رواية بيوت الصفيح الفصل الثاني بقلم زهراء السراي
.
وبكيت كما لم أفعل من قبل
بكيت من كل الحواس
بكيت كأني أذوب دفعة واحدة
وأمطر
.
صِبى
______________________
أحساس القهر والغبن
ميختفي
بس يتحول بمرور الوقت
لكرة نار داخل الأحشاء
رغم اشتعالهة داخلك
لكنها تطفيك من الخارج
وتحولك لضلام حالك
مستندة عالباب وعيني
بعين رضا ووجهة المحتقن وجفنه المشگوگ
وعينة المضروبة ومزرگة وصوته
الغاص بالحزن
-رااااح .........
گال الكلمة وقبل ليكمل
وگعت للگاع ورجلية ماتحملني
-وووين فرررررقد وين اخوووووي
گعد بالگاع وهو يسحبني من ايدي
-وييييينه
على صوتي اجت غِنى وخالتي
-بالتوقيف والله
لطمت على وجهي
-شبيييييي ليششش
جرتني خالتي تطببني ورضا دخل ويانة
وگفت گباله
-شصاااااار فدوة شصارله
-لازم ابوج يجي السالفة جبيرة
لطمت على وجهي
-بس فهمني شنووووو شصار
-من رحنة لمحل ابو الدراجات
واگفين ندور دراجتين زينات
ونحجي المحل انترس ولد
وهوسة يسولفون ويدورون
مثلنة
ازدحمو حوالين الولد صاحب المحل يحجون ويا
التفتنة اني وفرقد نباوعلهم لزگو ورانة
ابتعدنة شوية
سوو نفسهم يتشاقون تدافعو علينا
ابو المحل صاح بيهم
واعتذروا وفجأة طلعوا
فرقد عبالك عندة احساس بسرعة
مد ايدة على جيبه مالگة الفلوس
صرخ
-فلوووووسي انگرت
بدون نقاش طلع راكض يباوع منا منا
عبالك حس بذولة لگفهم جاي يصعدون
دراجاتهم الجان واگف ورة فرقد بعده
واگف ويريد يصعد دراجة
ركض فرقد
سحبلة بوري من السكراب گدام المحل وركضله
مالحگ ذاك يشرد
رگعة على كتفه
ووگعة وتماطلو بالگاع
ووفرقد يصيح
-ويييين فلوسي نگرررررية عبالكم زووووج وتلعبوني
التمو جماعتة وصارت هوسة
ابو المحل اجة بس گام يغلط على فرقد
وهنا حسينا هو متفق وياهم
تعارك ويا فرقد واني بنصهم احاول اسد الموضوع
بس ضربوه فرقد واني عاركتهم
وصارت هوسة شي تضرب شي
التفتت ابو المحل لفرقد وضربة بوكس
على وجهة فرقد رفع سكور صبانة من المحل وخلاهة براس ابو المحل
وهذا ماعت روحة وسبح بدمة
ماكو دقايق والدورية وگفت يمنا
لأن سيطرة مسافة عنهم
سحبوني اني وفرقد والشباب كلهم
ابو المحل شالو بتكسي
هناك طلعوني لأن فرقد گاللهم مو وياي
وهو حبسو
لطمت على وجهي حيل وخالتي
گامت تعيط وطلعت راكضة تدور
ابوي
ام رضا اجت واني مثل طير مذبوح
حايرة وين انطي وجهي
ل١١ دخل ابوي وويا خالتي وبده
صياحه وغلطه
اخذة رضا وطلعو وللفجر ماكو
الليل اللي مر عالناس نايمة
اني عيني مااخذت نوم
وافتر بالفسحة اللي بين الغرف أباوع لمكانة
الفارغ
للصبح دخل ابوي
ورضا واگف يستأذن بباب الهول
-شصارر يابه
ركضتلة استفسر
-فدووووة يابة شلون فرقد يبقى بالسجن
-يردون فلوس مني منين اجيب
صفنت بوجهم
-يابة اذا مادفعت شيصير
-ينسجن
-يااااااابه
حجيتها وانفجرت باجية
-فدوووة لا تخلي بروح امي لا ينسجن
-يتأدب السجن تهذيييييب
-فدووووة اروحلك والله مايتحمل
حتى ١٨ بعدة ماصاير
-اي يذبو بالأحداث يربوه
گعدت بالگاع عاجزة عن الكلام
رضا يباوعلي وامة تبجي
وخالتي رغم قساوتها عيونها تجري
طلع ابويا وما گال اي كلام ثاني
ركضت ورا
-يابة بس حاجيني
-لا تدوخيني صِبى العصر ارجع واروحله
طلع تاركني ورا
دخلت للهول رضا يباوعلي بقلة حيلة
امة طلعت وهو وياها وخالتي تحجي ويا
-خالة رضا شنسوي
-خالة اذا ماتنازلو ينسجن
-شلون اخليهم يتنازلون
باوعلي مقهور
-ماتگدرين صِبى يردون فلوس
-غيييير أعرف شگد
غطيت وجهي باجية
شبيع
واحنة كل شي مانملك بس أنفاسنا المخنوگة
وأرواحنة المتعبة شبييييع ابيع عمري شسوي
طلع رضا وامه
ودخلت للبيت
غِنى تباوعلي وتريد تنفجر من القهر
خالتي مثلي هم ماتعرف شتسوي
لا عم لا خال ابوي أساساً مگطوع من شجرة
وحتى الكم واحد النعرفهم من اقرباءة البعيدين
هجرونا وگاموا ميتواصلون ويانا بسبب خسة
أبوية ومواقفه
خالتي ماعدهة احد هي بيبي وامي واثنينهن راحن
لرحمة الله وخلصن من هالدنيا الغبرة
شفت روحي ماتحمل أنتظار
لبست ملابسي وخليت شال على راسي
واني ببالي فكرة وحدة
رحت ماشية لبيت ام رضا وخالتي تصيح وراي
-ولج صِبى وين رايحة
-خليج يم البنات راح اخذ رضا وامه
اسمعهة تغلط علية لأن عاندت
مشيت بسرعة لحد ماوصلت بابهم
دفعتة ودخلت
رضا طلع من الحمام اللي مسوي برة
بس بالتراك
سحب خاولي من الباب خلا على كتافة واجاني
-بيج شي صباوي وين رايحة
-وديني لفرقد
وگعت دموعي مسحتهن
وطلعت ام رضا
-ها يابعد خالتج
-خالة خل ياخذني رضا لفرقد
-ماااااااخذج للمركز
-يمة اخذها شوفها شلون مفرفحة علموده
-صدگ تحجين يمة ادخلها مراكز بين الزلم
-وديني لأهل الولد اذا تندلهم
-مااااااااكو ممنوع
-انيييييي اروح بنفسي
بس خالة ......
