رواية ندوب الذكريات الفصل الثالث 3 بقلم سحر السحرتي

*بابا روح يومها طلب الذهب من مراته رفضت

:انا بطلب الذهب اللي انا اشتريته اسدد ديوني طلعتي بنت ناس ووقفت جنبي هجيب لك قده مرتين بس على مراحل قليتي بأصلك شوفي مين هيصرف على اولادك

: هما دلوقتي ولادي مش كلامك ليا انهم ولادك انت كمان

 :والمفروض بنتي اللي اتجوزت تعتبر بنتك انت كمان ... هتقفي جنبي انا مش عندي 10 بنات هما اثنين قلتي ايه يا بنت الناس 

*فكرت ودورتها في دماغها لو ادت له الذهب هتكسب انه هيرجع ازيد من الاول وتطلع اصيله ... لو رفضت مش هيصرف على العيال ويمكن تبقى مطلقه للمره الرابعه وعمرها ما هتلاقي حد يشيلها بعيالها ويصرف عليهم ويحبهم زيه 

:عيني ليك يا صبورتي انت بتقفش قوي بسرعه 

*فكرت تاكله بكلمتين بس هو خلاص فهمها بس لسه بيحبها ومش قادر يبعد عنها لكن حب يرجع لنا جزء من حقنا حتى لو المادي ... لكن الحب والحنان كله كان لها 

*بعد يومين خالتي جت زارتنا وعرفت باللي حصل ودخلت هزقتني

 :ايه اللي عملتيه ده يا نادين ازاي تتجرئي على ابوك كده 

:عملت ايه يا خالتي وهو بقى له سنين بيمن علينا بالمصاريف وبيحسسنا ان احنا بنشحت وفي الاخر عايز يلبسنا جهاز اختي اللي هو مسؤوليته

 :كان بالادب انما ايه هرفع قضيه واروح اشحت تحت بيتك دي 

:هو اللي اضطرني اعمل كده 

:غلط كان بالراحه تقولي له احنا يا بابا ملناش غيرك وانت الخير والبركه 

:ما كانش هيجيب معاه

 :جربتي ولا كانت حجه عشان تطلعي اللي في قلبك ده مهما كان ابوك افرضي زعل من الكلمتين بتوعك ولا جرى له حاجه ما كنتيش هتسامحي نفسك ابدا فهماني يا بنتي ..  تروحي مع امك تتاسفي انت بس انما امك عملت الصح واوعي تخليها تعتذر له ... هي تتكلم حقها سامعه 

:حاضر يا خالتو كام يوم كده

 :لا النهارده يا نادين بنتي حبيبتي الطيبه هتصالح ابوها 

:حاضر

بقلمي سحر السحرتي 

*رحت فعلا بس لوحدي خفت ماما تضعف وتعتذر له اول مراته ما فتحت الباب

: عايزه ايه يا بنت سعاد

: انا بنت صابر ابويا راجل لو مش مالي عينك بنت سعاد دي تبقي تقوليها لما ندخل الجنه 

*حبت تلحق نفسها عشان بابا سمعها 

:ما اقصدش انا قصدي امك بعتاكي ليه 

:حاجه تخصنا مع بابا هو موجود 

:اه وزعلان ومش عايز يشوفك 

:دورك تقولي له نادين عايزاك وشوفي هيرد يقول ايه 

*دخلت وهي هتطق مني ومن برودي اللي اتمرنت عليه كثير عشان اعيش الدور ده 

*رجعت وقالت

 :اتفضلي جوه مستنيك 

*رديت عليها عشان اغظ-ها

 :سبحان الله مش كان زعلان مني ومش عايز يشوفني ولا افتكاسات منك 

:ادخلي من غير لماضه هو قلبه ابيض وانا قلت له دي بنتك ما يصحش 

:لا طيبه وفيك الخير متشكره قوي يترد لك في اولادك 

*لو اقول انها كانت هتعمل زي التنين وتطلع ن-ار من ودانها هتقولوا يا بت يا نادين انت بتبالغي 

