رواية نقش بارد الفصل الثالث 3 بقلم فدك فاطمه

وچنت أخَاف يصّيرلي الصايِرلي هَسة .

.

.

غنــوة 

وگف بالباب عيونة علية اشرلي بهدوء اصبعة على شفتة يگلي اسكتي صوت البنية بعدة اسمعة عدلت الغطة علية ضليت ساكتة وگفت بالباب سادة 

حجة بجدية:ليش اجيتي مو گتلج صديقي بالبيت

اسراء: ماعبالي هلكد ضال اجيت اشوفك 

دلهم:تعاي للمطبخ

ابتعد صوتهم صرت ما أسمعة رجعت راسي للمخدة البجي ما فارگني من يوم لنجريت بي ورة سالم 

نحكم علية بجريمة مامسويتهة ولا اعرف شلون نخليت بيهة فجأة لگيت حياتي متدمرة اكثر من گبل

مسحت دموعي بضيف مر الوقت اني حبيسة افكاري

كل ماتذكر شي تزيد الغصة و صدري يختنگ بي الهوة لميت الغطة علية كل ساع ينغزني الجرح

مرت لحظات باب الغرفة انفتح رفعت عيوني دخل 

يباوعلي بنظرات لا هي قسوة لا حنية رغم هو مايهتم بس ماكدر انكر موقفة من صدگني 

دخل من شفتة اقترب رجعتلي خوفتي من ذاك اليوم 

لميت الغطة علية ابتعدت لطرف الجرباية گعد مخلي اديه على ركبتة يضغط عليهن

حجة بدون مايباوعلي : اعتذر منج على الموقف گبل العملية 

دنگت ماعندي رد اعصر بأصابعي محد يعرف شكد خفت منة بوقتها شلون گلبي جمد من الرعب هواي صرخت جان قريب علية ما سمعني نشف دمي 

دلهم:تضلين فترة على ما تتشافة العملية و اتواصل وية اخوج ترجعين 

بلعت ريگي گلبي صار مثل الطبل رجفت شفتي بخوف اجة ابالي كل الضرب و الذل و صوت سالم و 

اخوي علوان همة محتارين بية يردون يذبحوني

رفعت عيوني الة بلكي يغير رأية مايرجعني 

غنوة:محد يصدگني اذا اجع يذبحوني شگللهم شلون 

دلهم:مشگلتج مو مشكلتي العلية سويتة راح ارجعج نظيفة لبيتكم ماتحمل مسوؤلية فوك الشايلة

غنوة:اذا طلگتني بعد شراح أسوي ماراح يرضون راح أتبهذل 

حجة هو يوگف: لاتكبرين الموضوع مو اول وحدة تطلگ انتي اخذي هاي الفترة استراحة وراهة كل واحد يروح لطريقة

غنوة:ليش تزوجتني اذا ماتكدر تشيل مسؤلية

رد بجرأة: احتاجيت بنية اتونس بيهة محد يسأل عنها

                                            

              

                    

الحجي تحجر بلعومي عيوني توسعت بصدمة الدم بجسمي صار حار من الخجل دنگت گلبي يرجف احس نبضاتة بكل جسمي تدك شلون يحجي هيج 

حسيت بي طلع و سد الباب ضليت بمكاني فكرة تجيبني فكرة توديني ما أجذب اذا اگول أرعب من الموت الطلاگ و الرجعة

عدنة بالقرية عيب البنية تطلگ بت جيرانة من تطلگت الناس حجت هواي عليهة و اهلهة بس طلعت العدة زوجوهة بواحد عدة هواي نسوان

غمضت عيوني اتذكر الصار وياي اختنگ بعدني خايفة و جسمي يرعش اذاني يصير بيهة صوت طنين قوي من الرعب و حجم الكلمة السمعتهة

جنت عايشة بقرية بالاطراف عيشة بسيطة اخواني ثنين سالم يشتغل بالسوك يبيع مخضر و علوان عامل بناء ثنينهم متزوجين عدهم جهال

ابوي متوفي من زمان گبل ولادتي بأربع أشهر و أمي

نرجس التقت بأبوي من سافر لأيران هي إيرانية بت

صديق جدي و تزوجو هي ما جانت صغيرة رجعت 

ويا للعراق سنة و نص و توفة جان اخوي سالم 

متزوج و مرتة صفية أمي من ولدتني توفة ابوها راحت لأيران اني صغيرة ورة ولادتي بأربع أشهر بعد 

بسبب الوضع ماكدرت ترجع مرت سنوات ما حصلو خبر منها ولا من اهلهة ضليت ببيت ابوي و ربتني مرت اخوي صفية 

وعيت من حبل افكاري على صوت الأذان وخرت الغطة نزلت من الجرباية گمت منحنية اخاف ارفع 

نفسي و العملية توجعني و گالي ملتهبة خايفة يطلع دم منهة مثل ذاك اليوم

طلعت من الغرفة مستندة بأيدي على الحايط اسمع صوت من المطبخ بطرف عيني شفتة واكف يسوي 

عشة الجو أظلم حتى البيت بي ضوة قليل من الغرفة

بيدي علاگة ماشفت الملابس لشتراهن بس اخذتهن 

مريت منة رايحة للحمام جو بارد خاصة الغروب دخلت رديت الباب رفعت الفانيلة مني متوجعة 

نزعت ملابسة الجانن علية واني واكفة غسلتهن 

خليتهن على جهة گدرت اغسل شعري و امسح جسمي اخاف لا الماي يلهب الجرح هو بي دفو يوجعني فتحت العلاگة حصرتني البجية من الخجل

طلعت الملابس الداخليه جنت محتاجة بس استحي

مايوم اشتريت لو طلبتهن مرت اخوي تشتري هسة 

تمنيت اختفي دموعي ترست عيوني لبستهن بگلبي

ادعيلة حتى لو نيتة جانت مو زينة بس هو صدگني 

اهلي بسرعة اتهموني شكد حلفت و بجيت صفية ما صدگت هواي طعنت بية گالت لسالم اسبوع خلوني

اتمنى الموت دعاوي و شتايم و ضرب تسودنت 

حلفت بكلشي محد رضى يصدگ اني ماعندي شي 

طلعت الفانيلة زرگة وياهة بجامة بلونة گوة لبستهة ماكدر ادنگ ضليت احوس بالحمام ضيگات ما البس 

هيج الفانيلة اردانهة گصار ضليت بالحمام اوصل للباب و ارجع تندمت ما جبت عباتي وياي 

سمعت صوت دراجة اشتغلت كيفت مبين طلع فتحت باب الحمام اباوع ماشفت دراجتة بالحوش

            

              

                    

طلعت امشي بخطوات سريعة تذكرت الملابس 

رجعت عصرتهن احتاريت وين اشرهن هنة مبللات

نشفتهن من الماي حيل شگد ما أكد اخذتهن شريتهن على الدرج التفت ارجع للغرفة صار گبالي

