رواية بنات الحجي السعيد الفصل الثاني بقلم شمس العراقية
ليال ـ بهل الأثناء رجعت الكهرباء وأختفى الضل ورجعنا نتراكض ندور على اجهزتنا نخابرهم وسمعنا حركه وخطوات مشي وحده تباوع الثانيه وهدأنا أكولجن شگلنا راح نموت بهل الغرفه وأنفتح الباب وغمضت وصرخنا بعلوا صوتنا وطلع باسل فز ولزم گلبه وعاط بينا .
باسل ـ شگو وجع شبيجن تتصارخن مثل الصخول صرعتني شگو شعدجن كاعدات .
ليال ـ صوتي يرجف باسل هذا أنت وبهل الاثناء سمعنا صوت أمي من جوه تصيح علينا دفعنا باسل من الباب وطلعنا نتراكض عليها وباسل نزل ورانا يهز يأيده ويضحك ويستهزء بينا!! گابلنا أمي ونتراجف وخايفين ونبجي وجنات ركضت الها وحضنتها وترتجف بخوف .
هيفاء ـ شگو شبيجن باسل شبيهن أخواتك ليال لقاء جنات مـامـا شصايرلجن .
لقاء ـ باسل عليك الله هذا أنت جنت يم الباب وطفيت الكهرباء علينا اذا مقلب گول لان هيج مقالب تافهه قسم بالله متنا الف موته .
باسل ـ اي اني صعدت لان باب السطح عايفاته مفتوح وهوا برة وصوته شگ اذني صعدت سديته يا مقلب اني حياتي صايره مقالب ويا كهرباء شبيجن بابا ليش أطفيها عليجن
لقاء ـ لا عليك الله تشاقه مو
باسل ـ أشاقه شنــــو والله الباب مفتوح وصعدت سديته وشفت الأضويه مفتوحه وصوتجن عالي وأجيتجن شعدجن كاعدات!!
جنات ـ ماما حرامي شفناه والله شفناه وشفنا رجلينه من جوه الباب وانوب قفل الباب علينا وقطع الكهرباء ورجع شغلها وليال شافت خيال يم الشباك وكومه صرخنا شُنو ما سمعتونا .
هيفاء ـ على كيفج بنيتي اسم الله الرحمن شبيجن تتراجفن شگو بنياتي، باسل اذا مسوي مقلب بأخواتك احجي ما تشوفهن شون يتراجفن من الخوف
باسل ـ يمه يا مقلب صدك تحجين مخبل أسوي مقالب بهل الليل عاد اني شگد الي خلك لهل تفاهات .
لقاء ـ باسل ماما يعني ما سمعتوا صوتنا من صحنا عليكم
باسل ـ لا ما سمعنا الا صعدت، واني كاعد حتى جنت احجي ويه عُلا وليش تصرخن ليش هو شگو جنات بابا من كل عقلج حرامي!!
جنات ـ اي والله حرامي جاي نگولك شفنا رجليه وهو يمشي ورجع قفل علينا الباب
باسل ـ أنتن صوجن عايفات الباب مفتوح وبزازين دخلت وشفتن رجليها وبعدين وين يعبر الحرامي حياطين عاليه عمي لا أكيد حلمانه لو مكوبسه .
جنات ـ ما اعرف لقاء وليال شافن مو شفتن .
ليال ـ أي شفنا بس معقوله صُدك تطلع بزونه! بس باسل الباب انقفل وانفتح والكهرباء فصلت ورجعت وشفت خيال من شباك متأكده شفت .
باسل ـ من الخوف كمتن تتخايلن والكهرباء ما فصلت أبد يجوز نظام الكهرباء طابق الثاني بي مشكله عطل باجر اشوفه يله فوتن نامن خبلتنا وياجن طوكعه .
لقاء ـ لحظه باسل صدك موبايلاتنا أنباگت وماكو هم ما تصدكنا هاي هم بزونه لو نتخيل ! .
هيفاء ـ يمه أسم الله الرحمٰن
باسل ـ خبال يخبلجن عمي دطيرن اروح انام
لقاء ـ والله موبايلاتنا انباگت من فصلت الكهرباء ندور عليها علمود نشغل الفلاش ما لكينا ولا موبايل وهنا يم روؤسنا عالشحن هاي هم نخاف ونتخيل .
باسل ـ صاعد أشوف بعيني واذا صدك ماكو موبايلاتجن شتردن انطيجن انوب موبايلات تنباك هي يالله والله تخبلن الما يتخبل .
ليال ـ صعد باسل ولقاء تفتر واني كعدت عالدرج وامي تسكت بجنات وتقرأ المعوذات ونزل باسل شايلهن ثلاثتهن ويضحك .
باسل ـ هـا هذن شـنو منو بايگهن! .
لقاء ـ لا مستحيل والله جانن ماكو شلون لكيتهن
باسل ـ عالشحن بابا والله أنتن مخابيل مكعداتنا بنص الليل على خبالجن وصياحجن شتكول علينا العالم هاجن هاجن وأمشن نامن واني أفوت انام وراي كعده للمحل من الصبح .
لقاء ـ ليال جنات من أجتي الكهرباء مو دورناهن ما لكينا ولا موبايل .
ليال ـ باسل دخل لغرفته وفتحت تلفوني ما بي شيء باوعت لقاء هزت ࢪاسها كعدنا دايخين ونربط كلشي صار معقوله نتخيل
لقاء ـ لا مستحيل أنتن تخيلن بس اني الشفته كله واقع مو تخيل لان قبلجن كعدت وشميت ريحه شعواط
جنات ـ ماما شُـــــــنوْ هاي والله متنا من الخوف
هيفاء ـ أمشن للغرفه هاي أكيد سوالف جواهر .
ليال ـ صعدنا الغرفه بس خايفين وأمي تفتر بطابق الثاني وفتحت الشباك وتباوع وبيت جدي صاير مقابلنا ضلت تباوع شبيج ماما
هيفاء ـ كاعده تباوعلنا شوفنا هذيج وينها!
ليال ـ باوعنا شفنا خيالها وردت البرده بقوه ماما معقوله تكون هي وليش هيج تسوي بينا .
لقاء ـ گلشي تابع لـ أمي تأذي ومن أحجي وأكولجن جواهر تسوي سحوره وشغل مو نظيف محد يصدگني
هيفاء ـ لا أدري بيها بس ما توقعت منها توصل بيها تأذيجن لان مشاكلها وياي وهالمشاكل ما تفض ولأ تنتهي الأ بموت وحده من عدنا لــوْ أني لــوْ هَـيّ!
ليال ـ أسم الله ماما شُـــــــنوْ هالحجي
جنات ـ أگولجن يجوز صُدك بزونه لان باسل گال عايفات باب السطح مفتوح وبزازين دخلت وشفتن رجليها وأحنه من الخوف گمنا نتخيل .
