رواية قصة وجدان الفصل الثالث 3 بقلم انين الليل

ام احسان باستغراب // يعني انهزمت ؟

امي هزت راسها واستردفت

من بطلنه ابوي من المدرسه انا وغنيه صرنا نبجي ونتوسل امي اتكله لكن هو قافل واتذكر حتى لزم امي من كصيبتها

وصار يعت بيها ويكول

• هذا الشي لا تحچيين بي قررت وخلص ترديهن يداومن حتى ايصيرن مثل هاي العار خلي الحك على نفسي وابطلهن

امي //. فدوه ابو ناظم بعدهن ازغار وهاي نظيمه حماره ما تفهم مصلحتها

ابوي //. شكلت انا لا تخليني افوت هسه كلهن اعوقهن وخليج مكابلتهن ومحتاره بيهن

عاد امي بيوم الي التحق ابوي راحت العصر العمتي ام حاتم واترجتها تجي تحجي ويه ابوي حتى يرجعنه للمدرسه

ولان عمتي چانت ماخذه ع خاطرها من رفض نظيمه اختي الابنها ولان تحب اخوها گالت الامي

راح تجي الصبح وتحجي ويا وتقنعه ايرجعنه للمدرسه ما دام الخطبه راح اتم وهو اكيد ما راح يرفضلها طلب

رجعت امي من يم عمتي ام حاتم وكالت // قبلت تجي ولو هي زعلانه علينه من وره نظيمه وانا ما خليت اتوسلها

واكللها غصبا عليها تاخذ حاتم شني تلگى احسن منه وابوچن مفهمها هي زغيره وما تفتهم من حچت هالشكل

واجت يم نظيمه الي متمدده على الفراش وكالت الها // اگعدي اسبحي ورتبي نفسج ومن تسالج عمتج شبيج كليلها

عثرت وطحت من الدرج

نظيمه ما جاوبتها بقت متمدده ودايره وجهها وساكته

امي باوعت النه // وانتن گومن ع البيت اغسلنه ورتبنه باجر الضحى تجي عمتكم ام حاتم وتحچي ويه ابوچن

حتى ترجعن للمدرسه خلي تشوف البيت نظيف ومرتب وما اريدها اتحس على شي

وره العشا كمت انا وغنيه ع البيت وغسلنا ورتبنا الديوان والصاله ورحنه للمطبخ نظفنا لان بالايام السابقه ما نطلع

من الغرفه اله اذا ابوي ما موجود بسبب نظيمه وكلامها ويه ابوي او وگفتها بوجهه خلا انسان ثاني

بليلتها بقينه سهرانات انا وغنيه وامي ولان هو چان بالواجب فا احنه اتاخرنه بعدين نمنا

ابوي من يصير عنده واجب يرجع الساعه بالتسعه الصبح جايب ويا مسواك ما حسيت اله امي جاي تندهنا

وهيه خايفه وترجف مثل السعفه فتحت عيوني وهيه سالتني // اختج وين ؟

باوعت الغنيه الي فزت مرعوبه وصرنا وحده اتباوع للثانيه بحيره وخوف ما يقل عن خوف امي

ما عرفنا شنو نجاوب طلعت ورجعت وهي تكول // البت مو بالبيت وين راحت

لا اراديا طفرت من فراشي وانا ارجف من الهبطه فتحت الكنتور شفت كل شي بمكانه ما ماخذه اي شي وياها

بس جنسيتها والشهاده باوعت للتعلاكه الي داگينها وره الباب ما شفت عبايتها لان هيه چانت تلبس عباية راس

بدون حجاب

اندك الباب عرفنه ابوي اجه احتارينه شنسوي بذيج اللحظه راحت امي فتحت الباب شافها مو على بعضها سالها

شبيج شصاير ؟

امي صارت تضرب على وجهها وتخرط بخدها وهي ترجف من الخوف وتعصر باديها وكلتله وهي تاشر ع الغرفه

• حميد بتك نظيمه ماهي

ابوي بالبدايه صابه الي صابنه يعني انذهل بعدين دخل علينه وعيونه بگصته كمشنه من شعرنا وسالنه برجفه

