رواية عشك أل فراس الفصل التاسع والعشرون بقلم زينب نور
علي: المسدس كان كاتم تلاث طلقات كلهن بـ راهب وحدها اجت بطنة وثنين بكتفة الأيمن مباشرةً وكع سابح بدمة
علي:راااهببب
وكع بحضني سابح بالدم صحت على نمر طلع يركض واكو كم شخص طلعوا واجوا يركضون علينا
نمر:ولك شصارر مو هسة طلعتواا
علي:عوف الخرا هسة خل نشيلة
المستشفى كان قريب علينا فـ بسرعة نقلنا وكادر كامل كان موجود كان لابس تشيرت ابيض صار احمر من الدم كعدت بالكاع مخلي ايدي على راسي
نمر:فهمني شصار مو طلعتوا من عندي ماكو شي
علي:ما اعرف سيارة تكسي ضربت تلاث طلقات وطلعت الرمي علية وهوَ صار كدامي خرا بيه
نمر:كافي إهداء لا يصير بيك شيء ان شاء الله ماكو شي
علي:ضل بيها اهداء انا السبب اذا صار بيه شي انا السبب
كعد يمي نمر نسيت حتى اخابر اهله واكلهم ايدي وملابسي كلها دم من عنده رحت بـ غير عالم ماحسيت غير صوت ابو ازهر يحجي وياي
ابو ازهر:بوية شلون هيج صار
علي:طلعنا من البيت الثاني وطبكت علينا تكسي وصار اللي صار
ابو ازهر:انا اخو باشا انا اعرف راهب ماعنده اعداء يروح بدربة ويرجع بدربة منين اجوا ذول
ذياب:ماعنده اعداء بس عنده أصدقاء سوء
عرفت الكلام يقصدني ذياب يكرهني لان اكثر من مرة الزمة يشرب او بالمخدرات ماكنت اتخذ بيَّ اجراء قانوني اسلمة بيد راهب وهاي هيَّ ومن عدها ضل يكرهني
سكتت عنه ما جاوبت كعدت انتظر الدكتور يطلع بعدين وحدها من الممرضات طلعت تركض
الممرضة:المريض محتاج دم لازم اقل من ساعة يتوفرر غير هيج ممكن نخسرة
علي:اي أنا موجود نفس زمرة الدم
الممرضة:لعد تفضل وياي نسحب دم بـ أسرع وقت
ذياب:دم اسود مثل دم الجلب
علي:الخاطر اخوك راح اسكت بس دير بالك مني
مشت الممرضة كدامي دخلنا لـ مكان سحب الدم
الممرضة: ملابسك كلها دم
علي:اي
الممرضة:نقيسلك الضغط
علي:لا شكرًا بس كملي سحب الدم
الممرضة:نسحب دم ميصير تطلع قبل متاكل شي حتى لتصير عندك مضاعفات اقل شي لازم تشرب عصير وتاكل فواكة
علي:ماشي
كملت سحب الدم اجه نمر كعد يمي وجاب اكل
نمر:يلا اكل
علي:ماطلع الدكتور
نمر:لا بعده العملية كبرى تعتبر تلاث طلقات بـ جسم واحد شيصير
علي: انا الهم
نمر:منو همَّ تعرفهم
علي:ماكو غيرهم ولد داود
نمر: اول وتالي ينعرفون اكل يلا لا تغلس
علي:ما اشتهي
نمر:بكيفك هي ما تشتهي
اكلت شوية وكمت طلعت جدي وابوي وعمامي والشيخ موجودين
الجد:كول يالله بوية ان شاء الله مابيَّ شي
علي:ماطلع الدكتور
ازهر:لحد الان محد طلع
خمس ساعات يلا طلع الدكتور
ابو ازهر :بشر بوية
