني مو زعلت بس خجلت وفشلت من كلامه يكول// جفاف وترخمش ودفرات
هسه لو صدك هم ميخالف شو مطيح حظي
وأخاف من عنده خوفة الحية
-رحت للمطبخ وغسلت المواعين
واسلام واكف يمي
أجه ورايه
اركان/من تخلصين شغل البيدج صعدي فوك
عندي حجي وياج
منى/خلصت وغسلت ل اسلام واخذته فوك ويايه الصدك صعدته حماية اليه
خاف يضربني على الاقل يستخطيني لان ابنه موجود
-دخلت للغرفة بس ماحجيت شي
بدلت حفاظة اسلام وبدلت هدومه
وكعدت أهزه على رجلي حتى ينام ساعة ٩
ماقبل الا أتمدد بصفه ويخله أيديه بصدري
انجطلت بصفه وصار بيني وبين ابوه
واركان نايم على صفحة يباوع علينا
نومته وغفيت وياه
-حسيته يبوس بيه فتحت عيوني
اسلام بعده بنصنه وهو من فوكه
مسنود على أيديه مدنك عليه
ويبوس بيه
اركان/ليش زعلانه الشمس مالتي
منى/ليش هيجي تفشلني كدام الاهل
شوكت مسويه بيك جفاف لو ما ٢٤ ساعة تثرد بيه وما تشبع
وشوكت مدفرتك ومخرمشتك
اركان/باباتي هذا تعبير مجازي
اطرد بي عيون حتى مايحسدونه
منى/انت قشمر عليه بهاي سوالفلك
اركان/وانتي فطيره بسرعه تصدكين
منى/مو صوج هذا أشرت على كلبي
هذا فطير ويحبك
اركان/شو خل أشوفه صوره وصوت
حتى أصدك بي
منى/عززه اركان الجاهل نايم
يمعوود خررب لا يفز بعد شينومه
اركان/وين شريط الحب مالتج
مروه/ميصير اخذه ،لان عندي عذر
اركان/خرب حظي مو كلبي حس وكلت اليوم جفاف،،عاد بس بوس مغذي حالي حال افراح
انوب عكب باجر لازم أداوم
منى/بقى يبوس ويكمش مايمل ولا يشبع
جزت روحي من الموضوع وصارت عندي تخمة حتى كمت أكرهه هذا الشي
وهو عنده أحلى من العسل على كلبه
من تصالحنا ولهسه هو يثرد بيه
من صدك مليت لو باقية زعلانة احسن
وانوب أخاف أعارضه لان يعصب ويصير نار
-هو ماخذ راحته ويبوس
ومنحس الا أسلام كاعد على حيله وصافن علينا ،، وهو بسرعة بتعد عني
وره شوية اقنع أسلام حتى يرجع ينام
يأشرلي // بوسني من حلكي
وهو غم نفسه كال /حفظ السالفة ابن النعال
محمود/صعدنا فوك دخلت وقفلت الباب
اليوم الحاسم والواضح
لو اني صدك الفاهي ومغمض
لو رفل هي صدك شيطانة ومستغلتني
-جبت القران وخليته بحظنها
//رفل حلفي بهذا كلام الله
انتي ما مسويتلي سحر
ولا مسويه لاهلي
ولا مطعمتنا بالحلويات الجابتهن امج هذاك اليوم
بعدت القران من حظنها وصوفرت
توسلت بيها بس تحجي ماكو أخرست
يابه أحلفي ما تقبل
-ما كلت باطل اليوم أريد أوكف على النغل منو أبوه كمت وجبت الحزام من الزاوية
//رفل تعرفيني من أقفل أجرم بحالج
مسدتها بالحزام على فخذها
طفرت وكعدت بالكاع وكامت تبجي
//تحلفين وتحجين لو هسه أجنزج
