رواية بنت الكهوجي الفصل الثلاثون بقلم احمد
ياقوت : من خلصت الاغنية رحنا اني وياسمين حطينا الحلويات بصحون والببسي بگلاصات ورجعنا للصالة ووزعناهن وبلشت التعليلة
وهنا استلمونا زيد وزياد تصنيف وضحك لحد ما صارت الساعة 12 بالليل واية نست حتى النتائج يوقتها من گد ما حجينا وضحكنا
من خلصت التعليلة راحو زيد وزياد لبيت اهلهم واني والبنات نظفنا الصالة ورحنا للغرفة ولان تأخر الوقت فورا نمنا اني واية ما حجينا بشي ثاني
گعدنا ثاني يوم ورجعنا لنفس التوتر وتعرفون خلگ وزارة التربية شگد مزعج بحيث يخلون الطلاب يصير بيهم شي من التوتر لحد ما يطلقون الدرجات
العصر جانت بعدها النتائج مو طالعة واخذت اية للحديقة علمود شوية تغير جو وطول الگعدة وهي مركزة بالتيلفون تنتظر النتائج
اخير شي گالت اي ولج نزلوها نزلوها گلتلها ادخلي بسرعة شوفيهن وبسبب الضغط عالرابط جان كلش يتأخر تقريبا نص ساعة لحد ما فتحت
جانو اهلها ورانا بس ماندري بيهم ولان اسمها بحرف الالف جان بالبداية طلعت الدرجات صارت ترجف ووگع التيلفون من ايدها
اخذتو باوعت معدلها 99.86 حضنتني وانفجرت بالبجي بس جانت تبجي من الفرح لان اخيرا حصلت المعدل الي تستاهلو
تميم : هاي دموع فرح لو حزن
اية : راحت ركض وانطتو التيلفون
تميم : باوع للدرجات ورجع باوعلها وهو مبهور باختو
زيد : دحجي شگد معدلها هالفصعونة
تميم : ولكم هاي الدكتورة اية وحضنها كل قوتو
جانو زيد وزياد مو مصدگين اخذ التيلفون زيد وشاف الدرجات وراح يركض لبيتهم ويصيح نصييييير صارت عندك دكتورة
ما احجيلكم عالفرحة الي صارت بالبيت خصوصا فرحة اية وتميم وگوة سكت اية من البجي رغم انها جانت تبجي من الفرح
تميم : حضري نفسج
اية : لشنو
- للهدية
- شنو من هدية
- روحي بدلي ملابسج وتعالي
- تمام
راحت ركض بدلت ملابسها ورجعت واخذها بالسيارة وراحو واجى سأل عنهم زيد گلنالو طلعو شوية ويرجعون
ورا ساعتين تقريبا رجعو جان مشتريلها دبدوب بحجمها وتخم ذهب وحلويات تارسلها السيارة وملابس ومكياج وكلشي يخطر على بال البنت
واول ما وصلو دزو عليها ابوها وجدها وراحت ورا شوية رجعت بايدها فلوس وصارت تعد ذني من بابا وذني من جدو وذني من فاضل ومالك رشيد زيد زياد
يعني حتى زيد وزياد الي بعدهم يدرسون انطوها هدية النجاح وبلشت اتصالات الگرايب على تميم يباركولو بنجاح اية وبعضهم يسألون عن معدلها لان ما يعرفون يطلعوه
تميم : باجر نسويلج احلى حفلة
الحجية : ما يحتاج حفلة يمة
- ليش يمة
- وليدي الله وفقها فمو لائقة من الله وفقها نرجع نعصيه بهالسوالف
- والله صحيح بس علمودها
- اذا تريد تعبر عن فرحتك بيها جيب حلويات ووزعهن على اهل المنطقة وتبرع بفد شي للفقراء احسن من الحفلات والاغاني والهوسة
- شنو رايج اية
اية : اني ماريد شي ماطول نجحت ما يهمني شي
