رواية بيوت الصفيح الفصل الثالث بقلم زهراء السراي
ثم يخرج شعورك من عينيك
لأن داخلك لم يعد يتسع
.
صِبى
_______________________
هذا شعوري واني اسمع صوته
وهو يضحك وضحكته تجلجل بالغرفة
بعد الخوف اللي صابني
وهو يكمم حلگي ويشيلني من الگاع
-صبيييييوة طلعتلج عالوعد
ماأستغرقت ثواني وآني ادفن راسي
بحضنه وابجي عن كل لحظة وثانية مرت
من دونة خلال الأشهر المرت
-اشششش كافي شوووفي باوعيلي طلعت
شبييييج
ايدي اخذت مسارها على وجها واللحية
الحلوة اللي مطولها
-رجعت فرقد
رجعت حضنته وهو يسحبني تحت جناحة
-شفتي مو ركضت الأيام واجيتج
اباوعلة بودي مايسكت وبس يحجي
-الصفنة مو الج صباوي
-أتمنى اشگ گلبي واخليك ببطنه وأسده عليك
واحميك من هاي الدنيا
-تعاي ولج شنو هالحنية المفروض اني اسوي هيج
-لا اني-اني الجبييييير ولج
-بعيوني صغير
ضحك وهو يسحب جنطتي من الگاع
-بشررريني الرابع شلونه
-سهل والله اسهل من الثالث ارجع وياي
اني وياك نقرأ سويه
-لا لا فاتني هووواي وبرگبتي دين لازم اسدده
لرضا ماقصر طول هال١١ شهر اگلج شنو
شوووو سنطة ولج
-مااعرف شو مختفين
-گوووومي بدلي ملابسج
وننتظرهم اطلعكم اليوم گومي
بدلت ملابسي وانتظرناهم دخلت خالتي و غِنى و مُنى
وشهگن باستة خالتي والبنات حاضناته
وهو مبتسم
سألتهم اني
-وين جنتو
-يم ام رضا الحبايب يردن حفافة التمن يمهة ورحنة وغنيوة اجت عالواهس
باوعتلهه غِنى صفح وهي ترجع تحضن فرقد
مسح على شعرها ومستمر يسولف
-مادام ابوي مو هنا مشتاقلكم والله وجوة ايدي
كم فلس خل اطلعكم نتغدة بمكان كلكم تحبو
وافقو وطلعنة اخذ تكسي مسافة بعيدة
وبينت الكاظمية
ومعالم القبة فرحانة واني امشي بصفه كل شوية
اجر ايدة اگرصهة يضحك ويطبطب على اصابعي
يطمني
زرنة وطلعنة برة لمطعم بسيط تغدينا
بقو يفترون منا ومنا واني ويا متگابلين
-ليش ماگال رضا فرقد يطلع
-حتى اني ماادري الضابط اجه بنفسة بشرني علمود سلوكي طلعوني تربية امي جابت نتيجة موو
ضحكت وهو يباوعلي
-عيونج الحول گامن يضحكن
-كل شي منك مقبول بس تعلمت منك عالغزل من تگلي
عيونج من عجائب الدنيا السبعة
-جانن ولازالن
شمرلي بوسة بالهوا وسكت باوعتلة فرحانة بي
-احجي بعد اروح فدوة لصوتك
-هيج فاگدتني صِبى
-ماتتخيل عندي حجي وسوالف يرادلهة سنة سهر
حتى اكملها الك
-كلهن شيليهن وشمريهن من صدرج
شيلي الهم والقهر وحطي بمكانهن سعادة
وفرح جاي
-كبرت فرقد
-اووووه كبرتني الظروف بس الشفتة بهالسنة سجن
كبرتني أكثر
-شراح تشتغل
-المعتاد علما اكمل ديوني وانطلق
-لا تگلي ترجع لشغل المقالع
-وعمالة هم تعرفت على ولد ابو مقاول
هم طلع وياي راح اطلع ويا عمالة من يحتاجني
--تتعب هيج
-المحتاج يركب الصعب واني محتاج اغيرلكم ولو شي بسيط اريد ارتب الغرف عالاقل بلوك بدل التنك الينكت ليل نهار
-اروحلك فدوة مابي شي والله الحمد لله اكو سگف فوگ راسنا
-سگف عن سگف يختلف خل نحس بآدميتنا شويه
استمرت سوالفنا لساعات لحد متعبنا
ورجعنا ماتحمل فرقد اخذنا رجلي لباب رضا
ودگة الدگة المميزة مالته يعزف موسيقى ويطبل عالباب ثواني واجة صوت رضا يصرخ
-وحق الله فررررقد
