رواية ارحموني ولو رحمة مرة الفصل الثلاثون بقلم فراقد حسن علي
محمود /المريت بي كل مااذكره احس المغص
والوجع يرجع يمزق مصاريني
-بدت عندي صخونة من الصبح
و شوية شوية زادت عليه بس ما اهتميت
كلت حرارة عابرة يجوز أخذت برد
-للعصر بدأ عندي لعبان النفس
وبطني بدت تمغصني ،وكل شويه ويزيد المغص
-ابد ما خليت على بالي سالفة الحليب
-صح اخير شي ضربتها بالحزام بس ماأذيتها
واللس سوته هي مو قليل
لان هي جبانة وما عدها شخصية
وامها تسيرها وتدخل با أمورها وهي اللي هجمت حياتها
1
-وفرح بعدها نفساء واشوفها تركض للبيت
وعلى افراح
وعرفتها ضايجة وزعلانة من عندي لان صعدت يم رفل وتركتها
وانواب جملتها من كبستنا سويه
-اريد انام ما اكدر نار وتاكل بجسمي
مصاريني موس ويشرح بيهن
حسيت بطني راح تزرف من قوة الالم
-انذبحت من الوجع اصيح
محد يكولي ها ويجاوبني
لان مطبوكه باب الهول والكل نايم
-من فرح فتحت عليه الباب ،،چن شفت العافية
-وبقت معاناتي من الفجر للمغرب
العفو أشكال الوان ألتقيؤ والاسهال دم
وأنوب شكلت عندي الكحة
والشحطة شلت رئتي
عز عليه الهوى وطلعت روحي
-صارت بعيني شغلتين بس
حادثت فرح من جرمت بحالها بالصغر
وردتها تسامحني
-وردت أشوف افراح أخر شي
قبل لا الله ياخذ أمانة
-وبالفعل من شفت رفل
شايلتها فوك راسي بالهول
غمضت عيوني بعدها
لان مابقت اي طاقة بجسمي
-ثواني وأجاني أعصار من الألم الفضيع
صعد من بطني لبلعومي
شحطت بالحيل الباقي عندي
والعفو تقيأت وغفة بيضة وياه دودة تشبه دوة القز
-اسمع الصوت وخوف الكل عليه
بس ما اكدر افتح جفن عيني
ولا عندي طاقة احرك ايدي لو رجلي
من راد اركان وابويه ياخذوني للمستشفى
ماردت اروح لان من كثر التعب اريد بس انام
فرح/ركضت وجبتله مندر وفرشلته بالهول
رجع ابويه من الحوش وشاله هو واركان
وجطلوه على فراشه
دثرته بالغطه وبقيت كاعدة بصفه اباوع بوجه ما أدري نايم ما ادري كاعد
لان مغمض عيونه
لزمت ايده عصر ايدي عصرة خفيفة
عرفته كاعد بس ماعنده قوة يفتح
اركان/يا هذاك اليوم شل حالي
من كثر الخوف والقلق والصدمة أجيت أنجلط
-منى شمرت عليه اسلام ولملمت الهول ونظفت الكاع ،،بس خافت ماوصلت الدودة
-كتلها /جيبيلي كارتونة وعلاكة سودة
جابتهن اليه ،،الصراحة صار عندي فضول
اريد اعرف شكو بطن هاي الدودة
خليتها على الكارتونة واخذتها للحوش
وجبت موس حلاقة وشرحت بطنها
تف ،، وبره /محملة ذراع (دود ناعم صغار) لعبت روحي رحت جبت جداحة وحركتها هي والكارتونة والعلاكة وشمرت رمادها بالمنهول
فرح/بقى محمود ٣ ايام نايم بالفراش
ويادوب ياكل شوربة خفيفة
وعصاير طبيعية
وحركته كد يروح للتواليت
دخلته للحمام غسل وشطف جسمه
وبدا يصلي هو كاعد ما عنده قوة يوكف
-هاي ٣ الايام حرت وياه وهملت البيت كله
حتى افراح يادوب ارضعها ورفل تكفلت بيها
-الحمد لله باليوم الرابع صار أحسن شويه تنشط بس يكول //عندي بعد مغص خفيف
بس يعاند يكول// هاي مو شغلة سحورة
شغلتي طبية عندي طفيليات أو دودة دخلت لامعائي عن طريق اكل أو شرب ملوث ،، والحمد لله ربي خلصني منها
راح جيگ يم دكتور اخصائي بالجهاز الهضمي وكايله نفس الكلام
وصفله علاجات و مغذيات خاصة
ولازم يبقى مدة ياكل بس اكل خفيف وسوائل لان مصارينه تخدشت وصار عنده اسهال دموي
امي خصمت الموضوع وكالت //الحمد لله والشكر لله من ربك العظيم خلصك
أن جان سحر أو جان مرض
الحمد لله من عديت وانكتبتلك العافية
منى/البيت مخبوص على محمود
متت من الخوف و القهر عليه
وكلشي بصفحة وابويه بصفحة
خطية سكره بقى مرتفع صارله اربع ايام من الهبطة
-واسلام شل حالي اصعده فوك يبجي ويلج نزليني جوه ...
