رواية بنت الكهوجي الفصل الثاني والثلاثون بقلم احمد
ياقوت : ما جنت اريد اروح ويا تميم خصوصا بعد الصوت الي سمعتو اول ما اجو الولد من طلعت جان فائق واگف بالحوش واخذني تميم للاستقبال
دخلت للاستقبال جان بيها 4 شباب ملابسهم مبهذلة واكو شوية دم على ملابسهم من شفتهم خفت وختلت ورا تميم بدون مادري بنفسي
تميم : تعرفيهم
ياقوت : هزيت راسي بمعنى لا
تميم : خلص روحي .. زيد
زيد : گول
تميم : طگلهم صورة حليوة مثل جهرتهم
زيد : يلا يا ولد ارفعو راسكم وگولو چيييييز
ياقوت : تعجبت من زيد رغم الوضع المخيف لحد الان يصنف ومو هامو شي تمنيت عندي برودة الاعصاب الي عندو المهم تجاهلت كلشي ورحت للغرفة
ياسمين : بخوف .. ها شكو ياقوت
ياقوت : ماعرف 4 شباب مجتفينهم وضاربيهم بالاستقبال
- منين اجو الشباب
- ماعرف يمكن جايبيهم وياهم الولد
- ياربي استرنا بسترك
- آمين
تميم : قبل ما اجي لبغداد جنت مفكر انهي موضوع نقل ياقوت وبنفس الوقت اريد اعرف منو الي جانو يريدون يغتصبوها
جان الموضوع معقد ولازم نخططلو تخطيط كامل قبل ما نسوي اي خطوة لان اي غلط ممكن يصير يا اما تتورط ياقوت يا اما ما نلزمهم مرة ثانية
قبل ما ننتقل لبغداد بكم يوم دزيت زيد ووياه شخص من گرايبنا عندو معلومات عن كاميرات التصوير والمراقبة
واشترينا نوع كامرات نگدر نشوفها عن بعد وتنربط على جهاز بيه بطارية علمود من تنطفي الكهرباء ما يتوقف التصوير
المهم اخذوهن زيد والولد وانطيتو مفاتيح بيت ابو باسم ووصيتهم ما يسوون شي قبل الليل علمود لا احد يشوفهم من الجيران وينتشر الموضوع
فمن راحو لبغداد بقيت على تواصل وياهم ومن صارت الدنيا ليل كلش راحو للبيت واول ما دخلو قفلو الباب ونصبو الكامرات بالسطح
وتأكدو انهن مو واضحات وكملو تنصيب والجهاز الي ينربطن عليه حطوه بالسطح وحطو فوگو شوية غراض علمود ما يبين
وسحبولو كهرباء من الواير مال الگلوب وتعرفون بهيج حالة الي يجي ماراح يدقق على وايرات الكهرباء واصلا ما متوقعين اكو كامرات
رغم حرارة الجو وخصوصا بالاسطح بس ما جان عندنا اختيار ثاني ومن خلصو تنصيب زيد والي وياه رجعو للانبار وصارن الكاميرات مربوطات على تيلفون زيد
بعدها صرنا ندور بيت ايجار قريب من بيت اهل ياقوت وگوة لگينا بيت بطرف الفرع الي بيه بيت ابو باسم وحجزناه للولد
انطيت خبر لاهلي عن الموضوع بس وصيتهم محد يحجي گدام ياسمين وياقوت ما اريدهن يخافن او يسون شي ممكن يخرب الخطة
ومن مشيت لبغداد بنفس اليوم لحگوني اخواني وبقو بالبيت مگضينها مراقبة ونوم وانترنت ومن يشوفون اي شي مو طبيعي يتحركون
من رحنا لبيت ابو فائق دققت على تصرفات فائق جان مبين عليه كلش زين ولان جنت محتاجو قررت افاتحو بالموضوع
بس ما اريد احجيلو كلشي دفعة وحدة بس وصيتو ينشر بالمنطقة ان اني اطلع الصبح وما ارجع لورا الظهر علمود الحجي يوصل للعصابة
وهو ما قصر خلى المنطقة كلها تعرف بس على طريقو نشر الكلام بحيث محد يعرف ان هو مشترك وياي بالموضوع علمود لا احد يأذيه
باليوم ال 10 بعد ما طلعت الصبح بلشو اخواني مراقبة والعصابة مايدرون بشي وجانو مقررين انهم يغتصبون ياقوت وياسمين