الدكتور:حالته مستقرة وكدرنا نسيطر لان مانازف هواي راح يبقى كم ساعة تحت المراقبة ومن بعدهي انقلة لـ غرفة خاصة والحمدلله على سلامتة
ابو ازهر:الله يبشرك بالجنة يابوية
اترخص الدكتور وراح كعدت على الكرسي خليت ايدية على وجهي حسيت ايد انحطت على كتفي
ابو فهد:كوم بابا كوم صاحبك مابيَّ شي
علي:أنا السبب يابه أنا السبب عداوتهم وياي بس عرفوا نقطة ضعفي
ابو فهد:لا تحجي هيج قضاء وقدر وصار والله ياخذ حقة منهم
الشيخ:روح للبيت بدل ملابسك وارتاح وتعال ارجع لااا تحجي ولا كلمة يلا روح وجيب وياك فلوس العملية
علي:خوش رايح
طلعت من المستشفى باوعت على نفسي ملابسي كلها دم صعدت السيارة وطلعت باب بيتهم كان مفتوح وامه كاعدة بالباب تبچي ويمها نسوان بس شافت السيارة كامت طبكت على جهه ونزلت
ام ازهر:بشرنيي يمه شلونة ابنييي
علي:زين والله زين حالتة مستقرة ومابيَّ شي
انتبهت على ملابسي وكامت تلطم
ام ازهر:دمة هذا دمة صخام الصخم وجهي يمه سودة عليه يايمه ريت الصواب بيه ولا بيك
علي:اسم الله عليج ادخلي جوا والله مابيه شي
ام ازهر:اريد اشوفة
علي:المستشفى متروس زلم من تفرغ ويكون بوحده انا اخذج والله
دخلت لـ جوا وانا رحت لـ بيتنا محد موجود صعدت لـ غرفتي سبحت وبدلت ملابسي اخذت فلوس وطلعت صارت بوجهي امي
ام فهد:كواك الله يمه شوكت اجيت
علي:الله يكوي حيلج يمه كبل ساعة تقريبًا
ام فهد:ما تآكل شي
علي:لا يمه راح ارجع اجيت ابدل ملابسي اكو ملابس بالحمام بيهن دم ذبيهن لا تغسلينهم
ام فهد:شلونة راهب
علي:على كلام الدكتور زين
ام فهد: ان شاء الله مابيَّ شي التعب ابين على وجهك حيل
سكتت ماحجيت شيي ترخصت وطلعت وصلت المستشفى ناس هواي واكفين من عبرت اكو ممرضات ثنين واكفات
_هذا اذا صارت عنده مضاعفات او يموت شلون راح نكلهم
_كبل يكولون حضروا عمامكم او لا كبل كل واحد طلقة براسة
_المحفظة مالتة بيها هويتة وباج مدري شنو بس هو ضابط
_لا هاي هيَ ضابط وابن عشاير اذا مو بالعشاير بالقانون
كملت طريقي سلمت باوعت نمر ماكو
علي:نمر وين
حارة:كال عندي شغل ساعة وارجع
علي:شيخ الفلوس
الشيخ:من فلوسك
علي:اي
الشيخ:خليهم يمك انتَ ادفع
علي:لا انتَ اخذهم وادفع مابينا فلوسي وفلوسك واحد
استقرت حالة راهب نقلوا لـ غرفة خاصة طلعت وكفت بـ باب المستشفى اشرب جكاير اجه ابو مهيب ويا ام ازهر ومهيب ومهيمن
ابو مهيب:ها بوية الله يساعدك
علي:هلا عمي يساعد بختك شجابكم
ام ازهر:يمه طك كلبيي على وليدي
علي:ناس جوا هواي شيدخلج
ام ازهر:ميخالف يمه بس اريد اشوفة
دخلوا همَّ جوا كملت الجكارة اجيت ادخل دك تيلفوني رقم غريب عرفتة لـ واحد من ذول