تميم : هاي هي يمة لعد على رايج
ياقوت : حضرنا العشى اني وياسمين واية راحت اخذت غراضها للغرفة وبين ما وصلتهن كلهن حطينا العشى اني وياسمين
تعشينا وغسلنا المواعين وصلينا العشاء واجن البنات يباركن الها وكالعادة صارت تعليلة من العمر ويا البنات وزيد وزياد وتميم
جنت اني من اكثر الناس فرحانة لاية لان جنت وياها واشوف شگد تتعب وتضغط على نفسها وبالاخير حصلت المعدل الي يليق بتعبها
اية : ترا النجاح هذا مو بس الي هذا النجاح لكل الي بالبيت هذا وخصوصا ياقوت وتميم هم اكثر ثنين ساعدوني ووگفو وياي
زيد : يعني اني هم وگفت وياج مو
اية : ترا اعرف سوالفك من جنت تزعج ياقوت لان تمنعك تصعد تلهيني
زياد : معليج بيه اني وگفت وياج
اية : انت زين من شفتك بعد الامتحان
رشى : ولك زياد خاف عاشق واحنا مانعرف
زياد : احم واشر باصبعو على زيد
رشى : باستغراب .. شنو يعني
زياد : الاخ عاشق مو اني
رشى : جذذذذذذذب
زياد : اي والله
زيد : الله يهجم بيتك حطيتني بلسان رشى هسا بس ربك يخلصني منها
كمل كلامو وانهزم ولحگتو رشى علمود تعرف منو هاي ورجعت گالت انهزم وسألت زياد گال ماعرف منو بس اني اعرف زيد
والي اثبتلنا ردة فعل زيد لان لو مو صحيح جان انكر بس ردة فعلو كأنها اعتراف انو فعلا عاشق ويوما ما راح نعرف سعيدة الحظ
خلصت اليوم وثاني يوم جاب حلويات تميم ووياهن صحون سفري حطينا بالصحون حصص وغلفناهن بنايلون ووزعوهن هو واخوانو
وافتر على بعض الفقراء انطاهم فلوس كصدقة الهم ورغم هالشي ما يصير ينحجي بيه بس تگدرون تعتبروها نصيحة تسووها بنجاح اولادكم
بدال ما تسوون حفلات وتعصون الله عز وجل تگدرون ترضون الله وبهالطريقة اكيد ربنا راح يوفقهم ويوفقكم بعد اكثر
مرت الايام بروتين طبيعي وبلشت اية تستعد للجامعة وقدملها تميم بالجامعة الي هو يداوم بيها وبقى بس القبول علمود تداوم بيها
اني جان موضوعي شوية صعب
لازم نروح لبغداد ناخذ كتاب نقل ونجيبو للانبار وخصوصا بعد وفاة ابوي صار الموضوع اصعب من قبل لان تميم ما يندل ببغداد ومو هو ولي امري
والمشكلة لحد الان مو مطلعين شهادة وفاة لبابا فتميم گال خلي نسويلو شهادة وفاة قبل ما نسويلج نقل افضل وبهالحالة لازم نسويه ببغداد
والسبب انو ما طلعنا شهادة وفاة لبابا اول ما توفى ولازم اول شي نسويه نطلع تقرير وفاة من المستشفى الي جان يراجعها بابا
بعدها اسوي وكالة لتميم بالمحكمة علمود هو يگدر يكمل الاجراءات ويطلع شهادة وفاة لبابا من بغداد لان اندفن بيها فاتفقنا قبل بداية الدوام نكملها
وفعلا بداية الشهر التاسع بلشنا بيها اول شي رحنا اني وتميم للمستشفى وطلبنا تقرير طبي يثبت وفاة بابا ولان تأخرنا جان لازم نجيب شهود على وفاتو
فاتصل تميم على ابوه وگالو يجي هو واي واحد من عمام تميم علمود يشهدون وبقينا ننتظرهم لحد ما اجو ابو تميم وواحد من الجيران
