رواية نقش بارد الفصل الثاني بقلم فدك فاطمه
ذبــح و رگابهــن حلـوات
و الحـلوات كلش مـالهن حوبة
ذبـح و اسم الله ع السجـين
و الـذباح يمـسح دمهن بـثوبة
.
دلـــهم
عفتها رحت لوسط المحطة قابلني رجال متوسط بالعمر يلهث الغضب مرسوم على ملامحة بس ماخفة القلق و الارتباك الجان بي
دلهم:على شنو تدور
اتلفت حولة رد بتوتر :بـ..بانزين سيارتي وگفت على الشارع اريدلهة دبة تبيعون
حجيت أشر على جهة تانكي:اذا تدور على بنيـة هناك لابدة بين التانكيات
رفع عينة الي عيونة تهتز بخوف واضح و ايدةضامهة ورة دشداشتة المسحوگة من گد اللبس مبين الدنيا لاعبة بحالة لعب
اشرتلة بأيدي على جهة الثانية من المحطة راح للتانكيات يدور يوصلني صوتة يسب و يشتم ويحجي ساعة بهمس يتوعدلهة
حركت ايدي بجيبي طلعت جكارة سحبت الموبايل وية الباكيت خليتة مشتغل و فتحت الباكيت خليت جكارة بحلگي
رجعلي بهمة و صوت مهزوز من الغضب:ويينهة وين شفتها ماكو هنا
دلهم: جانت هناك دورهة زين ماكو مكان ثاني تطلع منة عدا ذني البوابتين لگبالك
التفت محتار يدور ساعة يوگف تعبان لو يمسح على شعرة لو يفلت لسانة و يسب و يشتم بصوت عالي
دفر دبات المتكومة بجهة الحايط
وصلني صوت شهگتهة من مكانهة الوراي اشرتلة يجي تقرب نفخت دخان عواطفي رافضة الراح اسوي
دلهم: البنية تصير اختك
التفت لكل مكان هز راسة بدون جواب ايدة اليسرة بجيبة واضح لازم سجينة من القبضة الخشبية الطالعة
دلهم:تريــد تذبحها
تحركت ايدة بخوف لزم قبضة السجينة حجة مرتبك يضحك:شنو تحجي .. لا لا شلون اذبحهة اختي نزلت من سيارة و ضيعتها
دلهم:مو جنت تريد بانزين
رد بغضب:شعليك تحقق وياييي
دلهم:واضحة نيتك علة وجهك و بيدك سجينة
:ايي اذبحها اخلص من عارهة حتى اكدر ارفع عيني بعين الناس
دلهم:هناك تلگاهة بالجهة ذيج
باوعلي بتردد تحرك لحظات سمعت صوت صرختهة التفت شفتة شالهة من الگاع جراهة وراه قبضة ايدة
مدفونة بشعرها يسحبهة وراه
طلع اسمع صوت سبة الهة تبعتة ورة دقايق يدليني عليه صوت بجيهة نزل مشة لنهاية الشارع الترابي
بين البيوت الهياكل المفلشة
دخل لواحد منهن دفعها بغضب تكومت بالگاع راسهة نضرب بالكابوگ عاطت متكورة على نفسهة
حجة هو يفتر حولهة :اليوم اذبحج اغسل سمعتنة ادفنج هنا گبل لا تجيبين كسرة العين الي
طلع السجين رفع راسهة ايدة ترجف العرگ يصب خلاهة على رگبتهة تحركت خطوة بحذر اراقب تصرفاتة رجع عنها بخوف
كل ما يحاول ينفذ لبراسة يتراجع عنة اي واحد بمكانة ما راح يتجرأ مبين هو جبان من رجفتة گابلهة
كعد مخلي راسة بين اديه يتحسر
زحفت وصلت لرجلة حجت مرعوبة:سـ..سالم والله ما غلطـ..ت والله احلفلك بالله العظيم ماغلطت و روح ابوي انـ..ني ماغلطانة
ردة جان سطرة على وجهة خلاهة تشهگ تتكور على روحهة بزاوية الحايط طفيت الكامرة شغلت تسجيل
الصوت تردد بالبيت الفارغ
گام مفزوع سجينتة بيدة يتلفت :ياهو هناا اطلعع
ارتكيت على الحايط رفعتلة الموبايل توسعت عيونة
تقدم مني خطواتة راجفة و جسمة متوتر و مشدود
دلهم: تدري شنو حكم القتل العمد سجن أو اعدام اذا ما لزموك تصير هارب من العدلة تتخربط كل حياتك
توسعت عيونة رد بصوت راجف:ءء أ أ أعدام
هزيت راسي رفع اديه يفتر مخليهن على راسة بفزع مالگة طريقة ثانية ينفس بيهة عن خوفة غير بضربها
رفسهة مد ايدة يصفگهة و يسبها
درت عيوني بعيد عنة رجع قابلني يشرح حالة:شلون يعدموني هاي وصخت سمعتنة اريد اغسل عاري
دلهم: تكدر عشيرتك تدخل بس وكتها راح تنفضح تصير سيرتك على كل لسان
سالم:أنتتة شتـ..ريد شتريد منييي
تقدمت خطوة منة كفختني ريحة العرگ و التعب حجيت اقنعة: ماعندي شي بس اذا نكتلت هنا تطيح براسي لو طلعت ريحتها وانتة هنا قريب على البانزينخانة يجوز انجر بهاي البلوة سجلت برائتي
سالم: محد يدري .. محد يدري انتة روح اسكت هي هي هنا تموت محد يعرفها
دلهم:بيــعها
توسعت عيونة بصدمة رجع خطوة:شتـ..تكول
دلهم:اني اخذها ادفعلك عليهة هم تنستر وانتة تطلع بالسليم منهة شگلت
حجة مستعر يلزم ياخة قميصي:انتتتة اشايفني بدون مروة ابيييع اختييي
دلهم:اختك غلطانة راح تضطر تقتلهة تنظف سمعتك و تشيل ذنب موتها طول حياتك أشوفك انتة المستفاد اني اخذهة اعقد عليهة وانتة تاخذ فلوسك و الله وياك
سالم:البت غلطانة انتة شتـ..تسوي بيهة
دلهم: رجال فقير ماعندي أهل ولا ناس عايش لوحدي حالي حال اي شاب اريد اتزوج اشوفهة مناسبة استر اختك
باوعلي مقلص عيونة حجة كاره الفكرة: تتزوج وحدة بايعة شرفهة
دلهم: گتلك محد عندي اريد مرة اتسلى
كز على سنونة بقهر رجع الهة يكمل ضربة تقدمت دفعتة:راح تموت يمعودة وتطيح براسك
سالم:اختييي مابيعها اطلع منا معليك
دلهم: گتلك اعقد عليهة و بحضورك احسن ماتنفضح فكر عدل هاي الشرفيات ماتفيدك
صرت گبالة اخليهة بضهري :اسمع يابن الناس ليش توصخ ايدك اني موافق اخذهة نعقد بعد ماتشوف وجهة حتى لو رجعتلك محد راح يلومك اختك متزوجة تنستر و تندفن
سالم:شلون تتزوجهااا هي هـ..
