رواية عشك أل فراس الفصل الثلاثون بقلم زينب نور
علي:شنوووو ليش انتحرت
ام فهد :تحبك غير
علي:اهوووو رجعنا لـ نفس الربابة
ام فهد:الربابة ما خلصت حتى رجعنا الها
علي:وانا شعلية بيها تحبني او لا كافل بيها انا فاتحلها حضني يعني لو منطيها امل سلام وياها وخلص شعلية بعد
ام فهد: شوفلك حل
علي:ماعندي حل خلي اهلها يلزموها ويأدبوها بنية عمرها 16 سنة محد يعرف يفرك حلكها بنعال ويطيح حظها حتى تتأدب
ام فهد:اهلها ما مقصرين وهيَّ راحت ورا صديقات السوء
علي:ايبااخ صديقات السوء لو اكو راقبة من الاهل چا ماصار هيج ونعالات السوء يكدرون يبعدونها عنهم ولا تحطين الشغلة براسي ترا مالي خلك كفيلج الله اطلع ضيم الدنيا بيها
غزل:اهدوا هسة مو وقت العصبية خل نفهم شصار بيها
علي:كلشي مابيها اصحى مني استهتار هذا
ام فهد:كاافيي عااد
علي:مخابرتني وعايف دوامي وشغلي على مود هاي الشغلة رجلج فؤاد وانتِ فرح هيَّ هاي سوالفكم ماعدكم غيرها
عسل:علي اهداء كافي اتركوا الموضوع هسة
خواتي كلهن يمنا كعدت انتظر شنو راح يصير شوية ودخل جدي اول مرة اشوفة هيج عصبي
الجد:تاالي عمرنا بنت بكد هاي تسوي هيج تنتحر والله احب ابن عمي وكاتبة وصية يا سواد وجهي يا سواد وجهنا تنتحر علمود احب واحد حسبي الله عليج من بت
علي:اهداء حجي ماتسوا
ام فهد:شلونها هسة هيَّ
الجد:كلشي مابيها اصحى من الحصان شلونها بليل تطلع كلشي مابيها احفادي من الصغر لـ هسة جبتهم كلب على كلب وما زرعت حقد وكره بين ولدي وبناتي ولدهم وبناتهم ولا خليت واحد يزرع كره وحقد بينهم تالي تطلع هاي تسوي هيج يا حسافة والله يا حسافة التربية والتعب بيها
ابو فهد:اهداء لا يصير بيك شي ينحل الموضوع وينتهي كلشي صدكني
الجد:شنو الحل كلي يلا
علي:لا تباوع عليه دير بالك ادكلي تزوجها
ام فهد:شناقصها
علي:رحمة للعباس ابو فاضل اسكتي عني انتهت اجازتي وما فارغ لـ هاي السوالف وفرح لو تبقى اخر مراة ما اخذها وغير اللي احبها ما ازوج شهد اصعدي فوك تلكين اوراق على الميز جيبيهم وتعالي بسرعة
كلهم سكتوا جابت شهد الاوراق اخذتهم وطلعت لـ دوام اول ما دخلت صار كدامي راهب ضرب التحية ورديتلة التحية وبعدهي دخلنا لـ جوا
راهب:وين رحت وشنو هاي الاوراق
علي:رحت للبيت تخص بعض التجار معلومات اكو قضية اريد اشتغل عليها
راهب:نفسها قضية داوود مو
علي:مو داوود هذا غيرة بس اله صلة بـ داوود
راهب: اتوقع شايفة هذا صورتة مو غريبة
علي: قبل فترة قصيرة انعرف هذا فـ طبيعي جدًا مار على اغلب الضباط
راهب:اتوقع هيج
بديت اشتغل عليَّ لـ 3 الفجر شغلت نفسي حيل
كنان:سيدي اكو شخص برا طلب انُ يلتقي بيك
علي:بهذا الوقت منو هذا
كنان:ما كال منو بس كال اريد اشوفة ضروري حاليًا يم الولد برا
علي: هسة اجي
