رواية بنت الكهوجي الفصل الواحد والثلاثون بقلم احمد
ياقوت : راح للسيارة جاب بطل ماي وانطانياه شربت منو شوية وبقيت واگفة ويا ياسمين وعيوني تتجول بواجهة البيت الي جانت تحمل هواي ذكريات
مشيت كم خطوة ووگفت بالطارمة باوعت عليهم وگلتلهم بابتسامة مع دموع هنا جان ينتظرني باسم وويا كلامي زادت دموعي
اجى تميم انطاني مفتاح باب المطبخ گال تشجعي وادخلي قبلنا واخذت المفتاح بس جنت مترددة لان صعب اتحمل كل هالذكريات
فتحت باب المطبخ جان فارغ لان نقلنا الاغراض اني وبابا للغرفة مالتي اني وباسم ومنظرو وهو فارغ كأنو يشرح الفراغ الي تركوه اهلي بي
ورحت للغرفة مالتي اني وباسم فتحتها ودخلت گوة عليها من بين الاغراض ورحت فورا للكنتور فتحتو وباوعت لملابس باسم بعدهن مسفطات
اخذت بلوزة من ملابسو ورحت لغرفة بابا وماما ورحت للكنتور جان باقي بيه ملابس ماما وبعض ملابس لبابا الي ما جان يريدهن
اخذتهن ودفنت وجهي بيهن وگعدت بالگاع وانفجرت بالبجي واحس گلبي دا يتگطع كلش صعبة فراگ البنت عن اهلها
ياسمين : كافي حبيبتي كافي الله يخليج لا تأذين نفسج
ياقوت : مو گادرة اتحمل والله مو گادرة هواي صعب فراگهم
- اعرف صعب يا روحي بس هذا قضاء الله وقدرو وشمانسوي ما راح يرجعون لذلك حاولي تهدين وتتمالكين نفسج
دا نحجي وسمعت صوت تميم دا يحجي ويا احد داخل البيت وياسمين گالت خلي نشوف منو اجى وطلعنا من الغرفة وصارت بوجهي ام فائق
من شافتني نزلن دموعها وركضت عليها وحضنتني وهي مو مصدگة انها شايفتني گدامها رفعت راسي من حضنها وگالت وين ابوج
تميم : ابو باسم انطاج عمرو قبل سنة تقريبا واجينا نسويلو شهادة وفاة وجبت ياقوت ويانا احتمال احتاجها
ام فائق : ووين باقية ياقوت
- ياقوت امانة يمنا من ابو باسم
- باوعت لياقوت .. ليش ما جابج ابوج يمنا
ياقوت : ماعرف
- ابني اعذرني على سؤالي بس ليش ابو باسم يعوف بنتو يمكم دون باقي الناس
تميم : هذا الحجي ماگدر اجاوبج عليه لان هو يعرف السبب
ياقوت : بابا عافني يمهم لان مايگدر يأمن علي عند احد ثاني
ام فائق : حتى احنا
ياقوت : خصوصا هاي المنطقة عود بعدين اجي واحجيلج كلشي بس اخلص تنظيف البيت
ام فائق : تمام
ياقوت : لاحظت عليها حتى ما واستني بوفاة بابا لان من جهة متفاجئة بينا وتفاجأت بوفاة بابا وانو بقيت امانة عند ناس غربة
لهالسبب تلخبطت عليها الامور وشافتني انو نريد نبلش اني وياسمين بتنظيف البيت فعافتنا وراحت ورا خمس دقايق رجعت
گالت لا تسوون غدا غداكم علينا تشكرنا منها وراحت لبيتها وتميم گال اني اروح اضربلي فرة بين ما تنظفن وارجع گلنالو تمام
من طلع تميم نزعت العباية والخمار الي جنت رافعتو فوگ راسي وشديت الشال على خصري وبلشنا اني وياسمين بالتنظيف
غرفتي اني وباسم عفناها للاخير وبلشنا اول شي بغرفة بابا وماما طلعنا الاغراض منها عفنا بس الكنتور لان ثگيل وصعب نطلعو
وفوگها جان من الموديل القديم الي يصيرلو رجلين ومرتفع شوية عن الگاع يعني نگدر ننظف الي تحتو بدون ما نطلعو من الغرفة
نظفناها خليناها تلمع وبعدها بلشنا من البيتونة وبقينا ننظف لحد ما كملنا البيت كلو بس تكسرنا من التعب لان جان مليان تراب