لقاء ـ وريحة الشعواط ريحه غريبه والكهرباء من فصلت والباب من أنقفل والضل الشافته ليال وخطوات المشي سمعناها والموبايلات أختفن هاي شنو تفسيرها هم نتخيل .
هيفاء ـ خل تصبح الدنيا ويصير خير وخل أبوجن يخلي الها حد لكل سوالفها الطايح حظها مثلها .
لقاء ـ وأبويه راح يحلها يعني قابل ما تعرفين أبويه
هيفاء ـ تحجن اله گلشي لان اذا سگتنا راح تستمر وتوصلها للموزينه اني گلبي خلصان من مشاكلها ساعة السوده الرجعت بيها
ليال ـ رجعتي!!
هيفاء ـ أمشن نامن الصبح يصير خير .
لقاء ـ والله ما أعرف ماما سالفتها ويانا مدروسه ومو وحدها مستحيل تگدر لان بس نزلنا موبايلاتنا رجعت أذن أكو أحد يساعدها وجان داخل البيت وقبل لا يصعد باسل هو رجعهن .
ليال ـ الأبواب مقفله شلون دخلت
هيفاء ـ مو صعبه عليها ماما أكيد عدها نسخه من المفاتيح .
جنات ـ بس هي ما داخله بيتنا أبداً .
ليال ـ معقوله نائل شريك وياها لا مستحيل هو صح عصبي وما يتفاهم وتصرفاته بخباثه بس مو لهل الدرجه لا مو هو .
لقاء ـ باب البيتونه جان مقفول شلون أنفتح .
هيفاء ـ لاتفكرن ماما أني أحلها أنتبهن لدراستجن
ليال ـ ماما شتسوين طيب ليش ما تحجين لجديتي .
هيفاء ـ ليش جديتج اذا حجيت الها تصدگني محد يصدكنج يكولن بزونه مثل ما كال اخوجن ومن خوف تتخيلن لو رجال يصدكونه بس المره محد يصدگها
.. وأني أعرف ليش هيج سوت تريد تزرع بيجن الخوف وتخليجن عايشات برعب علمود أضطر اعوفلها البيت ونأجر ونطلع علمود الملك يضل الها احنه نكعد بالأيجار بس حامض على بوزها تحلم أعوفلها البيت هذا حقي وحقجن وحق أخوجن وتعبه وحالي من حال الكل والورث والميراث حق الكل مو بس حقها بس هي وأبنها
لقاء ـ هي ليش ما تبطل مشاكل وياج وأحنه مًا مأذينها وابويه كل الاوقاته يمها قليل يجينا بعد ليش هالكراهيه والحقد كلها هذا لأن أبويه تزوجج عليها .
ليال ـ لقاء شُنو هالاسئله أكيد اكو أسباب ثانيه مو شرط زواج أبويه من أمي قابل بس أبويه يتزوج مرتين بس بعد هي هيج نفسيتها تشوف أبويه بس ألها .
هيفاء ـ خليهن يسألن يمه خليهن أخ لو تدرين بالگلب شبي وتعرفن ضيمي الشفته وعشته ويه أبوجن وأهلجن وجواهر وعماتجن يله كافي گومن نامن .
ليال ـ وحده تباوع الثانيه سگوت أمي وراها قصه نمنا بغرفتنا رغم الصار ويانا بس أمي ويانا نامت على سرير جنات وحضنتها ونمنا بهدوء وأمان لأن أمي يمنا ...
كعدت الصبح على صوت لقاء تتحضر تروح الجامعتها وتسوي صوت بالكنتور باوعت امي نايمه على كيفج لاتسوين صوت .
لقاء ـ أريد اخذ ملابسي تأخرت وأنتِ شنو ما تروحين .
ليال ـ ما عندي شيء ما جاي على بالي أروح من ورا اللي صار أشوف تالي امي شتسوي والله صرت أخاف عليها من جواهر .
لقاء ـ اني هم عبالي ما اروح بس لازم يله رجعي كملي نومتج لعد لما اكمل .
ليال ـ ماشي رجعت نمت وفجأه صرخت لقاء بعلو صوتها وتكمز فزينا على صراخها العالي فاتحه الكنتور وتنكت بملابس وتكمز شگو وجع شگو كمنا وأمي لازمتها وهي تصيح
لقاء ـ عظام ميتين عظام ميتين يمــــــا .
ليال ـ باوعنا بنص الملابس عظام تقربت أمي وجنات رادت تلزمه أمي صرخت بيها ومنعتها
هيفاء ـ أيدج شو عوفي .
باسل ـ شگو شبيجن بس تصرخن تخبلتن أنتن تخبلتن
ليال ـ دخل باسل باوع على عظام
باسل ـ شـنو هالقرف من صباحيات الله منين أجه
ليال ـ تقربت لفت العظام بشال وصاحت بينا
هيفاء ـ أني أعرف منين أجه أمشوا وياي لبيت جدكم
لقاء ـ يمه وين أمشي وراي روحه تكريت تأخرت
هيفاء ـ أمشن وبله لغوه يله تحرگن
باسل ـ امشن بابا أمشن الله يستر دام بيها عظام اذن السالفه بيها جواهر
ليال ـ مشينا كلنا ولبست شالي عالسريع وأمي لبست عبايتها وطلعنا وراها من صباحيات كلها نايمه ودگت الباب بكل قوتها وباسل كام يحجي وياها .
باسل ـ يمه خل نرجع عود من يكعدون ونحجي بالسالفه كلها والله مو راهمه هسه
هيفاء ـ لا ما أرجع گبل ما أوكفها عند حدها شنو أستاذ باسل لازم ما مصدك بأخواتك.
ليال ـ ما حجه شيء ورجعت دگت الجرس وطلع النا نائل
نائل ـ خيــر اللهم أجعله خير من صباحيات وأصبح بوجوهكم لا خوش أشتغلنا اليوم .
هيفاء ـ أمشي ولي عن وجهي الله يأخذك .
ليال ـ جواهر واكفه بالباب وسمعت امي تدعي على نائل لو تخبلت تريد تملخنا احنه وأمي
جواهر ـ خفت حلگج ليش تدعين على أبني جعل الدعوه ترد عليج وتحرك گلبج بظناج لا والله من الله ياخذج وانتِ وبناتج تروحون فدوه لأبني تاج رأسكم .
نائل ـ هييي وين داخلين علينا مثل قوم فرعون
باسل ـ نائل أحترم نفسك وأحجي عدل والكلام ما موجه الك خلك محضر خير .