وأرد أشمرج بحظن ابوج وعلاء هم يكملون عليج
كالت/لا فدوة كلشي ولا ابويه ترى يعدمني
انطيني الامان ولا طلكني وأحجيلك كلشي
محمود/ الج الأمان
وشيطلع من السانج ابد ما يوصل لا لأبوج
ولا الاخوانج ،، ولا اهلي يعرفون بشي
وما أطلكج بس صارحيني وفهميني خليني أفتهم راسي من رجلي
كالت/مو اني واصلا ما قبلت
هاي امي وخالتي هن سون ودبرن كلشي
-خالتي تعرف مراه مشعوذة
وتكول// شغلها مضبوط
واخذت امي عليها
وهي المشعوذة اخذت كومة فلوس من امي نص شغل وتعب ابويه والولد صار بطنها
-وسوت سحر طعوم لتفريق العائلة عن فرح
وكلكم تصيرون تكرهوها
وسوت سحر على فراش منى حتى تتعارك ويه اختها
-وامي جابت دهن كالت فركي بيدج
وبس طخي فرح بي وتطرح الجاهل
وبعد ما تجيب وتصير عقيم
وبس انتي تخلفين ورجلج يطلكها
لان راح تصير مشاكل وهوسه وماتخلف ويطلكها
-اني ماقبلت على أذية الطفل
بس هن امي وخالتي موتني من الكتل
وامي //تكلي افضحج كدام عيالج
واكلهم هي تمشي بدرب السحورة واني ما ارضالها
-لعد ليش ما ارضيت ارجع وطولت عدهم
لان جانن امي وخالتي مكملات مخططهن
وبالغصب امي جابتني وهددتني اذا ما انفذ مخططهن تشوهني
واكلت راسي بالكومة والكعدة تكول/ليش تاركة المال والجاه بيد فريحة العوبة
لو ماهي مفتوحة وكح...وشبعت بحظن هذا وذاك ونامت براس رجلج هذا البخت
مو انتي الفاهية العايفة فلوس رجلج الدكتوروحماج الضابط
وعمج المعروف كل اصحاب مواد البناء يحسبوله الف حساب
والفلوس هيجي نايمة على قلوبهم
وأنتي ظلي مكابلتني وكاعدة تلطمين وجه البوم
-امي وخالتي هن خططن وهن مشن ودبرن وسون كلشي اني ما قبلت عليهن بس أخاف منهن
-افراح اموت عليها و هواي أحبها
وحيل أنقهرت وتأذيت من نامت مستشفى
-خو بيوم تخبل اركان شبعت بجي عليه
والليل كله ابجي على حاله
هن كالن منى وفرح يتعاركن
بس ما اعرف ليش اركان اتأذه
محمود/كافي رفل صوتج ما اسمعه
لو هسه أكسر أعظامج
يعني خفتي من امج بس ماخفتي من ربج
وعادي عندج تقتلين طفلة ليش شنو ذنبها وتخططن لقتلها!؟
أتمنيت عيونج تشوفها شلون زرفوها بالمستشفى ،، و تمنيت كلبج بدال كلبي
من طبيبها يكول //ما تستجيب للعلاج
خلي عيونكم بعين الله
-كلمة أنمرد كلبي عليها قليلة وما توصف حالي ول عيوني ماغفت ولا وكفت دموع
تعرفين شنو يعني هي فرحتي بهاي الدنيا
لو لا ؟؟
-تدرين بيوم ابوج بلغني أنج طرحتي الطفل
متت قهر وذبحني الندم لان مديت ايدي عليج وضربتج وانتي مذنبة وتستاهلين الجرالج لان من ايدج كل الصار
-بس انتي شنو من نفس عندج
مستعدة تقتلين طفلة من اجل غيرة
وخريط النسوان !!!
