رواية نارا حيدره الفصل التاسع والعشرون بقلم نمارق رحيم
تگول :- گد ما لگيتك سنـد..
مرات أتيـه الأسم و اندهلـك حـزامي 🔥♥️.
🌟🌟🌟🌟🌟🌟🌟
الساعة الثامنـة مساءً
الكُل موجود..
صافنة بوجهه بصدمـة إلي ما توقعتها الكلام كُله ضاع من لساني بعدما سمعت كلمته الأخيرة
إلي خلتني أفقد توازني بشكل بطيء تشويش وتفكيري تشدد حسيت نفسي رح ينغمي عليه!!
التفتت علئ خواتي الكُل مصدوم مثلي وما متوقع السر المضموم من سنين..
باوعت لـ "نـبراس" دموعهاا علئ خدهاا تنزل بحرگة و"نـور" ميتة من البچي ..
و"نرجـس"مصدومة أيدها علئ حلگها .. بس أني أحاول أسيطر علئ نفسي ..
ركضت لـحيدرة وصرخت:- الله عليك گول
إلية كلاام سـالار إلنه چذب بداعتي احچيي!!
گول كُل هذا الكلام چذذذذبه! حـيدرررا وروح أبوووية احچي لا تبقئ ساااااكتت!!!
جرني لحضنة بدون ما يحچي شيء يحاول يهدي بيه حتئ هو متأثر ومقهور مثلنه وكُل هذا إلي صار ما نزلت دمعه مني بسبب قوة الصدمة إلي سمعتها
التفتت علئ صرخة نبراس صرخت وگعت من طولها انغمئ عليها ركضت الها أني ونرجس خلينها علئ كرسي بللنه وجهه بالمي وگعدت بقت ساكتة
باوعت لـ "سـالار" وحچيت وگلبي دينعصر
لازمه روحي بالگوه :- فـدووة شووف أختك شصار بيها بسبب كلامك انغمئ عليها احچي گـول چذذب گـول أي چذبت عليكم لييشش ساكتت أحچيي الله علييييك!!!
سالار :- لان هاي الحقيقه انتي و نبراس مو اخوواتي مو اخوووواتي
بچيت بحرگـه، وصرخت بوجهه..
- كااافي لااا تحچيي هيچييي
حضني من ظهري حيدرة وهو يگول الي:- ناري مو گلت إلچ ما تبچين أنتي أقوئ من توگع دمعتچ..
- لا حيدرة مو قوية أني بهيچ مووقف مو قوية "سـالار" أخوية خوش هو أخويـة وما يهمني لا DNA ولا صـور ولا تسجيـلات ولا مـاضي
أني ونبراس تربينه على ايد ابوية وعشنه عمرنه گله ببيت واحد وسقف واحد طفولتنه كلها وي اخوية ضحكنة سوية وبچينه سوية وتحملنه المرة والحلوة سوية أخوية هذا ما اسمح الكم تاخذونه من عدنه!!!
تنهدت واني اباوعله حچيت بشهگه :- اعتبره ابوي مو بس اخوية!
سكتت وكملت كلامي بصوتي المبحوح.. لا تگول مو أخوي ، امي أكيد چذبت اي چذبت حتى تخرب بينه اني واخواني أي اكيييد!! ..
سالار :- ناااردين افهمييي افهميييي، لا تگوولين امي .. هيه مو امچ مو امچ و لا ابوي ابوچ
صفنت بوجهه بعدت من حـيدرة:- ما أريد أعرف اذا أمي أو لا هي بالحقيقية بس أبـوي لا تگول مو أبـوونه هو خط أحمر هو ألي رباانه وكبررنا شجاي تحچي أنتتتتت شبيك سـالار تخبلتتت؟؟
سالار :- اي صحح رباچن بس من نجي للحقيقه و الواقع انتن مو بناته ولا بناتها و لا اخواتنه
كاافي نارردين كاافي دخيل الله لا تضغطون عليه بكلامكم گلبي شنو يتحمل بعد كافي وحق الكووون تعبت بعد ما اگدر احچي لان ما رح أسيطر على نفسي وحق محمد..
گعد ولزم راسه بألم وظل ساكت..
حيدرة :- عمي جاسم الله يرحمة ، و سعاد هيه اصلاً ... قاطعته
-يعني هذاا السبب كرهاا النه !!
-اي لان مو بناتها
-شلون عرفت ويمته؟ احچي اريد اعرف..
-ما اعرف بالموضوع انا اسألي سالار هو يسولفلچ افضل ..
ألتفتت اله تمشيت بهدوء گعدت يمه وايدي على چتفه بعدها..
سالار:- لا تتقربيلي ناردين..
- لان طلعنا مو خواتك بالدم هيچ تسوي! صارت حتى ايدي تبعدها عنك؟ ...
سالار:- رح ابقى اخوچن ومساندچن طول عمري وبكل وقت.. بس خلوني وحدي لا تتقربون اني بنفسي مصدوم وما متقبل الواقع..
نور :- انا وانت ونرجس ومصطفى اخوان؟
سالار :- اي صحيح اخوان بس التؤام مو خواتنا
نرجس :- ناردين ونبراس منين ووين اهلهم ما دافتهم اذا مو بنات امنه ولا ابونه بنات منوو؟
سالار:- گالتلي امي انو ابوي اتزوج عليها بالسر وچان بوقتها عمري 6 سنوات وانتي 5 سنوات لذلك مانتذكر شيء لان چنه اطفال
نرجس :- اذا تزوج عليها، غير هيه حملت منه غير هنه بنات ابوي !
- لا
- لعد!..
- المرة الچان متزوجهاا عدهاا تؤامين من زوجها السايق ،و الي هنه ناردين و نبراس
من گال هيچ،حسيت حيدرة تذكر شيء ..
رئستاً سئله :- التزوجها عمي ارمله ؟
سالار :- اي صحيح زوجها متوفي الي هو ابوهن..