*دخلت وسلمت على بابا اللي كان زعلان قوي مني بوست ايده وراسه ما استحملتش وعيطت 

:حقك عليا يا بابا انا اسفه بس بجد احنا اتظل-منا وانا بشتغل واحاول اخلي ماما مش محتاجه حاجه لدرجه اني لما بتعب برفض اغيب احسن يتخصم مني

 *حضني جامد 

:مش زعلان يا نادين انت طلع عندك حق وانا ظلمت-كم يا بنتي وهصلح ده واحاول ابعت مصروفي يكفيكم

 :مش بس مصروف يا بابا احنا محتاجينك لاننا بنحبك 

:حاضر يا نادين هاجي لكم كثير

 :يعني مش زعلان مني

: لا يا حبيبتي بس لو في حاجه بلاش كلامك القاسي ده

: حقك علي وزه الشيطان واكيد مش هتتكرر 

*بعد سنه من اللي حصل رحت لبابا وقلت له 

:ممكن تقبل مني ده 

:ايه ده يا نادين

: الشغل عندي عمل رحله عمره بالقسط وكنت عاملاها مفاجاه لك انت وماما وجه جواز ندى خلاني اجل وقدرت ادفع معظم المبلغ بقى لي كام شهر وفاضل كام شهر لسه عليا

: يا حبيبتي تصدقي كان نفسي اعملها من زمان

 :انا ما كنتش ناويه اقول لك غير قبل السفر باسبوع بس قلت دلوقتي عشان تعمل حسابك 

:والسفر امتى 

:كمان ثلاث اسابيع

 :شكرا يا حبيبتي ربنا ما يحرمني منك

: ربنا ما يحرمنا منك انت وتفضل منور البيت

 *بعد ما مشيت ومراته عرفت يعني هتسافر و تسيبني لوحدي 

:لو معايا كنت اخذتك ويانا 

:يعني بنتك ما عندهاش نظر مش كانت تحجزلي معاكم 

*بص لها باستغراب من البجاحه 

:حاضر المره الجايه هقول لها اعملي حساب مرات ابوكي

: كده زعلت منك صالحني بقى 

:عايزه ايه 

:بيقولوا الذهب هناك حلو قوي هات لي اي حاجه معاك وانت جاي 

:الناس بتطلب من هناك ماء زمزم وانت عايزه دهب

: ما انت هتجيب الميه معاك اكيد بس ما تنساش حبيبتك بحتة سلسله صغيره او اسوره 

:بدل ما تقولي خاتم او حلق حاجه خفيفه 

:اللي تجيبه حلو من ايدك قلت ايه 

:لو معايا فلوس هجيب مش هتاخر عنك

 :هي نادين مش هتديك تصرف في السفر 

:يعني تسفرني وتديني مصروف ايدي 

:اكيد هتدي لامها اشمعنى انت 

:عشان الشنب اللي في وشي بيقول ان انا الراجل اتهوي بقى 

:طب انا محوشه قرشين هات لي بيهم وشويه حاجات

*بابا قال في نفسه محوشه كمان منين نفقة طليق من اللي اتجوزتيهم ولا الفلوس اللي كنت بمنعها عن مراتي وبناتي فعلا عندهم حق طيب الصبر 

:اكتبي طلباتك في ورقه ووهاتي الفلوس و هجيب كل حاجه

 *باسته وضحكت عليه بس هو اللي كان ناولها على نيه ثانيه 

بقلمي سحر السحرتي 

*بابا وماما سافروا وهما مبسوطين .... يمكن ماما اكثر عشان هتقعد مع بابا فتره طويله من زمان حارمها من قربه 

*اديتهم هما الاثنين فلوس هو كان رافض بس مع اصراري وافق 

*بابا هناك الفلوس اللي مراته كانت عايزه بيها حاجات اشترى لها و لماما الاثنين زي بعض من نفس الفلوس بس ما نسيش ولادها وانا وندى 

*رجعوا وكانوا في منتهى السعاده وانا كنت طايره وانا شايفه فرحتهم 

*فكرت بابا اتغير بس للاسف زي ما تكون مراته دي إدمان اول حاجه عملها حط الشنط لماما وجري عليها لانها كانت وحشاه 

*شفت حبها في عينه اللي عمري ما شفته لماما وكل مره كان بياكد على قراري اني مش لازم احب لان الحب بيذل