ماگدرت اكمل اكررررهني واكره قلة حيلتي
-اذا عندج فلوس انطيني علما يطلع فرقد ارجعهن
تنفست حيل احاول انظم انفاسي
دموعي رافضة توگف
-انطيج والله بس شلون وين رايحة
دفر رضا الباب وراح جوة رجع لابس تشيرت
حجة ويا امة واحنة طالعين
-اني رايح ماخذها تشوفة ادري بيها
مستعدة تروح وحدهة راكبة راسها
يمشي واني امشي وراه
احس هاي الدنيا الواسعة اضيگت بعيني
وماعاد بيهة فسحة أمل
التفت من وگفت متأخرة عنه
امسح عيوني اللي غوشن ومااشوف بيهن
من البجي
-بيج شي ارجعج للبيت امشي لا تتخربطين
مشيت ويا بدون ماارد
طلعنا من منطقتنه أجر
تكسي
ومشينة مسافة لمناطق مرتبة لحد ماوگفنة بباب المركز
نزلنة وهو عينة تطير شرر
-تعاي اوگفي هناك عالرصيف وديري وجهج عالحايط
بين مااشوف يخلونا نواجهه لو لا
وگفني على جهة ودخل ربع ساعة وطلع
يگز على اسنانة ويحجي
-غطي وجهج بالشال وامشي خررررب شرف ابوج
شلوووون عنودية
دخلنة بممرات ومكاتب
وگف يم مكتب استأذن ودخلني
ماسيطرت على صوت عبرتي واني أشوفة
گاعد بيده كلبچات
وگف وابتسملي بمرار
ضابط گاعد حجه ويا رضا
-خل البنية تاخذ راحتها
ربع ساعة وراجعلكم
طلع وگعدت لازمة ايده
-شلووون
گلتهة وانفجرت باجية
-شبيييج صبيوة عود انت القوية
شغلة سهلة
-بس والله مو عدل هذا انت تدافع عن نفسك
-ادري والله بس مادام بسبب الضربة هذا السگط ابو المحل دخل مستشفى
محد راح يهتم بسبب المشكلة راح يهتمون فقط بالنتيجة
صوت مساجين وصياح وتجاوز جاي من بره
گلبي نبض بقوة خوف علي
-رضا حاجيتوهم
جاوبتة اني
-اي محاجين ابوية وميقبل يدفع فلوس
-هاي هي يمعودة شبيج تبجين
-وتنسجن
ضربت على خدي لزم ايدي
-اي شبيج كم شهر ارتاح بيهن من الشغل وارجعلج أبيض المع أحسن ماصاير لونين زنودي شي وايديه شي
-واني شلون
هالكلمة حطمت قوته
وحضن راسي
-الدنيا كارهتنا صِبى حيييل كارهتنا
تدرين كل شوية اگول لو مشتري لأخواتي بالفلوس
شي لو معدللهن الغرفة احسن ماراحن هيج
-اروووحلهم ابوس ايدهم والله واخليهم يتنازلون
-تنسسسين عندج اخو اسمة فرقد بس تسويهة
باوع لرضا
-مخليهة هي بالذات أمانة يمك ممممنوع تطلع
خطوة من الباب امدااااني اذا اخليج تنذلين لواحد لخاطري
زلمة اني شعليه كم شهر واطلع والله الضابط
هذا آدمي گال سهلة
اخذهة رضا ولا تجيبهة اذا تگول اني اخوك وعزيز عليك
مااريد شي بس تعالي منا لمن يفض موضوعي
حتى لو انسجن واريدك تلتفت لأخواتي
أبوي ماعلي اعتماد وادري جاي احرجك واني وروح امي
بس اطلع كل فلس صرفته
ارجعة الك
-مع الأسف عليك والله اني العصر ادورلي محامي
صح المبلغ العندي قليل بس راح اشوفلك بسببي
اني دليتك على هذا السگط
-يمعود يامحامي عاد واحد منه يحصل اللي
رادة اخذلك دراجة واطلع اشتغل بلكي ربنا يفرجها
علينا وعليك
دخل الضابط ووگف رضا اشرلي
-نعتذر حضرتك اخرناك وزحمناك
لزمت ايدة جريتها بستهة مثل كل مرة
رفع ادي بكلبچاتهن وحضن راسي
وهمسلي
-بروح امي لا تجين بعد العيون نگسة و الناس ماتتأمن
طلعت وعيني علي لحد ماانسدت الباب
رجعنة للبيت واني طول الطريق سرحانة
بالصارلنه
شلون أطلعة من هالمصيبة واني لا حول
ولا قوة نمشي بدرابين المنطقة الضيگة
ورضا كل شوية يلتفتلي
-صِبى والله باجر رايح ادور محامي
لتفكرين
-شلون ماافكر ماعندي غيره اني
روحي تعبت وماعدت گادرة
حتى أبجي
دخلت لگيت خالتي وام رضا
بالهول
-هاااااه شسويتي بالله من عاندتي ورحتي
-شفته
گعدت سندت نفسي عالمخدة اللي
ينام عليهة كل يوم
-وشراح يصير
-اذا مندفع تعويض ميتنازلون
-ابوووج السگط معاند
مااگدر حتى أرد
بقيت صافنة صامتة ماابدي
اي رد فعل لحد المغرب
دخل ابوي بيده بطل
فزيت رحتله
-ها يااااااابة جايب شرب
مو اتفقنة تروح لفرقد
-لسانج لا اگصه الج كلبة
شو صايرة تراددين
-اراااااادد يابة لخاطر فررررقد أرادد
فدوة لا تخلي ينسجن
انت مو تاخذ منة مصرررف افرض انسجن
منيلك اكل شرب بناتك منو الهن غيره
-انچببببببي سويتيليا عنتر بن شداد
وهو طبة عرج محد گالة يضم عليه هالگد
فلووووس وتالي خوش الله عاقبة لأن عاق
وخلاهن طاااارن برمشة عين
-يااااااابة لتروح مووووضروري دليني ببيت الولد
اني أروح احاجييييهم