وويا الواسطات بسرعة طلعوها ولان تأخرنا بيها رجعنا للبيت وثاني يوم توجهنا للمحكمة واول شي سوينا استمارة توكيل من مكاتب الاستنساخ وجان تميم يمشي بيها واني بس امشي وياه وانفذ الي يطلبو مني
وما كملناها باول يوم فرجعنا للبيت وثاني يوم رجعنا للمحكمة وقدمناها للقاضي ولان بابا توفى من زمان فتعقدت الشغلة
فصار بيها تقرير من الشرطة وما اكتفى بتقرير الطبي وتميم گوة بقى ساكت لان دا يصعبوها على شي ما يسوا
بس المشكلة مجبور ينفذ لان اي كلمة يحجيها ممكن يلغون الوكالة كلها ويتورط بيها فانجبرنا نسوي تقرير شرطة عن الوفاة
بس الحمدلله الشرطة ما صعبوها لان موجود تقرير طبي مصدق من المستشفى انو متوفي فكملو الاجراءات بسرعة وحتى شهود ما طلبو
ورجعناها للمحكمة بس بسبب الازدحام ما لحگنا ندخل للقاضي ورجعنا للسيارة وجنت بنص هدومي من الفشلة من تميم
فوگ تعبو الي دا يتعبو علمودي دا تتعقد الشغلة وكل ما نگول خلصنا تطلعلنا شغلة تغثنا اكثر من الاول ولا اني الي احد غيرو ولا هو يگدر يعوفني هيج بدون مساعدة
ومن رجعنا للسيارة ما حجيت شي لحد ما رجعنا للبيت وثاني يوم جان اليوم الحاسم رحنا للحكمة واخيرا القاضي كمللنا الاجراءات وانطى وكالة لتميم
رجعنا للبيت وجنت مفكرة انو انتهى الموضوع لان ما جنت اعرف بالاجراءات كلها فعبالي بس اطلع وكالة لتميم وهاي هي
بس من رجعنا للبيت صدمني تميم من گال تحظري انتي وياسمين علمود باجر نروح لبغداد نكمل شهادة الوفاة ونقل المدرسة ونرجع
الحجية : ليش تاخذها مو سويت وكالة
تميم : يمة ما تعرفين شيصير وياي ممكن احتاجها بعدين شيوصلها ونقل المدرسة لازم هي موجودة
- ووين تبقون هالفترة هاي
- يا اما نبقى بفندق او نروح لبيت اهلها بين ما نكمل
ياقوت : من گال بيت اهلها فورا انتبهتلو لان جنت قبل فاقدة الامل انو اشوفو مرة ثانية
الحجية : يمة البنية ما تتحمل هالضغط هذا ما شفت شصار بيها ذيج المرة بالمقبرة
ياقوت : بلى اتحمل خلي نروح لبيت اهلي بدال ما نبقى بفندق ويصير المصرف هواي على تميم وهم ناخذ راحتنا اكثر وازور جارتنا ام فائق
تميم : خلص لعد باجر نروح لبيتكم بس من هسا اذا شفتج ما تگدرين تتحملين نروح لفندق
ياقوت : تمام .. شگد نتأخر هناك
تميم : ماعرف احتمال يوم واحتمال اسبوع واحتمال شهر مانعرف بالضبط بس اكيد نتأخر لان هيج اشياء ما تخلص بسوالف
ياقوت : شكرا دا اتعبك هواي وياي
تميم : ياسمين جاوبيها
ياسمين : انجبي ياقوت
تميم : ياسمين صخمتيها
ياسمين : اعتذر ياقوت
ياقوت : هههههههههه تمونون كلكم
ياسمين : اروحلج فدوة
بوية بذيج اللحظة التوتر عندي صار الف واحس جسمي صار يرجف من التوتر واريد بس يخلص اليوم علمود يجي باجر واروح لبيتنا
گمت منهم ورحت للغرفة واجت وياي اية طلعتلي جنطة من عدها حطيت بيها ملابس الي وكم غرض من المهمات مثل مشط وزيت شعر ومنشفة