حيدرة :- من البصرة هيه ؟؟
- اي صح مو من بغداد من البصرة..
ملامحة تغيرت بسرعة ،،،،من هادئ الئ شاك و مصدوم و متفاجئ
- شنو شبيك تعرف شيء انت؟
- هاا لااا لاا ماكو شيء طالع اخابر هسه دقايق واجي كملوو كلامكم..
-تمام براحتك..
كعدنه كلنه بالديوان كل واحد علئ قنفه بعيدة عن لخ وكل واحد بينه مصدوم ويبچي وايده على وجهة..
سالار :- ناردين حبيبتي نبراس عيوني انتي كلشي صار انسوو اعتبرن ماكو هيچ شيء واستمرن عيشن حياتچن مثل نمط قبل ماتعرفن بالحقيقة..
ابوي ومتوفي وامي بيت خوالي بعد ماتعيش ويانه وناردين ببيت زوجها ونبراس ونور بعد باچر عگبه تتزوجن..
ناردين:- وانت!
- اني ابقئ اخوچن مارح اتغير ولا ابتعد صح قبل اشهر تغيرت وماحجيت وياجن لان جنت مصدوم وفضلت السكوت ،،،
امي مالچن علاقة بيهاا الي تريد تحچي وياها تحچي ما مانعها بس بعد ماتعيش ويانه ببيت واحد ،، ابوي بقبرة لا تنسنه لا تنسن هوو الي تعب وربانه ..
خلاني اصير رجال واعتمد علئ نفسي ،واصيرلجن سند وحزام وظهر واساندچن
خلاچن ادرسن وتكملن كليات وما رفض الجن طلب واحد ،،
جان يشتغل من الصبح لليل في سبيل يعيشنه ..رباچن احسن تربيه،وخلا كل وحده واثقه بنفسها وما غصبجن علئ شيء
حتئ من عرف ناردين تحب حيدرة وافق عليه ..
علمني اصير صديق الچن، قبل اخو ،،وما فد يوم تضاربنه
وما گال هو مو ابوچن الحقيقي ،،الاب هو اليربي وكلشي سوا الچن
صح بعدچن مصدومات بس خلص اتقبلن الواقع ، مثل ما احاول اتقبله..
سكتنه ودخل حيدرة بقى واكف وبيدة موبايله..
نبراس :- امنا الحقيقية الي جابتنه على هالدنيا عايشة هسه!
سالار :- ماتت من سنين
حيدرة :- شنوو ماتت !
-اي والله !
حيدرة:- شلون ماتت؟
-ما ادري
-سعاد اقصد امك ما گالتلك ؟
-لا ما كالت ماتعرف عنها شي شنو حيدرة چنك تعرف وضام؟
-هااا لا ما اعرفها بس هيج سألت
-متأكد؟
- اي يابه قابل شنو اعرف..
سالار:- تمام يلا طالع اني..
حچيت :- واحنه ؟
سالار :- ما ادري المهم نرجس رح ترجع لزوجها منتظرها ونبراس ونور ترجعن للبيت انا رح اوصلهن واجي اهنا
حيدرة:- تمام وصلهن..
راحو واني بعدني گاعدة بعدني ما مستوعبة كلشي..
- يعني اني يتيمة من صغري!..
سمعني واجه يمي گعد وحضني وگال..
- انا شنو كلتلج؟
-گلتلي ناري لا تبچين..
-وبعد؟
-ما اضعف
-وبعد ؟
-اصير قوية واتحمل كلشي..
-وبعد..
-بس هذا
-لا گلتلچ شي بعد..
-شنو گلتلي؟
-انا ابوچ واخوچ
-اريدك تصير بالأول زوج وحبيب..
-ها بويه لا تستعجلين على رزقج..
ضحكت وضحك وياي مسح دموعي
-اي هيج اريدج اضحكي لاا تبجين ، دموعچ شبيهن؟؟..
-غاليات..
-عفية..
-سالار رح يجي هنا؟..
-اي يگعد يم حساني..
-تمام..
-تصعدين للغرفة ترتاحين؟..
-اي تعبانه
-چاا امشي
بس گمت لزمت ايده قوي دخت حييل..
-هااا نارري شكوو شبيج؟؟..
نارررردين ،،،
طاحت بالگاع بسرعة شلتها لحضني صعدت بيها للغرفة خليتها على چربايه..
-ها ناري بابا اگعدي شبيچ شنو اليوجعچ احچيلي..
بللت وجهاا ماگعدت شممتها عطري قوي ريحته فزت وگعدت..
-ها سلامات..
-ما ادري دخت لا ارداياً..
-صعدتي ضغطي امشي نروح للدكتور؟..
لزمت ايده.. هاا خايف عليه ؟
- شلون ما اخاف عليج و انا ..
-وانت شنو؟..
-ماكو شيء نازل جوا..
-وين..
-اجيبلج شيء تاكلي..
-مامشتهيه شيء مساع تعشيت
-ميخالف علئ اقل اجيبلج شيء تشربي مايصير هيج لا تتخربطين عليه مرة الثانية..
-تمام بكيفك..
نزل ودقايق اجه وبيده كلاص عصير ليمون انطانياه..
-حاامض..
-اي عادي..
-ما احبه..
-لاتسوين ادراما و اشربي وانتي ساكته بلا..
-داگولك شسمه ما احبه
-لخاطري؟..
هزيت راسي واخذته شربته..
-يلا هسه نامي..
-دا احس بنتك وتعاملني مثل الطفلة..
-اي انتي بنيتي الصغيرة..
-اريد احضنك وانام..
ابتسم وهز راسه فتح الكنتور نزع قميصه بقئ بالشورت طفئ الاضوية واجه تمدد يمي..
حضنته وراسي علئ صدرة العاري.. ليش هيچ
-شنو؟..
- ليش اني فگر ؟
-منو الگال؟ انتي مو فگر انتي محظوظة هواي
-شلون..
