رواية ارحموني ولو رحمة مرة الفصل الواحد والثلاثون بقلم فراقد حسن علي
اركان/اشرت ال منى افتهمت عليه
صعدت أتنوم أبن النعال مسويلي حرب نفسية ينومني يلا ينام
-صعدت وراهم واشوف الصفيرة
والصفيير الصغير يلعبون
من أشعل أصفاح بليسكم
-يلا طفوا الضوه ناموا عندي دوام من غبشه
-لاااا تشيلي نزلي مو زين عليج الثكل انزل ابن الكلب شنو قرد خو ما قرد
//يلا نام لوليش لا تخاف أنت حباب
يلا نام نفس بابا راح ينام لوليش هو نعسان
يلا نام حبيبي انت
يمه شلع كلبي يلا غفى ونام
اركان/ماروكو لا تلبسين شي كدامه مشلح ترى عقله صافي ويبقى منتبه عليج
منى/لا لازم البس كدامه هيجي حتى يتعلم عليه وما تبقى عينه فارغة ويستغرب اذا شافني صدفة بهيجي لبس ولبسي مستور مو هواي مشلح
اركان/دتعاي لا يفز ابن النعال
ورايه دوام من غبشه
منى/بعده ما تقرب كد كام خله التلفون على الشحن ،،كعد اسلام والحلو كعد على حيله كمت جبته من جربايته نام بوسطنا
ودار وجه على أبو حظنه يريد ينام
اركان/ابن النعال اكو واحد موصيك عليه
كاعدلي ركبه ونص
-انتي ضحكي يالصفيرة اجتي من جانبج
لا تفرحين مصير أسلام ينام وأخنكج
-وحتى قبل شوية عادت علية نفس كلامك
تكول لامي ولمنى
لو فرح تلبس كونية هم تطلع حلوة عليها
-واليوم بالذات حسيتها مو طبيعية
بس صافنة عليه ،وكل ما اندار اشوفها
تراقبني ومركزة نظرها عليه
محمود/اكول نامي شو غطي راسج
لان الظاهر غيرة الشرايج خبلتج
فرح/وداعة افراح محمود احجي صدك
محمود /باباتي شو لفي راسج ونامي
ولا تسولفين هاي سالفه يم واحد عيب
الواحد يكوم يفكر بيج وبرفل غير تفكير
ويكولون عليجن من الشواذ
فرح/اعوذ بالله من هيج تفكير
-لفينا روسنا ونمنا بأمان الله ورسوله
كعدت الصبح ويه أذان الفجر شبعانة نوم الحمد لله صليت
وبعد ما كملت صلاتي رضعت افراح
ورجعتها بمهدها و طلعت من غرفتي
وسديت الباب على محمود وافراح
حتى مايفزون من أشتغل
ورجعت على الحوالي غسلته هو والحمام والتواليت غسل بالصوندة
ورجعت نشفته ومسحته
-دخلت للحمام وشمرت الهدوم بالغسالة
-رفل كعدت واجتي صبحت عليه
وبقت كاعدة على الدرج مطفية ونعسانة
استغربت هاي اول تالي تكعد من الصبح وبهيجي وقت غباشي
//رفل ليش كاعدة اصعدي نامي بغرفتج
كالت/لا هسة اساعدج اشرلج الملابس
كتلها/بعدهن بحوض الغسل اذا تردين بس
شطفيهن ونشفيهن وشريهن
-صدك كامت ودخلت للحمام
وهي بين ما شطفت الهدوم
ونشفتهن وشرتهن
اني كشيت الهول كنس ومسح
-بس الاحظها مو طبيعية وقلقة
شلون الواحد اللي بايگله بوكة ويخاف ينكشف هيجي مبين عليها القلق
-هي سفطت الخبز على ايدي
ولفته بجرجف الخبز
وعافته على الكاونتر
وراحت للهول
-اني مابقى عندي شغل
بعد بس امسح المطبخ
خدرت القوري على النار
رحت الغرفتي اخذت بس ملابس داخلية ودشداشة ودخلت للحمام سبحت
وطلعت بوجهي طفيت الجاي
ورجعت لغرفتي امشط
-اشوف افراح ماكو بمهدها
يمه كلبي وكف من الخوف عليها
اخذت البنية وخنكتها
-لكفت المشط ورحت بسرعة للهول
شفتها كاعدة وتبدل بحفاظتها وملابسها
//شوكت اخذيتها من مهدها
منى /الناس تكول يالله
تكول صباح الخير
تكول صباح العافية
مو تصبح على عض
عزززة راح يفز الولد