اية : ولج راح اشتاقلج اذا تأخرتي
ياقوت : تشتاقلج العافية لازم اروح مو تريديني اكون مستقبلي
- اي اكيد بس خايفة تتأخرون هواي وراح تروحون كلكم بس ماما تبقى هنا
- ما نتأخر إن شاء الله بس شعجب تميم يريد ياخذ ياسمين ويانا
- لان ما يصير تروحين انتي وياه وحدكم وخصوصا ان هو غريب عنج مو من گرايبج ولازم تكون وياكم مرة ثانية گدام الناس
ويريد ياخذ ياسمين لان ماما جبيرة بالعمر وما تگدر تساعدج اذا احتاجيتيها خصوصا انو بيتكم هسا يرادلو تنظيف اول ما تروحون
- بيتنا ننظف بس المكان الي نحتاجو
- مع ذلك لازم تساعدج بالتنظيف ما تگدرين وحدج
- ولج صدگ الشباب الي حجى عنهم بابا اذا عرفو اننا رجعنا وماكو بس اني وياسمين ممكن يجون بعد ما يطلع تميم
- بخوف .. ولج صحيح شلون نسينا هاي
- ماعرف بس لازم نگول لتميم
- روحي انتي احجيلو
- وليش مو انتي
- لا فدوة احجيلو انتي
فهمت اية انو خجلانة منو لان الموضوع يخصني وماگدر احجي بيه ويا تميم فالاحسن هي تحجيلو گالت لعد تعالي اسمعي الحجي
گمت وياها ومن نزلنا سويت نفسي رحت للمطبخ ووگفت خارج الصالة يعني اسمعهم بس ما يشوفوني لان گدامي حايط
دخلت يمهم اية وسوت نفسها على اساس هي تذكرت گالت تميم مو اكو شباب حجى عنهم ابو ياقوت قبل ما يتوفى وبسببهم اجو هنا هو وياقوت
تميم : اي صحيح
- وشلون تتصرف بهالموضوع
- معليج كلشي محسوب حسابو
- شلون محسوب حسابو خاف يكونون هواي ويأذوكم وانت وحدك هناك
- لا ما يأذونا حطي رجليج وايديج بماي باردة
- تمام
الحجية : حجي خيتك صح يمة الي يفكر بهيج اشياء ما يوكف بوجهو شي
- لا يمة يوكف بوجهو الشيخ تميم واذا بيهم خير يفكرون مجرد تفكير ان يأذونا الا امحيهم من ارض الله هم وشكو واحد يطلع وراهم
- الله يحميك يمة ومع هذا اذا حسيت الوضع مو امان لا تبقى ببيت ابو باسم
- تمام يمة ما يصير خاطرج الا طيب
ياقوت : كلام تميم طمني وحيرني بنفس الوقت منين اجتو هالثقة هاي ان ماراح يفكرون يجون لبيتنا من يطلع الشغلة غريبة
بس يلا اهم شي ان نخلص من هالمعاملات ونرجع هنا بعيدا عنهم وعن افكارهم الوسخة مثلهم الله ينتقم من شكو واحد يفكر مثل تفكيرهم
تميم گضى اغلب وقتو خارج البيت بس وقت الاكل يجي ياكل عالسريع ويطلع وتوقعتو دا يكمل شغلو لان راح نتأخر ببغداد
وكلام اية عنو ان ياخذ ياسمين علمودي خلاني كلش احترمو دا يفكر بسمعتي قبل اي شي ثاني صدگ هالانسان واعي وصان الامانة
من صارت الدنيا ليل اخذتلي دوش وجهزت ملابسي الي البسهن الصبح ووياهن العباية والخمار وكالعادة بهيج ضروف ماگدر انام
بقيت اتگلب هواي يلا غفيت شوية وويا الاذن گعدت صليت ولبست ملابسي وطلعت جانو گاعدين ياسمين وتميم ودا يتجهزون