-اسمعيني زين طلاك مااطلكج لا تخافين
-وروحة لبيت أهلج بعد ماكو أنسي
-وممنوع هذا الحجي الدار بيناتنا يطلع بره باب هاي الغرفة
-بس بعد انسي عندج رجال
وشوكت ما اشوفج صرتي أدمية
وجريتي عدل
و طابت نفسي عليج ارجعج لحضني
-وأفراح بعد ممنوع توصلين يمها
اذبحج اذا صار بيها شي
-شكثر بجت وكلشي أكوله ألها
تكول// اي ميخالف
بس من كتلها//ما توصلين يم افراح
تفرفحت وبقت تبجي بهستريا
//فدوة اروحلك بس افراح لا تحرمني منها
احب الاطفالو ،، وداعتك حاسبتها بنتي
لا تخاف ما أذيها
-بقيت ساكت بس نار وشعلت بيه
حسبي الله ونعم الوكيل على امج الهجمت حياتج ،، واني متأكد بسبب طمعها و جشعها هي وره عرض ابوجن من انطاجن هدية
بحجة تقوية اواصره الاخوة
وبقت تركض وراج وساعية لحد هاي الساعة بخراب بيتج
((هذا الكلام الي دار بيني وبين رفل كشف
بالوقت الحالي من اجل سرد أحداث القصة))
-تركتها تبجي واخذت جكارة وتلفوني
وطلعت للسطح أشتم هوى اختنكت
تذكرت اركان يريد يسولف ويايه
دزيتله مسج/اذا كاعد تعال اني كاعد بالسطح
اركان/قريت رسالة محمود
وهذا ابن المطي كطع كلبي ما قبل يرجع ينام غفه شويه وكعد اصحى من عندي
وتعال اكعد لاعبني
-ماروكو نومي قردج هسه اجي
محمود عنده سالفة ويايه
-طلعت عليه للسطح وأشوفه
يسحب الجكارة بحيل صدر
*ها أبو أفراح شكو شبيك مهموم
وعلست الجكاير علس
محمود/لا يظل بالك تلاغيت ويه رفل
غيره الشرايج ما تخلص ،
لا هاي تبطل سوالفها
ولا هذيج تبطل دلعها
وأبتليت بيهن
-بشنو ردت تحاجيني من جنا جوه
اركان/شوف يخوي تعرفني اني بطبعي
ما انسى الاحداث والسوالف
ومن سولفت وكلت الرجال يكول مطعوم من قبل اكثر من ٥ -٦ سنوات
اني رجعت شريط ذاكرتي ليوره واتذكرت
من جنت تسولفلي على هاي صاحبتك
الجانت وياك وبالكلية لأسمها ( زهراء الصفيرة) اللي هي صارحتك بحبها شبيك صفنت
اي صح هي لطشت عليه
وهواي لمحتلي على الحب و الزواج
واني جنت لابسها ولابس كل البنات
لان جانت وما زالت بس فرح بعيني
لحد ماهي اجتي صارحتني بهذاك اليوم
وكالتلي//اني أحبك واقبل بيك
بس تعال اخطبني ونتزوج بدون كلشي
بس المهم اكون زوجتك وعلى ذمتك
واني رديتها بوكتها بأدب //انتي أخت عزيزة
واني ما مفكر بمراه تكون حلالي غير بنت عمي
اركان/واني متأكد هي هاي السوتلك السحر ماكو غيرها
تذكر من هدتلك ساعة و رديتها
وانوب هدتلك قميص وهم رديتها
وا نوب جابتلك كيكة وانت اخذتها استحيت اتردها اني متأكد هي سحرتك وخلت السحر بالكيكة
محمود/بس ما أكلتها وحدي
كل أحنا الكروب تقاسمنا بيها
اركان/المهم انت اكلت
السحر قايم على أسمك ،،
*بس كول يالله وكون تخلص من هذا الشر
فرح/فزيت امي تندهني افراح تنوص
كعدت مقفلة فاتحة عين وغالقة عين
هم حاولت وياها وتعبت يلا رضعت
الحمد لله بس كون ترضع وتاخذ الحليب
-صبح علينا الصبح ،كمت اسوي ريوك
وأشوف محمود نايم بالهول
تركته مالي دخل بي
كملت الريوك وكلت لامي تكعده وراه دوام
-نزلت منى واسلام يبجي
يبووو على البجي واللجة تعالوا خلوا أفراح بحظني