دلهم:هي شنو ؟
مسح على وجهة هز راسة بنفي كعد محتار رفعت الموبايل الصبح راح يطلع أفتر يفكر مايكدر ينزل من روحة و يوافق و يخاف يموتها
دلهم:براحتك اني رايح اذا اجو سألوني لو حققو وياي اطلع الفيديو
تحركت عايفة مسافة مترتين هيج اجة وراي يركض التفت اسمع صوت خطواتة بيدة السجينة بنية قتلي
لزمت قبضة ايدة گبل لاتوصلني رفعت رجلي نبتت ركبتي بطنة عاط طاح متقلص على نفسة شهگت اختة الجانت تشوفنة من بعيد
اجت تركض لزمت جتفة تبجي:سـ..سالم فـ..دـ.
دخيلك لا تطگة عوفة عندة گلب مريض
رد يدفعهة بعيد عنة:وخررري يانجسة ياگ***" الله ياخذج كسرتي عيني الله ياخذج شسوي بيج شوفي وين خليتيني نزلتي راسي
دلهم: السجينة مالتك ماتذبح الافضل تطعنها بس هم راح تشيل ثمن دمها اني وين ما اشوف صورتها و خبر موتها اسلمك
التفت خطوتين جر رجلي يوگفني :اخذهة موافق اخذهة اعقد عليهة
ملت براسي لجهة اخفي ضحكتي على وضعة لو عندة شوية عقل جان حسبها هاي إذا ماتت واني جنت موجود و شهدت على الجريمة و مابلغت هم انعلس ويا شايل تهمتي بيدي
دلهم:تعال وراي
تحركت هو گام يجرهة اسمع همسها و توسلاتهة التفت من شافتني نصت راسهة سكتت دموعها تطيح على اديهة
دلهم:عدك سيارة
سالم:اي اي عندي
تحرك كدامي يجرها وراه عبرت من البانزينخانة اخذت اغراضي جانو الولد توهم واصلين ابوالشغل محضر مواويل يغنيهن على راسي تجاهلتة
مشيت ورة سالم صعدت بصفة اضحك بداخلي على عقليتة وصلنة للجامع گبل لا انزل فتحت المحفظة
شفت الفلوس البيهة التفت الة
دلهم: عندي بس سبعين
باوعلي وجهة عرگ من الخجل هز راسة بصمت نزل فتحت الباب نزلت وراه مد ايدة سحبهة ينزلهة رفضت عيونهة تتوسلة منحنية تبوس ايدة
شالهة يريد يضربهة تحركت بسرعة لزمتة:كافي عوفهة ساكتة لاتخلي الناس تنتبه الك
ابتعد رجع يجبرهة تنزل بلهجة قاسية و جلفة دخلت گدامة رتبت الوضع اكو سيد اعرفة كل ما اجي هنا يجي يصلي دخل اخوها هي بسدة
وگف يم السيد يحجي منصي راسة يمسح العرگ من گصتة كل شوية كعدت بصفة هي مدنگة كاعدة بالجهة ثانية اديهة ترجف و جسمهة كل ينتفض من مكانة بدون صوت
فهم السيد مشكلتة و تقبل الموضوع طلع أوراقة
و مستمسكاتة و سأل البنية هزت راسهة تأيد هذة اخوها لاماه هواي على ضربة الهة
سمعت حجة و مدحة الي هزيت راسي بأمتنان طلعت هويتي نطيتهة الة عرفة اخوها علية على ابو اني صديقة و من معارفة
سألهة بصوت هادئ عينة عليهة مرة مانطقت بيهة و بالثانية ردت بالموافقة من اخوها خلة ايدة على ظهرهة نكمشت على نفسها وحجت
التفت الي من أول ما سأل جاوبتة مبيت النية من هذة الزواج براسي ادري بي باطل لان هي مجبورة و اني لاعبة نيتي مو صافية
باركلنة طلعت هي ملزمة بأخوهة نتر ايدهة وگف بمسافة عن ساحة الجامع بعيد عن العيون باوعتلة بسخرية طلعت الفلوس خليتهن بطن ايدي
صافحتة نهزت ايدة بخجل دنگ مايخلي عينة بعيني
يتلافت صعد بسيارتة لزمت جامة السيارة اوگفة
دلهم:تندل البانزينخانة باجر بالعشرة تجيبلي بقية مستمسكاتهة حتى اخلي نسخة من العقد الشرعي عندك
هز راسة بفهم رفعت ايدي مشة التفت الهة مدنگة عاصرة عباتهة بين اديهة طايحة على جتفهة شعرهة الاحمر يدلي التايه
دلهم:غطي شعرج تعاي وراي
تحركت كل ضني هي وياي بطرف عيني لمحتهة واكفة بمكانهة كملت ماشي ارتبكت لحگتني بخوف
وصلت الشارع اجرت تكسي
فتحت الباب صعدتهة صعدت بصفهة نطيتة العنوان عدل المراية عيونة متشخصة علية و عليهة
اثار الضرب و العنف مرسومة على وجهة
:خوية على كيفك مايصير هيج تسوي وية اهلك ترة البشر مايجي بالضرب مو حلو..