رجعت نزلت جنطتي وخليت الخمار بالصالة وساعدت ياسمين بالريوگ ومن تريگنا وخلصنا اجن الحجية واية ودعننا قبل ما نروح
تميم اخذ جنط الملابس واني لبست الخمار وگلت ياربي احمينا وسهللنا ورجعنا سالمين اللهم استودعتك انفسنا ومن معي يامن لا تضيع عنده الودائع
وتوكلت على الله وطلعت ركبت بالسيارة وانطلق تميم باتجاه بغداد وهالمرة جان الطريق عبارة عن ارض صفرة لان نهاية الصيف
جانت كل الاراضي الزراعية محصودة وما بيها بس بقايا الزروع اليابسة وبعض الاغنام الي ترعى بيهن بين مسافة ومسافة
بقى يمشي تميم ومن طلعت الشمس احتر الجو وسكر الجام وشغل التبريد وصارت السيارة تخلي الواحد غصب عنو ينام بس شينومني اليوم
من تقربنا على بغداد مثل ذيج المرة وگف تميم وبحث عن الحي الي بيه بيتنا واتجه عليه وصار يفتر بشوارع بغداد الي كلش اشتاقيتلها
وبنص اندماجي بالشوارع اجت عيني على مدرستي هي نفسها مدرستي الي جنت ادرس بيها بالخامس متأكدة منها 1000%
صحت على تميم بصوت عالي بس بعفوية گلتلو هاي مدرستي خطية حتى هو فز گال قسم بالله عبالي انگلبت الدنيا
ياقوت : اسفة مو قصدي
تميم : اكيد هاي مدرستج
- اي والله هاي هي
- تندلين البيت
- اي قريب تدخل من ذاك الفرع وبعدها ثاني فرع عاليسار
- تمام
مشى مثل ما وصفتلو وويا كل متر يمشيه دگات گلبي تزيد واني اباوع للشوارع الي جنت امشي بيهن اخر مرة واني فرحانة واضحك لان نجحت
جنت كلش فرحانة انو راح اخلي ماما ترتاح من شغل البيت جانت هاي الشوارع تحمل كل ذكرياتي من جنت عايشة بسعادة
وعلى گولة المثل اغمضتها كي لا تفيض فامطرت ونزلن الدموع مثل الشلال من عيوني واني اباوع لباب بيتنا واحنا نتقرب عليه بهدوء
وگف تميم گدام البيت ونزل فتح الباب لان جان وياه المفتاح ونزلت بخطوات بطيئة واني خايفة ادخل عليه خايفة ادخل للمكان الي جان من قبل اماني
دخلت ورا تميم من الباب وجسمي ما بقى بيه طاقة انو يقاوم اكثر حاولت اسند نفسي بشي وجان الحايط والباب بعيدات عني
قبل ما اوگع مسكتني ياسمين وانتبهلنا تميم گال خلي نروح گلتلو لا فدوة لا تحرمني من هاللحظة سكت شوية گال اهدي واستجمعي قوتج
راح للسيارة جاب بطل ماي وانطانياه شربت منو شوية وبقيت واگفة ويا ياسمين وعيوني تتجول بواجهة البيت الي جانت تحمل هواي ذكريات
مشيت كم خطوة ووگفت بالطارمة باوعت عليهم وگلتلهم بابتسامة مع دموع هنا جان ينتظرني باسم وويا كلامي زادت دموعي
............. يتبع
اقرو الكلام الي تحت ↓↓↓
لايك وتعليق حلو مثلكم ❤️
حطولنا ارائكم وتوقعاتكم ❤️
حساب الواتباد @ahmed_19_98
بيج الفيسبوك @zty.413
ضيفوني انستا @zty.413
#بنت_الگهوجي #قصص_عراقية #قصة_واقعية #قصة_درامية #قصص_من_الواقع #قصة_تبچي #رواية_عراقية #قصص_حقيقية #قصص_حب #قصة_مؤثرة #سرد_قصصي #قصص_عربية #StoryTime #IraqiStory #ArabicStory
بعيدا عن البارت
