رواية قصة وجدان الفصل الثاني 2 بقلم انين الليل

بلحظه البيت انملى ناس ما نعرفهم شرطه وضباط والجيران حتى الي بعمرهم ما جايين ولا مسلميين اجوي

هشام وابو احسان وبعدها رامي راحو مانعرف وين وامي تعيط بصوت وتضرب على وجهها عالي واني ابچي

امي حاضنتها ام احسان وتصبر عليها وهيه مره تضرب خدها مره تضرب على صدرها واني يمي منار گاعده

وما بطلن دموعي

امي مرات تباوع لي واني اروح يمها تحضني وتكلي

  • بعد منو يخليج بحضنه شلون بيج يووم راح ابوج راح خيمتج

رغم الي اسمعه وابجي بس احچي ويه نفسي = اي راح بعد ما يضربج ولا يعيط علينه راح نرتاح منه ومن عصبيته

لكن من اتذكر شلون كان يبوسني ويحضني ابجي كانت افكاري مخربطه افكار ما اعرف اوصفها

الساعه اكثر من الوحده بعد نص الليل جابو ابوي للبيت دخلو للصاله الداخليه جابو بتابوت وملفوف بعلم

وهشام ورامي يبجون امي من شافته شمرت نفسها وهيه اتكله بهستريا

• سعدي لا تعوفني تره انا مو كد الحمل

وحده من النساء الي اجت يمكن من المنطقه سالت // ليش جابو ما اخذو ايدفنونه

ام احسان // خلو للصبح حتى ايشيعونه

امي اتجاوبها // اي الصبح ياخذونه وانا عافني وحيده عميه ما اعرف شي گليلي خوله شسوي شلون اتصرف

ام احسان لازمتها // على كيفج نجاة صيري قويه

دخل هشام وحضن التابوت وهو يعيط //يابه كسرت ظهري يابه شلون تنغدر هذا انت السبع شلون هالشكل

امي زادت باللطم والعياط وام احسان گالتله

• هاي شنو خاله هشام انت هسه رجال البيت دير بالك على امك واخوانك

• ااااخ يابه ااخ اگعد قابلين بكل شي بس لا تعوفنه

• دگوم خاله گووم رووح يم الرياجيل شلقصه

• اووف خاله ابوي ابوي راح

ام احسان كومت هشام وهي اتگله // لو تدخلون التابوت الغرفته خلو يبات بيها

هشام // لا خاله عمامي خابروني هسه على جيه من الناصريه

راح هشام وخاله ام احسان طلعت غابت شويه ورجعت وهيه تكل الامي

• اهله بالطريق جايين مو انتي هم لازم تخابرين اهلج

امي بس شفايفها يرجفن ودموعها تنزل وما جاوبت

حاولت وياي منار اروح وياها للبيت لكن اني كعدت بعتبة غرفة امي واباوع اشوف امي شلون تبچي بحرگه وهي تباوع

الصورته وهو كاعد ورا الميز

لو صوره ثانيه هو وامي واحنه وياهم وبكلبي اباوعله واحجي // الي يشوفنه يگول اسعد عائله

تقريبا الساعه سته الصبح اني يمكن غفييت واسمع ناس اجوي دخلو وهمه يعيطون فتحت عيوني شفت رياجيل كومه

ما عرفت اله واحد شفته حاضن التابوت عرفته عمي عاصف وبعدها واحد ثاني وهو يصرخ ويكله

     - سعدي خويه كسرت ظهري سعدي شلون تنغلب اكعد خويه

اباوع امي صارت على صفحه وهي تضرب خدها والرياجيل يعيطون والي يگول ياحيف والي يبجي

اشوفهم واكثرهم لابسين دشاديش ومنكبين اجوي هواي رياجيل يم عمي عاصف والرجال اللاخ وكلوله

  

• كومو كافي صدك چذب

واحد ثاني اجه للرجال الثاني وهو ايكله // مهدي صدك چذب خلو. امكم اتشوفه

انتبهت على مره. كبيره بايدها عكازه واگفه اتذكرتها هاي بيبي وجايات وياها نسوان كومه واشوف شلون سوولها مجال

گعدوها يم التابوت وصارت تنعى وتبجي بصوتها الحنين والكلام الي تكوله كلام كله عتب وقهر

وشلون تعبت بتربيته وهو ما جازاها ما حصلت منه بس التعب والعذاب

صرت احجي ويه نفسي واكول // يعني ابويه حتى بيبي البعيده عنه هم معذبها

والي شفته عجبني شگد هاي النسوان بچن ولطمن وامي تبچي وتلطم وياهن لكن هنه عبالك ما يشوفنها ولا كانه

موجوده وهي صاحبة العزا

صار الصبح واتهيأو للتشييع واجوي هواي ناس ضباط ومنتسبيين لكن الشي الي عجبني الناس الي اجت وهيه شايله

البيارق مالت العشاير والهوسات الي طلقوها الشعراء على ابويه والبطولات الي اتحدثو بيها عنه

ومو بس هالشكل كلام الجوارين واهل المنطقه وانو كان نعم الجار الي ما فد يوم غلط بحق احد ولا اتجاوز على احد

ومن يحتاج واحد المساعده ما كان يتأخر كان ايقدمها بطيب خاطر

من اسمع هذا الكلام بيني وبين نفسي اگول =. اخاف مو ابويه متوهميين

واخذو ابويه راحو ويا هواي سيارات عمو عاصف واخويه هشام وعمو كريم ابن بيبي هدية عمة امي

وهواي سيارت طلعت ورا والي بقو بنو چوادر الفاتحه

وامي طلعت ورا وهي تگول // الله وياك سعدي

  ومسرع ما اجن الملايات وصارن يقرن ومن تجي نسوان يلطمن مثل ما هو وارد والملايه تصير

تجيب شعر على المتوفي وهذا الشي وارد تقريبا بكل محافظاتنا لكن الي شفته انو النساء الي اجن

ويه بيبي وعمامي ينطن فلوس للملايه حتى تجيب اسم شخص (بدر ) والي تنعته بالشهيد بالشجاع بالمظلوم

وبيبي على كبر عمرها تدخل وتلطم بحرگه وياها النسوان عرفت انو هذا بدر يصير عمي الكبير

