رواية أعظم خيانة الفصل الثاني بقلم الزهيريه
لقد اخطأنا في حق انفسنا
حين ظننا ان كل القلوب تشبه
قلوبنا
ريماس / اصعب شعور ممكن تشعر بي هو انه تدفع عمرك على اشخاص واحدهم قندره ما يسوى ومرات من افكر بأمي مرات اگول ما چان بيدها شي ومرات اگول صوچها ليش من شافت ابويه من البدايه ما يعتمد عليه بقت مستمره ويا ونبقى نگول الله يعلم شنو كانت ظروفها المهم انه هي من شافت ابويه وزوجة خالو بثينه وطلعت تركض عبرت الشارع العام اجى لوري ضربها ومن قوة الضربه نشمرت على الرصيف
واكو اصحاب سيارات وگفوا حتى سايق لوري وگف ونزل وكلها الناس تجمعت حول امي وچان راسها متهشم وابويه سوه روحه حنين ولزم صاحب لوري وضربه بس الناس گالوا اله مو وقتها المهم ننقل المصابه للمستشفى وبالفعل ماخذين امي للمستشفى وحتى سايق لوري رايح وياهم
وبالمستشفى اكدوا انه بنفس الوقت توفت والسايق انسجن وصار يمثل انه هو حزين ويلطم على راسه ومتصل باهل امي وخالو چان بالجيش اجتي بس بيبي وزوجة خالو لان بيبي ام حمزه ما عدها غير بس خالي وبنات اثنين وزوجها متوفي
بعد الغسل والدفنه باقين اهل السايق يجون على بيت جدو ابو سلام حتى يتنازلون عن ابنهم وياخذون ديه في حين السايق اكد الف مره انه امي هي طلعت گدامه تركض بس هذا حچي منو يصدگه وخصوصاً بذاك الوقت ماكو كاميرات
اما اني چانوا مخليني يم بيبي ام حمزه من دفنوا امي على اعتبار بيبي ام سلام چبيره بالعمر وما تگدر تعتني بيه
وبعد مباحثات اهل السايق ويه سلام قرر يتنازل عن السايق وياخذ ديه وسبحان الله حتى هي وميته هم استفاد منها وماكو احد خسر غير امي هي خسرت حياتها وابويه ربح فلوس وعاش حياته
ومن قبل ياخذ ديه اخذها كلها وما انطى اي شي لاهل امي من فلوس الديه ومن عرف خالو تخبل شلون ياخذ فلوس الديه كلها وما ينطيهم ومن راح خالو وطلب من ابويه يتقاسم فلوس الديه وياهم تخبل ابويه وما قبل ومتعاركين وبالگوه مفاككهم جدو ورجع خالو اخذني من حضن بيبي ام حمزة وشمرني على بيت جدو ابو سلام
وجدو بنفس الوقت طرد ابويه لكون اخذ ديه وظل يحچي على ابويه انه حرام عليه اخذ ديه من السايق وانه هو ما چان متقدها من دعمها لانه ما يعرفها والحادث كان قضاء وقدر وانه السايق الله اليعلم من جابهم وهو فقير وعلى گد حاله وطلب من ابويه يرجع فلوس الديه لسايق وهاي الفلوس حرام
وبعد مشاده كلاميه بين جدو وابويه قرر جدو انه يطرد ابويه وبوقتها ابويه طلع وقبل ما يطلع گله جدو اخذ بنتك وياك احنه ما مسؤولين عليها وعلى ثاني يوم ابويه مشتري بيت صغير في منطقة شعبية وراجع ماخذني يمه ومع هذا ما منقطعه علاقته بزوجة خالي بثينه
وبعدها ما عبرت الأربعين مال وفاة امي حتى بثينه لگت عروسه لأبويه والعروسه صديقة بثينه منفصله وما تخلف وهو هذا كان طلب ابويه انه زوجته ما تخلف لانه مو حمل مسؤولية اطفال لأنه حمد لله والشكر بكل شي فاشل
وبعدها أزوج أبويه صفيه وطبعاً بيت جدو الي همه أهله أصلاً اهله قاطعوا وتبروا منه والسبب لانه سايق لوري ظل يدعي على بيت جدو بهجمان بيتهم لكون فلوس الديه مداينهن وبايع حتى لوري مالته ومنطيهم الديه وابويه تنازل عنه ونحكم 3 سنوات حق العام وراحت امي كأنه ما اجتي على هاي الدنيا