بعد مايفيد الحجي ويه اركان قافل
ويسب بأسلام وبأهل الكهرباء ،
ادري رجلي مو صاحي العسكرية مسويه بي خيط خبال
اركان/ طلعيلي ملابس داخلية نظيفة وحضريلي غراضي
هسه بس اغسل واصعد ابدل
ما الحك اوصل للدوام هسة الازدحام واصل لطريبيل
-نزلت بس بالبرموده لان ادري
بس فارة النضد تكعد من الصبح
وهسه اكيد كارصه بحضن محمود
هم وراه دوام
-نزلت على الدرج وتصميم بيتنا
الدرج جواه الحمام والتواليت
وكدامه مباشراً على الجانب المطبخ يعني بس الممشى الصغير هو الفاصل
-بعدني مكنبصة وما متوقعة أي شي وكلشي صار بثواني
هي مدت ايدها لافتها بطرف أردانها ودفعت جدر الباجة عليه
لان مكنبصة قريب الباب والطباخ
صارت وكعت الجدر على عرض أجتافي نزل المي على كل ظهري ولحد مقعدي أنسمط كل ظهري
يمااااااااااااااااااااااا ،،اااااااااااخ
يماااااااااااااااااااا
-كلبت الدنيا بالصريخ والعياط
صوت صريخي كعد اهل الكبور
روحي فرفحت لو ميته ولا هذا العذاب
-السالفة صارت ثواني ،
بس كلبت الجدر عليه
عطت وكمت وكفت على حيلي بعدني بحرورة صوابي مثل ما يكولون
واحس واحد مزق الثوب عليه
-ركضت خطوتين واشوفها مسموطة بجدر الباجة ،، الواحد من يشوف هيجي مواقف بعد يفقد وما يعرف شلون يتصرف
بدون وعي مزقت دشداشتها عليها
-ورفل انهزمت وختلت بالحمام
وقفلت عليها الباب
فرح/اااااا ررررركان ااااالحكللللي
ررراح اموووت يمااااااااااا الحكيلللللي
محمود/غاط بالنوم وصوت صريخ فرح شالني من الفراش ،كمزت على حيلي اريد اندل الباب وين صار بعد انثول طلعت اركض من الغرفة
وامي وابويه طلعوا من غرفتهم مفزوعين اكثر من حالي
ومنى نزلت تركض من فوك
اللي صار كبال عيوني اركان يمزق بثوب فرح وهي تصرخ وتعيط // شبيييها
منى/اباوع على فرح انتهت من الصياح والصريخ بيد محمود وهو يصلخ دشداتها المزقها عليها اركان
محمود/بوووويه ااااطلع شغلي السيارة اريد بس أشوف صدرها بس لاحترك تموت وما الحك عليها
-ركض ابوي للحوش يعيط
وهي انتهت من الصريخ والعياط
نزعتها الدشداشة اركان مسويها عليها وصلتين اباوع ظهرها الجلد كله مكفع وانزلغ بالقماش من نزعتها من عدها
-عساها عيني عمت بهذيج الساعة
فكيت الداخلية من جهة ظهرها
انشلع الجلد واللحم وياها
امي و منى حارن شلون يلزمنها
نزعتها الملابس الداخلية واثنينهن انصلخ الجلد وياهن من جهة الظهر
فاطمه /فررررح يمه ه ه ه ه ماااااتت البنت
عااااااااادل اااااالحكني يبووووووووووو
محمود/بووووووويه ااااااارررركان
يمه ه ه ه ه ماااااتت فررررح
-مديت ايدي على بلعومها
يادوب بيها نبض خفيف
المسكينة صارت فرجة
امي سترتها وشمرت شيلتها عليها
منى/من الصدمة لا بجيت ولا صرخت بقيت مصكوكة وبس اباوع ،
-عود مديت ايدي الزمها
اجى لحم ظهرها بيدي
بقيت اباوع على ايدي وسهيت الزمهاوكعت بالكاع بيد محمود وامي
وامي كسرت الدنيا بالصياح
ابوي اجه يركض على صوت محمود وعياط امي وهسه يلا شفته موجود !!!شايل بيده جرجف لفاها ويه محمود وشالوها بالعكس من جهة صدرها
ومحمود يبجي ويعط مثل عياط النسوان /يمه فرح راحت من ايدي
-وامي بس اخذت عبايتها بدون حجاب ركضت وراهم
هو ابويه شوكت شغل السيارة!!