جواهر ـ منين يجي الخير ليش اليشوفكم يشوف خير داخلين علينا مثل السلابه شو امشي منا أنتِ وبناتج وابنج تكول عامود كهرباء كل خير ما منا ابو النسوان
باسل ـ أستغفرالله وأتوب اليه والله لومو مره
نائل ـ ليش شتسوي أنت بس أفتح حلگك ويه أمي وأشوفك النسوان شتجيب الأ ارجع بطن أمك
هيفاء ـ أنت أسكت ولا تضل تمشي ورى حجي النسوان وأنت أمه أصبريلي والله أطلع قهر گلبي والسنين المضت كلها اليوم يا جواهر والله والساعه السوده دخلتي بي لهل القصر وهجمتي على ࢪاسي .
ليال ـ هجمت عليها وتعاركن واجه ابويه وجدي وجديتي وعماتي وعمي سليم ودخل باسل يفازع ونائل يدفع بامي بقوه عبالك عدوه اله وجديتي تحجي وابويه سحب جواهر ورى ظهره وعاط ورفع أيده بوجه أمي ويصيح عليها
سعيد ـ گافي گافي
حليمه ـ شعندج من صباحيات هاجمه علينا شعندج
ليال ـ شمرت العظام كدامهم كلهم ضلوا يباعون
هيفاء ـ هذا العندي هذا بلاجن ذبيتنا بملابس بناتي علمود تكطع قسمتهن هذا سحرجن والليل كله هي بيتي خبلت بناتي بسوالفها عبالج ما ادري بيج البارحه الليل كله تفترين بيتي ام السحوره .
حليمه ـ ولج أم عيون الطاگه يا سوالف تحجين عنها وشنو هالقذاره جايبتها وجايه ولج استحي بناتج بطولج ما تبطلين من مشاكل كلشي يصيرلج تذبينه براس ام نائل .
هيفاء ـ أني أكولج يا سوالف احجن يمه ليال لقاء جنات احجن يمه احجن شصار بيجن الليل كله .
ليال ـ حجينا گلشي وجدي ما حجه شيء ومشه لغرفته وما اعرف شگال لابويه وجديتي غمت أمي بأيديها الأثنين وعمي سليم يهز بأيده يإستهزاز بالمختصر هانوا أمي بنظراتهم وباسل يباوع للكل واحد واحد بالاخص أبويه ماخذ وضعيه المتفرج الصامت .
حليمه ـ ولج من جان أستحيتي على عمرج جايبه وياج عظمين ومصدكه هالخريط الكالنا بناتج وهاده علينا من صباحيات الله بس من يومج زعطوط وارعنه ومو ام بيت وما تصيرلج جاره من يوم حبج وخذاج وسواج جنه عبد الغني وانتِ مو من نسوان سعيد أهمداج من بين النسوان .
جواهر ـ هـا ارتاحيتي
حليمه ـ جواهر سدي حلگج وانت جده باسل أخذ أمك وأخواتك روح البيت ما ناقصين فضايح نوب علينا سوالف المزعطه
هيفاء ـ لا ما يحتاج اني اخذهم واروح ما أكول غير حسبي الله ونعم الوكيل بيكم وجعل حوبتي اني وبناتي تطلع بعزيز گلبج يا جواهر
ليال ـ جديتي ضربتها بالعوجيه قوي وأمي تأذت وباسل سحب امي راد يحجي جديتي سگتته ومنعته .
باسل ـ ليش تضربينها ليش
حليمه ـ أكص لسانك اذا تفتح حلكك بحرف سوالف نسوان وضراير ما الك بيها وانتِ دعيتي على نائل من نثرم لسانج على هالدعوه امشي منا لا بارك الله بيج ولا بعمرج يا الارعنه امشي أنگلعي .
هيفاء ـ حسبي الله ونعم الوكيل بيكم حسبي الله ونعم الوكيل بيكم .
سليم ـ أمشي منا وأخذي بناتج وولي فضحتينا من الصباحيات ما تخلص طلايبج عوذه من يوم شفناج وشفنا أهلج شفنا المشاكل .
سعيد ـ أمشي كافي عاد أمشي الله يأخذج فضحتينا
ليال ـ تقدم أبويه سحب أمي بقوه وهي ادفع بي وتبجي وتتحسب واحنه وراها وباسل ضاج حيل بس ما حجه ودخلنا البيت وتعاركوا هي وابويه بنص الصاله وأمي تصيح وتبجي وأحنه صافنين عليها
هيفاء ـ كله منك انت وصلتنا لهل المواصيل انت وراضي وعاجبك جواهر تسوي سحوره لبناتك وخبلتهن بسوالفها وسحورتها الليل كله تفتر بيتي ، بس المن احجي ومنو يصدك اذا انت ابوهن حلكك ما فتحته كلمه ما حجيت ووكت المدافع تدخلت سحبت جواهر وخليتها بظهرك واني خلف الله على ابني سحبني من كدام ابنك نائل الدم يطفر من سنونه عليه وعلى خلفتي .
سعيد ـ مني مو مني هسه صار كله مني ليش ما تكولين على نفسج وكلشي صار هسه أنتِ السبب بي!! .
باسل ـ يابه ماكو هيج شيء يعني لو عدوه هم جان گلبك أحترك عليها واكف حالك حال الغريب ما حجيت كلمه ولا دافعت عن امي وكلكم جفصتوها وهنتوها وأستصغرتوها كدامنا ، أمي تحجي لوحدها وتدافع وانت ولا عبالك رجلها وعاجبك الوضع جواهر وابنك نائل أحترام ما يحترمها ليش هيج يابه على أقل جان كلت ابني وبناتي وهاي أمهم مو يهوديه يعني جديتي تحجي عليها وأنتَ ساكت وعمي سليم يطردها وأنتَ ساكت ، ونائل مـا يحترمها وجواهر تلعب بكيفها يعني وصلتوني لمرحله أخذ أمي وأخواتي واهج منكم ومن كرهكم وحقدكم على أمي وعليه وعلى أخواتي .
سعيد ـ أمكم من أيديها جانت شيخه وتأمر وتنهي وتالي بالاخير شصار شوصلها لهل الحال من ورا صغر عقلها وسوالف نسوان ضيعت الاول والتالي وخسرتني
كظتها يوميه زعلانه وماشيه لخوالكم والله شُنو أمك هيج گالت أخواتك هيج گالن فلانه أجتي وبس تسأل عليك وكظت حياتنا زعل بزعل وهسه جاي تگولي ليش ما ادافع لأمي شدافع الها وهنا نفسهم هسه الواكفات ويحاجن أمك جانن يكولن عليه هو جان لاحكها مثل الجلب لا فاد سحر ولا صخام ليل بنهار مكابل بيتهم بس حتى امكم ترجع وياي .