-بنت الزمال وووووين مولية
طلعت خالتي من المطبخ تصيح
-يعني انت لا ترحممممم ولا تخلي رحمة ربك تنزل
تگلك دليني واني اروح وياها هم
انهار أبوية بالغلط
-گح**** ادبسزيات تردن تفترن بالبيوت والمراكز
رووووحجن بالدييييياحة بس اني شاكمجن
التتحرك خطووووووة برة البيت اكسر رجلها
سمعتن
دفر الباب ودخل گعد بالهول
طلعت تاركتة ورحت للغرفة
گعدت واجت غِنى بدون كلام سندت راسهة
على كتافي وبجت بهدوء
هاي طبيعتهة بالتعامل وية الحزن
بكل شي صاخبة ومدوية
الا الحزن يصيبها سكون
غريب
بالليل ويا الهدوء ونوم العيون وسكونهة
اندگت الشباك
فزيت راكضة لرضا
-هاااا رضا فدوة رحت
-رحتلة اخذتلة اكل وتراك يبدل بي
وسألت گالو مقابلين يتنازلون
وسألت على محامي والضابط الله يوفقة
انطاني اسم شركة قانونية ووصاني على واحد بالاسم باجر
الصبح اروحلهم
اشوف شسوي
-وييين رايحة يمعودة
-بس اسمع والله مااحجي شي
صفن بوجهي حاير
-اخذج بس حلفي وروح امج ماتبجين
-ماابجي وروح امي
ابتسملي ومد أيدة لجيبه
طلع ككاو منها
-مانسيت
-ماانسى اكلي لا تگعد غِنى السعلوة وتاكله
اجانة صوت غِنى المتهكم
-ترى السعلوة گاعدة وساكتتلك بمزاجي
-ادري بيج گاعدة بالج على اختج وجها خلصان من التفكير
گرص خشمي ومشى
عبر الجذع راجع للبيت من ورة بيتنة
گعدت غِنى تباوعلي
گعدت بصفهة سندت راسي على كتفهة واني
اقسم الككاو بيناتنا
-ليش عقلج اكبر من عمرج
ضحكت واني ارد على كلامها
-التعب اللي عشنا كبرني قبل أواني
-وراسج الداحسته بالكتب والمجلات والجرايد
اليلگاهن فرقد ومكتبة المدرسة اللاطشة بيها
-كل هالاشياء علمتني بس الدنيا دروسها اكبر
-تحبين فرقد اكثر من عدنة كلنا
-احبة اكثر من نفسي
مسحت دموعي وهي تطرح اسألتها
-ليش
-مااحب احد مثل حبي اله
محد يعرف قصة معاناتنا غيره هو واني
تقاسمنا كل شي اني ويا ننام على نفس المخدة
وناكل من نفس الماعون نضحك سوه ونبجي سوه
ياما وياما انضرب بدالي وتحمل عقاب ابوي
عني محد يحبني بگده ومحد سامحني على
غلطاتي الطفولية غيره
-لهالدرجة
-اكثررر واكثر واكبر من الوصف
شگد مااهو اكبر مني احسه اخوي الصغير
احس بتعبة بگلبي
-تحبينه لأن جانت امي تحبة اكثر
-لا احبة لأن يستاهل احبه اكثر
واحبج انت و مُنى والله
-اني هم أحبه واشتاقيتله
-ادري واحس بيج بس شسوي
بقينة نحجي لحد التعب ونمنا
گعدت على صوت خالتي
-صبيوووة گعدي ابوج انگلع ويا فلاح
النذل بالصدگ ماراح لأبنه
وهاي ام رضا تگول خل تجي اخذهة وياي للمحامي
-جاية
گعدت لبست ملابسي البسيطة غسلت
وشمرت الحجاب على راسي وطلعتهلم
لگيت رضا منتظرني بنهاية الدربونة
وامه رجعت للبيت
بس گدام خالتي گالت رايحة
مشينة هادئين دارلي وجهه
مد ايدة لجيبة طلع باكيت بسكت
فتحه وانطاني وحده
-اكلي وياي
اخذت وحدة اكلتهة على مضض خاف يزعل
اخذ تكسي لمنطقة راقية
ومشت السيارة توقفت گدام بناية جبيرة
نزلنة رفعت عيني للافتة
مكتوب بشكل عملاق وأنيق
( الغالب للأستشارات القانونية)
دخلنة اني ويا بالاستقبال مال الشركة
بنية حلوة بشعر مجدول ومكياج خفيف
وزي ابيض وأسود
استفسر منهة رضا
-أستاذ أسد موجود
-للأسف طالع بقضية بس أخو أستاذ حمزة
موجود
صعدنة للطابق الثاني
سألنة ودزونت علي
اسـتأذنا بالدخول
واجانة الرد
دخلنة مكتب مرتب وشاب أسمراني
گاعد عالمكتب يقرأ بملفات
رفع راسة بأستغراب ونزلة يقرأ
-تفضلوا
گعدنة مقابيله وبدة رضا يحجيله
وهو كل شوية يهز براسه بعدم اهتمام
وميجاوب غير بهمهمة
-اممممم
لحد ماخلص رضا وبخجل سأله
-هيج قضية شگد تحتاج مبلغ
رفع راسة مبتسم بسخرية
-اساساً هيج قضايا سهلة منستقبلها
-أستاذ اني مجاي استجدي منك هو عرض وطلب
شگد مقابل تترافعون عن صديقي
وگف بتحدي
-٤ ملايين تدفع ؟
بلعت غصتي ووگفت
-بس انت مو گلت هيج قضايا سهلة
باوعلي رافع حاجبه
-بابا طفلة أنت وينج وين هيج اسئلة
رضا ضرب عالمكتب
-جايينك بكل ادب واحترام فأنت مجبر تحترمنا
-اطلعو برة بابا ماعوزنا بس الزعاطيط تجي
تتعنتك علينة بررره
رفع رضا ثقاله اوراق على شكل حجر لزمت ايدة لايسويلنا مصيبة
تركها تحت نظرات المحامي عديم الخلق
وجرني رضا من ايدي طالعين