الضحى اجتي بيبي امها الماما وخالاتي اثنينهن وياهن بنات اثنين اكبر مني وصارن يبچن

ويلطمن ويه الملايات بعدها راحت بيبي ام امي رغم تعبها راحت هيه وخالاتي وسلمن على بيبي ام ابوي والنسوان الي وياها واشوف رد اهل ابوي على سلامهن ابرود وتكبر

اما امي فگاعده ابحدها تبچي بقهر وحزن ومن شويه تسكت وتهدأ اشوف بعيونها حيره

  منار جابتلي دشداشه سوده وخليت شال على شعري ثاني يوم وره الظهر خالاتي وبيبي رجعو للبصره

سلمن على امي بوسنها وراحن حتى امي ما عطلتهن واني اشوف نظرات تساؤل بوجه الموجودات بالفاتحه

اما بيبي ام ابويه فارتفع ضغطها واخذوها للمستشفى

ويوم ثالث بمجرد ما ختمو وكملو العشا راحو اهل ابويه حتى بدون ما يسلمن على امي او حتى يسمعنها كلمه مواساة

من خلصت الفاتحه اجه هشام وكال الامي /// ماما عمو عاصف يريد يسلم عليج

امي كالت // انا لازمه عده شلون يجي ويسلم

هشام // يگول خلي توگف وره الباب وتسمعني

امي // شنو هو ما راح ويه امه وگرايبه

  هشام // لا گال يبقى للسبعه

تستمر القصة أدناه

امي هزت راسها وهشام فتح باب الصاله وردا خلى فتحه كلش زغيره سمعت صوت عمو وهو يتحمحم

:: السلام عليكم ام هشام البقيه بحياتج وان شاء الله الخلف ما مات وانا موجود وحاضر الكل شي لاتعتبرين سعدي

غايب لا سعدي موجود بهشام الله يطرح بي البركه ورامي الله يحفظه وانتي على راسنا انا اعرف انتي

لازمه عده بس هذا ما يمنع اعيد واكرر اولاد اخوي وبنته مسؤوليتي وانتي هم اختنه

انا ادري الصار انتي ما الج يد بي وكل شي بقسمة الله

حسيت بكلام عمو راحه النفسي رغم ما اعرفه هلكد بس ارتاحيتله هواي

عمو عاصف شاب بعدين عرفت هو ازغر من بابا بهواي لان مبين علي اكبر من ابويه كان جثل واطول من ابويه

اله نفس عيون بابا واسمر حنطي وكلامه كلش هادئ ورزن وداىما يلبس دشداشه ومرات يلبس جفيه وعكال

لكن اكثر المرات يلبس دشداشه بيضه مكويه ونظيفه كلش بعد ان كمل كلامه حاجى هشام كله

:: صيحلي اختك واخوك

اجه هشام وگلي // عمو رايدج انتي وعلاوي

رحت وهو گلي :: هلا هلا بيج باباتي 

باسني براسي وشال علي وشفت دمعه نزلت من عينه وهو ايكله بعبره :: هله بالبطل

نزل علي ولزمه من ايده وباوعلي :: ما اوصيكم انتم الاربعه اتديرون بالكم على امكم وتسمعون كلامها

وتحترمونها تره امكم تستاهل الاحترام والتقدير واي شي تحتاجونه (لزم چتف هشام ) راسا تتصل بيه

لا تستحي افتهمت بابا مااوصيك

هشام هز راسه //. ان شالله عمو

:: اريدك تصير نچر وسبع واخو اخيته كون من يجيبون طاريك يكولون صدك هذا ابن سعدي الجده غازي والنعم منه

ومن تربيته

:: عفيه ابني يجوز تاخذنه الحياة بتلاهيها لكن انت رجال وامك واختك انت المسوول عنهن والعرب تكول

الحرمه وداعة الخير شلون والخير هذا ابنها واخوها

ورغم اني ما فهمت المفرده بس حسيت بالاطمئنان

امي بقت تبچي وما ردت علي ويوم سابع سوا مثوبه كبيره واجوي كل اقاربنه واصدقاء بابا والي افتهمته انو المثوبه

كلها كانت على حساب عمو عاصف

عرفت من هشام انو عمو كل ما يجون ناس من الداىره يطالبهم بضرورة لزم المجرمين وتسليمهم للعداله

وهشام يگول عاصف يوكف ويكللهم :: دم سعدي غالي ولازم نعرف منو قتله واحنه ما راح نسكت ولا نرتاح

اله نعرف منو الي اتجرأو وكتلو سعدي

ومن اجوي الدائره انطو بايد عمي ظرف بي مبلغ من المال بعدها هشام گال انو هو انطا الي وياهن الفلوس الي

بقن من الفاتحه على اعتبار هو صار رجال البيت

بعدها رجع عمي عاصف البيتهم وبقينه احنه ابيتنا

هشام هوه وجيرانه ابو احسان يستقبل اصدقاء بابا ومرات واحد من الجوارين يجي من باب المجامله

واصدقاء هشام هم يوميه يجون اثنين او تلاثه واني احضر الاستكانات والمي وماما هيه الي تسوي الچاي تخلي بترامز

وتنطي الهشام لان اني حتى چاي ما اعرف اسوي

رامي بس اول ايام يبقى ويه هشام وبعدها صار يطلع بالليل ما يرجع اله فايت وقت ومن يساله هشام ايگله ويه اصدقائي

امي دائما ساكته وحزينه ودمعتها على خدها تواسيها خاله ام احسان الي ابد ما عافتها لا هيه ولا بيبي هديه عمتها

رغم كبرت حييل وزوجة ابنها كريم ام كرار هماتين تجي ودووم ايرددون نفس الكلام

• نجاة انتبهي الصحتج ما يصير هالشكل تسووين بنفسج اقلها ابقي الهذوله الزغار وجدان وعلاوي

  ام احسان //. اي دادا انتبهي خطيه بعدهم زغار وما بقى الهم بس الله وانتي

امي تباوعلي وتصيحني انا وعلي تحضنه وهيه تشهك بالبچي واسال نفسي

= معقوله امي هلگد اتحب ابويه ليش نست شلون چان ايعذبها ويضربها ويسب ويفشر معقوله امي هسه ما فرحانه