هي أمكم لو الله مسهل الها وساتر عليها وجايبه اخوانكم التؤام جان هسه هي فوك الكمر ولا جواهر ولا الف من جواهر يكدرن يبعدني عنها وعن حبها بس العينتين أمكم هي هجمت بيتها وطلبت الطلاق وقدمتني ؏ طبق من ذهب لجواهر وربع جواهر ، عود بعدين الله هداها ورجعت بس بعديش وعكبيش بعد ما تزوجت جواهر وبحظني نائل وصارت جواهر أم البيت وام الولد والحفيد الأكبر وأبني الكبير ومن تالي انتوا صرتوا وعوضتوني والحجي بعد ما يفيد بس يغث صاحبه .
ليال ـ كمل كلامه وباوع لـ أمي بنظرات كسر وخذلان ووجهه حزين وفتح الباب وأيديه يرجفون وطلع وخلانا بوسط هذول وصدمه من اللي سمعنا تقدم باسل على أمي وهي تبجي .
باسل ـ يمه بدون بجي ودموع لان مو وگته بس أريد منج تحجيلي وتوضحيلي كلام أبويه وشنو يقصد اللي أعرفه أنتِ زوجه ثانيه!! شو هسه أنگلبت الأيه واليوم اليوم أريد أعرف سبب هالمشاكل بينج وبين جواهر والعدواه والتفرقه بينج وبينها حتى بيني وبين أخوي نائل وليش مـا يحبني ويكرهني ووجودنا وعدم وجودنا واحد هسه تحجيلي گلشي صار وياج لان سکوتج هذا دمرج ودمرتنيا وياج .
لقاء ـ أحجيلنا ماما لان أحس حتى كرهه عماتي الج وره سبب مو بس لان ابويه تزوجج زوجه ثانيه على جواهر عود بنت خالهن ومقهورات عليها لان احس اكو أسباب ثانيه .
هيفاء ـ منو گال الجن أني زوجه ثانيه ، اني زوجة الأولى .!!
ليال ـ شلون ماما كلنا نعرف جواهر هي زوجة أبويه الاولى ونائل أكبر من عدنا وابوبه تزوجج بعد ما شالوا رحمها من ولدت نائل ، بعد شلون أنتِ زوجة الاولى!!
هيفاء ـ السالفه طويله وأول تالي تعرفونها وهم تعرفون سبب حقد جواهر عليه وعليكم ، أني وأبوكم عشنا قصة حب حلوه جديتكم ما جانت رايدتني جانت رايده بنت أخوها كنعان اللي هي جواهر بس أبوج ما جان رايد غيري وعاند أهله لو أني لو ما يتزوج شلون أنتَ هسه ميبس ࢪأسك على عُلا أبوك هيج جان واي قسمه تجيني جنت أرفض وأنتظره كلها درت بُحبنا وصرنا حديث الساعه هيفاء وسعيد ماكو مثل حبهم حب .
ويمر يوم ويجي يوم يفاتح اهله بالزواج جديتكم تعارض
بس جدكم عبد الغني علاقته قويه بأبويه لان تجار وبالسوك وصداقه قديمه ما جان عنده عارض وموافق واجوا خطبوني ووافقوا أهلي وتم الزواج وعشت وياهم بالقصر الجبير وابوكم مشيخني ومرت الأبن الجبير جديتكم وعماتكم ما جانن رايدتني گلني بالدهن بس بس عمتكم نجاح زينه وياي وزوجة عمكم رشيد سلوى الله ينطيها هي جانت تخفف عني همومي وحملت بداية زواجي تؤام ولد والقصر صار أفراح وعرس ساعة سمعوا هيفاء حامل بتؤام وولد وجديتكم صارت وحده ثانيه شالتني بالصلولات ما تخليني اشيل حاجه من كثر ما تخاف عليه وعلى البطني .
لقاء ـ صُدك ماما تؤام وينهم لعد؟
هيفاء ـ جايتج بالسالفه بنيتي ، الحمدلله حملي جان زين وحالتي الصحيه زينه گلشي ما بيه بس بيوم وليله صرت أكره ابوكم ما أحبه ولا اطيق أشوفه كرهته كره الدم وهو حاول وياي تالي أيس مني لان عجز وهو يحاول وياي وسلوى كالتله لان حامل نفسيتها تعبانه وثكل الله يساعدها عوفها هل كم شهر تخلص نساوتها وترجع هيفاء التحبك وتريد رضاك وأبوج جان يحبني حيل الهوا ينتفسه هو هيفاء يعثر بالكاع يصيح هيفاء وكلهم يحسدونا على حُبنا وبهاي الفتره أبوج تعب حيل وصار يحتاجني بس اني ما أطيقه من أشوفه أختنك گتله اخذني لأهلي واخذني الهم وبليلتها خابرتني سلوى وكالتلي رجلج راح منج عمتي توز برأسه تعال نزوجك بنت خالك جواهر بنت كنعان بينما هيفاء تولد وشگو بيها الشرع محلل ، يعرفون الشرع بس بالزواج .
ليال ـ يعني گولي مسويات الج سحر .
هيفاء ـ أي يمه سولي سحر وفرقنا وخربن حُبنا وبساعتها خالكم شامل رجعني ومن وصلني شاف عمتجن بلقيس وتخبل عليها حبها بيومها وكال لأهلي ما كالوا باطل بشهر زمان خطبوها بس جديتج ماراضيه عالزواج ولا عمامجن بس جدجن وابوج وافقوا وتزوجت عمتجن بلقيس خالجن شامل ..
واني طول هالفتره وياهم بالبيت بس ابوجن تغير عليه حيل تغير وكامت تصير مشاكل وسممني بعيشتي وازعل واروح لاهلي واكوله عليهن ما يسمعني يكولي تحملي اهلي شسويلج يعني .
بس بعدين تبين طلعت جواهر تروحله للمحل وناس تشوف ناس وحبها واني على ذمته وازعل ويرجعني وهذيج جديتكم تدلل بيها كدامه وتجينا كاشخه وعطرها يوصل هذاك الصوب يشك الخشم ونظراتهم لبعض نظرات عاشك وهايم بحبها الى ان اجه يوم الاسود
لقاء ـ شصار
هيفاء ـ صارت مشاكل بالسوك وتجار وبينهم وتعاركوا خالكم شامل ويه عمجن سليم الحقير وسوه مشكله شكبرها وتالي سحبوا عمتجن وجبروا يطلگها وطلگها واني كل هالفتره ساكته وحملي كبر ومخنوگه خنك من حملي ومن تغيير أبوجن ابد ما حاجيته ولا عاتبته ضل يخون بيه وكدام عيني تالي طگيت وانفجرت بوجه بس ما حجه ولا كلمه عافني وراح المحل وخابرت اخويه اجه أخذني وعيونه ادور على بلقيس جان يحبها حيل بس أهلكم وعمامكم جبروا يطلك وطلکوهم غصب ..