-خل ارجع اني احاجييي
-امشي لا تخليني ارتكب بي جريمة
-شلوووون بفرررقد
سحبني حيل للمصعد
بجيت بحرگة واني ادخل
انسد باب المصعد وحسيت
انسد باب الحياة بكاملها بوجهي
-فدوووة رضا
-لا تكفرررريني
-استغفر الله استغفر الله
استغفرت وغطيت وجهي باجية
وگع شالي
ويا عصبية رضا علية وهو يرص اسنانة ويحجي
-ولج طرررردنا
-اخووووية شلون بي
انفتح الباب رفعت راسي اعدل الشال
وامسح دموعي
طلعت وانطخيت برجال واني ماشية
التفتت معتذرة
-اسفة
وگف واني امسح دموعي
باوعلي بغرابة وانغلق باب المصعد
علي
طلعنة بره
رضا يمشي واكاد أسمع صوت خطواته الغاضبة
واني تايهة بأفكاري زمخ بيه
-خفييييي رجلج الناس تباوع فضيني
صعبت عليه نفسي هوووايه
اكو صبة عالية يم محل ورد
گعدت عليهة استرجع انفاسي الحزينة
واكفكف دموعي بهدوء
هو ماشي مو منتبه لگعدتي
مسافة وگف يتلفت
شافني گاعدة اجاني راكض
باوع لوجهي يهز راسه متأسف
تركني گاعدة ودخل للمحل
طلع بيدة وردة حمرة
ابتسم وهو يخليهة بحضني
ويگعد بصفي
-ياريت انگص لساني ولا شفت دموعج
بسبب كلامي
والله ماجاي اگدر افكر
الجوة ايدي كلهن بيهن ٦٠٠
دفعت منهن ١٠٠ البارحة لمنتسبين داخل المركز
حتى يشترون لفرقد اليريده
بيهن وانطيتهم ٢٥ الهم حتى يهتمون بي
يعني الباقي ٤٧٥ وشفتي وسمعتي
هذا الكلب المحامي شلون يستهزأ
حاااااير والله حاير
ماكدرت ارد غير طبطبت بكفي على كتفه
-امشي الها رب يحلهة
مشينة مسافة مو قليلة
بس ردنة نطلع من جو المشكلة والتفكير
لحد مااخذنة تكسي راجعين
بس نزلني رضا طلع هو للمركز
رجعت لكيت خالتي منتظرة
-هاااااااه ولج رااااايحة وحدج ويا
باوعتلهة مالي خلك حتى احجي
-ويا لو مو ويا ماكو فايدة
طلبو كومة فلوس مانكدر نجمعها لو بعد سنين
باوعتلي هم حايرة
اني اعرف تفكيرها منين نصرف بعد
وماالومها حقها منين تجيب قابل
ابوية ماعلي اي اعتماد
وانتظرنا للعصر بين رضا
ووجه مبين علي الخبر اللي راح يلقي
على مسامعنة راح يكون حزين
-هالأيام يصعدو محكمة
ماكدرت ارد علي دخلت جوة
وهو بقة يحجي وية خالتي
للمغرب وابوية ماكو
والليل كلة عده
وهو مختفي
ثاني يوم رضا مابين ولا اليوم
الورا واني غايبة من المدرسة ومن الحياة هم وما بعيوني بس فرقد
غِنى و مُنى يداومن حتى ابعد تفكيرهن عن موضوع فرقد جبرتهن يداومن ومرت خمس ايام
ابوية مرتين رجع للبيت ياخد ملابس ويروح واحجي ويا ميفيد طگ كلبي واني انتظر
واخيراً بين رضا وجهة شاحب وتعبان
تلاگينة ببابهم
واني رايحتلة العصر
-لييييش تعذبني هيج فدوووووووة بس كلي شصار
-امشي دخلي جوه
مشيت لبيتهم
امة طلعتلي اباوع بوجوهم
ام رضا تمسح دمعتهة بفوطتها
ورضا مالة خلك حتى يحجي
-اكيد صايرلة شي
ليش اختفييييت رضا
-حكموا
ضربت على خدي
-ضاع اخوي مووووو
لزمتني ام رضا تهدي بيه
-زلمة معدل فرقودي والله يتحمل
-شگدددددددد فدوة شگد انحكم
-سنة
لطمت على وجهي وطلعت راكضة
لبيتنة تلاكيت ويا ابويه وهو شايل بطلة جوه ابطه
بالباب
-بنت الكلببببببب وين دايحة
-حكمووووو فرقد انتتتتتت الوين جنت انت وييييين داااااايح
انهاريت واني ادفع الباب وادخل للبيت وهو يدفع بيه
حيل وگعت على وجهي بباب الهول واطراف التنك اللي
مبنية منة الحيطان شگگت اديه
سحلني من الشال خنكني
-گووووومي بنت الكلب طووووولان لسانج
على صوتة طلعت خالتي و غِنى تسحب بية وهو يعيط
-كوو**د ماوراكم بس التعب اخوووج هذا التلطمين علي اكبررررر عاق وجاحد
ضام الفلوس وفلوس بطل لو جگارة گوة يناوشني بمنية
الله سلط علي الحرامية وطيح حظه
وگفت ولأول مرة هيج اواجهه بعد عمر من التعب
-شقدمت وشسويت حتى تريده يبر بيك
شنووووو القدمته
ضربك اهانتك خليتة يصير رجال وهو بعده
طفل ١٢ سنة وطلع للشغل
تمر ايام كاتلنا الجوع وهو طفل يركض وره
سيارات الزبالة ينبش حتى يطلع حق اكلنا وشربنا
وشررربك انت
-بت القندرررررة كبر راسج فرقد الك**د وصار لسانج
شطوووووولة كلج بطول زري
ششايفة رررروحج بهالكلمتين التقريهن وحافظتهن
عبالج تطلعيييين من هالطهارة من تتثقفين
تبقين خلگ قندرررة مسحوووگة وعتيگة
عايشة ببيوت التنك
-بفضلك بفضلك عمرررررنا ماراح نسامحك