اخير شي نظفنا الاستقبال علمود اذا اجى تميم يگعد بيها لحد ما نخلص التنظيف والترتيب بعدين استر نفسي ويدخل
ياسمين : هسا بقت المهمة الصعبة
- ليش الي سويناه شنو
- صعبة بس اقصد المنطقة الصعبة والي هي غرفتج انتي واخوج
- هوووووف تعبت والله
- خلي ننظفها علمود نخلص من موضوع التنظيف نهائيا
- تمام
بلشنا نطلع الاغراض غرض غرض بلشنا بالمواعين نظفناهن وبعدهن طلعنا الاغراض البقية ومن ضمنهن المبردة
بس لان البيت كلو ماي ما شكلناها وهم خلي يجي تميم لا يصير شي وندمر الدنيا ووخلال شغلنا اجى تميم وراحت ياسمين گلتلو يبقى بالاستقبال
جان جايب وياه غدا انطانا حصتنا واخذ حصتو تغدا ورجع طلع واحنا تغدينا وكملنا شغلنا وبعد ما طلعنا الاغراض كلهن من الغرفة نظفناها هي
بس هواي تأخرنا بيها لان جانن كل اغراض البيت بيها وللمغرب يلا كملنا التنظيف والترتيب بس من صدگ هلكنا من التعب
اخذتلي ملابس ورحت للحمام اخذتلي دوش من هذا الي يجي مرة وحدة بالعمر ههههههههه بحيث عظامي كلهن ارتخن وصرت امشي مثل الزومبي
وقبل ما اطلع من الحمام سمعت صوت تميم بالبيت وهمزين حسبت حسابي وجبت وياي شال كملت عالسريع وطلعت شو ماكو احد
وانتبهتلهم ماخذين المبردة عند باب البيت وظا ينظفوها وراحت على اساس اساعدهم وگالولي روحي مشطي ومعليج بكلشي
رجعت لغرفتي اني وباسم على اساس اريد امشط شعري بس اختنگت من الحر تخيلو بيت يتنظف بالصيف وهو ببغداد شلون يصير
البوخة وصلت للجيران بس وجود تميم جبرني اتحمل ومشطت شعري عالسريع ورجعت لفيت شالي وطلعت لگيتهم دا يشكلون المبردة
رحت سحبت الصوندة وعبيناها وشغلها تميم ووگفت گدام الهوا البارد بوية احس ردتلي روحي بعد هاليوم اليخنگ
والثلاجة من استقر الغاز شغلناها وجان تميم جايب وياه ماي ارو نظفت بطولة الماي الصغار (بطولة - قناني الماي) الي جبناهن ويانا
وعبيتهن ماي ارو وحطيتهن بالثلاجة وبعد ما سبحو ياسمين وتميم اجو بالغرفة وحطينا العشى الي جابو تميم من المطعم
ياسمين : صدگ هسا وين تنام تميم
تميم : فوگ السطح
ياقوت : ما تتحمل الحر
تميم : لا عادي اصلا بعد شوية يطفي الوطني ونتورط
ياقوت : ياااااا اي والله شلون نسيناه
تميم : بابتسامة وهو ياكل .. الي تلحگني عالسطح اذبها من الدرج ترا
ياسمين : حتى اني مريتك ما تسمحلي
- انتي اول وحدة بالقائمة لان اذا اجيتي ما تخليني انام واني لازم اگعد من وقت
- هههههههههه بسيطة يا تميم من نرجع عود شوفلك غرفة ثانية
- ترا الغرفة مالتي قبل ما تصير الج
- ما دخلني دبر نفسك
- هاي هي اتفقنا
- لا والله صدگ تميم شلون هسا اذا طفى الوطني
- ترا جاية مولدة مو وطني
ياقوت : صفنت شوية وفعلا جان صوت المولدة موجود لان شوية قريبة .. اي والله مشتغلة بس شلون اجت علينا
تميم : رحت لابو المولدة جانت موجودة الجوزة مالتكم بس فاصلها عن بيتكم وانطيتو حساب مال شهر ورجعها
ياقوت : همزين تذكرتها جان تورطنا
تميم : هسا احجولي شنو تحتاجون
ياسمين : والله ماعرف حاليا ماعندنا اكل نهائيا
تميم : راح اروح اجيب ريوگات بعد شوية نحطهن بالثلاجة وفد شي للغدا بين ما باجر نبدل غاز ونرتب وضعنا