وابويه كال /يابه لاتصيرون عقل مجهله
هذا طفل مايعرف خلوها بحظنه وخل يسكت
-قبل الضحى ولن داخلين علينا عمه نجمة وهالة وأقبال وعمر
شكثر كيفت بجيتهم
وامي ومنى طارن بيهم
حتى رفل كيفت بيهم وكعدت يمهم
خليت افراح بحظنها
هي بقت كاعدة على واهس امي
لان عمه نجمة كالت /لفن الطفلة بصوف مو بكطن ولا تتركنها بالمهد لو بالكاع
دائما خلنها بحظن وحده منجن حتى تبقى دفيانة
اني ما اعرف اكعد وكافي صارلي هواي متختخة ونايمة كمت اسوي غدة ومنى ويايه
-اجتي هالة يمنا بالمطبخ
احنا نسألها //شلونج ويه تعب الحمل
وشخبار رافد وياج
وهي تسأل //انتي شلونج ويه محمود
وانتي منى شلونج ويه اركان
-انوب كامت تشكي وتبجي من اقبال
مشوفتها نجوم الظهر ومجرعتها المر
وقبل كم يوم متكافشات
اجه ابويه من الشغل
ومحمود من الدوام
-كملنا الغده وهوسة المطبخ
ومنى كلساع صاعدة نازلة
اركان يحضر بملابسه باجر يبلش بالدوام
-واكفة اغسل الباقي من المواعين
اجتني رفل للمطب
كالت/فرح اريد اكلج شي واستحي
تقبلين أرضع أفراح وأعلمها عليه
اني عندي حليب وصدري مانشف
حتى لو ماتشرب حليب اعلمها تاخذ صدري مثل الملاهي
-صفنت هاي سالفة اجتي من جانبي
هم تبقى افراح دفيانة بحظنها
وهم تتعلم ترضع احسن ما تشلع كلبي
//اي ميخالف شكو بيها
رجعت لغرفة امي وجنها ما صدكت وافقت
طلعت صدرها وبدت تحاول ويه الطفلة،،
ولو هي أتعب تشلع الكلب ماتعرف ترضع وتشرب الحليب
وطول ما كملت شغلي وكملت الغدة
وهوسة المواعين والجاي
اشوفها طايرة باأفراح ما نزلتها من حظنها
حتى اسلام ادفعه منها اذا اجه عليها
-بيت عمه نجمة ردوا لبيتهم العصر
بعد ما عمة خلت مباركة لافراح
وهالة جايبتلها هدوم حلوة
-لليل لا احجي محمود ولا يحاجيني
ورفل بس ارضع افراح تأخذها وتكف عليها
مثل الدجاجة من تكف على بيضاتها
تخليها بحظنها كلساع ومخليتها على صدرها
-صعدت لغرفة منى بابهم مفتوح
//اركان نايم لو كاعد
منى /فوتي شبيج هذا كاعد يعلب ويه اسلام
اركان/تعاي فارة النضد
لا عيب صرتي ام تعاي ام الفارة
فرح/اركان اريد احاجيك عن الشقى
هذا صديقك الضابط النقيب تزوج لو بعده
اركان/لا بعده لان امه شايفتله وحده
راح شافها وما عجبته
عندج مراه اله
فرح/اي عندي خوش مراه يشكرني عليها
اركان /الله وأيدج ،بس كون شعرها طويل
فرح/اي شعرها طويل نفس شعر كوثر
بنت عمي احمد
وحلوة تشبه الممثلة زينب العسكري
هاي الطلعت بمسلسل دنيا القوي
وعليها جسم دنكة طول زلمه
بس بجسم مراه معدلة من كلشي ،
اركان/وياهي هاي ؟؟
اذا هيج مواصفاتها خطبيها اليه بعد اخيج
اختج مسويه بيه جفاف
منى/هااا تريد تخطب عليه
عود من اموت ازوج
شو تعال عضيته من متنه
اركان/يوووول انتي مراه لو جلب مسعور
وجعتيني يالمخبلة ،،من خرب لشة ضرغام
فرح/من صدك ضحكت عليه
منى لكطته بعضة شلعتله لحمه
بقى يفرك بيها ويدردم
اركان/اذا شعرها نفس كوثر اني اكلج يقبل
بس منو هاي التحجين عليها
فرح/اقبال بت عمه نجمه
اركان/هاااي صغيرة
هي صدك حلوة بس مو هلكد منتبه عليها
هي شكد عمرها ؟!