فتح الباب وحضنه وشالة شيل من الگاع يفتر بي
ويضحكون اثنينهم
-ولك يمتة طلعت عوووود باجر ناوين نجي اني والولد
-اخيك طلع حسن سير وسلوك
-الحممممد لله شايل همك والله
-ماراح انسى وگفتك ويا اخواتي للموووت
-ماكو موووت گول طول العمر خل نعيييش
ضربو كف بكف وتركناهم راجعين اني وخالتي والبنات
لگينة ابوي بالبيت
-هلا بالدايحااااات المدحمات وووووين موليات بهالغروب
طفرت مُنى بفرح
-طلع فرقد
-اي هلاااااا بخريج السجون
ارتفع صوت فرقد
-الية الفخر يابه
وگف ابوي عينة بعين فرقد
-هااااااه ربتك هالسنة سجن لو لا
-تربية امي اني مامحتاج احد يربيني
-تربية سگط
-رحم الله والديك يابه
-ابن الزمال ماعندك احساس ماگلت ابوي ليش مازارني طول ذيج السنة
-لا ماگلت جيتك ماراح تشكل فرق
-ابن گ****ة گ****د
-ابنك بعد شطلع
مشة تارك ابوي ورا دخل للغرفة رحت وراه
اباوعلة هو اساساً طويل طولان بعدولحيته محددة منطيته اكبر من عمرة وسمنان ووجهة منور
-ها ولج صاير حلو مو
-طول عمرك احلى الشباب
-اني ماصايبني بالغرور وشوفة الحال غيرج
غمزلي يضحك
-افرشلك تنام يمنة اليوم
-ايييي والله تعبان ونعسان
فرشتله وخليت فراشي عكس فراشه
راس يم راس مثل من جنة صغار
وطلعت يم البنات بره ابوي گاعد بالهول
وبس يريد حكة خشم حتى يتعارك
غلست وعبرت صاحلي
-ها صبيوة رجع المقوي شوكتج ومكبر راسج
-حسه بالدنيا كافي لااريد يقوي شوكتي ولا يكبر راسي
رگعني بباكيت الجگاير
-سويلي زقنبوت
-تتدلل
-بت الزمال بالصدگ ماگالت اسم الله عليك
دخلت خالتي و غِنى يتبسبسن بينهن
مااعرف شعجب
سكتن من دخلت باوعتلهن بأستغراب شنو هالعلاقة المتطورة هاي وگفت خالتي تسألني
-شبي أبوج
-يريد عشه
-سم وزهرر هسة اسويله
-اذا تعبانة اني اسويله
-لا ماعندي شي
طلعت تاركتها و غِنى ورايه دخلنة الغرفة مُنى گاعدة على اكتاف فرقد ومطلعه ذراعة وزندة وتضحك
-كاتب اسم صِبى اووول شي
گعد وشالها يدغدغ بيها
-كلجن احبجن بس صِبى رفيقة الروح
اشرلنة گعدنة يمة منا ومنا گعدت بصفة جر راسي وراس غِنى على كتافة ساندنه و مُنى بحضنه
-وروح امي راح اعوضجن تعب ذيج
الأيام وراح اعدل البيت بس
لخاطرجن
باستة غِنى من زندة وعضته بسرعة وهو يجر بشعرها
-هددددي ولج غنيوة المجلوبة
-هااااا تكتب اسم صِبى على ايدك اول شي
-انجبن لاتزعلن من الجبير للصغير كتبتهن
رفع ردنة الثانية وكمل
-وهنا امي سويتلها مكان وحدها
ابتسم مقهور يعرضلنا الوشم كلمة امي
وجواها دموع واگعة
- ربي لا يشوفنة بيك مكروه
-جدددي بعد جدي
-انجبي غِنى شعدنا غيرة احنه
باستة غِنى من خدة وگامت
-اسويلك اكل
-لا راح انام طفولي الگلوب وياكم
تمدد بفراشه خليت راسي يم راسه همسلي
-كاسر ايدج وضاربج بعينج وبعدددد
-منووو حجالك
-مُنى حجتلي ليش بالرسايل ماتكتبيلي التمرين بي
-خلص من اروحلك فدوة الحمد لله رجعت انت
وكل شي رجع لمكانه اني اماني وجودك
كفش شعري يمازحني وهدأ صوته ربع ساعة انتظمت أنفاسه ونام وغطيت ويا بنومة عميقة تاركة بيهة الأرق ورة ظهري من سنوات وغافية براحة وكأن وجود فرقد يمي يبني حواليه سور حماية وهمي يقيني هم الأيام وأفخاخ حزنها