ياسمين : تمام
ياقوت : تعشينا وگعدنا نحجي ويا بعض ومن تأخر الوقت رحنا اني وياسمين لغرفتنا اني وباسم طلعنا طلعنا فرش النا كلنا
جانت ماما الله يرحمها حاطة فرش فوگ الكنتور ومغطيتو بشاش وجانن البطانيات اكثرهن بالجيس مالهن فطلعنا منهن
وطلعنا فرش من الي بالوسط لان الي من فوك صاير عليهن تراب ومتبهذلات وراحت ياسمين ويا تميم علمود تفرشلو فراش فوگ
واخذت وياها فرشة صغيرة علمود تفرشها تحت فراشو واني فرشت فراشنا ومن اجت غطينا بالنوم فورا النوم وما گعدنا لثاني
من گعد تميم راح جاب ريوگات لان البارحة نساهن وجابلنا وياه صمون هواي گال تغدن بالي يزيد من الريوگات اذا تأخرت عليكن ومن خلص ريوگ راح
ياقوت : اگلج ياسمين
ياسمين : گولي
- ام فائق مو گالتلنا البارحة انو غدانا عليها
- لج اي والله شو ما اجت
- والله ماعرف خاف صاير وياها شي
- ماعرف والله بس فعلا غريبة اختفائها
- والله بالي مشغول عليها
- منا للعشرة او هيج نخابر تميم ونروحلها هم تطمنين عليها وتزوريها
- تمام
بقينا نحجي اني وياسمين لان ماعندنا شي ومن صارت الساعة 10 اتصلت على تميم استأذنت منو وگاللها روحن واذا رجعت اخابركن وترجعن فورا
لبسنا كل وحدة عبايةواني لبست الخمار رغم بيتهم مقابيل بيتنا بس احس نفسي تعودت على الخمار فقفلنا البيت ورحنا عليهم
دگيت الباب وشوية وطلع ابنهم فائق ومبين من نظراتو ماعرفني لان لابسة الخمار بس استغربت معقولة امو ما حجتلو اني رجعت
ياقوت : السلام عليكم
فائق : عليكم السلام
- وين خالتي
- بالمستشفى امري
- ليش شبيها
- مابيها شي بس ابوي تخربط البارحة وبعد شوية اروح اجيبهم
- يعني خالو مابيه شي
- لا الحمدلله تخربط شوية وهسا كلش زين
- تمام الحمدلله على سلامتو
- الله يسلمج منو اگللها اجت
- ياقوت بنت ادم
- فتح عيونو على وسعهن .. لا بربج صدگ
- اي والله
- اعذريني ماگدر اگلج تفضلي لان وحدي بس وين رايحة هسا
- اجينا البارحة للبيت فهسا اروح ومن ترجع خالتي امرلها
- تمام
- تمام امانة الله اي شي تحتاجيه انتي او عمي ادم تنطونا خبر
- بابا توفى
- لاااااااااا گولي غيرها
- للاسف
- الله يرحمو ويغفرلو
- ويرحم موتاح يلا استرخص اني
- مرخوصة
جان مبين عندو اسئلة لا تعد ولا تحصى بس لا وگفتنا بالباب راهمة ولا يگدر يدخلنا للبيت لان مثل ما يگول وحدو بس وين خواتو
يلا يجوز ويا امهن رجعنا للبيت وبقينا اني وياسمين لحالنا مانعرف شنسوي اخير شي اشتركت ياسمين بالنت عالخط وخابرت على اية فيديو
جانت كلش فرحانا باتصالنا وبنفس الوقت ضايجة لان بعيدة عننا حجينا وياها هواي واخذنا الوقت بالحجي حتى غدا ما تغيدنا
الساعة 2 اتصل تميم وسألنا اذا متغدين لو لا گالتلو ياسمين بعدنا گال راح اجيب وياي غدا وارجع وفعلا نص ساعة واجى جايب الغدا وياه
تغدينا وحجينالو على ابو فائق گال بالليل نروحلهم وبعد ما تغدا وارتاح اتصل على ابو الغاز الي ما تذكرت اسألو منين جاب رقمو
احى بدللنا القنينة وراح تميم جابلنا خظراوات ولحومات وشاي وهاي الاشياء الضرورية بس الصمون عافو لان ييبس بسرعة فيجيب جديد من نحتاج
