رواية بنات الحجي السعيد الفصل الثالث بقلم شمس العراقية
ليال ـ گالها بضحك وجمدت بمكاني وجاوبته باسل صُدك تحجي!
باسل ـ لا يمعوده رايحين على ولد صاحبنا بالسوك طالبنا نحضر المشيه وياه
ـ شو من هسه
ـ البنيه من البصره هم يله
ـ ها اي شگو بيها ترحون وترجعون بالسلامه ما جاوبني وراحوا الله وياهم ، يمه عبالي يحجي صُدك والقرأن وكع گلبي
هيفاء ـ هـا ليال شو واكفه ماما
ليال ـ لا ماما بس سألت باسل وين رايحيين .
ـ أي
ـ بس ماما ليش من سألته گالي رايحيين نخطب ليث
ـ هم سألتي نفسج أخوج ليش گال الچ رايحيين نخطب لـ ليث؟
ـ لا والله ، ليش
ـ أني أگولج ليش ، أخوج ذكي وما تفوته ولو كُلنا ملاحظين ليث عيونه عليج بس الما ملاحظينا بنيتنا شگو بقلبها لـ أبن عمها .
ـ ماكو شيء مجرد أبن عمي قابل أنتِ مـا تعرفيني .
ـ أعرف ماما أعرف وأنتِ عاقله وعقلج رزن وما يحتاج أوصيج ولا أحجي لان بنتي وأعرفها وحافظتها بس تعرفين عماتج والكل مترصد النا ومنتظرين علينا الزله ويمكن أخوج گال هيج وضحلج بكلامه المبطن لصالحج فهمتيني بنيتي .
ـ فهمتج لا يضل بالج ، تربيتج اني ماما ما يحتاج توصيني أعجبج
ـ فدوه لوجهج الله يفرحني بيجن يله تعاي نصب الغده بينما تجي جنات خاتون من جامعتها .
ـ من عيوني صبيت الغده وگملنا واجتي جنات تغدينا كملت شغلي وصعدت كملت دروسي وصفنت بكلام باسل وماما لازم أكون حذره ونبهه وكلام باسل مو عن عبث يمكن گاله راد يشوف ردة فعلي ، منا وهيج لازم أنتبه لنفسي
صعدت أمي بخرت كل الطابق ودخلت بخرت ملابسنا وفراشنا وفتحت الشبابيك وشغلت قرأن للمغرب اذن وصليت وأتصلت على لقاء ما جاوبتني ونزلت أمي تصلي وأندك الباب طلعت أمي و هاي تماضر!! وكفت أمي تحجي وياها ها ماما شتريد
هيفاء ـ عمتج نجلاء وعمتج أنسام أهنا وجديتج مسويه عشه ودازه على عمامج ودازنا علينا لان أهلج يتأخرون معزومين عالعشه .
ليال ـ أي ونروح
هيفاء ـ جديتج دازه علينا نكدر ما نروح يله صعدي لبسي بينما أكعد جنات نايمه يمي .
ليال ـ ماشي صعدت لبست ملابسي واخذت شحانتي وجنطتي باوعت الغرفه الحمدلله من انزل السكينه والأمان علينا من ساعه أمي بخرتها وشغلت القرأن الغرفه صار ينام بيها .
نزلت وأمي وجنات جاهزات قفلنا الأبواب زين وطلعنا بين جدي وأحنه وصلنا صادفتنا عمتي سلوى زوجة عمي كريم صايرين بصف بيت جدي حايط عالحايط .
سلوى ـ ها انتوا هم معزومين زين خوش جمعه شونكم ليال حبيبتي شلونج .
ليال ـ هلا عمه الحمدلله بخير انتِ شلونج
سلوى ـ زينه الحمدلله يله خل نفوت ولج ياقوت فيروز خلصن ولحگني لا جديتجن تهلس عطوبتجن، والله شالعات گلبي بس على هالموبايلات .
ليال ـ دخلنا وهي ويانا وأستبرق زوجة فارس خطيه صارلهم سنتين من تزوجوا ما جاي يصير الهم أطفال شكد راجعوا حاولوا فشلت المحاولات وطلبوا منه يتزوج بس هو رفض نهائي وربي يرزق كل مُحروم .
دخلنا البيت وكلهن موجودات بيت عمي رشيد وزياد وسجاد كاعدين بالحديقه سلمنا دخلت البيت صادفتني هدير بنت عمتي أنسام هم جايه هلاو شلونج
هدير ـ هلا عيني تمام ماشي الحال شلونه الدوام
ليال ـ زين الحمدلله غدير وين
هدير ـ ما أجتي والله ضلت هي ومعاذ بالبيت يله تعاي
ليال ـ دخلنا سلمت على جديتي وعماتي كاعدات سلمنا وأمي هم سلمت ردن من ورا خشمهن ورن موبايلي عمتي نجلاء گبل ركزت باوعت الشاشه لقاء أبتسمت ورحت يم الشباك جاوبتها هلا حب شلونج .
لقاء ـ هلا تعبانه والله هسه جاي نسوي العشه شلونكم أمي جنات باسل شلونه
ـ كلنا بخير ومشتاقين الج
ـ واني هم والله ، وين ما وين شنو هالصوت عبالك حرب المغول
ـ هو هم هيج معزومين عالعشه وكل عماتي وزوجات عمامي لان ابويه وعمامي رايحيين يحضرون خطوبه واحد وياهم يالسوك .