گعد ثاني يوم من الصبح فزيت ويا
طلعت للمطبخ لگيتة يسوي جاي
-صباح الخير فرفور
-صباح النور صبيووة
ضحكت ممازحته
-وين مغبش عيوني
-شغل خوما ابقى گاعد
-ارتاحلك كم يوم
-ولج شرتاح من الراحة شو جنت مكضيها
اكل ونوم خل اطلع الملي كم فلس
وانت شو بعدج ممبدلة للدوام
-راح اغيب علمودك
-دبدلي حبابة وگعدي البنات اوصلجن واروح
سمعت كلامة بدلت ملابسي وگعدت البنات
كلنة لبسنا وطلع ويانة يتمشى
-تحجبتي صباوي
-اي كااافي بعد كبرت هوووايه
-وانت غِنى ماناوية
-لا بعدني نونو
كفخهة واحنة ماشين يضحك ويسولف لحد ماوصلنا خلة بيدنه كل وحدة الف ورجع للمنطقة مر هاليوم بسرعة البرق بس اريد ارجع اشوفه رحت جبت مُنى ورجعنة للبيت بسرعةبدلت وطلعت ورة فرقد
للمقلع
وگفت على تل التراب من بعيد اراقب شفته هو ورضا يشتغلون انتبهلي واجاني راكض
-ها صباوي شعندج جاية
-عيني منك
ضحك واجة گعد يمي
-كبرنة بعد اني ١٨ شكبرني شگدني
وانت كبرتي وصرتي طحشة عيب تجين وراي
-مااگدر گلبي ماينطيني
-راح اشتريلج تلفون حتى اطمنج علية
بس لا تجييين وراية ولج عيب
سحبني ويا مگومني نكت ملابسي
-يلة ولج روحي سويلي غدة اتغده وارجع للشغل
مشيت وعيني منة لحد ماغاب خلف اكوام الزبالة
رجعت للبيت
اسمع صوت خالتي تحجي بصوت خافت
-ولج غنيوة والله خوش شغل ليش ماتسمعين الكلام
-لا بالله عبالي شغلة بمكتب بصخام
ثاري يردون خدامة
-عااااملة ولج عاملة خدمة بشركة شمالج
-لا عيني بطلت شنو اترك دراستي واخدم بالناس
-اني وياج بت الكلب
-حتى لو
سكتت خالتي ويا دخلتي واني هم ماناقشت مدام غِنى انطت رفضها ماكو داعي احجي گعدت اسويله اكل واساعد خالتي لحد الساعة ثلاثة يلة اجه
سبح وگعد تغده ارتاح ساعة ورتب نفسه
يريد يطلع
-وييين فرفور
-رايح لصديقي الگتلج علي
اتفق ويا عالشغل
-بوحدك
-لا رضا رايح وياي
-لا تتأخر فدوة
-ولج جوووووزي من التفكير والخوف
طلع وعيني وراه گعدت ادرس بس گلبي يمه ل١١ بين وبيده كارتونة جهاز حديث صاحني
-تعاي صباوي
فتح الجهاز وخلة بي خط
-هذا يمج يبقى بالج علي ترى بالدين اشتريته
كفخني وگام يضحك صاحت غِنى
-واني بدون خط ليييش بت البطة السودة
-خط للبيت هذا مو خاص بس بصِبى
-خليلي خط بجهازي حبااااااااب
-هو جهازج منتهي
-ميخالف حباب فدوووووة
-بس انطيني مجال اشتغل فترة ومن عيوني
باوعتلي ورفعت حاجبها
-عيني موووو بس انت يدللج
مشت تاركتني واني كالعادة گابلته وگعدت استجوبه
-وين الشغل
-بيت جبير بالكرادة يرموو واني ورضا راح نطلع
وياهم شغلهم كلة بالليل شباب
ويانة كلهم مثلنا يشتغلون شغلتين
-خوووش
رفعت التلفون باوعت للكاميرا ندسته
-خل ناخذ صورة
تقرب بصفي جعص وجهي وصورنا
ثواني وشمرت غِنى نفسها بنصنا
-صوووووروني
صورنا سويه
وگمت اقرأ
قبل لا اطلع من الهول فرقد صافن يگلب بتلفونه رفعة يتصل وهو يخابر باوعت اكو تصوير فيديو
فتحته اسجل وهو يحاجي رضا
-ها رضيوووو جاهز لباجر
ايييي شبيك ميخالف الصبح نرجع مناك
گبل للمقلع حتى لو تعب
اريد قبل الصيف اجدد الغرفة للبنات
واسددك
ابتسمت لكلامه حفظت الفيديو ورجعت للغرفة