تعشينا مقالي وبعد صلاة العشاء بدلنا ملابسنا كلنا ورحنا لبيت ابو فائق وطلعلنا فائق سلم عليه تميم واخذلنا طريق ودخل تميم للاستقبال واحنا داخل
سلمت على ام فائق وبناتها وعرفتهن على ياسمين واجى فائق من بعيد گال يمة تميم يصيحج علمود ياقوت گالتلو اي يمة جاية ولحگتو
البنات ما صبرن گالن تعالن ويانا ورحنا يم الصالة علمود يسمعن شراح.يحجي تميم ومن دخلت ام فائق وسلمت عليها بدا يحجيلهم
بلش من اول ما اجى بابا عليهم لحد ما اجينا بس ما ذكرلهم انو راح للشيخ الي جان يشتغل عندو بابا ولا جاب طاريو نهائيا
وفهمهم القصة بحذافيرها ومن خلص كلامو رجعنا اني والبنات وياسمين للمطبخ وبلشن البنات يسألن واني اجاوب مثلا ايمتى مات ابوج شنو صار وياج
شلون عايشة شراح تسوين وتعرفون هاي الاسئلة واني جنت اجاوبهن وبعدها غيرن الموضوع لان لاحظن انو احجي عن بابا غصب عني اختنگ
بلشن يحجن بغير مواضيع ويضحكن ويصنفن وكلش تونست وياهن ياسمين وعرفت انهن متزوجت ثنينهن قبل كم شهر
بقينا يمهم ومن تأخر الوقت دز علينا تميم وودعناهن وطلعنا من البيت قبل ما نوصل بيتنا تميم گال ياقوت فائق ثقة
ياقوت : شلون يعني
- يعني اگدر اوثق بيه
- اي اكيد
- روحن للبيت هسا ارجع .. واندار على فائق گلو فائق دقيقة اذا ما تصير زحمة
ياسمين : شكو تميم
- هسا اجي واحجيلكن
عفناه ورجعنا للبيت وبين ما اجى فرشنا الفرش ومن اجى گال لياسمين وصيتو عليكن خاف تحتاجن شي واني مو موجود وصعد نام
مرت كم يوم وتميم خطية مگضيها بالدوائر يطلع الصبح وما يرجع لورا الضهر بس الشي الحلو انو استقرينا بالبيت ودائما نتواصل ويا اهل تميم وخصوصا اية
وجانت ياسمين تتواصل ويا اهلها ومن تتواصل وياهم اني ابتعد عنها علمود تاخذ راحتها وبنفس الوقت علمود لا يشوفوني اخوانها لان تحجي فيديو واسمعها تحجي وياهم مرات
بعد مرور تقريبا 10 ايام الساعة جانت بال 8 ودگ تيلفون ياسمين وشافت الاتصال جان زيد وردت عليها گاللها اني عند الباب
وطلعت علمود تفتحلو الباب جان يم باب الصالة يعني عابر من فوگ الحايط ووياه زياد ورشيد ومالك اشرلها تسكت وگاللها ارجعي للغرفة وشيصير لا تفتحين الباب
رجعت گعدتني لان ما حسيت على صوت التيلفون زمن حجتلي انشغل بالي گالت البسي عبايتج وخمارج خاف يصير شي واتصلت على تميم
گاللها تميم هسا جاي بالطريق اني وشلون كملت كلامها صارت هوسة بالبيت واني وياها كتلنا الخوف ومانعرف شنو لازم نسوي
رحنا ركض وگفنا يم الباب علمود اذا اندفع ما ينفتح وبسبب الاصوات ما جنا نعرف شنو صاير وصرنا نبجي اني وياها من الخوف
ورا شوية هدأت الاصوات وصرنا نسمع صوت تميم بالبيت وگال لزيد روح گول للولد يدخل بسرعة واجى باتجاه غرفتنا
من دگ الباب فتحتو ياسمين ومن الخوف حضنتو كل قوتها وهو حظنها وگاللها لا تخافين ماكو كلشي وصاحني گال تعالي بوية
ياقوت : بخوف .. شنو تريد
تميم : تعالي وتعرفين
- خايفة
- اقه عليج تخافين واني موجود
- بس گلي شنو صاير
- تعالي وياي وتعرفين
- بتردد .. تمام
ما جنت اريد اروح وياه خصوصا بعد الصوت الي سمعتو اول ما اجو الولد من طلعت جان فائق واگف بالحوش واخذني تميم للاستقبال
شكرا لزيارتكم عالم روايات سكيرهوم
