رواية نارا حيدره الفصل الثلاثون 30 بقلم نمارق رحيم

حسن :- هاا تمام روحن لا تخافن مابي شيء هسه يهدئ.. 

طيبة :- اريد اعرف شبي شنو سبب غضبه؟

حسن :- روحن سون العشه جوعان 

راح دگ الباب گال افتح انا حساني شوي وفتحله دخل وسد الباب ..

ناردين:- شنوو صاير غرريب؟

طيبة:- ما اعرف، بس مو جديدة هو هيج من زمان مرات يجي ضايج وروحه صاعده لخشمه يسد الباب ويطلع قهره بالغراض وثاني يوم يجيب غيرهن وهكذا

- ياا خبالوو خبالوو

طيبة:- اي والله صدگي قبل سنة اجه ضايج بس حييل يعني مو مثل كل مره لا حيل وكانت قوية دخل للغرفة وفلشها تفلش لا ضلت چرباية صاحية لا كنتور استلم منه كسرها تكسر 

-ياا وتالي شنوو؟؟

-ثاني يوم شمرها وجاب اثاث جديد.. 

-نوب يگلولي مخبله طلع هو اضرب مني.. 

-لاااااااا مو مخبل اخوي بس يعصب ترى!! 

ضحكت متفاجئة من ردة فعلها وگلتلها اي ترى اشاقة شدعوا !

سكتت وراحت سوت عشه وساعدتها تعشينه كلنه وهو بعده بالغرفة ما نزل كال حسن مايريد ياكل 

اندگ الباب من خلصنه عشه راح حسن فتح الباب دخل هو وسالار كعدو بالهول كعدت يمهم جانت طيبة بالمطبخ تغسل بالمواعين ما تدري 

چان تدخل هيه وبيدها صينيه كلاصات و قوري چاي، دخلت تضحك دارت وجها وشافت سالار اخترعت و طاحت الصينيه من ايدها 

همزين ما احتركت وانصلخت من الچاي لان حار بسرعة طلعت تركض ما تدري بسالار موجود وما لابسه حجاب دخلت بدشداشتها ..

            

              

                    

دنك سالار ما باوعلها ،گال لحسن :- اسسف اروح الظاهر ما ماخذين راحتكم 

حسن :- لااا هي دخلت وماتدري بيك وجنت انت مدنگ تحجي وياي ما شفتها وبعدين هي مثل اختك شسالفه خويه

سكت ماحچه شيء ..سالاو طبيعته هادئ و يحچي بهدوء كلش صوته مو عالي حتئ اذا عصب ما يصيح دائماً يسكت ما يحچي اهواي ، ومن يحچي يحچي بالتفاهم .

رحت لطيبة المطبخ شفتها ايدها علئ خدها وتبچي وعيونها وخدودها حمر 

-يا شبيج طيوب صايرة طماطة.. 

- ولج شافني مفرعه انه اذا اطلع ما يلمحون مني شيء وهو شافني لا حجاب ولا ملابس مستورة 

- قابل متعمده ديلا يمعودة عادي يابه وذا شسالفة مثل اخوج هو ،هذا حسن اكعد يمه وعادي بملابسي ودشداشتي

- انتي ما متحجبه وعندج هلشي عادي 

- شلون يعني الطم وياج ،ابقي ابجي رايحه اكنس الكزاز لا ننجرح 

اخدت المكرافه ولميت الكزاز، اجه حسن اخذها مني :- عوفيها و روحي لغرفتج انه اشيل الكزاز 

- ماشي

باوعت لسالار شافني و دار وجهه ..برطمت و رحت لطيبة 

- يمعودة ما تسوه كل هلدموع

- فشله 

- اكلج اشو انچبي اني جوعانة وهاي تبجي شنو ما بقئ شي من العشه ما زاد 

سكتت ما ردت ..فتحت الثلاجة طلعت ماعون الكباب سويتلي لفه اكلتها

ورجعتلها اضحك عليها ..

نزل حيدرة ما يتحاچه نازل بس بالبنطرون وفانيله تعلاكة سودة وشعره مكفش وعيونه حمرر وايده مزلغه بيها اثار دم و خراميش سجين 

تقربت منه وهو يم المغسله.. شبيها ايدك عود صدگ صاحي انت مسوي هيج بنفسسك؟..