علي:الو
_مرة ثانية لا تحط راسك بـ راس زلم الاستاذ داود
علي:انتَ وداود وذكورة جوا نعالي خل افرغ وأنا الكم
_هههه هالمرة اجت بـ صاحبك المرة الثانية بيك او بـ شخص عزيز جدًا على كلبك
علي:ضحكتني دير بالك على نفسك
_نشوف منو يدير بالة على نفسة انا او انتَ
علي:نتواجة
سديت التيلفون ودخلت لـ جوا
علي:شكو
نمر:صار عنده مضاعفات
علي:ياربي دخيلك اخذ من عافيتي وانطي
كعدت حيلي مهدود ذنبة بركبتي وكل دمعة نزلت من امة واهلة بركبتي لـ يوم الدين
ام ازهر:يارب لا تفجعني بيَّ
ذياب:ارتاحيت هسة والله اذا صار بـ راهب شي ما اخليك عايش والله
نمر :وحك كريم اهل البيت اذا ماتحترم نفسك وتسد حلكك انومك بـ صف راهب كاافييي
ذياب:خليكم انتَ وابن عمك هذا يضحك عليكم ويشمركم بـ سوالفة
ابو ازهر:امشي ولي اطلع ما اريد اشوف وجهك
الجد:صلوا على محمد بوية اذكروا الله مو وكت هذا الحجي خل نطمئن على راهب وانتَ بوية اذا ما تحترم علي احترمني انا وعمامك واكفين خلينا احترام
ذياب:ابنكم يحط نفسة بـ شغلات يورط غيرة
كال هيج وراح كعد محد جاوبة اجه نمر كعد يمي حط ايدة على كتفي
نمر:معليك بيَّ يمسلت
هزيت راسي وسكتت طلع الدكتور كال حالتة مستقرة حاليًا اتعدى مرحلة الخطر بقى راهب أسبوع بالمستشفى هوَّ فاقد يوم الخميس بـ4:30 صليت الفجر ودخلت يمه محد كان موجود كلهم راحوا لزمت ايدة ونزلت دموعي
راهب مو بس صديق وبالاسم راهب اغلى من اخواني راهب اخو وسند الي شحجي عنه قليل....
شوية وحسيتة كعد اجه الدكتور شافة وكال
الدكتور:صحى الحمدلله على سلامتة
نص ساعة وكعد راهب
علي:عزيز روحي الحمدلله على سلامتك
راهب:شريك سنيني الله يسلمك
علي:ريتهن بيه ولا بيك
راهب:هههه انجب مع احترامي الك
دخل ذياب أنا طلعت وراها اجوا اهله كلهم وبقى راهب عشر ايام بالمستشفى وراها طلع
علي:شلون اجازيك
راهب:أنا شلون اجازيك مو انتَ شكم مرة انتَ فاديني بـروحك شكم مرة انتَ متحمل عقوبة من وراي هواي الك مواقف لو انذر عمري الك ما اجازيك
قاطع كلامنا دخول ابو ازهر انا ترخصت وطلعت لـ بيتنا بالطريق صادفت فرح بنت عمي
فرح:هلا شلونك
علي:هلا بوية الحمدلله انتِ شلونج
فرح:بخير الحمدلله
علي:وين رايحة
فرح:الكم
علي:چا يلا فوتي كدامي
دخلت هي كدامي سلمت وصعدت يم شهد كعدت يم اهلي
الجد:شلونة راهب
علي:زين
الجد:منو ذول اللي سووا بيَّ هيج
علي:ناس هتلية
ام فهد:تعبان انتَ كوم ارتاح عندك دوام باجر
علي:باجر التحاقي
ام فهد:يايمه تعبان التحاقيش
علي:غير واجبي