سديت الملف وكمت طلعت برا ملتمين الشباب عليَّ وهوَّ واكف يعني ما منطي فرصة حتى يتحرك
علي:اتركوا شباب
تقدمت عليَّ اول مرة اشوفة ما اعرفة اصلاً
علي:تفضل طالبني
_انتَ علي محمد المحمداوي
علي:اي أنا منو حضرتك
_أنا جايك طالبك بشغلة دلوني عليك ناس خيرة وعرفت انتَ واهلك ما تقصرون وهسة انا بيتي قريب هنا واجيتك
علي: ان شاء الله ما اقصر تفضل شنو طلبك
_ محتاج فلوس عندي عملية لـ بنتي عمرها سنتين عدها فتحة بالقلب والله ماعندي وحالتي تعبانة
علي: شنو اليثبت كلامك
_اذا تحب تعال وياي وهاي اوراقها
انطاني اوراق اخذتهم منه صح كلامة
علي:ماراح اقصر وياك ان شاء الله بس حاليًا انا ما اكدر اطلع ان شاء الله باجر تجيني هنا ونروح وبـ خدمتك
_الله يوفقكك يارب
راح هوَّ اخذت الاوراق منه ودخلت لـ جوا ما ارتاحيت للموضوع ابد
علي:كنااان
كنان:نعم سيدي
علي: شوكت ينتهي واجبك
كنان:انتهى
علي:بدل ملابسك والحك هذا اللي جان هنا واكف شوفة وين راح واذا ماكدرت ارجع بس لا تخلي لا يشوفك ولا يحس عليك بعده يمشي بس بسرعة
كنان:حاضر سيدي
راهب:شكو
علي: احسة جذاب بهذا الوقت وجايني أنا بالضبط وطالبني بالاسم السالفة بيها أنه
راح كنان ساعتين بالضبط ورجع
علي:تأخرت
كنان:سيدي راح لـ منطقة وقبل لا يوصل التقى بـ شخص وسلمة فلوس وبعدهي كل واحد راح لـ مكان لكن
علي:لكن شنو احجي
كنان:سيدي اسمحلي اشوف صورت التاجر اللي صار عليَّ اعتراف اخر شيء
اخذت الصورة انطيتها اله
كنان:اي سيدي هوَّ نفسة نفس هذا الشخص اللي سلمة الفلوس
علي: حلو سهلوا الطريق كلش
كنان:سيدي المنطقة خطرة وصعب الدخول الها
علي:ماكو شيء صعب علينا روح ارتاح
طلع كنان كعدت ادور بالاوراق اللي كال تقارير طبيب الاوراق مضبوطة
راهب:شنو براسك
علي:لازم اوصلة هذا بكل طريقة لـ باجر هذا يجيني غايتهم يسحبوني
راهب:اي وانتَ تروح
طلعت للقائد المسوؤل ضربت التحية وحجيت ويا بـ خصوص بهذا الشيء
_عاشت ايدك لـ باجر ينتهون ان شاء الله
تجمعنا مجموعة من الضباط وكعدنا ندرس خطة معينة
_ هاي المنطقة شارع واحد يدخل الها الدخول الها راح يكون بدايةً مدني يدخلون يأمنون الوضع
علي: راح يكونون بعيدين عن المكان المطلوب راح ادخل أنا كـ شخص مطلوب اكون قريب الهم وحتى نشوف البنية ومن بعدهي تجيكم اشارة
_الاشارة راح تكون اذا كدر علي يطلع من البيت يأشر بيدة واذا ما كدر راح تكون طلقة اذا ما كدر يسيطر على الوضع
علي:ومن بعدهي يكون التدخل عسكري
_بعد ما نلقي القبض عليهم تحتفظون بـ حقوق الانسان
الجميع :حااضر سيددي
ضربنا التحية وطلعنا بدينا نتحضر ونشتغل لـ 9 الصبح رجعلي نفس الشخص سلمت عليَّ وطلعت ويا على حسب الخطة وصلنا لـلـ منطقة حيل بعيدة
البيوت كانت تعبانة دخلنا لـ واحد من البيوت بنية كانت نايمة صغيرة
