رواية ندوب الذكريات الفصل الثاني 2 بقلم سحر السحرتي

*نيجي بعد كده لبابا اللي قال مش هينقصنا حاجه 

*مش فاكره هو قال مش هيجيب حاجه ولا مش هينقصنا لانه فعلا كل حاجه بقت ناقصه .. حنانه اللي كان بالجرام بقى ما فيش ..  الفلوس بقت بالعافيه ... حتى بياتوا عندنا بقى نادر لدرجه ان ماما لما كانت بتبقى عايزه تشوفه لانه وحشها جدا كانت بتروح تشوفه عندها .. ساعتها بيفتكر انه عنده بيت ثاني واولاده و يتكسف ويجي معاها يشوفنا كام ساعه 

*بس طبعا بيلومها انها راحت عنده في البيت الثاني وكلام انا هبقى اجي وبلاش تتعبي نفسك 

*انا بصراحه شلت منه و بطلت نهائي اخرج اشوفه 

*ولما استمر الحال كده نزلت ادور على شغل جنب الدراسه عشان ارحم امي من مرمطه طلب فلوس منه ... او حتى اشيل نفسي 

سعاد :لا يا نادين يا بنتي انتبهي لدراستك

 :دراسه ايه يا ماما انت شايفه دخلني معهد سنتين عشان يعرف يصرف على مراته وعيالها وكمان اختار الحضور فيه يومين بس عشان لاقول له مواصلات ولا لبس ... بيوفر لهم على حساب مستقبلي 

:معلش ربنا يسامحه

*بكل ما فيا من غض-ب 

 :ربنا ياخده

 :اخرسي ح-رام كده انا ربيتك على ده .. احنا من غيره ولا حاجه .. بكره لما تتجوزي هتعرفي قيمة الراجل في البيت 

:قيمه ايه هو فين الراجل في بيتنا ما انت شايفه قاعد عندها على طول و بيجي ساعه كل اسبوع واكتر وطول ما هو قاعد يتنفخ زي ما نكون بنخ-لقه او قاعد في البيت غص-ب عنه 

:معلش هو تعب عشانا زمان كثير يا بنتي

: ده واجبه زي اي اب المفروض يكمل مش فجاه يفتكر انه نسي نفسه و يلاقيها مع واحده بعيالها واحنا بنات اولى منهم 

:خلاص يا نادين إذا عايزة تشتغلي انزلي بس اشتغلي في مكان كويس عشان ابقى مطمنه عليك 

:حاضر ما تخا-فيش انا تربيتك 

*مرت السنين و اتخرجت بدأت اخرج من وحدتي شويه بشويه وانا بحتك بالناس بحكم الشغل 

*بابا عارض موافقته على شغلي شويه منظرة مش من جواه و اقتنع اني بسلي نفسي وهو في الاصل مبسوط اني هشيل شويه من عليه

 *لغايه لما اختي جالها عريس واضطر يفكر في جهازها ووقتها لجا ليا 

:نادين انت معاكي فلوس

: ليه يا بابا 

:اختك جالها عريس و محتاجه جهاز

: طب ما تجهزها 

:انت عارفه الظروف 

:وهو حضرتك ما فكرتش في الظروف دي ليه قبل ما تفكر تفتح بيتين ...عموما انا كل الفلوس اللي كانت معايا كنت بديها لماما عشان تكمل مصروف البيت ... انا ممكن اقول لك على حل شوف كده عند مراتك اي حاجه دهب نبيعها نجهز بيها اختي وانا هدخل جمعيه ونحاول نرجع لها حاجتها ... المهم ان اختي تتجهز بحاجه تشرفنا قدام عريسها

: بقى عايزاني امد ايدي واخد  فلوس من واحدة ست حتى لو كانت مراتي  

:وهو انا لما بكمل مصروف البيت كل شهر ده اسمه ايه ... وبعدين الست الاصيله المفروض تقف جنب جوزها وانت بقى لك اربع سنين بتصرف على عيال مش عيالك اظن جه الوقت انها ترد الجميل وان الاوان تعرف هي ست جدعه ولا لا  ...ولا كانت بتضحك عليك 

