رواية بنت الكهوجي الفصل الثالث والثلاثون بقلم احمد
ياقوت : جابت الغدا اية وتغديت وخلصت وگلتلهن اعذرني ماگدر اتحمل اريد انام گالت اية وربي اذا ما سكتي يالصخلة الا اشوي على اذانج بصل
طلعتلها لساني واني متوجهة للدرج وعفتهن وصعدت فوگ واني مشتاقة لفراشي الي افتقدتو من زمان من وصلت گمزت عليه وتمددت
بدون ما افكر بشي غمضت عيوني وخلال ثواني اخذتني النومة وبقيت نايمة لليل گعدت باوعت للساعة جانت 9 بالليل
نزلت تحت جانو گاعدين يتعللون هيج من بعيد رفعت ايدي على اساس اسلم عليهم وكملت طريقي للمطبخ وشربت گلاص ماي
بعدها فتحت الثلاجة لگيت بطاطة وبانذجان اخذت منهن وبلشت اگشرهن وادندن ويا نفسي وبعدها گليتهن ومن كملت اخذت العشى للصالة
گلتلهم تعالو اكلو وياي ورفضو گالو متعشين وحطيتو بصفحة عنهم علمود ما اضايقهم وگعدت اكل شو شوية واجى تميم صار ياكل وياي
ولحگتو اية وبعدها ياسمين بقت بس الحجية وطلبنا منها تجي ورفضت لان ما تگدر تكثر اكل بالليل يأثر على معدتها
وسبحان الله ربنا حط بركة بالاكل بحيث كفانا كلنا لحد ما شبعنا من خلصنا غسلت المواعين وحدي لان قليلات ورجعت يمهم
اية : مشتاقة لزيد وزياد
ياسمين : اي والله
تميم : باجر اذا انحل الموضوع راح يجون
ياقوت : باستغراب .. باجر
- اي خابروني اهلهم وباجر ينجمعون يمنا
- منين يعرفون انو احنا اجينا اليوم
- ماطول ولدهم يمنا فيعرفون كل تحركاتنا لحد ما نرجعلهم ولدهم ونخلص منهم
- الله يستر منهم بس عالقليلة عايفينك ترتاح بعدين يجون
- هم ما جبروني على باجر بس گالو اذا ماعندك باجر شغل نجيكم نحل المشكلة واني وافقت لان اريد اخواني هم يرجعون
- وربي ماعرف شلون اشكركم كلكم وگفتكم وياي ما يسويها الا ولد الاصول
- هذا واجبنا بوية لان انتي امانة يمنا وهاي معناها انتي منا وبينا والي يصير عليج يصير علينا سواء جبير او صغير
ثانيا اذا انتي ما نوگف وياج لعد ويا منو نوگف والي سويناه يفيدج ويفيد غيرج
- يفيد منو يعني
- على سبيل المثال اذا حاطين براسهم وحدة غيرج راح يخافون ويتراجعون والي يسمع بالي صار راح ياخذ حذرو على بنتو
- اي والله صحيح
- اني تعمدت افضحهم بالمنطقة علمود اوصل خبر للناس الي بالمنطقة شنو من شي ذول
- والله اني ما مضوجني غير اهلهم
- اهلهم بشنو يفيدوج اذا صار شي ترا ابسط شي يگولون لو هي مضبوطة ما صار وياها شي لان ماراح يعرفون ان ولدهم الي مسوينها
ثانيا من خلو ابوج يهج من بغداد ويعوف بيتو وشغلو ومنطقتو شو اهلهم ما فادوكم بشي ولا حاولو مجرد محاولة يساعدون ابوج
- بهاي وياك حق بس اني مكتوبلي اجي هنا قبل ما يموت بابا ومكتوبلي ابقى وياكم
- اي صحيح
- ليش ما تخابرون زيد نشوف شخبارهم
- من عيوني
- تسلم عيونك
- اية ناوشيني تيلفوني من يمج .. ومن اخذو خابر على زيد وفتح الصوت
زيد : الووو
- ها زيد شلونكم
- ممكن تحدد منو الي شلونهم احنا لو هم
- انتو وهم
- اذا ممكن استاذ تميم سؤال سؤال علمود الحگ ارد
- استغفر الله .. يابة شلونكم انتو
- بخير
- وشلونهم هم
- بخير
- نعلة على ابليسك من الاول گول بخير وفضها
- يولد الشيخ تميم يسلم عليكم تريدون اوصيه على شي لو عندكم كلشي
- ذول هم لو انتو
- ذول هم ويشكرونك على حسن الضيافة ويگولون من راحت جهرتو من يمنا واحنا ضايجين
- طبعا ضايجين هو وين اكو بشر يشوف جهرتك ويفرح