انزله جوه هم يبجي ويلج انطوني افراح عباله لعابة
-رفل صارت تقسي وياه
تدفعه ما تخلي يوصل يم افراح
ومرات تضربه على ايده من يهمشها
-اركان دوامه يومي يروح ويرجع للدوام
وهو هم لاحظ قساوة رفل ويه اسلام
وضاج منها
كتله /ميخالف اتركها ولا تحاجيها لان افراح صغيرة وتعلقت بيها
-محمود استعاد نشاطه بس مو هذاك الحيل
يعني الواحد من يشوفه يعرفه مريض
وماله خلك
فرح/رجع محمود يبات يمي
بس ما يتقربلي لان حيل تعبان
ولان أني نفسه حتى ما يحظني
يكول// من احظنج ما اسيطر على نفسي
خليني بعيد بس المهم موجود وياج بنفس الغرفة
-افراح بس بليل اخذها من رفل و انومها يمي ،، الحمد لله رضاعتها تحسنت وصارت ترضع اكثر
-صارت حفلة نيشان أقبال ما رحت
هم محمود ماله خلك صح راح للدوام بس بالكوة ،، وهم اخاف على افراح من الهوسة والنفس وهي بعدها طفل نفاس واخاف عليها
منى/رحنا اني وامي و رفل الحفلة اخذنا اركان ،، وجانت الحفلة حلوة
واقبال طالعة تخبل
ام ضرغام جابتلها فستان الحفلة من بغداد
ومن الصبح جايه عليهم وجايبة ام صالون هي تعرفها وياها من بغداد وناصبة أقبال بهذاك المكياج والتسريحة التخبل
-ثاني يوم من داوم اركان اجه يضحك ويسولفلي يكول / ضرغام تسودن وشخط عقله خلص اليوم بس صفنات ،
ومشتري تلفون جديد وراح من الدوام
لبيت عمه نجمة يودي لأقبال
فرح/الايام عادية مرت ما بيها جديد
نفس جدول كعدتنا ونومتنا وشغلنا بالبيت
الولد يرحون ويرجعون للدوام
وابويه بين البيت والشغل
وامي ويانه بالبيت تنصح هاي وتعلم هذيج
وعرفت منها محمود هاجر رفل لان متعاركة وياه
منى/حياتي عادية مثل حياة اي مراه عراقية
بين شغل البيت واسلام و اركان
-بس عندي مصيبة ويه أركان
كل ما يتقربلي يسألني //شربتي الحباية
اجاوبه//اي شربتها
وهو جذب اني اشمرها جوه الكومدي
ومن يروح الصبح للدوام اسحب الكومدي واطلعها اشمرها بهوسة الغراض الموجودة بالسطح
واحنا رحنا للحنة صارت حفلة حلوة
وهلكثر فيكت وتنعوصت أقبال
عوزها بس بعد تلعب دقلات
-بيوم زفتهم رجعنا وياهم لبغداد
ابويه ومحمود وفرح رجعوا للبيت
بس اني و رفل وامي واركان طلعنا وياهم لبيتهم ،، بعتبار اركان صديقه
مو أقارب العروس
-صلوات على النبي بيتهم قلعة
مبينين ناس راقين ومثقفين
ابو ضرغام متوفي
اللي عايشين بالبيت أمه وأخته صغيرة
وعنده أثنين خوان
واحد متزوج وكاعد وياهم
والثاني هم متزوج بس طالع من البيت
واختهم الجبيرة متزوجة ابن خالها
-عشاهم مو مثلنه هوسه ومواعين
لا أكل سفري وشي مرتب ونظيف
وحاسبين أحساب الكل صغار وكبار
اركان يكول /اغلب الحاضرين من الزلم
عساكر وياهم بالدوام واصدقاء ضرغام
-تقريبا بعدهم يعشون بالناس
وهوسة النسوان والجهال
كالوا// سوا طريق الشباب راح يزفون صديقهم العريس
اللي ركضت تلبس حجابها
واللي تستر نفسها لان لبس مشلح
-ام ضرغام
واخته المتزوجة
وعمه نجمة
صعدن اقبال الغرفتها
اني استغليت الزفة والهوسة وكعدت أدك سوالف ويه هالة تشاورني// ان أقبال متراهنة ويه البنات تخلي الليلة ضرغام يركض وراها ويتوسل بيها وبس يريد رضاها
-عمام ضرغام و خواله و أصدقائه
كلهم يهوسون وفرحانين بي
على كولت اركان/ ما صدكوا أتزوج
صار عانس وداسه القطار ومرده يلا وافق على الزواج
زفوا الغرفته ،بالهوسات والهلاهل
-بعد الزفة الناس طشت
والنسوان خفت
اركان صاحلنا حتى نرجع للبيت
عمه نجمة وعمه كمرة يبقن بيت العالم
كاعدة الململم بهوسة اسلام
وادور وين خليت جنطة الغراض