فرح/وين صغيرة عمرها ١٥ سنة
منى /لكفت السالفة خلي نخلص هالة منها
//اركان ترى مابيها شئ حاجي عليها
هي صدك حلوة
وشعرها واصل لحد نهاية ظهرها
وما شاء الله ثخين اسود و أملس
وعيونها شهل ، وبعد ابيض من عندي
تشبه جدة الله يرحمها
اركان/هااا شغلتني خطابة علمود تخلصن اخيتجن هالة من عدها عبالجن ما افتهم سوالفجن مشنها على غيري باباتي
هي عرمه مووو
فرح/اي عرمه واللسان يهلهل
بس رافد يصكرها بصوت واحد
اذا صديقك حوك يضبها من بدايتها
اركان/باجر اشوفه واشمرله اللكط وبلكت نصيده ونخلص الحمامة هالة من العتوي اقبال
فرح/نزلت جوه واشوف رفل نايمة بغرفة امي ومخلية افراح بحظنها ومغطيتها وياها
عادي عندي المهم الجميع مرتاح
تمددت بفراشي
-ثاني يوم رجع اركان من الدوام
بس نزل من السيارة ركضنا عليه اني و منى
// هاا بشر
اركان/شبيجن ملكوفات
خل اكعد ارتاح اشوف دربي
اني بعد حاجيته بحجة الشقى
وكتله//خوش لكيتلك مراه من ربعنا
تشبه زينب العسكري
وشعرها بعد اطول واثخن
وعمرها ١٥ سنة
ما صدك يكلي/اصعد بيك كتاب ترقية
بس كون تحجي صدك وبيها هاي المواصفات
كتله/ابشر تجيك وللجمعة ارهملك موعد تشوفها
-بعد عايل عليجن كولن اركان مايسوي عمل خير
منى/اي مو فدوة غديت الطولك
اركان/هم ميخالف حصلنا كلمة حلوة
احسن من العض
// ترى جوعان فووول
منى/اي الغده كامل بس نصب
فرح/ركضت صبيت الغده
نعمة الله ربي يزيدها علينا باكلة بالدهن الحر
ورغم ما احاجي محمود بس كلبي ما ينطيني واخاف عليه حمستله معلاك
واني اموت على الفشافيش ثرمتها ثرم خشن
كعدنا كلنا على الغده
محمود/ترى هذا تعذيب للنفس
شنو بس اباوع عليكم
فرح شيلي المعلاك ما أريد
فرح/محمود حمسته علمودك
جريت ايده من تشريب الباكلة
يمعود لا تتخربط ودمك يرجع يتكسر
-كملنا غدانه بالعافية ،، وبعد ماشربوا الجاي
كل واحد راح الغرفته ،محمود انجطل بالهول
-اخذت افراح ورحت الغرفتي
اندكت الباب
ودخلت رفل كعدت يمي
كامت تبدل لافراح وتحجي ويايه
//فرح تعرفين ليش محمود ايحبج اكثر من عندي ،،لان جسمج احلى وابيض من جسمي
//لا يمعودة وين احلى منج
شو انتي طويلة ورشيقة
خو ما اني كصيرة وصايرة شسمني
جني برميل طرشي على كولت اركان
جان تكول/لا بالعكس جسمج متروس وحلو
ومحمود لان ابن عرب يحب المراه السمينة
وهمه ولد العرب يحبون المراه صاحبة صدر وانتي ما شاء الله ما ناقصج شي
-صفنت عليها هاي من كل عقلها تحجي
وانوب منتبه عليه وعلى جسمي
وكاعدة تقارن بيني وبينها
-وراه هذا حجيها الصراحة كمت أخاف منها لان هواي مركزة ويايه
بس افراح ما منعتها منها
صارت يومية تنزل من الصبح
وشغلها بس افراح تكمط وتعدل وتلفلف
وبس تنوص تخليها على صدرها
يعني كافة عليها كفت الدجاجة على فروخها
بس أني كل ساعة ونص أكثر أو أقل
اروح اخذها من عدها ارضعها ومن تشبع ارجع اخليها بحضنها
-لاحظت محمود ابد ما يحاجيها
ولا هي تحجي وياه ولا حتى توصل يمه
وابد مالها شغل بي لا بغسل هدوم
ولا بأكل ولا بشرب