دلهم:سوق وانتة ساكت لاتدخل
هز ايدة رد:لا حول لله الواحد شيحجي وياهم
وگفتة براس الشارع نزلت نطيتة كروتة مشيت سحبتهة وراي من ايدهة احس بيهة تجوي من الحرارة
دلهم: شعـرج غطي
غنوة:مـ..مغطيتة بـ..بس العباة تزلگ
فتحت الباب دخلت هي وراي وگفت بالمطبخ صرت
گبال المراية هي وراي اباوع لروحي شسويت شلعبت من طيح الله حظي على هذة العقل التالف
دلهم:اول غرفة على ايدج اليمنة ادخلي بيهة
تحركت سبقتهة بخطوات دخلت لغرفة الوشم ركيت راسي على الحديد البارد مال الباب صافن الهوة ثگل
بصدري
جانت لحظة مجرد ثانية من التسرّع فكرة طلعت مني بدون تخطيط بدون وعيشي طلع من لساني گبل حتى ما أفكر شنو تبعاته
وهســة
هي بالغرفة الثانيةاني وحدي هنا مصدوم ما فاهم شلون خليت روحي بهاي الصفقة الغبية
رفعت ايدي لوجهي افرك گصتي بقوة جني أكدر أمسح التفكير الزايد اللي بدأ يتكدس براسي بس ماينمسح ما يروح
عقدت عليهة جنت اريد استعملهة بس هسة يالله كلهة خلگ وحدة بايعة روحهة اعلمهة ادفعهة من شي نگرة لنعمان استغلهة
رفعت عيني للسگف زفرت انفاسي مبروك عليك دلهم أنت رسميًا أغبى واحد قرر يشتري مصيبة
سحبت الكرسي بتعب من السهر ركيت راسي عليه انام و الصبح تصفى من فزيت جان موبايلي بجيبي يدك رفعتة اتصال واحد من الولد لشتغل وياهم
حكيت راسي مسطور من الوجع فتحت الباب ما اشوف كدامي فتت للحمام غسلت الجهاز بعدة يرن
غيرت هدومي ادور على السويج
تذكرت مخلي الدراجة هناك اجرت سيارة نزلت يم المحطة لاگاني أحمد ولد گصير لوگي حجة يباوعلي بسخرية:المدير يريدك
مشيت لغرفة العاملين اخذت باقي اغراضي طلعت مغلس عنة ادري راح يطردني لو يريد اعتذر حتى مايسويهة اني مامحتاج اقدرة
شغلت الدراجة گبل تحركت احس الصداع يدك براسي جهازي يرن تجاهلتة كل ضني الولد من لح هواي طلعتة جان صفوان
دلهم:شعدك
صفوان:السلام لله ترة
دلهم:احجي صفوان ماعندي واهس اخذ و انطي وياك
صفوان: اكو شغلة لنعمان راح تصير هنا ماعرف اي تفاصيل راح ارسلك عنوان روح بالليل الجماعة المسؤليين هناك يجتمعون
دلهم: ماتگدر تروح بأتعابك
صفوان:اعذريني الخطيبة مريضة
دلهم:انعل ابوك لابو الخطيبة
ضحك قطعت الاتصال لان أسراء اتصلت بية تنرفزت من المكالمات رديت عليهة اجاني صوتهة مبحوح
أسراء:دلهم وين انتة
دلهم: طالع ليش بيج شي صوتج شبي
أسراء: بالمستشفى تگدر تمرلي
دلهم: اگدر بمنو داخلة ابنج لو انتي
أسراء:عصام نجلط
وگفت على صفحة لزمت الجهاز مصدوم رجعتة على أذني :شتحجين انتة
أسراء: تعال فدوة تعبت من الوگفة من البارحة اركض بي تحاليل و فحوصات حليل باد و خوانة محد منهم اجة
دلهم: هسة اجي ابنج وين خليتي
اسراء:يم جيرانة ماعليه بس تعال ضل وياي ما أدبرهة هنا هوسة ماكدر
دلهم:جايج
سديتة منهة رجعت للبيت بعجلة اخذت فلوس طلعت متوجه للمستشفى كل بالي يمة مايستاهل عصام خوش رجال بس دوم الدنيا عوجة ويا
وصلتلهة العيون ممرودة من البجي خلت راسهة على صدرة تحجي بقهر مسحت على راسهة كعدتهة
على جهة بعيد عن الزحمة
دلهم: اتصلي اسراء صعبة عليج اول ما طاح جان اتصلتي بية
أسراء:ما ردت ازاحمك گلت خاف عدك شغل
دلهم:انعل ابوالشغل گتلج من تحتاجين اتصلي اجي بأي وقت ترديني
أسراء:مادري عبالي مثل كل مرة ضغطة نوب طلبو تحاليل و سولة فحوصات گالو جلطة
دلهم:ان شاء الله تعدي استريحي هنا رايح اشوف الدكتور
ردت منصية راسهة بخجل :تكدر تجيب العلاج هذة ماكدرت اطلع
اخذت الوصفة منهة عرفتهة خجلانة تطلب فلوس ما حجيت كل همي يگعد بخير و سلامة ولا اشوف اسراء تبجي هيج
كملت الإجراءات و سألت عنة الحمدلله جلطة خفيفة اشتريت العلاج نقلتة لغرفة خاصة اخذت أسراء يمة طلعت من المستشفى
الشوارع تدور بية كد ما دايخ اخذتلهم غدة وصلتة الهة رجعت للبيت الساعة بالثنتين دخلت شمرت جهازي على الشحن اخذت ملابس فتت للحمام
وراهة توضيت و صليت دورت بالمحادثات محتاج فلوس لازم ادوري كم واحد اطكطكهم بوشم شي
وگفت ايدي على محادثة صفوان
غمضت عيوني بضوجة رديت على كم رسالة انتظرت للاربعة جنت متوجه للباب من طر بأذني صوت صرخة التفت مستغرب للباب
طلعت بنية تركض لزمت ايدي لبدت بسدي ضلت عيني عليهة توسعت بأدراك غبي شلون نسيتها عصرت ايدهة على زندي نبهتني
رفعت راسي لصفوان لطلع من الغرفة مبين دخل من الشباك مالتهة الي مخلي الة و يفتحة من برة
عيونة علية و عليها مستغرب و الباب بعدة يدك
سحبتها دفعتة عن الغرفة دخلتهة : لاتطلعين منا
سديت الباب التفت الة:روح للغرفة ذيج المفتاح فوك الباب
صفوان: والله عبالي دخلت لبيت ثاني شصاير عدك
دلهم:بعدين افهمك
فات للغرفة رحت للباب فتحتة ثنين زلم دخلتهم بلشت شغلي طكت رگبتي من كد ما دنگت بالي كلة
يم أسراء تأخرت عليهة
للغروب يالله خلصت الوشم الهم ثنينهم اخذت الفلوس رجعت باب الغرفة مفتوح واضح صفوان مل و مشة لوحدة
طلعت مستعجل بطريقي اخذت عشة لأسراء رجعتهة لبيتهة و بتت يم عصام ضجة المستشفى خلت الصداع يزيد براسي ماكدرت انام مرتاح
الصبح جبرت اخو عصام يضل يمة ورة ما فشلتة گبال گرايبة طلعت مريت على الطوارئ قست الضغط هبوط درجتين
طلعت متوجه للبيت جهاز على أذني اتصل بصفوان
حجيت اول مافتح : شعدك اجيتني امس