-مو نايمة يمي وبحضني
ابتسمت.. اصلاً هنيالك عليه..
-ادرري..
بچيت وظليت اشهگ.. باس ايدي ومسح على شعري..
-شلون وياچ بويه..
-مو بيدي دابچي..
-زين شلون تبطلين بچي ودموع؟..
-شيء واحد..
-شنو هو گوليلي..
-احضني انت وگول اليه دللوو ياحلوة يابنيتي دللو نامي نامي وهيج رح اخاف وانام..
ضحك وحضني لصدرة وصار يگلي دللو يناري..
-جعل محد يگلي دللو غيرك..
-فدوا الج تدرين شغلة..
-شنو..
-انه تعبان هواي وعلي..
-ادري بيك بسبب الشغل مو؟..
-اي هد حيلي..
-الله يساعدك.. اگلك حيدرتي..
-گولي بويه..
-شسمه
-رجعنه لسالفه شسمه وشسمه..
ضحكت.. اي شسمه انت مو گلتلي استعدي للصدمات؟؟..
-اي صحيح..
-وين صدماتك البقية؟..
ضحك تالي تنهد :- من اتٲكد من الي بالي رح تعرفين..
-ها
-ناري الحلوة..
-ها حيدرتي..
-بعدچ تحبيني..
-اي گلبي متعلق بيك ما يرضى يبطل منك يحبك كل يوم رغم كلشي دا يصير..
-فدوا اروح لعمرچ.. اگلچ.. چؤ رايد ارتاح تعبان وعلي عادي تفرچين ظهري اذا بيچ حيل واذا تعبانة بعدچ لاتگومين..
-من عيوني..
-سالمة عيونج وحبيبج التحبي..
تگلب علئ ظهرة ادلكه و احجي وياا علئ سالار ونبراس.. لحدما ارتاح ورجعت نمت..
ثاني يوم كعدت الصبح حيدرة ما موجود بالغرفة طالع وطيبة دا تتريك..
غسلت وجهي ورحت للمطبخ اتريك وياها..
طيبة :- دريتي اجه اخوج ؟
-هاا سالار احه صدگ نسيت !
گمت سئلتها :- وينه ؟
- بغرفة حسن ،
-هاا نايمين؟
- اي ،هسه يكعدون لاترحين رجعي كملي اكلج
- ها ماشي
رجعت اكل،سمعت خطواته اجه نزل من الدرج
لبست حجابها ،،
عبر من المطبخ وگال :- هاا صباح الخير
- صباح النور
سالار :- حيدرة موجود ؟
- لا،طالع بالشغل
- اهاا
طيبة :- تتريك؟ توني صبيت ريوگ..
سالار :- لا خيتي بالعافية ،طالع انتي و حسن
-على راحتك خويه..
نزل حسن وهو يدندن ويحچي :- يمة لا لا تعذبيني بحبهاا يمة لا لاا
دخل للمطبخ شافني :- ها هلاا اليوم مرت اخوي مسويه ريوك
ضحكت :- لا طيبة السوته
سوتله لفه طيبة اكل على السريع واخذ كوبين گهوة وطلع
-اكلچ على طاري الطبخ ما اعرف شيء اني!
طيبة :- صدك تحچين هههههههه
-اي بالنبي ما اعرف..
-اي عادي اني اطبخ..
- اي تمام واني اساعدج..
صعدت فوگ للغرفة لبست دشداشة طويلة الردانات ولفيت شعري
فتحت المجر اطلع القراصة تذكرت سالار وكلامه مداستوعب كل شوي واعيد كلامه الگاله البارحة
تقبلت ان سعاد مو امي الحقيقية بس ابوي واخواني ما دا اگدر اتقبل الحقيقة ابداً صعبة حييل..
رتبت الغرفة عدلت الچرباية چان اكو ميز فتحته كله ملفات ملونة ردت اخذ واحد فضول اشوف شنو هذني الملفات..
دخلت طيبة وگالت..
-شجاي تسوين ناردين..
فزيت :- خرعتيني خيه..
طيبة:- ناردين هاي ملفات حيدرة مهمة ما يقبل احد يلمسهن والله اذا يشوفچ يموتني وياج..
سديت الميز وجاوبتها ..اي عادي وذا شسويت اني..
طيبة:- الساعة هسه بــ 11 امشي ننزل نسوي الغدة حيدرة يتغدة من وقت..
-اكلج صدگ گوليلي كلشي عنه مثلاً شنو يحب وشنو يكره؟ لازم اجيب دفتر واسوي جدول واكتب عنه..
ضحكت وجاوبتتي اي تدللين بس المفروض هو يسولفلج صح؟..
-لا اريد اسمع منچ..
-بعيوني چَا..
نزلنه اساعدها بالمطبخ سألتها شنو رح تسوين؟
-فاصولية النه بس هو ما ياكلها ..
-ليش ؟
-ما يحبهاا
- اهاا ،اكو واحد عراقي ميحب الفاصوليا شعجب يلا هو حيدرة كلشي غريب بي ،زين شيتغده ؟
-اثرمي خيار وثوم وخليهم على الزبادي..
-عزه هذا عنده غدة؟ اني عندياها مقبلات
ضحكت وگالتلي ادبريها لو اني اسوي لان رح يجي..
- لا شسالفة اي اعررف طبعاً شرايدلها بسيطة
فتحت الثلاجة طلعت خيارتين وزبادي گعدت اثرم واسوي الگالتلي عليه.. وخلصنه الغدة كملناه سويه
واجه حيدرة راح للحمام يسبح خليت السفرة على الطبله اجوو سالار وحسن كعدو بالديوانية
طيبة :- يلا رح اصب صيحيله..
- اي صاعدة
صعدت بعده بالحمام دگيت الباب
- اطلع صبيت غدة حيدرة..
- انتي صبيتي گولي ولحسين؟
- لا اني وطيبة للأمانة يلا اطلع منتظرينك..