طالع من وحدة من الغرف شهگت ضامة وجهي عنة

بأدية ادري بي يشوفني على الاقل اني ما اشوفة 

مشيت للغرفة سديت الباب اعصر بأدية نغزات من العملية توجعني من الحركةاخذت العباة من الگاع

لفيت بيهة روحي گعدت خايفة لا يسوي بية مثل ذاك اليوم حتى من صاح اذا اريد عشة ما رديت عليه

اسحب بالبجامة بلكي تعرض لفيت شعري نمت من الخوف گعدت على صوت قوي رفعت راسي ظلمة

حتى ضوة من الشارع ماكو عرفتهة الكهرباء طافية

صوت المطر يضرب الشباك قوي صوت الرعد

أبتسمت اتذكر حسن ابن اخوي كل ما يجي الشتة يضم روحة جوة غطاي مايدري بية اخاف اكثر منة

اغالب خوفي و اگوم من تصيحني صفية اخلي سطول لو جداري بأي مكان يخر من جهة السگف 

بالشتة حتى لو نخلي نايلون يضل اكو مكان ينگط مرات يطير من الهوة و محد يصعد فوك يخافون لان 

ترعد واحد من القرية طگتة رعيدة مات صرنة نخاف اتحمل الگعدة بالليل ادور على نگاط الماي

مسحت دموعي صوتي طلع بدون وعي خليت ايدي على حلگي خايفة شلونهم هسة هم يفكرون بية هم 

واحد سأل عني غسق مرت علوان ماذكرتني صفية ربتني بس ولا مرة حنت علية مثل غسق دوم تكتلني

فزيت على طگة الباب القوية واحد يدك بقوة شفت 

ضوة اشتعل خطف من الباب وراهة سمعت صوت 

رجال و صوتة هو يحجي كل شوية الصوت يصير اقرب مبين اكو لايت عدة الغرفة صار بيهة ضوة

شفت بس ايدة مداهة سد باب الغرفة النايمة بيهة سمعت طكة القفل ضليت اتصنت لصوتهم و 

سوالفهم ما افتهم شيگولون صوتهم ناصي مرات الرعد يصير اقوة منة بطني توجعني و العملية تصل

ماشربت العلاج لان ماتعشيت مر هواي وگت يالله 

حسيت بصوتهم ماكو جنت مامركزة وياهم طكة 

قفل الباب من انفتح وعتني من صفنتي گمت لابسة

عباتي تسحل وراي طلعت من الغرفة البيت اضلم

بيدي اتلمس الحايط لزمت أطار باب المطبخ دفعت ايدي خاف مسدود صارت على شي حسيتة مو الباب

فجأة صار ضوة خفيف على وجهي توسعت عيوني

هو گبالي مدنگ لطولي شايل موبايلة يضوي بالشاشة على وجهي بلعت ريگي ايدي على صدرة

اصتكيت بمكاني من الخوف ضل واكف ماتحرك ولا حجة شغل ضوة الفلاش اخذ ايدي رفعهة من صدرة

خلة الموبايل بجفي ضواه صارت على وجهة

            

              

                    

دلهم: عشاج بالثلاجة 

عيوني عليه ابالع من الهبطة مر مني راح جوة للغرفة استندت على الباب ايدي ترجف و الموبايل 

يتحرك وياهة دخلت للمطبخ خليتة على الكاونتر

امسح على وجهي عرگت من اتذكر شلون لمستة

فتحت الثلاجة ابعد افكاري بطني كلش توجعني حرارة بيهة من الجوع اخذت الطاوة فوگهة ماعون 

مغطيه بي رفعتة طماطمة تگلاه اخذت خبز ماكدر اكعد خليتهن على الكاونتر وگفت أكل كملت اخذت

ماي رجعت للغرفة شربت العلاج جهاز بعدة بيدي 

مشيت لغرفتة دگيت الباب اعصر بأدية مستحية

اجاني صوتة من الغرفة:تعاي

فتحت الباب حجيت واكفة يم العتبه:هذة الموبايل مالتك 

مد ايدة جان متمدد بالگاع غضيت بصري ما اباوعلة هو نايم بدون تشيرت مديت ايدي خليتة بأيدة بسرعة ابتعدت اضم ايدي جوة الردان مشيت اطلع 

وگفني صوتة من گال:شربي علاجج

غنوة: اكلت و شربتة

دلهم:بعد لاتفوتين وقتة 

هزيت راسي طلعت شاردة خايفة منة بعد الصار ما جنت ضانة يسوي شي بية ورة ما عافني و تطمنت

نوب لزمني شكلة و تصرفاتة جانت تخوف 

گعدت على الجرباية رفعت رجلية بوجع تمددت سحبت الغطة فوگي عيني على الشباك صوت المطر يرجع الي ايام هواي ما احبها ماحب الشتة

تلمست بطني بخوف رجعت ذاكرتي للصار وياي 

فترة گبل لا تكشف علية القابلة جنت احس وجع ببطني ينزل ليجوة مثل النغزات و ظهري يوجعني

ما خليت ابالي شي مرت ايام و الوجع صار واضح ماكدر انكرة بيومها گالت صفية اطلع الزوالي 

اغسلهن مديتهن بالحوش شغلت الماطور ضليت اغسل بيهن ايدي راحت هنة كبار و ثگال 

خلصت وحدة گمت اريد الفهة ظهري شكل وجع قوي ببطني نحنيت ابجي حسيت الگاع افترت بية

گعدت على الطابوگة لازمة بطني ايد مخليتهة عن الشمس القوية و تضرب على راسي

طلعت صفية شافتني حجت بعصبية:گاعدة المسعدة و الزلية تنغسل وحدهة گومي جبح لهل العيون

بلعت الغصة امسح دموعي گمت اعصر بثوبي من الوجع لفيت الزلية الخلصتهة الله هداهة اجت ساعدتني رفعناهة على الحايط حتى تيبس بالشمس 

لهثت تعبانة رجعت كملتهن هي كاعدة بالمطبخ يم الباب كدامهة طاسة و علاگة البانية تقلم بيهة نفتح 

الباب دخلت غسق توهة جاية من السوك وراهة علوان اول ما شافني منگعة بالحوش زمخ علية 

اعدل ثوبي عدلتة نزلتة على رجلية يسحل من الماي 

جان عدي فضول اشوف غسق شجابت من السوك

            

              

                    

هي و صفية اسمع حجيهن من المطبخ كملت صحتهن شالن الزوليات يشرنهن دخلت للبيت اعصر

بثوبي من الماي نفضتة اباوع لعلاگة المسواك

صفية:امشي بدلي ثوبج تعاي حطي المرگة على النار راح يأذن و الغدة بعدة

غسق:جا انتي وين جنتي توج كعدتي 

صفية:غسلت السطح خاف تطك الكهرباء ننام فوك غير كلة ورگ من شجرة بيت حاتم 

رحت للغرفة مخليتهن يسولفن صفية تجذب اني لميت الفرشات من السطح و غسلتة بس اخاف 

احجي تجويني لو تمعش شعري لبست دشادشتي 

طلعت سويت الغدة صبيناه مر وكت الظهر كلة

جنت متمددة بغرفة ابوي القديمة بيهة غراضهم أنام بيهة اني و حسن و عبيس اتگلب على الفراش 