*كان نفسه يض-ربني قلمين بس دخلت عليه من ناحيه ما يقدرش لا هو ولا مراته ينطقوا 

*القوه دي جات لي من تجربتي والشغل مع ناس مختلفه وبجد مش عارفه ازاي قدرت اتكلم معاه كده 

*بس الفرصه جات لي اني اخذ حق امي وما كانش ممكن افوتها

 :طب ايه رايك ما نبيع ذهب امك احسن ما أمد ايدي لمراتي 

:بصراحه من غير ما تزع-ق اللي في ايد ماما ده ذهب صيني احنا كنا لما بنحتاج فلوس وانت مش معاك ماما كانت بتبيع حته وتجيب بداله عشان ما تحسسكش انك مقصر

 :يعني كانت بتستغفلني 

:انت ليه مسميها كده ليه ما تقولش كانت بتحس بحملك وما بترضاش تطلب منك فلوس او تحسسك انك عاجز تصرف على البيتين و تتقل عليك ...هي كانت بتسند وراك مش بتستغفلك 

*ما قدرش يتكلم او ينطق ما انا بكلمه بالعقل

 :كانت تقول لي انها هتبيع ذهبها 

:ليه كنت هتديها ... ماما قالت لك عايزين فلوس ومحتاجين طلبات كنت بتقول مش معايا 

*المهم اقتنع ومراته طبعا رفضت تبيع ذهبها حجتها انه خساره .. ممكن يستلف الفلوس ولما يقبض الجمعيه يسدهم لان هيبيع الذهب بمبلغ و هيشتريه اغلى على اساس حساب المصنعيه او ممكن يغلى 

"هو طبعا اعتبرها فكره رائعه لانها رفضت فما حبش يحرج نفسه و يطلعها قليله الاصل .. غير ان الذهب ده هو اللي كان شاري معظمه لكن عمره ما هيعترف 

*وفعلا سمع كلامها واستلف واختي اتجوزت واللي قدرت اعمله معاها من وراه عملته 

*بعدها بشهر بابا سألني 

 :نادين انت هتقبضي الجمعيه امتى 

:جمعيه ايه يا بابا 

:مش قلتي هتعملي جمعيه عشان نرجع ذهب مراتي 

:وانت كنت اخذت ذهبها مش انت استلفت

 :اعتبريه ذهبها عايزه ارجع للناس فلوسها

: ما انت قللت الفلوس اللي بتديها لماما مصروف للبيت على اساس ان ندى مش معانا 

:وفيها ايه ما انتم اثنين بس

: ما انا كنت بكمل عليهم عشان نكمل معايش البيت هعمل الجمعيه منين ... انا كنت هعتبر ندى لسه موجوده وادفع المبلغ ده في الجمعيه ولما انت خصمته قلت انك انت اللي دخلت الجمعيه بمعرفتك

: بقى كده يا نادين بتضحكي عليا يا بنت سعاد 

:يا بابا يعني هناكل طوب هو انا بقبض الاف وانا خريجه معهد ده غير فلوس المواصلات

: لما الشغل مش جايب همه اقعدي في البيت

 :يعني انا غاويه مرمطه هنكمل دواء ماما منين ... اقعد وتكمل مصاريفنا انت انا ما عنديش مشكله

: انت غيرتي اتفاقك معايا 

:لا احنا ما اتفقناش تقلل فلوس البيت رجعهم و هعمل جمعيه زي ما قلت لك 

:مش هرجع ومش هدفع حاجه ثانيه عشان اعرف اسدد اللي عليا

 :يعني ايه مش هتدينا مصروف للبيت

: اه ما فيش فلوس علي ما اسد  الديون من جوازة اختك

: و اشمعنى هتسدها من مصروف بيتنا احنا مش من البيت الثاني

 :عشان اخواتك لسه صغيرين وعايزين مصاريف

: دول مش اخواتي لو نسيت ولو مصروف البيت بتاع ماما ما استلمتهوش في ميعاده ما تزعلش مني هاجي لك البيت و اطلبه قدام الجيران وعارفه ان طنط بتخاف من كلام الناس