- جاي الليف تليفني؟
-صدك ؟ اي افتح الباب و تدلل
سمعت ضحكته العالية المسموعه:
-امشي لا اسحبچ وياي داخل..
- اي اسحبني هياتني يمك
- بوية صايرة شاخطه كلش انتي فقدت السيطرة عليچ
ضحكت نازله يلاا اطلع ..
- اي روحي طالع هسه..
نزلت واني اضحك دقايق ونزل بيده الخاولي ينشف بشعرة من المي كعد يمهم بالصالة كعدت يمه اخذت الخاولي منه انشف بشعره وهو يبتسملي وعيونه مركزة بعيوني..
حسن:- سويتولي واهس على الزواج ..
ضحكنا ودخلت طيبة بيدها صينيه چبيرة گام حسن اخذها منه وخلاها على طبله..
رادت تروح گال الها حيدرة:- ها بابا وين رايحة..
طيبة:- رايحة للمطبخ اكل اتغدوا انتو..
حيدرة:- شنو خجلانة من سالار محد غريب تعالي اتغدي ويانه حبيبتي..
..اباوع لسالار مدنگ راسه بالاكل ويهز برجله شلون الارتبك ،
ضحكت وگلت مممم..
باوعلي حيدرة وغمزلي رفع حاجبة بمعنى( شكو)
هزيت براسي بضحكة بمعنى (ماكو شيء)
كعدت يمي سمينه وبدينه ناكل الصالة هدوء بس صوت المكيف ، دنٲكل چان يكرصني حيدرة باوعتله بمعنى شكوو همسلي بأذني انتي الي مسويه الاكل؟
جاوبته باستغراب بصوت ناصي اي اني ليش تسأل شنوو طيب عجبك مو؟
خزرني :- شبيج انتي جاي تضحكين حضرتج مخليه شكر بمكان الملح بالزبادي
- ياا شوكت!
تذوقتها وطلعت صدگ .. انتبه عليه حسن گال شبيكم تتهامسون شصاير..
گام وگال :- اكلوو انتوو طالع انا..
ناردين: وين رح اتروح؟
-لشغلي..
طلع واني حاصرتني الدمعه بطرف عيني اباوع بالوجوه مصدومة مثلي..
سالار:- جافصة بالاكل مو؟
هزيت راسي بمعنى (اي) وگلت.. خليت شكر بدال الملح بالزبادي بس ما ادري مو قصدي..
باوع حسن لسالار وطگوها ضحكة بصوت عالي..
سالار:- ذكرتيني بالچاي من خليتيلي ملح بمكان الشكر بالكوب..
حسن:- لك خطية بچت رح تحمض..
طيبة:- حسن كافي خطية شبيك نوب طلع بدون ماكمل غدة..
حسن:- شيأكل چَا روبة مشكرة
ناردين:- حسسننننن
-لا تزعلين بس اذا جانت عندج فكرة ادخلين للمطبخ اتعوذي من الشيطان..
گمت للمطبخ وهمه يضحكون اجه سالار وراي يغسل وهو يگولي مو تگولين عادي يابه وذا اي لعد عادي لا تزعلين نشاقة وياچ وهو راح علمود شغله مو بسبب الأكل حيدرا واعرفه..
هزيت راسي وصعدت للغرفة تمددت مچتفه ايديه ومبرطمة شفايفي بضوجة واني افكر
وين طلع وشديسوي؟ ويامن رح؟ تنهدت بضيق ..
...
حيدرة
طلعت من البيت واتخذت الاكل حجه حتى محد يسألني خابرت على رائد وانا بالسيارة وجاي اسوق وعيني على الطريق..
جاوب:- هلاا بالزين كله هلاا بهلصووت الي يشوگ شگ
- حيدرة انا مو حبيتك خاف اتخربطت بالارقام ،استجن
-اشاقة حويدر قائدنه شعجب متصل شنو مشتاق لصوتي
-چؤ رائد عوف سوالفك اسمع عرفت معلومات جديدة على هذاك الـ* *؟
-اي تعال يمي موجود اني كاعد معندي شيء
-لا رايح للمركز لان اريد اشتغل بهدوء
-فديت الهادئ انا شحلاتك يباا
-رائــد !! صير جدي مره بحياتك
-اوكي احنه الزلم الجد الجد..
-رائد بدون شقه ماصخ يلا رايح وانت تعال مو تتأخر
-صار ياعمي الله وياك
وصلت للمركز فتحت صندوگ السيارة طلعت الملفات تخربطن كلهن وتيهت بينهن لذلك اخذتهن كلهن ونزلت من سيارتي
فتت للمكتب اخذت الملفات الي اريدها والملفات الي ما احتاجهن خليتهن بالخزنة
اجه رائد كعدنه نشتغل على الحاسبة بنص الموضوع والنقاش والشغل چان يگول..
وبعدها اجه يكلي؟
اخ منج ،
مرّة كتلج حيل فحطان بظروفي ..
ومرّة كتلج نار كبّرة بوسط روحي !
ومرّة كتلج خلهم يغارون مني ..
وياج احس بنفسي اقوة ..
ليش طفيتي الچمر بعيوني گوة ؟
وليش كدام البشر صرتيلي نَزوة !
وليش فرعتي الحجي وصار الميسوة !
وليش سويتيني غنوة !
ياما كتلج والله احس بنفسي حيل وياج اقوة .
⭐⭐⭐⭐⭐⭐⭐⭐⭐
رجعت الصورة للملف واخذته، وطلعت من المكتب امشي بسرعة والف حسبه ابالي ركبت سيارتي ورجعت للبيت من وصلت دخلت للبيت لاگاني حسن
حسن:- هاا وين چنت اتصلت عليك هواي ما رديت
-چنت بالشغل صاير شيء بغيابي؟؟..
-اي اجه صديقك قبل شوي..
- منو بيهم؟؟..
-عثمان..
-اها اي نسيت اخابره تمام هسه اشوفه شيريد..