• وين اختجن ؟

ما اوصفلج حالتنه صرنا نحلف ونبچي ما ندري بيها ونبرر انو احنه سهرنا يم امنا واخوتنا ايمن وحسين

وبعدين اجينه نمنا وهي شفناها بفراشها

اصلا كوه رحنه جبناها يمنه بالهول تكعد ويانه شويه وهيه كله نايمه وتبجي

لا كلامنه ولا تبريراتنه ولا قسمنا شفعت النه گال // خلص راح اذبحجن واطم عارجن

وفعلا راح جاب سجين وهو يگول // خلي اخلص من عارچن وبعدين ادور على ذيج العايقه

حتى اليسالني اكول ذبحتهن وهيه خافت وانهزمت

حصرنا على حايط الغرفه وصرنا نعيط ونكله // والله ما ندري بيها وين بس هو ما فبل يسمع

بلحظتها اندك الباب وراحت امي تركض اجت عمتي وهيه تگول // شنو شصاير صوتجن الوين واصل شكو

امي تتوسل بعمتي // فدوه ام حاتم اخوج اتخبل راح يذبح البنات

• يا يايا ليش ياستار

دخلت عمتي للغرفه وهيه اتگله // حميد شبيك شكو

ابوي وهو يلهث // اريد اذبحهن واطم عارهن

• شصاير گلي شبيك

احنه صرنا وره عمتي واحنه نرجف لازمات بيها من وره وهي تكله

• حميد شكو فهمني

ابوي صار يضرب على گصته وعلى صدره وهيه اتقربت يمه ولزمت ادي // خويه شصاير فهمني

ابوي يبلع بريگه // شصاير الگ... ما ندري وين شردت

عمتي من سمعت باوعت النه وهيه تگول // ياهي ؟

بلحظتها الكل سكت رجعت سالته بعصبيه // ولك گلي ياهي نظيمه مو ؟

اهنا ابوي صار يلطم على وجهه وهو يبچي ويگول // خلي اشرب من دمهن ودم امهن

طلع ورجع وهو جايب المسدس ورفعه وهو يرجف // هسه اكتلجن ما بيها مجال

رجعنه صرنا وره عمتي رغم هيه توخرنا من وره ظهرها لكن احنه ما عفناها وهي اتگل الابوي باستهزاء وتهز بايدها

• واذا كتلتهن شني العار ما يركبك بيك خير دور ذيچ بتك واكتلها وتالي اادب ذني

ابوي من سمع هالشكل لا اراديا شك دشداشته وگعد وهو يضرب على رجله

• شوفن اقرب الناس اليه عيرتني چا الناس شراح تحجي من تسمع

عمتي صارت تخمش بخدودها وتحچي // اااي اعيرك اعيرك حميد مو انت وديت عليه وكلت بتي رضت بتي تستحي

ثوله زغيره ما تفتهم يافشلتي گدام العالم گدام عيالي وابني

يافشلتي وانا بت اخوي الكتلت روحي حتى اخذها ما ادري وين شارده او ويا من

وكفت مقابيلنه وصارت تضرب بينه // گولن وين اختچن وين شردت العشيگها احچن لا تسكتن اگ...

شارده من امس مو وانتن وامچن تدرن وساكتات وهسه سويتن روحچن ما تدرن

صرنا نبچي حييل وما نعرف شنگول

ام احسان //. الله يساعدكم على ذيج اللحظه هاي مصيبه

امي وهي تتحسر //. اي مصيبه ويمكن انا الوحيده الي دفعت ثمنها

ام احسان // كملي دادا وتالي شصار

امي // خوله شي راح وانتهى ليش ادوخ راسج

ام احسان //. لا ما اتدوخيني عليج بداعة كل عزيز كملي

اتنفست بعمق // بوكتها نزل ايمن وحسين من فووك لان عدنا غرفتين فوك غرفه ينامون بيها وغرفه الاخوي ناظم