كل طلباته عليه
واذا بحظني افراح واحتاج شي
تكومله لو منى لو امي
-بهاي اليومين امي خابرت على عمة نجمة وسولفت وياها بموضوع ضرغام صديق اركان اريد اقبال
وثالث يوم ردوا جواب بعد ما رافد سأل على ضرغام يلا كالوا// خلي يجي بس كعدة تعارف
وعمي ابو رافد كال /يصير ما يصير
اني الزم اركان هو كفيل العريس
-اركان اخذ منى واسلام وياه لبيت اهلنا
ومناك جاي ضرغام وامه واخته وزوجة اخوه
منى/بيوم الجمعة أخذني اركان وياه
-وضرغام صديقه اجه ويه عائلته
ما شاء الله اول مره اشوفه جعلته اخويه
هيبة وكشخة ولسانه لبق
ملامحه عادية مثل اي رجال عراقي
بس أضخم من اركان و اسمن
-بيت عمه نجمة صار اللقاء
والنسوان شافن اقبال
وامه ما قصرت فلستها تفلس
شافت شعرها وسألها// شنو تستخدمين الشعرج؟؟وكل شويه تكمشها من متنها
ودكت على جتافها
كلشي بحجة الشقى ومبتسمة بالوجوه
بس هي مبينة كيفت على اقبال
-اقبال لابسة فستان وردي فاتح
وفاتحة شعرها على طوله
وخاطة كحل خفيف لعيونها
يعني طلعت عليهن على طبيعتها بدون لا مكياج ولا هوسه
-راد ضرغام بس يشوفها عمي ابو رافد ماقبل
كاله/هن بعد الحريم شافنها
-ضرغام /عمي ابو رافد اني مجهز كلشي
الحمد لله ما ناقصني اي شي
وبعد سألتوا عليه ورافد ما مقصر سأل جميع ضباط بغداد عني وهذا الشي من حقكم
عمي أسمع مني احسن ما تسمع من غيري
الحمد لله اني ما شراب
ولا زير للنسوان
بس ادخن جكاير ونركيلة اي
دربي بين شغلي والبيت
وعلاقتي محدودة ببعض الاصدقاء
وما اصلي لان عندي الدين قناعة
وبعدني انتظر هداية ربي إليه
وعندي مشكلة وهي الصراحة
وما اعرف أجامل الغلطان انطي طينة بخده
وعصبي من افور و اتعصب اطفي
لو أبوي كدامي اطشره
ولو كلت لا اصير ابن كلب وما اتراجع
والشغلة المهمة اذا الله راد وصارت القسمة
اتخبل من المراه ترادد لو صوتها عالي
ابسط ما عندي لو أطرها بالكاع وافشك راسها
هذا كلامي وين ما اروح واتقدم لاي بنية اكوله حتى الجميع يكونون على علم
واي شي تريد اسألني اليه اجاوبك بكل صراحة وما اضم عليك
-عمي ابو رافد كيف على صراحته
وكاله// الله كريم التساهيل من ربك
-بعدها هم رجعوا لبغداد
واركان اخذني لبيت اهلي شفتهم ساعة ما طولنا عدهم ورجعنا للبيت
-بليل اتصل ضرغام على اركان
يريد يتقدم ويخطب رسمي
-اركان بلغ عمي ابو رافد
واتفقوا وياه على يوم الإثنين المشية
-صار يوم الاثنين
ورحنا كل احنا لبيت عمه نجمة
بس فرح بقت بالبيت تخاف تطلع علمود افراح
حتى رفل اخذها محمود وياه
-وضرغام جاب الزلم خواله وعمامه
ونسوان اقاربهم والحمد لله قروا الفاتحة
بس لا عقدوا شيخ ،، ولا لبسوا ذهب
كعدتهم بس قراية فاتحة
-ضرغام راد يشوف أقبال
بعد عمي ابو رافد ماعنده حجة يعترض
دخل شافها ودخلت وياه امه
وموجودة وياهم بالغرفة عمه نجمة
هو شافها لو تخبل عليها لان صدك هي حلوة
طويلة وضخمة دنكة بعد
وبيضة ناصعة البياض،، وعيونها شهل
وصاحبة شعر طويل
ملامحها تشبه زينب العسكري
يعني الواحد ينطيها فوك عمرها ١٠ سنوات