كملت طريقي بٲستعجال للغرفة ( امي ) دخلت وگعدت يمها..
-هاا حجيه گاعدة..
عدلت گعدتها وگالت اي هله يمة..
ظليت ساكت متردد افتح الموضوع لو لا تالي گالتلي.. خيرك حيدرة احسك عندك چلمات تريد تحچيها لاتضم يمه احچيلي..
-عندي موضوع رايد استفسر منه هو مو موضوع الا سالفة قديمة بس چبيرة وصارلي فترة دايخ بيها وقلقان لا يطلع شكي بمحله!
-ان شاءلله خير حچي يمة اسمعنك گول..
بهالاثناء دخلت ناردين للغرفة ظليت ساكت..
ناردين:- هاا انت اهنا يمتى اجيت؟
-ناري بويه عوفينا شوي عندي سالفة وياها..
ناردين:- اها تمام لعد اسفة قاطعتكم..
دخلت طيبة گالت حيدرة اندگ الباب اكو واحد يريدك ضروري..
قبضت ايدي بعصبية شلوون بلوة يا الله منين اجيبها من هلنار لو من هلحمار الاجه بهالوقت..
-تمام يابه جاي هسه اطلعله..
ام حيدرة:- يمة وچلماتك؟..
-بعدين بعدين..
طلعت للكراج اعاين سيارة عثمان مصفوفه بالباب سألته شعندك جاي بباب بيتي؟..
عثمان:- لك حيدرة وينك شگد اتصلت عليك وماترد انت نسيت كاظم ولك..
-چنت مشغول ليش شبي..
-شوفلك حل وياا كاظم دخيل ربك من سافرت ليهسه وانت ما رايح لهذيج المنطقة..
-غير امس رجعت لبغداد جائز كاظم گايله لگيت شغل بغير محافظة ورح اتأخر هذا سبب خليته يصدگ بين ما اني ارجع من السفر..
-وانت عبالك يصدگ؟..
-ياكل تبن لا يصدك شسويله مخلفه وناسي..
-لا حيدرة لا امشي يلا ملابسك وهاي الأمور بسيارتي خليتهن بس اصعد..
-يابه رايح بس اسكت صرعتني بصوتك اگلك حبيبي چاا واسد شنو فلمه اخ يابه..
-ولك شبيك اخ واخ چنك حبلة رح تجيب حبيبي هسه انت اخلص من شخصية كشكول تالي ارجع لأسد يمعود..
-وفالح مادري صالح اخ..
-غير خلصنه من هلموضوع من چنت بلندن تم كلشي بعد انسدت وكلشي صار مثل ما خططناه لعد ليش ما گالك رائد..
-لا ما گالي ملتهي يتمعشگ هل سرسري..
-الله يساعده غير صارله اكثر من 5 سنوات يشتغل خل يشوف حياته صار عمره 35 وهو بعده اعزب..
-اي يتونس حبيبي خصم الحچي انت روح وانا رايح لكاظم بغير سيارة..
-اي زين عفية عليك روح من طريقنه المختصر خوش لحتى ما تتأخر..
-تمام..
-في امان الله..
-الله وياك..
رجعت دخلت جاي اسد بالباب چان اشوفها واكفة شافتني وانكمزت..
-هلا چنتي تسمعيني؟..
ناردين:- لا طبعاً..
-سمعتي كلامي انا وهو؟؟..
-لا..
-اها !
-منو هذا كاظم؟..
-شنو هالتصرف ليش واكفة تسمعين كلامي مو گلتلچ شغلي خليچ بعيدة عنه..
-هيچ والله طكني فضول وسمعتكم تحجون..
-منين طكچ؟..
-اهوو هسه شصار ليش تصيح عليه شكلتلگ اعصابك اوووي..
-انتي تخلين واحد عنده عقل سالم ما تتحملين يعبر يوم اذا ما مسوتلچ فد فاينه من فواينچ ومشاكلچ الما تخلص
-ريلاكس اوووي..
شردت بسرعة ركضت واني اضحك صعدت للغرفة واني احچي بصوت مسموع..
اموت واعرف هذول اصدقائة منو همه؟ وكاظم منو عثمان منو وشنو ديشتغل..
يربي چان دكتور شحلاته، اشو گلب صار من جماعة مافيا !.
هيه هاي العايزه و يطلع من المافيا، عزا يطلع يتشغل بالسوق الاسود يبيع و يتجار بالاعضاء الناس، يا اصخام بوجهي بس لا صدگ
داحچي چان التفت وانخرعت خرعه من شفته واكف وراي وطخيت بيده من المسافه القربية
-يا يمه دخيلك ربي بسم الله قل اعوذ برب الفلق شنيييه من طلعتلي..
ضحك وگال.. ماتدرين بيه انا جني متنقل..
-ياا صدگ لا لا عفية لا تحچي هيچي والنبي اخاف تره عزه وانوب اطلع متزوجة جني..
-بس حلو ينطلع بي..
-اي غير انت عسل على المربى، لوز على الكعك، سمسم على الكليچه..
-على خر* *
-مو وجه غزل دروح اوووي..
-ولج كافي گلبي رچيچ..
-شسويت؟..
-وتسأل اخخ يابه اخخخخ..
راح للكنتور طلع علاگه بيهاا ملابس سألته شنوو راح تتبرع بيهن؟..
-اي اشوف فد واحد حمار يلبسهن..
-اكلك شي..
-لا..
-كلمة وحدة..
-هل كلمة الوحدة رح اتصير سيناريو فلم كامل..
ضحكت حيل دار عليه وظل يضحك وگال..
-گولي يابه غردي لا تبقى حسره بگلبچ..
-حلو من تصير عصبي..
-اخ يمته صاير انا عصبي..
-صارلك ساعة تحچي بأعصاب چنك طماطة معصبة..
-ترى بعدني هادئ يابه وطماطة طلعت نوب نعم الله عليچ..