-وما نشوف غير ضرغام نزل مكشر
وصاح على أمه
كتلني الفضول الا اعرف شصار
شبسرعة كمل المهمة شنو ملكوف خو ما ملكوف ما صار نص ساعة من زفوه
-صعدت تركض اخته المزوجة ،، و امه
وعمه نجمة وياها عمه كمرة ،
واني شمرت اسلام على امي فاطمة وركضت وراهن
-عزززة مو غرفة طاكة بيها عبوة
البدلة مشمورة بجهة
البركع وتاج التسريحة بجهة
النزلة مال جرباية واكعة بالكاع
الملابس هنا وهناك مطشرة
واقبال شبعانة بجي
يمه هاجم عليها أمرعدها تمرعد
تكول/ما قبلت يتقربلي لان خفت من عنده وصديته وهو تخبل عليه
-عمة نجمة مارضت وكامت تحجي
//ليش هيجي مأذيها
وشعنده مستعجل ومنو راكض وراه
وليش ما اخذها على كد عقلها
-ام ضرغام شافت نيشانها
وكالتلها //شو كومي اوكفي داشوفج خاف مجروحة اذا نزل عليج دم هسه اخذج للمستشفى
وكفت اقبال بس شنو ترجف
امه كالت/ لا الحمد لله ماعدها نزف ما بيها شي
ماما لا تخافين
هسه يصعد ضرغام ويتعذر منج
وهو يعرف شلون يراضيج
واعذري لان تصرف وياج بهل طريقة المتسرعة لان جماعته خابصي
وهو جبير بالعمر وما متقرب المراه من قبل ومن شاف هيج جمال كدامه تهور وما سيطر على نفسه
-هو صعد ،،
وكدامنا كلنا تقرب عليها وبوسها على راسها وهي بس تشهك وتبجي وهيجي ترجف
كال/مشكورين على جهودكم المبذولة
ماقصرتوا أسمحولي أشوف مرتي زعلانة عليه اسمحولي أرضايها
-اني أول وحدة تقدمت وبوست اقبال
باركتلها ونزلت قبل الباقيات
عزززة هو شكبره وشكده جنا حايط
مفترسها للبنية ،،
الحمد لله بليلة عرسنا اركان جان حباب ومتفهم وصدك الموضوع يبقى يم كل شخص وعقليته
اخذت اسلام وشلت جنطته
وامي ورفل يشمن كدامنا
وطلعنا على اركان
-عمه نجمة وعمه كمرة جلبت بيهن ام ضرغام كالتلهن // الصبح يوصلكم ابو محمد
يصير اخو ضرغام الثاني
فرح/مشت الايام عادية ما بيها جديد
بس المشكلة الصارت ويايه هي حالة غريبة
بس أني متأكدة مو متوهمة !!
من ادخل للحمام اسبح انتبه على الباب احس اكو واحد يباوع عليه
-تكررت مره ومرتين وثلاثة
كلت لامي على الموضوع كالت //اسم الله لان
نفسه وما طالعة الاربعين وتدخلين بدون
ماتشيلين سجينة فتتخيلين اشياء ما موجودة
-كمت من ادخل اشيل السجين ويايه
ونفس الحالة احس اكو واحد يباوع عليه
اكو زرف كلش صغير بصف سرگي صاير
من اثر اللحيم لان باب حمامنا حديد
-حاجيت محمود يابه أني متأكدة ما متوهمة
اكو شخص يراقبني من ادخل للحمام اسبح
يضحك ويكول /هذا اني مشتاقلج واباوع عليج
-مر كم يوم خلصت شغلي ودخلت اسبح
الولد بالدوام
وابويه بالشغل
وامي و منى ملتهيات بالمطبخ
ورفل ملتهية ويه افراح
وهم واحد يباوع عليه !!!
رجع محمود من الدوام وكتله//محمود لا تجذب عليه انت بالدوام واني دخلت للحمام ومتاكدة واحد يباوع عليه
يبقى يضحك يكلي/هذا اسلام لعد
-محمود لا تخبلني اسلام صغير ومايوصل
للزرف الموجود بالباب
يبقى بس يضحك يكول /انتي متوهمة
-طلعت الاربعين وامي سبحت افراح
من الصبح وشطفت جسمها بمي وملح
وسبحتها بحلقتي الذهب والدنبوس الجبير
والخضرمة ام سبع عيون الزركة
-واني هم غسلت وشطفت جسمي
وغسلت غسل الاربعين وهم غسلت بمي وملح
-ومحمود صح ينام يمي كل هاي الفترة بس ما يتقربلي لان اريد احفظ افراح للأربعين
علمود يصير عدها بخت
1
-وافراح بعد تعودت أبقيها يمي بس بليل وطول النهار عند رفل
-من غسلت غسل الاربعين الصبح
اشوف محمود يلوب عليه
بس كلت خلي شوية احمسه
بس هو وين يصبر استغلني أبشع استغلال
سوه شغله أستغربتها !!