صفوان: ردت اروح وياك للگهوة طلعت عدك مشاغل احسن
دلهم: داخل وية عصام بالمستشفى بعد لاتجفت للبيت اتصل علية گبلهة
حجة بضحكة: منيلك بس گلي
دلهم:اسكت رحمة لهلك خلينة بالمهم
صفوان:المهم نعمان فتحلة مجمعات هنا الفخامة تقرة ألف و الاسعار برخص التراب
دلهم:غسيل
صفوان:اي عدة فلوس يريد يعبرهن
دلهم:بعد شعرفت
صفوان:هذة كل العدي بالليل نروح الهم نسير
دلهم: ياخوفي من تسيوراتك
صفوان: شعدي رجال مسكين مخطوب
دلهم: صارلك خمس سنوات مخطوب يمتة تتزوج
فتحت الباب الهوة عالي الجو بارد دخلت للبيت اسمع سوالف صفوان من گام يمسلت سديتة بوجهة
التفتت صارت عيني بعينها جفلت راجعة ليورة طاح منها كلاص الماي تبدة ارتكت على السنك من وجهة مبين دايخة مو متوازنة بوكفتها
دلهم:لمي الكزاز وأكل بالثلاجة اكلي الحمام خارجي اخذي الهدوم لمشرورات على الدرج لاتضلين هيج كلج تراب
هزت راسهة بفهم مشت وية مشيتي عيونهة ممرودة
من البجي وجهة مورم و شعرهة صاير كفشة كلهة تراب عباتهة على جتفهة
على ما شمرت اغراضي بالغرفة طلعت لگيتهة ماكو
غيرت هدومي بالصالة فتت للمطبخ غمضت عيوني
بضوجة اشوف الثلاجة فارغة عدا علاگة البصل
ناسيهة ولا ابالي طلعت اتمشى للمحل اشتريت لأريدة بالرجعة شفت سيارة طابگة باب بيتي استغربتها وصلت يمة
دلهم: محتاج شي
التفت مقلص عيونة:صَعب لو اني غلطان
دلهم:ماغلطان رايد شي
:وياك جَبر اريد وشم اجيتك كذا مرة ما فتحتلي الباب
مريت منة افتح الباب ما عاجبني جيتة التفت عيوني تقيمة شاب يجي بنفس عمري عضلات و نفخ مبين من ذولة أهل الجم و الحديد
دلهم: مافتحتة لان ماريد اوشم الك
جَبر: ليش انتة توشم على مزاجك
دلهم:جا على مزاج الخلفوك
عمار:شگد ساقط هي هاي اخلاق مهنة
دلهم: محد مودي عليك حبيبي
عمار:هسة شنو ماتدخلني
طبگت الباب مامهتم لو الي خلق جان كتلتة دخلت ادور عليهة كاعدة بمكانهة لافة روحهة بالغطة رجعت للمطبخ خليت الطاوة طگيت البيض سويت جاي كعدت اكلت عزلت الهة
اريد بس اخلي راسي على مخدة و اغفى شوية شمرتهة بالصالة تمددت هدوء البيت و البرد دنيا مغيمة ماكو ضوة قوي يجبر اكبر واحد ينام
تنهدت بضوجة اسمع اسمي يتردد بهمس فزيت من خلت ايدهة على جتفي رفعت راسي مسطور سطر من النوم گامت تعصر بأديهة
حجت بأرتباك :البـ..الباب الباب يدك اكو واحد برة
دلهم:خيولي
التفت وراهة صوت دك عالي رجعت عينهة علية رفعت موبايلي اذا اسراء تدخل و صفوان يجي من الشباك كتلة اتصل ما دام مو ذولة الثنين ما افتحة
دلهم:عسى مايدگ لباجر بس تگعديني اشمرج للشارع امشي من كدامي
درت وجهي عنهة من بدت تبجي رجعت اكمل نومتي توة راسي صفى حسيت بأيدهة على جتفي
حجت هي تحركني:دخـ..يلك اگـ.گعد الـ..ـدنيا تـ..مطر هو خـ..ـطي بعدة يدك بالباب
ألف شيطان ركب راسي بهاي اللحظة صوتهة مستفز
تحجي كل حرفين سوة جريتهة من زندهة فتحت باب المطبخ دفعتهة سديتة رجعت كملت نومتي
لحد ما اتصل علية صفوان گمت غسلت وجهي لبست البوت طلعتلة بعدهة دنيا تصب مطر الجو اضلم من الغيم الساعة بالسبعة
صعدت بسيارته انكث بشعري من الماي حجة يسد الجام : تروح مو نگعد شكم ساعة نشوف شنو وضعهم
دلهم: متأكد المجمع لنعمان
رضوان: متأكد بس الاصول مو الة لأبنة
دلهم:المهم من محيطة
التفت للشوارع اغلبهة فارغة طلعت جهازي اتصلت على أسراء تطمنت هي بيتهة و اخوان عصام هناك يمة سديتة احس وضعي مخربط راسي مايهدئ
طبگ السيارة على جهة نزلت امشي وراه الطين يوصل للراس اول ما دخلنة الدربونة كفختني ريحة
الفحم و الزيت المحترك و اصوات ضحك و هوسة
رضوان:هنا وين الداگة الضيم يجي امثالي مو امثالك ابو الدراهم
دلهم:طگني الضيم لحد ما خلاني اعض الگاع شتريد مني هسة
رضوان:متعافي انتة وحق الله تركضلك ورة جلب سايب يجي يوم و يموت
دلهم:مو گبل ما اضوگة المر اطلع دم حاتم من عيونة
رضوان:حاتم الله يرحمة اخوك محد جبرة
دلهم:رضووان لاتطلع اعذار انتة ما فاهم كلشي لا تبرر لنعمان و كليشتة
هز راسة مامقتنع حجية خلة الهوة يثگل بصدري المكان شگد ما جان ضيگ ضاگ اكثر دخلت وراه
اخذنة طاولة بين الزحمة ريحة الدخان و العرگ مخلوطة بريحة الاكل خلت راسي يفتر
رضوان:متعشي
دلهم: على هاي القذارة ماريد افك حلگي و احجي مو نوب اكل
رد بضحكة:نتحمل ابوالدراهم
ضلينة طول الوكت ساكتين لحد ما لمح ثنين شباب دخلو عگدت حواجبي عرفتة اشرت لرضوان نبدل مكاناتنة كعدت بمكانة نطيتة ظهري
حجة بهمس:شكو لمحت عرف
دلهم:اي هذا الولد اليوم الصبح شفتة يريد اوشملة
رضوان: اني طشيت اسمك هنا بلكي عدهم هيج اهتمامات
دلهم:عفية عليك اجيت بية ليجاي شبيك بوية مسودن
رضوان: خليك بالمفيد
دلهم:اگطع المفيد على راسك هسة
دنگت اخفي وجهي عنة ضليت اسمع لسوالفهم طولو يالله حجو بأشياء تفيد سحبت الباكيت طشرت الجكاير فتحتة كتبت على الكارتون عناوين و اسماء و ارقام ماريد يفوتني شي
رضوان: عرفتة المجمع مو الة بس واضح غسيل يم السايلون من تعبرة جنك رايح اول ماتدخل المدينة هناك بدو يخططون لمطعم
دلهم: ليش مشروعين بنفس المحافظة
رضوان: هذة الماعرفتة لو صدك يستفادون منة لو مشاريع عادية فرعية لأولادة
دلهم: اشمرلك عامل بناء يم موقع المطعم و..