 *ماما لاحظه زعلي من اللي بابا عمله فحبت انها تخفف عني 

:تعالي يا نادين شوفي جبت لك ايه قبل البنت ندى ما تيجي و تنقي او تاخد اللي هي عايزاه وانت بتتكسفي تقولي لها لا 

:سيبيها تاخد اللي نفسها فيه 

:طول عمرك طيبه بس لا المره دي لازم تنقي انت الاول 

*فعلا خففت عني غير خالتي وهي داخله تزغرط ماما فرحت بفرحتها ليها

: خليها لما احج ان شاء الله دي بس عمرة

: ومين قال اني بزغرط عشانك

 :امال عشان ايه عندي خبر يفرحكم لو هتقولوا اه واهي الافراح بتجيب بعضها 

:خير يا اختي

 : ابني طارق طلب بنتك نادين وانت عارفه ان طول عمري بحبها فايه رايكم

: لو وافقت خليه يكلم ابوها هو انا هلاقي احسن من طارق دى انا اللي مربياه

*خالتي ما صدقت ودخلت تكلمني

 :ايه رايك

: انت عارفه يا خالتي انا طول عمري بحبك بس طارق يعني

: ده طيب بس هو اللي عصبي شويه وانت بايدك تغيريه وانا طول عمري نفسي اخذك لحد من ولادي عشان مربياك وعارفه انك طيبه 

:طب اديني كام يوم افكر بس لو رفضت ما تزعليش مني

: انت بنتي يا عبيطه هزعل ليه بس اهم حاجه الموافقه تكون عشان انا اللي هبقى حماتك هههههه 

*ضحكنا وندى اختي وصلت وفعلا نقت الهدايا بس ماما كانت خبت عنها اني خلاص اخذت حاجاتي لانها فاهمه انها الدلوعه ودايما تستغل اني طيبه و تاخد الحاجه مني 

*فضلت افكر في العرض بتاع ابن خالتي وقررت اقبل 

*يمكن اسبابي كانت غلط وهو ده اللي خلاني اختار من غير ما افكر صح وده اللي و قعني على وشي 

*كنت بختاره بسبب الخوف اني مش هتجوز او نظره الناس ليا لان اختي اللي اصغر مني بخمس سنين اتجوزت قبلي ومعظم بنات العيله اتجوزوا رغم ان سني مش كبير فانا كنت تقريبا 22 سنه بس خفت 

*وقررت اوافق وخصوصا انه ابن خالتي وكان هيوافق على شرطي ان افضل اشتغل عشان اقدر اساعد ماما لان اكيد بابا بعد جوازي هيقلل مصروف البيت زي ما عمل مع اختي وهي الدوا بتاعها مكلف لكن الاكل مش بتاكل كثير 

*بالرغم من ان علاقتي بيها مش زي ندى اختي بنت و صاحبتها لكن انا بحبها قوي وهي اغلى شيء عندي 

بقلمي سحر السحرتي 

*بعد جواز ندى بدات تقرب مني و تعوضني لكن احيانا بقول بعد ايه سابتني في اوقات احتجت لها ما صاحبتنيش في الوقت الصح اللي المفروض كل ام تفهم بنتها الدنيا ازاي والتعامل مع الناس باي طريقه 

*رغم كل ده حبها كبير في قلبي 

*كنت خايفه من طارق ابن خالتي لانه عصبي ورغم كده فكرت في كلام خالتي ان ممكن اغيره واعتقدت اني عندي القدره على ده 

*بس للاسف دايما الطبع غلاب 

*اتجوزنا بعد سنتين خطوبه لان بابا كالعاده مش معاه فلوس من جوازه ندى 

*مراته عملت فيلم انها تعبانه و محتاجه عمليه فهتبيع الذهب عشان تدفع مصاريف العمليه وعشان توفر اكثر هتعملها في عياده دكتوره لان في المستشفى مصاريف اكثر 

*بابا صدق لان ما فيش فلوس للعمليه لكن هي كانت متفقه مع الدكتوره و خبت الذهب والكلام ده عرفناه متاخر 

*طبعا انا اللي جهزت نفسي كان طارق طيب وكريم جدا حاول معايا يشيل الجهاز كله انا رفضت ورغم محايلات خالتي اصريت على الرفض