من وجع كلة من ورة غسلة الزوالي حسيت بروحي

مبهوتة و گصتي عرگانة گلت هاي ضربة شمس

سوت غسق العشة كعدنة ناكل بس اني الگاع تفتر بية ورة العشة صاحتني نطتني علاگة اخذتهة 

خجلانة رحت للغرفة جايبتلي شغلات نسائية راحت

ابتسامتي اتذكر الدورة ما جايتني صار هواي 

اني و غسق بينة يوم هي اجتها و خلصت اني ماكو 

عصرت بطني خايفة شتت افكاري كيفت مفتكة 

منهة مرن أيام خلص الشهر اجة الوراه روحي مخلوبة من الخوف وجع بطني يزيد علية 

البس ثياب عريضة من اتلمس بطني احس شي صلب جوة الجلد جنت خايفة احجي و استحي اگل 

لغسق عيب ضليت كاتمة بگلبي متحملة الوجع بس گلبي ينعصر من يحي ابالي خاف بية خبيث مثل عمة صفية الصار بيهة و ماتت ماتلاحگوهة

گمت ماكدر امشي صرت انحني على كيف بس عيون البنات وراي يباوعلي و يتهامسن لحد ما بليل 

صاحتني غسق سألتني عن الدورة گتلهة جايتني سكتت رجعت للغرفة جسمي كلة يرجف و ايدي

گعدت ورة الباب ادك على رجلي خايفة دموعي تصب زاد علية الدوخة و لعبان الروح بس معدتي تگلب بين فترة و فترة جهة بطني اتلمسهة منتفخة

لحد ما اجة اليوم المصيبة الطاحت علية جنت كاعدة الگط تمن اريد اسوي الغدة سمعت الباب 

ندك طلعت صفية تلف شالهة على راسهة فتحتة

اسمعها تهلي و ترحب بأم لطيف قابلة تجيب النسوان مرات تسير على صفية و غسق 

گمت غصباً علية خليت القوري على النار توني سويتة لجهال يتريگون على ما يحمة طلعت الماي 

البارد درتة بالصلاحية النايلون الحمرة و طلعت الكلاص مشيت سلمت عليهن مديتلهة الماي 

حجت صفية تسحب ايدي: روحي سدي الباب تعاي هنا يمي 

هزيت راسي بدون اعتراض خايفة من نظراتهة رحت سديت البيبان ثنينهن رجعت يمهة عدلت المخدة 

            

              

                    

بصفهة اشرتلي اتمدد بلعت ريگي وجهي حسيتة

صار اصفر من الخوف تمددت گلبي يدك حيل 

مدت ايدهة تتلمس بطني عصرت ثوبي بين اصابعي

عيوني تصب دموع تطيح على الخدة من الوجع هي

ايدهة خشنة و تفحص بقسوة ماكدرت اخفي شهگاتي كل ما ضغطت على جهة يم بطني افز بوجع

لحد ما رفعت ايدهة طگتهة على رجلهة حجت عينهة على صفية:خية بتكم حبلة 

توسعت عيوني مبهوتة صفية ضحكت تهز ايدهة ندستهة على رجلهة :دخيل بختج شني كبرتي ماتعرفين علة النسوان 

ردت عليهة تسحب ايدهة:دتعاي شوفي بطنها اذا هذة مو فرغ اتفلي بگصتي شوفي 

حسيت الدنيا كلهة افترت بية من تغير وجهة صفية نرسمت ملامح الصدمة و الفزع على وجهة لطمت على خدهة ترك بطني بأيدهة الثانية و مامصدگة

حجت تصفگني على ايدي:ولج صدگ هذة الحجي غنيوة

فزيت برعب اغطي روحي اهز براسي:لا .. لا والله صفية لا مو مو حبلة والله طحت اي من كنست الحوش طحت

ام لطيف: خية شني جا لتطيح هيج دشوفيهة وجهة اصفر و بطنهة كبرانة العمة يگول هاي البت حبلة الله يبعد عنة و يستر بنياتنة 

جسمي كلة انتفض بصدمة و رعب اهز راسي ما اشوف من الدموع و راسي نسطر اسمع صوت صفية 

تولول و تتوسل بيهة ماتحجي ولا تفضحنة هي تحلفلهة ما تگول طلعت رجعتلي صفية 

زحفت لزمت ايدهة احبهة اتوسل : والله و روح ابوي و رحمتة احب ايدج صدگيني انة مو حبلة

نفضت ايدي تفتر بالغرفة تدك على رجلهة فتحت الباب صاحت:ولج غسيقة ولج تعاي خية لحگينة ولججج

اجت غسق تركض شالهة بيهة :شبييجن اسم الله شكو

ردت عليهة تدك على خدهة :البت حبلة ولج البت حبلة

غسق:ياهي ياهي

صفية:غنيوة حبلة 

باوعتلي بصدمة التفت الهة:صخام الصخمني شني هذة الحجي ولج

صفية:شگول و شحجي ولج توهة طلعت المرة تگول بتكم حبلة وين اننطي وجوهنة من العالم تعااي تعااي شوفي

جرتهة دفعتني تريدهة تشوف بطني اباوعلهن برجفة جسمي يختص برعب احلف و اتوسل هنة مايسمعن يفترن حوالي يدعن و يشتمني و يلطمن

كل شوية تجي صفية تلطم وجهي لو تطگني على راسي گلبي نخمش صرخت برعب من خابرت علوان

گطعت روحي ابجي و احلف مابية شي سمعت حجي

اخجل حتى ارد عليه تيهت شلون احجي 

صوتهن كافي يزرع الرعب بية بالك بجية علوان و سالم حسيت بروحي انتهيت ريگي جف ماكدر حتى 

ابلع گاعدة بنص الهول رجلي ماتعيني اگوم لساني نشل روحي راحت من سمعت طگة الباب نفتح

تلگنهم يحجن وياهم بتوسل علوان من الباب طفر علية طگاني طحت للگاع تكورت على روحي هو 

            

              

                    

يسحب رجلية من بطني كل ضربة احس الروح تنسحب مني اصرخ بوجع صم حلگي بجف ايدة

يحجي مفجوع من السمعة يسألني منو السوة بية هيج ماكدرت حتى احجي تعاونو علية ثنينهم واحد 

يسب و يشتم و ثاني يطگ جسمي خدر صار نار من الالم و وجهي ماكدر المسة حتى لو خليت ايدي