مقفوله ويمها مخزن زغير وبيتونه

ايمن يتثاوب // خير شصاير اسمع العياط عبالي عد الجوارين احد مات بالمنطقه

عمتي // قرت عينك عمه نايم قرت عينك اختك نهبت وانتم نايمين

ايمن انبهت وهو يشوف ابوي شلون يرجف من الحركه والقهر ودشداشته شاگها

ايمن باستغراب //. مني

عمتي //. ياهي بعد نظومه نظومه اختك نهبت شوف ويامن

حسين اخوي راسا جاوب // انتي شتحچيين عمه انا الصبح شفت نظيمه لبست عبايتها وطلعت

الكل انتبه الكلامه ايمن گله // شتگول

هز راسه // اي نزلت اشرب ماي والكل نايم شفتها طلعت عبالي رايحه تجيب صمون لو ريوك ما حاجيتها

امي سالته // يعني بيش الساعه شفتها طلعت

يمكن بالسبعه اكثر

عمتي // ها اتسدد الها

حسين // لاشنواسدد الها حچيت الصدك ترديني اشوف ابوي يريد يذبح اخواتي واسكت جاي اكلج شفتها الصبح

وعبالي راحت تجيب صمون من الفرن اليمنه

اهنا ابوي صار يتهدد على اخوي حسين ويريد ايضربه لان عمتي گالتله

قرت عينك خويه گو... بتك اخوها

بوكتها انذهلت معقوله عمتي الي تحبنه وتحب ابوي هالشكل تحجي علينه

ابوي يتهدد وايمن صاير بالوسطه وهو ايگله // بويه اذا صدك نظيمه شارده انا ابايدي اذبحها واشرب من دمها

هسه خلي نشوف يجوز راحت لجوارينه الوحده من صاحباتها

يجوز عد كرايبنه خلي نفتهم

عمتي // هاي بس بنات حميد يطلعن يسيرن من غبشه

امي تباوع العمتي بتوسل يعني اسكتي وعمتي بيها وما تزيد بالكلام بهاي الاثناء اندك الباب الكل سكت واترقب

ابوي راد يروح يفتح الباب عمتي لزمته بنتر

  • اوگف (باوعت الامي ) روحي جيبيله دشداشه سودنتن الزلمه الله لا يطيچن وانت (باوعت الايمن ) روح افتح الباب

راح ايمن فتح الباب ورجع علينه گال الابوي

بويه رجال سيد ورجل خالتي ابو فلاح وياهم اثنين زلم بالباب يردونك

عمتي طگت اصبع // هلا هلا هاي اليگول ابنك عليها توها طالعه

امي اتقربت وكالتلها بعتب // كافي يامعوده لاتشمرين سمج

عمتي صكت اسنانها وتحچي // ولج انا اشمر سمي بر...هسه صرت انا ...

ابوي قاطعهن وهو رافع اصبعه // اسسس ولا نفس خلي اشوف الزلم شتريد وتالي احسابي وياچن

طلع ابوي واسمعه ايگول // اتفضلو حياكم الله

دخلو بالديوان وايمن اجه كلي بسرعه دولكة ماي وگلاص

رحت طلعت ماي وگلاص گلي سوي چاي

اجت غنيه خلت بالقوري ماي وانا طلعت لان امي اشرتلي بعيونها يعني دوري ع الترك اسمعي شيگولون

طلعت وصلت وانا حانيه ظهري حتى محد يلمحني وصلت يم الشباك واسمع الناس تكول الله بالخير وشلونك ابو حميد

سمعت واحد منهم گال

ابو حميد يمكن ما تعرفني انا سيد ... جيران عديلك ابو فلاح

ابوي جاوبهم // والنعم منك اهلا وسهلا اخ عزيز

السيد // وهذوله الجماعه اصدقائي هذا الخيير ابو فضل رجال معروف وهذا شيخ ابو عبد الله شيخ عشيرة

ال... وابو عبد الله معروف يحل الطلايب ودووم الناس تاخذه للكلفات وان شاالله شغلتنه يمك سهله مو طلابه

ابوي // هلا بيكم منوما تكونون واعتبرو شغلتكم مكضيه

السيد // طال عمرك ابو ناظم بتك عد ابو فلاح وهسه يم خالتها وانا وديت اهلي يمها

ابوي جاوب بارتباك // والله سيد هسه توني اجيت ولگيت امها تبچي وتكلي بتك ماكو

ابو فلاح // خويه ابو ناظم بنيتك عدي اجت الصبح الخالها انا مو غريب ربيتها من هي زغيره واحنه اخوان