اما اني نشأت ما اعرف اهل امي ولا اهل ابويه وسبحان الله هاي الدنيا حظوظ ابويه من چان ويه امي شبعت منه مذله وفقر وجوع وضرب اما صفيه حظها گاعد سلام يباوع على حلگها وحتى گام يشتغل ويجيبلها وهي ما قابله عليه واني وعيت على الدنيا گدامي صفيه ومن كبرت وصرت لازم اداوم مدرسه وسجلتني صفيه بالمدرسه هذا كله اني ما اعرف صفيه مو امي لانه كله چنت اصيحلها يمه
وسبحان الله رب العالمين التفت على صفيه وصارت حامل وبوقتها اذكر من رجعها ابويه من الدكتوره شلون لازم ايدها ويمشي بيها ويوصيها تعتني بنفسها لكونها حامل
ومن ذيچ الليله تغيرت تصرفات صفيه ويايه ومن ضمن تغيرتها من اگللها يمه تضربني على حلگي وتگلي اني مو امچ وگدام ابويه تعاملني شكل ومن يروح ابويه اشوف وجهها الحقيقي وشلون تكرهني
وخلصت الأول الابتدائي وحتى المعلمات يشكن مني لكون وصخه اما الدراسه اني شاطره بحيث احفظ من المعلمه تقرا گدامنه بحيث كل المعلمات چانوا يتعاطفون ويايه لكون ما عندي ام وأسمعهم يگولن عني يتيمه بس ما افهم شنو معنى هاي الكلمه
ونجحت للثاني وبهذا الوقت صفيه صار عدها بنيه وتخبلت عبالها ولد وسبحان الله ما مر على ولادتها لبنتها غير ستة اشهر حتى صارت حامل مره ثانيه بهذا الوقت اني چنت بالصف الثاني وچان بيه گمل
وچانت المعلمه تگعدني بالاخير لكوني وسخه وبيه گمل حتى ماكو وحده تلعب ويايه كل البنات ينهزمن مني لكون بيه گمل حتى المعلمات من يگوموني لسبوره يسدن خشومهن من ريحتي مرت عليه ايام بس الله اليعلم بيها چانت المديره والمعلمات من يتريگون يسولي لفات مال بيض واكل وينطوني باكيت عصير لانه چنت ماكو احد يسويلي ريوگ وصفيه حتى الثلاجه قافلتها وما ينطوني فلوس اشتري لليوم غصه بگلبي من اشوف البنات يجون امهاتهن عليهن ويسألن على مستواهن الدراسي ويشترن من الحانوت واني بحسرة اللگمه ايام سوده ما تنسي ابد
وكل هذا و صفيه حايره تخلف يعني خصم الحچي نجحت للخامس ابتدائي صفيه صار عدها ولد اثنين وبنات اثنين وهاي السنوات كلها صفيه تكرب عليه شغل بيت ومن چانت صفيه تعاملني أسوء معامله من ابويه ماكو هسه لا صارت علني تتعارك ويه أبويه وتگله ذبها بملجئ ما أيتام بيها گمل ووسخه
بس ما اعرف ليش ابويه چان ما يقبل يذبني بملجئ وحتى بيومها هو جاب الي شامبو مال گمل وعلمني عليه وگمت اسبح بي يوميه وراح الگمل بس سبحان الله لقب ام الگمل ظل مچلب بيه ونادراً ما احد يصيحلي ريماس وحتى من يصيحولي ريماس ما انتبه إلا من يگولون ام الگمل يله انتبه
ونجحت من الخامس وصار ما چان بالحسبان وهو ابويه صار عنده فشل كلوي وهذا تقريباً چان سنة 2008 صار بحيث ما يگدر يعدل ظهره من الوجع وحتى رجليه تورم
هنا بهذا الموقف شفنه صفيه على حقيقتها لانه ابويه صار عاجز بعد ما يگدر يشتغل وحالنه صار ما يسر عدو ولا حبيب بحيث لگمة خبز ما عدنه
ولكون ابويه عاجز ما يگدر يشتغل صفيه لگت خوش شغل لابويه واليه گالت
صفيه / شوفي ام الگمل ابوچ بعد ما يفيد مريض اني عندي اربع جهال وانتي وابوچ واني هاي 7 نفرات منو يصرف علينه اني شنو اشتغل ومنو يشغلني احسن حل نجيب عربانه مال معاقين ويوميه تخلين انتي ابوچ بالعربانه وتطلعين (تگدين) بي ولچ خوش فلوس تلمين
بيان / الحياة من تكون بيها شروط الأفضل انه ننهي التواصل ويه هذا الشخص وخصوصاً الحياة الزوجيه لانه من تتنازل عن حقوقك لشخص ما يسوى اعرف انه بأي وقت يغدرك لهذا الافضل نقطع حبل الموده ويه الأشخاص السيئين لأنها ما راح نحصل منهم بس الخيانه والغدر