عليه ماكدر احس من الخدر انتهيت ساعة اغمض و 

ساعة افز على كفخة كل ما عصبو يجون يكتلوني 

ضليت مشمورة بالغرفة ماكو على لساني غير الحلفان اني مامسوية شي ولا ادري شنو البية

من العشرة الصبح لحد ثاني يوم مغيبة من المصيبة الصرت بيهة كل شوية انكر و اصدگ صرت حتى اني 

اشك بروحي ماعرف شنو قصدهم بس كلشي تجمع 

براسي اي نظرة بيوم اجتني من رجال صرت اشك و انفجع من افكاري و أتهامهم الي بالعيب

من طلع الضوة دخلت غسق تلوم بية تحجي شربتني ماي تتوسل اعترف ياهو الكاسرني و مسوي هيج 

الغصة تحجرت بلعومي ماعرف شتريدني احجي

طلعت تدك على رجليهة بحسرة و قهر

العصر رجعو جابو القابلة هم فحصتني باوعتلهة بكسرة و توسل نظراتهة اتهام و لوم نفس الحجي 

عادتة گالتلهم حبلة علوان من الباب ركض الي

سحلني و طگ راسي بالحايط عيوني صارت بهامتي

گوة طلعوه كعدت الدم احسة يمشي على علباتي جوة شعري يدخل لثوبي عيوني جفت من البجي 

ادعي بگلب مرعوب و مكسورة ماعرف شلون افسر البية ضربت بطني بجزع كل ما احس بوجعهة 

لليل صاحني سالم گالتلي صفية ياخذج للدكتورة 

دعيت كون صدك براسي اتمنى تگلهم غير السمعتة

ما طالعة من البيت ولا مرة نولدت و كبرت بين هاي

الحياطين لا بعيد ولا مجالس حتى المناسبات و الاعراس اسمع بيهن بس ما رايحة 

طلعت عيني على الشارع ماشوف عيوني مورمة قليل اكدر المح شي ظلمة بس ضوة المحلات يمر

صوت سيارة سالم مختلط بصوتة هو يذمني و يشتمني يدعي علية كل ما عصب مد ايدة كفخني

بلعت ريگي اشوف الشوارع فرغت البيوت صارت بعيدة الضوة راح ضل بس ضوة السيارة عصرت 

بطني اطمن روحي هو سالم طالع و يندل گال 

رايحين للمستشفى يارب كون يطلع بية مثل مرض عمة صفية ولا يگلولة حبلة و ناس تفضحني

وعيت من افكاري على وگفة السيارة جراني يسحلني وراه گاع تراب يمشي بسرعة يحجي وية روحة 

ماشوف كدامي بس احس بالتراب يطب بين اصابعي من النعال و عباتي تسحل وراي ماكدر اتحرك

كلشي صار خلة روحي تنتهي كابوس لفني و غطى الخوف علية من شفت سجينتة بجيب الدشادشة 

            

              

                    

تلمع من يمر بيهة ضوة دفعني طحت على وجهي

زحفت مرعوبة هو بيدة موبايلة يخابر بعلوان

من حجية مبين علوان مايدري بي ماخذني زحفت ليورة شديت على عباتي ركضت اتعثر اسمع صياحة

رجعت للشارع و سيارات قليلة تمر بس ثنين خطفن

اني اركض فحطانة شفت من بعيد ضوة خفيف 

بناية مكشوفة بس حياطين طبيت اتلفت خايفة من بعيد شفت ضل رجال واكف منطيني ظهرة تحركت

بدون شوف سحگت على بطل فارغ طلع صوت 

ركضت شمرت روحي ورة تانكي صامة حلگي 

سمعت صوت بعيد اعرفة صوت سالم نخمش گلبي 

املخ بشعري و خدودي من الخوف ادعي و ابجي

فلتت شهگتي نرعبت ضغطت ادية على حلگي 

رفعت عيوني من حسيت بضل فوگي ضوة صار علية لساني نعگد عقلي تشتت بين الواكف گبالي

وبين صوت سالم اليحجي بهمس و نتر و عصبية

تحرك الرجال خليت ايدي على گلبي اسمعة يسولف وية سالم ادعي كون يخلي يروح مايذبحني تمنيت 

يگلة شبية وذاك ينصحة اتخيل يگلة هيج بيهة وصل بية الخوف اتمنى بگلبي سوالف ما يعقلهة البشر 

خاب كلشي وانتهى من گالة ورة التانكيات جنت منتظرة يجيني استسلمت لموتي فزيت من گالة 

ماكو رجع يسولف عليه رجع الكابوس وايد سالم 

نمدت سحبتني من شعري سحلني وراه 

نرسم خط النهاية براسي رفعت ايدي اتلمس نحري منتظرة الذبح صار الماعقلتة رجع نفسة الولد يهدم 

أمالي و يبني غيرهن و يهدمهن اتمرجح بين خلاصي و موتي اسمع سوالفة هو و سالم فزيت من ضربة

ادري بأخوي گلبة تعبان بدون وعي فزيت خايفة لايموت و يضلون جهالة گلبي ماينطيني اتمنى غير 

شي عليه بس هو جان اقسى باعني و رخصني دفن 

روحي شمرني لطريق ماعرف عنة خلاني بضياعي

وعــيت من هاي الذكرة لتحفر براسي مادري شسوي من الدنيا سدت كل بيبانهة گبالي ضليت 

مشمورة بوجع روحي و جسمي نفتحلي باب مامحسبتلة طلعني من هذة الذنب و الكسرة رجعلي

احساسي القديم و نظرني لروحي لوثوهة و خلوني حتى اني اصدگ هسة ارجع لنفس العذاب شفت 

منهم وجع محد يحملة كسرو خاطري و رخصوني

عشت طول عمري ما اشتكي محرومة من كلشي

شلت الغطة فوك راسي حتى ابجي براحتي هنا يالله عرفت طعم البجي جنت كاتمتة بصدري كل السنين

كل لحظات الوجع و كسرة الخاطر جنت ابلعهة اذا 

بجيت كلهة تحجي علية يسألوني شعدي و شضامة 

فزيت على ضوة الشمس صار على وجهي صوت الطيور من برة يزقزفن مسحت وجهي تحركت عاضة

شفتي من الوجع لنغزني ارتكيت على الميز و گمت

سحبت عباتي خليتهة على متني شالي غاسلتة

            

              

                    

مشيت للمغسلة رشگت ماي دافي خلاني اخمل و انعس بالزايد سديتة تنفست براحة اشم ريحة 

التراب المبلل من مطر البارحة الجو شوية اظلم بعدهة الغيوم بالسمة باب المطبخ مفتوح 

نسمة الهوة الباردة تدخل للبيت رجفت امسح على

ادية رحت للمطبخ القوري على العين الصغيرة و 

النار منقصة لاخر شي جواه عليتهة مستغربة وينة

فتحت الثلاجة ماكو ريوگ كل مرة الگة بيض لو جبن

سمعت صوت دراجة وراهة الباب نفتح لميت عبايتي علية من دخل درت وجهي امشي خايفة 

جني احمي روحي منة واني كاعدة ببيتة وهم ماريد اروح شكد محيرة بأفكاري و ضايعة بنص الخوف