بقلمي سحر السحرتي 

*ض-ربني قلم جامد و شدني من شهري 

*ماما جريت عليا بسرعه لما سمعت صوتي بصرخ 

:في ايه يا صابر بتض-ربها ليه

 :تعالي شوفي بنتك بتضحك عليا و بستلف ومش عايزه تساعدني

: تساعدك منين احنا ساعات بنام من غير عشا 

:ولما انتم كده كنتم بتجوزوا البنت ليه 

:نعم دي مسؤوليتك انت ... كمان ما كنتش عايز تجوزها كل ده ليه عشان مراتك وعيالها اللي هما مش عيالك اصلا ... ولا صدقت نفسك وهم بينادوا عليك ويقولوا لك بابا 

:انت كمان هتقولي لي زيها انتم متفقين بقى

 :لا دي الحقيقه ولا بنكذب عليك ح-رام بقى استحملت سنين اهمالك وذلك لينا واحنا بنبقى محتاجين بتاخدها من بقنا و تديها لها هي وعيالها ... واحب افكرك بنتك اللي اتجوزت جهازها مسؤوليتك ونادين كمان مسؤوليتك ولا الحقيقه دي كمان هتنكرها 

:لا اسمعي بقى انت وهي الكلمتين  دول مصروف البيت هدخل بيه جمعيه لغايه لما اسد جوازه بنتك وبعدين ابعث لكم اللي اقدر عليه 

*اتضايقت انه بيبيعنا للدرجه دي فقلت له بكل تحدي

 :الكلام ده ما يرضيش ربنا 

*بص لي بغ-ل وقال 

:اللي تقدري تعمليه اعمليه وده اخر كلام عندي 

*رديت عليه بحده 

:لو عملت يا بابا مش هيعجبك ولا هيعجب طنط لان في ايدي اعمل كثير 

*بص لي بتحدي

 :عاوز اخذ فكره عن حاجه منهم 

:من غير زعل هرفع قضيه نفقه لي و لماما و هنقسم معاها الفلوس بتاعتك و هناخذ اكثر من اللي انت بترميه لنا وكانك بتمن علينا و بأثر رجعي كمان لان اقامتك مش هنا ومش معاك اي حاجه تثبت انك كنت بتدينا فلوس وعندي شهود 

*بصي لي بغ-يظ ولسه هيمد ايده عشان يضربني بصيت له بتحدي اكبر

 :ابويا ومن حقك تض-ربني بس اي قلم هاخده هي وعيالها هياخدوا قصاده و هعمل كده ... انت بتظلمنا وجيت علينا كثير و صبرنا و مفكر ان انا ضعاف و بتظلمنا بزياده ... غير اني كل يوم هكون في الشارع بتاعكم بشحت اللقمه من الناس حواليكم لانك مش بتصرف علينا 

*زاد غض-به وغ-لواد عليا و مسكني ضربني وهو بيقول 

:يا بنت ال... (بتهديد )طب وريني هتعملي ايه وانا هك-سر لك رجلك 

بقلمي سحر السحرتي 

*ماما المره دي بعدته عني

: كفايه بقى احنا مستحملين كثير و ساكتين حتى اللي اتجوزتها عليا رفضت تقف جنبك جاي تكمل علينا مش قادر على الحمار روح افرد نفسك عليها واعمل راجل هناك 

: اتغيرتي قوي يا سعاد 

:الظلم و القسوه اللي شفتهم منك من ساعه ما اتجوزتها بعد ما كنت بعشق التراب اللي بتمشي عليه بقيت مش طايقاك بعد ما ذليت نفسي لما كنت بتوحشني واجي على نفسي واروح اشوفك عندها وهي بتطلع بقميص النوم عشان تكدني وكنت تدلعها قدامي و اعاتبك تقول لي بتحق-دي عليها عشان هي اصغر واحلى ... ربنا قال لك تعدل اكبر اصغر اوحش لازم تعدل ويوم ما هيسالني مسامحاك هقول له لا 

*بابا زعل من نفسه بعد ماما ما واجهته بالحقيقه و واجهه نفسها كمان لانها اول مره تسمع نفسها الكلام ده 

*ما زعلتش من العلقه على قد ما فرحت انها فاقت لنفسها و واجهته