ـ هاا هيج يعني ، زين اليوم سحر جماعي بالعافيه
ـ ضحكت وزياد گبالي عيونه عليه رديت البرده
ـ وينج
ـ وياج ، يله حب اروح أساعدهم بالعشه
ـ ديري بالج من الأكل سألي عمتي نجاح منو طابخ
ـ وعلى أساس ما ننسحر يمعوده شتسوي مثلاً
ـ الحذر واجب أختي كلكم ما خايفين منها بس اني گلبي مـا مرتاح الها .
ـ ماشي باي
ـ صوريلي ودزيلي وها سجلي نقط على الكل حرامات ما موجوده فاتتني جان اعزل عليهم والله
ـ أجوائج
ـ أي والله ، صدك تعاي تماضر شلابسه بس لاتكولين المخور جابته من دبي لحد الان تلبس بي بكل مناسبة كاشخه بي ترى طلعت روحه يصرخ المسكين يكول الها انزعيني انزعيني
ـ لا ما لابسه لابسه فستان أسود فاتل خصرها فتل
ـ الاسود ملك الاغراء ، عيونك حلوه اوي هاي لفد واحد ما معبرها
ـ ضحكت خرب بيومج ما موجود رايح وياهم
ـ ها تمام عود دزيلي الأحداثيات اشوف بينما يكمل عشانا .
ـ أوك حب باي نهيت الأتصال رحت المطبخ ساعدتهم بالعشه وجواهر تسوي سلطه وكفت بصف عمتي نجاح عمه منو طابخ الأكل
نجاح ـ أني وعمتج بلقيس ليش تسألين
بلقيس ـ ليال تعاي ساعدي خالتج صبي السلطه بالمواعين يله تحركي وين الباقيات جنات تماضر هدير ياقوت فيروز زمرد من اريدهن ولا وحده يمي .
ليال ـ أي عمه أخذت السلطه منها وهي غسلت أيديها ودخلت جنات وابتسمت الها تقربت باستها وتمسح على شعرها
جواهر ـ شلونها بنيتي شلون دراستج خوما صعب .
جنات ـ لا ماما زين حابته
ـ والله اني ما حابته موخوش قسم ليش ما تحولين أهلي طبيه خل ابوج يقدملج على مسائي معهد طبي باب المعظم بنت اخويه جاي تدوام بي وهم بي تعيين
ـ لا ماما ما يحتاج
ـ الله يوفقج ، يله ساعديهن وصبن العشه رايحه أكب ماي على جسمي طگيت .
ليال ـ طلعت وأجتي جنات گرصتها رجعتي تگولين ماما
جنات ـ أحتراماً ألها شگول الها يعني
ـ كولي مثلنا جواهر أنتِ دواج لقاء تسلگج سلك على كلمة ماما ، ضربتها على ࢪأسها خليها برأسج هاي ماما ما تنگال فقط لـ الأم الحقيقه نخلقتي من روحها هي وبس غيرها لواكه ولعبان روح
ـ أفتهمنا
ـ أي أفتهمي شُــــنوْ نسيتي إشــسوت بينا بهذيج الليله لـو مثل أهلج ما تصدكين .
ـ ما شافت عيني ما أصدك .
ـ نفضت أيديها وهزيت ࢪاسي بقهر وكملت شغلي وصبينا العشه وولد عمامي أتعشوا بالحديقه واحنا بالصاله لان يله تكفينا ، أمي سحبت سلطه تريد تأكل ماما عوفيها حست واكلت غير شيء وجواهر تباوعلنا
هيفاء ـ بهمس على أساس باقي الأكل نظيف .
ليال ـ خليناها على الله لان محد يصدگنا وأكلنا وگمنا وعافن المواعين علينا اني وجنات لان عماتي طابخات ما تعاجزت منهن دخلت المطبخ بلشت غسل وجنات تنظف الطباخ واجتني عمتي سلوى تساعدني لا عمه ما يحتاج والله .
سلوى ـ لا خليني أساعدج اني احب غسل المواعين ياقوت صيحي أختج فيروز وتعاي عزلن المطبخ جنات هاج عزلي الاكل خلي ورا البيت
ليال ـ عالسريع غسلنا وگملنا فدوه لگلبها عمتي سلوى ما خلتنا لوحدنا لان بكل عزيمه يعوفن المواعين والهوسه الأكل على بنات هيفاء خو زمرد بنت عمي رشيد عبالك خاتون ولا عليها تماضر بس عليها الجاي هاي مهمتها مال لواگه، والله الشغل مو عجز بس مساعده حلوة وعمتي سلوى من طييب أصلها ما عافتنا ، صبت الجاي واخذت لأمي وكعدن هي وأمي يسولفن لان حيل صديقات ومقربات لبعض وكعدت بصف عمتي نجاح .
نجاح ـ تعبتي مو
ليال ـ لا عادي عيوني عمه تعبج راحه
نجاح ـ فدوه لهل الوجه .
نجلاء ـ على شُــــنوْ تتفدين بيها على شطارتها تطلعها بس بغسل المواعين كدامجن عود اني خوش مره وام بيت وبدراستها مزفته الله يدري بيش ملتهيه .
هيفاء ـ شُــــنوْ هالحجي بحق بنتي ما أسمحلج
نجاح ـ ليش يابه أنتفضتي لازم ما عندج علم بنتج وسوالفها
هيفاء ـ سوالفيش ديري بالج تجيبين طاري بنتي
سلوى ـ نجلاء داده صدك تحجين شُــــنوْ هالحجي مو عيب وأنتِ عمتها
انسام ـ نجلاء عيب
نجلاء ـ واني شحاجيه على كيفيجن أكلتني حاصل فاصل وبعدين اني ما جايبه من جيبي الطلاب وياها يحجون يكولون تلهي ما تهتم لدراستها
هيفاء ـ ينكص لسان وينشل كل واحد ووحده يجيب طاري وحده من بناتي .