وهنا المصيبة محمود وابويه وامي
واني وياهم حرنا شلون ندخلها للسيارة
هي بس تون صوتها اختفى
ونبضها صار ضعيف محمود يكول
دخلناها على نومتها يعني على وجهها
امي صعدت يمها ليورة وخلتها بحظنها
وتنخى وتستنجد بالله واهل البيت
وابويه يعيط ويبحي
ومحمود بس برمودا وفانيلة بيضة تعلاكة
وامي بس عباية لا حجاب ولا نعال
-رجعت ركض جوة لان صوت رفل كسر الدنيا
انوب الناس والجوارين التمتوا علينا
واسلام نزل من فوك يصرخ و يبجي
-واشوف باب الحمام اركان
باجها بالهيم الحديد (تايلبر )
وشامرها داخل الحمام
اركان/من نزلت ما توقعت بالبداية رفل حركت فرح ، عبالي الجدر وكع عليهابس من انهزمت ودخلت الحمام وقفلت الباب عرفتها هي حركتها
-ومحمود طردني لان مزقت الثوب عليهاخطية تكشفت ،، وداعة ابني بقصدي انقذها مو أتكشف عليها وهي بعد أختي وعرضي
-طلعت للحوش وصوت صريخها وعياطهاتتوسل بينا نخلصها من الوجع ياكل بكلبي ،
-يا من يخلي رفل بيدي يحج بيت الله وهو كاعد بيته
-الكل احتار بيها واني شغلت السيارة لابوي ما يشوف دربه من الهبطة ورجعت ركض عليهم من سمعتهم
يصيحون ماتت
هنا فقدت وشمرت عقلي للجلاب
هجمت باب الحمام على رفل
ما تفتحتها لان تعرف روحها مذنبة
وتصيح// هااا مااااتت الكح....
-يابه عيوني صارن بكصتي
ركضت للسطح واجيب الهيم الحديد بجيت الباب مرتين ثلاثة انشلعت بيدي
منى/اركان لزم رفل سواها طوبة بين ايدي ياضرب ،،يادفرات،، يا كفخات،، يا راشديات كطعها تكطع
وهي تصيح وتعيط
والناس زلم ونسوان والجوارين
دخلوا للبيت وفكوها من ايد اركان
-وهي تصرخ تكول/يا ناس يا عالم
ضرتي وحده كح..اخذت رجلي من عندي ونامت برأسه بعد ما شبعت ويه خطيبها
ولكم حركتها من قبل بس ما ماتت
عبالي تكب عليها الصوبة وتخلصني منها
كلكم شاهدين شلون ضربني علمودها لان شبعان من عدها وينام وياها
ولكم ردت اخلص الناس من شرها
بس هذا حماية الشريف الشابع بمراة اخوه يضربني علمودها
-يمه اركان هنا تخبل رسمي
من بين ٣ زلم واكفين بصدره وفازعين لرفل هو هجم عليها وهمشها من شعرها وخلاها جوه رجليه يادفرة يا كفخة
والزلم ادفع بي يريدون بس يخلصوها كطعها تكطع
هاي الهوسة كلها صارت بين الحمام والممشى وبداية المطبخ
-هي من خلصوها الزلم ركضت للهول تريد تاخذ افراح وتطلع
اني ركضت عليها ونمت بشعرها
وهاي هم نامت بشعري
والنسوان تفازع بينا
-اركان اخذ افراح من ايديها وجابها بدفرة كومها بنص الهول
-واركان خشمه طك دم
ام رامي جيرانا ركضت للثلاجة جابتله مي بارد وخاولي خلاه على خشمه
محمود/ابويه بعد ما يشوف يسوق
وهلكد سب الناس اللي يمشون بالشارع
واليوكف بطريقه يتفل عليه ويسبه
والهورن خبص الشارع
انوب ازدحام العالم طالعين للدوام
-اني روحي ماتت ويه فرح
داير كل جسمي عليها من كشن الصدر