السيد // من ودا عليه ابو فلاح ورحت سمعت البنيه تريد تجبرها على ابن اختك وهيه ما تريده معتبرته مثل اخوها

وهذا الشي مو عيب ولا حرام تدري تكلي ردت احرك روحي بس ما ردت ابوي يتكبع بالعار اجيت الخالتي

بلكت تشوفلي حل

ابوي بارتباك // ماكو فرق بيت خالتها بيتها

ايمن // عمي انا توني حلفت الابوي اذبحها من الگاها

ابو فلاح //. افه عليك ايمن شني انا مو بعينك البنيه اجت الخالتها يعني الامها

السيد // عمي من شفتها وشفت ابوك شلون جارم بيها گلت حقها تنهزم بس بتكم شريفه واجت الخالتها

ابو عبد الله // من رخصت السيد والحضور احنه جاييلك البنيه ترجع انت ما تلزم شعره من عدها

السيد // اي البنيه استجارت برجل خالتها والزلمه اجانه ورحنه سمعنه منها. هسه نسمع منك

ابو فضل // شوف خويه ابو ناظم تنطينه كلمه وتشد النه الرايه نرجع بتك لا تگول اكتلها واسوي ما اسوي

ما تشوف اظفرها وانا او ولدي وعشيرتي كدامها

ابو عبد الله // اي مثل ما گال ابو فضل بتك بتنا وطلعت من ذمتك واجت الذمتنه

السيد // ها ابوناظم ساكت

ابوي // بعد شگول جاييني لا انتم طبابة خير لا انتم اتهددون بيه ما عرفت شي

السيد // اسمعني ابو ناظم بتك لو عدها زايد ناقص صاحب عشيك چان راحت ويا ما اجت الخالتها واستنجدت

برجل خالتها حتى ما تزوجها الابن عمتها

الشيخ // وما طوول محد عرف وحتى لو عرفو ما بيها شي بتك لا ناهبه ولابايگه بتك ما تريد الولد تكول مثل اخوي

هسه نريد نسمع كلمه منك ترجع بكفالتنه شتگول

ابو فلاح // والله كلام الشيخ بمكانه ما طوول البنيه ما راحت منا منا ترجع ولاتجبرها حرام ما يجوز

ابوي اتحسر // اي ترجع هذا هوه

السيد // ترجع ابخت جدي

ابوي هز راسه // اي

الشيخ // ابو ناظم شيصير بالبت ما نسكت لان استجارت بينه

    ابوي هز راسه // • لا شيصير بيها تجي البيت ابوها وما تتزوج ابن عمتها

ابو فضل // وابنك الي يتهدد

ابوي //. لا ابني عليش يتهدد هيه ابيت خالتها وخافت لان اليوم خطبتها همزين راحت البيت خالتها وما حركت

روحها لو انهزمت منو يرحم

ايمن // انا راح اجيبها

السيد // لا عمي جيبلي تلفونكم اخابر تجيبها خالتها والعلويه

جاب ايمن التلفون والسيد انطا الابو فلاح گله اتصل وكل لم فلاح خلي تنطيني العلويه

واتصل ابو فلاح وگال الخالتي السيد يريد يحچي ويه العلويه

السيد // الو علويه جيبي البنيه هيه وخالتها وانتي هم تعاي وياهن

بعدها ابوي گال الايمن // روح جيب بعد چاي

السيد طلع من جيبه قطعة قماش // هاي الرايه تعگدها ما توصل يم بتك والجماعه شهود عليك

ابوي بقى ساكت السيد گاله // ها خويه چنك تريد تخلي بكلمتك

ابوي رد بقهر // لا سيد بس انا مستهضم

السيد // عليمن مستهضم ابو ناظم بتك خافت منك وراحت الخالتها وهاي بيتهم شمرة عصا لا باكت ولا نهبت

احمد ربك ما غاويها الشيطان

الشيخ // من رخصتكم ياجماعه رايد ابو ناظم بحچايه ابيناتنا

وكف الشيخ وابوي كله اتفضل بالطارمه

لا اهنا تعال يمي

اجه الشيخ وكف يم الشباك الي اتصنط منه وابوي اجه گله// اتفضل محفوظ

الشيخ // ابو ناظم من ترد بتك ما اوصيك ولا چن شي صاير هالمره اجت سلامات الله اليعلم اذا لحيت وياها