حرك راسة بشنو اشرتلة يسكت لان همة فجأة سكتو
توقعتهم لو يصنتون علينة لو انتبهو لشي ملت رگبتي بعيد عنهم اشر لرضوان خمس دقايق و نطلع
فترة رجعو يحجون بس غيرو الموضوع تأكدت شكو
فتحنة هواي مواضيع عادية كلهة جذب نجيب و نسفط لحد ما خلصن الدقايق
طلعنة متجنبين طاولتهم اخذت جهازي رغم تسجل مشوش بس اذا ركزت اگدر الگط كذا معلومة منة
رضوان: تجي اعشيك
دلهم:ورة هاي الجيفة لخليتني اشمهة ما اشتهي العسل
رضوان: تعود يجوز تنسجن
دلهم: ليش انسجن كاتل الگ***" ال****" امك
طگاهة بضحكة باوعتلة متعجب من شخصيتة التافهة صعدت بالسيارة نترست طين من احذيتنة
وصلني للبيت مشة دخلت الهوة عالي يحرك الباب يهزة من مكانة دخلت للبيت اخذت هدوم اريد اطلع للحمام تذكرتها فتت للغرفة ماكو
شمرتهن طلعت برة اشوفهة طايحة بركن الحايط يم الحديقة سحبتهة مغشي عليهة بس النفس بطيء
استغفرالله هذة ليجيب بلوة لروحة نوب فاهية
شلتهة احس بعضامهة من كد الضعف دخلتهة للصالة ضربتهة على خدهة لحد ما صحصحت وجهة ثلج اطروف اديهة زرگ
گمت جبت ماي حار نزعت التشيرت ابللة ادفي بي اديهة ووجهة لحد ما رخت و رجع شوية اللون الهة
شلون غبية باب المطبخ مفتوح مادخلت
دلهم: افتحي عينج انتهي وياي
عگدت حواجبهة تغيرت ملامحهة سدت هلگهة نهضت بسرعة ركضت برة من مكاني اسمعهة تتقيء شمرت التشيرت بقرف لعبت حتى روحي
رجعت جسمها يرجف مستندة على الباب عيونهة تايهة راحت نظفت الحوش ضلت واكفة بالباب الماي يصب من عباتهة لمتروسة طين
شلت المدة شمرتهة على الدرج توصخت دخلت للغرفة اسب بعقلي و بروحي على خاي البلوة جان ماتت مادري بيهة طلعت هدوم رجعتلهة
دلهم:روحي للحمام كاسري الماي مو تدخلين فجأة جواه هاج هاي لهدوم لبسيهن
مدت ايدهة ترجف دموعهة تسبق حركتهة منحنية لازمة خاصرتهة وجهة اصفر من البرد سنونها تطكطك صوتهن واضح
طلعت للحمام فتحت الثلاجة تأففت طلعت موبايلي
دورت هواي يالله لگيت مطعم يوصل بهيج وكت
باوعت من الشباك اشوف باب الحمام بعدة مسدود
اكو سقيفة فوك الباب بس المسافة لبينة و بين باب المطبخ مفتوحة المطر بعدة ينزل
شلت الديباج من الگاع طلعت انتظرتهة لحد ما فتحت الباب شهگت عيونهة متوسعة تباوعلي بخوف
بخار الماي تارس الحمام شعرها لازگ على وجهة لابسة تشيرتي يوصل لنهاية رگبتهة جواه التراك مبهذلة بيهن مدت ايدهة ترجف رفعت القماش فوك متونهة غمضت عيوني اسب بعقلي لنجر لغير سالفة
دلهم:طلعي شبيج نزرعتي بمكانج
قدمت رجلهة بخوف بس طلعت لفيتهة بالديباج اغطيهة عن البرد مانطيتهة مجال شلتهة دخلتهة للبيت احس برجفتهة صوت بجيهة
خليتهة بالغرفة رجعت اخذت ملابسي فتت احاول اشغل بالي عنهة خليت الماي يصب فوك راسي يذوب افكاري
راحت عيني لهدومهة لجانت لابستهن كملت غسلت الملابس علگتهن بالحمام لا اكو غسالة ولا الجو يساعد اشرهن بي
طلعت ما تأخرت منتظر ابو التوصيل لحد ما اتصل فتحت الباب المطر صار اخف حتى جو مو نفس برودتة دفعتلة فلوس اخذت الاكل
وگفت بالباب عيني على اخر اتصالين ترددت هواي يالله راسلتة گتلة يجيني باجر الصبح خل استفاد منة
دخلت للبيت اتاگد من البيبان مسدودة خليت الهة الاكل فتحت الباب فزت بخوف لمت روحهة لنهاية الغرفة تجر بالغطة عليهة
دلهم: اكلي و علاجات بالثلاجة اشربيهن براسيتول و شراب خافض حرارة
مانطت اجابة عدة البجي ماتشبع منة عفتهة ماتدخلت بعدني قصص وروايات عراقية كرار صلاح محتار شسوي بيهة ما استسيغ
كعدتها هنا من اتذكر بايعة روحهة ولا عندي فكرة شلون ادخلهة بشغلة تفيدني
مرن اربع أيام بين روحاتي للمستشفى علمود عصام
و طلعتي بالليل وية رضوان نحاول نكون علاقات جنت ناوي اتقرب من جَبر بس ما اجة من راسلتة
بسبب رضوان و افكارة الفاشلة صار هواي يجون لبيتي اكره ليحي بدون ما ينطي خبر جهزت الادوات
طلعت لاگتني بباب المطبخ يوم عن يوم تصير اتعس من الگبلة من شكلهة يگول طفلة لو ما شفت مواليدها 2002 هسة داخلة العشرين بالغة بس تبين اصغر بهواي
تذكرت اخوها گتلة يجيب لي اوراقها غلس الگ***" اني اعلمة سهيت بأفكاري عنها هي بعدهة متقلصة بخوف واكفة بمكانهة
دلهم: لاتطلعين منا للعشرة ضلي بالغرفة
هزت راسهة بفهم اخير شفت منهة شي غير البجي
اشرتلهة تدخل من ندك الباب رحت فتحتة قابلوني
اربع زلم من شكلهم زايعتهم الگاع
اشرتلهم يدخلون كل خطوة اسب رضوان لورطني بديت اوشم الاشكال ليردونهة بدون خلگ صوت سوالفهم اعلى من صوت افكاري
الشي الزين ما اعترضو على السعر دفعو همة ساكتين و طلعو وگفت عيني على محادثتني وية أسراء تطلع عندي تكتب ماكو ما ترسل شي
دلهم"شتردين أسراء گولي"
سديت الباب اقرة برسالة"عدك فلوس من يرجع عصام يشتعل يرجعهن"
دلهم" بالليل امر عليج اجيبهن"
أسراء"اذا ماعندك لو محتاجهن گول"
دلهم"شسوي بيهن "
ضلت تتشكر اكره هاي سوالفهة عفتهة تحجي لوحدهة بس اخلي اوكي ورة كل رسالة تمشيت للمحل اشتريت كذا شغلة ناقصة و بطالة ماي
رجعت للبيت خليتهن بالثلاجة خابرت ولد اعرفة بلكي يرجعوني لشغلي ادري هيج فترة دوامات اغلب ليشتغلون يبطلون