وتالي شفت الوضع تعبان وبالأخص بعد طلاك بلقيس زادت المشاكل ما نقصت وشدن وياي وهو اذن من طين واذن من عجين اححيله وأشكيله ما يسمعني وبيوم طگ گلبي ومشيت لأهلي طلبت الطلاك بس أبويه الله يرحمه ما راد الطلاك لان يحب جدج عبد الغني ويحب سعيد كالي أزعلي سنه سنتين شكد ما تردين وبيت أبوج بيتج بس سالفة الطلاك تنسيها وتشيلنها من يالج وبطنج مليانه طلاك ماكو دز على سعيد حاولوا وياي جنت قافله ومصممه على قراري وتوصلت لحل بس اولد يطلگني عافني على راحتي كالوا خل تولد ومرت الايام كالوا رجعي ما رجعت ضليت مصممه الا يطلگني .
وأبوكم ضل يحاول وياي ما مل أبداً واني قافله وأخر جيه اجاني بيها كالي اذا ما ترجعين اني اتزوج كتله تزوج ما أريدك بعد وبس اولد تطلكني كالي يصير خير وراح وبعد ما وصلني
وبيوم باقيلي أيام وادخل بشهري وصلني خبر زواج أبوجن من جواهر وأنصدمت صدمة عمري ضليت ايام ابجي واتحسب عليهن هجمن بيتي واخذن رجلي مني الى ان ماتوا أخواجن بطني من القهر والسم العشته وشفته منهم ، مصيبتبن على ࢪاسي خسرت الاثنين ابوجن واخوانجن .
ليال ـ يمه ليش ما تطلگتي ليش رجعتي اله دام هلكد متأذيه منهم .
هيفاء ـ وهو ما طلگني لان اجدادجن ما رادوا طلاك وهو عافني على راحتي جان يجي يحاول بس اني رافضه
سلوى جانت تحجيلي شلون فرحانات عود مطلكني وجانت تكولي رجعي وكسري خشموهن والله يحبج ولج تعاي كل عقلهن مطلگج ومتشمات بيج حيل تحبني وتتوسل بيه ارجع وتالي بيوم اجه عمي وعمجن كريم ابو ليث بس هو بعماجن اوادم الله يرضى عليه هو ومرته وعمي عبد الغني بس ابوجن ما اجه وراضوني ورجعت بيتي لوحدي عمي مشتري وسلوى مرتبته من كلشي هي وعمجن رجعت بس ابوجن ما شفته لليل يله اجه وسلوى تضحك على عقلي لبستني ملمع وهلاهل ورضيت لان جنت احبه واقتنعت بقسمتي ومن هذاك اليوم اني بهذا البيت وخلفت اخوجن باسل وبعده ليال لقاء وجنات .
لقاء ـ جواهر شعجب ما سوتلج سحر وخربت بينكم .
هيفاء ـ منو كلج ما سوت بس من رجعت هي شايله رحمها ووالده جديد ومن جبت باسل مكانتي تغيرت عن جديتجن صارت تحبني وما تخلي وحده تحاجيني وخفت عني جواهر وبعدها جبت ليال طلبتها مني تاخذها تربيها اني رفضت وبجيت وكالوا بطن الثالثه لجواهر هي تحب الجهال ومن اصير حامل تداريني وزينه عليه لان تتأمل انطيها البطني وصارت لقاء بس جنتي وكحه من صرتي لدنيا بس تبجين ما رادتج كالت بطن رابعه اليه ما بيها مجال وصارت جنات واخذتج ربتج بحضنها وتحبج وخفت عني بمشاكلها صح بالليل اجيبج يمي بس بالنهار يمها
لقاء ـ عوذه واني اكول ليش تحبينها اثاري هي مربيتج
هيفاء ـ هي بفتره ما صرتوا انتوا هي زينه بس من كبرتوا وباسل استلم الشغل ويه ابوه واعتمد عليه بكلشي وهي عبالها جان مطلكني ورجع تزوجني عود اني اخذته منها وصارت جواهر تفكر لبعيد ونائل مخربط مو صاحب أعتماد وشلع گلبها بمراهقته وسوالفه لان وحيدها ومدللينا وتخبل على عمره كلشي يريده يصير وخرب نائل وصارت توز برأسه كرهه وحقد ترسته ترس لان كل تفكيرها صار بعيد كلشي يصير اليه ولابني والجن وتغير تفكيرها وجشعها وطمعها وصارت تعادييني وتأذيني الى ان وصلت بيها تزرع الخوف والرعب بيجن وهاي جواهر مرت ابوكم الثانيه واني الاولى وهاي قصة أمكم اللي أبوكم محملني الذنب .
لقاء ـ يمه ليش هسه يله حجيتلي النا وليش جديتي دائماً تكول جواهر الاولى وهيفاء الثانيه وخلتنا نصدك
هيفاء ـ لان عبالهن أبوجن مطلگني وبعدين رجعني بزواج هذا يعرفنا هنا وجديتج ما رادت تهضم جواهر ومنعت احد يحجي لـ الأحفاد اي شيء حتى طلبت من جواهر تبطل مشاكل وكالت تعاشرن صرتن أمهات ونائل اخوهم الجبير وهما خلفتج مرات تجر وتصير شلونها مرات لا والله تگلب وعماتجن مقهورات على اختهن وحقدات عليه من ورا اخويه يوزن برأسها وتتغير وتگلب عليه .
باسل ـ وأنتِ ليش ما حجيتي النا
هيفاء ـ ما حجيت لان ما ردت ازرع الحقد والكراهيه بينكم ما ردت أصير مثلها وتضل ام اخوكم وبيوم من الايام ربيتوا بحضنها وهم اگول خطيه مكسوره خاطر وأنهضمت بعز شبابها وشالوا رحمها يمكن من كسرتها وقهرها هيج تسوي .
باسل ـ يمه لاتنقهرين عليها أنقهري على روحج وطيبة گلبج هي وصلتج لهل المواصيل وكلام أبويه صُدك أنتِ خربتي حياتج وأنتِ دخلتي جواهر بحياتكم تركتي فراغ وغيرج اجه ترسه ولو شتفيد الملامه وشيفيد الكلام بعديش وشيغير بعد لأن بالأساس ماضي ويضل ماضي مـا راح يتغير شيء لو حجيتي هسه أو بعدين
ليال ـ عافنا ودخل غرفته ولقاء باوعت الساعه وأمي ضلت ساكته والصراحه مصدومين وطلع باسل لابس ملابسه وكف عالمغسله يمشط شعره ولقاء گالت .
