رواية أعظم خيانة الفصل الثالث بقلم الزهيريه
عندما تشعر ان المكان ليس لك
لا تحارب من اجل احد ارحل بهدوء
ريماس/ اكثر الامور نسويها نكون مجبرين عليها لانه نكون مسيرين ما بيدنه شي واني حياتي ما اذكر بيوم سويت شي بأختياري كله مجبره وبعد مرض ابويه اني وابويه صرنه تحت رحمة صفيه وهي من أزوجها ابويه چانت عمرها حدود 38 سنه وعاشت ويه أبويه ما يقارب 8 سنوات صار عمرها 46 سنه لهذا من تمرض أبويه
اسمعها دائماً تگله لأبويه اني بعدني شابه واريد فراش وانت معوق وگاعد گدامي اضافةً انه ما يشتغل صرنه بوضع الله اليعلم لهذا لگت شغل اليه ولأبويه انه اخلي بعربانه ما معوقين واني اطلع اگدي بي
صفيه / ولچ ام الگمل تدرين الناس من شوفه رجله مورمه ومريض ينطوچ هواي فلوس بس المشكله منين نجيب عربانه مال معوقين
ريماس / اني في وقتها ما چنت افهم عليها بس اباوع بوجهه وهي ضربتني على راسي تگلي
صفيه / ولچ لو شويه چبيره وبالغه چان خليتچ يم ام رحاب تعدلچ والليله بذاك الحساب نحصل بيچ كومة فلوس واني عمري چبير وام رحاب تريد بنات صغار خره بحظي هسه لو عمري صغير چان اشتغلت خوش شغل
ريماس / هذا كله واني ما افهم على كلامها وبوقتها گالت روحي نامي باچر ورانه طلعه واني اي شي تگلي سوي انفذ بدون ما أناقشها بحرف
وعلى ثاني يوم گعدني من النوم وهي تگلي گومي حضري ابوچ
گمت گوه اخذت أبويه على الحمام غسل ورجعته لصاله وگوه ساعدته لبس ملابس اما صفيه طلعت راحت على جيرانه وتوسلت بي حتى ياخذنه على المستشفى والرجال ما قصر واجى وگف بالباب ينتظر نطلع أبويه وهو من شافه گوه يمشي ويتكأ عليه اجى ساعدني وصعده بالسياره
وصفيه وصت زوجة هذا الولد ابو السيارة على أطفالها ورحنه للمستشفى واول ما نزلنه باب المستشفى اكو ولد شرطي واگف في باب المستشفى اجى يركض جاب كرسي وگعد ابويه على الكرسي وطلب من صفيه انه جيب كرسي متحرك من الطوارئ
اني ظليت واگفه يم ابويه لما اجتي صفيه جايبه كرسي متحرك ورجع الشرطي ساعد أبويه وگعده على الكرسي المتحرك ودخلنه للمستشفى بالبدايه دخلنا الطوارئ وبعد الدكاتره سووا تحاليل وسونار وأثبت إنه ابويه عنده فشل كلوي
اني في وقتها چنت مصوره انه صفيه خايفه على أبويه من اخذته للمستشفى بس طلعت غلطانه لأنه الها مآرب أخرى وكملنه كل شي وكتبوا اله علاج اخذناهن وطلعنه ومن وصلنه أبويه لباب المستشفى صفيه گامت تبچي وتگول شلون راح نرجع للبيت والله فلس ما عدنه
وطبعاً العراقيين طبعهم الكرم اكو ناس اجرت تكسي النه ودفعوا الكروه والشهاده لله حتى ساعدوا أبويه وصعدوا للتكسي وصفيه گالت لابو التكسي هاي العربانه مال المعاقين صعدها بصندوگ السياره وسايق گاللها عبالي للمستشفى حتى ارجعه جاوبته صفيه لا عيني مال هذا الرجال المسكين
السايق ما حچه شي ورجعنه للبيت ومن وصلنه نزلنه أبويه والكرسي ودخلنه للبيت
صفيه / شوفي ام الگمل ذكاء صفيه حصلنه كرسي لابوچ بدون ما نشتري هسه هاي التحاليل والوصفه الطبيه مال العلاج اخذيهن وافتري على البيوت ونزلي دمعه دمعتين وگلليهم ما عدنه نشتري علاج وأبدي بالبدايه من فرعنا
وهاي چان اول طريقي بالگدايه وعلمتني عليه صفيه
بعدها اخذت التقرير والوصفة العلاج من صفيه وطلعت اول ما دگيت الباب على جيرانه چانت كلش صعبه بس كل شي بالبدايه صعب بعدين يصير سهل