علي:شسمها
_ها
علي:شسمها البنية
_تُقى
علي:الله يحفظها ان شاء الله ما راح نقصر بشيء بس انتَ ليش ما طلبت تبرعات
_مايفيد وانا دلوني عليك ناس كالوا مايقصر وانا اشتغل عمالة وما تكفي
علي:ان شاء الله خير العصر ارجعلكم
اول مادرت ضهري اجيت اطلع انحط المسدس بـ راسي
_هههه كالوا عليك ذكي ماتوقعت هالكد سهل بسرعة صدكت
علي: مافهمت وليش رافع السلاح
_ لا تفهم بعدين تفتهم يا سيادة الضابط اطلع كدامي بدون حركة اييي حركة زيادة افلش راسك بـ طلقة
علي:ماشي
طلعت كدامة وهوَّ وراي تقدمت لـ كدام طلعت من البيت أنطيت الاشارة طفر عليَّ مصطفى من فوك ضربة على راسة حايطهم ناصي ومصطفى فوك
علي:صادوك وانتَ النجر
_أني معلية اتركوني
علي:ادخلوا للبيت بسرعة واغلقوا المنطقة
طلعت الناس كلها تباوع عبرت مراة لابسة نقاب بالكامل وكفوف بس شكلها ضخم حيل مو مال مراة
علي:م،حسن
حسن:نعم سيدي
أشرت عليها هوَّ افتهم رفعوا السلاح عليها مباشرةً انشمرت العباية والنقاب التاجر نفسة صار يرمي علينا مباشرةً احتمينا بالهمرات سحب طفل من الواكفين حطة رهينة
_اذا ما تنسحبون اقتلة والله اقتلة
علي: اترك الطفل ولا تعم على نفسك
_والله اقتلة
علي:انسحاااب
تراجعنا لـ ورا وهوًّ الطفل بعدة بيدة افتر راهب من ورا واحد من البيوت صار ورا واحنه تقدمنا عليَّ شمرنا سلاحنا اجهه راهب من ورا يركض ضربه دفرة اجت براسة وكع بالكاع الطفل تحرر وهوَّ الزم
علي:عاشت ايدكم ابطال
انتهى واجبنا ودخلوا تحقيق كامل البنية من دار الايتام ماخذينها وكذلك الدار تعاقبت قانونيًا بيا حق تنطي طفلة بدون متسئل وتعرف وهيَّ امانة
من بعدهي نزلت للبيت اول ما نزلت استقبلتني ازل سلمت وكالت
ازل:بدل ملابسك ويردونك بـ بيت عمي ابو اسيد
علي:ليش شكو
ازل:الله يعلم بس كالوا اذا اجه خلي يلحكنا
علي:خير ان شاء الله
سبحت وبدلت ملابسي ورحت يمهم سلمت وكعدت
علي:طالبيني
الجد:نريدك تبتعد عن فرح
علي:لا اله الا الله شعلية بـ فرح أنا
الجد:ابتعد عنها حيل
علي:اهج يعني شلون اعوف البيت واطلع
الجد: لا مو هذا القصد من اشوفها تجاهلها لا تحجي وياها لا تسلم ولا توصلها ابد
علي:محسسيني اربعة وعشرين ساعة مكابلها وكاعد لا تحطون الصوج بيه وعمي اسمحلي اكلك بنتك الزمها واسحب التيلفون فترة وخليها بعيدة عن الصديقات الموزينات وراقبوها بس مو بتحكم وتعقيد راقبة طبيعية اكعدوا وياها واحجوا وياها وينتهي الموضوع وكفاكم انا ما عايز مشاكل وضيم ترا راسي دايخ من الدوام ومشاكلي كلش كافي مو انوب عليه فرح وهسة اترخص واتمنى ينتهي هذا الموضوع
طلعت من يمهم صارت بوجهي قمر وامها سلمت عليهم وطلعت رجعت للبيت
ازل: واذا تحبة تروح هيج تسوي كلنا حبينا بس متخبلنا هيج والانسان اهم شي بالدنيا كرامتة على شنو بعد اهين نفسي علمود شخص ميريدني