ضليت بالغرفة لحد ما سمعت صوتة گالي تعاي تريگي انتظرت شوية و طلعت لگيتة ماكو مالة 

صوت كعدت بالمطبخ فتحت العلاگة بيهة صمون و الطاوة مغطاية مسوي بيض و هم بصفهة جبن

عفت الطاوة اخذت الجبن خليت بنص الصمونة صبيت جاي بعدة حار كعدت تريگت بعدهة طلعت

للحوش اشم ريحة الگاع براحة سحبت الكرسي طلعتة برة كعدت صافنة على السمة و افكاري 

غمضت عيوني اتذكر يمتة اخر مرة هيج كعدت براحة بيت اهلي كلة شغل صفية ماتخليني اگعد

حتى شغل البيت اذا تسوي غسق تطلعلي غير شغلة

بالليل جهالهن يمي ينامون ابتسمت شكد احبهم

رغم اهلي يضوجوني بس حسن و عباس احبهم بلعت ريگي امسح دمعتي حسيت بضل فوك مني

فتحت عيوني شفتة مر دخل للبيت فزيت بسرعة

مادري بي ماسمعت صوت دراجتة گمت اتلفت

دخلت للمطبخ اباوع بحذر سحبت العباة من الباب

لبستهة بطني خبطت من الخوف ماريدة يشوفني

هيج رجعت للغرفة ضليت اتصفن بالحياطين 

لليل صاحني للعشة بس بنتر و عصبية خوفتني

اخذت عشاي للغرفة اكلت گالي لاتطلعين ضليت 

اسمع سوالف زلم وصوت غريب صار هواي اسمعة

هنا ماعرفة شنو ، شربت علاجي لازمة طروف الغطة

اسحب بالخيوط الزغار اطلعهن الفهن على ايدي

نفتح الباب دخل رداه وراه فزيت لامة الغطة علية

حجة يفتح العلاگة : بدلتي اللزگة

هزيت راسي جذب ما مبدلتهة لان توجعني اخاف من انحني هيج توجعني اذا اوگف گبال المراية ما الوح هي صايرة جوة الصرة خط طويل و تنغز

باوعلي بيدة وحدة من اللزگات حجة: من تجذبين حضري لجذبتج مو بس حجي هنة نفسهن ماناقصات وحدة

سكتت دايرة عيوني احس وجهي گب من الفشلة گعد بصفي نهبطت گلبي صعد لبلعومي غمضت

عيوني حيل حسيت بأيدة فوك الغطة سحبة من ايدي شمرة لفحني الهوة فتحت عيوني ادفعة

            

              

                    

غنوة:ءء اني أسويها والله باجر بـ..

سكتت من باوعلي بسخرية و نظراتة مال وحدة طاگة روحة بهاي اللحظة طفت الكهرباء بجيت 

خايفة حسيتة گام سحبت الغطة بسرعة علية 

مامهتمة لا للوجع ولا للعملية اريد بس اضم روحي

حسيت بضوة صار على وجهي فتحت اشوفة لازم الموبايل خلاه على الميز رجع گعد بمكانة بيدة گطن فتح الجيس مالتة و الديتول خلاهن على لميز

دلهم: ابدل اللزكة و اروح كافي تبجين 

غنوة:اني ابدلهة والله بس روح

دلهم: كافيي

عضيت شفتي ساكتة غمضت عيوني حيل عاصرة جفني حسيت ايدة نمدت طخت بطني ثبتني روحي 

راحت من الخوف سحبهة ماطلعت صوت ولا وگفتة

اريد بس يخليهة و يروح حسيت بحرگة الديتول من خلاه و ملمس الگطن على جلدي وراهة خلة اللزكة

زفرت براحة صار الغطة علية وصلني صوتة يحجي بجدية:لاتتحركين هواي انتبهي زين

هزيت راسي رجعتلي روحي من مشة سد الباب وراه

صارت الغرفة ظلمة هاي اهون من كعدتة هنا 

غطيت روحي اهفي على وجهي حريت من المستحة

ثاني مرة جمعت شجاعتي سديت الباب گلت اني ابدلهة ورة العملية من حاولت طلع دم صارت بية 

خوفة لا تنفتح هم مشمأزة من منظرهة هسة كلهة تهون بس لا يجي يمي و يشوفها 

سحبت اللزكة و نضفتها اضحك فرحانة ذبيت القديمة براحة من سألني و گتلة بدلتهة ماصدگ 

حتى من شتف اللزگات گالي ماخذة وحدة منهن وشامرتهة اني ما اجذب حلفت هم ماصدگ

ضوجني و نقهرت نزيت من مد خزرني وگفت مصتكة و خايفة مد ايدة وخر العباة جنت متغطية بيهة عصرت طروفها بأدية مدنگة ما اباوعلة 

بأصابعة الثنين لزم طرف التشيرت رفعة شاف اللزكة مبين جديدة لان ذيج طروفها صارت صفرة

هاي لا بعدهة عضيت شفتي من قرب بس بسرعة 

عاف تشيرتي مشة ما رجع باوعلي طبگ الباب قوي

مر ايام تصرفاتة نگلبت صرت اخاف منة بالزايد كلة نتر و حجي يجرح الغصة تخنگني ماكدر ارد عليه 

هو ما يعايرني ولا يجيب سيرة اهلي حجية العادي 

بس اسلوبة مو حلو يزامخ نظراتة تحسسني بثگلي

جنت كاعدة بالغرفة تكرر الصوت صرت اسمعة هواي طول الاسبوعين الفاتن محبوسة بالغرفة

بس وكت العشة و الغدة اطلع اسمع صوت زلم من برة مرة وحدة طلعت للشارع من رحنة نفك الخياط 

رجعت لنفس الروتين و البيت مايفرغ ماكدر اطلع لو الظهر او بالليل بس الفترة بالسبعة الصبح و 

الستة اكدر اطلع جان الجو بارد ثلج شفت روحي صرت زينة اخذت ملابس و العباة اريد اغسلهة

طلعت مصتكة من البرودة وصلت الحمام سن يطك

بسن سديت الباب فتحت الماي الحار ذبيت هدومي

            

              

                    

دخلت جواه رخن عضلاتي بدفو سبحت سبحة من العمر غسلت شعري لفيتة ذبيت ماي علية اخذت

العباة نشفت بيهة وراهة غسلتهة هي و هدومي اخذت تراكة و الفانيلة من الباب غسلتهن هم طلعت

ارجف شريتهن الهوة يحرك بيهن باردة يمتة ينشفن

دخلت سديت الباب وراي رحت للغرفة حليت شعري دورت على المشط ماكو افتريت الهول كلة 

فوك الثلاجة أيست الگاه لفيت شعري سحبت الترواكة من الدرج مترددة بردانة اخذتهة لبستهة