لا اني ولا اخووووتي ولا امي اللي مووووتتها بسوووووايتك حسبي الله ونعم الوكيل بيييييك
ضاااااع اخوووويه بسببك
تفرهدت من بين ادين خالتي و غِنى وهو يسحبني
من بين اديهن
بسبب الشرب والاكل والگعدة يملك قوة
عشرين شخص ملخني
مااعرف الضربات منين تجيني
اختفى صوته فجاة
رفعت راسي اله
خالتي لازمة چفچير وضربته على كتافة
گلب الدنيا تحول وحش كاسر
حار يضربمن
مُنى من الخوف شردت للغرفة ختلت
وهو تعب وطلع بره
يفشر ويغلط
تگابلنة اني وخالتي و غِنى
بوجوه متجهمة خالتي باوعتلي
-بالله شمحصله منجن اني غير الضرب والاهانة
راددتهة غِنى
-محد گالج دافعي
-ماميتة عليج خفت على مناوي گامت تبجي وخافت
اباوعلهن يتراددن
گمت تاركتهن غاطة بكرب عظيم مو معقولة
يصير هيج سنة كاااااملة بالاحداث
شلووون راح يعيش وهو هادي وبرقة جنح
فراشة مايتحمل
صاحت خالتي
-وين جنتي وتخبل علينة عويمر هيج ولج شصار
بدون ماالتفت رديت
-حكمو سنة
سمعت صوت شهگة غِنى
وضربة خالتي على رجلها
طلعت مُنى من الغرفة من شافتني دخلت
ووجهي متدمر من البجي والضرب
شمرت فراشي بالگاع
ولأول مرة من سنوات مرت
أهرب من الحزن للنوم
نمت لوقت غير معلوم
وهم تركوني
كعدت على صوت غِنى
-صِبى گعدي هذا الفگر خبصنا خبص يدگدگ
فزيت كايمة للشباك عدلت شعري
فتحت الشباك رضا واكف ومسنود علي
-ها حبيبتي
احس گلبي مادگ مثل كل مرة اثر هالكلمة
بسبب حزني على فرقد
مدلي ايدة بكاكاو وجبس
-ادري بيج ماتاكلين
فتح تلفونه وشغل اللايت
باوع لوجهي وعيونه مفتوحة بغضب
-شنووو العادي
-من بعد فرقد ماكو شي مهم
بجيت بقهر وحرگة على ظليمتنا
دار وجهة يستغفر لحد ماسكتت
-باجر رايحله اني وبقية الولد جماعتنة
باوعتلة بتوسل
-اخذني وياك
-مستحيييييل تعرفين شنو احداث
-سجن
-مو سجن عادي سجن مراهقين صغار متهورين
شلون اخذج
-مااگدر والله اطگ وأموت اذا ماشفته
-باجر ارهمهه واخلي يحاجيج
-لا لا ارررروح اخذني وخالتي تروح ويانة بروح ابوك
باوعلي محتار
-وابوج
-ميجي مدام عنده شرب مايلفي
-اخذج بشرط
-تم والله
-تغسلين هسة وتاكلين وترتاحين وجهج تعبان بس يشوفج فرقد مايرتاح ويبقى مقهور
-اي والله هسه
-لا هسة ابقي يمي
لزم اطراف اصابعي يمسح عليهن بهدوء
سحبت ايدي مسحت رموش عينه من التراب اللي
محاوطهن
-بعدج ترديني اصير
ممثل واني بهالوصخ
والمزابل
نفخت بوجهة ابعد بقايا الغبار عن رموشه
-صير اللي تريدة حقق التحلم بي
-تعرفين حلمي
-تهاجر وتتركنا
-اهاجر حتى اسويلي مستقبل
الكم انت واخواتي وامي التعبانة
بس ماجاي الگة فرصة تساعدني
بقينة نحجي لحد ماتعب
وراح
رجعت لفراشي بانتظار الصبح
الساعة ب٨ رحت لخالتي گعدتها
ماگالت لا لبست وراحت لبيت أم رضا
ربع ساعة ودگ الباب
فتحتة رضا لابس وجاهز
ركضت لبست وطلعت ويا
مبتسم ومغمض عينة بسبب الشمس
-صباح الخير
-شبيج خل ابوسج من الصبح عاد تنفتح نفسي
رفعتلة عيني وهزيت ايدي
-اي مو احنة بتكساس
-ليش بس بتكساس يبوووسون
لزم ايدي بسرعة باوع منا ومنا
باسهة ونزلها ويا طلعة خالتي منهم
طلعنة ماشيين تلاگينا ويا بقية اصدقائهم
راحو بسيارة واحنة بسيارة
همست لخالتي
-خالة ماجبناله شي ماكو لا فلوس لا شي ينأكل
-عندي ١٥ الف راح انطيهن اله والله كريم عالجايات نسويله هالموجود
تحمحم رضا وحاجاها
-خالة اني ماخذله فلوس معليج
-تعبناك ويانه
-اهلي انتم ماكو تعب
مشت السيارة لحد ماوصلنة
البناية وبين اجراءات وهوسة دخلنة
ربع ساعة گعدنه وفاتو الشباب للمواجهة
اللي جايين أهلة واللي جايين اصدقاءة
وهل وجه فرقد علية مثل ميهل العيد
وگفت وبودي اركضله
تقرب من خالتي باسته
ورضا حضنه
باوعلي ابتسم
سحبني جوة جنحه
-اكببببر عنودية وراس يابس
غطيت وجهي بيدي
-مااگدر اموووت بدونك
بجيت وهو حاضني
-ولج انفضحنا خشمج لتمسحي بيه
ضحكت وعدلت گعدتي وهو يسولف
-والله مرتاح نظام وماكو فوضى ليش عيونج
هيج حايرة وخايفة
-ابوووية ميقبل يسوي اي شي
-ومن يمته ابوي يسوي خلي حكم وانحكمت ماكو
فرصة بعد
-وتبقى سنة
-ولج ٩ أشهر اذا حسن سير وسلوك
وانت تعرفين اخوج مؤدب
ضحك رضا وضربة على ظهره يمازحه
بقو يحجون
اصدقاءة البقية بسرعة سلمو وطلعو
وخالتي مدري ششاورته طلعت الفلوس