من شافوهم اخواني بالسطح اجو ركض وخابرو ياسمين علمود ما يسمعون دگة الباب وعبرو من فوگ باب الحوش لان صوتو عالي
بعدها انتظروهم لحد ما دخلو وهجمو عليهم وگدرو يجتفوهم واني من وصلني خبر من ياسمين عفت كلشي بايدي ورجعت للبيت مثل الصاروخ
اول ما وصلت باوعتلهم بالاستقبال وبگلبي اگول انتو تخلون ابو باسم يهج من بيتو ما يكون اسمي تميم اذا ما ندمتكم على فعلتكم
جبت ياقوت علمود اعرف اذا تعرف احد منهم لو لا بس ما جانت تعرفهم وخليت زيد يصورهم وانطينا الصورة لفائق وجان يعرفهم كلهم
گلتلو من اطلعهم للشارع اريد تنطي خبر لاهلهم خصوصا ان اكو 2 منهم من غير فرع ووصيتو يگول لاهلهم اكو ناس مجتفين ابنكم بفرعنا ويرجع
سحبناهم مثل الطليان گدام البيت وراحو رشيد وزياد دگو الابواب مالت الفرع كلهن وبطبيعة الحال من يطلعون الناس ويشوفون المنظر راح يتجمعون
وما خاب ظني لان تجمعو علمود يعرفون منو المجتفين وشنو صاير وياهم وتخبلو اهل الولد وجانو يريدون يهجمون علينا علمود يخلصوهم
اشرت لزيد وراح جاب سلاحي من السيارة ووجهو على راس واحد منهم وگال الي يتقدم اطشر مخو ومن هدأو بديت احجي اني
تميم : اني الشيخ تميم شيخ عشيرة البو هذال (اسم العشيرة وهمي) وذول الاربعة داسو گاعي وجانو ناويين يطعنون بعرضي
بس والي رفع السما فلا يطلعون من المشكلة مثل ما دخلولها وهسا گدامكم احجي الي يريد ابنو يجيني للانبار لان ما يحصلهم هسا
رشيد زياد مالك دخلوهم داخل وانت زيد الي يتقدم خطوة حط طلقة براسو وخلي العشايرة تتذابح بيناتهن
دخلناهم للحديقة وبقو اهلهم يتوسلون وننطيك كلشي تريدو بس عوفهم گلتلهم مستحيل واذا تريدوهم تجون تنطون الفصل بالانبار مو هنا
اخير شي شافو ماكو اي نتيجة لانو اغير رايي وبسبب خوفهم على ولدهم انو اذيهم ما جانو يگدرون يسوون شي
من راحو دخلت داخل للولد واستلمتهم دگ بوكسيات وراشديات ودفرات طلعت ضيم بغداد كلو بروسهم خليتهم يتندمون عاليوم الفكرو بيه هيج فكرة
باوعت لزيد گلتلو روح احميلي سجين عالنار خلي نسويهم حريم وتخبلو اخواني والولد صارو يبجون ويتوسلون ان ارحمهم
سحبت زيد عالمطبخ على اساس يحمي السجين گلتلو ماراح اسوي هيج شي بس احميه علمود اخوفهم واخليهم ما يتجرأون يفكرون هيج مرة ثانية
وبعدها غسلت ايديني من الدم الي عليهن وجنت دايخ وين اوديهم هسا سالفة اوديهم للانبار واگفة كلش لان مستحيل يوصلون
اذا احطهم بالسيارة ممكن ينطون خبر للسيطرات ونروح بخبر كان واذا نحطهم بصندوق السيارة فالصندوق ما يتحمل اكثر من واحد
واذا السيطرة تفتش الصندوق هم نروح بخبر كان فلازم اخليهم بفد مكان ببغداد لحد ما اكمل شغلي وارجع للانبار بس محلولة إن شاء الله
من خلصت غسيل ايديني رجعت للغرفة جانن ياقوت وياسمين گاعدات وكاتلهن الخوف ومن طبيت اجت فورا ياسمين تسأل
ياسمين : ها تميم شصاير والله گلبي راح يوگف
تميم : تطمني ما صاير الا كل خير .. بوية ياقوت
ياقوت : ها
تميم : مسكنا الي خلوج انتي وابوج تعوفون بغداد
ياسمين : قصدك العصابة
تميم : اي نعم
ياسمين : شلون مسكتوهم وليش جبتوهم هنا
تميم : ما جبناهم..........