شتسوي بروحها استر حالك ولا تظل سالفه ابين الناس انت تعرف قصدي

ابوي سكت وبعدها كال // اي شيخنا كلامك ذهب

الشيخ // تره الناس ما ترحم وانت هالتشوف الدنيا مگلوبه والناس تريد الها حچايه تحچي بيها

  • والله صحيح

  • ابو ناظم خويه احمد ربك البنيه راحت الخالتها لو لاعب براسها الشيطان وشارده ياهو يرحمك

ابوي ما رد رجعو گعدو واندك الباب السيد گال

• اوكفو انا راح افتح الباب بس كبلها هاي راية العباس ما تحاچيها ولا تمر بيها

ابوي عكد الرايه وراح السيد انا ركضت اريد اشوف منو اجه ويه اختي نظيمه شفت خالتي وياها مره مبوشه

من دخلت المره سلمت وشالت البوشي شفتها يجي عمرها بالعشرينات حلوه كلش عرفت هاي مرت السيد

نظيمه بس تبچي اصلا وجهها مورم من كد البجي واجه ابوي وايمن والسيد گللها

  • لاتخافين بابا ابوج اتفهم الوضع وبعد ما يحجي وياج وما يجبرج تعاي طيحي علي واستسمحي منه

هيه اجت ولزمت ايده وهيه اتكله // سامحني بويه خفت منك تكتلني من اعاندك ورحت الخالتي

وصارت اتبوس ايده وباسته بخده وابوي ما حاچاها السيد كال // خويه ابوناظم بتك طلعت من بيتك واجت البيت عمها

وماكو فرق بيناتكم

ابوي هز راسه وكال // اي ماكو فرق

العلويه حجت بصوت ناصي // سيد البنيه مزوركها ابوها من الضرب وحتى رايد يكسر ظهرها تره حتى ما تكدر توكف

فتره طويله

السيد باوع الابوي // صدك ابو ناظم

ابوي هز راسه ويحرك بحلكه // هيه ساعة شيطان انا هم غلطان

  • لا خويه حرام عليك باچر محد ينام بكبرك ومحد يفيدك

  ابوي // هذا هو سيد انا الغلطان

  نظيمه وهي تبجي رفعت راسها و كالت // بويه بحضور السيد المن ما تريد زوجني الابن اختك الابن اخوك بكيفك

انا غلطانه وگفت وعاندتك سامحني وطلعت من البيت خفت منك

الكل اتعجب من كلام نظيمه وباوعنه الها هي ردت // اي بكيف ابوي الابو ما يتعوض لو شيسوي

السيد كله // شوف يابو ناظم شوف بنيتك تره هيه ما تعرف شي ومو قصدها اتعاندك

نظيمه هزت راسها // لا مو قصدي اعانده هو ابوي وتاج راسي ولو شيگلي اسوي

اهنا السيد گال // هذا هو ان شاالله ماكو بس الخير ياالله علويه اتحضري بس اروح اگل للجماعه البديوان كل شي تمام

راح ابوي ويا والعلويه اتقربت على امي وكالت الها //ما اوصيج تره بنيتج خطيه ديري بالج عليها

امي رفعت اديها بالدعاء // رحم الله والديج علويه خلي ابوس ايدج

• استغفر الله ما سوينه اله الواجب وخطيه لا تجبرونها تره حرام عليكم

امي //. شبيدي علويه بكيف ابوها انا ما الي حچايه ويا

•. الله يهدي

وراحت العلويه وخالتي ام فلاح واكفه تبا وع بعدها اجه ايمن وهو يكللها / خاله عمي يگول خلي نمشي

هزت راسها وحاجت امي // ام ناظم هاي بتج طلعت ذهب وردت ذهب لاتحاجونها

امي وهي تباوع العمتي // لا خيه عليمن انحاچيها راحت البيت خالتها شنو ناهبه

راحت خالتي وبقت عمتي ام حاتم وهيه تخزر بنظيمه اجه ابوي ونظيمه صارت وره امي گاللها // شني خايفه مني