لان ابوي بعد ما يرجع

واحنه الي من يجي نتمنى بس يروح وبعد ما يرجع معقوله هسه نريده يرجع حتى يضربنا ويعيط علينه

امي تركت كل شي وعاشت بحزنها اتصورو حتى الطبخ لو خاله ام احسان تطبخ الغدا لو هشام ايجيب النه من المطعم 

وحتى ما صرنا نلتم على سفره لان رامي ينام متاخر يگعد العصر يطلع ويه اصدقائه وامي ما تاكل اله قليل وانا وعلي

ناكل سوا

ومر اكثر من اسبوعين على وفاة ابوي واجه رامي كال الامي انو يريد مصرف امي ردت علي انو هيه ما عدها فلوس

والي موجودات جوه ايدها صرفتهن

رامي گللها // شنو يعني احنه ما عدنا فلوس

امي جاوبته // لازم ننتظر الراتب واكيد راح يتاخر

رامي صار يعيط //. اني ما اعرف اريد مصرفي

واجه هشام من بره وسال رامي // ليش اتعيط وصوتك واصل سابع جار

رامي جاوبه // محتاج فلوس

  - شتسوي بيهن

- اريدهن

- اي اريد اعرف شتسوي بيهن

- انت ما عليك

اهنا هشام كمش رامي وكله // اتجوز من هاي تصرفاتك ومن احچي وياك تحترم نفسك وترد عليه بااحترام

رامي جاوبه باستهزاء // لاا متاكد شنو عبالك صدك انت مسؤول عنه

هشام رد // اي غصبن ما عليك وانت والكل لازم يحترمني ويسمع كلامي

رامي وهو ينزل بادين هشام // بابا لا تصدك نفسك واني محد كبير عليه

طلع رامي وهشام يتوعده واتقرب من امي وسالها

صدك ما عندج فلوس

امي هزت راسها // اي ما عندي

لعد فلوس ابويه وين

رفعت اكتافها // ما اعرف

- يووم ابويه راتبه خير من الله واني اشوفه شلون يصرف ع البيت

هزت راسها // اي وهم تشوفونه من يروح كل واحد ينطي مصرفه بايده وانا حالي من حالكم من يتاخر اطلع

فلوسي واصرفهن عليكم صحيح لو انا غلطانه

هشام هز راسه ورجع سال امي // ماما صدك متعرفين وين فلوس ابويه ؟

— • ليش اچذب عليك ابوك عمره كله ما ورجني على شي وانت شفت بعينك هو الي اخذك وسجلك دورات

وسجلك بالمدرسه الجديده

هز راسه // تمام لعد لازم نستعجل بمعاملة الراتب التقاعدي

امي هزت راسها وهشام استردف // اني بقى عندي مبلغ عمي عاصف خلا النه وهم اصدقاء ابويه الي ويا مجمعين

مبلغ وانطو اليه

  - - اي خليهن اصرف بيهن ع البيت

- - بعد وراي الثوابات والاربعينيه

- - الله كريم تدبر

ثاني يوم اجتي خاله ام احسان مرت علينه تشوفنه خاف محتاجين شي امي گالت الها

- همزين اجيتي

-خير ام هشام

تستمر القصة أدناه

امي راحت للغرفه وجابت اب ايدها سوار وگالت الام احسان

  - -بيعي وجيبيلي فلوسه

ام احسان صارت تباوع بي ورفعت حواجبها باستفهام امي كالت

- - هذا جابه الي من راح للاردن

- - بس حرامات تبيعينه ثگيل وغالي

- - محتاجين فلوس

- - بس مو اله هذا تبيعي طلعي من ذهبج

  - ما عندي

رفعت حواجبها باستغراب // انتي شتكولين نجاة

هزت امي راسها // صدكيني كل العندي اشياء بسيطه نواعم اريدهن الوجدان

ام احسان وهي تباوع للسوار // بس اني اگول حرامات راح يكسرون سعره

• شسوي محتاجين فلوس نسويله ثواب والاربعينيه. والي عد هشام يادوب ايكفنه مصرف

ام احسان / / اني اجيبلج ومن يطلع الراتب رجعيهن

  امي // الاربعينيه والثوابات لازم منه من بيته وهذا السوار جابه الي من راح للاردن ومن شفته صدك انبهرت بي

ولو تشوفين شگد فرحت بي اتذكر رد عليه باستهزاء كلي

- انحرجت كدام اصدقائي وجبته الج لان كل واحد اشترى سلعه ثمينه المرته

ومن سمعت كلامه واستهزائه صدكي حتى ما لبسته وهسه اجه وكته ابيعه واتصرف بفلوسه لان هو جابه رفع عتب

ام احسان // مي خالف نجاة انطيني النمنمات ابيعهن وخلي السوار البتج

   امي //. انتي تشوفين هالشكل

هزت راسها //. اي دادا خلي البنتج صدك جذب اقلها من تكبر اتخلي بايدها

راحت امي الغرفتها غابت شويه واجت بايدها علبه فتحتها من شافتهن ام احسان كلتلها // صدك زغار بس ثگيلات

كانن محابس اثنين وزوج تراجي ومداليه زغيره اخذتهن ام احسان وراحت اتبيعهن

امي اخذت السوار وهي اتكلي //. هذا الج لا تفرطين بي هذا كل الي طلعت بي من ابوج وراح يبقى الج

جاوبتها =. ماما شلي بي ما اريده

حضنتني // لاحبيبتي خلي ذكرى مني

  اخذته وما كدرته صرت اتفحصه صدك حلو وفيكه وبي زارگون ازرك مكتوب علي ( ما شاء الله )

امي كالت شوفي شنو ناقش علي من داخل باوعت شفت حرف n وs. يعني اول حرفين من اسماءهم

    كالت الي يشوف ابوج من اشترا وشلون نقش حروفنا يكول هذا مدلل مرته ويموت عليها

كان فعلا تحفه يخبل امي ضمته بجنطه بالكنتور بعدها اجت ام احسان وطلعت فلوس من جنطتها وكالت الامي

هاج دادا كل خميس سويله ثواب وكتري فلوس للاربعينيه

وفعلا امي كل خميس تطلع مبلغ وتنطي الام احسان تجيب القاسمه الله وامي تطبخه وتدز البيت ام احسان