الجد:ان شاء الله من تنزل على خير ورا محرم نزوج اسد حتى نتفرغلكم بعد
علي:على خير
صعدت لـ غرفتي سبحت وبدلت وطلعت ملابسي اريد اخليهم بالجنطة دخلت امي
ام فهد:اكعد اريد احجي وياك
علي:اسمعج
ام فهد:همَ عندك شي ويَّ فرح
علي:فرح! لا ليش
ام فهد: اريدك تبتعد عنها حيل حيل البنية مراهقة وصديقاتها سحبنها لـ طريق خطأ
علي:اهلها وين
ام فهد:مامقصرين بس صديقات السوء لذلك اريدك تبتعد البنية تفكر افكار بعيدة حيل عن الواقع وذيج المرة ذبت عليك سالفة وانتهت الله يعلم هالمرة شسوي دير بالك كلش زين وابتعد عنها وحتى سلام لا تسلم عليها
علي:صاير شي
ام فهد:صاير او لا اسمع كلامي وخلص
علي:ترا مو طفل انا حتى تمشيني هاي الزعطوطة على حسب افكارها لاعندي شي وياها ولا عدها شي وياي
ام فهد:انتَ بعدك ويَّ قمر
علي:ماعندي تواصل ويَّ قمر
ام فهد: اعرفك تكره الجذب وماتجذب وانتم تلتقون بالبستان
علي: شدراج
ام فهد:انتَ تقبلها على خواتك
علي:هوب هوب شمسوين التقيت بيها بالبستان واكفة بعد متر عني وكلامنا عادي واول وتالي هي مرتي وثاني شيء خواتي كلهن تم زواجهم على حب وعلاقة وتواصل وادري بهذا الشيء بس ادري بيهم زلم لهيج سكتت وقمر لا تجيبون طارية لا بخير ولا بـ شر لحد مايصير كلشي رسمي
ام فهد:انا ما جاي احجي على البنية واتمنى اليوم قبل باجر تكون جنتي ومثل بناتي بس انا خايفة على البنية من اهلها ومن الناس وسَحر ما ناوية خير وفرح وياها
علي:وهسة انا اخاف من زعاطيط صدك تحجين شيردن يسون خل يسون هنه ونعالي
ام فهد:الله كريم باجر بيش الساعة تروح
علي:بـ 5
ام فهد:هم الموصل
علي:لا كركوك
ام فهد:حظي ما يشمروك غير بذنك المناطق كلها خطرة
علي:هذا شغلي
ام فهد:لو يرجع بيه الزمن فـ لا اخليك توصل العسكرية وتختار هذا الصنف
علي: احلى شي بالماضي هي العسكرية
شوية وطلعت حضرت غراضي وطلعت البدلة العسكرية كويتها ونمت على الفراش طلعت تيلفوني صار فترة ماشايف الناس بس قمر اراسلها وخلص اسد التيلفون حجيت وياها شوية ومن بعدهي نمت
فزيت على صوت امي
ام فهد:علي يمه علي الساعة بـ 6
طفرت من مكاني تأخرت حيل
علي:بـ 6
ام فهد:اي والله عبالي رحت
علي:خرا بالحظ تأخرت
ام فهد:من التعب حقك كوم بدل على ما اسويلك ريوك
طلعت امي كمت سبحت وبدلت على السريع صارت بـ 6:40
علي:طلعتوا
نقيب رسول:وصلنا السماوة حركت التيلفون حرك ماكو شنو السالفة
علي:نايم وما سمعت انتَ ويامن رحت
نقيب رسول : شجاع وحيدر ومسلم
علي:درب السلام
نزلت جوا كلهم كاعدين اللي يرحون لـ دوام واللي عدهم شغل سلمت عليهم وطلعت بـ سيارتي التحقت