جاوبني وهو يرص على اسنانه.. 

-لا انا مجنون لذلك ابعدي مني ..

غسل وطلع وصله شد جرح ايده بيها ..

- على اقل عقمها لا تلتهب مايصير حيدرا ؟

ما رد عليه وصاح بصوت عالي..

- طيــبةةةة روحي جيبي قميصي.. 

- عوفها مشغولة اني اروح اجيبها 

صعدت جبته انطيته اله لبسه ودخل للهول كعد يم سالار.. 

مدري شديحجون وشنو دا يخططون؟ صاحلي دخلت.. 

سالار:- باجر رايح لأربيل 

-شنوو ليش ! 

سالار :- نبراس رح تجي تبقئ يمج اما نور ومصطفى يرحون وياي فد شهر ونرجع لبغداد

-اهاا بكيفك اي روحووا.. 

طلعت ضايجة واحس بخنگه يمكن اكثر من شهر رح يبقون طلع واجوو ورا ساعة.. دخلت نبراس وبيدها الجنطة.. 

            

              

                    

حيدرة:- انا الگلتله يجبها لحدما يرجع من شغلة وعملة

-اي افرح بيها اني.. 

سالار:- رايح ان شاءالله باجر اتوكل ناردين موبايلج يمج اتصلي عليه بكل وقت ترديني بي 

هزيت راسي.. ماشي ما تقصر.. 

تنهد وطلع.. سلمت نبراس على طيبة واجت يمي ظليت شابگتها .. وحيدرة وحسن طلعوو بقينه بس احنا قررت تنام بغرفة طيبة وخلت ملابسها بكنتورها ..

وكعدنه نسولف ونحجي كعدت يمنه امه صارت الساعه 12 يلا دخلو اجو اثنينهم كعدو يمنه الهول ..

ونبراس اطكطك باصابعها ما متعودة علئ وجود حسن ويانه گعدت بصف حيدرة يحجي وياها وتباوعلي وتضحك.. 

غرت وكمت كعدت يمهم سألتهم ليش داتضحكون.. 

حيدرة:- شدخلچ؟

-لا والله؟ تعصب عليه وتضحك وياها !

حيدرة:- اضحك وياا اختي شعليج انتي؟

-حلووو

-شكد تحجين شوفي هدوء اختج مو مثلج بس تكمزين.. 

-مد ايدك.. 

باوعلي مستغرب وگال.. رايدة تبوسيها؟..

-اي مدهاااا.. 

خلا ايده بحضني رفعتها وعضييتتتتها حييل عاط بيه وظل يعصر بيها خزرته وگلتله مرة الثانية اذا ما تعدل اسلوبك اشوفك غير وجهة ترا انا ناردين ..

رغم جان معصب بس من سمعني ابتسم وطگها ضحكة وگال وهو يغمزلي.. ومو سهلة ناردين.. 

ناردين:- اي جا شلون يابه يلا انا گايمه عندي شغل اذا نعست اصعد نام بغرفتك تصبح على خير.. 

ظل يضحك ويگول لاتحاولين تقلديني تبقين ناري الوكحة..

حسن :- اي يمه شلونج شخبارج مشتاقلج 

- الحمدلله يمه انت مشتاقلي شعجب؟ 

حسن :- اي والله بگد رحمة الله صارلي هواي ما شايفچ

-الصبح چنت يمي.. 

حسن :- مشتاق لهدوئج 

- النهار كلها اصيح بيك وصوتي راح.. 

حسن :- ايباا الحجيه ما تفوتلها سالفه 

-اعرفك اعرفك واعرف شنو تفكر حبوبه.. 

ضحكت على سوالفه باوعلي حيدرة وگال

-جيبيلي كلاص چاي.. 

-ما اشتغل عندك.. 

-شنو بعدج ضايجة شلون انراضي الحلو هسه.. 

-روح كسر غراضك وگلي لا تتدخلين بيه.. 

-جيبيلي جاي وانطيج نساتل.. 

-جبتهن يعني؟ عبالي نسيتهن.. 

-اي شلون انساچ نسيانچ صعب ترى.. 