نجلاء ـ أنهجم بيتج على هالبنات وأنحرك دمها على بناتها داده اني احجي لمصلحتها اذا ما بيها خير لدراسه وبس تلهي شكو دازتها تدرس وخابصتنا بناتي وبناتي ويوميه تعال ليث وديها لجامعه تعال فواز جيبها من الجامعه وروح نائل جيب أخواتك وتعال نائل ومخليه العالم خدم وسواق الج ولبناتج وابنج كرة عينج عليه مشيلته ايده من خدمة أخواته .
أنسام ـ نجلاء گافي لاتجيج أمي سگتي وكته هالحجي مجموعين ليش تسسمين جمعتنا.
سلوى ـ نجلاء سگتي عيب عليج أستحي على نفسج تحجين عليهن بنات أخوح وأنتِ عمتهن من عمى العماج وما التگى دواج .
هيفاء ـ لا خلنها خل تحجي العدها وهيج مقهوره من بناتي خل بناتج يوصلن الوصلنا بناتي خل تماضر البطلتيها من السادس تدخل قسم اللغه العربيه خلي تجيب معدل يوديها صيدله مثل لقاء خلي تصير مثل جنات اللغه انكليزيه ، خل بناتج يصيرن مثل بناتي هذاك الوكت بيج خير واحجي على بناتي الا احط لسانج واكصه اذا جبتي طاري وحده منهن واذا مقهوره لان يودون ويجيبون ولد عمهن عندج مشكله ولد عمهن ربوا سوه مو بس ولد عم أخوان هم ما عاجبج هذا القصر بي مية الف حايط ضربي راسج بواحد من الحياطن .
نجلاء ـ والله تماضر بطلتها من شفتها مو مال دراسه على أقل اخلي بنتي كدام عيني مو ادلل بيها كدام الرايح والجاي مسويتلي بيها ولد عمامها خوش ولد عم والله عمي سعيد نايم ورجليه بالشمس الله يعلم هالبنات شمبدعات من ورى ظهره لا ومكيفه بنتج مطلعه صيدله ودازتها لتكريت ليش اهنا ماكو جامعات الا تكريت واقسام مو درسنا بناتنا بحامعات بغداد بس هاي فخخه زايده منج بناتي وبناتي كرة عينج على هالبنات الله يعلم .
ليال ـ تحجي واني صافنه عليها وعماتي يسكتون بيها بس هي ما تسگت وأجتي جديتي ودگت عوجيتها بالكاع وصاحت بيها .
حليمه ـ نجلاء لسانج أكصه اذا حجيتي بعد أجفص على راسج اذا جبتي طاري وحده من بنات سعيد يا ويلها وسواد ليليها تجيب معدل تربيه هيفاء وبناتها احش لسانها من عرجه .
نجلاء ـ يمه
حليمه ـ وجعة ابو أمي تفدع گلبج فدع يالملسونه .
ليال ـ أمي مسحت دموعي وعمتي نجاح سحبتني وتبوس بيه وعمتي انسام اخذت عمتي نجلاء للغرفه وتحجي عليها ولحكتهن أسمهان زوجة عمي رشيد
حليمه ـ زياد جده ما تخابر بهل المهجوم وتشوفلي أهلك وين صاروا شو طولوا وگلبي أشتعل بنار وجدك شال راسه يم اخوه ولا يگول اسال على ولدي وين صاروا بس گلب الوالده متعلل .
زياد ـ خابرت ليث كال واصلين مسافة الطريق .
حليمه ـ ليث طاير بسيارته ادري بي حرك
زياد ـ الحافظ الله جده لا يضل بالج .
ليال ـ واكف بصف جديتي ويحجون وعيونه علينا وأجتي عمتي أسمهان شافته وباوعتلي
أسمهان ـ زياد ماما شعندك واكف عيب بتاخت عمك كاعدات ويستحن ما ياخذن راحتهن .
حليمه ـ وأنتِ منو يمج بنات عمه ما الج دخل ابقى جده ضل يمي ما الك شغل بأمك .
ليال ـ بالي مو يمهن يم كلام عمتي نجلاء حيل قهرتني
حليمه ـ ليال جده لاتزعلين من عمتج نجله من يومها لسانها وسخ بس گلبها طيب تضل عمتج ميخالف واني هم رزلتها شسويلها ابو طبع ما يبدل طبعه النكس يضل نكس من يومها راعية مشاكل .
هيفاء ـ لخاطرج والله ياعمه
حليمه ـ يسلم خاطرج تربيتج ما تنعاب ولا ينجاب طاريها بالموزينه الله يحفظهن ويفرحج بيهن .
ليال ـ جديتي حجت كلام حلو صح مرات تقسي بس كلام الحق تعرفه وتگوله لو على كص ركبتها رغم كبيره بالعمر وگوه تمشي بس قويه ولسانها سليط والكل يهابها ويخاف منها وكلمتها مسموعه
الا جدي فقير والكل يحبه ويحترمه وما يحب سوالف الجنايين مبتعد ما يدخل نفسه واغلب أوقاته يروح يم اخوه عبد العزيز ومرات يروح لـ السوك يم ابويه وعمامي يفضي خلك بالسوك لان هو سابقاً جان تاجر ذهب ووسع شغله وصار أيضاً تاجر سجاد ومفروشات وعمي رشيد استلمها هو وعمي سليم والذهب ابويه وعمي كريم ابو ليث ونائل يشتغل ويه عمي سليم وباسل بالذهب يساعد أبويه وعنده هم محل تجهيزات أطفال .