صادفت ايام محرم وبهاي الايام داعش يشهد حيلة على الشيعة
نقيب رسول:الوضع متوتر
علي:ناخذ حذرنا والباقي يم الله بس الجنود لا يغفلون ينامون او يلتهون بالتيلفون اخذلك فره عليهم
سيطرنا على الوضع لحدما خلص واجبي ونزلت للبصرة وصلت السماوة اتصل عليه ابوي
ابو فهد:الله يساعدك بوية
علي:يساعد بختك هلا حجي
ابو فهد:شني وين وصلت
علي:بالسماوة
ابو فهد:دير بالك من الطريق بوية ولا تسوق سرعة
علي:صار
سديت التيلفون وكملت طريقي من دخلت الناصرية عبارة عن مواكب وكلها زوار بعدهم بالناصرية ما واصلين السماوة
وصلت للبيت بـ 3 الضهر
الجدة:هلا بهالطول
علي:هلا بعافيتي
سلمت عليها محد كان موجود بس هي
علي:چا وين الاهل
الجدة:شهد بغرفتها وامير وامك راحوا لـ زيارة وجدك وابوك والشيخ وصهُيب بالموكب يخدمون واسد بالدوام وردة فوك هيَّ وابنها
علي:وانتِ كاعدة وحدج غير تنزل الخاتون شهد تكعد يمج
الجدة:يبعد امك جانت تقرا وصعدت فوك هم تعبانة سودة عليه تتغده يمه
علي:لا متغدي
ترخصت منها وصعدت فوك دكيت الباب على شهد سلمت عليها وكتلها انزلي جوا لا تخلين الحجية وحدها اتصل عليه راهب
علي:هلا بالعزيز
راهب:هلا بيك بعد بيتي شنو وصلت بعدك
علي:اي قبل شوية وصلت شلون صرت
راهب:الحمدلله احسن بليل تروح للموكب
علي:مادري اشوف اذا كدرت
راهب:عندك شي
علي:لا بس تعبان
راهب:ميخالف كمل تعبك بليل نروح
بدلت ملابسي ونمت كعدت بـ 5ونص على صوت التيلفون رقم غريب
علي بنعاس:الو
_مرحبا
صوت بنية باوعت على الرقم غريب اول مره اشوفة
علي:منو
_اممم ضروري تعرف منو
علي:تحجين منو لو شلون
سكتت ماحجت شي سديت التيلفون
علي:دنعل ابوج لابو حتى الخلفج بربوك
رجعت اريد انام ما كدرت كمت غسلت ونزلت جوا هم محد موجود
ورا فترة طلعت مشاية من الحلة ماكدرت اطلع من البصرة بوقتها دوام عندي مرت ايام الاربعين والخدمة
انتهت الاربعين بدوا يحضرون لـ عرس اسد وراها لـ خطوبة اسر وراها لـ خطوبة صهُيب
امير:انطونا فكة خل نتنفس فوكة فوكة
الجد:انثبر انتَ الخميس خطوبة صهُيب والعرس مايطول لا هو ولا اسر وراهم علي ومحمد
محمد:انا ما ازوج لحد يفتح هذا الموضوع رجاءً
ورا فتره صارت خطوبة صهُيب انا انشغلت بـ دوامي حيل صار اغلب وقتي بالدوام حتى اهلي قليل اشوفهم
قمر:والى متى تبقى هيج مشغول
علي:ان شاء الله فترة وتخلص بس هاي الفترة
ورا يومين بالضبط خابرتني امي كالت هسة تجي للبيت اخذت اجازه زمنية وطلعت
علي:شكو حركتي التيلفون حرك
ام فهد:فرح بنت عمك
علي:اهوو شبيهاا
ام فهد: انتحرت
علي:شنوووو
..............................