قفل الكنتور وراح للميز فتحه تالي باوعلي بنظرات شك سألني فاتحة الميز صح؟..
-لا منو الگلك..
-شميت ايدي وعرفت جاوبي فاتحته ها؟..تره واضح فاتحته انتي..
-اي شسمه بالغلط وما لزمت شي..
هز راسه طلع مفتاح ثاني وقفله تقرب مني ولزم ايديه اثنيهن..
-ناري الكنتور والميز خط احمر لا تفكرين مجرد تفكير تفتحيهم صيري عاقله ولا تلعبين بكيفج ملفاتي كلها مهمه وياا بختج تفتحين واحد..
-اي خووش..
عافني وطلع صرت افرك بأيدي بضوجة واعيب بلساني عليه واقلده ملفااتي مهمة ويا بختج مهمة مهمة دروح اوووي..
واحد حقير بس ياطركاعة گلبي الي نبض اله.. سمعت موبايلي يرن فتحته وشفت المتصل ( نبراس )
بسرعة گلبي انقهر مجرد ما شفت اسمها اتذكرت ليله البارحة والصدمة رديت عليها هاا هلا حبيبتي..
-ولچ ناررردين رح اموووت والقران ما بيه حيييل بعد..
-يا گلبي شكوو ولچ يخبله شنوو شبيج لا تخوفيني عليچ..
-ناردين اخوي لج اخوي يجي للبيت يكعد يمنه مثل الخطار مثل الغريب ما يخليني حتئ الزم ايده ،اخلي ايدي علئ چتفه يبعدها ما چنه هذاك الچنت انام بحضنه هسه يگلي كلشي اتغير ..صار اخو بس غريب حاله حال الغرررريب
دمعت عيوني بحرگه وبچيت.. شنسوي يا عمري هذا قدرنه هذا مكتوب النه وما عدنه اعتراض على حكم ربنه رغم الي صار كلش قوي على گلبنه بعد 19 سنه من حياتنه والسنين الگضت هسه يلا عرفنه اهلنه طلعنه يتيمات منصغرنه .. امنه وابونه ماتوو من چنه اطفال وعافونه عند عائله اعتبرناها عائلتنه..
-والله ما همني اعرف امي اصلاً سعاد بعد السوته بينه علمود لؤي اعتبرتها غريبة فلاا اگولها ماما لأنو ما تستحق
-هيه وينها بالبيت يمچن لو لا؟؟..
-لا ببيت خوالنه هه اقصد اخونها..
- لج نبراس حتئ لؤي مو ابن خالنه و هيه تدري من سنين و كل التحرشات تشوفها و تسكت و تدري غريب و حرام وتسكتت وخلتني اسكت چنت اخاف منها لان تضربني الله ينتقم منه ، وحسبي الله و نعم الوكيل بيهاا
- اي شوفي شلون ما تستحي ابد ضلت ساكتة وكل يوم تكرهنه بحياتنه، هو حتى بابا ليش جان ساكت ما گال؟ ،،ما اريد احد اقربله بس اخواني و انتو خواتي و ابوي
-الله كريم خيه مصطفى ونور وينهم شلونهم؟؟
-نور نامت قبل شوي لان البارحة كلها ما نمنه وكضيناها بس بچي واليوم الصبح اجه سالار هو وحماچ حسن سولفو لمصطفى هم خطية انصدم وظل يضحك عباله دنشاقه وياا ولحد الان ما مستوعب الگالوا اله
-اي مو احسن من حالنه..
تنهدت :- صدك ناردين البارحة و احنه نحچي اني و نور و نتذكر ماضيينه خطر علينه سؤال علئ ابونه اقصد بابا جاسم
گالت ابوي و اتذكرت البارحة اني من خابرت امس امي عليه وحيدرة گالي راح اكلج منو الدعمه وچنت حيل منهارة.. تالي من اجو خواتي وسالار وبدو يحچون فاجئونه من كالو هيچ ابد ما جنت متوقعه السر هذا فلا اجه علئ بالي هيج شيء ونسيت سالفة الگاتل بابا
-الوو وينچ ناردين وياي!!
-هاا اي وياچ..
-داكلج ما عرفنه كاتل ابونه مرت سنة واحنه القضية سادينها ومحد فتح السالفة
-اي صح، اگلچ بعدين احاچيچ يصيحولي..
-تمام حبيبتي الله وياچ..
سديته منها عفت الموبايل بسرعة ونزلت جوا اصيح حيدراا وينك حيدراا..
طيبة:- حيدرة طلع قبل شوي..
ضربت راسي بغباء ونسيان..اي صح نسيت
طيبة:- ليش شبيج شنو صار..
-لا ماكو بس نسى شيء من اغراضه وردت انطياه يلا لعد صاعدة للغرفة..
-تمام حبيبتي..
صعدت وسديت الباب.. بچيت بصوت واني اصيح واعض اصابعي:- شلوون نسييت شلوون !!
البارحة التهيت بالسالفة ونسيت اسأل حيدرة
هوو كال اعرف الداعم منو بسرعة اخذت موبايلي ومسحت دموعي واتصلت
رن وطول يلا رد :- ها ناردين..
-تعال للبيت هسسسه هسسسسه..
حيدرة:- ليش شكوو صايرلج شي؟ احجي!
-تعال وتعررف لا تتأخر..
حيدرة:- تمام رح ارجع هو انا بالطريق هسه..
-تمام انتظرررك..
غلقته وشمرت الموبايل وگعدت على الارض لميت رجليه لصدري وصرت ابچي بقوة.. كلشي اتجمع ببالي..
موت ابوي، يوم زواجنا المشؤوم ،العملية، تعامل سالار،ألم اختي التؤام ،اهلي الحقيقين، موت لؤي،
صرت ابچي ابچي حييل حسيت روحي رح تطلع من البچي الچنت حابسته بگلبي وكاتمته طلعته بالبچي..
تالي ضحكت ودموعي على خدي.. وهمست تهون.. وتعدي.. ورح تجي ايام حلووة..