واباوع عليها ،ماكو صوت بس تون
-وصلنا لطوارئ مستشفى الكرخ العام
ما استقبلوها وحولها لمدينة الطب
بعد ما طلعوا ويانة اسعاف
وضربوها جرعة معززة من لقاح الكزاز و أبر مسكنات للألم
وغطوا مكان الحرك (هو كل ظهرها
بضمادة معقمة (قطعة شاش كبيرة نظيفة بيها مرهم خاص بالحروق)
-طلعنا لمدينة الطب
اني وامي صعدنا وياها بالاسعاف
وابويه لحكنا بسيارته
-وصلنا للمدينة القسم الحروق
واستلموها الأطباء الاختصاص
فرح /وروح اجدادي ،، وداعت جهالي
الوجع للجماد خطية ما اريد اتذكر
كل ما اتذكر هذاك اليوم الاكشر ينعصر كلبي
محمود /صوتها اختفى من كثر الصريخ
التزمها دكتور و مساعدة الدكتور
عالجوها وصلخوا عنها الجلد المحروك من جوه ركبتها على عرض جتافها لفخاذها ((كل ظهرها احترك )
-ما عندي كلب ابقى واكف يمها واشوف شلون يعالوجها ،، وما اكدر اعوفها
كتلهم// اني دكتور وبقيت وياهم
مجلب بيدها واكف يمهم
-تتوسل بيه اخلصها من الوجع و الألم
و أرحمها تكولي/انت مو تحبني خليهم يضربوني أبرة ويموتوني
//محمود فدوة حاجيهم خليهم يموتوني ويرحموني كلبي راح يوكف من الوجع
-اسمع صوتها المبحوح وبجيها و ونها
وما بيدي شي عليها لان هاي المرحلة ضرورية ولازم ينصلخ الجلد المحروك
الله يكفيكم الشر
كعدت على ركبي كدام سديتها
وابوس بوجها وابجي وياها
-أمي وابويه بقوهم بره
لو مدخليهم ويايه على الاقل يسندوني
-الدكتور هو ينظف بجسمها يحجي ويه المساعدة حتى يعلمها و يدربها
ويحجي بالانكليزي حتى فرح ما تفتهم عليه
-كملوا تنظيف جسمها وهي شبه فقدت من الألم
غطوا مكان الحرك بشاش طبي رطب خاص بالحروق ولفوا كل جسمها بشاش يابس قطعات جبيرة يخافون عليها من التلوث
رجع الطبيب ضربها ابرة كزاز
وابرة مسكنة ، وابرة للالتهابات
والمساعدة خلتلها بلازمة لان هواي فقدت سوائل
عادل/اسمع صوت صريخها المبوح وكلبي وكف عليها من القهر
اذا يومية هيجي يعالجوها البنية تموت
ويوكف كلبها من الوجع
ماكو بكلوبهم رحمة يعالجونها بدون تخدير
محمود/حولوها للردهة بقسم النساء
ولفوها بجرجف خفيف ارزك خاص
-ما ادري أحير بمنو
احير ويه أمي اللي انتهت عليه من الهبطة والخوف وتخربطت من شافتها هيجي ملفوفة
لو احير ويه ابويه اللي صعد سكره
وكام يمشي صفح
هو اني اريد واحد يحير بيه كلبي معصور عليها من الخوف والقهر
اركان/انثولت بعد ما اشوف أحس راسي انفخ
وخشمي مايوكف عن النزف
-واسلام تخبل من الخوف والبجي
وهاي الطفلة تصرخ
ومنى مدري شجاها كامت ترعش وكعدت بالكاع النسوان حارت بيها
خفت عليها وكلت راح تطرح على هاي الهبطة
ابو رامي جيرانا ومرته ام رامي
وأبنهم صديقنا رامي بقوا يمنا
وهو ابو رامي خلف الله عليه
تشكر من باقي الجيران وطلعهم من البيت
وام رامي هي السترت منى بجادر صلاة سجادة امي