وبوقتها جيرانه شافتني ابچي نكسر گلبها عليه وانطتني 1000 دينار اخذتها وظليت افتر على البيوت مبالغ تختلف اكو ينطي 500 دينار واكو الف واكو اكثر لميت كومة فلوس وبوقتها تعبت لهذا رجعت للبيت ومن شافت صفيه الفلوس هواي تخبلت وهي تگلي
صفيه / ولچ ام الگمل إذا نبقى هيچ يوميه يطبلنه هلگد فلوس يصير عدنه خير باچر مو ترجعين تفترين بالمنطقه لا لانه نطوا اليوم باچر احولچ على غير منطقه بس هاي المره اخذي ابوچ وياچ فهمتي
حتى العالم تستعطفه
وبالفعل على ثاني يوم خلينه ابويه على عربانه وطلعت اگدي بي وبالفعل الناس هوايه تتعاطف ويانه وتنطينه واكو ناس حتى من ندگ الباب عليهم نطلب منهم يطلعون النه صينية اكل نگعد گدام بابهم ناكل استمر الحال هذا سنتين
واني وابويه حالنه مثل حال المثل الي يگول البعير حمله ذهب وأكله عاگول احنه بالگديه ندخل فلوس كومه للبيت وصفيه تنطينه على گد ما ناكل يمها وحتى ملابسنه منتهيه مخلگنات واني صديقاتي نجحن وصلن لثاني متوسط وشگد انقهر لكون ما دراسه حالي حال صديقاتي بس قدر الله وما شاء فعل
وصرت كل اسبوع اخذ ابويه للمستشفى يسوله جلسة غسيل الكله بمستشفى الكندي وبيوم خلصوا جلسة الغسيل وطلعوا للردهة واني گاعده يمه ظل يباوع عليه ونزلن دموعه باوعت عليه وسألته ليش تبچي يابه
سلام / سبحان الله شسويت بهاي الدنيا قبل الله طلعها بيه الله يرحمچ انوار شگد تعذبتي
ريماس/ أنوار منو
سلام / أنوار امچ
ريماس / لعد صفيه شنو غير هي امي
وابويه حچالي القصة كلها من اول ما عرف بثينه إلى زواجه من صفيه وسألته عن اهله واهل امي
سلام / انتي ما عندچ غير 3 عمام ومن ابويه طردني على مود الديه وتبرأ مني بعدها أكثر من مره رحت حتى أصالحهم بس ابويه مصمم إلا ارجع فلوس الديه وكلهم قاطعوني وبعد ما رحت عليهم ما ادري بيهم اما اهل امچ من تعاركنه اني وخالچ حمزه على فلوس الديه بعد ما ادري بيهم وبالأخص من تزوجت صفيه حتى علاقتي بثينه هم نقطعت لهذا كل معلومه ما عندي عليهم وبوقتها انطاني اسم المدرسه الي جدو چان حارس بيها وگال
سلام / شوفي ريماس أخاف اموت وصيتي الچ لا تبقين يم صفيه روحي على بيت جدچ اهلي همه من يعرفون اني متت راح يبقوچ يمهم مو آمان تبقين يم صفيه فهمتي
ريماس / بقى ابويه يحفظني اسم المدرسه الساكنين بيها بيت جدو
سلام / تعالي ريماس ابوسچ احس ما راح اطلع من هاي المستشفى
ريماس / اتقربت يمه وايده بيها مشكله بيها الكانونه سحبني عليه وظل يبوس بوجهي من كل مكان وهي يگلي سبحان الله چنت أعاير امچ لكون جابت بنيه وهاي البنيه هي بقت ويايه اللحظات الاخيره سامحيني انوار اني اليوم يمچ انوار وسبحان الله عبالك يعرف نفسه راح يموت
وچانوا مشكلين جهاز على صدره بعدها ايده رخت بعد ما چان لازمني قوي والجهاز گام يصفر بصوت عالي اجى دكتور وياهم ممرضه بعدوني وظل يفحصون بي
الدكتور گال المريض توفى ورجع سألني الدكتور شنو بس انتي ويا اما اني من عرفته مات دموعي تجري لانه ما يوم حسيت بحنينه غير بهاي لحظات
موته وجاوبت الدكتور انه بس اني ويا لهذا حولوا على ثلاجة الموتى لحين يجي انسان بالغ يستلمه