بين اكل وقراية وجه الصبح اندگت الشباك رحتلة
فتحت الشباك وعيونة الحلوة طلت
-صباح الخيير
-اليوم عصافيرج طايرة وفرحانة
-بوجود فرقد حياتي تنملي فرح
-ووجودي
-نفس الشي
-تحبيني بگده
هزيت راسي واني مبتسمة
-ادري جذابة بس ميخالف گولي احبك. -تدري انت
-گوليها شبيج
هزيت راسي رافضة مشة متحرك زعلان همستله
-رضا. -هممم. -احبك اني
سديت الشباك بسرعة خجلانة من ردة فعله
سمعت الباب اندگت عرفتة راح للباب حتى يروح هو وفرقد للشغل گعد فرقد لبس وطلع ويانة للدوام وصلنا ورجع لرضا لشغلهم بهاليوم جنت متميزة بعد ماانطتني المديرة شهادة تفوق رجعت للبيت طايرة
ويا دخلتي دخل فرقد واگفة لازمة الشهادة مخليتها ورة ظهري
-فرفور احزر شنطوني
صاحت غِنى
-انطوها شهادة تفوق
بلا لواگة طلعيهة اكلتي راسي طول
الطريق حتى تشوفيها لفرقد
ضحك وهو يسحبها من ايدي باوعلها ورفعهة باسها
وخلاهة على گصتة
هالحرگة خلت گلبي يرفرف
انملت عيني دموع
وهو يبوس راسي
-والله بطلة لا دورات ولا دروس خصوصيةسببببعة
-شيرررادلها ترة اني هم اگدر هيج اطلع
بس مابية حيل اريد اشد حيلي عالسادس
-انت هم سبعة
-بهالمناسبة جيبلي خط
-ولج اكلتي رااااسي ادررري ادري
اخذت الشهادة من ايد فرقد رايحة اطلع ملابسه حتى يسبح
-جيبي تلفونج وتعاي
اخذتلة التلفون صورني ويا الشهادة
وكالعادة ابقى اطگطگله صور وهو صافن لو يخابر
دخلت للغرفة ارتاح
بعد ماتغديت اجتني فطومة اخت رضا للغرفة دخلتها غِنى گعدت تسولف شويه
وبعدين سلمت وطلعت وياهة للباب
همستلي قبل لا تطلع
-هاي دزهة رضا
خلت الورقة بيدي وطلعت
دخلت للغرفة فتحت الورقة رقمة مكتوب وبصفة قلب صغير حفظتة بالجهاز
وبين تحاضير وشغل صاحلي فرقد المغرب
ويا دخلة ابوية للبيت
-صِبى اني طالع للشغل مو يظل بالج
وشوفي الخط مالتج بي رسايل مجانية
مو تتصلين اذا تردين دزيلي رسالة واجاوبج
-بس مو تخلي گلبي وياك حباب جاوبني
صاح ابويه
-وشبيك ماتگول هالحجي لأبوك
-وراي شغل في امان الله
دار وجهة وطلع يم الباب خله بيدي ٢٠ الف
-انطيهن لأبوي
دار وجهة وطلع عيني ورا اختفى بظلام المنطقة
سودة علية گلبة گلب عصفور خلاله فلوس رغم سوالفة ويا رحتله احاجي يباوع عالتلفزيون
ويشرب جاي
-اخوج خريج السجون صاير مايحترم
انقهرت واني اعصر الفلوس بيدي
-هاك يابة دزهن فرقد
اخذهن يگلب بيهن
-امدا وامدة فلوسة ٢٠ الف متعب نفسة ابن العار
تركتة وراي يدردم ويصيح لخالتي تسويلة عشه
ثاني يوم جمعة فبقيت للفجر عيني تترقب التلفون
گلبي طگ دزيتله رسالة
-فرفور شو مااجيت
مارد علية ساعة ودگ التلفون
-صباح الخير صباوي
-صباح العافية شو تأخرت
-بالمقلع ذابين كيبلات لحگنة عليهن اني ورضاجاي نحرگ بيهن
-اجيك
-حتى اشلع اذاناتج
-مو تتعب هيج
-سكتي الرزق يحب الخفية
مدام وياية رضا ماخذني الواهس
روحي نامي اني اجي من اخلص
-لا تتأخر
-حااااضر ماما
گالهة وهو يضحك وسد التلفون لمن تطمنت يلة نمت
الصبحية بحدود العشرة رجع فرقد تعبان دخلي للغرفة
-هاج صباوي خلي ذني يمج
مدلي ايدة بمبلغ اخذتة ضميته بخانتي هو شمر نفسه بفراشي بدون كلام وغط بالنوم