ودووم اتطلعني انطي العمال النظافه الي يجون المنطقتنا والباقي يبقى النه وصارت الاربعينيه وبليلتها طبخنا

مثوبه كبيره وهشام هو وعمو كريم عزمو جوارينه وامي وصت ام احسان تجيب ملايه وتعزم المنطقه

وبعد القرايه وزعنه ثواب الروح ابويه بهاي الايام

محد من خوالي اتصل طيلة هاي الفتره لكن اسمع هشام دائما يخابرونه عمامي او هو يجي ويگول  

- يوم خابروني بيت جدي ويسالون عنج

وامي تهز براسها بدون ما تحچي شي

قبل الفجر طلعنه للنجف هشام اجر سياره من هاي الي تشيل 11 راكب رحنه اني وماما ورامي وهشام وعلي

واجتي بيبي هديه الي رغم كبر سنها لكن اصرت تروح وعمو كريم وام كرار وخاله ام احسان ومنار وعمو ابو احسان

امي لابسه عبايه وبوشي وحتى كفوف وام احسان وصتها

ان لا يطلع صوتها عالي لان هي لازمه عده

   

وصلنه للامام وزرنا وصلينه وبعدها طلعنه للمقبره من وصلنه قبر ابوي لان هشام

خابر واحد گله تمشي يم المكتب ال... راح تلگى ولد منتظركم ايدليكم

كانت هاي اول مره اشوف المقبره ما كنت اعرف انو هي هلكد كبيره اتفاجآت من المناظر الي شفتهن

وصلنه للمكتب ونزل هشام والولد ركب سيارته قبلنه ومن وصلنه اشر النه على قبر ابوي بصراحه اتفاجئنا

  لان شفنا يم القبر هواي جايين ناس بالبدايه ما عرفت منو همه لكن من اتقربت

عرفتهم اهل ابويه شفت بيبي ونفسهن النسوان الي اجن للفاتحه اني وامي من شفنا صورة ابوي عبالك

يصيح النه ويگول تعالو

ركضت يم القبر وصرت لا اراديا احس فد شي دفعني خلاني اعيط وابچي حييل واحچي ويا بعبره

= بابا اشتاقيتلك

وامي گعدت يمه وتكله

• سعدي ارجع فدوه الطولك ارجع البيتك احنه كل شي ما نريد منك

• سعدي تعرف بيه ما الي قدره وما اگدر اشيل الحمل لان ثگيل تعال سعدي كل شي قبول من عندك بس ارجع

سمعت مره تنعى عرفتها بيبي ام ابويه لان صوتها شجي وبلهجتها الجنوبيه بحيث الكل يبچي على كلامها

وعتبها الابويه وبعدها النسوان الي وياها هم صارن اينعن وحده اتباوع الامي وتخزرها وصارت تحجي

كلام تلحنه على انو نواعي لكن بعدين عرفت هوه اتبسمر الامي وما اعرف شنو السبب

امي بس حاضنه القبر من يم الاسم واني وياها وهنه ابد ما ينطن مجال الى ان اجتي خاله ام احسان وكالت

• حبايب شويه خلن ام هشام تسولف ويا وتحاچي هذا شريك عمرها وابو بيتها 

وبلحظتها وما صارت كلمه على خاله اتجمعن عليها 

• وشنو هيج تحچيين وشنو شريكة عمره واحنه شنو غربه وكل المصايب من وراها او ورى اهلها المفروض

ما نخليها تكعد ويانه وهيه مو احن من عدنا هاي امه وانا اخته اتاشر على نفسها هاي الي تبسمر

ردت اكوم ارد عليهن لكن ماما لزمت ايدي بقوه سكتت وبيبي صارت تنعي وتعاتب اب ابويه وتكله

صارت المره تعزك اكثر مني وانت من يووم يومك وانت شال حالي ومعذبني

وهواي كلام بلهجة اهل الجنوب الى ان اجه عمو عاصف وگال الامه

:: تعاي يمه خلي نروح البدر وخلي ام هشام تگعد يم زوجها لاتنسيين هيه لازمه عده ومالازم صوتها يطلع

لزمها من ايدها بقيت متفاجئه بلي صار لان شفتها الهاي الي تعاركت عبالك تريد تاكل امي وبس تدردم لكن بمجرد

ما عمو عاصف خزرها هي سكتت وراحت

ابتعدو عنه وبقت امي وهيه تسولف ويا وتگله

• سعدي ابد ما حملت همنه وهسه انا ما اعرف شسوي وشلون اتصرف رامي وطلعاته وهشام بدا يتشمخر

وانا خايفه ما اعرف اتصرف وانت تدري بيه لا اخ ولا سند الي

وبقت امي تبجي وام احسان وبيبي هديه وام كرارايصبرن بيها بعدها الكل راح يقرا الفاتحه الامواته ويزورهم

اني رحت اتمشى واقرا اسماء المتوفيين واقاربنه الي جايين قبلنه شفتهم شويه بعيدين عن قبر ابوي وملتميين هناك

وبيبي اتگله بصوت مسموع // يمه بدر يامظلوم يامحروم ياشباب يمه

والكل يبجي رحت امشي واشوف ولد شاب مبين اكبر من هشام خزرني وكال // وين رايحه

باوعتله بكبرياء وما رديت علي

هو رد بنتر // مو احجي وياج ليش ما تجاوبين

باوعتله وحجيت = واني ما اريد احچي وياك

رد باستهزاء // اوووي خاف تتشاقين

  هزيت راسي = لا مدا اتشاقى انت معليك

• ارجعي المكانج لا اكسر رجلج

استغربت من كلامه وليش هالشكل حجى وياي خزرته وحچييت بحده واني رافعه اصبعي

=. هييي بعده ما جابته امه الي يكسر رجلي

— انجبي وفوتي منا روحي يم امج

=. وانت منو حتى هيج تحجي ويايه رووح منا لا تشوف شي بعمرك ما شفته

  رد عليه //. ولج اك

اجه واحد من بعيد يحجي // شصاير شكو وانتي شبيج تصيحين

باوعتله كان شاب ينطي شبه البابا وعمو عاصف رد هذا الي تعارك ويايه //. ياخي ما كتلها شي بس وين رايحه اكلتني