واني طول فترة مراجعتي بي للمستشفى صرت اعرف طريق الرجعه للبيت لهذا رجعت للبيت وبلغت صفيه بوفاة أبويه ظلت تعيط وتلطم واجوي الجوارين علينه وعرفوا انه ابويه ويعرفون احنه ما عدنه احد لهذا هواي زلم من الجوارين اخذوا صفيه والمستمسكات مال ابويه وراحوا للمستشفى ومكملين شهادة الوفاة بوقتها اني ظليت بالبيت ويه أخوتي من أبويه وبعدها سمعت ابو الجامع يصيح توفى إلى رحمة الله سلام وذكر اسمه كامل وانه سيتم صلاة الميت عليه وبعدها جابوا للبيت والنسوان وصفيه يعيطن وجيرانه عنده سياره كيه تبرع انه تكاليف الدفنه كلها عليه بثواب روح ابو وما يقارب الساعه انطلقوا بأبويه للنجف واني بقيت بالبيت وقررت بس ترجع صفيه من الدفنه اروح اني لاهل ابويه
بيان / اكثر شغله تأثر بالانسان هي الخيانه وطبعاً دائماً الخيانه تجي من الأنسان القريب وفضلته على نفسك لانه الغريب ابد ما يخون لانه ما عنده علاقه بيك اما القريب من يخونك يعرف الي يأذيك لهذا خيانته الك تكون قاتله وهذا كان وضع أبويه مستحيل بيوم چان يصور الخيانه من امي ومو بس خانته إنما ذبته بتهلكه بيومها تعاركت ويه امي وچان اول مره اصيح عليها وضربتني بس ما سكتت كسرت معظم اثاث البيت
وبوقتها اجى جدو گام يصيح عليه ويغلط ويگول لامي هذا ما بي خير مثل ابو ما يفيدچ ذبي على اهل ابو الگواويد خلي نخلص منه
صدگ هنا ركبني الشيطان من جاب طارت ابويه جاوبته / ابويه يشرفكم اقلها ابويه ما باگ الدوله ولا مرتشي ولا قمرچي مثلك
وهو اجى وضربني قوي على وجهي تخبلت رجعت ضربته وبحكم هو عمره چبير اكيد حركته مو مثل حركتي اني حركتي اخف منه لهذا امي گامت تعيط ودفعتني قوي حتى تخلص ابوها مني وجدو گام وهو يگول لامي هذا ما اريده يجي يمي
جاوبته / انت عجوز مخرف انت يا هو جاي يمك انت جاي هذا بيت ابويه
حنان / لا عيني هذا مو بيت ابوك هذا بيتي واني عارضته للبيع وراح اعيش في بيت أبويه وانت لكون هذا لسانك وضربت جدك هو بعد ما يريدك راح أذبك على اهل ابوك واخلص اني ما أتحمل مسؤوليتك وخصوصاً اني بعد فتره راح ازوج
بيان / بعد احسن وگرة عينچ تردين تزوجين لو تموتين ما تلگين مثل أبويه
وبعدها جدو خابر على بيت عمي وطلب منه يجي وبعدها امي اخذت ملابس الها والأغاريد وراحوا
وما مر وقت هواي حتى اجوي عمامي اثنينهم ومن دخلوا وشافوا البيت مكسر وجدو حچالهم شسويت وشلون ضربته جاوب عمي
وسام / عفيه عليك بيان والله انت رجال وابن رجال بس قصرت عمو لو لازم امك وبسچينه وبطنه ام الزلم چان رضينه عليك دنيا وآخره
وجدو يگله / هاي انت الچبير تعلم ابن اخوك هيچ هذا من يكبر شيطلع مجرم
وسام / والله احسن خطوه انه تخلون بيان يمنه لانه إذا اخلي يم امه ويمك يطلع حرامي ومرتشي وقمرچي ويطلع گواد مضبوط لامه بس هي شعجب ذبت بيان علينه واخذت أغاريد وياها صحيح بيان ولد ما بي شغل أغاريد بعد كم سنه تگوم تشتغل عليها الله يسامحك سامي ورطتنه ويه عائله زباله
وبوقتها طلب مني عمي انه اروح اجمع ملابسي حتى اروح وياهم رحت لغرفتي جمعت ملابسي وشنو احتاج ورحت ويه عمي وسام وعمي مهند اخذوني للمزرعه مال أبويه إلي مسجلها بسم بيبي
وعمامي أصلاً مزوجين وكل واحد عنده بيت وحده وبيبي مره چبيره بالعمر ما تحب حياة المدينه مأجره بيتها وگاعده بالمزرعه