وهكذا استمر فرقد أيام وليالي دخلنا سنة جديدة
٢٠١١ وامتحنا نص السنة ونجحنا
وفرقد مايكل ولا يمل يشتغل بكل طاقته
اول شي سوا جمع من فلوس العمالة
٤٠٠ الف انطاهن لرضا اللي زعل منه
وگوة تقبلهن
وراهة كمل تجميع يمي ويشتغل متواصل
لحد ما عطلنة نهاية السنة بعد نجاحنا
بالعطلة اجاني فرحان
-جيبي الفلوس العندج
-ويييين فرقد فدوة لا دراجة ولا غيرهة اخاف عليك
-لا ولج جييييبي بسرعة
طلع راكض الصبح ورجع الظهر صاحلنا اني والبنات
-تعااااالن بسرعة مدام الناس ببيوتها ومحد اكو
طلعنة لگينة بلوك هوووواية بالگاع ورمل ومواد
لمعت عيونة فرح وهو يحجي
-راح اسوي البيت غرفة غرفة ابني
وهاي غرفتجن والمطبخ اول شي
وراهة اخططلي غرفة صغيرة استقر بيها
بعيد عن دوخة ابويع
-لا فرفور اول شي غرفتك
حباب رتب مكانك واحنا وراك
-هو انام يمجن منا لمن ابني
هسة سمعن عندي شغل اربع ايام
ماارجع للبيت طالعين لأطراف بغداد
بيت بناء وفترة اجمع فلوس الشيلمان وابلش بناء
جمعنة جوة جنحة ممازحنا
-بس من تتزوجن موتنسن اخوجن تذكرن الدلال ياقرووودة
وهيج جان فرقد مثل النحلة بهمتهه ونشاطها
رجع يجمع يمي وتكون مبلغ مليون ونص جان ناوي
يجيب بي شيلمان للغرفة وبقية المواد واصدقاءغا
يشتغلون الة
جنة مقبلين على بداية الدوام وكالعادة فرقد غايب
عن البيت ليومين رجع منهن هلكان بس الفرح يمطر من عيونة
وهو يدس بيدي علاگة صغيرة ملفوفة
ويهمسلي بفرح
-لزمي هاي مليون ثاني الظاهر راح اسوي غرفتجن
وغرفتي صرت لازم اگعد بغرفة
ابتسم ابتسامة مااعرف جانت بيها
مثل الضوه وشرارة نور طفحت من عيونة ونزل راسه
-اخوج طلع عندة گلب ويحب
احس نبتتلي بهاللحظات جناحات
-احلف بروح امي
-والله
-فطومة اخت رضا
ضحك وحك جبينه
-هيج واضح
-مثل قرص الشمس
جريت ايدة عضيتها وهو يكفخ بيه
-مجلوووووبة
-والله اذا تعزهة وتحبهة اكثر مني
العب بييييك لعب
جرني جوة جناحه
-شلووون احب احد اكثر منج وانت وامي اثنينجن متساويات بنفس الخانة
-تتزوجها
-فد سنتين خل اصير ٢٠ وهم الم نفسي
-يمممممة واشوفك عريس يمكن
ساعتها گلبي يوگف من الفرح
-لا لا اريدج عدلة مو ميتة حتى تهوسيلي
(انچب ياالشامت چد ذراعة وعرس بي)
-اي والله صدگ
سحبت ايدة بايستها وهو يهمس
-ضميييهن ركضي ابوي جوووه اسمع صوتة گعد
واني راح اطلع طلعة بيهة رزق
-فدووووة لا ستوك رجعت حباب ارتاح
-لا تعرضيلي صبيوة
باوعتلة تعبان سودة عليه
وركضت بالفلوس ضامتهن واني اسد الخانة مالتي
دخل ابوية وهوو قليل اصلا يدخل غرفتنة
ستوة گاعد من النوم مسطول يباوع
-خالتكم وين
-عدهة حفافة راحت يم النسوان
-سوولي ريوگ وراي طلعة
رحت سويتلة ريوگ وفرقد جهز غراضة
وطلعت ورا
-ها عيوني رايح
-اي وليظل بالج مثل كل مرة
دزي رسالة واتصل بيج خوش
-تمام
طلع واني رحت للمطبخ اجيب اكل لأبويه
صاحلي وهو بالهول
-هاج هاي خمسة جيبيلي قوطية لحم
مشتهيهة
باوعتلة
-سويتلك اكل يابة شتسوي باللحم
-لا تراددين اگلج روحي
-روح انت يابة بين مااخدر جاي جديد
شمر دولكة المي اليمه بأتجاهي
-بت الزمااااااال روحي
مشيت واني العن الدنيا اللي خلته اب النا