لقاء ـ ما ضل عليه وكت راح عليه الخط باسل ما توديني أنت
باسل ـ وين أوديج وراي تفتحيه المحلات أصلاً تأخرت
لقاء ـ لا عفيه شلون لعد منو يوديني راح عليه الخط
باسل ـ باجر عود روحي هسه أجليها رحمه لجدج
لقاء ـ عفيه باسل حباب فتح المحلات وتعال وديني
ـ وين اجي بابا بس تفتحيته تاخذ نص الوكت، كل عقلج أجليها عيني كلت باجر يعني باجر وانتِ أقسام بعد شگو هاللغوه
ـ باسل
ـ باجر
ـ حباب
ـ باجر گافي تلحين
ـ يمه گوليله
ـ گالج باجر كافي تلحين عليه يله أمشن العدها دوام تمشي دوامها والما عدها تشوف شغلها ليال امشي لجامعتج يله
ليال ـ ما اروح اليوم
هيفاء ـ مو على كيفج صعدي غيري ملابسج وامشي مو لعب جهال هي ما اروح يله ، يمه باسل ما اسويلك لكمه تاكلها
باسل ـ لا يمه تأخرت اهناك جماعة المحلات ونتريك سوه ، يله فيمالا .
هيفاء ـ الله وياك وليدي دير بالك على نفسك
ليال ـ تقدم باسها وحضنها وتبوس بي وضحگها
باسل ـ جنتج سألت عليج وگالت بوسلي عمتي هاي البوسه من جنتج مو مني
هيفاء ـ ليا خبيث أمشي على شغلك تأخرت .
باسل ـ من أرجع عُلا تريد تحجي وياج
ـ بشنو تحجي خاف مسويلك مكسوره ويه البنيه ولك أحجي شمصخم وياها .
ـ اي تشكيلج مني ليش هلگد طولت وياها صار سنين مواعدها بالزواج وابويه وعمامي سلام الله عليهم شون عمام كلهم عليه
ـ أني وياك وأهلك يوافقون لوما مطلقه ما تكولي وين لگيتها وعشگتها ومتت عليها من خفت هيج حب لو هي لو ما تتزوج شطلعت هل العُلا هاي .
ـ أيه من الجمال كلشي بيها يحبه باسل
ـ اي فهمنا صدك ما گتلي بشنو نحجي
ً ـ بموضوع هي تحجيلج
ـ ولك خاف محبلها
ـ أستغفر الله اني رجال صالح ومؤمن تقي ما اسويها
ـ أنهجم بيت أبوك دمشي لشغلك
ـ من أرجع نحجي .
ـ الله يستر منك
ـ الله يستر على الجميع يمه أنتِ بس أدعيلي أتوفق
ـ شلون ما أدعيلك يمه
ـ يله فيمالا
ـ يحفظك الرحمن ، الله وياك أبني حبيبي .
ليال ـ أمي دخلت الغرفتها وجنات گبل نامت ولقاء كعدت تراسل صديقاتها واني فتحت الكنتور ولعبت نفسي تذكرت العظام وقرفت ، طلعت ملابس وتالي بطلت لفيت ࢪأسي ونمت ...
لعصر نزلت وأمي تباوعلي ورافعه الحاجب شبيج ماما
هيفاء ـ ليش ما رحتي أبن عمج فواز اجه أنتظرج حضرتج نايمه ، اني شحجيت مو كلت ما أريد أهمال بدراستجن تالي اضل اعلم بيجن هذا مستقبلجن منو يفيدجن هـا .
ليال ـ يله يمه يوم واحد ما راح يأثر .
ـ لا يأثر ، أمشي كعدي أخواتج ينزلن يتغدن كملن ونصعد انظف الغرفه والطابق وابخره من الصخام الخلته جواهر .
ـ ماشي ، صعدت لكيتهن كاعدات نزلن تغدن بسرعه لان امي معصبه ما مسموح اي تأخير كبل تكب بينا
لقاء ـ كبت بيه قبلجن مجمده اليه اكل واني حضرته قىل بوقت وكله مايع ونسيت ارجعه بالمجمده .
غفران ـ الثول اخرس اطرش .
لقاء ـ أنجبي يله نزلي .
ليال ـ نزلنا وباسل راجع من الشغل واكف يم الباب المطبخ وامي كاعده عالكرسي تحجي عالتلفون ومندمجه بالكلام .
لقاء ـ عفواً نريد ندخل
باسل ـ أجلنها هسه أمشن كعدن بعيد وبله صوت
لقاء ـ أتصالات مهمه عيني
باسل ـ بله لغوه يله
لقاء ـ حاضر أمشن لما تخلص الأتصالات العاجله .
ليال ـ كعدنا وهو عيونه تلمع ويباوع لـ أمي ما أعرف أمي شتحجي وهو يضحك ويضرب كصته أنقهرنا عليه لأن حيل حيل يحبها وحاول ويه أهلي الا عجز ولحد الأن مستمر يحاول بس مع ذلك الرفض أول كلمه يسمعها
" دخل أبويا علينا باوعلنا ومشه المطبخ يبووي گملت ودخل عليهم وباسل بأيده موبايله وطلع وباوع لأبويا
باسل ـ ها حجي شلونك اليوم عشاك يمنا .
سعيد ـ ليش ما رايح المحل لحد الأن
ـ هسه راح أروح
ـ جنت واكف لأمك وهي تحاجي صاحبتك مو
ـ لا يابا شسالفه
ـ بس العتب مو عليك العتب على أمك ولج هيفاء أني أغني بالطاحون ليش گلمتي ما الها مسمع مو گلت البنيه ينساها ليش تحجين وياها .
هيفاء ـ حجيت وياها بلغتها برفضك لزواجهم شحجي وياها قابل وصارلها سنين موكفه نصيبها علمود أبنك
سعيد ـ يعني حليتها لا خوش والله كله منج أنتِ مخليه أبنج يركض وراها بس شوف ولك البنيه هاي تنساها ولاتحلم تزوجها وخلها تمشي بقسمتها وانت هم أشوفلك بنت ناس وأزوجك واخلص من هالسالفه ولك منو يرضي بيك كلهن عرفنك تحبها وتريدها عليت گلبي بسوالفك .
باسل ـ حجي لاتعب نفسك زواج ما أتزوج ، هي مره وحده ردت اتزوج بيها الأنسانه الحبيتها وانتوا عارضتوا ورفضتوها ، هاي هي مو لازم أتزوج غيرها وأشيل خطية بنات الناس وياي ليش أتزوج واني گلبي معلگ بحب وحده ثانيه لهذا شيل فكره الزواج من بالك ، تريد تفرح زوج أبنك الكبير نائل وأذا على أختياره بعد أحسن أما باسل أنسى لو تصفلي نسوان العشيره ما أتزوج بعد .
ليال ـ دخل غير ملابسه واخذ المفاتيح المحل من أبويا وطلع وأمي ضلت ساكته ما حجت أشرتلي رحت ساعدتها صبينا غده وهو كاعد خليت كدامه بابا متغدي
سعيد ـ أي متغدي من ١٢ بس أتغدى وياكم ليش غداكم متأخر اليوم ساعه اربعه العصر بابا .
هيفاء ـ ما نمنا الليل كله كاعدين ونامن البنات بدون غده هسه كعدن ، يله يمه مدن أيديجن ، سعيد تريد أصبلك كلاص لبن .