ولد عمي كريم هم يساعدون ابويه ليث وفارس بس فواز لا جاي يدرس ..
گمت للحمام غسلت وسمعت صوت عياط أسم الله يا ساتر شگو ، لزمت گلبي وطلعت وعمتي نجلاء ادك وتلطم وصلت يمه شگو .
هيفاء ـ جدج عبد العزيز متخربط وحالته تعبانه جيبلي عبايتي اروح وياهن .
ليال ـ أنخبصن وكلهن لبسن عبايتهن وطلعن وتماضر رادت تروح وعمتي نجلاء صاحت بيها .
نجلاء ـ وين تجين كلها بالمستشفى ابقي اهنا بيت جدج .
تماضر ـ ماشي ماما .
ليال ـ راحن ضلينا اني وجنات وتماضر وبنات عمي لبسن وراحن ها ياقوت تروحن .
ياقوت ـ اي والله ليث وصل يضل يحجي لان البيت فارغ وامي راحت وياهن ماكو واحد ، تصبحن على خير
ليال ـ وأنتِ من أهله .
جنات ـ اني نعست وراي دوام عمه راح انام بغرفتج
نجاح ـ نامي منو لازمج ، ليال اذا نعسانه تردين تنامين نامي .
ليال ـ لا عمه ما نعسانه ، أبتسمتلي الوحيده ما تطلع من البيت طيبه وحنونه أحن عماتي ، شوي دخلوا علينا نائل وأمه وعمتي بلقيس .
نجاح ـ ها شصار شونه عمي
بلقيس ـ بعده والله
جواهر ـ كلها فوك رأسه انطو مجال يشم هوا يتنفس
ليال ـ تحجي ونائل صافن باوعت لكيته يباوع لـ تماضر كلت يجوز نظره عاديه تجاهلتهم ما خليتهم بذمتي وهو مشه ، راسلت لقاء جاي احجي وياها وسمعت صوت نائل .
نائل ـ يمه سوولي عشه
جواهر ـ ليال كومي سوي عشه لـ أخوج .
ليال ـ اي هسه
جواهر ـ مو هسه وهسه افوت اغير ملابسي الكاج محضره عشاه هسه يطلع من الحمام يريد عشه جوعان سوده عليه ما متعشي .
ليال ـ ماشي راحت وخليت موبايلي عالشحن وكمت ولاحظت تماضر ماكو يمكن راحت نامت يم جنات دخلت المطبخ حميتله الأكل وكملته وكفت باب المطبخ صحت عليها خاله العشه جاهز .
جواهر ـ صعدي لغرفته .
ليال ـ أهوو شطلعت هاي .
جواهر ـ وجعوا من كثر أخوانج ، أخوج الجبير وغصباً عليح تصعدين الأكل اله
ـ واني شحجيت
ـ حجيتي ما حجيتي صعديله الأكل وصمي حلگج
نجاح ـ شگو صوتجن عالي، ليال ماما صعدي الأكل ما بيها شيء ماما أخوج
ليال ـ والله ما حجيت شيء أكلتني بلسانها
بليقس ـ ميخالف مرت أبوج يله فضينا على گلشي متلاغيات وصوتجن عالي .
ليال ـ ما حجيت شيء شلت الصينيه وصعدت فوك وغرفته مفتوحه وفارغه هذا وينه خليت الأكل وأستوقفني صوت ناعم وضحك خفيف اخذتني رجليه الغرفه مسوينها مخزن .
تماضر ـ حباب خل اروح قبل لا عماتي يلاحظن عليه ويگولن لـ أمي والله تذبحني تقبل أني أموت
نائل ـ شلون أقبل أني أموت بمكانج لج شطالعه اليوم خصرج مفتول فتل بالأسود هذا المن هالخصر المن مربيته وناحته
ـ الك غير وضحكات خفيفه بدلع
ـ لك أموت أموت خليني اتملس أنحناءات خصرك يا حلو يا سابي گلبي خلي أطبع واختم ملكية نائل .
ـ لا نائل حباب خل أنزل
ـ بس شويه ونزلي مو أهلي أنصمطوا بهل الغرفه متحمل الحر والبرد علمودج
ـ شسويلك
ـ أووف يا تماضر اووف
ليال ـ ضليت مصدومه وأجتني الجمده تخشبت وأبلع بريكي لازمه المحجر اريد انزل وسمعت صوت ما اعرف شكسروا يمكن مجلب بيها غصب
تماضر ـ يا نائل ما اعرف شكسرت هاي هديه عزا
نائل ـ فدوه الج الهديه وصاحب الهديه والبيت واهل البيت والمال والعيال ونائل وعشيرته .
تماضر ـ لا نائل لا حباب لا .
ليال ـ صار صوت حركه توني ردت أنزل صاروا گبالي يبوس بيها من شفايفها ومحتضنها من خصرها طبگها على الحايط وبوس وحضن لعبت نفسي
تماضر ـ نائل تدري اني أعشقك
نائل ـ واني هم واني هم .
ليال ـ وفزيت على صوت جواهر
جواهر ـ شعندج واكفه
ليال ـ أيدي ترتجف وفز گلبي كبل جسمي نزلت وانفاسي تتسابق عبرتها ولزمتني من ايدي قوي
جواهر ـ شجنتي تسوين بغرفة نائل وليش تأخرتي
ليال ـ شسوي يعني وديتله العشه عندج أوامر ثانيه
جواهر ـ لا ما عندي أمشي ولي أنحمي بصف أختج
ليال ـ ما جاوبتها أخذت تلفوني ولكيت لقاء كومه مراسلتني
لقاء ـ وينج رجعي كملي شصار منو مات عليج الله كولي جواهر فطست والعباس ابو فاضل اهلهل هسه
.