سألته //ليش هيجي سويت !؟
كال/هذا عزل خارجي حتى ما تحبلين بسرعة انطي مجال لروحج
كتله/خو اشرب حب مانع
كال/لا يسويج اعصاب وتتغير عندج الهرمونات
-الجو صار حار
وبعد ما بيها مجال
لازم نكرف البيت ونغسل الزوالي
امي خلال فترة شهر الرابع ما قبلت نشيل الفراش تخاف على اسلام وافراح من البرودة
-اني ومنى وامي كرفنا كل البيت
وشكو زوالي ،، ومداد غسلناهن
ومن تنشف القطع يشروها الولد على السطح
-بهاي الأيام افراح الحمد لله صارت شوية احسن ونشنشت وكامت تبجي صوتها صار مثل صوت اي طفل من يبجي ،ورضاعتها زينة ترضع على صدري
وترضع من رفل لون بشرتها نفس بشرتي
وشعرها بي شكار
-محمود يموت عليها بس يرجع من الدوام يجي يركض عليها ،
-واركان اذا موجود يبقى شايلها ويفتر بيها ،
//يابه صغيرة ما تحمل شيل
يكول/مالج دخل تطلع قوية على عمها
-وابويه بس يرجع من الشغل صاح /وين عيون جدهم يقصد على اسلام و افراح
منى/لاحظت نفسي اني مو طبيعية عندي نحول ،، وكمت بس أجطل هنا وهناك وهواي انام ، ومابيه حيل اشيل روحي
اركان/منى شبيج شو مو طبيعي وضعج
منى /ما اعرف شو مالي خلك
واريد بس انام
اركان/اكلج خاف عندج تيفو
منى/ما صاير عندي قبل
اركان/فد شوية اخذج اسويلج تحاليل
منى/وعلى كلامه بس ارتاح شوية
وأتغده ،، وهيجي غفه غفوة صغيرة صار العصر
بدلنا واخذني اني وامي و رحنا للدكتورة
حجيتلها عن حالتي
وكتلها // شاكة عندي تيفو
كتبتلي مجموعة تحاليل ورحت للمختبر والبنية سوتلي تحاليل دم و ادرار
-طلعت النتائج ورجعنا على الدكتورة
كالت /مبروك حامل
-هواي فرحت ما شاء الله ما توقعت احبل بهل سرعة
-امي هواية فرحت
ومن طلعنا من غرفة الدكتورة
ضحكت بوجه اركان وكالتله/بالمبارك يمه مريتك حامل
-هو عيونه صارت بكصته
وصك على سنونه يطلع صوت الجزه من حلكه يخوف ،، وجه انكلب صار احمر
مايكدر يعيط لان العيادة مليانة ناس
جرني من ايدي بقوة خلع جتفي من قوة الجرة
-رجعنا للبيت والطريق كله ينافخ
بس دخلنا للبيت وعاط
ابويه موجود وكاعد بالهول
ومحمود كاعد يكلب بالتلفزيون
ورفل كاعدة على جهة وبحظنها افراح
فرح بالمطبخ تكمل العشه
اركان /تعااااااي هنااااا
من أنعل أاااابوووج لابوووو الخلفج بببببنت الكلب تلعبييييين على شواااااربي يووولي جنوووود تخاف مني وأااانتي تلعبين عليه
منى/ اتخبل عليه من عصبيته وعياطه خفت وركضت ختلت وره ابويه استغفر الله عبالك مو ابنه وحبلانه من غير واحد
عادل/شبيك لا تصرخ شكوووو
فاطمة/يمه صلي على محمد شبيك تخبلت
على البنية كول الحمد لله على رزقك
اركان/بت الجلب الكدامج
هاي التسوي روحها مسجينه ،
كل مره اسالها شربتي زقنبوتج
تكلي اي ،،
*يمه ضحكت عليه تعرفين
شنو ضحكت عليه
اني ماأمن ومرتاح وياها
علساس شاربه الزقنبوت
وهسه تكلي حامل ،
عادل/وشبيك ضايج وتعربد على روسنا
واذا حبلت الحمد لله هذا رزق ربك
أعطاك وما أعطى غيرك
اركان/هسة اكوم ادفرها واطرحها
شوفي يالصفرة تولين وين ماجان وتروحين
تذبينه ما أريد جهال
عادل/اكل ووووحل شنو أذبه
وليش أذبه
منى/لااا ما أذبه اريد اصير ام
اركان/من أنعل ابوج لا أبو حتى أمج تذبي يعني تذبي
فاطمة/يمه شبيك تخبلت عليها
ليش ما تريد جهال منها
اركان/يمه هم تجيب و تموت
ترى بعد ماعندي كلب يحمل الصدمات