تخليهن بيدة رجعهن
-مامحتاج والله كل شي متوفر هنا
والولد ماقصرو كلهم
وكفنة من صاحو انتهت المقابلات
تحركت ماشية خالتي
واني حضنته
-ارجعلي ترة اموت وراك
-راجع والله حسبيها استراحة اليه
همسلة رضا
-ترة يشتكون منها بالبيت لا اكل ولا شرب ولا دوام
باوعلي بزعل
-وتعبي المن جان مو علمودجن تداومين بروح امي
والبنات بالج عليهم
ممنوع تهملين دروسج داومي اريد من اطلع
الگاج عابرة للرابع
هزيت راسي ووگعت دموعي
تقرب باس راسي وهمس
-بروووح امي اذا تحبيني بعد لا تجييين ابد
لا انت ولا اي وحدة من البنات حلفتج بعد
تركنا وطلعنة بعد ماصاح الحارس
لأن تأخرنا
مشينة واني أحس نص گلبي بقى هناك
رجعنة للبيت وكأني تركت الحياة هناك ورجعت
خاوية
مرت الأيام اداوم وادرس واشتغل
واساعد اخواتي بس بدون روح
داومت ومرن شهرين احس گلبي بي مثل الجمرة
على فراگة گمت بالزيارات ادزله رسايل ويرد
علية ويا رضا ويوصيني ان مااروح للسجن
مرت الايام وبدت ملامح غياب فرقد
تبين وتأثير الشي البسيط اللي جان
يشتغلة صار واضح صفينة من بعده رماد
البيت فارغ من كل
شي ممكن ينأكل رضا يساعدنا بس اني انقهر
ابوية مو جبير بالعمر وبعدة قوي
ويگدر يشتغل بس تعود عالگعدة
وخالتي تحف لو تبيعلها حاجة لاگيتها
بس المنطقة تحت خط الفقر يادوب نطلع شي
بديت ارجع الفلوس بيد رضا
لأن هو يروح لفرقد ينطي مصرف
واكل وكل شي يحتاجة
اسبوعين هو زعلان مني لا اشوفه ولا أسمع
صوتة
الى أن قررت
لبست ملابس فرقد مال الشغل
ولفيت وجهي وطلعت فجرية
ويا طلعة ولد وبنات المنطقة اللي يشتغلون
رحت وگفت على جهة منتظرة تجي
السيارات
التمو الولد ورضا وياهم
اجت السيارات نزلت الگط شيجي بطريقي
وايرات نحاس
ماكو نص ساعة بنص الفوضى
وانلزمت ايدي
سحبني رضا وهو شبه راكض
ورة تل التراب البعيد عن الهوسة
جر النقاب اللافة بي وجهي
وبكل قوتة ضربني كف
ماحجيت ولا بجيت
بقيت اباوعلة مااعرف انقهر منه
لو علي
من شافني ماابديت رد فعل
رجع النقاب على وجهي
ودفعني يمشي وياي
وصلنة للعبرة
عبرني الجذع والباب دفعها انفتحت
-حسابج بعدين
دار وجهة ماشي
نزعت الملابس غسلت وتمددت بفراشي
للظهر ماطلعت
دخلت خالتي الغرفة
-گوووومي المسعدة خل نشوفلنا شي ناكله
ابوووج السگط اجه
وانت ام عزة النفس والكرامة متاخذين من رضا شي
هاي تاليتها باقين عالحصة ناكل
-نعمة الله ورضا ماملزم بينة كافي علي مصرف فرقد
عيب عندة خمس نفرات يوكلهم مو فوگ حملة احنة ماعدنه احساس ونزودها علي
-وابووووج
-يااااااكل المووووجود
-گووووومي انت گليلة
طلعت الف بشعري وهو متمدد
بالهول مشغل التلفزيون
-شعددددجن زقنبوت
-راح نسوي تمن وعدس
-بتتتتتت الكلب هم عدددددس
-هذا الموووجود يابه
قابل نبووووگ
وگف وهو يسحب النفاضة من الگاع
-عليمن تصيحين
-ماااصيح يابه
-لااااااا لسانج طولان
ضربت حلگي
-هااااااي سكتتت
-دبررررن نفسجن اريد اكلة براسها حظ
-اطلع انت اشتغل يابة ربع ماكو بالبيت
تقدملي وعيونة طاگة دم
-تعلميني بت الگ**ة
-لا تفششششر يابة حرررام ميييتة والله حرام
-حررررمت علييييجن الراحة
دبررررن غدة براسه حظ لعبتن روووحي
-ماكو غير العدس
-والله لأنعل امج تعانديني
دفعني حيل وگعت بباب المطبخ
نكتت نفسي وگمت
-لا تسسسسسب كافي انت المسؤول انت اللي تجيب
واحنة نطبخ
-اييييي مگذلات ومدللات بنات النعل
-ايييييي بجالك تدللنا
بهالكلمة وكأني فتحت على نفسي نيران
جهنم
ركضلي بسرعة ايدي اللي ساندتها
عالحايط بكل قوتة ضربها
صوت فرقعة العظم
دخلت مسامعي ويا ماضرب الألم
جسمي وانسابيت اعيط بالگاع
خالتي ركضتلي وياهة غِنى
وهو يعيط
-گ***ب كلجن
والله لأربيجن من جديد والله
تقدم يريد يضربني ودفعتة خالتي
-كسررررت ايدها كاااافي ولك كافي
ماسمعلهة بكل قوة ايدة خمط وجهي
اصبعة دخل بعيني عطت
وهو وخر
باوعلنة
-شوووووفن انت وانت وانت الثالثة جبيرتهن
الأسمع صوتها يعلة اشگها شگ فهمتن لو أعيد
طلع وهو يرعد
روحي راحت وخالتي تگومني
-گومي العنوووودية گومي
مااگدر احجي شي عيني تهمل دمع
واحس بيهة نار مشتعلة
ايدي ألمها يضرب بگلبي
وخالتي تحجي علية
-ربع ماعندي شلون اخذج ولج ايدج