قمر:عرفت فرح تحب علي ما اعرف حب حقيقي او مثل ميكولون حب المراهقة وراح ينتهي
صدمتي كانت مو قليلة ابدًا والغيرة اشتعلت بكلبي لـ درجة صرت كل يوم اتخربط وكل تفكيري كان انُ راح يخطبوها اله ويزوجون وخلص أني انتهي من حياة علي
لان جدهم عنده بناتها غاليات حيل وميضوجهن بشي هذا اللي خفت منه بهاي الفترة علي صار قليل يحجي وياي ويكولي دوام وكُل ما اسئل شهد كانت ادكولي بالدوام اغلب الوقت بس ما عندي جرئة اكولها شنو علاقة فرح بـ علي
عشت ايام بـ قلق وخوف انُ تاخذه مني بعد ما حبيتة وتعلقت بيَّ بشكل مو طبيعي صرت ابچي كل يوم خوفًا من انُ افقده
لحد مايوم كاعدين على الغدة وسمعنا صوت صراخ كُلش عالي من بيت ابو اسيد طلعوا اخواني وابوي يركضون على الصوت واحنه واكفين بالباب نريد نعرف شنو اللي صار راحت امي واحنه مقبلوا نطلع
رنا:هسه غير يجي واحد يكول شنو السالفة
قمر:خلونا نلطم وراحوا
الصوت كان جدًا عالي صراخ نسوان والناس كلها التمت شوية واسعاف اجت
رياهم:عززاا هاي شكو يارب استر
قمر:هاي فرح
رنا:يمه شبيها
خلوها بالسيارة وطلعوا محد اجه حتى يحجي شنو الموضوع ضلينا ننتظر ساعتين يلا اجت ماما
رنا:شكو شصاير
ام مهيب:فرح منتحرة
قمر بصدمة:ليش
ام مهيب:محد يدري كاعدة يمهم وصاعدة لـ غرفتها صاعدة وراها اختها لكتها جارحة نفسها من الوريد واكعة بالكاع
مباشرةً اجت براسي حبها لـ علي معقولة ! بسبب هذا الشيء
صعدت لـ غرفتي وكفت على الشباك شفتة اجه بـ سيارتة لابس عسكري نزل بسرعة دخل للبيت وبعد ماطلع
راسلتة ماجاوب اتصلت عليَّ رفضني ضليت افتر اريد اعرف السبب ليش هيج سوت اتصلت عليه سَحر بس فتحت التيلفون انهدت بوجهي
سَحر:يا حقيرة يا كلبة والله والله اذا صار شيء بـ فرح ما اخليج تتهنين بـ عشيتج حقيرة من اجيتوا ما شفنا الخير مريضة ومكاعدة راحة
مالحكت ارد مباشرةً غلقت التيلفون
نزلت دموعي على كلمة مريضة ! شنو ذنبي اذا ربي ابتلاني بهذا المرض شنو ذنبي واتحمل هيج كلام شنو بيدي ومنو يتمنى المرض يصيبة
شفت علي دزلي رسالة مجاوبتة شمرت التيلفون وانهاريت الكلمة مو سهلة على المريض ابدًا شخص يحجي وعادي عنده بس المقابل شنو راح يصير بيّّ اني لو بيدي اتعالج اليوم قبل باجر مرضي متعب
رجع اتصل عليه جاوبتة
علي:متجاوبين شبيج زعلتي شنو
قمر:لا على شنو شصار على فرح
علي:شبيج شبيَّ صوتج تبچين شنو
قمر:لا مبيه شي بالي يم فرح ليش هيج صار وياها
علي بحدة:قمرررر عوفي فرح هسة شبيج ليش تبچين
علي ما كان يعرف انُ اني اعرف بـ حب فرح اله وهوَّ حتى محجالي ولا فتح الموضوع ابدًا
من سئلني ما تحملت انفجرت بيَّ هوَّ مالة ذنب بس مالكيت احد يمي غيره
قمر:شبيه مريضة بعد شبيه ومكاعدة راحة اني مو كتلك اتركني عوفني شوف حياتك لا تصخم حياتك ويَّ حظي المصخم روح فرح تريدك ويمكن هسه منتحرة بسبكك وسَحر تريدك لان رب العالمين خلقك وكسر القالب بعد ماكو غيرك زلم ابددد انعمت عيونهم عن الكل بس عنك هذا اللي بيه مريضة ومكاعدة راحة هذا الكلام اللي اسمعة افتهمت هسة شبيه بيه مرض رب العالمين ليش مايخذني ويخلصني ليش