رسل راحت من ايدي واخذت نص حيلي وسحكة أسلام اخذت الباقي
ووكعت محمود قبل كم يوم كسرت ظهري وانوب هل مكموعة تحبل وتموت بالولادة غير اموت وراها
منى/شبعت بجي
ابويه كعدني بصفه وبوسني على راسي
فرح وكفت باب الهول وتباوع علينا
ورفل مستغربة من ردت فعل اركان
محمود/يالفهيم يعني اذا طرحت الطفل هسه وصار عدها نزف الله لا يكولها ماتموت
اركان/لا ماتموت لان الطفل بعده صغير
محمود/يالدكتور يالشاطر الأجهاض أخطر من الولادة ، الاجهاض هواي بي مضاعفات خطرة على حياه المراه يجوز تموت بالنزف ويجوز تصيبها جرثومة
ويجوز يخرب رحمها لاي سبب كان
اما الولادة هاي سنة الحياة و ربك يسهل امورها بمساعدة طبيبة او قابلة مأذونة تولد بخير وسلامة وتكوم على حيلها
فاطمة/يمه كول يا الله مو هل فرح ولدت بسلامة عند الجدة
اركان/يمه ترى خايف عليها
تعرفين شنو معنى اموت وينشف دمي بعروكي اذا سمعت بمراه تريد تجيب لو عدها نزف اكول راح تموت
-وداعة اسلام بيوم ولادة فرح زعت العافية ،أنحمست روحي لحد ما كامت بسلامة بكل دقيقة اكول راح تموت
فاطمة/كول يالله يمه ،وادعيلها تكوم بسلامة هي ووليدك والله يفرحك بيهم لو كل واحد يسوي سوايتك من يبشروابخبر حبالة مريته جان الوادم بطلت ماتخلف
اركان/كايل يالله
من هسه راح اشيل هم
ويتيبس كلبي بيوم ولادتها واذكرج بهذا الحجي
-كومي جيبيلي كلاص مي نشف ريكي
فرح/اباوع عليه يرجف من الاعصاب
كعد على القنفة كبال منى
هو صدك يخاف
خطية بيوم ولادتي صوفر وجه كلت راح يتخربط
-منى خاتله بصف ابويه وشبعت بجي وامي كعدت بصفها تهدي بيها
ومحمود يضحك كام وكعد على كرسي التخم القريب على التلفزيون
ورفل ترضع باافراح مغطية صدرها
بشالها
//منى ابقى كاعدة اني اجيبله مي
رحت جبتله دولكة مي ورجعت
اخذها من ايدي وشربها
اركان/كومي اصعدي كدامي فوك
اريد احجي وياج لا تبقين تعوين
منى/حتى فرحتي ماتت بكلبي
شكثر فرحت بالبداية
بس من هوسته وعصبيته راحت فرحتي
-ندستني امي عود اسمعي كلامه
وكومي صعدي فوك
*لفيت عبايتي وصعدت فوك
عيوني متشوف من الدموع
هواي انقهرت
عادل/ممنوع تمد ايدك عليها
العب بيك طوبة وأبيتك بالشارع
اركان/يابه تراها مرتي وام جهالي
وما لاكيها بالشارع
وأني مو لهدرجة همجي واضرب مراه حبلة
بس اعصابي تلفت من خوفي عليها
فاطمة/يمه دكول يالله واصعد راضي مريتك
وطيب خاطرها بكلمة طيبة
والله يسهل عليها ويكومها بالسلامة
-صعدت فوك من كل عقلي اريد ابسطها من خوفي عليها بس استخطيها لان هواي اذيتها وضربتها من جنت في حالة الخبال
-دخلت للغرفه وطبكت الباب ومو بقصدي اخوفها بس أريد ابدل حارة حتى اكعد احاجيها واعتذر منها فتحت الحزام
وهي عاطت
منى/الله يخليك لا تضربني
أي ميخالف اروح للجدة و أذبه
وروح جديتي هو ابنك
وما اعرف رجال غيرك
اركان/لا شوف من خبالاتي شسويت بيها
من كثر خوفها كامت تشخبط
تقربت عليها بقصدي احضنها
كسرت كلبي من غطت وجهها بيدها
(حركة الخوف والدفاع عن الوجه من الضرب
حظنتها بقوة وبوست راسها
//شبيج تخبلتي مو بقصدي اخوفج بس اريد ابدل حارة وبعدين شنو هذا التشخبط
شنو ابنك ،،،شنو ما اعرف غيرك
-كافي لا تبجين شلعتي كلبي يالصفيرة
ول شكثر احبج وكتلج من الصغر انتي معجونة بروحي بس حرامات أكشفت العجن متأخر