لليل طلعت رايح لأسراء اعدل بالكلاو على راسي دنيا تذب ثلج وصلت لبيتهم من الباب اسمع عمتهة تصيح دگيتة اكثر من مرة يالله سمعوه فتحت الباب
حجت متوترة:هلة دلهم شلونك
دلهم:زين انتم شلونكم عصام شلون صار
أسراء:احسن من گبل تفضل
دلهم: لا عندي شغل اريد اروح
حضنت راسهة لصدري بوستهة خليت الفلوس بالفراغات الي بين الحايط نصت راسهة خجلانة تضم اديهة بردانهة
دلهم: دخلت للمحل شفت الككو لتحبينة گلت امر عليج
ردت تاخذة من ايدي:شكد قديم هذة وين لگيتة
دلهم: موجود يالله فوتي الجو بارد عليج
حجت ترفع عيونهة بقلة حيلة:ماعرف شلون اشكرك
دلهم: عوفي الرسمية على جهة مابينة يالله من رخصتج تأخرت
أسراء:الله وياك
رجعت للبيت منتظر الولد يرد علية اذا اكدر ارجع أشتغل وياهم التهيت وية رضوان نحاول نوصل لثغرة لو شي يخلينة نبدي نتحرك بأتجاه نعمان
ورة اسبوعين خابرتني أسراء عازمتني على عشة بثواب حاتم اليوم ذكرة وفاتة رفضت اروح كعدت بالغرفة ضايع بأفكاري
هذة اليوم دمرني خلة بية ندوب اكثر مما تتوقع أسراء ماكدر انساه يحفر بذاكرتي هدم البيت كلة فوك راسي نهة احلام و دمر أمنيات
گعدت بالمطبخ العصر الجو مغيم و بارد خنگة و النفس گوة يمر بريتي فتحت باكيت الجكاير ضلن ثنين شعلت وحدة اباوع لضواهة الخافت
گمت ما طايق البيت طلعت برة الهوة بارد يكفخ وجهي ياريتة يبرد گلبي كلشي رجعلي جنة شريط فلم
دخلت للغرفة اخذت اي ورق كدامي بس اريد اشغل روحي بأي شي اباوع لأيدي مابيهة مساحة اخلي وشم جديد خليتة برجلي نغزات الابرة تنبهني و تطلعني من افكاري ندك باب الغرفة
دلهم :تــعايي
فتحت الباب شوية حجت مدنگة:الباب الباـ..ب يدك الولد بـ..برة يصيـ..ـح اسمك
باوعت لشاشة الموبايل عصام يتصل شمرت المكينة بس لا أسراء اجت گمت حجيت ادفعهة للغرفة
دلهم:قفلي الباب لاتطلعين لحد ما أكلج
دخلت بدون صوت سمعت القفل نسد طلعت امسح ادية من الحبر فتحت الباب صار بوجهي بس عصام
سلم مد العلاليگ البيدة جايب عشة تشكرت منة اخذتة مشة باوعتلهن بيدي بضوجة
دخلت للبيت خليتهن فوك السنك رحت دگيت باب الغرفة فتحتة لازمة الحايط اديهة ترجف وجهة يوم عن يوم يبهت اكثر من الگبلة
دلهم: عشة بالمطبخ اكلي
ردت بأرتباك:وأـ.أنتة
دلهم:معليج بية
مرت مني رايحة للمطبخ عيني على مشيتهة بيهة خلل توقعتها تعرج مثل أسراء بس لا اكو فرق بينهن
يجوز من الكتل الماكلتة وجهة ازرگ
ضليت افتر بالبيت لا الي خلق اطلع و گابل الناس لا كعدة البيت تخلي افكاري تصحة دورت على الباكيت بالغرفة مالگيتة رحت للمطبخ دنكت اخذتة
مديت ايدي بجيبي على الجداحة ماكو اخذت الجكارة اشعلهة من الطباخ بطرف عيني اباوعلهة واكفة بجهة الباب مدنگة عاصرة ملابسهة
رمشت انفاسي احسهة ثگلت عفت الجكارة على الطباخ زفرت نفسي اطرد الشيطان من راسي بس البيت ضاگ علية اريد افرغ هذة القهر البية
لمست شعرهة بأطراف ايدي نزت رجعت خطوة ليورة رفعت راسهة عيونهة مورمة نظراتهة ملمس جلدهة كلة حفزني ناحيتهة
صوت بجيهة يرن بأذني كلامهة المتقطع جنت اراقب كلشي ونگلب القهر لبداخلي لرغبة اريد افرغهة حركتها و توسلهة يوصلني و گلبي مايحسة
ايدي وصلت لخدهة و رحت احس بملمس جلدهة على شفتي الدم حار يجري بشرايني و جلدهة صار يلسع ساعة تدفعني ساعة تصرخ
ايدي لتفت على بطنهة ظهرهة على صدري عطرهة ترس ريتي مدري الشيطان جَملي كلشي بيهة صار يسلب حواسي و عقلي
دفعتهة مصدوم من غرابة جسمها طاحت بالگاع متكورة على روحهة صوت بجيهة ترس البيت اباوع لأدية عيوني متوسعة
صدري يصعد و ينزل ألهث اطلع من قوقعة الرغبة لحالة ادراك ترجعلي حالتهة بهاي الايام شلون غريبة و حركتهة و شكلهة
تقربت عاطت متكورة على روحهة بزاوية الحايط ضامة راسهة بين اديهة اريد اجذب لحسيتة
دلهم: أنتــي حامل
عقلي ماتقبل الفكرة حسيت نفضة حارة تعبر جلدي اشوف عيونها الزرگ من جوة اديهة متوسعة مفزوعة تباوعلي برعب
ضليت متجمد بمكاني عقلي يضغط علية بالافكار اني متندم على الغباء لخلاني اعقد عليهة مو نوب حامل ماكدر لا اشيل مسؤليتها لا اني هيج خير احتويهة
جنت اريد اطلگهة اعلمهة شكم شغلة و ادفعهة بشي مكان تفيدني هي بايعة روحهة ماتفرق عدهة
حسيت الغضب تجمع كلة على راسي
دلهم:احجيييي كافييي تنوحيين
حشگت روحهة يم الحايط اديهة على راسهة زاد بجيهة حجت مرعوبة:لا… لا والله… والله ما بيه شي…
عصرت ادية اتذكر ملمس بطنهة :هاي شنو… بطنج…
اجة براسي حجي اخوهة گبل لانعقد جان يريد يحجي شي بس تراجع و ارتبك غبي شلون ماركزت
گعدت كارهة روحي مشمأزة من شوفتهة صارلهة اسبوعين محنطة روحهة بالعباة مصدعة ببجيهة
تقربت يمهة بجت نرفزتني عطت اسكتها جفلت خلت اديهة على حلگهة تضم صوتهة عني
دلهم:منو الحامل منة تعرفينة اقاربكم ، احد معتدي عليج واحد من اهلج متقرب عليج ماتكدرين تعترفين انتي لاعبة بحالج هيج گولي
هزت راسهة بنفي سحبتهة من زندهة:كاافي بجي ردي فهميني السالفة كلهة لا والله اطلگج هسة و اشمرج للشارع خاف ذاك اليوم ضليتي بالحوش
ردت برجفة:مـ..مادري ماعرف والله والقرءان الكريم محد محد يجيني ماعرف زلم بس بس جنت مريضة مرت مرت اخوي جابت القابلة علياء گالت حـ..حامل اني والله مو هيج