شهد:ميفيد الكلام وحدها مخبلة
ازل:اول وتالي تعقل متوقعت كل هذا من فرح صدمتني صراحة
شهد:الله يستر من الجاي
عسل:كافي كافي مشتهية تمن احمر
شهد: الناس تلطم وهاي تتنسى علينا
عسل:ازل كومي سويلي أني ما اكدر اطبخ بس اشتم ريحة الطبخ تلعب نفسي
ازل:يا خيه سودة عليه اسويلج للعشة هسة بعد وقت انچلبتي
من دخلت سكتن اخذت المخدة شمرتها بالكاع وتمددت اجهه الفهد يزحف شمر نفسة بحضني
علي:ياروح خالك فدوة لـ هل الوجهه
خليته بحضني ونمنا ثنينا كعدت على صوت امير وياسر ومهند وايمن يلطمون فوك راسي
امير:نريد اولاد بالمعلب يحلونهه
ويردونا عمامة اليوم يردونا
ياسر:اجت هوسة واجوا ربعة يريدونة
حلو والكاع من يمشي يحليها
ايمن:وجاي نخطبلك مراة شلك بـ نوم المكبرة
وعمات الولد جنة يخطبلهه
مهند:الية اعتاب ويَّ اهل الغريرية
وارد اروحلة واهدم الطينية
ويامحلا الولد من يچبل عليه
امير:اكولن ياهلا ومرحبا بطارية يبووييي
علي:وجعوي حتى وجعوي الطفل نايم والقزالقرط صغار انتم واحدكم بكد البغل غسل حتى غسل
مهند:وايا يا ولد مو هاي وكت النومة
ياسر:عليك اخوك اليوم شك هدومة
تخبلوا فد مرة كلبوها فاتحة امير شك التشيريت ولطم
امير:ابوة يلطم عليَّ وتنوح خوانة
ايمن:شلون يشيل اخونة الجان ويانة
مهند:عليَّ يونن عماتة
علي:كووووموا اطلعوووا برررا ادبسززز خبلتوا الولددد
امير:يبووييي مات اخونة
علي:والله دنعل ابوك لابو حتى اخوكك كوووم منااا
الفهد ضل يبچي على صياحهم وصريخهم عبالك فاتحة عدهم اجت غزل تركض وراها عسل وازل وشهد ورسُل ومن برا اجت امي وبيبتي وجدي وابوي واخواني
ام فهد:يمةةة شبيكممم
علي:غزل اخذي ابنج تخبل شيخ انطيني عكالك واطلعوا برا واقفلوا الباب
اسد:شكو شبيهم
علي:طايح حظهم غير ناييمين واجوا يلطمون ويجعرون على راسي
الشيخ:يستحقون اطلعوا برا كلكم صارلهم هواي ما مار العكال على ضهرهم
امير:ياسر انزع
ياسر:شنزع ولك طايح الحظ
امير:وغسل حتى غسل وين راح بالك انزع التشيريت شكيت التشيريت مالتي
ياسر: مشكلتك تحمست زايد
امير:مهند ايمن
ايمن:انطي روحي وما انطي
مهند:انطي شرفي وما انطي
امير:تفففف عليكم من ولد عم نعال برجلي ما اخليكم مو حزام ضهري شيخ كول يالله يامحمد ياعلي واهداء ماتسوا احنه دخلنا عبالنا ميت لان شفنا الفهد حاضنا
الشيخ:استحقيتوا
استلمهم الشيخ وصريخهم صار عبالك نسوان تطلك
الجدة:خايب يمه بسك عوفهم
الجد:عوفهم بوية كافي هيج
الشيخ: جيب التليفونات
مهند:شني عمي جهال احنه
الشيخ:جيببب التيلفون لا افلشة بـ راسك صار هواي تاركم تليفونات لمدة اسبوع ماكو وطلعة ماكو وتبقون بالبيت شغلكم تسوكون وتنظفون الديوان كل يوم بليل بعد ما تروح الناس وتسون كهوة والعصر الخيل تاخذونهم لنهر وتنفذون اوامر الجبير والصغير