منى/من ضمني بحظنه وكع عليه غضب إسمه بجي ،، هسه هو حاضني ويسمعني كلمات حلوة ،،بس ليش ابجي وعيوني تصب
// ترى اني احبك اكثر من روحك واموت عليك ،، من جنت مراهقة اني احبك حتى دعيت على ألمرحومة من وره هذا الحب ولحد هسه متندمة
اركان/وتعرفين اني على شنو متندم حرامات ماشبعت بيج ختلات من جنتي مراهقة ،،اي احجي صدك لا تباوعين هيجي عليه ،،وحرامات ما شبعت بيج استغلال
منى/يعرف شلون يقشمر عليه
يعرف شلون يحركني،،وشلون يرجع يطفيني
// انت واحد واوي محد يكدرلك
اركان/لا أشتبهتي مو واوي
جبوري طعماوي للنخاع
منى/ياااا شوف شلون يفر الحجي
اقصد ثعلب محد يكدر عليك
اركان/اكيد هذا الكلام
اني ابو اسلام والنعم من اصلي
منى /بدون غرور ، بدل وانزل
اريد أروح اساعد فرح بالعشه خطية وحدها تركض
اركان/بس سؤال لان ما اريد ادخل بيناتكم. شو أشوف رفل ذابة استقالة من البيت ليش ؟
منى/لا خطية ترى هي مبتلية با افراح كلشي عليها بس رضاعتها على فرح
اركان/اي اني مناكر هذا الشي
بس مو معناها تحني ايدها وتكعد
وانتي حاجيها بهدوء كوليلها //خفي قساوة على اسلام
منى/مو تخاف لان يهمش افراح
اركان/هذا الحجي مايمشي عندي
مثل ما اسلام غالي عندي
افراح بعد غالية عليه
وهو طفل خليها تاخذه على كد عقله لو اتصرف وياها غير تصرف
-تعاي قبل لا تنزلين
من هسة اكلج من تولدين روحة للمستشفى ماكو !!.
واذا جبتي ولد شنو نسمي
واذا بنية شنو نسميها !؟
منى /ما شاء الله هواي مستعجل
بعد وكت على كل هاي الأسئلة
اركان/شو تعاي خلي اطلع بيج قهري اعصابي تفور ،،لا دفعين اربطج والله
منى /اركاااان يمعود اسلام لا يفتح بالباب يمعود وخررر ،،ياااا عززة بعيني وخر راح اعضك
مو يبوس لا يتعارك ،، ولمساته خشنة دفعته بالكوة وانهزمت من عنده
نزلت جوه ركض ودخلت للمطبخ
فرح/هههههه مبين خوش لدغج الزنبور الاصفر وراضاج
روحي غسلي وجهج وعدلي كفشتج لا يجي واحد يشوفج هيجي عيب
منى/ماطلعت استحيت غسلت وجهي على السنك ولملمت شعري بيدي من مي السنك
// مو زنبوز كولي حنش بلدغته
فرح/عود ديري بالج على اللي بطنج بوكت اللدغ والدفرات والخراميش
-وخففي من شغل البيت وشيل الثكل اني اسوي كلشي
وهسه بس سوي زلاطة من يمج
-الحمد لله أنجمعنا كلنا على العشه
وكاعدين ناكل بامان الله
وافراح بمهدهاواسلام لطش الا يوكلها خبزة
نقنع بي نريد بس يفك عنها ماكو
يقفل قفلات عمه وابوه
امي قشمرته وباكت الخبزة من ايده عساس اكلتها افراح
ولازم كلنا نكول /هااا عفية اسلام انطيتها عم عم
هي نايمة بمهدها ،، دنك عليها وبوسها من حلكها
محمود/ابن الكلب من خرب شيب ابوك كووووم من يمها
كومي منى شيلي ابنج لو الطشة بالكاع
اركان/هههههههههههه ،الله عليك يا كبير اجمل قصة حب بالعراق تبدي من الطفولة واجمل من قصة يحيى و لميس
محمود/اكل تبن ،،كرت عينك انوب فرحان يالأغبر لو مشايفك مايقلد حركتك
اركان/يابه بكلشي وراثة
مو عمه شايف البشاوات ونفذ بالفارة وهو شايف التلفزيون مو امك ونسوانك متابعاتلي يحيى ولميس وهل قلد حركتهم
عادل/اكل وحل ولا تبقى تلوص بالحجي
اركان/يابه وداعتك ملايص بالحجي ابنك العود ملچ جان لا يغمض ولا يهوودولكف هذولك العرب وفعل فعلته الشنعاء
محمود/طفرت عليه وخنكته والكل يضحك واني شايط ودمي فاير
-حتى مارجعت كعدت على النعمة
استغفر الله دمي شاط ،،ابن المطي فرفحني