لؤي الله اخذ حقي منه وسعاد ارتاحيت منها ومن ظلمها .. صفنت على المرايا وگمت ايدي صارت على وجهي ظليت مركزة بملامحي اه شگد متغيره يا ناردين !
انفتح الباب وچان يدخل ويشوفني بهاي الحالة تخبل واجه گال بأهتمام وقلق.. يا ناري شكوو شصاير جاي تبچين؟؟..
-اي ابچي عليك..
-بعدني ما ميت..
-ليش ما جاوبتني..
رفع حاجبه وگال توني اجيت جواب شنو؟..
-منو الداعم بابا؟..
ألتفت ما جاوبني.. شبيك دا احجي وياك ماعبرني جاوب وها لا تگول ما اعرف منو الداعم لأن تدري وتعرفه متأكدددة !!
-لا غلطانة ما اعرف..
-انت امس كلتلي تعرف..
-گعدي احچي وياج..
كعدت اجه كعد يمي ،:- اي احچي
-اسمعي انا عبالي الكاتل ابوج لؤي بس طلع مو هو والكائنات
-منو لعد؟
-ما اعرف
-امي من خابرتني كالت ابوك هو الداعم!!
-ما اعرف..
-يعني صح كلامها ؟؟
-جاي اكلج ما اعرف ناردين!..
-ابوك وينه؟ ولا مرة شفته ليش ما اجه ليش ما تحجي وياا ؟؟؟؟
-هذا ما اسمي أب من سنين مالي علاقة بي
-ليش؟؟
-بسبب سوالفه؟؟
-يعني قصدك سوالف مكسرة وياكم!..
-اي بالضبط..
-وليش ما حاسبته؟ ما دافتهم من جهه عندك اي شخص تقتله لو تحبسه وابوك عادي! زيش ماسويت شيء مادافتهمك حيدرة
- مو بسهولة ناردين انتي شنو عبالج انا رئيس العراق مثلاً والسلطة بيدي؟
- انت بس فهمني شغله وحدة بحياتي ما لحيت علئ شيء بس شغلك اريد اعرف شدا تشتغل؟؟
-شنو شغلي مثلاً ، تدرين بيه دكتور
-دكتور؟ هههه لعد ليش ما تروح للعيادة مالتك؟
-منو كلج ما جاي اروح؟؟..
-ما اشوفك مهتم وما ذكرتها اصلا من نخطبنه لهذا اليوم مغلس عليها!..
-ارجع واكول لاتدخليين بشغلي ابقي بعيدة عن هذا الموضوع بذات وهي تصفى وتنحل..
-وابوي!..
تنهد وتمدد على الچرباية وگال..
- تعبااان هواي تعبااان..
-اني اكثر!
- اريد ارتااح يناري حمل البگلبي مو شوي وعقلي ماجاي يفرغ من التفكير صرعني والمصايب والمشاكل تجيني بكد شعر راسي
-ليش ما تفتحلي گلبك؟..
-صعب..
-ليش؟
- انتي متصورة اكلج يابه هيج شغلي وهيج اسوي وهذا الكتل ابوج بسهولة!..
-يعني انت تدري الكاتل ابوي منو؟
-اي ادري!!!
-منووووووو! لا تلعب بأعصابي حيدرااا!
-ما رح تسوين شيء ولا تغيرين اذا اكلج وتعرفينه..
-اريد اعرف الي دعمه تحاسب او لا !
-چان بالسجن تالي طلع برشوه..
- شنوو ما فهمت؟؟
-بعدين تفهمين بويه هسه تعبان وعلي خل انام ساعة واكعد اذا اتأخر كعديني..
-هيج صاررت! تمام حيدرا..
حيدرة
طلعت وطبگت الباب قوي ضحكت على اعصابها وتنهدت وجريت نفس طووويل.. فركت راسي .. حتى لو اگول الها الداعم منو ما رح اتغير شي
ما جانت الصورة واضحة لأنها صورة قديمة حييل صعب اتعرف على صاحبة الصورة منو لذلك سكتت بالي مشغول حيل من الأسم معقولة صدفة ؟ وتشابهة بالاسماء؟؟
لازم الگا ابوي لاززم وضروري لأنه الوحيد الي يعرف كلشي بالي صار بالماضي!
دك موبايلي المتصل ( سالار ) جاوبته..
-حيدرة مو كلت ندور على اهلهن اشو بعدك ساكت على الموضوع؟؟
-حبيبي سالار كتلك خاي الموضوع عليه ويجيك الصافي فد اسبوعين..
-لكن هواي!
-غير جاي ابحث قابل شبيگ لبيگ وعرفت اهلها
-تمام انا خواتي ما اكدر ابقى يمهن اكثر بعد! جاي اتعذب حيدرة…
-اخ ياخوي تفرج ان شاءالله انت وينك حالياً ؟؟
-بـ بيتنه..
-چنت الصبح ببيتي ليش رجعت؟
-اي رجعت خوب ما ابقى يمكم قابل مخلفيني وناسيني زحمة خويه..
-يا عيب لك صدك تحجي من شوكت هالسوالف ما بيناتنه ترى يمعود تعاال بروح العزاز..
-لكن شلون؟ والبيت يضل فارغ؟
-چاا مصطفى اخوك وينه؟
-بـ بيت امجد ابن عمي..
-تعال بليل لا اجي عليك غصب…
ضحك وگال.. تمام ان شاءالله
سديته منه لازم الگا حل لأخواته ما يصير يظل معلك هيج اجه ابالي رائد! رئستاً اتصلت عليه
-اكلك انت مو رايد نور وتگولي احبها؟
-اي احبها والحسين
-ليش ما تجي تخطبها؟
-رايد من زمان، بس شايل هم لا ترفض لأنها ما تحبني ابد حتئ من احچي وياها ما تحملني بت اللذين
-كول يا الله انا وياك
-هاي شنوو واضح التتطورات انت وياي متأكد؟؟
- اتوكل جيب اهلك وتعال اخطبها لا تضيع وقت على الفاضي تالي تروح من ايدك وتنخطب لغيرك..