اشتريت قوطية اللحم ورجعت للمطبخ اگلي بيها
اجاني صوتة
-صِبى اني راييييح
باوعتلة من باب المطبخ للهول
-والاكل
-خلي عندي شغل رايح اسبوووع وراجع
استغربت
ابوية وعندة شغل من يمتة هاي
ردت اروح اسد ورا الباب
صاح
-اني اسدة في امان الله
طلع مسرع بس صدى صوتة بقى بالهول
طلعت مستغربة شنو هالادب النزل علي
يسلم ويسد الباب
كملت الريوگ وانتظرت خالتي اجت وياها غِنى اللي لازم كل يوم تروح لفطومة اخت رضا
و مُنى اللي تلعب ويا بنات المنطقة
-تعالو تريگو
صاحت غِنى
-شنو هالدلال
-ابوية اشتراها شو من سويتها گال
لا اني طالع ويگول اسبوع وأرجع
خالتي حجت بأستخفاف
-الگ***د مسويلة عملة مادام
راح يبقى أسبوع
يومين مرن هدوء بدون ابويه واني اراسل رضا اطمأن على فرقد لأن يزعل اذا كل شوية اتصل
ومشى الأسبوع اللي المفروض يرجع بي أبوي
وبيوم بعد رجوع فرقد صبحية
سلمني مبلغ اضمة حتى يبلش مدام صيف
يبني ويرتب المكان دخلت للغرفة فتحت البوفية
رفعت الملابس اطلع القوطية صرخة صدمة طلعت مني ويا انهياري ولطمي على وجهي
دخل الكل يمي واني عيني على فرقد
شگلة فلووووس تعبك ماكو
-شبييييج انتلتي بالكهرباء
-لا
گلتهة وانفجرت باجية
وگفت يمة اباوعله
-الفلوووس ماكو
بهت وجهة وهو يباوعلي
-خاف مادورتي زين
سحبتة للبوفية
-باوووع القوطية كلهة مشيولة
نزلت ايدة من ايدي
والحزن احتل ملامحه باوع حوالي
خالتي بسرعة گالت وكأنها تعرف
-طلعة ابوك المستعجلة وظلته بره البيت
أسبوع هي السببب ابوووك ماكو غيرة طلع بدون ماينطق حرف ركضت ورا
-فرقد
باوعلي حتى مايگدر يحجي
ودموعه تفتر داخل مقلة عيونه الحلوة
مسح على راسي باس جبيني وطلع راكض
دخلت للبيت ونزلت أحزان الأرض ملت گلبي
واني اندب حظة المسكين
الشاب الصغير اللي ماشاف راحة
استلمتني خالتي اسئلة
-منيلة فلوس
-يريد يعدللكم البيت يريد يسوينه
أوادم
-ولج طلعتي دنغوزة وتگدرين تضمين السر
تركتهة وطلعت وگفت بالباب حايرة حزينة
منتظرته مااعرف شسوي وكأن ادية تكبلن بأصفاد نار
تأخر للمغرب ورجع مايقوى حتى عالكلام. -لگيته
-وين يروح قابل اول وتالي يرجع
خلال يومين فرقد ماطلع بيهن للشغل
منتظر ابويه حتى يواجهه وأجه أبويه وياليتة مااجه
ولا خطت رجلة البيت وجابت وياهة دمار
حياتي ونهايتها
ظهرية حارة وفرقد يفتر مثل اللي منتظر حدث
عظيم راح يصير ساعة يطلع من الباب الخلفية
وساعة يطلع برة يفتر بالهول لزمتة من كتفة مستغربة
ردة فعلة الصامتة
-فدوة بس احجي
-ضاعت مني حتى الحروف للأسف
ابوي موتني مرتين
مرة من خلاني مشمور بالسجن
وهالمرة من باگ تعبي واني اركض
بين ثلث شغلات
بالمقالع ادور بالزبالة كأني مو آدميييي
وعمالة بالليل
وظهرية مثل الزمااااااااال اطلع
اشتغل حمال للشورجة
انهار بأنفجار غاضب كأنة يحاول
يگل للدنيا كلها
ابوية ظالم ويلقي جبال همومه عليهة ويفرغ صدره من الحمل اللي أثقل كاهله
كمل وصوته تحشرج بالبجي
-ماطالب شي اني ردتجن ترتاحن ردت اني استقر
ماشفت من عمري راحة بس بالسنين الجانت امي عايشة بيهن دمررررني ابوووي صارلي عبببببرة
المثلي وعى على ابوووو يشررررب
وياخذ حبووووب ويزني