ياقوت : من كمل كلامو زيد غص من الضحك وصوت ضحكتو وصلنا بالتيلفون وراح على اخوانو ويحجيلهم على كلام تميم
اخوانو بعد اضرب منو وما نسمع بالتيلفون بس صوت ضحكتهم ومن خلصو ضحكتهم حجو ويا تميم كلهم وحجو ويا اية والحجية
بس تفاجأت بالاخير من زيد طلب يحجي وياي وانطاني التيلفون تميم واخذتو گال زيد سكري الصوت وباوعت لاهلو باستغراب
تميم : شتريد زيد
- موضوع بيني وبينها
- من ايمتى اكو مواضيع بينكم
زياد : من بعيد .. يريد يسألها عن احوال الحب
تميم : العب منو هاي الحب يول ومنين تعرفها ياقوت
زيد : وانت مصدگ هالجلب هذا بس سكري الصوت ياقوت وراح تعرفون كلكم بعد شوية
ياقوت : تمام .. سكرتو احجي
- اول شي شخبارج
- الحمدلله وانت
- الحمدلله صيحي اية يمج بس لا تخلينها تسمع الصوت
- صحت اية خليتها على يميني والتيلفون يساري
- هسا اضربيها على علباها وانهزمي
- فتحت الصوت .. شنو ما سمعت
- اضربيها على علباها وانهزمي
اية : لا يالخاين ليش ولك
- انفضحنا يولي ياقوت مو على اساس بيناتنا اتفاق
- اني ما اضرب خيتي
اية : يولي اروحلج فدوة
ياقوت : تريد تحضني ودفعتها وضربتها على علباها ورحت ركض ختلت عند الحجية
اية : يااااااا ليش هيج ولج جلبة
- عبالج نسيت من لحگتيني للغرفة الضهر
اية : اني الج يولي بسيطة
زيد : ولج بعد ايدي هالايد
اية : بسيطة يول زيد وربي الا اخلي تميم يأدبك
ياقوت : بقو يحجون وزيد شبع ضحك عليها وهي تعرفنا نشاقيها فما ضاجت بس من خلص الاتصال حاولت تضربني ومنعتها الحجية
رجعت گعدت بمكانها وتباوع على امها وتگول طلعو اهلي كلهم خونة واني مادري
بعدها كملنا التعليلة وحجينا بمواضيع مختلفة واخير شي رحنا نمنا تمددت بفراشي واجى ببالي موضوع الگعدة باجر
حاولت اتجاهلها واقنع نفسي ان الموضوع كلو عند تميم وماراح يهمني شي بس مدا اقتنع لان الموضوع يخصني اني من الاساس
وبنفس الوقت لان گعدت بوقت متأخر فمو جايني نوم واية عرفتني دا افكر بالگعدة فصارت تحجي وياي بمواضيع مختلفة علمود انسى
اخير شي اية نعست واني سويت نفسي اريد انام علمود هي تنام وبقيت هواي افكر لحد ما سمعت صوت اذان الفجر وگمت توضيت وصليت
من سجدت گلت اللهم انهي الموضوع على خير ولا تخلي تميم واهلو يتأذون بسببي لان ماراح اگدر اتحمل الذنب باذيتهم
بعدها گعدت اية عالصلاة ومجرد تمددت غفيت واخذتني النومة وما گعدت للساعة 10 الصبح وگعدت مو شبعانة نوم
نزلت تحت جانن اية وياسمين بالمطبخ يغسلن مواعين الريوگ والحجية تقراء قران بالصالة وما صبحت عليها علمود ما اقاطعها ورحت للمطبخ
ياقوت : صباح الخير
ياسمين : صباح النور هلا حبيبتي
- ليش ما گعدتوني
- اية گالت بقيتي للفجر گاعدة وما حبينا نخرب نومتج
- تمام
- المهم طلعيلج شي اكليه لا تبقين بدون اكل
- تمام .. اجو الناس لو بعد
- لا بعد بس تقريبا راح يوصلون لان مشو من هناك من وقت
- شتتوقعين يصير
- راح ينطون الفصل الي يقررو تميم ويروحون
- وتميم واخوانو خوما عليهم شي
- لا معليهم شي لان اهل العصابة ما يريدون تكبر المشكلة ويعرفون ولدهم غلطانين ولو جانو بمكان تميم جان سوو اكثر من هالشي
- خوش الله يحميهم
- آمين
- ليش ساكتة اية
- ماعرف شفت ياسمين دا تجاوبج الاجوبة الي ببالي فبقيت ساكتة
- تمام