قبل العيد باسبوع او اقل تواصلت وياي بنت من بغداد عمرها 25 سنة جانت من متابعاتي القديمات كلش ومصابة بسرطان بالراس
گالتلي انها جانت تقرا قصة طرقات نحو الهلاك وهي بالمستشفى واني ذكرت بالبارت 38 طريقة علاج السرطان من خلال الصيام
تگول من قريت البارت فتحت الموضوع ويا الدكاترة فابو الاشعاع منعني بس دكتور التغذية گاللها صحيح الصيام يفيدج
فبدت ويا دكتور التغذية بالصيام والاكل الي هو يحددو الها ولله الحمد بلشت تتشافى شوية شوية ولاول مرة بعد ما اكتشفت السرطان خلصت شهر كامل بدون مضاعفات نهائيا
بعد مدة من الزمن صارت ما تحتاج علاج كيميائي بس بعدو جسمها يحتاج علاجات وهي ذكرتلي الاسباب بس لان مو متعمق بهاي الامور فما فهمت منها اغلب الاشياء بس المهم انها تحسنت
رجع شعرها نبت من جديد وصحتها تحسنت واخر مرة اخذت رنين جان بشهر الواحد اذا ما خانتني الذاكرة والرنين اليجي بنهاية الشهر السادس
جنت كلش فرحان انو گدرت اساعد انسان واكون وسيلة من الله لشفائو ويوم الاربعاء بالليل جان اخر تواصل الي وياها وبعدها اختفت
من لاحظت اختفائها انشغل بالي راسلتها علمود اعرف اذا صار وياها شي وما ردت ليوم الجمعة راسلتني الضهر گالتلي جنت نايمة وصار عندي فجأة نزيف من الاذن
حاولت افهم منها شنو صاير گالت مانعرف لحد الان ننتظر نتيجة الرنين علمود نعرف شنو صاير بالضبط والي على اساس يوم السبت الضهر تطلع
بعدها اختفت مرة ثانية انتظرتها يوم السبت علمود تطمني وما اجى منها اي خبر وصار عندي قلق كلش جبير انو يكون صاير وياها شي
وبيومها علمود اخلص من القلق حطيت كل تركيزي بالبارت واكيد كلكم لاحظتو ان البارت مابيه اي شي مجرد تصفيط حجي لان من صدگ بالي مشغول
خلص يوم السبت وماكو اي خبر عنها ويوم الاحد بقيت النهار كلو انتظر وماكو رد الى ان صارت الساعة 2:11 الفجر وانتبهت انو واصلتني رسالة منها بالساعة 00:00 عالانستا
جان محتوى الرسالة احمد اني ******** انت موجود احجي وياك الاسم جان اسم اختها مو اسمها گلتلها هلا ********
وين ***** صار يومين انتظرها
خرجت من المحادثة لگيتها ناشرة ستوريات دخلت للستوري وعرفت انها متوفية ورجعت هي اكدت الخبر انو يوم السبت بالليل توفت اختها
راجع المرض متنشط يمها والدكاترة ما يدرون بيه وصاير عدها نزيف داخلي وانتقلت لرحمة الله وهي نايمة بالليل
لحد الان الموضوع شاغل بالي لان جنت كلش فرحان انو ساعدتها وارجع باقل من اسبوع اتلقى خبر وفاتها خلاني حتى تفكير ماعرف افكر
وحاليا رغم انتهى كلشي وعاشت عمرها الي الله قررو الها ولا اعتراض على حكم الله بس مدا اتقبل الخبر الموضوع كلش صعب
دعواتكم الها بالرحمة وفد نصيحة الي لان محتاج نصايحكم ورجاء قبل ما تلوموني عالانقطاع حاولو تعرفون ضروفي
شكرا لزيارتكم عالم روايات سكيرهوم