زيد : تميم السجين جاهز
تميم : جايك .. بس ارجع احجيلكن
ياسمين : لحظة لحظة شتسوي بالسجين فدوة لا تورط نفسك
تميم : لا بوية ما اسوي شي بس اخوفهم علمود لا يعيدوها
ياسمين : امانة لا تسوي شي مو زين
تميم : لا والله ماسوي
ياسمين : تمام
تميم : رجعت عليهم وبايدي السجين ومن شافوها تخبلو ومستعدين يبوسون رجلي بس المهم اسامحهم وما اسوي الي ببالهم
لان يعرفون اذا سويت هالشي هذا راح يفقدون ذكوريتهم لان عيب اگول رجولتهم وتدمر حياتهم كلها هاي غير الوجع الي راح يحسون بيه
قربت السجين من وجوهم وبالاخير گلتلهم هالمرة ماراح اسوي شي بس اقسم بالله ان سمعت بيوم من الايام مفكرين مجرد تفكير تعيدون هالشي الا انهي حياتكم بايدي
وهسا تروحون ويا الولد واي شي يصيرلهم فانتو وعشايركم تتحملون المسؤولية والي رفضت اسويه اليوم راح اسويه بغير يوم
اول ما كملت كلامي اجى صاحب البيت الي گاعدين بيه الولد يريدهم يطلعون منو لان سمع بالي صار ومايريد يتورط ويانا
زيد : هسا شنسوي
تميم : راح نروح احنا لفندق وانتو ابقو بالبيت بس انتبهو كلش زين
زيد : تمام توكلو لعد
تميم : تمام
دخلناهم بالاستقبال واخذت ياقوت وياسمين لفندق ووصيت اخواني يقفلون الابواب كلش زين واذا يحتاجون شي يخابروني ما يطلعون هم
ياقوت : رحنا ويا تميم وخايفة من نتائج الشي الي صار واكثر شي خايفة على تميم واهلو بس هو ما جان مهتم نهائيا وهالشي انطاني شوية امل
******* تسريع للاحداث ********
بقى تميم يراجع بشهادة الوفاة لحد ما كملها وبعدها رحنا اني وياه للمدرسة وكملنا موضوع النقل ومن اخذت كتاب النقل يلا ارتاحيت
بعدها تميم اخذ مسواگ لاخوانو علمود يكفيهم لحد ما يجون اهل العصابة على اهل تميم ويفضون الموضوع بيناتهم بدون دم
طبعا خلال وجودنا ببغداد دائما يتصلون على تميم ويتوسلون بيه علمود يعوف ابنائهم بس هو يعاند الا يجونو للمضيف بالانبار
وجان دائما يگوللهم اي شي يصير لاخواني راح تكبر المشكلة وابنائكم راح يبقون يمنا بدون ما نأذيهم بس اذا فكرتو تأذونا نتصرف غير تصرف
وكلامو جان يخلي اهلهم غصب عنهم يخضعون للامر الواقع ويخافون يسوون شي وجانو شبه مطمنين لان گاللهم يبقون بدون اذية
بين ما تميم اخذ مسواگ لاخوانو يكفيهم المدة الي يبقون بيها جهزنا نفسنا اني وياسمين ومن اجى انطى حساب الفندق وتوكلنا على الله
جنا كلش متشوقين للرجعة وخصوصا اية والحجية كلش اشتاقينالهن وخلال الطريق حجى وياي تميم
تميم : اكلج ياقوت
ياقوت : گول
- راح يجون اهل الولد علمود ينطون فصل عن ابنائهم فشنو تريدين بالضبط
- شلون يعني
- يعني تريدين ينسجنون لو تاخذين مبلغ مالي او يتعاقبون بالعقاب الي انتي تقرريه
- ماعرف اني
ياسمين : خلي تميم هو يتصرف افضل
- اي اني هم رايي هيج انت تصرف بالموضوع اني ماعرف شنو الافضل
- بصراحة سالفة السجن شوية راح تتعرقل وانتي بالضبط لازم تحظرين المحكمة علمود تشهدين گدام القاضي بالي سمعتيه من ابوج
ثانيا العقاب معناها راح اخلف بكلمتي گدام اهلهم لان گلتلهم يبقون بدون اذية فافضل شي ناخذ منهم فصل بس نخوفهم
- شلون يعني تخوفهم
- يعني بالبداية نطلب ينسجنون ويكون هذا طلبج واهلهم اكيد ما يقبلون بهالشي فراح يحاولون يقنعونا بفصل علمود نعوفهم
بالاخير اگوللهم اني امون عليج وراح اقنعج بالفصل وبهالحالة ناخذ منهم الي نريدو
- بس هالشي مو غلط
- شنو الغلط بيها
- يعني اهلهم يتحملون مسؤولية افعالهم