تريگت ورحت للصالة باوعت من الشباك جانو عمام تميم كلهم متجمعين وكلهم لابسين زي عربي واسلحتهم بايدهم عبالك حرب مو گعدة
تميم : گعدت من الصبح جهزت نفسي وطلعنا اني واخوي فاضل وابوي وجدي بدينا نجهز للگعدة ونظفنا المضيف واجو ولد عمامي ساعدونا
بين ما صارت الساعة 9 الصبح كملنا گلتلهم الي يريد يروح يسبح ويرجع خلي يروح هسا علمود يلحگ يرجع قبل ما يجون
رجعت للبيت وصيت ياسمين واية يجهزن الريوگ وصعدت اخذتلي دوش ونزلت تريگت ولاحظت ان ياقوت مو موجود ويانا
سألت عنها گالت اية بقت البارحة للفجر مو نايمة وعفناها نايمة علمود ترتاح ومن كملت ريوگ طلعت للمضيف وجانو گرايبي تقريبا كلهم متجمعين
ابوي وجدي هم تكفلو بموضوع الغدا فمن گعدو الصبح راحو فورا علمود يشترون ذبايح ويودوهن للگصاب وجابو وياهم الطباخ والاشياء الي نحتاجهن بالعزيمة
الساعة 10 جان كلشي جاهز بس الطباخ يشتغل بالغدا وعندو هواي وقت يعني ما يحتاج يستعجل وبقينا ننتظرهم يوصلون علمود تبدي الگعدة
الساعة 10:30 وصلت سياراتهم وجانو ال4 عشاير جايبن مع بعض لان كلهم بنفس المشكلة ونفس المنطقة فتجمعو واجو سوا
استقبلناهم استقبال حلو لان مشكلتنا ويا ولدهم مو وياهم وعيب علينا نقلل من احترامهم بسبب افعال ولدهم ناقصين التربية
بعد ما گعدو وضيفناهم الگهوة والجاي بدا جدي يرحب بيهم بصفتو جبير العشيرة وجد الشيخ الحالي الي هو اني
(راح اذكر كلام الضيوف بدون ذكر اسماء)
- شكرا الك حجي كلامكم هذا ينحط عالراس واحنا نعرف ولدنا غلطانين ويشهد الله خجلانين منكم بسبب فعلتهم واجينا اليوم نقدملكم اعتذارنا ونحاول نحل المشكلة بدون ما تكبر
الجد : العفو شيخنا هذا واجبنا بس بما ان الموضوع يخص حفيدي فهو الي راح يتكلم وياكم بخصوص الحل وإن شاء الله تتصافون ويا بعض
- شيخ تميم اول شي نعتذر منك عالي صار ومجرد بقيت ولدنا عايشين هذا فضل ما ننساه الك
تميم : الفضل لله واعتذارك مقبول
- بشنو نگدر نرضيك اطلب اي شي ببالك واحنا جاهزين
- شيخنا لا تنسى ان الموضوع ما يخصني اني وحدي بنت ابو باسم هي الي جانت مقصودة ولو لا قدر الله صايرلها شي جان انتهت حياتها
ولعلمكم ابو باسم جان يعرف بنوايا اولادكم قبل ما يترك بغداد وبسببهم تركها وتمرمر هو وبنتو وكل هذا ما كفاهم باول فرصة حاولو ينفذون مخططهم
- لا حول ولا قوة الا بالله والله يا شيخ تميم احنا ماعدنا علم وكل الي سمعناه عن ابو باسم الله يرحمو انو طلع من بغداد لان لگى شغل خارجها
وتوقعنا بوقتها انو ما يگدر يبقى بالبيت الي توفو بيه زوجتو وابنو الله يرحمهم لذلك يريد ينتقل لغير مكان علمود يخفف عن نفسو وجع الذكريات
- ادري بيكم ما تعرفون بس الي اريد اوصلو ان البنت طلبت انهم ينسجنون ويتعاقبون حسب القانون
- بس شيخنا انت گلت نگعد ونحلها بيناتنا واجينا من هناك علمود نحلها بدون محاكم وسجون
اني اعترف ولدنا يستاهلون اسوء السجون بس لا تنسى يا شيخ ان هذا الشي راح يزيد الفضيحة عالعشاير الاربعة كلها مو بس عالولد
فنطلب منك ان تفاتح بنت ابو باسم بلكي تغير قرارها والي تطلبو احنا جاهزين بس المهم ما يكون السجن احد الحلول
واني انطيك كلمتي ان عقابهم ما راح يكون سهل وراح اكون اني اول واحد يعاقبهم ويخليهم يتوبون من هيج افكار مرة ثانية
تميم : من سمعو بالسجن صارو ينطون حلول واني جنت شبه مصر على موضوع السجن ما اريد بسرعة اتنازل لان راح يحاولون يضغطون علي بموضوع الفصل علمود يقللوه