وهاي المزرعه گاعدين بيها عائله هم حراسه وهم فلاليح ومزرعه در خير من الله من زرع وبيها حيوانات مربيهن يستفادون منهن حليب وبيض وحتى خليه مال نحل بيها
انتقلت للمزرعه ويه بيبي بس شنو بيبي منتهيه على مود ابويه وعمامي ما ساكتين يراجعون وواسطات يريدون يعرفون ابويه وين صفى بي الدهر
بس ماكو ظل هذا وضع ابويه ما يقارب 6 اشهر اخير شي واحد يعرفوا عمامي گايل الهم سامي بالامن العامه وبعد لا تسألون عليه إذا ينعدم راح يبلغوكم وينطوكم كتاب بانه نعدم
بس المسكينه بيبي اصلي وتدعي وتنذر نذوره ليل نهار وتدعي على امي وابو امي انه ما يرتاحون
واني چنت ناجح من الثاني متوسط وچنت اريد اعوف الدراسه بس بيبي ما قبلت وهي تگلي انت امانة سامي يمي ولازم أحافظ على الامانه وچانت شجعني اكمل دراسه حتى عمامي للامانه چانوا بمقام أبويه وكملت الثالث ونجحت للرابع بس واهسي برد من ناحية الدراسه
وامي وأغاريد كل شي ما اعرف عنهن مر على اليوم الاخذوا بي ابويه 3 سنوات ولا حس ولا خبر وكلما يسألون عمامي على يگولون الهم انتظروا منهم خبر وبالفعل نهاية سنة 2001 جابوا كتاب قرار من الامن العامه إنه ابويه نحكم مؤبد
بيومها بيبي تخبلت گد ما دگت ولطمت ارتفع عدها الضغط وچانت راح تموت وعمي اخذها للمستشفى ونزلوا ضغطها وجابوها وهي چانت تدعي على امي وانه ابويه الضابط راح يگظي عمره بسجون
الوضع مال بيبي وعمامي ما ينوصف اما اني نفس وضعي نفسيتي تعبانه بسنة 2002 وبمناسبة عيد الاضحى وعيد ميلاد صدام حسين في وقتها صدام حسين انطى عفو عام للسجناء وبيض السجون بيومها فرحتنه ما تنوصف لانه طلع أبويه من السجن هاي فرحه ما منها فرحه من طلع اجى يركض يبوس بأيد بيبي وعمامي اما اني شافني گدامه جرني عليه وهو يبوس بيه وعمي وسام يسأل أبويه ويگله عرفته
جاوبه أبويه هذا مي عيني بيان
مرت اربع سنوات على غياب ابويه من طلع اني دخلت بعمر 18 ورجعنه للمزرعه وبيبي تهوس بعبايتها ما مصدگه ابويه طلع وبعد ما گعدنه بده ابويه يسأل ليش بس بيان هنا يمكم وأغاريد ليش ماكو وعمي وسام حچى كل شي لأبويه وانه استلمني من جدو بعد ساعات من اعتقالك وابويه التفت عليه
سامي / ليش بابا بيان تضرب جدك مو عيب رجال چبير چان خليتني اني گدام عينك
بيان / يابه والله استفزوني يعني شتريد شلون اصرف وياهم
سامي / زين اختك أغاريد شنو أخبارها
بيان/ والله يابه ما اعرف كل اتصال بيني وبينها ماكو صار 4 سنوات
باوع عليه ابويه وظل يهز براسه وعلى ثاني يوم رحنه آني وابويه على بيتنه ومن دگينا الباب طلعنه واحد ما نعرفه وگال أنه اشترى من مره اسمها حنان قبل 4 سنوات وابويه اخذني على بيت جدو اهل امي وكذلك طلع البيت مبيوع تخبل ابويه يعني شنو فقدنه كل اثر لاغاريد رجعنه للمزرعه وابويه قرر يدور على امي حتى يشوف أغاريد وبعد فتره طلبوا مواليدي حتى أداوم بالجيش بس بوقتها أبويه وعمامي ما قبلوا اروح للجيش لهذا اضطريت ارجع لمدرستي وبديت اداوم ومن نجحت من الرابع اعدادي إلى الخامس دخلنه بسنة 2003 وكل الناس تعرف انه امريكا راح تضرب العراق بس چانوا يصورن مثل كل مره يستمر الضرب كم يوم ويخلص بس لا هاي مره تختلف لإنه امريكا ناويه تحتل العراق
وقبل ما يبدي ضرب امريكا للعراق بأيام اجتي للمزرعه سياره
وهاي السياره بيها امي وأغاريد
شكرا لزيارتكم عالم روايات سكيرهوم