-فريحة البنية مسؤوليتج
اذا صار بيها شي أعدمج
وممنوع تخلين هذا الشيطان يوصل يمها
اركان/وشكو مكبر الموضوع اذا لا سامح الله اسلام تشيطن وطلع على عمه واخذ من عنده الوراثة واخترق الحواجز عود هم ياخذها
فرح/الكل يضحك ، وهو الموضوع ميستحق الضحك الصراحة اني ضجت يعني للموت راح تبقى هاي سالفة طامغة بيه واني مالي ذنب بيها ،،وانوب محمود چملها وكام يحجي عليه قفلت فرد نوب بس استحيت اكوم من النعمة هسه يكولون زعلت
-اركان من حجه هيجي محمود ضربه بجهاز التحكم اجتي الضربة بظهره وهو اركان تمدد بالكاع من الضحك
لان محمود ضايج ومن كل عقله وما يقبل اسلام يوصل يم افراح
-انوب الغثني بالزايد رفل كالت /
اي الواحد ميعرف شضامتله الدنيا
بس مو افراح تنخطب الغير واحد
وتلعب وياه شاطي باطي ،وتجي
تنام براس اسلام هو هم ابن اختي وهي بنتي ،بس انتو لا تنطونها لغير واحد
عادل/يابه جفينا الشر
وماله داعي هذا حجيج الماصخ
ترى بسمارج اعوج من دكيتي
فرح/خليت وكمت من النعمة
ورحت لغرفتي شبعت بجي
للموت وتبقي السالفة لاطشه بيه ياربي شنو ذنبي
-دخل عليه محمود بس من صدك مالي خلك اباوع بوجه ،، هواي مقهورة ومغثوثة من السالفة
-بهذيج الساعة أتمنيت متزوجة مخلد
وعارفني مو بنية و ذابحيني اهلي
اهون عليه من كل ما انفتح الموضوع واتعير بسالفة عبالك اني ام الصوج والذنب
-بقى محمود يبوس بيه ويراضيني ويتعذر عن الموقف الصار وعن كلامه القاسي ويايه وعن كلام رفل
-خلصت هذيج الليله بجي وقهر
ونمت مغثوثة ،
-كعدت الصبح ونفس الجدول اليومي مشيت محمود للدوام ،واركان نزل سبح وهم ريكته ومشى الدوامه
-منى خاملة ومالها خلك تريد بس تنام
صعدت جبتله هدوم وسبحته من الصبح مدبك من الحر
-بعد ما تريكنا ،، ابويه طلع للشغل
كمت كشيت الهول بمسحة سريعة علمود يبرد الكاشي
وامي بحظنها افراح واسلام يحومي عليها تخاف يهمشها كلساع وعاطت //يااا ووولك ايدك ، ياااا مو هيجي ووولك يمه داده
دخلت على المطبخ ،،
نزلت منى ما رضت اسوي شي
هي تكمل تنظيف بدالي
دخلت سحبت وطلعت لفت شعرها وتريكت وبلشت بتنظيف المطبخ
-ماعندي شي ضوجة شسوي اذا ماعندي شغل احس اصابعي تكوم توجعني وتبقى تكرص بيه لازم اطلعلي شغلة من جوه الكاع
-كمت و عجنت شوية
وطلعت لية وياها لحم شرح من المجمدة وبصل و كرفس وكعدت اثرم أخبز خبز عروك
-من كاعدين نتريك ابويه كال /مال هسة خبزة عروك وخاثرة تخلي الواحد بي حيل
-منى من خلصت شغلها مشطت
وانجطلت بالهول على الكاشي
تكول /احس جسمي حار
-افراح كامت تبجي اجيت كعدت بالهول حتى ارضعها
-اسلام اجه وكعد كدامي
وصافن عليه شلون ارضع افراح
//منى خو ما اسلام شايفكم بليل وانتم بهذيج السالفة
منى /لا ابد ، مو تدرين انومه وحده بجربايته وينام ويطفى يلا نتقارب
فرح/لعد البارحة شلون بوس افراح من حلكها
منى/هاي صارت مره وحده هو جان نايم وصحى فجاة وشاف ابوه يبوسني
وحفظ الحركة وصار هواي من مضت السالفة
فرح/منى ديري بالج هذا ولد وبعده جاهل وعقله نظيف يحفظ السالفة بسرعة كلشي لا تسوون كدامه خطية يخرب تفكيره
-كاعدين نسولف نزلت رفل صبحت علينا وراحت غسلت وجهها
سمعتها دخلت للمطبخ وسوت ريوك النفسهااتريكت بالمطبخ ،، واجتي كعدت يمنا اخذت افراح من مهدها وبقت تلاعبها وتسولف وياها