گلت اذا اسمع صوتة كعد انزعها احسن ما احصل زمخة فتحت الثلاجة طلعت الريوگ و خليت الجاي

على النار وگفت انتظرة يفور كمل صبيت الي تريكت

رفعت راسي من دخل للمطبخ توسعت عيوني اشوفة بدون ملابس بس الشورت تمنيت اطم روحي

ردت اشلع عيوني و اشمرهن بالمجرة ولا اباوعلة

طفرت عايفة كلشي ركضت للغرفة بطني تشنجت

شكد عيب ضميت وجهي بين ادية افتر ساعة اگعد

نوب اگوم من يرجع شكلة براسي بلعت ريگي هيست اكو لگمة بعدهة بحلگي نسيتها من الموقف

بلعتها كعدت على الجرباية بعدني النفس ما ردلي فتح الباب جمدت ايدي ضليت ساكتة همزين لابس

حجة بدون اهتمام:الترواكة

رمشت مستغربة:هـ..ها

دلهم:الترواكة جيبيها

نهضت امشي بأتجاهة اهز براسي لزمني رجعني لمكاني تفطنت بيهة علية دنگت متفشلة جراهة من 

جتفي نزعت الردانات اخذهة لبسهة متنگع الظهر

من شعري جان بعدة رطب عصرت اصابعي بيدي 

طلع ما حجة شي اتبعتة بنظراتي تأكدت مشة زفرت النفس براحة رجعت كملت ريوگي غسلت كلاصة و 

الماعون الطلعتة عزلت المطبخ رحت خلسة اتلفت

خايفة لايجي فتحت الغرفة لينام بيهة ادور المشط

جانت هوسة كلشي متطشر فتحت البردة و الشباك حتى تتهوة لميت الفراش على جهة صفطت 

البطانية خليتهة فوگة دنكت اخذت الباكيت و الجداحة يمهن دفتر صغير و اقلام و اوراق متطشرة 

شلتهن من الگاع لميت هدومة اخذتهن غسلتهن كعدت بالمطبخ امشط بشعري اجيبة منا و ارجعة

منا گوة تنعم هو مجعد صاير كفشة نزلت ايدي

متوجعة كملتة لفيتة گمت افتر بالبيت بس الغرف

الي مسدودة ما ادخل الهة اكو تلاثة جوة وحدة اني انام بيهة و حدة الة و ثانية دوم اشوفهة مسدودة

صعدت الدرج ماكو شي فوك نهاية طابوگ مبني

ساد كلشي مامكمل البيت نزلت بضوجة و ملل

صدك الشغل نعمة جنت استغل ماحس بالوكت هسة بطيء يمشي رجعت للمطبخ فتحت الثلاجة

مأيسة الگة بيهة شي غير الطماطة و البيض هاي 

العشة دوم طماطمة مرات شوي و مرات تگلاه

والغدة لفات من برة و الريوك لو جبن لو بيض 

كشت روحي مشتاقة لطعم التمن و المرگة 

            

              

                    

دورت بالخانات لگيتة گواني ثنين وحدة بيهة شكر

و ثانية تمن بس مو هواي ربع منهة طلعتة خليت

بصينية شفتة خاف بي شي نظيف جا ليش مايطبخ

غسلتة سويت تمن ماكو شي غير الطماطة تنهدت 

بضوجة و سويتهة تگلاه غطيتهن من سمعت الاذان نقصت الطباخ جوة التمن هدرتة رحت اصلي

حسيت بي رجع واني بنص صلاتي بالهول كملت خليت التربة فوك الثلاجة رحت للمطبخ شفت 

علاليگ على الميز اجيت ابجي من فتحت علاگة الطماطمة عفتهة و ثانيات وحدة بيهة خس 

غسلتة حضرت صينية صبيت تمن و خليت من الطماطة بكاسة و شوية خس طلعت صمون خليتة

طكطكت اصابعي متوترة اروح للغرفة و ارجع اريد

اصيحة حاولت اصيح بصوت عالي مثلة من يصيح

طلع صوتي مدري شلونة بس اني سمعتة زفرت نفسي تشجعت رحت للباب رفعت ايدي رجعت 

شاردة اخذت غداي دخلت للغرفة سديت الباب 

هو يطلع و ياكل العلية سويتة طبخت و صبيت

ورة الغدة بفترة اجة گالي الم كلشي الية من الغرفة

اخلي جوة الجرباية استغربت بس لميت هدومي

هنة كم لبسة خليتهن اشرلي اطلع دخلني للغرفة

المقفولة حذرني اطلع صوت كعدت ساكتة 

اسمع صوتة يسولف و صوت بنية يمة تحجي لو جاهل يصيح صوتة عالي تقربت من الباب كعدت 

وراه اتصنت على حجيهم مافهمت بالبداية بعدين 

ركزت عرفت البنية اسمها أسراء تحجي وياه بضحك

گمت افتر بالغرفة اباوع للشباك شوية شوية دنيا تصير ضلمة هذولة بعدهم افترت عيني للحايط 

صور ملزگة اشكال غريبة ماركزت لان بيهن صور زلم 

لو ظهرهم لو جهة صدرهم طالعة ماحب اباوع هيج

وگفت يم الميز اخذت القلم اشوف رسمة على النص ضالة شلت ورقة غيرهة خليتهة بصفهة صرت 

ارسم مثل ما راسم خطي معوج ايدي ترعش ما اسيطر اخذت غيرهة بدون وهي صرت اسحب ورق

كررتهة هواي جانت شكل مثل الساعة وياه هواي خطوط گعدت على ركبي الطاولة صارت توصل 

لبداية صدري ارتكيت بأيدي عليهة رجعت احاول 

التهي بيهة على ما يفتح الباب و يطلعني 

بعدني مركزة جريت خط وگفت اكمل بلعت ريگي

من نمدت ايدي من وراي لزمت ايدي حسيتة مدنگ

علية گلبي صار ببطني خايفة التفت صار وجهة بوجهي دنگ خشونة لحيتة بززت خدي خلاني اصتك

رجعت نظري لأيدي من صارت ايدة فوگهة عصرت القلم بين اصابعي مد ايدة الثانية ثبت الورقة حرك 

ايدي القلم يرسم هو ضاغط على اصابعي مثبتة

دلهم: شكد صرفتي أوراق 

دنگت متفشلة اباوع شكد مشخبطة حرك ايدي يرسم يكمل لسويتة جهة صارت مخربطة لرسمتهة

            

              

                    