-باب الشارع تفلشت علينا دك و دفرات
عرفتهم من الصوت علاء وخالد اخوان رفل
-اريد اوكف على طولي ما اكدر راسي منفوخ واحس دمي مو اليه
كام ابو رامي وطلع عليهم
بالكوة كمت امشي وراه
بس فتح الرجال الباب هجموا عليه
ضربة اليه وضربة الهم
هم اثنين واني وحدي
ابو رامي ورامي يفازعون بيناتنا
ورجعوا الناس والجوارين التموا علينا
-دخل ابو علاء وتوله ولده بالعكال
وكفخات كدام الناس
بس بعديش كسروا اعظامي وفلشوا وجهي
ويصيحون// الا نحجزك بمركز الشرطة ونكعدك للعشاير
منى/صدك بهذاك اليوم أنسبينا
صارت علينا ولية مال غمان
-منين اباوع على عملة رفل الحقيرة
ويه فرح وما اعرف هسه عايشة لو ماتت
-لو على هجوم أخوانها على اركان
وهو خشمه يكت دم ،
وميكدر يوكف على طوله
-الخوف سيطر عليه انثولت وبعد ما اعرف شسوي
ومنا اسلام خبلني بالصريخ والبجي
-كمت ادورلي على تلفون
دخلت لغرفة امي ولكيت تلفون ابويه على الكومدي ،، دكيت على ابويه باسم
اصرخ وابجي كتله/فرح ماتت حركتها رفل واخذوها للمستشفى
واخوانها هسه هجموا على اركان
وكسروا أعظامه وشمروا بالشارع
والناس الغربة فزعتلنا
لحكووونه يابه ترانا أنسبينا وتفرهدنا
-سديت الخط من ابويه باسم
ودكيت على عمي نوري
وهم اعياط وبجي وصريخ
ونفس الحجي كلته اله
-طلعت للحوش اريد اشوف رجلي عدل لو ميت من هجوم هذول الك...
والناس ملمومين علينا متروس الحوش زلم ونسوان وجهال
-سودة عليه اركان كاعد بالكاعد
وساند راسه على شباك الهول
وخشمه وحلكه يكتن دم
-أبو علاء سحب ولده
وطلعهم من الحوش كفخات
ورجع باس اركان على راسه وطلع
وهم الكو... يبووو صوتهم يرعد بالغلط والفشار علينا بالشارع
-أبو رامي ورامي طلعوا الجيران من البيت
وسدوا باب الحوش
وانوب شالوا اركان وسندوه دخلوه جوه للبيت ودخلوه للحمام بقوا واكفيله بالباب وهو دخل سبح كله دمايه
-اني كل جسمي يرجف
بس نزلت ملابس لاركان من غرفتنا
وانجطلت على القنفة
وام رامي شمرت عليه جرجف خفيف
لان رجلها وابنها موجودين
وهي خطية احتارت ويه الجهال
اركان/ما اعرف شلون اوصف او أحجي عن هذاك اليوم ،الصراحة تمنيت بعد عندي اخوان ويسندوني بهذاك اليوم
-جسمي كله يون عليه من وجع الدفرات
ووجهي مااحس بي من الضربات
وخشمي يكت دم ما يوكف
-كلشي بجهة وخوفي على فرح بجهة
ومنا منى اشوفها ترجف من خوف الصدمة
واسلام تخبل شايلته ام رامي وهو مفرفح بيدها
وطفلة تصرخ يمكن جوعانة
-سبحت وطلعت
انوب اريد اتحرك ما اكدر جسمي مكسروماكو واحد موجود يمي سند من اهلي صح الجيران ماقصروا
بس وكفتهم مو مثل الاهل
-طلعت للهول واشوف منى مجطولة هنا زعت العافية كلت طرحت من الصدمة وجها اصفر كركم
وشفايفها بيضة وترجف مبينة مو طبيعية وام رامي كاعدة يمها بالكاع ومخليه الجهال بحظنها