ليال ـ لا ولج گولي ما صار أستغفر الله شححيلج
ـ أحجي شبيج
ـ الله وصى ىالستر
ـ ونعم بالله بس اكو بشريه لازم تنفضح علمود تصير عبره
ـ اني احاجيج وگلبي يم وحده ما اعرف شصار بيها
ـ منو ولج احجي عاد تعاي اتصال هيج اخبار مو مال مراسله ما احب تعاي احجيلي .
ـ أجتي
ـ منو ووجع
ـ تماضر
ـ لا بربج شبيها
ـ بعدين
ـ تعالي وينج
ليال ـ دخلت تنشف وجهه عود جانت بالحمام تغسل وعمتي نجاح صاحت بيها
نجاح ـ تماضر وين جنتي .
تماضر ـ خاله جنت بالمغاسل
نجاح ـ. كل هالوقت ىالمغاسل!
تماضر ـ لا طبعاً كملت وخابرت أختي اسأل على أمي وجدو
نجاح ـ كعدي وأنجبي يله
بلقيس ـ على كيفح على البنيه شبيج أنفجرتي بيها
تعالي يمي حبيبتي .
ليال ـ كعدت بصف عمتي بلقيس وعمتي نجاح لفت ࢪأسها ونامت وسمعنا صوت أبويه وأمي أجوا ودخل علينا ابويه
سعيد ـ كعدي أختج تروحن البيت تماضر خالي شنو هنا باقيه ليش ما رحتي ويه أمج .
تماضر ـ خالي أمي گالتلي أبقي بيت خوالج .
سعيد ـ أمج هم أرعنه وابقي بالنهار مو بالليل لبسي عبايتج وتعاي وياي .
تماضر ـ وين خالي
سعيد ـ لبيتكم
ليال ـ طلع أبويه وأمي دخلت كعدت جنات ونائل نزل باوع على تماضر وشكله كله أستغراب لان شافها تلبس
مشيت ورى امي وتماضر ورى ابويه
نائل ـ يابه وين رايح
سعيد ـ وشعليك بيه وين اروح أمي ابويه مرتي تسألني وين اروح .
ليال ـ ما حجه وطلعنا باسل واكف يم الباب جان واكف ويه احد بس احنه طلعنا باب بيت عمي انسد معقوله ليث!! طلعنا وباسل كدامنا وتماضر صعدت ويه ابويه يوصلها لبيتهم .
وصلنا البيت اظلم خفت وباسل شغل الأضويه جنات جلبت بعباية أمي
هيفاء ـ جنات ماما صعدي نامي بغرفتج ابوج هسه يجي .
جنات ـ ماشي ماما تصبحين على خير .
ليال ـ صعدت وراها وامي لحگتنا أفترت بالسطح والفوك ضلت تفتر وتسد شبابيك واجتي كعدت يمنا
غيرت ملابسي وضليت صافنه تماضر ما خلت عقل براسي حركات مطبوعة بعقلي نفضت راسي استغفرالله .
هيفاء ـ شبيج ماما
ليال ـ باوعت جنات نايمه ماما أححيلج شيء
ـ شُــــنوْ هو
ـ سولفت إلها ماما مو لازم نحجي أخاف توصل للموزينه لا سامح الله لان نائل ما اعرف شگولج
ـ ادري بي سخيف بس ما توقعتها نفسه تدني على بنات عماتها وعرضه ليا ساقط
ـ وهسه ماما شنسوي
ـ شنسوي نسگت
ـ نسگت ليش ماما ترة تماضر رايحه على الأخير وعمتي نجلاء تدفع بيها كل عقلها نائل يتزوجها ونائل كلنا نعرفه مو مال زواج من يومه مخربط لما أمه من زمان ابويه مكظبه الباب ..
ـ شعلينا يا أمي عدها أم وهي تراقب وتحاسب واذا حجينا راح يصدگونا هو انتن انلعب بيجن لعب بالرعب وسوالف جواهر محد صدگجن وشفتي بعينج شلون انطردت، وراها اجاني ابوج اكل براسي حلاوه ورضيت وتغاضيت عن كل اللي صار وكل هذا متجفيه الشر وكاعده وساكته وما سالمه ورحت العزيمه وهم ما خلصت كعدت تسب وتطعن بيج انتِ واخواتج وكدامهن كلهن ، يا بنتي اني گلبي مورم من سوالفهن وعبالج اذا حجيت ونبهت يصدگوني يكولن مثل ما نجاح حجت على بناتج رجعتي حجيتي بناتها وحده بوحده لهذا نسكت أفضل والله يحفظها ويستر عليها .
ـ بس ماما
ـ نامي ماما وراج دوام ولاتخافين ماكو شيء اليوم كلنا انام بإمان وسلام لان أبوج ينام يمنا ما تكدر تسوي شيء بوجوده .
ـ باستني ونزلت وخليت ࢪأسي على المخده وتذكرته وتذكرت كلامه وقساوته ما اعرف ليش جاي يسوي تالي اخذتني أفكاري ونمت ..
كعدت الصبح الحمدلله عدت هالليله عالخير وماكو شيء
شفت جنات كاعده من وكت وجاهزه هـا اليوم نشاط ،
جنات ـ شعبالج لعد يله نازله قبلح وباسل يوصلنا
ليال ـ تمام كملت ولحگتها وبابا موجود صبحنا عليهم ولحگنا باسل واحنه طالعين شفته صعد سيارته شغلها وعبرنا بدون سلام
باسل ـ هذا شبي ما سلم!