 *ماما دخلت تفهم السبب ايه 

:عشان يا ماما ما تبقاش عيني مكس-وره قدامه ويجي اليوم ويقول انه خدني ببلاش

 :ده ابن خالتك و بيحبك عمره ما هيقول كده 

:ابن خالتي ده راجل 

:طبعا وسيد الرجاله

: اهو كل الرجاله زي بعض لو مستعجل على الجواز يروح يشوف واحده تانيه جاهزه انما انا مصره على موقفي

 *فعلا حسيت اني بعمل الصح وبحفظ ماء وجهي وكنت بضغط على نقطه انه بيحبني لما اعترف ليا بعد الخطوبه انه بيحبني من زمان 

*فكنت بستغل النقطه دي في صالحي و اهدد لو مستعجل يشوف حد ثاني 

*هو بصراحه احترم وجهه نظري وقرر يعوضني انه يجهز الشقه بطريقه جميله تعجبني غير انه كان بيحاول يرضيني باي طريقه لانه حس اني مش بحبه وانه بالنسبه ليا جواز صالونات

 *قرر يجرجر رجل قلبي ناحيته لما حس اني متعلقه بامي وجهز غرفه مخصوص لها في شقتنا 

*الحقيقه المفاجاه عجبتني وقررت مهما حصل مش هسيبه للاسباب اللي وافقت عليها في الاول

 *خوفي اني مش هلاقي والسبب الثاني ان ما حدش هيستحمل امي ويعمل كده معاها وهي مش غريبه عنه دي خالته 

*هو كان بيضرب عصفورين اول حاجه يعجبني و احبه والثاني ان خالته هتعقلني لما يحصل مشكله بيننا وتحاول ترجعني لو نشفت دماغي زي ما بعمل معاه فتره الخطوبه 

*هو فعلا عنده حق في النقطه دي لان كنت مش بحبه فزعله ما كانش بيفرق معايا فعلا

 *المقوله بتاعه حبيبك يبلع لك الزلط وانا من تجربه امي قررت اني مش هبلع حتى شويه ميه 

*كانت فتره الخطوبه كل محاولاته يداري عصبيته لغايه لما نتجوز لانه عارف اني على شعره وارمي له الدبله

 *فكان خروجه معايا قليل لانه بيغير قوي عليا ودي حاجه عجبتني لفتره لانه حسسني اني ست تتحب وده احساس بيرضي كل امراه انها تتحب ... ويا سلام لو كان حب في الحلال 

*حاولت مع بابا كثير اخذ منه فلوس لكن كان بينقطني لضيق الحال وعمليه مراتي و اخوكي دخل ثانويه عامه 

*رديت ببرود

: ده مش اخويا وانا ملزمه منك 

:يعني اعمل ايه

 :ادخل جمعيه وهات فلوسها 

:منين

 :انا جوازي بعد شهرين طبعا لما هتجوز هتعتبر اني مش موجوده و تخصم الفلوس دي من مصروف ماما 

:اكيد انت عارفه الظروف

 :اعتبر ان جوازي إتاجل سنه و ادفعوا وسد الجمعيه

: طب و الشهرين دول لازم ادفعهم هدفع منين 

:يا سيدي مش عايزه اخصمهم من بكره بس هات الفلوس بلاش ادخل بجهاز اي كلام

: العريس ابن خالتك واكيد مش هيتكلم 

:مش هيتكلم دلوقتي لكن بعدين ممكن يقول مين هيمنعه 

*حاولت اكلمه بالعقل لغايه لما ينفذ رغم ان جوايا ن-ار هو انا كل ما اعوز اخد حقي الف وادور

 :ها يا بابا ارجوك بلاش تقل مني قدامه انت ابويا و سندي 

*بلا بلا  بلا لغايه لما اقتنع عملت بنصيحه خالتي 

*بابا لما كبر ما بقاش يقدر على مراته وبقى يخاف منها فعمل الجمعيه من غير ما تعرف وجاب الفلوس 

*اتفق خلاص مع خطيبي على ميعاد الفرح 

*مرات بابا صممت تحضر لانها كانت بتحبني من مواقفي وردودي عليها جت و شافت الفرح