ام حاتم باستهزاء وتفر بايدها // يجوز خافت منك

ايمن // عمه الحمد لله رجعت اختي

عمتي بنتر // وانت فرحان وتكول رجعت اختي هههههي هي

ابوي // كافي ام حاتم شنو هالكلام هيه ابيت خالتها وعرفت غلطتها وهاي هيه بالليل تجون وغصبن عليه وعليها

اعقد الها على حاتم واخذيها بعباتها وفنها تفك حلگها هالمره بايدي احرگها واظل باوع الها على ما تطفى من بحدها

عمتي وكفت ونكتت عباتها // لا خويه انعم الله عليك خلي بتك عدك

كلنه باوعنه العمتي الي كالت // خويه هاي مال عد خالتها كلنه نعرفها چذب ومال اخذها الابني لا ياخوي هيه

شردت حتى ما تاخذ ابني

ومن ما خذاها ذاك التعرفه بطل منها گالك شجايبني الها من بطل منها هسه قبلت باابني تريد تبركسها براسي

انذهلنه من كلام عمتي

امي اتقربت منها وهيه اتكلها بترجي // خافي الله ام حاتم

عمتي تباوع الامي وتحرك باديناتها // انوب انتي اتكليلي خافي الله مو انتي امس اجيتيني تكليلي تعاي حاجي اخوج

بلكي يقبل البنات ايداومن تره مو انتي الجبتيني لا (وباوعت ليفوك ) الله راد يفضحچن وهسه اتكليلي خافي الله

امي // اي خافي الله بتي خافت من ابوها وراحت يم خالتها

اتفر بايدها // هههههي ولج ياخالتها شوفي عدمن جانت وتالي كالت خلي اروح الخالتي شوفي بتج شملعوب بيها

وتردون تخلونها براس ابني اتعرفن باابني يستحي من خاله

+

ابوي لااراديا اتقرب من عمتي وضربها راشدي وهو يرجف ويگللها

• حتى لو صدك بتي هالشكل انتي لازم اتسترينها مو تفضحينها يا نذله

  عمتي خلت ايدها على خدها ونشغت // انا نذله وطگيتني الخاطر هاي انا الك اله اخليك علج بحلوك العالم

امي بتوسل // خيه ام حاتم استهدي باالله ولا تاخذينها الابنج وهذني نجاة وغنيه كدامج تاخذين وحده منهن وتصيرلج

خدامه بس لاتزعلين على اخوج

عمتي اتغم بگصتها // شمالني من همداني شبيه انوب اخذ الزغار المدرستهن الجبيره بيكم خير طمو عاركم ياعار

واتقربت يم ابوي وهيه تتوعده // شوف يا حميد ما اتسمى بت ابوي اله اخليك ما تطلع من البيت ومن تطلع الناس

اتاشر عليك انا اتطگني الخاطر هاي العايقه انا الك وشوف بعد ياهو ايگلب بناتك

امي اجت يمها ولزمت ايدها وباستها وباست خدها وهيه تتوسلها // افه عليج ام حاتم اخوج وطكج مي خالف

عمتي دفعت امي // اخوي ايطكني مي خالف بس ايطكني على مود وحده عايقه لا والله ما اقبل واله افضحه

امي //. خيه اروحلج فدوه اكعدي واستهدي بالرحمن عيب هذا الحچي

عمتي // انتي انچبي وروحي شوفي بتج شبيها ما بيها ها وديري بالج عليها خاف منا وغاد تشتهيلها شي شياتين

غنيه مشت وصلت يم عمتي ودفعتها وهي تعيط // ياالله بره شتردين تسووين سوي بره لا هسه تشوفين شي ما شايفته

  عمتي //اي گح... منين اتطلبنها

  امي // نعم الله عليج يجينه اكثر

وبيومها راحت عمتي واحنه نشوف ابوي شلون يرجف وگف واتقرب على نظيمه وعيونه يطلع منهن الشرار كمشها

من شعرها وصعدها الدرج واحنا ورا باوع النه دار علينه ورافع اصبعه على حلگه // اسسس ولا نفس

ايمن // بويه سمعت الناس الاجو شكالو

وگف وهز راسه // اي سمعتهم كالو لا تكتلها ما كالو لاتسجنها وانت اغم من شفتها راسا جيب المسدس وفرغه