-حدد الاسبوع الجاي بيوم واحد عقد الشيخ
وحفلة النيشان
وياخذوها لبغداد يجهزوها
والاسبوع البعده العرس
-رجعنا للبيت المغرب
هالة خابرتني بليل من تلفون عمه نجمة
تكول/تعاي شوفي أقبال طارت من الفرح
وأستخفت من شافت ضرغام
كلساع وكالت//عيني زوجي ضابط نقيب قسمتي احسن من قسمتج هسة يلا رافد راح يصير ملازم
كتلها/خلي تولي هاي تغار لان انتن نفس العمر
وتزوجتي قبلها
-وبعدين لا تضوجين من كلامها
ما شاء الله انتي ورافد تزوجتوا عن حب واعماركم متقاربة
بس ضرغام أكبر منها يمكن يجي ب ١٥ سنة
اخذيها على كد عقلها و لاتسوين مشكلة
باجر تمشي لبيت رجلها
فرح/راحوا للمشية مال اقبال و ضرغام
اني ما رحت اخاف على افراح
يمة شلعت كلبي بس تنوص ومتقبل تنام وبالكوة ترضع مني
-من اجوي بليل بس دخلوا رفل اجتي طايرة عليها وتبوسها بلهفة
حتى اسلام مالها دخل بي مثل قبل
شو بس خلتها بحظنها سكتت
ومن رضتعها غفت على صدرها
تعجبت هاي عود ليش تريد رفل وماتريدتي!!!
-ثاني يوم كعدت الفجر فزيت على نويص افراح رضعتها ورجعت نومتها بمهدها
كمت طلعت للتواليت
واسمع واحد يون بالهول
شعلت الضوه واشوف محمود متخربط
نايم بفراشه بس شعلت الضوه
اشرلي تعاي
-ركضت عليه غادي جمر وينفض من الصخونة
/يااا شبيك محمود خوفتني بليل جان ما بيك شي
محمود/بطني تكطعت مصاريني احسها تتمزق
-ركضت سويتله كنداغ
و أجيت أشربه
بس دخل لمعدته ما كدر حتى يكوم
زاع على الفراش ،،كام ينفض نفض
خفت عليه
محمود/بس ساعديني اروح للتواليت
-نهضته ميكدر يوكف على طوله تعبان
شحطته بالكوة وصلته للتواليت
رجع زاع باب التواليت
كعد على ركبه بعد ميكدر يكوف على طوله
على صوته طلع ابويه بس شافه متخربط اجى يركض علينا سنده لحتى يوكف
بس هو انتهى ينفض نفض الصخونة ذبحته
-ركضت جبتله ملابس جديدة
وابويه دخله للحمام
واسمع صريخ ابويه
ركضت ودفعت الباب عليهم
واشوفه مجطول بالكاع ويزوع
-صرت مخبلة ركضت فوك
شلعت باب غرفة اركان من الدك
خطية طلعلي بس بالشورت خايف ومفزوع
// تعال ألحكلي محمود مو زين
عفته واكف بالباب ورجعت ركض جو
ابويه شحطه من الحمام وكعده بره
وامي طلعت مخروعة من الغرفة
-نزل اركان لابس بس برمودا
ومنى نزلت تركض وراه
اركان وابويه شالوا محمود وجطلوه على جرباتي بغرفتي ،، بدلوا ملابسه
ومنى طلعت لملمت فراش الهول
وهم رجع زاع على الفراش يلحك يرفع راسه ركضت وجبت الطشت يمه
يمه اباوع عليه راح يموت مابي حيل يتنفس
محمود/اركان اسندي اروح للتواليت
-اخذوا ابويه واركان وبقوا واكفيله بالباب
هواي طول جوة
اركان دك عليه الباب ماكو ميجاوب
فتح الباب عليه لكاه متخربط
وابويه كام يصرخ على امي تكاسر مي دافي
يردون يسبحونه مات من الصخونة
اركان كام يصيح// يابه بطنه تسيح دم
-دخلوه للحمام وسبحوه
لبسوه هدوم ثخينة
وطلعوا بي للمستشفى
وكل هذا الحجي بعدها ساعة ب ٦ ما صايرة
-وللظهر يلا رجعوا
اني كلساع اخابر على ابويه لو على اركان
يكولون// مستبرد ونشلة قوية