-خوش بس ترى رح اصبلك علمود النساتل مالاتي مو علمودك.. 

-احلى من يصبلي چَا..

طيبة:- اروح وياج خاف ماتعرفين تسوين

-لا شسالفة اعرف بسيط الچاي.. 

كمت ودخلت للمطبخ طلعت الچاي والشكر تذوقته خاف يطلع ملح واتفشل طلعت الجداحة اشغل وافر بالعيون الطباخ ما يشتغل ..

كلت اصيح لطيبة احسن تالي كلت لا شسالفة هو جاي ادبرها ،، صرت اجرب بيهن كلهن واجدح بالجداحه واخاف اشغل تالي جربت اخر وحده اشتغلت وياي خليت الجاي وكفت انتظر يفور

واشم ريحه غاز قوية عبالي الريحة من الشارع مو من القنينة فار ورحت وكفت حتئ اشيله واصب.. 

چان ينفجر الطباخ عليه و صرخت .....

-نور بــبيتك؟..

باوعتله :- انت صدك تحچي ! صارلي قرن احچي ويامن ؟

-يعني مو بــبيتك ها.. 

نترت :- رائــد !!!

-هاا يا بعد گلبي واغراضه.. 

-امشي اطلع بره رووح منااااا.. 

-اعصابك حبيبي دا اسأل.. 

-روح منا رائد نرفزتني.. 

-غير احبهاا أبن اللذين.. 

-حباك الموت امشي اطلع عوفني وحدي اشتغل.. 

-خايب وينهاا ناردين خلتشوف زوجهاا التحبه معصب چنه كليچه ام الحلغووم.. 

گمت جريته من ياخه قميصه وهو صرعني بضحكه ما هامه شيء طلعته وسديت الباب وهو يضحك.. 

رائد:- انت هم تعرف الحب شنووو الله يساعد مرتك عليك 

-وعلي رح اجيلك اسحلك درووح.. 

بعد ما سمعت صوته ، گعدت وقبضت ايدي بعصبية تنهدت وسديت الحاسبة گمت وانا اجر نفس بالگوه.. 

شمرت كلشي من الميز ،، كلمته بقت ابالي ( هم تعرف الحب شنو )

اي صح انه ما اعرف الحب شنو!! 

كل الي حبيتهم بحياتي ما موجودين حالياً إلي سمعت خبر موته الفجر والي ماتت بحضني وگدام عيوني!.. 

كعدت علئ الكرسي ادور واهز براسي واغرس القلم علئ جبيني طلعت من الخزنة الملفات حتى اراجعها

اگلب بيهن چان يصير گبالي ملف انتبهت عليه وركزت بي بأستغراب لان بس هو المميز بينهم

تالي اتذكرت هذا نفس الملف الي چان بسيارتي من 4 اشهر انطانياه سالار بيوم الي گالي هو مو اخوهن .. 

انطاني هذا الملف بي بيان وتواريخ وصور وكلشي يخص ناردين واختها نبراس بيومها ما فتحته لان چنت ملتهي بالسفرة إلى لندن وخليته بصندوگ سيارتي

وهسه شفته اجه بالوقت المناسب والصح چنت شاك بالموضوع واريد ارضي شكي 

يا الله مو الي ابالي ...تنهدت 

فتحت الملف عيني صارت علئ اسم ناردين الثلاثي ببداية اول صفحة

اسمها الحقيقي قبل ما يبدل عمي جاسم الجناسي ويسميهن بأسمه ..

قريت الأسم ( ناردين جبر عبدالله)

انصدمت صدمة چبيرة !! قريت اسم ابوها وجدها عدته من جديد خاف ما مركز لو غلطان بقيت اردد الاسم بصوت مسموع وايدي على الكتابة 

مستحيل!! مايصير يمكن تشابه بالاسماء! تصفحت غير ورقة حتئ اتأكد اكثر شفت صورة صغيرة اخذتها وشغلت اضوية لحتى اشوف اوضح

الصورة تجمع ناردين ونبراس من چانو اطفال باوعت علئ المرة الحاظنتهم بصدمة !

وصحت :- لا شنووو معقولةة هاي امهم !!! .....يتبع|||

الفصل الواحد والثلاثون من هنا