امير:شني سجن ابو غريب
ياسر:لا سجن سليمان
مهند:لا سجن الحوت
ايمن:لا سجن الاصلاح
الشيخ: اعلمكم السجن شلون
امير:ترا العقوبة قاسية اوويي
رجع عليَّ الشيخ ضربة وهذا بس يصرخ اخذ التليفونات منهم وهمَّ كعدوا يونون
امير:ااخخ بعد ما اخلف الدك كله على الضهر
الشيخ:مو اكوم اكسره الك
امير:حتى بعد ما ازوج ابد
الجدة:تستاهلون فرخ صغيرون نايم تصرخون بوجهه ما تخافون الله واخيكم جاي تعبان يركض من الصبح لليل تلطمون فوك راسة بيش طالبينا
ياسر:فرخ مال دجاج
اسد:تفاهتكم
ايمن:غزالة غزلوكي بالماي دعبلوكي
امير:كاعدة على الشط كاعدة تمشط
مهند:اجاها نومي كللها كومي
ياسر:هذا حصاني اشدة واركب على السكركب
امير:سكركب بالبرية
مهند:لا تبچين عليه
ايمن:ابچي على حجولي
ياسر:حجولي بأربعمية
ابو فهد:ديلا عود زلم شكدهم وشكبرهم
كعدنا على العشاء اندك الباب
الشيخ:كوم ايمن
ايمن:شني خطار انا
الشيخ:كوم لا اكوملك
ايمن:الله على الضالم
راح فتح الباب ربع ساعة ورجع
الشيخ:منو
ايمن:زلم
الشيخ:دخلتهم لـ ديوان
ايمن:لا كتلهم الشيخ طالع
الشيخ:الله يطيح حظك
ايمن:شني چا غير حتى تكمل عشاك صار ربع ساعة اقنع بيهم الشيخ طالع وراحوا كالوا بعد شوية نجي عليَّ شغلة مهمة
الشيخ:الله يطيح صبغك اكعد اكعد
ام فهد:مادام يجون ميخالف
الشيخ:يا ميخالف فشلة شلون يكلهم هيج
امير:ديلا هسة همَّ شلونهم جياتهم كلها طلايب
الشيخ:چا احنه المن اسمنا شيوخ بس فخفخة
ايمن:يلا يلا ميخالف بعد شوية يجون اشبع اشبع
صهُيب:اسكت لا يكوم يحط الماعون بـ راسك
ايمن:ترا اخذ اختي
اسد:وسم وزغنبوت اختك شكو
ايمن:ما دافعيلي شبيج
رسُل:عايز اللسان انتَ حتى ادافعلك
خلصنا عشه وراها اجوا ذول عدهم طلابة انا طلعت ماكعدت يمهم ومن بعدهي مرت الايام بدوا يحضرون لـ عرس صهُيب وصارت بينا مشكلة انا وقمر بيوم العرس التقينا
طلعت من البيت وفرح اذا الزمها اموتها وكفت على صفحة منتظرين العريس
نمر:جنك ضايج
علي:لا مابيه شي بس راسي يوجعني
نمر:دومه راسك يوجعك
علي:شسوي بعد اشلعة
نمر:انصحك تشلعة
علي:طاح حظك
نمر:تمون ابو نمر
خلص العرس على الخير ورا العرس بـ فترة ليث متعارك ويَّ واحد وضاربة سجينة اجو اهلة يرمون وخبصوا الدنيا ليث شرد مدري وين واخوانة وابو وجدي وعمامي ولدهم والشيخ راحوا للمستشفى وراحوا لـ اهل الولد حتى ياخذون عطوة بقينا بالبيت انا واسد ومحمد وجسار وادم متحضرين لهذا الشيء لان معروفين بـ شرهم من سمعنا صوت الرمي طلعنا مباشرةً لكن سبقونا ودخلوا عليهم للبيت
_ضميتوا رؤسكم مو اطكون وتختلون
اسد:هيييي احترم نفسك واطلع برا البيت لا اقسم بالله انومكم بصف اخوكم
_ولكم تخسون ثار اخوي عشر ازلام منكم