بقينا نتناقش الى ان صار الغدا وگلنالهم بعد الغدا اعتبروها محلولة إن شاء الله وقدمنا الغدا وبعد الغدا ترخصت منهم بحجة احجي ويا ياقوت
اجيت للبيت جانو اهلي دا يتغدون صعدت فوگ صليت الضهر لان من صلو بالمضيف جنت اني عند الطباخ وما لحگت عليهم ومن خلصت نزلت تحت
الحجية : ها يمة شو اجيت
تميم : اجيت على اساس احجي ويا ياقوت تغير رايها
ياقوت : اغير رايي بشنو
- مو اتفقنا انو على اساس طالبة ينسجنون
- ايوا وهسا شراح يصير
- هسا راح ارجع عليهم واگللهم حطت الموضوع بايدي واسمع قراراتهم والي يعجبني انفذو
- تمام
- يلا مع السلامة
الكل : الله وياك
رجعت للمضيف اول ما گعدت گلتلهم لخاطركم گدرت اغير راي بنت ابو باسم وحاليا الموضوع صار بايدي فاريد اسمع رايكم بالاول
- الله يوفقك ويجبر بخاطرك وفضلك هذا ما ننساه طول العمر
- الفضل لله هذا واجبي
- واني لخاطرك وخاطر مساعدتك النا ماراح اتهاون واقلل من الفصل واذا توافق فيكون الفصل 100 مليون على كل عشيرة يعني مجموع الفصل 400 مليون
- باقي الشيوخ عندكم راي ثاني
البقية : اذا توافق على هالمبلغ فاحنا جاهزين
- لعد اعتبرو الموضوع منتهي بس عندي كم ملاحظة اريد احجيهن بوجودكم
- اي شيخ احجي
- اول ما تطلعون منا ولدكم راح يكونون احرار وتلگونهم بالبيت قبلكم فاي شي يصير لاخواني راح تتحملون المسؤولية انتو لان محد يعرفهم غيركم
ثانيا اي شخص يسكن ببيت ابو باسم ويفكرون ولدكم مجرد تفكير انو يحاولون ينتقمون فماراح تعدي على خير وما راح تخلص بفلوس او سجن
ثالثا اي احد يجيني ويشتكي من ولدكم فراح اكون اني خصمهم الاول واتمنى ما تضوجون من كلامي لان تعرفون ان ولدكم ما يستاهلون التهاون
- تطمن شيخ تميم انت واخوانك وكل گرايبك مستحيل احد يتعرضلهم من عشايرنا واذا صار وتعرضلهم احد فدمو مهدور گدام الكل
- هاي هي شيخنا اتفقنا لعد
- بعد باجر يوصلكم الفصل باذن الله
- إن شاء الله واعذرونا اذا بدر مننا شي بقصد او بدون قصد
- ما منكم اي قصور يكفينا استقبالكم الحلو رغم غلط ولدنا
- ولو واجبنا
بعدها حجينا تقريبا نص ساعة وترخصو علمود يروحون واول ما مشو من عدنا خابرت زيد گلتلو تخلون سبيل الولد وتقفلون البيت وتجون فورا
وهم ما قصرو خلال اقل من نص ساعة مشو من المنطقة وبين ما حجينا اني وعمامي عن خطتي وشلون مسكتهم صارت الدنيا مغرب
رجعت للبيت متفلش لان النهار كلو تقريبا گاعد فجسمي تشنج وهم گاعد من وقت فتعبت كلش اول ما دخلت للبيت صارن بوجهي امي وياقوت
الحجية : ها يمة شصار وياكم
- فضت
- الحمدلله الله يبشرك بالخير واخوانك ايمتى يجون
- هسا تلگيهم بالطريق ما باقيلهم هواي
- ايمتى خابرتهم
- العصر جانو بگراج النهضة
- خابرهم تطمن عليهم
- صار
زيد : ولك ها يمثبور
- انلصم ولك وين صرتو
- لا رد
- احجي شبيك
- لا رد
- الووووووو زيد
- هسا ما فهمنا انلصم لو احجي
- لا احجي بالاول وبعدين انلصم
- تمام اتفقنا
- وين صرتو
- هسا قريبين من التأميم فد شوية ونوصلكم
- تمام توصلون بالسلامة
- يلا ادعبل
- هسا انلصم
- لا رد
الحجية : ها يمة وينهم
- فد ربع ساعة ويكونون هنا
- تمام
ياقوت : من تطمنت على تميم واخوانو شوية ارتاحيت وعفتهم ورحت للمطبخ بشرت البنات وبديت اساعدهن بالعشى
شكرا لزيارتكم عالم روايات سكيرهوم