-منى حاجيني شبيج اخذج للمستشفى
منى /لا مابيه شي بس خايفة على فرح
اركان/رد عليه ابو رامي
خابرهم وشوفهم بأي مستشفى حتى نلحكهم
مذهب الحلو كل تلفوناتهم بالبيت
وحتى ما ماخذين وياهم فلوس بس يمكن ابويه عنده بالسيارة يمكن أي ويمكن لا
-بقيت مربط وكاعد وين انطي وجهي قابل اروح اهبد بالمستشفيات وما اعرف هم وين !؟
ولو طلعت ومنى منا متخربطة الجهال منو يبقى يمهم
-صعدت فوك الغرفتي
انزل محفظتي وسويج السيارة
شفت تلفوني لكيت رقم غريب داك عليه مرتين ،، رجعت دكيت رد عليه اجاني صوت رجل غريب
كال/هذا ولد شاب كال محتاج تلفونك اتصل على اخويه لان صارت عدنا حالة طارئة واهلنا مايعرفون أحنا بأي مستشفى همه هسه بمدينة الطب
والولد بعد ما اعرف وين راح
تشكرت من عنده ونزلت جوه
بلغت ابو رامي ورامي اهلنا بمدينة الطب
منى /كمت بالكوة طلعت حجاب لامي وشحاطتها ،، وملابس لمحمود
وشحاطات ابوي ومحمود
وخليتهن بعلاكة وانطيتهن لاركان
وناوشته تلفون محمود وتلفون ابويه شغل سيارته يروح عليهم
وياه ابو رامي وصديقهم رامي
-ام رامي بقت يمي
افراح فرفحت من البجي
المراة راحت للمحل جابتلها ممية
وخبطتلها من حليب اسلام
مترضى تاخذها فرفحت من البجي ونامت بشهكاتها
-يمكن مرت ساعة والباب تكسرت علينا طلعت ام رامي ورجعت تركض
تكول/خالة دخيلج هذول رياجيل مسلحين تارسين الشارع
-دخل عليه للهول
ابويه وعمامي محمد واحمد
وامي وعمه هناء والبنات
سلمت عليهم وشبعت بجي بحظن ابويه وهو خطية يشهك ويبجي ويايه على مصيبة فرح
وبقت يمي عمه هناء والبنات
وخطية ام رامي ما تركتنا
محمود/أخذت تلفون من شاب ابن خير ودكيت على اركان ما جاوبني
حرت ويه أبويه وامي تخربطوا عليه ابويه السكر علگ عنده فول
-ورة ساعة او اقل أو أكثر ما أتذكر
دخل عليه اركان اباوع هذا وجه مفلش وياه ابو رامي و رامي
سولفلي كل السالفة وشنو الصار
-يا يابه انعصر كلبي من عرفت رفل هي حركت فرح
-وابو رامي سولفلي خريط رفل
بحق فرح و اركان
والناس تتفرج وتسمع ،،
يامن يخلي رفل بيدي لا اعلس منها لحم
-انطاني علاكة بيها ملابس اليه
والتلفونات
فرح/اركان مو تكول اني اخوج
فدوة اروح لتراب رجليك خلصني
اركان موتني وارحموني فدوة اروحلك
اركان/هي تبجي واني ابجي وياها
//كولي يالله خويه شدة وربج يسهلها
وداعة الخوة كلبي ممرود لا تزيدين الهم عليه
فرح/اركان محتاجة رحمة
فدوة اروحلكم أرحموني
كلبي راح يوكف من الوجع
اركان/خليت وطلعت ودموعي تتسابق تنزل على وجهي
//محمود تعال هنا شو البنية منتهية
محمود/اركان عينك لا شافتها من نظفوها وزلغوا جلدها حركها غميج وخطر
-وهسه الطبيب أجاني يكول// نراقبها لباجر بس الصراحة احنا خايفين على اعصاب وأوردة الكليات لا تتوقف عن شغلها .........
شكرا لزيارتكم عالم روايات سكيرهوم