-افااا اكسر راس الخلفوه الي ياخذها مني يا بيت؟؟
-بيت ابوها..
-واذا ماقبلوا بيه؟ اكيد هي رح اطلع ألف مليون عذر واسباب
-لا وربك تقبل تقبل خلي موافقتها عليه..
-لعد ما اصدك من باجر جاي والله العظيم..
سديته منه لاززم خواته ما يبقن بالبيت لان هواي اشياء رح اتصير وما اريد يتأذن بسببها وسالار يروح لأربيل وياخذ مصطفى ويا افضل وتبقئ بس نبراس اشوفلها حل
...
ناردين
كاعدة بالمطبخ نزل حيدرة سألته وين
حيدرة :- طالع ليش رايدة شيء؟
-لا بس ما تتعشه؟
حسن:- اي طلعيله الروبة المشگره
طيبة:- لا ذبيتها بالزبل حشاكم ما تنوكل هههههه
ابتسم وهز راسه وگال لا ما رايد عشه اتعشه بره
اجت امه تمشي على العكازة وگالتله وين رايح؟
حيدرة:- ها محتاجة شيء؟..
- ما توديني للدكتور؟
حيدرة :- ليش متأذية من شيء؟..
- يشوف رگبتي بلكت طابت ياله
-ماكو دكتور يفتح بالمغربية هاي هسه بعدين باچر اخذچ الصبح مجرد فحص مو ضروري ادري
-چاا خووش
رجعت للغرفة وهو طلع عفت الي بيدي ورحت وراه..
حيدرة:- ها ؟؟
-اشتريلي شي وياك..
-تأمرين شنو مشتهية؟
-مشتهية حلا جيبلي نساتل..
-نستلة وتاكل نستلة طرگاعا..
ضحكت وسكتت..
-ناري مساع مو چنتي تبجين ؟؟
-وانت مساع مو چنت معصب؟؟
-شلون يعني ما اهدئ؟؟
-وشلون يعني ما اضحك؟؟
-ههههههه يااابه لك فدوا
-مو تنسه النساتل..
ضحك وجاوبني لا ما انساچ..
سد الباب ورجعت دخلت گعدت يم امه واجت طيبة جريتها من ايدها لحتى تكعد يمنه ما قبلت
-شبيچ ليش ما تحچين وياا امچ؟؟
طيبة:- رجاءً لا تتدخلين بيه ناردين..
-هاا على راحتچ..
راحت التفت لعمتي شفتها تبچي :- يا خاله ما اعرف يا عمه المهم شبيچ تبچين من وره طيبة موو ؟
- بكيفج اثنيهم ، ياله
- لعد ليش
سكتت ،تالي كالت :- تعاي حبوبه اكعدي يمي حداي
كعدت يمها بقت تسولغلي علئ حيدرة من جان صغير و اني خربانة ضحك چان بس يخوزر ويعصب على لا شيء وكبر ونفس طبعة ما اتغير
- بس حبوبه گلبه طيب ما يتمنئ الشر لواحد و اهواي يساعد الناس يساعد الكل
- خاله ليش صارت مشاكل بينكم وشنو هيه ؟ وليش ماتحچون
- ما اكدر احچيلچ السالفه عبن خافن ما يقبل لأنهو موصيني ما اگولن لواحد
- هاا خوش
- لا تتضايگين يمة
- لا ما تضايقت ولا زعلت
كحت ، :- صحه صحه هسه اجيبلج مي
كمت جبتلها كلاص مي دافي صبيتلها و انطيتها ،اخذته مني و ما عافت ايدي
- هاا خاله عمه ايدي ايدي
عافت ايدي وگالت بتنهد :- الوحمه الي بيدچ ذكرتني بوحده غاليه عليه
- ها و منو هيه ؟
- ما تعرفينها حبوبه بس كولي الله يرحمها .
- شنو ميته !
- اي من سنين ماتت ،بس بعدني اتذكر كلش زين ايدها وانتي ايدج اليمنه مثل وحمتها
- هاا الله يرحمة
- امين
حسيتها اتذكرت وانقهرت حيل تالي اذن المغرب فرشتلها السجادة للصلاة كالت.. يمة مااكدر ادنگ
-شلون تصلين چا..
-انه وكاعدة واروحن فدوه للچا وصاحبتهه..
-ياروحي خاله فدوا لگلبچ..
جبتلها كرسي وطبلة خليتلها التربه والسبحة ورحت توضيت وصلينه سوه ..
دخل حيدرة ورگع الباب قوي اجه عصبي ما اعرفت شبي صعد بسرعة للغرفة اخترعت ولحكته وصعدت ورا !!
شفته خلا اوراق بالكنتور ورفع موبايله وخابر وهو يگول رائد لا تجي باچر اجل الموضوع بعدين..
سكت تالي كمل كلامة :- اي صارت شغله جديدة رووح للمركز باجر اجي انا اي يالله الله ويااك
سويت روحي توني دخلت وما سمعت شيء وبسرعة سألته ليش اجيت معصب صاير شيء وياك؟؟..
بسرعة شكر الغراض من ميز المرايا..اخترعت من صوت الغراض التكسرن ياا شبييك حيدرررا !
دفعني وهو يكول شششش ولا حررف ولا كلمة
طلعني من الغرفة وسد الباب قفلة اسمع بس صوت التكسير !
اجت طيبة على الصوت وگالت ياا عززززه شبي اخوي!!
-ما اعرف والله علمي علمچ! خايفة عليه لا يسوي شي من ورا عصبيته!
صعد حسن يريد يدخل لغرفته من شافنه اجه يمنه
حسن :- شنو هدا الصوت ؟
-حيدرة سد الباب وديكسر
شكرا لزيارتكم عالم روايات سكيرهوم