مكسورة
-مااااروح خليني بس مدديني
عاطت غِنى
-عينج دم متروسة انجببببي
طلعت راكضة من الباب
دقايق ورجعت
-گوووومي البسج
-انجبي بالله صوتج راح وروحج ساحت من الألم
-وين رحتي
همستلي
-مارررحت للفگر ادري بيج مزاعلته
هذا سامر جاي لأهله نازل وگتلة واجة منتظرنة بالباب
جرتني لبستني وشمرت الحجاب على راسي
وطلعنة بره
سامر جيرانة ولد شاب بالعشرينات اشتغل سايق
عند عائلة وضعهم زين يبات بكرفان يمهم
هم حراسة وهم خاف يحتاجوه ويجي
بفترات يناوش اهلة مصرف ويروح
سلمت علي خالتي وصعدنا
طلع بينة لمستشفى حكومي
دخلنة للطوارئ گص باص وبعد الأشعة
تبين كسر بمعصم ايدي اليسار
اما عيني خدش بالقرنية عقموها ولفوهة
وايدي جبروها
ورة ساعتين خلصنا ورجعنة اجا اتصال من اهل الشغل
قبل لنوصل منطقتنة عالشارع ندست خالتي
-خل ينزلنة زحمة
وكفتة خالتي وكوة خلانة نزلنا وهو يعتذر
امشي وهي تسندني
عبرنة نص المنطقة وصار بوجهنا رضا
فتح عيونة مستغرب
وگف سلم واني تركتهم ومشيت
للبيت تلكتني غِنى و مُنى حضنتني
ماگدرت ابقى گاعدة
نمت بعد مااخذت المسكن اللي كتبة
الدكتور
حسيت على ادين غِنى تگعدني بنص الليل
-نريد ننطمر گعدي لروميو
گعدت غطيت نفسي بقمصلة فرقد
وفتحت الشباك بس شافني رخت
ملامح وجهة
-انت ممجبور بينة ابوية رجال بعدة بحيلة شنو معناها اخذ منك مصرف وهو ياكل ويشرب بلاش
-الكم الج انت واخواتج وخالتج انتم أمانتي
فرقد وصاني عليكم
-اني بس اصير زينة ارجع اطلع للمقلع
-والله حظج اطيحه اذا سويتيها خاف سكتتلج
-اي صح سكتت والراشدي الأكلته
امي ضربتنيا
-انت ماعايشة برة وشايفة اللي يصير ويا
البنات اليشتغلن
بشغلتنة
-ماعلية بأحد
-عليييييج عليج عبالج كلهة مثل فرقد ورضا محترمة
الشباب متخبلة بس يشمون ريحة بنية يهجمون
-خليني ساكت
سكتت وهو امتدت ايدة رفع الضماد عن عيني
شغل موبايلة
-احترگت لشة الخلف أبوووووووج
خليت ايدي على عيني
-سهلة يوم يومين وتطيب
-وايدج
-الحمد لله اليسرى مو اليمنى
-والله حيرة اخذج منهم بس وين اخليج
دنيتنا ضيگة وماتسعنة
-لا تحتار والله ماكو شي
مد ايدة بيهة فلوس
مد ايدة لجيبة الثاني طلع ككاو خلا بيدي
وويا صرف الاف
-هذني مصرف للبنات للمدرسة
نزلت راسي واحس الغصة ترست بلعومي
وحطمت الباقي من گلبي
رفع وجهي بيدة
-هالوجه الحلو مايستاهل ينزل للگاع خلي راسج
مرفوع
-اكره احساس العجز
-طفلة انت بنية صغيرة لازم تتدللين مو
تحسين بالمسؤولية خليج وياي منا لمن يطلع
فرقد ولا تفكرين
-وتعبك
-يهون من اشوف عيونج
ماشايف هيج قبل
-عيون حول
ضحك وعينة بعيني
-شوف حور الحسن الماعاجبج متربع وناگع بنص
گلبي
-من جنت صغيرة ويعيبن عليه البنات
بالمدرسة ابجي جان عدنة معلم اسمة استاذ علي
گالي انت مميزة هذا يسمو حور الحسن يعني انت حسناء
-احلى حور هلك گلبي وطيح حظي
ابتسمت واني ارتجف برد
-بردتي دخلي دفي نفسج
يجي يوم واني ادفيج
غمز بعد هالكلمة وراح يعبر مثل كل مرة ويغني
دخلت فراشي
دفيت نفسي ونمت لحد وقت الدوام فزيت
ماقبلت المديرة گالت لو باقية بالبيت احسن لأن تخربطت وودوني يمهة
عيني مابطلت تذب دموع ووصاخة
خفت منهة لحد ماتورمت وگمت مااشوف بيهة
اخذت اجازة لثاني يوم
ورجعت للبيت لگيت خالتي هي وابوي عالگين
-جيب الفلوس ولك استحي على نفسك
جداااااوة الولد انطانياهن اصرف عالبيت شناكل
-اكلووووو قنادر عتگ جييييبي
جر الفلوس منها جر وطلع على وجهة ابتسامة
-شدرا عدنة فلوس
فاتح جزداني واني اشتغل بالمطبخ
عود فرحانة امداني اريد اتسوگ
والله مليت ولجن ملييييت وتعبت
انحرمت بهالدنيا من كل شي
لا بيت ولا رجل ولا جهال
حضنتها مُنى من رجليها
گعدت هي بمستواها
-انت مو تگولين انت بنتي
-اي والله صدگ
باستها ووخرت
باوعتلهة مو جبيرة خالتي ببداية الأربعينات
حلوة مملوحة ولسان اصلاً ماادري شلون قبلت
بأبوية
رحت للغرفة طلعت الصرف العندي
ورحتلهة
-هاج خالة بس خلي الف للبنات للدوام
والباقي ندبر حالنا بيهن
اخذتهن ضمتهن واني رحت گعدت بالغرفة
اخذتتي غفوة تعب وألم ماحسيت بس على
مُنى اجتني تركض تگعدني
-تعاااااي صِبى اكل يخبل
گمت وراهة لگيت خالتي بالمطبخ