ليال ـ وتوكلنا وصلنا وراح الشغله وبلشنا محاضرات وشفت تهاني وحجيت وياها ورزلتها مو عيب عليج تطعنين بيه ما خفتي من ربج تحجين بسمعتي وانتِ بنية بيت خافن الله شايف وعارف من تجبين وتلطشن عليه وعلى أخواتي ما ضارينجن بشيء ليش هالحقد والكرهه ليش
تهاني ـ على كيفج وياي هو شكو شصاير والله ما اعرف عن شنو تحجين وليش احجي بسمعتج شمسويتلي بنات أحجولي غدير أحجيلي شگو
ليال ـ كعدت وأعصابي نار بس شفتها تذكرت أمها وكلامها مثل السم ، سولفتلها گلشي وباوعت لغدير وصفنت شكلها ما تعرف اي شيء ادري بيها فطيره
تهاني ـ والله أمي شعدها سوالف تعبانه ، والله ما جايبه طاريج واصلاً أمي ما سألتني عليج منين جابات هذا الكلام بحقج ما أعرف ، وليش أنتِ احد يكدر يجيب طاريج لو يوصل ثكلج ورزانتج وادبج وأخلاقج وحشمتج ، الحرم الجامعي كله يعرفج شُــــنوْ والأستاذه كلهم يمدحون بيج بعد منين يطلع الحجي الموزين بحقج .
غدير ـ هاي خالتي نجلاء شاربه نفط شبيها لخاطر الله بكل مناسبه لازم يطلع كلام ومغثه ما نبطل من هالاسطوانه التعبانه العالم وين وصلت واحنه ناس تاكل بلحم ناس وتطعن بالسمعه والله مخازي.
تهاني ـ أسفه ليال والله ما حاجيه عليج وشرفي ما جايبه طاري أي وحده منجن هو بس بيت جدي نجتمع وكعدات وسوالف بنات
ليال ـ خلص هذا هو أنسي الموضوع
تهاني ـ يعني ما زعلانه مني لان أمي حجت عليجن
ليال ـ لا أنتِ شعليج أنسي خلص وبهل أثناء أجتي ياقوت أبتسمتلي هلاو
ياقوت ـ شلونجن
ليال ـ زينين وأنتِ
ياقوت ـ بخير شو اليوم ما اجيتي ويانا بس لاتأثرتي بكلام عمتي نجلاء .
ـ لا بس باسل هو وصلنا
ـ ويامن ترجعون .
ـ باسل گال يجي يأخذنا وأنتِ
ـ فارس اذا ما اجه باسل تعاي ويانا ونمر ناخذ جنات
ـ الله كريم ، نحجي وتهاني تباوعلي بحزن خلص يمعوده انسي
تهاني ـ والله ضجت
ليال ـ لا ولا يهمج خلص تعودنا عليها عمتي شسويلها يعني خل تحجي محسوبين عليها .
ياقوت ـ الله يصفي القلوب ولا يجيب بينا المشاكل
ليال ـ أمين، وضلينا كاعدين وكملنا دوام وطلعت شفته واكف تجاهلته وتقربت السياره يمي شويه يدعمني
ليث ـ صعدي
ـ لا ما يحتاج أخويه يجي يأخذنا .
ـ أخوج اخذ جنات وراح أمشي صعدي ، ياقوت وين
ـ هسه تجي
ـ تعاي لعد
ـ صعدت ليورا من جهة ياقوت وباوعلي
ـ مو عبالك مبالغه من كشختج ترى جايه جامعه مو حفله!
ـ أعرفه يريد يتعارك لذلك تجاهلته وما رديت
ـ مًو أحاجيج باوعيلي
ـ ليث شتريد
ـ على أساس ما تعرفين خطيه عليج
ـ لا ما أعرف ولا أريد أعرف
ـ كيفج يابا .
ـ أجتي ياقوت وطلعنا للبيت وتمشي السياره وهدوء وصلني مسج فتحته من عنده .
ـ تدرين بروحج ما تقاومين الزعل أكثر لان روحج يمي
ـ أبتسمت واني أقراها باوعتله غمزلي وأبتسم وصلنا نزلت يم بابهم وباوعلي ومشيت لبيتنا بعدني أفتح الباب .
ـ لا تتأخرين
ـ ماشي دخلت البيت جنات واصله قبلي وامي مجهزه الغده هلاو شونكم باسل وين لعد
هيفاء ـ هلا حبيبتي ، بغرفته نايم يله غيري ملابسج وتعاي تغدي علمود أنظف واروح الماركت عدنا نقوصات وتروحين وياي
جنات ـ اني هم اجي وياكم .
هيفاء ـ ميخالف كملن غداجن والله كريم
ليال ـ ماشي صعدت الغرفه ولكيته يتصل جاوبته توني جنت يمك على شُــــنوْ متصل
ليث ـ أشتاقيتلج غير
ـ ما جاوبته بس صخنت حسيت بي صدك مشتاقلي صوته لهفته سگوته وهو ينتظري أحجي
ـ هسه تصالحنا خلص ماكو زعل
ـ الصلح مو لازم أعتذار
ـ لا مو لازم
ـ ليش
ـ مـا صارت بينا مشكله قويه علمود نعتذر
ً ـ بس أسلوبك وطريقة كلامك جانت قاسيه
ـ جنت مزعوج وأنتِ ما فهمتيني وجاوبج بدون أحترام
هذا الأسلوب أني ما أحبه
ـ ولا أني أحب أسلوبك ونبرة كلامك تذكر لو أذكرك
ـ ما يحتاج سدي الموضوع خلص
ـ ليش تتهرب من الموضوع
ـ ما متهرب سدي الموضوع وگافي .