جاوبت بدون قصد = عووع اني اكل واحد مثلك

خزرني وكلي //. شبي المثلي

جاوبه الولد // غزوان عوفها ما عليك بيها رووح هناك يم الزلم وانتي امشي لو تردين يم امج لو تجيين يم حبوبتج

جاوبته بخجل = اني جايه اشوف اخويه علوش

غزوان رد باستهزاء // ها علوش روحي تلگينه هناك يم اخوج هشووم

هذا الي اسمه غزوان هز ايده باستهزاء واني ابد ما ارتاحيت لا النظرته ولا التصرفه والولد الي اجه بقى

واكف الى ان ابتعد غزوان ما حاجاني وراح واني مشيت ورا شفتهم متجمعين وعمي عاصف واكف ولازم بايده

ظهر بيبي لان هي واكفه وتنعى بصوت حزين والكل يبجي الصوتها عموعاصف حاجاها

:: يمه ليش اتخليني بعد ما اجيبج مو كل ما تجيين تسوين بروحج هيج

ترد علي // خاب يمه اخيك المظلوم الي ما شبع من هوى الدنيا لو ابوك الي بقى يطحن بكلبه على ما مات

هسه اتكلي لا تبچيين على كيفج لو بيدي ادفن روحي يمهم

وصارت تنعى شفت قبر مكتوب علي الشهيد المغدور بدر غازي وصورته شاب يجي عمره شويه اكبر من اخويه

هشام وصوره ثانيه وهو لابس القيافه ورتبه على جتفه

كانت رتبته نقيب اتعجبت يعني عمره بابا ما كال عنده اخ مستشهد واشوف الكل يبچي بحرگه على قبره

باوعت شفت قبر جدي الي عرفته. من اسمه وهم خالين صورته وهو لابس الصايه والجفيه والعگال وبيده عكاز

صدك انعجبت بجدي هيبه. رغم هو رجال كبير وينطي شبه الابويه

الحلو بهاي العائله انهم كلهم يتشابهون يعني كل رجالهم طوال وعيونهم كبار ولونهم حنطي بين قوسين ( جثليين )

بحيث من. تشوفوهم تعرفون همه من جد واحد ويبينون اكبر من عمرهم

وكفت وراهم وقريت الفاتحه اتقربت يم قبر جدي واني احچي ويا بهمس

  = جدو اني وجدان بنت ابنك سعدي

بعدها راحو اقارب ابويه وهشام عزمهم كللهم غداكم يمنه همه رفضو وعمي عاصف گال

:: غدانه موجود ولازم نرجع لان طريقنه بعيد

وشفت عمو عاصف وكف ويه هشام وسولف ويا وطلع مبلغ وخلا بايد هشام حسيت انو عمو ما يريد

احد يشوفه وهو ينطي الفلوس الهشام سمعته ايكله :: صير سبع وسلم على امك

راحو بيت جدي بدون حتى ما يسلمون على امي الي رجعت بيومها مخذوله وحزينه

تستمر القصة أدناه

واحنه رجعنه للبيت تعبانين نمنا وگعدنا ونفس الروتين رامي نايم بالنهار وهشام صار ياخذ سيارة ابوي للدورات

وما يرجع اله وره الظهر وهو جايب مسواك بسيط

بعد الاربعينيه بتلث تيام بالليل هشام اجه وسال على رامي امي جاوبته // كالعاده طلع وانت لازم تحجي ويا

هشام // يووم بعد شهر للمدرسه خلي هسه

امي // طلعاته ما عاجبتني

• ما سمعتي يگول يم اصدقائي ما اگدر اضغط علي خلي تجي المدرسه وهو بعد تلقائيا ايكيف نفسه دوام ودراسه

• ماما انا شريد غير الله يوفقكم

هز راسه وكل الامي // ابو احسان جاي علينه ويگول اريدكم موجودين

امي// ما گلك شرايد

• لا بس كلي جايين عليكم

امي // خير ان شاالله درووح جيبلكم فلافل وصمون وانتي روحي سوي جاي

هشام //. يووم والي متى يوميه نتعشى فلافل لو جبن والغدا شلون ما كان

اتنفست بعمق // مو بيدي يايمه ايدي ما تطاوعني ع الشغل (صارت تبچي ) من يوم الي راح ابوك وانا احس

بنفسي تايهه وما اعرف شسوي

اتقرب منها // لا تبجيين ( باوعلي ) وانتي اتعلمي تطبخيين البكدج فاتحات بيوت

• عوفها هشام

هز راسه // لا شنو اعوفها تره بتج مو زغيره الي بعمرها كل شي يعرفن يسوون

ردت ارد علي بس امي سبقتني // عوفها هشام انا اول وتالي اكوم للبيت وانتو اهتمو بدراستكم

هشام //. ماما ايكلج البنات الي ابيت جدي كلشي ايعرفن حتى يعجنن ويخبزن

    •. اي ماما لان عشاير يتعلمن مو مثلنه اهنا ياالله يووم رووح جيب عشا وارجع اتعشو لا يجي الرجال

هز راسه وطلع حاچيت امي = لويش ما خليتيني ارد علي

امي باوعتلي //. اسكتي وجدان لا تحچيين ما اريد هشام يتجاوز عليج

اتخوصرت = شحده يتجاوز

امي اتقربت وهي تخزر بيه // جاي اگلج اسكتي هشام صار هو المسؤول عن البيت وما صار بعينه اي واحد

=. شنو يعني

• يعني ما عنده مانع يضربج ومحد يوكف بوجهه حتى انا

صدك بوكتها انخذلت وصرت احچي ويه نفسي = يعني نخلص من ابويه يطلع النه هشام

  حاچيتها = معقوله هشام يصير مثل ابويه

هزت راسها //. اي يصير ليش لا هو وعى. على ابوج محد بعينه وما يهتم الاكبر واحد هو عاد هم نفس الشي

بلحظتها خفت وصورة ابوي او وحشيته اتجاهنا گدام عيوني رديت

=. لعد ماما انتي هماتين انسي حزنج وانتبهي النفسج

   ما جاوبتني ورحت خدرت الچاي وخليت العشا وگعدنا ناكل ومن كملنه هشام گلي سوي جاي زين ماما ردت