بيدهة علاگة جبيرة فتحتها بيها صينية تمن
فوگهة دجاجة مشوية
وياهة خبز ومرگ
وعلاگة ثانية مليانة مخضر وبقوليات ناشفة وزيت
-منين خالة منين هالمسواگ
-اسكتي مُنى شايفة جهال المنطقة ملتمين على سيارة مساعدات وواگفة وياهم
وصلها الولد الجايبهن بالغراض للباب
وراج يجيب بعد
باوعتلهة احير بين الكرامة وبين الماكو
اندگت الباب رحت فتحتها
شاب أسمر بشعر خفيف
وطول فارع بقمصلة جلد وبنطرون اسود
باوعلي مستغرب
-هاج عمو
اخذت العلاگة من ايدة
بقة ثابت بمكانة يباوعلي
-محتاجة شي علاج دكتور لعينج
-لا شكرا ربي يوفقك
دخلت سديت الباب قبل ليكمل
انطيت العلاگة لخالتي
لگيت غِنى لازمة ماعون تصب وتغني
-مجديييي يجدي من مجدي والله يرحمك ياجدي
-نعمة گدامج حررررام
-اييييه يا صباوي صرنة ناخذ مساعدات نجدي يعني
سكتت واني اباوعلها
شامرة هم الدنيا وراهة وكل شي تاخذة بمشاكسة وضحك
اجتني لزمت ايدي من شافتني صافنة
-أتشاقة والله نعمة الله ناكلها قابل احنة طالبيهم
همة وزعوها
-بالعافية
خلت الخاشوگة يم حلگي اكلت اللگمة ووگعت دموعي
نزلت الخاشوگة من ايدها
ووجهة غيم بحزن
-اني شبعت
-تعااااي اكلي ووكليني جوعانة اني
-والله تاكلين
-والله شبيج شوفي المرگ ويا فاصوليا
-اييييي فاصوليا وقيمة
صبينة احنة وخالتي وگعدنة بالهول ناكل
اكلت لخاطرهن مااريد احسسهن
بجزعي من هالوضع الكسيف
لمت غِنى الاكل وضمت خالتي الباقي بالثلاجة
باوعتلي غِنى بخوف واحنة داخلين للغرفة
-عينج تدمع دم
مشيت للمرايا
اباوعلهة ترشح دم ودموع
-لازم دكتور يشوفج
-اسكتي لاتزيدين الحمل على خالتي
بس دفيلي شوية مي وگطن خل انضفهة
-هسة تبقين تك عين بسبب سوالفج
-غِنى خالتي هم ايدها مربطة
ورضا بس يسمع يشمر الاكو والماكو عليه
اسكتي وانطوني قطرة من الطوارئ استخدمها
سوت اللي گلتلهة علي
نضفتهة ومر اليوم والورا والورا
واسبوع ابوية مختفي وعيني خف
ورمهة
واني بالي وروحي وكل حاسة بيه
تريد شوفة فرقد بس
رضا ميقبل ياخذني ويا
وخالتي تگول حلفني اخوج مااودي وحدة
منجن للسجن
الرسائل اللي يدزها بخطة الحلو
صارت سلوتي اطلعهن كل يوم واقراهن
لحد ماتتعب عيوني
والايام جرت بعضهة لحد ماامتحنت
البنات اخواتي نجحن
واني منتظرة النتيجة
وطلعت النتيجة ناجحة للرابع
وهيج مرت خمس أشهر على سجن
فرقد أبوية بعدة على حاله
ماتغير شي غير غيابه الزاد عن حده
وطلعاته المالها داعي
تاركنة ورا بدون اي شي
رضا لازال مثل ماهو ماتعدي ليلة اذا
مايوگف على شباكي
يسمعني كلامة الهادئ
ويدللني بأبسط وسيلة
غِنى بعدهة على طبعهة من تضوج
تخلي حمرة وصبغ اضافر وتفتح شعرهة
وتفرح نفسهة بأبسط الوسائل
وتنطوي الأيام ماخذة وياهة احلام
وسعادات صغيرة بسبب ضعف الحال
والفقر ضاع حلم رضا بأن يشتغل شغلة
زينة يجمع منهة فلوس ويهاجر
وضاع حلم فرقد بسبب كم شخص ميخاف
الله باگو تعب أيامه
وضاعت طفولة وأحلام غِنى بخزانة ملابس
مليانة الوان مبهجة بسبب سوء وضعنا
وحلمي بأن أشوف اخوي احسن
من الكل
دخلت الرابع أعدادي
بغياب حبيب العين
جان كل سنة يروح وياي بأول يوم دوام
يتمشى للمدرسة
افتقدته بشكل جبير باوعت على جانبي
ضل شخص ماشي ورايه
التفتت ووگفت تقدملي
رضا لزم ايدي
و غِنى تباوعله بطرف عينها وهو يهمسلي
-عرفتج راح تفگدينه گلت اخذ مكانه
طلع من جيبة دفتر ملون واقلام حلوة
-سنة جديدة ابديها بفرح أن شاء الله
ماباقي شي لفرقد بس يحجي بيج وبدوامج
فرحي وفرحيني بنجاحج
هزت ايدها غِنى كفخها ومشى
باوعتلي
-والله تالية هالفگريات مو زينة
-انجبي وامشي تأخرنا
دخلت المدرسة بهمة بعد ماسمعت كلام رضا
عن فرقد اجاني دافع استمر وأنتظر
يجي يوم يطلع بي
وافرحة بنتيجة تعبه علينا
ومرت الأيام وقبل امتحانات نصف السنة
وبنهاية شهر ١٢ من سنة ٢٠١٠
غِنى گعدت تراجع لأن ثالث
فرجعت للبيت بوحدي
وكالعادة ادخل من ورة البيت عندي
عبرة الجدول والجذع فد مغامرة
دخلت صحت كالعادة على خالتي
ماكو رد غِنى نفس الشي ماكو
تراجعت ليورة للغرفة دايرة وجهي
اريد التفت ادخل
وتكمم حلگي بقوة وحاوطتني ايد
رفعتني من الگاع تحت صدمتي
ومحاولتي للصراخ ...............
شكرا لزيارتكم عالم روايات سكيرهوم