يصيييير مثل ابو يمشي ورا خطواته
الا اني خليتة عبرة ودرس الية حتى مااصير عالة
على احد بكبرتي اني نعمة والله نعمة المفروووض
يقدرني بس هو داسني وتعدى
ويا كلمته دخل ابوي مخربط وضعه
ماتعب نفسة فرقد بس بكلمتين
-فلوسي وين
-يافلوس
-النگرتهن وطلعت
-لا شايل فلووووس ولا ماخذ
ووووابتعد عني راسي راح ينفجر
ركض فرقد هاد بس توقف بآخر لحظة مستغفر رب العالمين
-ياااااااااااابة لاتخليني ارتكب معصية بيك
-ابن الكلببببببب تريد تضربني
-سؤال وجوووووابة الفلوووووس وين
تعبان بيهن والله ومال حلال
-لا ماخذ فلووووس ولا شايف قوطية
صفنة كلنة بوجهه وحلت عاصفة فرقد بالبيت
وهو يكسر كل شي بطريقه
وصوتة ارتفع ويرجف بشكل مخيف
-قووووووطيه بوووووووويه انت البگتهن ويييين
بعشر ايام صرفتهن عالشرب والگح***** والحبوووووووب
شمر التلفزيون للگاع كسرة سحب وايرات الستلايت شمر النفاضات
-ابتلاااااااااء انت رب العالمين جااااااااي يختبر
قوووووة صبري وجلادتي بيييييييييك بس خلص
خلصصصصص ماعندي صبر
تعبتني من عمري ١١ لهسه مامحلل يابة مامبري الذمة
على تعبي الهي تعببببببت كااااافي
هالدنيا الغبررررررة وناسهت تعبتني
اخذ هالعمر الگصير ماااااااااريده
اخذ عمرييييي ماااريد ابقى بهالعذاب
ركضتلة احضنه لأن صار يرجف
وجهة اصفر وشاحب
خالتي غسلت ابوية غسل ترزل بي والغريبة ابوية ساكت ويا ماسحبت فرقد اهدي
طالعة بي للطرمة بره يشم هوا اندگت الباب حييييل وصوت صياح وعياط مرة هرج الدنيا ورجف گلبي خوف
راد يروح يفتح سحبتة مانعته
ركض تاركني ورا اول مافتح الباب
شفت ام سلمان الخبازة وجها احمررر دم مشخط
وصياحها المفجوع
-ويييييينة ابووووووكم ووووينه
اندفرت الباب وفرقد يريد يرد
وارتفع صوت سلمان ابنها
وهو داخل يدفع بفرقد للطرمة
-ويييييين ابووووكم
دفعة فرقد يطلعه لأن اني بدون حجاب
-وييييييين مدرعم لك
بسرعة ومباغتة سلمان دفر فرقد
-گوو***يد نغ***لة والله والله اليوم احرگ بيتكم عليكم
ضربة فرقد بوكس بس هو جبير وجثل
مدگدگ وخريج سجون وحرامي
وكل عبر الدنيا وسيئاتها بي
بسرعة وگف بعد البوكس ودخل للبيت
على صوت عياط خالتي والبنات
وهو يصيح
-ويييييينة ابوووووكم الگ*****د
دفر البيبان واحنة نركض ورا نمنعه
دفر غرفتنة
ابوية خاتل يم الشباك فرقد ركض يدفع بسلمان
-برررررررة لك شو هاجم بدوووون اسباب
-ابووووووك الن****ل سووووووة المكسورة
وية اختتتتتتتتتتي وطفرررررررررر
خالتي گامت تلطم وفرقد وگف صافن وسلمان دفع فرقد يريد يتناوش ابوي اللي طلع لسانه
-يامكسوووورة هي سيبندي
اختك وجها جنة جوووووووب ياهو يباوعلهااطلع بررررررة ياعار وروح شوف منوالمسوووويهة جايني اني شنووووووو
ام سلمان تلطم وتصيح
-حبلة البت حبلة وحلفت يمين عالقرآن انت محبلهاحتى بالعلامة مطيهة مليون تروح تذب الفرخ خاف تنفضح
بهتنة كلنة وية صراخ سلمان
وركضة فرقد ناحية ابوية وهو يصيح
-فلوووووووسي شامرهن عالزناااااااااا
اثناء ماوصل فرقد لأبوي
ووگف بجانبه وهو ممسك بأكتافه يهزة
صاح
-فلوووووسي وتعبي ذبيتهن عللى نزوووواتك
صرخ سلمان
-مووووووو زلمة اليگعد عن حقه