دلهم: رحتي للدكتورة سولج فحوصات و تحاليل
هزت راسهة بنفي:لا ... سـ..سالم گالي گالي اخذج و هو هو راد يذبحني اخذني من البيـ.. البيت يذبحني
دلهم: گومي البسي غسلي وجهج نروح للدكتورة قسم بالله ولخقلج اذا حامل مناك اشمرج و ارجع لاخوج اخلي سيرتة على كل لسان گوميييي
فزت ترجف عفتهة دمي محترگ غيرت هدومي اخذت اغراضي رجعت اخذتهة قفلت الباب مشينة
لازمهة من زندهة احس برجفتهة
ما أثرت بية من كد ما متقرف من حالهة اجرت سيارة مشينة للعيادات الطبية نزلتهة رحت حجزت
گعدت على جهة من البيت للعيادة هي على نفس البجية كلهة تباوعلهة
دلهم:شش كافي لا اكفر بيج صوتتج نصي لاتبجين
تكتفت واكف كدامهة الممر متروس نسوان مقابلة عيادة لدكتور جلدية صايرة خلط زلم و نسوان رفعت ايدي نزلت عباتهة لمتهة على روحهة مدنگة
ساعة تجر ساعة احنة متأخرين أذن و خلص و عبر الوقت يالله صاحو بأسمهة گمت هي بيدي امشيهة
حجت السكرتيرة تعترض:رجاءا بس المريضة الدكتورة ماترضة يدخل احد وياهة
دلهم:خرسة ماتفهم عليهة دكتورتج
باوعت الهة ضغطت زندهة دنگت ما حجت فتحت الباب دخلتهة كعدت گبال الدكتورة لعافت كلشي بيدهة رفعت راسهة الي حجيتلهة شكم شغلة لاحضتهن سألتهة عن حالهة هي عاصرة اديهة سوة ماترد
دكتورة:تعاي على السدية حبيبتي نسوي فحص نشوف شنو الوضع
رفعت عينهة الي اشرتلهة تروح گمت على جهة احسب الساعات جان عدي يقين قوي هاي حامل
ماراح اتردد بطلاگهة
ضلت عيني مثبتة على وجهة الدكتورة كل ثانية تمر تعبس ملامحهة اكثر اخذت كلنس مسحت بطنهة رجعت فحصت من جديد
حجت ترفع عينهة الي : ماكو صوت نبض جنين ولا شكلة كيس حمل البطن منتفخ بس مو انتفاخ حمل طبيعي
دلهم:يعني شنو شبيهة
دكتورة:اكو هواي أورام تتشكل بالبطن منهة حميدة و خبيثة نحتاج تحاليل حتى نتأكد
گامت حجيهة مايدخل عقلي كملت تگعد بمكانهة :البنية مامتزوجة مو ؟
هزيت راسي بطئ أيدهة رجعت عيونهة الهة بشفقة ردت : واضح ضاربينهة هي مو حامل هذة ورم،
غالباً تيراتوما ورم حميد يتكون من أنسجة مختلفة لازم نسوي تحاليل دم وصورة مقطعية حتى نثبت بالسونار يطلع اشبه بالجنين أحياناً يحتوي على شعر و اسنان كتل دهنية فالبعض يشخصونة كيس حمل يحتاج وعي طبي عالي بدون تسرع
دلهم:هسة شلون نعالجة
سحبت ورقة كتبت بيهة اسماء تحاليل مدتهة: سويلي ذني التحاليل بعدين نحجي بالحالة
اشرتلهة تگوم عدلت عباتهة طلعت وياي ساكتة وجهة فارغ مغيبة و مصدومة اني عقلي مفتر وياهة
نزلنة للمختبرات سوينة التحاليل گعدت على جهة عاصرة رجليهة عرفتهة بعد ماتكدر تمشي وگفت گبالهة ساعة تجر ساعة
لحد ماطلعن التحاليل اخذنهن رجعنة للدكتورة حجت تنزلهن من ايدهة :الورم حميد بس اذا ضل اكثر تتأذة منة لان هو ينمو يسببلهة مشاكل هواي راح اكتبلهة مسكنات نحدد وقت لعملية نستأصلة
دلهم: بأقرب وقت خليهة
دكتور:بعد يومين تجوني للمستشفى
هزيت راسي احس بغمامة سودة تبخرت من عيني نظرتي الهة اختلفت ماكدر انكر هذة الشي شما حاولت
كملنة طلعنة راجعين للبيت بس دخلت الحوش كعدت بالگاع تبجي عفتهة دخلت جوة اشرد من افكاري استندت على المغسلة
لو شوية منجر ورة شيطاني جان شلت ذنبهة رفعت راسي للمراية صدري ضاگ من هذة الحمل لجبتة لروحي البت اهلهة ضالمينهة واجيت كملت عليهة
رفعت راسي من دخلت تمسح بدموعها عفتهة ورة فعلتي اليوم العصر اكيد بعد ما تأمن بكعدتهة يمي
دخلت للغرفة بايدي جهازي اراسل برضوان
الفجر اجة جابلي فلوس ما سأل شسوي بيهن ما نطيتة مجال يحجي ضليت سهران عيني ماخذت
نوم لحد التسعة طلعت اشتغل اي شي حصلتة
مرت يومين كاره دخلة البيت أسراء رادت تجيني اعتذرت منها بحجة صديقي يمي ذني اليومين
بيوم العملية طلعنة متوجهين للمستشفى بطرف عيني اراقبهة من الخوف جسمهة كلة يرعش رجعت عيني للطريق لحد ماوكفت السيارة كبال المستشفى
كملت اوراقهة و الإجراءات كعدت برة لو ما معارفي مامشت سالفة عمليتهة اخوها الگ***" غلس ما رجع رغم خليت يمة رقمي حتى يتصل
دخلت لصالة العمليات كعدت برة منتظرهة اباوع للناس لتمر للوجه ريحة المعقمات و هوسة المستشفى تدك براسي تضغط على اعصابي
ورة ساعتين طلعت الدكتورة وگفت بمسافة عن الغرفة لحد ما وصلت يمي حجت بهدوء: الحمدلله استأصلنة الورم حجم كبير بس العملية صارت بسلاسة
تنهدت بضيق تشكرت منهة انتظرت لحد ماطلعوهة من العمليات لغرفة ثانية بعدهة بالبنج استغليت هذة الوقت طلعت من المستشفى اشتريت لتحتاجة
رجعت كاره روحي و الدنيا طالعة من عيني دخلت للغرفة هي بعدهة ما مصحصحة من البنج تحجي هواي دموعهة تنزل من عينهة للمخدة
مر الليل احس بيهة واعية نطوها علاجات بس ما حجت متعود على صوت بجيهة هالمرة ساكتة عفتهة مو اني الاعرف اواسي
ثاني يوم للعصر يالله سجلولهة خروج كملت اواقهة
رجعت للغرفة سديت الباب وگفت كدامهة الهدوم بعدهة على الجرباية ماتكدر تتحرك
شفتهة نكمشت على روحها بخوف صحت لوحدة من الممرضات ساعدتهة رجعت اخذت ايدهة مستندة علية طلعنة من المستشفى
اجرت سيارة رجعنة للبيت دخلتهة للغرفة تمددت شمرت الادوية على الميز التفت اطلع حسيت بلمسة ايدهة على ايدي توگفني
حجت منصية راسهة :شـ.. شكراً