سعيد ـ صبي صبي ، باسل أكل لو لا .
هيفاء ـ أي تغده
ليال ـ أكل ويانا ويباوع لـ أمي ونظراته حيل حلوة من يباوع بيهن لأمي كأنما ماكو احد بس هي، بس هالنظرات تبينت عن حب قديم أما هسه واضح گلشي أختلف ، كملنا أكل وغسلت المواعين وجنات هي وابويا يحجون على الدراسه وأمي فاتت الغرفه تصلي ولقاء نظفت مكان الأكل وغسلت الحوش وأني اصب الجاي وأسمعها تحجي بالحوش بعدت البرده وشفته ليث! .
لقاء ـ خبيث ليش نكعتني بالماي
ليث ـ عمي سعيد موجود
ـ أي موجود كاعد هو وامي ليش شتريد منه
ـ شعليج
ـ شنو جنت بالدوام
ـ اي ، ديله غسلي زين
ـ دمشي خليني أغسل عطلتني
ليال ـ نزلت البرده قبل لايشوفني ودخل وأسمع صوته سلم على أهلي وأمي صاحت عليه
هيفاء ـ ليال صبي أستكان جاي لأبن عمج .
ليال ـ أي ماما خليت أستكان وصبيت وكملت وطلعت يأيدي الصينيه وتذكرت نسيت البس شالي شعري ضل مفتوح ارتبكت وهو نظراته تشخصت عليه بلعت ريك مرحبا ليث .
ليث ـ وعليكم السلام
سعيد ـ أخذ جايك ، جيبي بابا اني احب الجاي من أيد ليال اكو كليجه جيبلنا .
هيفاء ـ اي اكو بالمجمده جنات كومي جيبي كليجه ماما ليال لبسي شالج
ليال ـ همست والله نسيت ماما
هيفاء ـ عادي تصير ميخالف .
ليال ـ غمزتلي ومشيت صعدت الدرج واندريت بنظره سريعه عيونه عليه تراقب خطواتي صعدت غرفتنا لزمت گلبي واضحك تلمست رقبتي شنو هالغباء طلعت بدون شال ، اخذت شال ضبطته ونزلت بعدهم كاعدين ولقاء شالت الاستكانات وصلتني لحكتها المطبخ عوذه جان عفتيهن اني اجمعهن .
لقاء ـ يـا نسيت والله يله عالجايات ، اني صاعده اغسل ملابسي واكويهن لان نفسي لعبت من قرف جواهر .
ليال ـ ماشي بطريقج أكويلي قميصي الأبيض باجر البسه
لقاء ـ تدللي
ليال ـ صعدت وسمعت أصواتهم يمكن راح يروح طلعت وصاروا گبالي هو وابويا يحجون باوعلي رجع يحجي طلعوا برا بالحوش وكعدت بصف أمي
جنات ـ ماما بس لا بابا ما يضل يمنا والله أشتاقله
هيفاء ـ لا يضل يمنا هو من يكول كلمه ما يتراجع عنها بس هو وليث يحجون علمود الذهب والشغل
جنات ـ ماما خل نروح السوك ونمر لمحلات بابا اريد ابدل التراجي مالاتي
هيفاء ـ شبيهن يا ماما تبدليهن لاتتبطرين ما صارلهن كم شهر ما محتاجين شيء علمود نروح السوك بعد هسه أجليها لما تفض سالفة اخوجن بلكي الله يهدي ويتزوج جان على زواجه نروح المحلات ابوجن هو يلبسجن ذهب .
جنات ـ الله ويصير عدنا عرس أخر عرس جان عرس فارس
هيفاء ـ الله كريم يوم لـ أخوانجن باسل ونائل ولد عمامجن ليث وفواز وزياد وسجاد ومعاذ ولد عماتجن هم وهواي اكو أعراس شبعي جنات خاتون .
جنات ـ يمه صُدك ليث هو الجبير ليش فارس تزوج قبله
هيفاء ـ ماكو فرق غير ما هاوي الزواج الله يسعده ولد عمجن خوش ولد تربيه سلوى تخليها على الجرح يطيب
جنات ـ ماما فدوه اذا تردون تزوجون باسل لاتأخذون من بنات عمتي نجلاء لا تهاني ولا تماضر والله انتحر بس ياقوت بنت عمي كريم بيها مجال فقيره
هيفاء ـ هو خل يوافق بعدين نشوف شلون ترهم ما ظنتي قافل على عُلا وعشيرة عُلا
ليال ـ ماما يعني لو نفرض بابا يوافق أنتِ توافقين
ـ أي ليش ما أوافق بنيه مثل الورده شحلاتها تكول ليرة والله ما وفقها بزواجها الأول مو معناها بيها عيب يجوز ما تفاهمت وياه لو اعمارهم مختلفه لو عقلهم من تزوجوا ما جان ناضج وجاهزين لحياة الزوجيه لان الحياة الزوجيه مو بس تحتاج قلب يحب تحتاج عقل يحكم ويفكر ويحسب حساب لخطواته بكل حياته الزوجيه وتطلقت لان ما شافت نفسها بالمكان الصح ومن حبت اخوج شافته عوض عن كلشي مرت بي بس هذا المجتمع ما ينصف لا مطلقه ولا غير المطلقه ومخلينها بخانه لوحدها ينصفون الرجل ما ينصفونها بدال مـا يخلون العيب بي يخلونه بيها وأبوج وأهلج خلوا خط أحمر على عُلا مو بس لان هي مطلقه وراها طفله لا لأن وراهم أسم ومكانه بالمجتمع وبالسوك أيضاً ويفكرون ويحسبون حساب الف خطوة ليكدام والعالم تركز على كلشي بالاخص أهلج معروفين غلطه صغيره تأثر على كل عمامج مو بس على أبوج
يعني من الأخير يا ماما الواحد من يشق الطريق ويدخله لازم يكون جاهز يتحمل العقبات والمواجهات بكلشي ويحكم عقله ويوزن كلامه وتصرفاته لان بالأخير الأذيه ترجع عليه لان هو أختار هذا الطريق وأخوج اذا أختار عُلا يخسر كل أهله وصح اني وياه وأبني وما أهضمه لان عزيز روحي بس من اجي لواقع اني ويه أبوج لان يا ماما أيد وحده ما تصفك ولا تسوي شيء صعب واحد يصير ضد مجتمع كامل انخلق منه وتَربى بنصه وتطبع بإطباعهم وعاداتهم وتقاليدهم وبعدين علمود رغباته يتمرد عليهم .
ليال ـ فعلاً كلامج ماما الواحد لازم يفكر بكل خطواته
أبتسمتلي ، ودخل علينا بابا وكعد قريب من أمي
سعيد ـ هـا شلونج
هيفاء ـ زينه الحمدلله وأنتَ .