كل شي صار بلمح البصر المسدس اللي طلعه سلمان من بنطرونة والطلقة اللي صوتهة شگ أذني وصفنة فرقد لثواني والرصاصة تخترق جسمه وتوقفت حركة الهوا وغياب الشمس ونهاية العالم الأعرفه
وصرخات خالتي وام سلمان واخواتي وانسياب فرقد
للگاع وصرخة سلمان للمرة الثانية
-موووووو زلمة الماياخذ حقه
اطلاقة ثانية تنطلق تحت فاجعتي توگع بأبويه وركضة سلمان وعياط امه
-كتلتهم ولك سلييييمان يممممة الوليد ماله ذنب
هروب سلمان وعياط خالتي اللي تمسكت بي وصراخ غِنى اللي طلعت للشارع تستنجد
واني وانتقالتي بدون ماادري
واني اخلي فرقد بحضني
تغلفنه اني ويا بغيمة باااااردة ظلمة تلمنة اني ويا
بس مو بهذا عمرنة لا بطفولتنا واحنة نركض جوة المطر متلحفين بالقمصلة العسكريةاللي لامتنة ومدفيتنه تحتهة عيني منة يضحك
-فرررقد منين ينزل المطر
-من عيون الناس التعبانة
-شلون
-من يصيب گلبهم حزن رب العالمين ينزل المطر
حتى يشفي صدورهم من التعب
-يعني هالمرة المطر دموعي لأن ابجي
على امي
-ودموعي هم لأن كل يوم اشتاقلهة
فتحت عيني بوجهة
شاحب هادئ لساني الثگيل گوه نطقهة
-فرقد حبيبي
ويا صوت العياط اللي رجع والموقف الواقعي
وخروجي من الخيال وصوت رضا المفجوع
-ولك فرررررررقد
صوت ناااااس هوووايه داخل البيت والهوسة
واني منزلة راسي علي مو مستوعبة
ثواني جثى گدامي رضا حضنة وهو يخلي خدة على شفاف فرقد وخشمة
-فررررررقد يابعد اخوك
صاح
-ياااااااولد بي نفس خل نشيله
ويا دخلة الشباب تحركت اصابعه
حضنت راسة حيل فتح عيونة بوجهي رادو يشيلو
باوعلي بس لمعة عيونه اختفت وحل مكانهة غيم اسود مبدد ويا كل حلم وردي حلمنا سوة
ويا همستي اله
-حبيبي
تنفس نفس حييييييل وكأنه
يستذكر اخر شهگة بهالدنيا وآخر نفس بيهة
ويحفظهة بذاكرته شخر وانتهى كل شي وغمضت عينه ويا لطم رضا على وجهة مثل
النساء الثكلى وعياط خالتي وبجي اخواتي
وصراخ الشباب صحبانهم
نزلت ايدي من وجهه وهمة يرفعو لأحضانهم
والبقية شالو ابويه المضروب عالجانب
ركضت وراهم وهمة يخلو بسيارة
بيكم احس بأيد خالتي تشمر على راسي حجاب
ركضت واحس الگاع تنطوي تحت رجلية
ورضا داخل السيارة حاضنه لحضنه
شافني صاح بصوت متحشرج
-شباب صعدو ورة خلوهة تجي
راحو ورة وابوية مشمور وياهم على ارضية السيارة
گعدت وسحبت راسه لحضني
رضا يحجي ويستفسر ويبجي والولد الگدام يسألوني
واني مااشوف غير عيونه
فتحت عينة بستهة
-شووووف اني ادري بيك ماتعوفني
اساساً اني عايشة علمودك انت اللي مصبرني على
كل شي هذا نفسك التعبان بهالدنيا هو المخليني مستمرة احلفك بروح امي لا تعوفني
فرقد والله اموت وراك
اتمتم بالكلام بصف عيونه ساندة جبيني علي
والولد مسرعين بالمشي كل شي بعدهة صار
ضبابي
نزلتنة للطوارئ وركضة الولد رضا وهو ياخذه من
حضني ملابسي الناگعة دم ركضتي وراهم
ونظرات الدكتور المتأسفة ووگعة رضا يم رجلين
فرقد كل شي مر بسرعة البرق
مثل سرعة مجيئة لهالدنيا وعمرة الصغير
وغابت الشمس
واختفى نورها
ويا رفعة عالاكتاف
بمنطقتنا الصغيرة
الفقيرة
وعلة صوت لا اله الا الله
معلن نهاية دنيتي
شكرا لزيارتكم عالم روايات سكيرهوم