محمد:يخسي شاربك اطلع برا وخليني محترمينك لا تنسحل
سحب سلاحة وضل يرمي لـ فوك انفتح باب الصالة طلعت ام مهيب تصرخ وتلطم
ام مهيب:اكتلوونيييي اني واتركوا ابني هاي اني كدامكم اقتلونييي
ادم:ادخلييي جوا خاالة
دفعة جسار وطلع برا طلعنا وسدينا الباب هو انكسر بس ثبتنا شلون ما كان الشر كان بين عيونهم اجوا شيوخ وياهم شيخ عشيرتهم صاح عليهم وراحوا
علي:خوش اجاهم فصل
اسد:كواويد
طلعت تيلفوني وابتعدت عنهم اتصلت على قمر مباشرةً جاوبت والخوف كان بـ صوتها
علي:اهدائي يروحي كلشي ينحل
قمر:ليث وينة ماما راح تنجلط
علي:مابية شي ليث وبـ مكان أمن لا تخافون كلشي ينحل شدي حيلج لا تخافين من شيء موزين عليج واخذي علاجج وارتاحي
قمر:حباب لا تعوفونا
علي:هههه الخوف مأثر عليج ضي عيني روحي ارتاحي لا تخافين ما انعوفكم
سديت التيلفون ورجعت يمهم العطوة يومين وبعد تتمدد الولد حالتة مو خطرة الضربة بـ ايدة بس اهلة مستچلبين
ورا اسبوع تنازلوا عن الدعوة وانتهت بـ فصل وانسد الموضوع نهائيًا رجع كلشي طبيعي
كعدت الصبح اريد اروح لـ دوام بدلت ونزلت لكيت بس امي بالمطبخ الساعة بـ 6 صبحت عليها وسويت كهوة وكعدنه نتريك أنا وياها
علي:ابوي وين
ام فهد:ابوك اليوم مريض مدري شبيَّ يمكن السكر
علي:مرتفع شنو
ام فهد:والله مادري
علي:قاسة
ام فهد:لا يمه
كمت من مكاني رحت لغرفتهم لكيتة كاعد اجت امي وراي
علي:صباح الخير
ابو فهد:هلا بوية صباح النور
علي:خيرك
ابو فهد:والله يمكن السكر
علي:اخذت علاجك
ابو فهد:صار فترة من خلص ونسيت اشتري غيرة
علي:صدك تحجي تنسى علاجك
اخذت جهاز السكر وقستلة
علي:مرتفع تروح وياي للمستشفى
ابو فهد :لا بوية بعد شوية اروح لـ صيدلة اشتري العلاج
علي:لا تروح انتَ خلي واحد من الولد يروح
طلعت لـ دوام الوضع طبيعي لليل يلا رجعت للبيت كالوا رسُل حامل
امير:كللللووووشششششش الله يكثرهم
صكر:للووششش
امير:بعد عمك وكلبة يهلهل ابو راس
كعدوا كلهم خليت راسي بـ حضن امي تعبان حيل
ام فهد:تعبان يايمه
علي:ايي والله كلش تعبان
ام فهد:سودة عليه والله لو ادري حياتك تعب وضيم تخلصها چا ما طلبتك من الله بذيج الليلة
علي:طلب ؟
ام فهد:اي يمه طلب
شهد:سولفينا شلون
ام فهد:يا ولج شسولف
ازل:شلون طلبتي ولييشش يعني
ابتسمت امي باوعت عليه وبدأت تحجي
ام فهد:من صاروا عندي فهد واسد وصهُيب وغزل بعد ما حملت وادوم كبل تريد ولد وبنات هواي اكثر شيء ولد
ضلوا يحجون عليه جيبي ولد وجيبي ولد وأنا بعد ماصار عندي ابد وابوكم ضل كل ما يطلع ويطب يكولي
ابو فهد:اريد ولد جيبي بعد ولد انا بس ذول ما اكتفي بيهم
وصرت اسمع الكلام كل ساعة تعبت من هالشيء وكلام الناس مايرحم ويترسون بـ راس ابوكم حتى يتزوج عليه خفت يتزوج ويسويها صدك ياخذ الكلام الناس