-كمت خبزت
ومنى تلكت امي رجعت من السوك
وبلشت تعزل بالمسواك
وامي خلت جدرها على الطباخ تطبخ الغده
-رفل اخذت التلفون من امي
وصعدت فوك تخابر على اهلها
-بعد ماكملنا كلشي وجهز الغده
واجوي الولد من الدوام وتغدينا بالعافية وشربوا الجاي
كل واحد راح لغرفته يرتاح ويغفى شويه
امي رادت اخيطلها دشاديش كودري شوية خفاف للصيف ،كلت استغل الفرصة هدوء
واهم شي أسلام يم اهله فوك ما يهمش وافراح يم رفل فوك صعدتها يمها بغرفتها
-فصلت لامي دشداشتين وخيطتهن الفصال ما يطول بيدي دقايق
بس الخياط لا شويه اعتني بي وارتب الدك
وفصلت اليه دشداشة سويت أردانها جناح فراشة عريض نص ردان
-نزلت رفل وبدت تسألني //شلون فصتلي القماش وحلو الخياط مال دشاديش خالتي وعلميني على مجالج
-شافت دشداشتي كاعدة اخيط بيها. رادت نفس فصالها
كتلها/ اذا عندج قطعة أقماش جيبيها هسه افصلها واخيطها الج
ركضت صعدت فوك الغرفتها
وجابت قطعة الوانها حلوة
فصلتها الها وغيرت بحفرة صدرها
حفرة التفاحة سويتهابس نفس تصميم البدن يصير كصة الجرس يعني من فوك تصير ضابة على الجسم وتنزل من الخصر كلوشة عريضة
وردانها هم سويتها جناح الفراشة نص اردان
-بلشت بالخياط
وخليتلها شغلات ناعمة وبسيطة
اني اشتغل افصل و اخيط
وهي مكابلتني وكاعدة
بس حسيتها قلقة
كل ما ارفع عيني عليها اشوفها صافنة عليه
من كملت دشداشتها اخذتها ودخلت سبحت ولبستها
-من طلعت كتلها//بالعافية حلوة عليج
والوانها زاهية على وجهج
وانطيتها افراح
كمت لملمت مكينتي وهوسة الخياط
دخلت سبحت ولبست دشداشتي الخيطتها
-للعصر بوكت متأخر كعد محمود
كمت أسويله جاي اجه ورايه للمطبخ
عضني من زندي // شهل المتون
زنود الست الحمداني بدهن الحر
-عجبتك الدشداشة الظهر خيطتها
محمود/لو تلبسين كونية هم تطلع حلوة عليج
فرح/فجأة دخلت رفل علينا
محمود جان واكف كدامي
واني محصورة بينه وبين الكاونتر
هو بسرعة أبتعد من يمي
وهي اخذت بطل مي من الثلاجة وطلعت
-بعد العشه كاعدين بغرفة امي
وامي لبست وحده من دشاديشها
بالعافية مضبوط القياس والفصال عليها
منى وامي كالن الرفل //دشداشتج خياطها وكصت صدرها والوانها احلى
من دشداشة فرح
كالتلهن /لا مو هلكد حلوة ما عجبتني
وفرح لو تلبس كونية تطلع حلوة عليها
جسمها متروس وزنودها بيضة وتغري
-منى بقت تباوع بوجهي
حسيتها تعيد كلام محمود علية
وترجعه على مسامعي
-اني من الظهر حسيتها قلقة ومو على طبيعتها ،كلساع اباوع عليها اشوفها صافنة عليه
-دخل علينا اركان و أشر المنى تصعد
هي اخذت اسلام ومست علينا وصعدت
اركان/اكول ام الفيران حبابة طلب صغير بعد اخيج
فرح/هسه غير يحجي سوها رطينة عليه
على كولت اهل المسلسل ادخل بالمفيد
اركان/هاا خوش حجي
عبالي شويه اقدملج عريضة وكلت خطية
صارت ام ولازم أكبرها شوية بس مايفيد وياج الا لقبج القديم فارة النضد
هسة نعيد الطلب من جديد
فارة النضد باجر اذا عندج مجال مشتهي باجة على الغده
منى تكول تلعب روحي من شوفة اللحم
وامي الغالية ما تسويها دسمة نفس طبخج
تخاف على سيادة الوالد
فرح/تدلل من هاي العين قبل هاي العين
كم ابو اسلام عندي اني
محمود/واني وين صار مكاني يلا كدامي
على غرفتج كومي انتي وبنتج يلا
فرح /اي كايمه تصبحون على خير جميعاً ......
شكرا لزيارتكم عالم روايات سكيرهوم