سعيد ـ هم زين .
ليال ـ يحجون واحد صافن بعيون الثاني نظراتهم تشرح گلشي كأنما عتاب بلغة العيون لان القلب ما عاد يستقبل ، أشرت لـ جنات وسحبنـا نفسنا هي صعدت الفوك واني رحت المكتبه مالتي ، أنتيكات أول عباره لامست قلبي هديه من ليث وأول ما رتبتها واشتريت الكتب هو جابلييها ، كعدت وفتحت الجرار وطلعت الرسمه وصفنت على ملامحه شغلت أغنيه فيروز ورجعت أكمل وين ما توقفت أرسم بهدوء وأفكاري سارحه وعلى شفايفي أبتسامه بسعاده تشرح القلب .
وأني أرسم ومندمجه وصلني مسج فتحته من عنده
ليث ـ شلونج يابا .
ليال ـ بخير الحمدلله
ـ شجاي تسوين
ـ بالمكتبه جاي أرسم
ـ من تكملينها دزيها أشوفها
ـ لسا مطوله
ـ شگد تطول
ـ بعد والله تعرفني دقيقه بالرسم
ـ أي أعرفج ، صدك ياقوت گالت اليوم ما مداومه
ـ أي صح مـا دوامت
ـ خير
ـ لا هيج ماكو شيء مجرد شوية تعب بس
ـ خاف ماكو أحد يوصلج
ـ لا أخواني موجودين
ـ وأني جنت بالدوام
ـ لا عادي ولا يهمك
ـ هـا
ـ أي
ـ تمام براحتج
ـ تمام
ـ أني رايح
ـ وين تروح
ـ أقصد رايح يعني أخليج
ـ ما فهمتك
ـ شعجب ما فهمتيني!
ـ دخت وياه ما عرفت شجاوبه تالي ما جاوبته يمكن يقصد يروح يطلع من المحادثه واني سُبقت الحديث
ـ ليال
ـ نعم
ـ أنتِ وياي
ـ أي
ـ دختي يمكن
ـ لا ليش
ـ لا هيج ، يله رجعي كملي رسمتج وباجر اني أخذج أوصلج الجامعه .
ـ تمام راح وصفنت بطريقه كلامه وأبتسمت دوختني وياك ما جاي أفهمك ولا أكدر أخطي أي خطوه تجاهك
أنتهى اليوم ولازمني القلق والتفكير بأخر حديث وياه لصبح كعدت من وقت لبست وشفت ملابس لقاء طالعه من الفجر راحت الله وياها، كملت لبسي ورتبت شالي وشلت جنطتي وشغلاتي ونزلت باسل واكف بالحوش يحجي أتصال صباح الخير .
باسل ـ صباح النور منو يوصلج
ليال ـ ليث يوصلنا
ـ ماشي عندج مصرف أوكفي هاج
ـ أنطاني مصرفي ، شكراً
ـ تدللي
ـ طلعت شفته واكف بابهم جاي يصلح بسيارته تمشيت لعنده صباح الخير شُنو عطلانه السياره .
ليث ـ صباح النور لا هسه شافتج وتشتغل يله ياقوت وين صرتي .
ياقوت ـ أجيت صباحو ليال هاي شلابسه شنو هالذوق والاناقه ، تعجبيني دائماً لبسج واناقتج غير شكل عالمج ثاني .
ليال ـ حبيبتي شكراً كلج ذوق ، صعدت ليورا وهو شغلها وباوعلي بالجامه بنظره سريعه تلافيت نظراته قدر الأمكان وحاولت أفهمه ما فهمته الى أن وصلنا
نزلنا وشفت صديقاتي وبعدها دخلنا محاضرات وخلصنا واني طالعه شفت ليث وصار بوجهي ليث شجابك
ليث ـ جنت يم رئيسه القسم وأجيت أخذجن من وكت كملتن
ليال ـ بلغتها يعني
ليث ـ اي لعد شحجي
ـ ما جاوبته ضجت من رده ومشيت صحت ياقوت وطلعنا طول الطريق تجاهلته ولا باوعتله وبنص الطريق دك هورن عالي وياقوت فزت
ياقوت ـ صُدك تحجي ليث فززتنا هو شگو أدك هورن شو الشارع فارغ .
ليال ـ ما جاوبها رجع باوعلي بنظره حده صديت وجهي عنه ووصلنا نزلت بدون كلام وصاح وراي .
ليث ـ شبيج بوزتي ونكلبت الخلقه شگو
ـ ما بيه شيء
ـ غرتي عليه لان دخلت الجامعه!
ـ بعصبيه لا متوهم ليش أغار عليك ، عفته ومشيت دخلت نار برأسي دائماً يستفززني بحركاته ومزاجيته نزلت جنات بعدها ما راجعه بس أمي غاسله ومنظفه وريحة الطبخ تشك الخشم ، ماما وينج صحت عليها وطلع ابويا من الحمام يبو فشلت منه .
سعيد ـ راجعه من وكت اليوم
ليال ـ ما اعرف ليث أجه أخذنا يمكن عدنا شغل .
سعيد ـ اي صح عندي شغل وياه يله غيري ملابسج وصبي غده
ليال ـ ماشي بابا ، صعدت غرفتي غيرت ملابسي خليت موبايلي عالشحن وصلتني رساله منه
ليث ـ وجهج ما أريد أشوفه بعد ، مو أني الينتر بوجهي ولا واحد من أخوانج هيج تتعاملين وياي !
ليال ـ أستغربت ودزيتله ليش إشسويت
ـ قلة أحتراماتج ما أنسـاها الج تمشين واني بعدني ما مخلص كلامي وأول وأخر مره تقلليين أحترامات كدامي يالمحترمه .
ـ ما سويت شيء ولا قللت أي أحترام بحقك واني من يوم يومي محترمه مـا يحتاج تعلمني الأحترامات
ـ عالعموم .
ـ ما جاوبته وضجت من تصرفه سواله زعله من لا شيء ، كيفك والله ازعل اني ما مسويه شيء بحقك عفت الموبايل على الشحن ونزلت .
لكيت باسل هم موجود وكاشخ وطلع ابويا من غرفته وأمي ترش عطر وتمسح على القاط مالته ورجع كال
سعيد ـ أخوك نائل جهز لو بعده
باسل ـ خابرته هسه يجي
سعيد ـ وليث وعمك وين صاروا
باسل ـ جاي يشغل سيارته بالفرع هسه يجون .
سعيد ـ وصيت ولد عمك على المحلات
باسل ـ اي گلت لـ سجاد وفارس موجودين لايضل بالك حجي .
سعيد ـ يله أبويه نتوكل
ليال ـ طلعوا وصحت وراه بصوت ناصي باسل خير وين رايحيين .
باسل ـ رايحيين نخطب لـ ليث .