ضاگ صدري فلتت ايدهة طلعت مليت من كد ما لمت روحي لان تورطت بيهة البنية مابيهة شي اني جان عندي افكار اشمرهة لنعمان و استغلهة
فركت وجهي بضيق مادري بيهة اخوها الگ***" اني اعلمة الة اكسر ايدة بس خل اندل مكانة ال***"
شمرت هدومي طلعت للحمام الدنيا تمطر خفيف الشتة السنة شاد حيلة كملت طلعت اخذت اغراضي
رحت للاسواق اشتريت لأحتاجة
رجعت سويتلهة اكل دگيت الباب فتحتة برجلي نزلت عيونهة ضامة روحهة بالغطة بعدتة سويت مكان بصفهة باوعتلي بخوف بردت الشوربة رفعت الخاشوگة الهة مدنگة ماترفع راسهة مللتني
دلهم: رفعي راسج
غنوة:ءء أنا أكـ..اكل اكل
خليتة بيدهة فزت من حرارة الماعون شلتة اباوع لجفهة صار احمر سكتت اكلت من ايدي مثل الشاطرة علمتها على العلاجات ضل بس تنظيف العملية شرحتلهة بلكي تفهم
بديت اشتغل فترة بمطعم خلصت يومين ماعجبني
هواي يمسلتون كرهت الاكل من كد ما اوكف و اشوف الناس تاكل عفتة رجعت لشغلي القديم
دخلت للبيت خليت الغراض على الكاونتر اسمع صوت بجي من الغرفة غلست عنهة علاجاتهة موجودة أكل و اسويلهة
غيرت فتت للمطبخ مديت ايدي بجيبي طلعت الباكيت ورثت جكارة اسمع البصمة من صفوان
فتحت الثلاجة فارغة
التفتت من لمحتهة اجت تفاجئت بية دنگت منحنية
طلعت برة لزمت زندهة اباوع لأيدهة بجهة العملية طابعة دم واضح من التشيرت الابيض
دلهم:تنظفين العملية
دنگت ماردت نفضت ايدهة حتى ترفع راسهة حجيت بضوجة: ردي اختنگ من تسكتين
غنوة:مـ..ماگدر ماگدرت
دلهم:ليش ما حجيتي
غنوة: ءء أ ستحيت
تنهدت مديت ايدي رجعت ليورة بخوف ثبتتهة رفعت التشيرت شفت دم ناشف و قليل منة بعدة جديد دنگت دموعها تطيح على خدهة
دلهم:تعاي
سحبتها من زندهة وهي انتفضت بخوف هزت راسهة: والله آسفة… والله… ما گدرت مابية شي مايوجع لاتضربني فدوة
دلهم:محد يضربج على شنو عمليتج تلتهب امشي كدامي ننظفها
غنوة:مـ..ماتضربني
دلهم:لا
مشت گدامي منحنية ماسكتت عفية شكد عدهة خلگ للبجي دخلتهة للغرفة فتحت علاگة الادوية بعدهة الزگات مثل ما اشتريتهة هاي الفترة كلهة بنفس اللزكة تنهدت ضاگ خلگي
دلهم:تمددي
غنوة:ءء أ أني أسوي
دلهم:ما سويتي گبل
سكتت دنگت عيونهة تباوع لزاوية الغرفة تمسح بدموعها دفعتهة بهدوء من جتفهة تمددت وجهة نصبغ أحمر اديهة يرجفن
اني ارفع التشيرت هي تنزلة شلت الغطة خليتة فوك رجليهة خزرتهة بضوجة ضمت وجهة بين اديهة خلتني صافن شبيهة هاي البت
هزيت ايدي رفعت التشيرت وضحت الي العملية شلون اللزگة تالفة عدلت گعدتي اول ماسحبت منها شوية شهگت تبجي
دلهم: استغفرالله كاافي كافي بجي
ردت تمسح دموعها:اي اي بس بس توجع
دلهم:تحملي اذا بجيتي اشعل اهلج الگ***'
دنگت عاصرة التشيرت لزمت ايدهة :لاتنزلينة راح اصفگج راشدي
غنوة:مـ..مو مو فشلة
دلهم:ششش
نلصمت من الخوف صمت حلگهة بيدهة شلعت اللزكة و نظفت العملية مسحت الدم و عقمتهة خليت وحدة ثانية شمرت الگطن على الميز
دلهم:علاجج تشربينة
غنوة:ءء اي أشرب
سحبت العلاگة كم شريط باقي بي حباية لو حبايتين
طلعتهن من الباكيتات شمرتهن بالعلاگة و اخذت الباكيت باجر اشتري مثلة
دلهم: تاكلين لو هم ماتگدرين
غنوة:اكلت والله و شربت ماي
درت وجهي عنهة تشگ الگلب بالفهاوة گمت لزمت ايدي استغفرت احس بملمس ايدهة البارد علية
غنوة:تـ..ترجعني لهلي
دلهم: اي صيري زينة و اوديج
غنوة:مـ..ما اضل هنا
التفت الهة متنرفز:المنن ضااالة
نزت عيونهة غوگت دفعت ايدهة اسمع صوت موبايلي يدك من برة دنگت الم الگطن و الهوسة
دلهم: اني ماكدر اشيل مسؤليتج شفتيني شكد مهمل بهاي الايام جان ابالي شي هسة ماريدة الافضل ترجعين
غنوة:مـا يصدگ مايصدگوني سالم يذبحني
دلهم:اني احجي ويا حتى لو ادفعلة فلوس
غنوة:تشتريني من اهلي و تبيعني عليهم
دلهم: هذة الحل عدج غيرة
هزت راسهة بنفي طلعت للصالة اخذت الموبايل رفضت اتصال أسراء رجعت مديتة الهة باوعتلي صافنة على وجهي
دلهم:اكتبي لتحتاجينة اشتري الج ملابسي اي شي
غنوة:مـ.ماعرف
دلهم:ماتعرفين تكتبين
هزت راسهة زفرت نفسي وين جانت عايشة هاي خليت الموبايل بجيبي اباوعلهة ليش أسأل هي كلشي مبين محتاجتة
صبيت غدة خليتة يمهة رجعت للمطبخ تغديت
وطلعت للسوگ كلشي يلاگيني اشتري بدون تعين لا قياسات بطريق الرجعة صادفت يوسف دگلي هورن
وگفت على جهة هو بسيارتة حجة ينزل الجامة: شسالفة دلهم مانشوفك وين
دلهم:شغل
يوسف: دمرلي على الكهوة الليلة عازمك على استكان جاي
دلهم:اذا فرغت ماطلعتلي شغلة
يوسف: براحتك خابرني اذا ماتطلع
هزيت راسي تحرك هو جان واكف ساد الشارع تنهدت اكره روحة الكهوة جنت اروح على حساب جلال الي من اشوف يوسف اتذكرة و اختنگ
رجعت للبيت خليت دخلت للغرفة اشوفهة نايمة خليت الغراض قريب يمهة شلت الغطة عليهة
فزت نهضت بدون وعي لزمت جتفهة عگدت وجهة بخوف
دلهم: رجعي نامي ماكو شي غطيتج
مدت ايدهة ترفع التشيرت طبعات الضرب و التعنيف مبينة زرگة على بنفسجية عيونهة غايرة و جهة شوية متحسن عن گبل رغم التعب
أسراء: دلــهم وينك
التفت للباب من سمعت صوت أسراء نترت ايدهة مستغرب جيتهة شتسوي هنا المن اجت بدون ماتگلي التفت
شكرا لزيارتكم عالم روايات سكيرهوم