علي:اولًا انثبري وطاري الموت لا تجيبي على السانج لا اكصة الج ثانيًا ماكو احد بينا ما مبتلى بشيء وانتِ راح تتعالجين ومابيج شي وراح نزوج ونخلف ونعيش حياتنا حالنا حال الناس ثالثًا سوالفج مال عوفني وعوفني بطليها ترا انا صبري اله حدود وعلى ساعة ينتهي واذا انتهى ما اضملج علي هذا اللي جاي يحجي وياج ،الي وياج غير اسلوب رابعًا فرح وسَحر ماعندي شيء وياهن خوات الي فقط ،كافي من هذا كلامج منين ما ادورها مصخمة
كال هيج وغلق التيلفون ضاج حيل وحقة هو شنو ذنبث حتى احجي ويا هيج كد البچي لفيت راسي ونمت كعدت المغرب راسي مسطور سطر غسلت ونزلت كلهم موجودين بس بابا طالع
قمر:شصار على فرح
مهيب:بعدها بالمستشفى يكولون زينه
قمر:ليش هيج سوت
مهيب:متعاركة ويَّ صديقاتها ومسوية هيج
قمر:يا خطيه الله يشافيها
ورا كم يوم طلعت فرح من المستشفى راحت امي حتى تسلم عليهم چلبت الا اروح وياها بعد معاناة الا قبلت رحت وياها من دخلنا سمعت صوتة بالاستقبال مال بيت ابو اسيد
كعدنا يم فرح كل ما اباوعلها وتجي عينها بـ عيني تخزرني ماما انتبهت لهذا الشيء ترخصت وطلعنا ويَّ طلعتنا هوَّ طلع من الاستقبال عصبي حيل من شافنا ابتسم وسلم علينا وطلع كدامنا ابتسمت على ابتسامتة صار فترة مشايفتهه ابد ومن بعد ذاك اليوم اخذله فترة زعلان ومن بعدهي حجيت ويا وراضيتة يكولي مو زعلان بس مشغول
رجعنا للبيت اول ما دخلنا كالت ماما
ام مهيب:شبيها فرح تخزر بيج
قمر:مادري بس هي من زمان تكرهني
ام مهيب: عليمن تكرهج شو حتى متحجين وياها وانتِ ما اطلعين ماخذه رجلها شنو
قمر:يا منيلها هي غير ممزوجة
ام مهيب:فاهية انتِ ماتعيشين بهل الدنيا بين الوحووش
قمر:يا ماما شدخل الوحووش
ام مهيب:دروحي روحي شوفي رنا ورياهم وين
قمر:اوك
رحت ادور عليهن لكيتهن كاعدات بالسطح رنا كانت حامل ورياهم عدها يوسف وهم حامل
قمر:شعدهن البطوط فوك
رنا:هههه عابت شوكت اجيتوا
قمر:قبل شوية
رياهم:تعالي سولفي شصار
حجيتلهن كُلشي بالتفصيل الممل
رياهم:اهم شي شفتي الحبيب
قمر:صاير حلو خرب انه بس ماعرفت عليمن عصبي
رنا:خاف علمود الست فرح بديت اكره هالبنية كبر ايي والله هسة تطلع منتحره من ورا
قمر:متأكدة من هذا الشيء والمشكلة اللي عندي شكولهه يكولي مادري كاعد وياها اني
رياهم:صُدك شمدري الولد
قمر:علي هذا يعرف النغل منو ابو
رنا:ههههه طيح الله حظج ايي والله على هذا المثل
قمر:اخذته منه هذا
مرت الايام بهدوء يوم من الايام طلعنا للبستان كلنا أني ورنا ورياهم ويانة انوار ومرت ازهر كعدنا بالبستان
انوار:راح اخابر شهد خل تجي
رنا:اوك
اتصلت عليها اكثر من مره متجاوب
انوار:متجاوب
رياهم:يوسف تروحلهم تصيح البنات
يوسف:وين اروح
رياهم:لبيت الشيخ صيح البنات كلهم يردونهم بالحديقة