•. انا اسوي كهوه

   اجه ابو احسان هو وزوجته وياهم منار ومن گعد امي صايره بصف الباب مال الغرفه بحيث تسمع الكلام

اني رحت ويه منار جبنه ماي وصبينه الگهوه امي محضرتها قدمتها وهشام يتشاقى ويه منار

• ها اشلونج المهندسه

منار ترد // محاميه هشام اني محاميه ادافع عن المجرمين امثالك

هشام ضحك //سويتيني مجرم

هزت راسها // لا مدا اقصد يعني بالمستقبل اذا اكو شي اني ادافع عنك

تستمر القصة أدناه

هشام // بس انتي شكلج مال مهندسه

-• ما احب الهندسه خليها الوجدان الاخويه احسان اني محاميه

رديت بسرعه // واني ما اريد الهندسه احب اصير دكتوره

هشام // حتى اني اتمنيت اصير طبيب لكن سبحان الله بهاي الظروف مستحيل

ام احسان // خاله لا تضوج كل واحد ياخذ قسمته

منار // وشبيها الظروف شنو انت اول واحد يتوفى ابو بس كول انت كسلان وما تكدر اتجيب الطبيه

ام احسان وهي تبتسم //. ها خاله هشام شتگول بكلام منار

هشام //. شگول خاله صدك اذا گالت تريد تصير محاميه ما شاء الله السانها السان محامي

منار //. لعد شعبالك

هشام باوع الابو احسان /خير عمو صاير شي

ابو احسان // لا بابا كول الخير

وطلع مفاتيح اثنين من جيبه وگل الهشام // اتفضل ابني

هشام باستغراب // شنو هذا ؟

ابو احسان // هذا ابوك مأمنهن عندي گال واحد منهن مفتاح الميز وجواه اكو قاصه تنفتح بالمفتاح الثاني بيها

كل شي ايملكه كان الله يرحمه من يجي ياخذهن مني ومن يروح للدوام يجيبهن الي ايامنهن عندي

هشام لمعت عيونه وابو احسان جاوبه

- - عمو هشام وانتي اختي ام هشام دا تسمعيني لازم تعرفون الفلوس الي بالقاصه هاي مال قطعة ارض انطتها اله الحكومه

وهو باعها وصرف قسم من افلوسها المن الله اعلم وگلي البقن منها ضامهن بالميز ولازم تعرف ياهشام

( طبطب على كتفه ) هذا ورث يعني الكل واحد بيكم حصه وانت هسه المسؤول عن البيت

  هشام // اي صحيح بس لاتنسى عمو البيت بحاجة مصرف فمنين اجيب

- - هم صحيح تاخذ ما يكفي العيشه لاتخلي بذمتك شي

  - - مشكور ابو احسان ابويه اامنك وانت حملت الامانه

- - ياالله تصبحون على خير واي شي تحتاجونه رگبتي سداده

- - والله عمو خجلتونه بكرمكم والسويتو ويانه ما ننسا

- - لتكول هالشكل ابني احنه اهل

طلع ابو احسان واجه هشام وهو ايحاچي امي بعتب // شوفي حتى ثقه ما اله بيج ولا بينه منطي المفتاح مال القاصه

ما اعرف الميز للناس الغربه عبالك مو مرته ولا احنه ولده لو اعرف هو ليش هالشكل يسوي وياج

امي عضت على شفتها وعيونها مليانات دموع وبوجهه الف كلمه بس ما اعرف ليش ما تحجي

اجه هشام ودخل للغرفه وفتح الميز الخشب المقفول شاف قاصه راسا انفتحت بالمفتاح لگى فلوس طلعهن

شافهن خمسه وتلاثين مليون ويمهن فلوس خالهن على صفحه حسبهن لگاهن مليونين وربع

هشام ضحك وكال // هذا ابويه دومه ايفاجانه مفاتيح وميز وقاصه بيهن بس ذني لا وضام المفاتيح عد ابو احسان

امي ردت علي

• هشام طلع ذني الفوگانيات للمصرف والباقي خليهن

• المن اخليهن ؟

• النه كلنه هذا حق ولازم يتقسم بشرع الله

• انتي تحجيين صدوك يووم ابوي مو بس هاي ملكيته ما معقوله

امي هزت راسها // اي بس هاي ليش ابوك شعنده غير راتبه وهذا البيت

هشام هز ايده وطلع وامي كالتله // جيب المفاتيح

•ليش ؟

• خليهن عندي احسن

• هههه هو من جان عدل ضامهن عد الغريب

هزت راسها // اي وهسه مات والعنده النه كلنه

• شنو عبالج اخذهن الي ؟

• لا ماما مو هذا قصدي بس يبقن المفاتيح عندي احسن

رجعهن الامي وطلع راح نام بغرفته وثاني يوم كنت بالغرفه الزغيره الجوه الي بيها شاشه والي اني وعلاوي

نلعب بيها بلي اندك الباب واجت ام احسان

سالتني // امج بالبيت

انا هزيت راسي = اي بالصاله الداخليه

دخلت وسلمت على امي // اشلونج ام هشام

امي // هله بيج ام احسان اگعدي

گعدت وامي اتگللها // تدرين خوله اتعودت عليج من اتدگيين الباب افرح اگول جايتني

ام احسان // واني هماتين تصدگيين امي تخابرني ليش ما تجينه اگللها يووم ما فارغه

• احنه هواي جاي انكلفج

• لاتحجيين هالشكل احنه اخوات

  • واكثر

ام احسان سالت امي // شبيج نجاة كافي حزن وانتبهي النفسج البنتج الاولاج

امي غمضت عيونها وجاوبتها // والله ياام احسان تكدرين تكولين متعجبه مذهوله

• ليش شكو ياستار ؟

امي سالتها // لويش منار ما اجت وياج

• اجتي بت حمايه امها خلتها يمنه وراحت تكول محتاجه شغلات ومنار بقت يمها

• ها ( امي كالت ) وجدان

=ها ماما

• سوي گهوه الخاله

• لا تعبينها هيه اساسا ما تعرف تسوي

= لا خاله علمتني منار وحتى شلون اخدر الچاي

ابتسمت // دياالله سويلي خلي اضوگها من ايدج الحلوه

رحت اسوي الگهوه خاله سالت امي // اگلج نجاة عود ليش سميتوها وجدان

امي بتساؤل // ليش شبي ؟

• حلو بس قديم مو مال هالوكت

امي باوعت الصورة ابوي وجرت نفس // هو سماها ومن سالته ليش گلي // على اسم حبيبتي

  ام احسان باستغراب // يا ؟

هزت راسها =/ اي وداعتج گلي حبيبته اسمها وجدان ومن سالته ليش ما اتزوجتها باوعلي وضحك وگلي يوميه اتزوجها