براسها گبل عاد شگلك اخوها ما اتحمل بس انت اغم

عرفنا ابوي اخذها دخلها للمخزن وقفل عليها الباب وهو اساسا ما بي شباك لايطل ع الشارع ولا عالبيت مخزن زغير

نضم بي زوالي الشتا وبعض الاغراض

رجع ابوي ولزمني انا وغنيه ودخلنه للغرفه وصار يتفنن بضربنا ويسمعنا اشكال الغلط وهو يكول

  • وديتن امچن على اختي حتى تفضحني اليوم اموتجن

واحنه ابين ادي مثل الطيور المذبوحه

طلع ابوي يلهث وصار يضرب على راسه // ليش انا شمسوي وهيج يصيربيه انفضح ابناتي تالي عمري لاولد مثل

الناس بي خيير ولا بت ارفع راسي بيها

باوع الامي وكلها // اذا تردين هذني ايعيشن ديري بالج تنطيين الهاي العايقه ( وياشر فوك ) ماي تره صدگي

اخليهن تلاثتهن بالمخزن واذب عليهن بانزين واگول گبت عليهن الكهرباء

امي سكتت واكتفت هزت راسها وهو بقى يحجي // هسه اجتني الفضيحه بصينيه من ذهب

• ام حاتم چا ليش بطلتي من بت اخوچ يا جا غير رحت ولكيتها منهزمه وتالي جابوها شيوخ وسيد هو ومرته

صار يبجي واحنه ختلنه بالغرفه وايمن يريد ينفجر وحسين كاعد ع اول بايه بالدرج ذاك اليوم جان صعب علينه

نسمع ابوي يكول //. ايمن اكتب على البيت للبيع ويصير خير

عرفنا ابوي مقرر بيش ماكان يبيع البيت ويشيل وهناك ينتقم من نظيمه

ام احسان // مو تكولين اتسامحت منه

هزت راسها // اي بس ابوي يعرف عمتي ما راح تسكت وراح اتخلي سيرتنا على كل السان

ام احسان // يعني كتلها الاختج

امي اتحسرت +// بيومها ايمن طلع وگله كتبت الدار للبيع

• اي خوش حتى لو ما انباع ابقى شكم يوم وتالي نشيل وهناك اغسل عاري

محد جاوبه بيومها ابوي ما طلع واحنه ضامات روحنا بالغرفه ونظيمه محد وصل يمها وبنفس الوكت محد اكل بس

الماي صرنا نشربه ويتراوالنا نظيمه ميته من العطش

اتصوري من خوفنا حتى الحمام ما طلعنه لان نخاف منه

بالليل اندك الباب واجه ابن عم ابوي ابو ناصر دخل للديوان ويا ابنه وامي راحت تسوي چاي ما اكدر اطلع حتى

اسمع شنو يحجون

الي عرفته من حسين اخوي لان امي دزته يسمع انو ابو ناصر سائل ابوي // شنو هذا الي سمعته ابو حميد

ابوي مجاوبه // شسمعت حجي

• بتك منهزمه وناس جايبينها وماخذين عليك عهد ما تكتلها اكو هيج شي

ابوي // شنو شتعرف بيه بتي تنهزم واخليها عايشه لو مو ماخذين عليه عهد

  الحجي // چا شنو فهمني

     ابوي سألهم // ام حاتم مو

  • اي ام حاتم اجت وكالتلي

  • لا لان انا ما نطيتها بتي گتلها ما طول بتي ما قابله بابنج ما اجبرها

  ناصر //. لا عمي لا مو هذا الكلام تكول منهزمه ومن رجعوها الناس هيه گالت اقبل بابن عمتي وانا چيف

ما رضيت اخذها الابني اخوي طگني وطردني من البييت

ابوي جر نفس // اي طكيتها حجت على بتي ومن دريت بالبنيه ما راضيه گتلها هذني بناتي اثنينهن اخذي اي وحده ترد

عليه ليش بتك شبيها وما تنطيها النه انا ما اتحملت طكيتها راشدي وطردتها

  ابو ناصر // وتريدني اصدگك

  • بكيفك حجي

ناصر // شني عمي بكيفنه غير نعرف بتك وين راحت وانهزمت ويامن واذا انت ما تگدر تطم عارك اكو من يطمه