وهذا چان حال أبويه بالمحكمه من حچى ويه امي وقبل بأي طلب تطلبه ينفذه بالبدايه سكتت ما جاوبته بعدها گالت
حنان / إذا تريد ارجعلك تسجل كل أملاكك بأسمي
سامي / اني ما عندي غير البيت الساكنين بي والبيت الثاني مأجره والسياره المرسيدس والعماره الي براغبة خاتون إذا قصدچ على ذني من عيوني تدللين
حنان / والمزرعه شو حسبتها هاي هم تسجلها بأسمي
سامي / المزرعه مو بأسمي بأسم امي اني من اشتريتها چانت في بالي هديه الها لهذا سجلتها بأسمها
حنان / معليه ترجعها من عدها وتسجلها بأسمي
سامي / ماكو داعي ذني الأملاك راح اسجلهن بأسمچ كافي وقابل انتي وين راح توديهن شو هو كله لاطفالنه
حنان / بين ما اسجل ذني باسمي ترجع تاخذ من امك المزرعه والا والله ما ارجع
سامي / ان شاء الله احاول وياها
حنان/ اي وشوكت تبدا بمعاملة تحويل الأملاك الي
سامي/ تدللين من باچر
بيان / على هذا الاتفاق الصار گدامي تم الصلح بين امي وابويه مرات ثقتنه بالأشخاص الغلط تفوتنه هواي أمور وتفاصيل بعدها نوگع بشر اعمالنه ومن ضمن هاي التفاصيل الفاتت ابويه انه من تصالح ويه امي ما تأكد انه قضية الطلاگ سقطتها لو لا مشى على عمى عينه وثقته بيها امي ما رجعت ويه ابويه للبيت وبلغته انه العصر ترجع للبيت بس امي وابوها والمحامي باقين إلى ما وصل موعد الجلسه وداخله يم القاضي هي والمحامي ولكون ابويه رجع للبيت تسجل يم القاضي انه لم يحضر الجلسه وراجعين مسوين بلاغ ثاني يعني معاملة الطلاق ماشيه وابويه ما يدري
واني وابويه رجعنه للبيت وچانت موجوده بيبي ومن سألت أبويه شسوه بالمحكمه وبلغها على الاتفاق الصار بينه وبين امي تخبلت بيبي وتعاركت ويه ابويه وحذرته كل شي ما يسجل بأسمها
لكن ابويه گال هي زوجتي وأم اطفالي إذا ما آمن بيها لعد بمنو آمن واني قررت اسجل كل شي يخصني من املاك بأسم حنان ورجع ذكر الها انه يريد منها ترجع المزرعه اله
هنا بيبي تخبلت وگالت لأبويه يا امومه لعد حنان من عايفه ابنها بيان راح يصير بشهر وين الامومه العدها وروح گللها لو تموت ما ارجع المزرعه حتى تنطيها لابوها القمرچي ومن هسه اگلك سامي إذا سجلت شي من أملاكك بسم حنان لا انت ابني ولا أعرفك ومتبريه منك دنيا اخره
أبويه ظل على موقفه انه راح يسجل كل شي بسم حنان لهذا بيبي زعلت وراحت من يمنه بس بلغت أبويه انه ما ترجع المزرعه وگالت لابويه / انه راح يجي يوم ويندم بس ساعتها يكون وقت الندم فات
وللعصر اجتي امي وياها أغاريد اختي وكأنه كل شي ماكو وامي تتصرف طبيعي وعلى ثاني يوم بدوا بمعاملة نقل الأملاك بسم أمي وطبعاً هذا يحتاج وقت وابويه كملت أجازته وراح التحق للجيش وبعد ما راح أبويه تقريباً اسبوع وحدود ساعه 11 ونص الصبح اني چنت نايم وگعدت وغرفتي فوگ ومن نزلت شفت امي وأغاريد بالمطبخ وامي تگول لاغاريد اياچ وبالچ احد يعرف شي ابد لا تحچين لا گدام ابوچ ولا بيان
وامي من شافتني گدامها سكتت ومن سألتها شنو الموضوع ما تريدني اعرفه گامت صيح عليه وسكتتني بس اني بداخلي اريد اعرف لان فضولي دفعني انه اريد اعرف
وبعدها ظليت الح على أغاريد انه تگلي شنو الموضوع بس ما تقبل تحچي وأغاريد دائماً تلعب ويايه لهذا گتلها إذا ما تگولين شنو الموضوع ضامته انتي وامي عليه بعد ما احچي وياچ
وهي استجابت لتهديدي وگالت / اجى واحد شرطي وسأل على أبويه وامي گالت اله ما موجود وما اعرف أنطها ورقه شنو هاي الورقه ما اعرف لان امي گالت ادخلي جوه