ام احسان باستغراب وابتسامه // تحچين صدك

   هزت راسها // اي طلعت حبيبته راقصه ما اعرف شنو ما تشوفيني دووم اسميها وجد

جبت الگهوه وقدمتها خاله اخذت فنجان وماما فنجان ام احسان شربت شويه وكالت // الله صدك مسويتها مضبوطه عاشت ايدج

ابتسمت =بالعافيه

ام احسان // اي نجاة گليلي شبيج

• من تصرفات رجلي

• قصدج ع المفاتيح

هزت راسها // اي ام احسان ما تعرفين شنو حسيت كدام رجلج واولادي

• حقج والله

• يعني رجال ما مامن بمرته شريكة حياته

• والله اني نفس الشي جاي اسال نفسي ليش هالشكل ابو هشام يتصرف وياج

امي اتحسرت // الحد هسه ما اعرف ليش مع العلم اني ما فد يوم سويت شي غلط

باوعت خاله الامي // بس نجاة اكيد اكو سبب

امي باوعت الخاله ام احسان الي هزت راسها // اقصد بس لاتزعلين شكد چان يضربج وما يخليج ترحين الاهلج

ولا همه يجونج وحتى اهله يعني اكيد اكو سبب

امي // شقصدح

ام احسان // نجاة احنه اكثر من الاخوات وحده بصف الثانيه واني ما اكدر يمر يوم ما اشوفج

امي // والله ام احسان الي سويتو محد مسوي وفضلكم ما ننسا

• دادا الفضل ال الله بس نجاة انتي عندج اولادج الله يحفظهم وهاي بتج ليش كل هاي الجفوه من اهلج واهله

امي اتنفست بعمق وغمضت عيونها وكالت // بعد ما يسوى الواحد يطلع جروح قديمه اساسا بعدهي ما طايبه

ام احسان // شنو نجاة اتضميين عليه ناسيه اني اختج

• واكثر هنه وينهن اخواتي

• سولفي دادا يمكن ترتاحين وسرج ابير

باوعتلي وگالت // روحي وجد لعبي علاوي

عرفت امي ما تريدني اسمع الكلام الي تريد تسولفه على خاله رحت للغرفه لكن ما لعبت علاوي الفضول اخذني

ردت اعرف اشياء امي ضامتهن حتى على نفسها رجعت اتصنط

الكلام امي وخاله ام احسان اتگللها // شنو تخافيين منه حتى وهو ميت اتاشريلي على بنتج لاتسمع خاف اتگله

امي بابتسامة حزن // لا مو هيج بس ما اريدها تسمع لان الجاهل من يسمع ويشوف يظل منطبع بعقله فكيف

وهي بنيه مراهقه

ام احسان // اي صحيح هسه اني شگد اتذكر اشياء من اني زغيره ما انساهن محفوره بذاكرتي

امي // حتى انا

• اي دادا سولفي ليش هالشكل المرحوم يتصرف وياج

• قصه طويله وتعيسه وحتى مقرفه ما اريد اضوجج

• لا دادا ما تضوجيني (ضحكت ) اصلا ما اتزحزح منايه اله اعرفها كلها نجاة بروح كل عزيز على گلبج سولفيلي كول شي

ولا تضميين اي شي بكلبج سولفيلي دادا حتى ترتاحيين

امي //. وداعتج ما اريد اضوجج

• لا ما تضوجيني خليني اسمع واعتبريني اختج

امي جرت نفس وكالت // وانتي اختي

  - - مادام هالشكل احجيلي نجاة

     اتنفست بعمق سكتت وانوب حجت

  • احنه من نفس العشيره يعني اقارب من بعيد اهلي اجوي من الناصريه للبصره لان ابوي عسكري

وانتقل للبصره واستقرينه هناك

ابوي مطوع سولفت النه امي تكول حصل قطعة ارض من الدوله باعها وكمل على فلوسها من ارض زراعيه ورثها

من ابو واشترى بيت بالبصره احنه تلث بنات ابوي سمانه الچبيره نظيمه والثانيه غنيه وانا نجاة

• يعني انتو بس تلث بنات

لا احنه سبعه اخوي ناظم الجبير وبعده اختي نظيمه وبعدين ايمن وراه اجتي غنيه وانوب انا وراي اجه اخوي حسين 

وهذا صار عنده خلع ولادي يعني يمشي على عكازه

•شلون يعني ؟

• من جيبت الممرضه امي كلش ولادتها صعبه لان اجه على مقعده فمن سحبته خلعت رجله

• خطيه وهسه هو يمشي

هزت راسها // اي على عكازه

• اي دادا شافه احسان وسالني كلي يووم خاله ام هشام عدها اخ معوق

امي هزت راسها // اي الحمد لله على كل حال بعد حسين اجت لمياء هاي صارت بعدين

ام احسان بضحك //. اي الوشاله بس شفتها كلش حلوه

ابتسمت // وسجلنه بالمدرسه وانا چنت شاطره واحفظ بسرعه بس ما احب المدرسه فما ادرس احب اكعد بالبيت

اتذكر چنت بالكوه انجح بس حتى ما اخلي ابوي يرزلني

ام احسان //. ههههه حتى ابوج ما يرزلج لو حتى تتزوجين

امي //. تصدگيني من اكلج زواجي من سعدي ما اعرف شلون صار عبالك حلم نمت فزيت انا متزوجه

ام احسان // هاي شنو نجاة حزوره

هزت راسها //. اي تگدرين تكولين حزوره انا ما اريد ادوخج

 نجاة فضفضي

• يمعوده خلي اتولي راح تدوخين

• هم كالت ادوخ اشو تكملين واني اسمع بس اني صدك دخت شلون نمتي وفزيتي لكيتي نفسج متزوجه