ايمن وگف وهو يعيط // شني احنه مو بعينك شني تطم عارنا

  ناصر // چا مخلينها تمسحون عليها

ابوي // اگعد ايمن وانت ناصر اكعد بتي كل شي ما بيها وهاي اختي چيفن بتي ما قبلت تاخذ

ابنها هيج صارت تتقول البت ما رادت ابن عمتها تكول اشوفه مثل اخوي نفسي ما تطيعني يصير رجلي

وانا لزمتها كفرت بيها راحت الخالتها حتى ما تحرك نفسها والناس تتقول وابو فلاح جاب جماعته حتى يطيحون

عليه وما اجبرها

ابو ناصر // حميد كلنه عدنا بنات وندري من تنخطب واحنه نرضى وهي ما راضيه احنه نجبرها حتى الناس

ما تتقول ويگولون بيها شي

ابوي بعصبيه // انت شتحجي بتي كدام العالم كالت اخذ ابن عمتي واليوم بس ابوي ما يزعل عليه ليش ما سولفت الكم

   ام حاتم

   الحجي هز راسه // لا ما كالت

ابوي // خوش انا اگول بتي شريفه بس ما تريد ابن عمتها وهذيج هيه راح اجيبها بعباتها وانت ابو ناصر گبعها واخذها

اليوم اعقدلها الاي واحد من ولدك حتى تعرف بتي ما بيها شي

ابو ناصر وكف وگال // بعد السمعنا منو يرضى ياخذ بتك انا هذا الشايب ما ارضى اخذها انت ما ضابط عايلتك هسه

جاي كبعها واخذها

ابوي // نعم الله عليك عود انت الحجي وتخاف من الله

ايمن // اسكت بابا ( صار اياشر بايده ) هذا هو بكيفنا لحد ياخذ اختي وبتنا ما نحاچيها وال لازم علينه لزمه خلي يگول

وطلعو وصار ابوي يتهدد // بت الكلب فضحتني جابتلي شيوخ واجتني اليوم اله اخلص عليجن كلجن

ايمن // اي اكتلها للعار وانت من يحاجونك الزلم گلهم ابني كتلها اتعير وكتلها

امي // واذا كتلتها اخذوها للطب الشرعي ولگوها ما بيها شي شتسوي شتكول

ابوي // حتى لو ما بيها شي الناس تكول انطو رشوه وخلوهم يكتبون بالتقرير ما بيها شي

امي //. والله شتگله

ايمن راح للغرفه وجاب المسدس // هسه اكتلها واغسل عاري

ابوي لزمه واخذ منه المسدس // بعد يومين نشيل وهناك اكتلها بس خلي انبرد السالفه

انا وغنيه وحده تباوع للثانيه بخوف كامت وفتحت جنطتها وطلعت ورقه ما اعرف شكتبت بيها وانتظرت

الى ان ابوي وايمن راحو للديوان

طلعت اشرت لحسين اجه //. ها غنيه شرايده

هاي الورقه بدون محد يشوفك توديها الخالتي

شبيها الورقه

حسون مو وكتك اخذها وسولف الها ع السوا ابوي بس دير بالك مو احد يشوفك

وابوي اذا شافني يموتني

ما يموتك حسوني اذا ما وصلت الورقه الخالتي كلنه نموت واولنا نظيمه

اخذ حسين الورقه ورجع گعد ع الدرج واحنه نراقبه بدون ما نحجي وابوي وايمن كل شويه واحد داخل يفتر بالصاله

ومن صارت اله فرصه طلع ومن رجع ابوي ساله

وين چنت

بالباب واگف

مو كلت لحد يطلع

ما جاوبه واحنه بقينه منتظرات

   ام احسان / شكتبت اختج بالورقه

• بالبدايه ما اعرف لكن بعدين عرفت هديه مسولفه الخالتي على كل شي صار وطلبت منها تروح للولد

الي يحب نظيمه ( عاطف ) وتگله خلي باجر اهله يجون يخطبنها لان ابوي موافق

شكرا لزيارتكم عالم روايات سكيرهوم