وحدي و جهة ثانية عدلة بخطة عرگت ايدي و گلبي

يدك حيل حسيت الجو صار بوخة و حار كلش 

حجة بهمس يم أذني: عاشت ايدج الغدة طيب

توسعت عيوني احس گلبي خدر و معدتي دغدغتني

كمل الرسمة واني جامدة خوف و خجل ماتحركت

ولا رديت عليه ماعرف شگول لساني يثگل من يحجي وياي 

حسيتة خلة وجهة برگبتي بنص شعري انفاسة حارة 

توصل لجلدي بلعت ريگي گلبي ينبض بخوف حرك

خشمة على طول رگبتي احس بي يشمني و يهمهم

دموعي صارت تنزل شهگت ابجي بسرعة ابتعد 

گمت اتعثر دخلت للغرفة سديت الباب ادية ترجف 

و جسمي منمل مسحت رگبتي و وجهي مرتعدة منة 

خايفة اعصر بملابسي گمت فتحت الباب على كيف 

اتخيل يجي يدخل علية لو يمد ايدة يلزمني 

سحبت المفتاح و رجعت طبگت الباب قفلتة كعدت

على الجرباية شمرت العباة سحبت العلاگة من جوة 

الجرباية طلعت ثوبي لاجيت بي طويل و عريض ساتر البسة احسن ارتاح بي من هاي الهدوم لضيگة

بدون وعي كل شوية امسح شعري و رگبتي ماكدر اوكف بجي خايفة على روحي ماحب هيج يسوي

وياي عيب گلت باجر اشوفة اگلة رجعني لهلي 

على الاقل ارجعلهم مثل ما طلعت ولا يصير بية شي

مر الليل كعدت يم الشباك اباوع لشجر هو يتحرك من قوة الهوة عاصفة قوية كلشي بالبيت جاي تهزهز حضنت رجلية لصدري متضايقة من الصار

عيني على الباب الحوش الصاير گبال الشباك انفتح رجع نطبگ من قوة الهوة شوية وهم انفتح بس ايد نمدت تستند على وحدة من الطلاگات نزلت رجلية

رفعت راسي مستغربة فزيت من شفتة دخل گوة يمشي خطوتين كعد بالباب طفرت من مكاني

ركضت فتحت الباب بخوف طلعت برة للحوش 

هو على گعدتة وخر رجليه طبگ الباب سداه وگفت بمسافة عنة لساني ثگل ماعرف اتصرف بس الدموع صارت تكت بخوف امد ايدي ارجعهة خايفة منة

رفع وجهة الي مايبين من كمية الضرب الي بية كلة صاير دم لازم صفحتة بقوة عيونة تتحرك بدون تركيز مثل الدايخ رجع راسة على الباب زفر نفس

مد ايدة يريد اسندة خملت طاحت تقربت بخطوات ارجف القلق يحركني سحبت ايدة استند بكل حيلة علية رجلية رعشن اجيت اطيح من ثگلة 

مديت ايدي للحايط استند عليه گومتة دخلتة للبيت فاتحة الباب بجسمي بس وصل استند على البردة جرهة بيدة حيل وگف التفت للباب سديتة قفلتة

رجعت ساعدتة كعد بالصالة گعدت على ركبي يمة اباوع لملامحة شكد تخوف شلون وصل لهاي الحال

حجة بصوت رايح :مـ..ماي 

اخذت لحظة استوعب يالله فزيت ركضت للمطبخ ترست الدولكة من الترمز ايدي ترعش رجعتلة 

راكي راسة على الحايط مغمض عيونة گعدت بصفة

            

              

                    

دلهم:وجهي و ـ.. وخري الدم عنة

خليت ماي بيدي غسلت وجهة ابجي بصوت عالي من الموقف خوفي غلب كلشي بية گلبي صار يدك بقوة ارعش ماكدر اسيطر

بعد ايدي اخذ لحظات يتنفس بقوة نظراتي نزلت لأيدة لمخليهة على خاصرتة كلهة دم ريحتة ترست المكان شلون وصل هو بهاي الحالة بلعت ريگي 

دنگت من رفع ايدة الثانية لزم رگبتي من ورة حجة بخمول:ششش اهدي كافي خلي عينج بعيني

رمشت ما اشوفة من دموع مسح عيني خدودي جوتني من حرارة الدم لتلطخت بي رعشة لزمت جسمي كلة گلبي غاص بصدري من منظرة 

دلهم: اهدي ماكو شي ... گومي جيبي قماش.. علبة تلگينهة فوك الرف بغرفة ...الوشم جيبيهن يالله سباعية بطلة بسرعة 

كل كلمة يگولهة احس تطلع روحة بيهة گمت ركض للغرفة گوة فتحت القفل دخلت ادور بعيوني اتلمس الرفوف لگيتهة مثل جنطة بلاستك بيضة

اخذتهة رجعت حجة قبل لا اوصلة :المـ..معقم 

التفت وراي وين أشر اخذتة من الطاولة رحت يمة خليتهن :هـ.هاي هاي جبتها قماش بعد قماش 

رحت لغرفتي احتاريت شجيب فتحت سحبت العلاگة اخذت تشيرت رجعتلة اخذة من ايدي سحب ايدة وخلاه على جرح يضغط عليه

دلهم:غسلي ايدي 

اخذت ماي اغسلهة گلبي احسة وصل لبلعومي من ملمس الدم الحار نشفتهة بشالي مدهة يريد يسحب المخدة اخذتهة خليتهة وراه ارتكة عليهة مدد رجلي

دلهم:شـ..شغلي ضوة و ضوي بفلاش الموبايل

گمت شغلت الاضوية توترت ارتبكت بخجل هو يريد اطلع جهازة من تراكة مبين كوة يتنفس حيل متأذي مديت ايدي دموعي تصب و امسحهن

طلعت الموبايل مخليتة گبالة ماعرف شلون اشغلة غمض عيونة يسب مادري بمنو رفع ايدة شغل الضوة خلاني اضويلة من كد ما ارجف الجهاز يتهزهز بيدي

وخر القماش لزم المعقم وحدة من اديه مايكدر يحركهة گوة فتحة فرغة فوك الجرح عض شفتة متألم وجهة نعجق واني اباوعلة و امسح بدموعي

حجيت بخوف:روح للمستشفى 

ما رد فتحت العلبة الة اشرلي على الخيط و الابرة اخذتهن حجة يرفع ظهرة للحايط:عقميهن 

سحبت المعقم خليت عليهن تقربت نطيتهن الة اخذهن عيوني عليه خايفة اريد اگلة يروج للمستشفى ماكدر نوب يعصب او يزمخ علية

دلهم:نزعيني التشيرت 

رفعت عيوني مصدومة:ها

دلهم:كافي فهاوة وخري عني 

تقربت گاعدة على اركبي مديت ايدي طروف اصابعي لمست جلدة رفعتة سحبت الردان من ايدة

وبعدين طلعتة من راسة سحبتهة شمرتة بعيد كلة دم ريحتة الديتول و الدم صرت اشمهة وية انفاسي

            

              

                    

گعدت گبالة اراقبة هو يخيط الجرح وجهة ينكمش ارفع ايدي و انزلهة جلدي مقشعر بوجع من حركتة