يوسف:اوك
راح يوسف ربع ساعة او اكثر ورجع
قمر:ها
يوسف:ما موجودين
قمر:وين راحوا
يوسف:طلعلي هذا ابو المشاكل امير كلي شهد ماموجودة فقدت عقلها واخذوها لـ شماعية والبقية كلهم راحوا وراها بس أني موجود
رياهم:ديلا بلا
قمر :امير بعد
ورا نص ساعة اجوا شهد وازل ورسُل ومرايم وريم وفرح ومرح وسؤسن بنت خالهم
سؤسن: شلونكم عيني
سلمنا عليهم وكعدنا لـ 6:30 وبعدهي كل واحد راح لـ بيتة بليل حجيت ويَّ علي احسة بيَّ شيء بس مشكلتة ميحجي الا يشلع كلب الواحد
قمر:والله بيك شي ابد مو طبيعي
علي:تروح وترجع عليه بوية مابيه شي
حاولت ويا ماكو كال راح اطلع أني ضليت العب بتليفون رحت لـ حساب سَحر بعدها نفس مرضها بس تنشر عنه بكُل صلافة من خلال حسابها طلعت حساب فرح مناشرة شيء دزيتلها متابعة دخلت على اللي متابعتهم اخوانها ولد عمها ومن ضمنهم علي اجيت انجلط
ورا فترة هي عرفت حسابي دخلت خاص نزلت بيه دك غلط وسب وانواع واشكال كلام ابد مو معقول من ضمن الكلام كاتبة
فرح:اخذه يعني اخذه حتلو ثانية المهم اخذه غصبًا عليج ولا تتوقعين يحبج ترا يتسلى بيج لـ فترة وبعدهي يشمرج علي ملعب
اكتفيت بالحضر وسكتت عنها علي اعرفة اكثر من نفسي مستحيل هيج يسوي بس هي تريد تخرب
انسد الموضوع ومحجيت لـ شخص على اللي صار ورا فترة عزمونا على عرس صهُيب قبل الحنة بيوم تعاركنا أني وعلي ماكدرت اضم عليَّ حجيت اللي صار بيني وبينها وهوَّ رزلني وأني هم ما سكتت تعاركنا
بيوم الحنة من رحت ماشفتة ابدد ثاني يوم بالعرس صعدت لـ فوك لان تعبت طلع هوَّ من غرفتة اني كنت لابسة فستان وهوَّ طلع لابس رسمي اسود كله اسود
ضلينا دقايق واحد يباوع لـ ثاني محد حجه لحد ما اجانة صوت فرح من وراي
فرح:التقوا عصافير الحب
علي:خليني محترمج ساكتلج لـ خاطر عمي وخالتي
فرح: يصير خير نشوف منو يفوز بالنهاية اني لو هاي المريضة
تقدم عليها راد يضربها صرت أني كدامها لزمت ايدة اول مرة نصير بهل القرب واول مرة الزم ايدة
قمر:لا لتضربها حباب عوفها معليك بيها
علي:اريد من الله مره ثانية تعيدين هذا الكلام انا الج سكتتلج هواي والضاهر انتِ مو مال واحد يحترمج خل يخلص العرس وانا الج
قمر:كافي عوفها روح انزل اكيد هسة ينتظروك برا
علي:مولي وانتِ من واحد يحجي وياج هيج كلام ردي الكلمة بالف ولا تخافين
هو نزل واني نزلت ورا حتى ما اريد ارتاح خلص العرس ورجعنا للبيت ومن بعدهي ماطلعت ابد ولا شفت شخص
بيوم من الايام فزيت الصبح على صوت رمي كُلش قريب وعالي حيل نزلت اركض ماما ورنا ورياهم واكفات بالصالة اني مباشرةً فتحت باب الصالة والباب الخارجي اندفر وانفتح على كبرة بسرعة دخلت وسديت الباب صار الرمي بالحديقة حسيت كلبي راح يوكف من الخوف
واحد منهم ضرب باب الصالة وصاح
_اذا ما اطلعين ويطلعون زلمكم احرك البيت على راسج
علي:تخسييي يالنذل صايرين زلم على النسوان
شكرا لزيارتكم عالم روايات سكيرهوم