كلشي ما مسويله بس منطي مغذي
وعلاج يخفض الحرارة وعلاج للاسهال
-سويتله شوربة خفيفة بس ما كدر ياكل
سنده اركان وجطله بغرفتي
وكلساع واحد رايح واحد راجع يشوفه
انوب جلبت بي الكحة ،،
بقى يشحط ويرجع ليوره
من قوة الشحطة يصير ازرك ويختنك
-ابويه كال//معقولة هاي اثار الحليب مال ابو ايوب
-للمغرب وجلبت بي هذيج الشحطة
وهو أنتهى عيونه طلعت
ويأشر بيده يريد هوى
وكام يزوع بس وغف لان معدته خاويه
-امي تخبلت وكامت تلطم وتبجي
وابويه انشلش ميعرف شيسوي
اركان كابله وكعد يلوب وياه
ركضت شعلت البنكة على فول بلكت يتنفس
رفل اخذت افراح وكعدت بغرفة امي
ومنى شايله اسلام وتفتر بي يخاف ويبجي
-أشرلي بيده تعاي أو تقربي
هو كاعد على الجرباية ومنزل رجليه بالكاع واني واكفة بصفه فوك راسه
واهفيله بالكوشة
كعدت كدامه حاجاني بالكوة يكح ويشحط وبالكوة يطلع الكلمة جان يكول /سامحيني أذيتج
ونطق الشهادة
-اركان كاعد كباله سمعه نطق الشهادة
لو تخبل كام بكل حيله وشاله
ويصيح// يااالعباس أوكفلنا
ياااابه محمود مات ووول الحكوووني
وابويه سودة عليه كام يبجي وشاله ويه اركان
-وامي تصيح ياااااعلي ابو الشدات احضر وليدي
-اني من الخوف واسم الله أتخيله مات انصكيت
-طلعوا شيل من الغرفة وصلوا بنص الهول
وكام يشخر صارت الشخرة بلعومه
-ابويه من سمعه سودة عليه يشخر
انجبح و وكع على وجهه
-كلنا نجمعنا فوك راسه
وهو سبل عيونه ويشخر
وابويه واركان يلطمون ويانه
وامي شكت ثوبها تصيح//مات وسلم الأمانة
ربي اخذ عمري قبل لا تطلع روحه
-هذا الموقف المرينا بي لو للعدو والتكرهونا من كلبكم تكولون عليه خطية
وداعت بنتي افراح وداعت تعبي وياها
شخر شخرة بصوت قوي كلت ويه روحي
طلعت روحه
اللهم ربي يكفينا واياكم شر كل أذية
زاع وغف ابيض مثل وغف التايت
وطلعت وياه دودة
-قل اعوذ برب الفلق اسم الله الحافظ
زاع دودة جبيرة تقريبا بكبر الخاشوكة مال كوب وبعرض الخيارة
يعني تخيلوها بطول وعرض الخيارة
ولونها ابيض طوخ وتشبه دودة القز
-وبقى يزوع وغف
ساعده اركان وكلبه على صفحته ويدكدك على ظهره ،، وهو مستمر يزوع وغف ويرجع ليوره اعوذ بالله الريحة جايفة تسطر الرأس
-وجهه صفر وانسحب لونه عبالك مابي دم صار ابيض شاحب
وما يحرك لا ايد ولا رجل بس يزوع
اني بقيت اباوع على بطنه تتحرك لو لا
-بعدها توقف ما يطلع وغف من حلكه
عدله اركان وكعده على حيله
وابويه وامي مكابلينا ويبجون
منى جابت دولكة مي واركان يغسل بوجه
بس هو ما يتحرك بس يتنفس
-ركضت جبتله هدوم نظيفة
نزعناه اني واركان وبدلناله
وابويه شغل السيارة حتى ياخذوه للمستشفى
كال/عفوني تعبت اريد انام .....
اترككم في أمان الله وحفظه
وأنتظروني في الحلقة القادمة
——————————-
-ربي يكفينا واياكم شر النساء و مكر الرجال
وبالذات الشباب (أنت يا أدم)
(وأنتي ياحواء الفقيرة )
احذروا من شر نفوس
هناك بعض النفوس وسخة ، وح اقدة ،وح قيرة
اللهم أجعل كيدهم في
شكرا لزيارتكم عالم روايات سكيرهوم