ـ بس ليث
ـ ليال بابا گافي كلنا خلص
ـ ماشي
ـ اي تغديتي لو بعدج
ـ لا بعدني هسه أنزل
ـ ماشي أخليج اخذي راحتج
ـ الله وياك عيني أنتهى الأتصال شعور حلو ومختلف عن كل مره ما اعرف لان متزاعلين وتراضينا بس هالمره حسيته غير يارب ما يخيب أحساسي بيك يا ليث يارب .
كل يوم يمر بينلي هو يحيني بس حبه على طريقته مو مثل مـا اني جنت أتمنى ما أعرف أسلوبه وطريقة كلامه يوم عن يوم تتغير ، على أتفه الأسباب يضوج تعبني هو من يومه متعبني بس أني اتغاضى عن عيوبه لان أحبه ...
هالفتره المرت أمتحانات ولود وضغط عليه والبيت هم أساعد ماما نوعا ما قل التواصل بينا مو مثل قبل نحجي مرات أتصال ورسائل ...
جهزت نفسي مثل كل يوم ونزلت وكفت باب الحوش وهو طلع كاشخ صعد السياره واجه بس ياقوت مو وياه
ليث ـ صعدي
ليال ـ صباح الخير شلونك
ليث ـ الحمدلله صعدي
ـ ياقوت وين
ـ ما أجتي اليوم كعدت مصخنه
ـ عليها العافيه صعدت ليورا وضل مركزي
ـ مسحي الحمره
ـ ليش
ـ مالها داعي
ـ بس شيء خفيف مخليه اني
ـ بس بارزه شفتج مسحيها
ـ بس
ـ ليال اني مهم عندج لو لا
ـ اي طبعاً مهم
ـ كلمتي الها أهميه عندج
ـ أي
ـ خلص لعد
ـ بس ليث شگلي ما بي شيء مبالغ بي والمكياج طبيعي مجرد لمسات خفيفه مو طوخ ولا الوان صارخه
ـ حتى لو ماله داعي
ـ أنطاني الكلنكس اخذته منه ومسحت حمرتي
ـ هسه تمام .
ـ وصلنا وقفني
ـ أوگفي خل يعبرون الولد
ـ يا ولد وشعليه بيهم اني
ـ ليال
ـ ماشي
ـ لاتتنرين بوجهي
ـ ليث على گلشي صاير أدقق ما جاي أفهمك
ـ أي طبعاً ما جاي تفهميني لو أهمج جاي فهمتيني من نظره قبل الكلام .
ـ زين تدري بنفسك كلش مهم عندي وجزء من روحي بس تتعمد بهذا كلامك .
ـ شمسويلج ترى هذا طبعي من يوم يومي جديد عليج
ـ لا مو جديد عليه بس جاي ما أعرفك شتريد
ـ لا زين تعرفيني وتعرفين بنفسج هم هسه فهمتي عليه .
ـ ما جاوبته بس أكتفيت بنظراتي اله
ـ ما تشبعين مناظره لهل درجة تحبيني ليال
ـ گلت بصوت ناصي أي گلتها ونصبت طبول بصدري خوف توتر رجفه كلام ىاسل أمي كسر الهدوء والتوتر من گال
ـ يله نزلي راحو
ـ باوعت ماكو أحد رجعت باوعت الساعه عزا ليث تأخرت
ـ ميخالف استاهل
ـ يبوه شلت جنطتي ونزلت ودگلي هورن ويضحك خبيث دخلت مبتسمه وصارت بوجهي غدير هلاو
غدير ـ تأخرتي وينج
ليال ـ اجيت ، دخلت المحاضره لحد ما خلص الدوام واني طالعه أجه فواز استغربت شعجب ما أجه هو وكفلي وصعدت مرحبا فواز
فواز ـ هلا يابه شلونج ليال
ليال ـ الحمدلله بخير ، شغل وطلعنا ما حجينا وصلني وما شفته راسلته وماكو وضل أيام هو ماكو اراسله ما يفتح رسائلي استغربت لليل اني نايمه وصلني مسج منه
ليث ـ أشتاقيتلج .
ليال ـ ليش مختفي
ليث ـ ليش مـا سألتي عليه
ـ مو سألت راسلتك ماكو ما تفتح رسائلي
ـ بالشغل ويه أبويه وأبوج ودوام ما صحلي مجال والله
ـ هـا ما صحلك مجال ولا دقيقه ولا ثانيه
ً ـ ليال شبيج حبيبتي
ـ لو حبيبتك طمني عنك مو هيج تختفتي حتى أستحيت اسأل ياقوت عليك ولو الكل ملاحظ ضلت على سؤألي
ـ هذا هو
ـ وين أنت هسه
ـ بالبيت هسه رجعت وباجر دوام
ـ ها تمام اخذ راحتك
ـ الصبح نحجي
ـ اوك نهيت المحادثه وراسلت لقاء بلغتها وصفنت شبيج سكتي
لقاء ـ أكولج هذا نفسه مـا فاهم نفسه
ليال ـ يعني شنو
ـ عوفي شوفي وين يوصل بهل أطباعه وتصرفاته
ـ المشكله بينا أثنينا
ـ لا المشكله بيج أنتِ تحبينه ومرات تجبرين نفسج تتقبلين كل تصرفاته الما عاجبتج ، بس اذا كان شخص يستحق منج هالشي مو شخص يستهلك كل طاقتج ويتعبج .