اتحسرت امي وكالت // صادف زواج ابن عمتي كريم اهنا ابغداد

  • عمتج الحجيه

• اي هاي الي تشوفيها تجيلي هي وچنتها ومرات هي وبتها شيماء

هزت راسها // اي اعرفها الشهاده ال الله ما عافوكم دائما يجون ويسالون من اتوفه ابو هشام

ومرات انتي اتكليلي اجتني عمتي

   • اي دووم تجي وتمر عليه

    - اي نجاة كملي

•. بوكتها ابوي جابنه كلنه بعد اخته الي يحبها وابنها متزوج

امي ابتسمت وهي تحجي الام احسان // بوكتها سمعت امي اتگله خلي ناخذ البنات الناس اتشوفهن بلكي احد يجي يخطبهن

ابوي باوع الامي بقهر واتحسر وجاوبها // تتصورين وره عملت بتج احد يجي ويخطبهن

امي ردت // ابو ناظم الناس شمدريها انسدت بوكتها

ام احسان //. ليش اختج شنو سوت ؟

اتحسرت امي // عندي عمتي غنيه متزوجه بالبصره هي ساكنه بالبصره قبلنه وابوي وحيد بس هو ولد الجدي

على تلث اخوات

وحده اتوفت وهي زغيره وبقن عماتي الاثنين اكبر من ابوي چان يحبهن كلش وهنه هم ايحبنه امي تكول من اتزوجنه

اجن وگالن الابوي لو يجي للبصره يم غنيه لو البغداد يم هديه

ام احسان //. هلكد ايحبنه

اتنفست بعمق // من اجو اهلي للبصره صار اتفاق ابين عمتي وابوي انو اختي نظيمه الحاتم ابن عمتي

ام احسان //. اي هاي قبل تصير بكل العوائل

• اخوي ناظم اتزوج من الناصريه اتزوج اخت سعدي

هاا

• اي جنت بالسادس ابتدائي وصادف اكو فاتحه وراح هو وابوي وهناك ما اعرف شافها الاخت سعدي ما اعرف حمدوها اله

ومن رجع طلب من ابوي ان يخطبوها وابوي كله يجوز ما يوافقون ابوها وعمامها وناظم گله ما بيها شي رووح واخطبها

وسبحان الله بس راح ابوي وافقو وتم الزواج وقبل ادنيا سهله مو مثل هسه بسرعه اتزوجو ومن اتزوج هو يداوم بشركه ودووم يسافرون

• شنو اخوج مهندس

•. لا فني بس داىما يرحون ايفادات وهاي زوجته بس اول اسبوعين عدنا وبعدها قبل يوم ايوديها الاهلها ومن يجي يجيبها

وهذا تقريبا ما يتدخل بينه اصلا ما جنه اهله وحتى زوجته من تجي ويا تكضيها بالغرفه وقله تجي تكعد ويانه وتسولف

عبالك مو چنه وعيال لا عبالك ناس مأجرين عدنا بعدين وره ست تشهر من زواجهم كالت تريد تروح يم اهلها فد نوب

— - شلون يعني

- يعني شالت الغراض فد نوب راحت يم اهلها

- هسه سولفيلي على اختج نجاة

• ابنها العمتي اتوظف وراد اختي حسب الاتفاق او كولي رادها يمكن يحبها المهم اجت عمتي خطبتها لكن اختي ما قبلت

ام احسان // يا ليش ما قبلت ؟

امي هزت راسها // چانت تحب الها واحد

   • منو هذا ؟

- - من البصره من غير منطقه وغريب ومن تداوم بالمدرسه شايفها وشايفته وصاير اعجاب

ام احسان // اي عادي تصير دووم وبكل وقت

ابتسمت امي // انتي تشوفينها عادي لكن من خطبتها عمتي الابنها ابوي وافق بس هي ما قبلت وبوكتها اتقدم

الولد وخطبها

- اي وشصار ؟

امي نفخت بحسره // ابوي ما قبل وطردهم وكال انا منطي الاختي كلمه خصوصا وابن عمتي جان موظف ومثقف

يعني ما عوزه شي عكس الولد الي رادته اختي چان ما يشتغل ومعتمد على اهله واساسا حتى اهله ما قابلين. يتزوج

لكن هوه جابرهم واجو يخطبون ومن رفضهم ابوي راحو بكل هدوء وما رجعو

•. لكن المصيبه بنظيمه وگفت بوجه ابوي وكالت ما اريد ابن عمتي وابوي ظل يعيط عليها وگللها تردين منو

هذا الدايح (عاطف )

هو اسمه عاطف هي جاوبت ابوي بتحدي // اي اريده وما اتزوج غيره

اهنا ابوي من سمعها جن جنونه لزمها كسرها ما خلى بيها عظم صاحي بحيث وجهه صار چدم زرك وبقت اكثر

من اربع تيام نايمه بالفراش ما تگدر تتحرك ومو بس هيه حتى احنه اني وغنيه صار يضربنه بدون سبب 

وقرر يبطلنه من المدرسه

ونگعد بالبيت ودخل عليها ابوي للغرفه چان لابس ملابس الدوام هيه متمدده وانا وغنيه ختلنه بزاوية الغرفه

ابوي گال //. انا رايح اخذ اجازه واجي بعد يومين يعني الخميس الصبح وبالليل خطبتج على ابن عمتج

ولو تفكيين حلگج وتگولين ما اريد ما اسويلج شي اخذج فووك السطح واشمرج واموتج واكول عثرت وطاحت

باوعلنه وگال وهو رافع اصبعه ويتوعدنه //. وانتن بعد ما كو طلعه لا مدرسه ولا اي مكان اهنا تنثبرن وتكعدن

على ما تجي قسمتچن

امي سكتت وام احسان سالتها //. وشنو صاريوم الخميس تمت الخطبه

امي وكانها تتذكر ذكرى اليمه // بيوم الخميس الصبح والي العصر لازم تكون خطبتها گعدنا ما لگينه نظيمه بالبيت

شكرا لزيارتكم عالم روايات سكيرهوم