- لا مو غلط لان ماعرفو يربوهم ولا علموهم الصح من الغلط فغصب عنهم يتحملون نتائج تربيتهم وتخيلي لو منفذين الي ببالهم شجان صار بيج
- ماعرف
- الي راح يصير اولا تفقدين شرفج وتصير سيرتج على كل لسان وراح تبقين بدون زواج هاي غير الحالة النفسية الي ممكن توصل بيج للانتحار
- ذكرتني بموضوع البنت الي حجتلي عنها الدكتورة النفسية
- شنو من بنت
- حجيتلو القصة
- هاي ابسط مثال يعني فوگ ما هي مظلومة صار كل الحق عليها وحتى اهلها عافوها
- اي صحيح
- لهذا لا تتعاطفين ويا هيج نماذج لان الي يتعاطف وياهم معناها يساعدهم انو يظلمون غير بنات ويدمروهن
- الله ينتقم منهم
- المهم حاطة مبلغ ببالج نطلبو
- لا
- تمام لعد عوفيها علي
- خوش بس شوية خفف عن اهلهم
- تمام بعيوني
- سالمة عيونك
بقينا نحجي بمواضيع مختلفة وصارت تشاركنا ياسمين بالحديث وما حسينا الا احنا على مشارف الرمادي والفرحة ترست گلوبنا
واخيرا وصلنا بيت اهل تميم نزلت ومن شوقي لاية والحجية نسيت جنطتي ومن شفت ماكو احد يشوفني من اهل تميم طگيتها ركض للبيت
اول ما دخلت جانت الحجية بالصالة تقرا قران واية يمها تگلب بتيلفونها ومن شافتني گالت يا روحيييييي واجت ركض حضنتني
الحجية : هلا بهالطول الحلو هلا بوردة البيت
ياقوت : بخجل .. هلا بيج وبوستها
- شلونج يمة
- الحمدلله وانتي شلونج
- مشتاقتلج كلش
- واني اكثر والله
- لعد وين تميم وياسمين
- نزلت قبلهم واجيت هسا تلگيهم وراي
ياسمين : السلام عليكم
الحجية واية : عليكم السلام ورحمه الله
وبوسنها
الحجية : وين تميم
ياسمين : راح لابوه يگول اريد احجي وياهم علمود من ارجع للبيت ما يدزون علي
- اي يمة عاشت ايدو هيج احسن
اية : يلا روحن بدلن ملابسكن وتعالن علمود تتغدن
ياقوت : يااااااا ولج نسيت جنطتي
اية : نسيتيها ببغداد
ياقوت : ماعرف ليش حبيت اجذب .. اي
- لا يالصخلة ولج اكو احد ينسى جنطتو ببغداد
- شعرفني
- مو اگول عليج صخلة بس محد يصدگ
تميم : هاج جنطتج صخلة
اية : دولي انت هم
ياقوت : جانت تحجي بعفوية ومو منتبهة انها گالت لتميم دولي من كملت كلامها صفنت وباوعت لتميم وهو ما تحمل وضحك
هي من الفشلة ضمت وجهها بايديها وراحت تركض باتجاهو وهو حضنها وباسها من راسها واخذها وياه للصالة وباس امو وگعد يتطمن عليهن
ياقوت : رغم تميم ما فد يوم صنف علي او حجى شي مو زين بحقي بس هالمرة ماعرف شنو السبب الي خلاه يسميني صخلة
بس اني على گولتهم تقبلتها بروح رياضية لان اعرف بيه يتشاقة وياي فرحت اخذت الجنطة وقبل ما اصعد گلتلو اسفة تعبتك وياي بس نسيتها
تميم : اية گومي تصرفي وياها
ياقوت : لا لا ماعيدها .. عفت الجنطة وطگيتها ركض للغرفة
اية كأنها منتظرة هالاشارة من زمان لحگتني للغرفة وتگول ولج افتحي ما اسويلج شي واني اگوللها والله ما افتح قابل اني صخلة مثلج
اخير شي عافتني ونزلت علمود الغدا واني طلعتلي ملابس من ملابسي الي بالبيت ونزلت عالصالة بس تعبانة كلش لان من الحماس ما نمت زين بالليل
جابت الغدا اية وتغديت وخلصت وگلتلهن اعذرني ماگدر اتحمل اريد انام گالت اية وربي اذا ما سكتي يالصخلة الا اشوي على اذانج بصل
طلعتلها لساني واني متوجهة للدرج وعفتهن وصعدت فوگ واني مشتاقة لفراشي الي افتقدتو من زمان من وصلت گمزت عليه وتمددت
بدون ما افكر بشي غمضت عيوني وخلال ثواني اخذتني النومة وبقيت نايمة لليل گعدت باوعت للساعة جانت 9 بالليل
شكرا لزيارتكم عالم روايات سكيرهوم