اني بحكم عمري الصغير ما فهمت شنو هاي الورقه وشنو هذا الشرطي وقررت ابلغ ابويه من يرجع ومرت ايام ورجع أبويه من دوامه وگتله على موضوع الشرطي وهو بدوره سأل امي على موضوع الشرطي تخبلت وخصوصاً من عرفت انه اني بلغته بوقتها ضربتني ضرب والله وجهي سوته خريطه من تخرمش بأظافرها ابويه گوه خلصني منها
وهي بعدها تعيط وتگول الله واكبر واحد غلطان بالعنوان سوا عليه جاي عليه همزين ما گال صديقي
وابويه ما ادري يطيب بخاطرها ما ادري يطيب بخاطري ومرت الايام وابويه وفى بوعده وياها وسجل كل أملاكه بأسمها وبعد ما راح أبويه لدوامه بأيام بيوم طلعت من الصبح وما رجعت غير الظهر
وللعصر اجى جدو ويا حداد وغيروا كل أقفال أبواب البيت سواء الخارجيه او الداخليه شنو المغزى من تبديل الأقفال ما فهمت
وأبويه چان يتصل بينه على التليفون الأرضي چنت كله اني احچي ويا هي ما تقبل تحچي ويا بعدها صارت تحچي هواي بالتليفون وبالليل شوكت ما انزل الگاها تحچي بالتليفون ويه منو ما اعرف
واجى موعد نزول أبويه من دوامه وچان وكت الظهر وظل يدگ بالباب الرئيسي كسرها تكسر وهي ما تقبل اطلع افتح الباب اله وهو ويا سيارته لهذا اضطر يطفر من من فوگ السياج حاول يفتح الباب الخارجي من الداخل بس ما گدر لانه هي قافلته والمفتاح عدها اجى على الباب الداخلي مال الصاله وظل يدگ بالباب وهي چانت ساده الشبابيك بالستائر لهذا كل شي ما يشوف بعدها هي فتحت الشباك وحچت ويا
حنان / نعم خير شعندك جاي يله روح منا لا اعيط وألم الجوارين عليك
سامي / شبيچ شنو شعندي جاي غير جاي على بيتي
حنان / يا بيت كل شي ما عندك يمي كله بأسمي ويله روح منه
وظل ابويه يصيح عليها وبوقتها هي چانت مخليه ملابس ابويه وشادتهن مثل البقچه وصعدت للسطح وشمرتهن عليه ومن السطح تحچي ويه أبويه وتگله هاي مساليبك إذا اجيت مره اشتكي عليك واني أصلاً طلگتك انت هسه طليقي وجاي تتهجم عليه
وابويه جنن جنونه اكو چان كرك بالحديقه سحبه وظل يكسر بالجام مال الشبابيك وامي نزلت من السطح وبوقتها اتصلت على ابوها
أما ابويه بعده بحاله هستيريه يكسر ويضرب وبعدها تقريباً بربع ساعه اجتي سياره مال نجده ولكون أمي تخاف تطلع تفتح الباب الهم عبروا من فوگ السياج وگوه لزموا أبويه وامي فتحت باب المدخل وطلعنه للگراج اني وأغاريد وامي
بوقتها امي ظلت صيح وتبچي وتگول للنجده انه هو طليقها واجى يتهجم عليها هي وأطفالها
وابويه يأكد انه هي زوجته وما مطلگها وامي دخلت جوه وطلعت بيدها ورقه من المحكمه قرار طلاگهم وتگول / انه هي اطلگت منه لكونه منتمي لحزب الدعوه وحتى بسيارته اكو عنده دعاء كميل
وهذا چان كفيل انه يخلون النجده ينادون بي وهادي الحادثه چانت سنة 1998 وبذاك الزمن چان حزب الدعوه محظور وكل واحد ينتمي اله اعدام
وبوقتها النجده اخذوا سويچ سيارة أبويه وراحوا فتحوا السياره وبالفعل لگوا عنده دعاء كميل وكلبچوا ايده لابويه وعصبوا عينه واخذوا وين الله اليعلم
يتبع / اكو تعليقات انتبهت انه يگولون الأحداث ما مترابطه اولاً القصه بعدها بأولها وثانياً همه اثنين دى يحچون يعني كل واحد يحچي الصار ويا رجاءً خلوا القصه تاخذ حقها بالطرح وما اريد تذمر خلوني دى اكتب بواهس من اشوف تذمرك واهسي يبرد وبعد ما الي نفس اكتب
شكرا لزيارتكم عالم روايات سكيرهوم