كمل عقد نهاية الخيط اخذت الشاش امسح الدم

شمرتة من انترس اخذت غيرة سحب المخدة من وراه تمدد على ظهرة زفر بصوت مسموع مدد اديه

خليت الشاش على الجرح اتلمس رطوبة الدم 

دلهم:روحي للغرفة 

رديت برجفة:الـدم ماوگف 

دلهم:عوفي سوي لأكلج عليه 

ضليت كاعدة ايدي فوك الجرح ماكو صوت غير الهوة من برة يطگ بالشبابيك يطلع صوت قوي 

من اشتدت العاصفة طفت الكهرباء ضل بس ضوة

الموبايل عصرت ادية بقلة حيلة ماعرف شسوي

ندك الباب بقوة جان باب المطبخ تقربت يم راسة احجي بصوت مبحوح:الباب اكلك جاي يندك شسوي

دلهم: افتحي روحي لغرفتج

غنوة:خاف يصير بيك شي اجيبلك دوة مسكن 

دلهم:طلعيهن خليهن هنا و فتحي الباب

اخذت الموبايل رحت للغرفة اخذت علاگة الدوة بيهة اشرطة مسكن و كبسول طلعت خليتهن يمة

مشيت اريد اروح للباب افتحة صاح علية رجعتلة

دلهم:صفوان هذة البسي شالج شي

التفت للدرج سحبت الفانيلة خليتهة على راسي رحت فتحت الباب صار گبالي واحد ضخم وجهة مثل دلهم كلة اثار ضرب شاد راسة بباندج 

بلعت ريگي وخرت عن طريقة ما باوعلي دخل يتلفت ضويتلة بالموبايل فتت وراه خليتة يمهم 

رحت للغرفة خايفة اتصنت على سوالفهم يتعاركون

هواي حجو هو كل شوية يگلة گوم اخذك للمستشفى لحد ما طخ راسة رضى يروح وياه 

ضليت سهرانة للصبح يالله رجعو دخلة لغرفتة وگفت الباب مال غرفتي اباوعلة شفتة خلاه يمدد بيدة مغذي علگاه الة بتعلاكة المدگوگة بالحايط

طلعت دنگ من شافني مر راح طالع من البيت تأكدت مشة رحت قفلت الباب دخلت للغرفة يمة

اباوعلة و اطكطك بصابعي متمدد مرخي ايدة علمود المغذي و الثانية مخليهة على عيونة 

گعدت بالباب اراقبة مابيدي شي اسوي تقربت احجي بصوت ناصي خاف نايم و افززة اذا كاعد يسمعني و يرد 

غنوة:دـ..دلهم 

سكتت انتظر ردة فعل منة فتح عيونة خاملة و منعس التفت بوجهة الي بلعت ريگي هو منتظر احجي 

غنوة:اسويلك اكل اجيبلك شي تاكلة 

دلهم: مايحتاج روحي منا

غنوة: گلي شسويلك و اسوي 

دلهم: بس امشي كلشي ماريد

گمت بدون رد رحت لغرفتي ضايجة حتى ماتريكت 

لحد العشرة طلعت سويتلة اكل وديتة الة بدون ما 

احجي شي هو يدبر روحة اجذب على روحي ضليت افتر بقلق كل شوية امد راسي من الباب اباوعلة

لحد ماصاح علية:تعاي جنج بزونة تعاي خذيهن

طلعت متفشلة شلت الصينية اخذتهة للمطبخ غسلتهن رجعت من صاحلي على هدومة اخذتهن من الحبل وديتهن الة ضليت واكفة خاف يريد شي

رفع الفانيلة من جهة مايگدر يحرك ايدة فوك ضل يجيبهة منا و يرجعهة منا لزمتهة بطروف اصابعي نزعتة بگلبي اسب بروحي حيل مستحية مرتبكة

اخذت الفانيلة الثانية لبستة صارت على رگبتة بعدة ما مدخل اديه عيونة بعيوني سحبت ادية بسرعة 

طلعت ما ارتاح لنظراتة اخاف ضليت بالغرفة لحد

ما صار العشة هم سويتلة اكل وديتة الة خليتة يمة

مرن يومين گدرت يگوم بس مايطلع هذة صفوان يجي يدخلون لغرفتة و ساعات يضلون يسولفون

بعدين يمشي و دلهم يطلع اني باقية بس اطبخ و الملم وراه هدومة مطشرة و البيت هوسة 

نظفتة العصر مستغلة روحتة كملت حيلي نهد من المسح نفظت الفراشات و رجعت فرشتهن رجعت

لغرفتي طلعت هدوم البجامة ضيگة مريت من الدرج سحبت فانيلتة طويلة علية و عريضة استر

على ما ينشف ثوبي ارجعهة الة اخذتهن رحت للحمام طيحت الوصخ جلفت روحي غسلت شعري

لفيتة لبست طلعت شفت دراجتة بالحوش يم الحايط دخلت للبيت جان كاعد بالصالة متمدد

فتت جني ما اشوفة خاف يحاجيني على الفانيلة ماريدة هم يشوفني هو معبس ايام يضل يباوعلي 

مرات بس يشوفني عيونة تشكل من المخازر يخوف

واني اريد اضل يمة بس والله مرتاحة بكيفي كاعدة

انام يمتة ما أريد و اكعد براحتي اكل و بس ماعونين اغسل هاي اكثر شغلة مكيفة عليهة محد يتأمر علية

كعدت يم الباب أضفر بشعري اسمع صوتة من الهول ناصي بس مو حجي يغني ساعة يسكت 

مديت راسي اباوعلة بيدة دفتر يكتب متمدد على بطنة مخدة جواه مرتكي عليهة فجأة باوعلي رجعت راسي فشلانة شلت المشط اكمل نهاية شعري

- زعلــني و يتحرش بية 

يقرب و يغازل بيــة

يضحكلي و يأشر بيدة 

متطمن أنا روحي تريدة 

قربة يطفي النار البية

عبست ارجع اباوعلة احلف على القرءان عقلة مو صاحي الصبح يتلاطم هسة يغني نوب مدري شنو يگول حكيت راسي بملل افسر كلماتة

هزيت ايدي اضحك عليه لفيت شعري سديت الباب رحت تمددت بمكاني غطيت روحي كل شوية اسمعة يرجع يغني نمت على صوتة واني اضحك 

بين الواعية و النايمة حسيت بضل فوك مني گلبت 

اوخر اسحب الغطة ايدي جمدت من حسيت 

المخدة من يم راسي نزلت جن واحد يضغط عليهة

گلبي نخمش و روحي راحت خايفة عصرت عيوني قوي مغمضتهن اخاف افتحهن تسلل ضوة لعيني

التنزيل:كل أحد و أربعاء

الفصل الرابع من هنا 

شكرا لزيارتكم عالم روايات سكيرهوم