بيوم من الايام رحت اخبز كبل بالطين واجن يمي نسوان سمعني كلام قهرني رجعت للبيت ابچي وجانت الدنيا مغرب وجاي يأذن
بذيج الغروبية وعلى حركت كلبي ودموعي رفعت ايدي لـ سماء وجانت ليلة جمعة
ام فهد:ربي بجاه هذا الاذان وبجاه ليلة الجمعة ارزقني ولد وسد حلوك الناس
وكعدت ابچي ورا شهرين عرفت نفسي حامل واجه علي لـ دنيا وانوب عسل وازل وامير وشهد واكتفيت بيكم والحمدلله
علي:يعني أنا اجيت حتى اسد حلوك الناس
باستني بين عيوني وكالت
ام فهد:وسديتهم من انتَ وصغير لحد هسة
ابتسمت بتعب غفيت بـ حضنها كد التعب كعدت على صوت ابوي
ابو فهد:علي بوية كوم اصعد لـ غرفتك
علي:كايم
كمت من يمهم صعدت لـ فوك مباشرةً نمت اتصل عليه راهب رفضتهة ورجعت نمت
............................................
وردة : رحت يم اهلي وكاعدين أني وشمس وأسيا وماما وفرح
فرح:وردة
وردة:ها
فرح:اسر لحد هسة ميحجي وياي شسوي
وردة:صخام بعيني لهسة بعده
فرح:اي ابد ميحجي وياي
أسيا:من سوالفج غير
فرح:انتِ انجبي ومعليج
وردة:أني احجي ويا بس ديري بالج على صكر
صعدت لـ اسر كان كاعد بـ غرفتة
وردة:هل تسمح بالدخول يا اخي العزيز
اسر:ههه ادخلي يا اختي العزيزة
وردة:احم ليش لحد هسة متحجي ويا فرح
اسر:ختولي
وردة:هي صح غلطت بس عرفت غلطها وانتَ تعرف فرح شنو كافي زعل وارجع احجي وياها والله خطية
اسر:أنا متأكد منها بعد ما تابت من ذيج السالفة
وردة:السالفة راحت وانتهت والولد نفسة محجه شي وسد الموضوع
اسر:هو سد الموضوع بس ما نسى الموضوع والله العظيم لحدهسة استحي اباوع بوجهه
وردة :متسوا اسر انسى الموضوع وغلطة من العمر وصارت وبعد ما تتكرر
سكت محجة شي قنتعة كوه انُ يحجي وياها كال ان شاء الله نزلت لـ جوا بليل حجة وياها ورجعت علاقتهم طبيعية ثاني يوم كاعدين نسولف ونضحك طبيعي ويمنا جدو وبيبي
الجد:ان شاء ورا صهُيب نزوج اسر وانوب علي
ابو اسيد:علي لكيتولة مراة
الجدة:اي موجودة مرتة ومو غريبة بنيتنا
انتبهت على فرح الضحكة شكت حلكها
ام اسيد:الله يوفقة يارب تعب هالولد
الجد:اي والله كلش تعب واريدة كون يرتاح بكل طريقة
اسيد:البنية بنت ابو مهيب مو
الجد:ان شاء الله هيَّ
مباشرةً اختفت ابتسامة فرح وكالت بـ عصبية
فرح:بسس هي مريضةةة
اسر:فرررح
الجدة:مو مريضة البنية على العلاج تصير كلش زينة
فرح:لا متصير لان حتى عملية متصيرلها على شنو كاتلين نفسكم عليها والله حلوة واصلًا مو كلش حلوة
الجد:ما اعرفج هيج حقودة
فرح:أني مو حقودة
الجد:شيلي علي من راسج
فرح:علي الي مو لغيري
ام اسيد:امشيييي وليييييي فووككك
صعدت مباشرةً الكُل اسكت او انصدم اسر راد يصعد وراها لزمة ابوي شوية وصعدت أسيا
أسيا:ولججججج يمممه الحكيييييي فررررح انتحرررتتتت