ـ مـا أعرف لقاء هو صح علاقتنا تطورت واخذت منحدر مستقبلها زواج وهو أكدلي هالشيء بس اكو شيء بي ما جاي أفهمه هو يدقق ويركز ويبالغ بغيرته .
ـ گتلج عوفي على طبيعته وأنتظري يجوز عنده مشاكل وضغوطات بالدوام وفرغ تعبه بيج ما لكه احد غيرج يتحمله ويحبه ويسأل عليه ، أنتِ حبج اله نقي وصافي ومخلص مو نفس حبه جاي من تملك وتغطرس ما اعرف هيج وضحلي من خلال تطور علاقتكم .
ـ الله كريم
ـ باجر أنزل ونحجي بهذا الموضوع .
ـ ماشي عيني ، رجعت نمت وافكاري ما مستقره وثاني يوم لقاء أجتي وفرحانين بيها كظيناها بالبيت وجان يوم خميس ولعصر لبسنا وطلعنا وياه ماما لمارگت نتسوك وباسل وصلنا بس جان دايخ وجه مـا يتفسر وأمي باوعتله الصراحه خفنا وهو هالفتره كله شغل وما بات خارج البيت من أخر مشكله هو وأبويه.
هيفاء ـ باسل ماما شبيك شو ما عجبتني .
باسل ـ لا يمه ما بيه شيء لا يضل بالج يله وصلنا من تخلصون خابروني اني رايح يم جماعتي .
هيفاء ـ وجماعتك نعرفهم
ـ اي يمه كريم وعباس
ـ يعني مو عُلا
ـ لا
ـ شخبارها بعدك تحجي وياها
ـ لا
ـ أن شاء الله تصدك بكلامك لأن گلبي ما مرتاح لهل السگوت والوجه ملامحه ما تبشر بالخير الله يستر عليك
ليال ـ نزلنا وافترينا واخذنا أجباسه وكرزات وحبشكلات تعلوله وكعده زينه نهاية الأسبوع وبهل الأثناء وصلني مسج من ليث
ليث ـ ليال وين أنتِ
ليال ـ طالعه ويه ماما وأخواتي ليش
ـ هـا ووين طالعين عالخير
ـ للماركت نتسوك
ـ ليال اني شُنو بحياتج
ـ حبيبي وكل حياتي ليش تسأل
ـ ليش اسأل
ـ ليث شبيك خلص من ارجع نحجي ماما تصيحيني
ً ـ روحي على الماما روحي .
ً
لقاء ـ شكو شبيج وجهج انگلب هسه جنتي شحلاتج
ليال ـ ليث
ـ شبي
ـ بس يتزعل ومعصب يمكن لان طلعت وما بلغته
ـ عفواً وهو شگو ترى بيت أهلج مو بيته يتحكم بيج من هسه شوفي أنتِ أختي الجبيره ودائماً تنصيحينا ونفس الوقت اكيد تحتاجين أحد ينصحج أنت مو رخيصه على نفسج ولا علينا لهذا لاتنطينا اكثر من حجه وتبالغين بحبه ويشوفه نفسه فد شيء عندج ترى هذت جاي يغذي كبريائه وغروره على حبج ومسمعج لكلامه وأوامره .
ـ ما حجيت ورجعت خلينا الأغراض وبقينا ننتظر ولقاء تباوعلي ولزمت أيدي وأبتسمت وجنات غمزتلنا وضحكنا
وماما دفعت الحساب واجانا باسل متوتر ويفتر بالكوه يصعد الاغراض بالجنطه بس يفرك بوجهه
لقاء ـ هذا مسويله مصيبه
ليال ـ اي مبين
هيفاء ـ على كيفك امي البيض لاتكسره خلي ليكدام ولك أمي اكو علب كزاز على كيفك شبيك مستعجل اذا عالعشه وصيت ابوكم اليوم عشانا كباب ومشويات لان مجموعين .
جنات ـ يا سلام ماكو طبخ ولا غسل مواعين .
ليال ـ وصعدنا وتوجهنـا للبيت نزلنا الأغراض وليث بالحديقه يحجي أتصال ومخبوص وعصبي
هيفاء ـ شبي هاالولد والله خبلني وياه ..
ليال ـ دخلنا الاغراض ورتبنا كلشي واجه ابويه جايب العشه رتبنا عالميز وكعدنا واجه باسل اكل كم لكمه وگام وابويه هز ࢪاسه ما عاجبه وضعه ، كمت صبيت الجاي وجبتلهم وفزينا على صوت أطلاق نار قريب بيتنا يا ساتر استرنـا .
سعيد ـ شگو شُــــنوْ هالضرب
هيفاء ـ سعيد لاتطلع خاف هجوم اكعد فدوه لعينك
سعيد ـ هجوم شنو خل اطلع اشوف شكو يا مره ابقي أنتِ والبنات لاحد يطلع وراي
هيفاء ـ سعيد فدوه لطولك لاتطلع
ليال ـ امي تتوسل بأبوبه وفتحنا الباب وابويه دخلنا ما قبل نطلع وضرب قوي وطلع باسل شايل موبايله!! وبهل الاثناء سمعنا صوت
ـ وينه الساقط وينه والله أشرب من دمك يا باسل ابن سعيد والله ، لك اندس عرضي وافوتها الك الا اسوي الدم لركب والله .
شكرا لزيارتكم عالم روايات سكيرهوم