طفرنا كلنا كانت ايدها كلها دم وهيَّ واكعة بالكاع من الكف منتحرة شالولها بسرعة ماعرف منو طلب الاسعاف على عياطنا التمت الناس كلها
اخذوها للمستشفى امي انتهت كوه سيطرنا عليها لليل طلعوها على مسوؤليتنا من دخلت امي وابوي حتى محجوا وياها
اسر:هاي البعد ماتعيدها مو هيج صلافة انا ابد ما شايف بسيطة
صعدت بدون كلام صعدت وراها
وردة:لج اموتج شسويلج شحصلتي يملطمة شحصلتي بس الفشايل من وراج اكو وحدها عاقلة تسوي هيج
فرح:اييييي اكو احبه شسووويييي يعنيييي
وردة:صوتج وحمس حتى حمس افتهمي مو حب وافتهمي الولد ميريدج ولا حتى يباوع بوجهج كافيييي عاد تأدبي هواي مصختيها وسكتنالج حيل
فرح:اي هذا الشاطرين بيَّ بس تصيحون عليه
وردة: وشتردين نبوس راسج
فرح:ان شاء الله مايتهنى بحياتة ولا ساعة
وردة:عزا بعينج ان شاء الله بيش طالبة الولد وجع كون تأدبي ومرض
تركتها ونزلت بقيت يمهم كم يوم ورجعت صار عرس صهُيب وانتهى على خير ومن بعد فترة طويلة رسُل صارت حامل حياتنا هادئة وتجنن بعيدة عن المشاكل وعن كُلشي فرح عقلت وكعدت بعد ما انكتلت كتلة زينه من اسر حتى ضلت متجي لـ بيت عمي
وردة:شيخي
الشيخ:عيني
وردة:خل نروح لـ زيارة حباب كلنا ناخذ سيارة ونروح والله صار هواي ما رايحين
الشيخ : هم فكرت بيها بس محد فارغ هاي الايام الولد كلهم دوام وايام امتحانات خليها بالعطلة واخذكم كلكم
وردة:يبووييي فديتك لو هيج الرجال لو مينراد
الشيخ:مصلحة
وردة: هههه احم سؤال ثاني
الشيخ:ماكو ترك
وردة:لا ابد الاجابة على جميع الاسئلة
الشيخ:يلا أمري لـ الله جاوب بعد عيني
وردة: عادي ارجع اكمل دراسة
الشيخ:مايصير نترك ابد
وردة:لالالا جاوب
هوَّ كان كاعد وصكر بـ حضنة حط صكر بـ جربايتة واجه تمدد وانطاني ضهرة
وردة:يااا فهد
الشيخ:ها
وردة:جاوبني
الشيخ:شوفي أنا ماعندي مانع عادي بكيفج بس انتِ فكري بيها شوية عندج طفل صغير ويريدج يمه دوم وأنا دوام وديوان ماموجود وخطارنا هواي وشغل البيت هواي وانتِ ادري بيج نادرة ما تكدرين تكعدين يعني انتِ فكري بيها الدوام ترجعين بـ 2 او بـ 3 تعبانة يستقبلج صكر لازم تكعدين يمه وتلعبين ويا انوب يجيج العشاء اذا اكو خطار انوب اجي انا تعبان هم اريدج يمي هسة عوفيني انا عادي بليل ممكن خطار ممكن ابنج يريدج ما يخليج تقرين نوم ماتشبعين تكعدين من الصبح وايام الفاينل المتعبة .. انا ما عندي مانع عادي اقدملج بس فكري وشوفي التعب
ضليت صافنة بـ كلامة من خلال كلامة تعبت كرهني بالجامعة على هذا الجدول احسة ركض ركض
وردة:فهد
الشيخ:هممم
وردة:بطلت ما اريد
الشيخ:لا خل اقدملج
وردة:لالالا ما اريد تعب
الشيخ:بعد عيوني نامي يلا
هستوني خليت راسي على المخدة والباب اندك
الشيخ:ياستار ياربي استرك
شكرا لزيارتكم عالم روايات سكيرهوم
