رواية بنت الكهوجي الفصل الرابع والثلاثون 34 بقلم احمد

ياقوت : من تطمنت على تميم واخوانو شوية ارتاحيت وعفتهم ورحت للمطبخ بشرت البنات وبديت اساعدهن بالعشى 

الولد من وصلو طلعو لاهلهم فورا علمود يسبحون ويتعشون وهم امهم مشتاقتلهم فاحنا تعشينا وراح تميم هالمرة بنفسو جاب حلويات 

ومن رجع مر على بيت ابوه جاب وياه زيد وزياد وباقي اخوانو جانو نايمين لان البارحة بالليل جانو سهرانين واجو تعبانين كلش 

اول ما دخل تميم دخل وراه زيد بابتسامتو المعتادة وگف وباوع لاية وفتحلها حضنو وركضت عليه وحضنتو كل قوتها 

اخذها بحضنو وصار يفتر بيها وهي تضحك ولاول مرة انتبه على فرق الضخامة بين زيد واية وكانها بنتو مو اختو فرق كلش شاسع 

عائلة تميم كلها الولد ضخمين والبنات ناعمات والي يشوفهم ما يصدگ ان ذني الناعمات خوات ذول الضخمين 

بعدها زيد باس اية من راسها وراحت تسلم على زياد وزيد اجى باس الحجية وصارو يتطمنون علينا وجنا كلنا فرحانين بيهم 

تميم : مسك زيد من علباه بقوة 

زيد : ول خالي والله مو اني 

- ول خالي والله انت 

- ول خالي غير افهم شنو سويت 

- ول خالي اني من زمان متحلف بيك 

اية : ول خالي مو ضربتني هالجلبة بسببك 

زيد : ول خالي اني متبري منها من اليوم ولاخر يوم بحياتي 

ياقوت : ول خالي ليش هيج 

زيد : ول خالي ماسكتني ايد تگول ايد وحش مو بشر 

زياد : ول خالي هلا بيهم 

زيد : الله عليك تميم عوفني ابرد گلبي بيه واقسم بالله ارجع لمكاني 

عاف رگبتو تميم وگام على زياد وصارو يتلاوون ويا بعض ووگعو فوگ تميم وبهالاثناء دخلت ياسمين ووياها علاگة الحلويات 

زيد : اوگفو نسوي هدنة 

زياد : واني موافق 

زيد : ادري ياسمين قحط مواعين شبيج ول خالي 

ياسمين : ول خالي انت بس اكل شنو فايدة المواعين من تبقى فارغة 

- ول خالي وربي صدگ .. صدگ تميم شتسوي بموضوع مدرسة هالفصعونة هاي 

ياقوت : انت فصعون 

- اية استلميها 

- هاي حبيبتي 

بين ما كملت كلامي اجتني كفخة على علباتي خلتني اعيد حساباتي كلها وزيد شبع ضحك على موقفي 

تميم : باجر اوديها للمدرسة اسجلها 

- وين تسجلها 

- غير بمدرسة اية 

- لا شوفلها غير مدرسة 

- ليش 

- افضل .. مدرسة اية بعيدة عن طريقك 

تميم جان ناسي موضوع ان هو يوديني وزيد جان قصدو ان انت راح تاخذها لان يجون وياه رشيد وزياد فالافضل اروح ويا تميم 

تميم : هم صحيح لعد باجر اشوفلها مدرسة على طريقي واخذها هي واية انزلها بالمدرسة واحنا نكمل طريقنا 

اية : وليش عود تاخذني اني اريد ويا زيد اروح 

تميم : كأنو صايرة توصوصين هواي 

اية : اي والله يخوي شنسوي لازم نوصوص 

زيد : عوفو الحجي وتفضلو 

ياقوت : بدا زيد يوزعلنا حلويات ويحجي ويضحكنا وياه جنا من صدگ مشتاقين لتعليلتهم هو وزياد وكلش تونسنا وياهم وبقو لوقت النوم وراحو 

ثاني يوم جان الروتين طبيعي ماكو احداث تذكر الا انو تميم لگى مدرسة على طريقو وجانت مدرسة اهلية بس اني مادري بيها اهلية 

جان عندي حماس كلش قوي للمدرسة وخصوصا انو الي وياي بالبيت كلهم ناس دارسين ويهتمون هواي للدراسة 

ومو قصدي اقلل من الناس الي مو دارسين بالعكس لان بابا وماما ما كملو دراستهم بس القصد انهم راح يشجعوني انو اتفوق بدراستي 

بعد ما لگى المدرسة وتأكد منها رحنا اني وياه للمدرسة اول ما وصلنا قريت اسمها مدرسة شهد النرجس الاهلية للبنات (اسم عشوائي) 

ياقوت : تميم 

- ها بوية 

- هاي اهلية المدرسة 

- اي اعرف 

- بس اني ما اريد اهلية 

- ليش بوية شنو السبب 

- هيج .. ماگدرت اگولو علمود الفلوس لان راح يزعل مني 

- احجي شنو السبب 

- ماعرف بس ما اريدها 

- شوفي بوية هاي اقرب مدرسة على طريقي فاذا اكو سبب احجيلي هسا واذا ماكو سبب علمود ندخل نكمل التسجيل ونرجع 

- اووووووف ماريدها لان ياخذون فلوس بدون فايدة 

- ههههههههههه معليج بوية اعتبريها دين ومن تتوظفين عود رجعيهن 

- بس تاخذهن 

- بضحكة .. اي اخذهن 

- تمام 

جنت اعرف ماراح ياخذهن بس من يجي وقتها اخليها ينجبر ياخذهن مهما كان الثمن وراح اذكرو بكلامو هذا علمود ما يگدر يمنعني 

دخلنا للمدرسة بيها بس المديرة وعاملة النظافة ومدرستين دگ باب الادارة تميم وسلم عليهن وطلبت المديرة انو ندخل نگعد 

تميم : ست عدنا هاي البنية نريد نسجلها يمكم بالمدرسة وياها النقل والمستمسكات واي شي تحتاجوه 

- انطيني بنيتي فايلج 

ياقوت : انطيتو الها 

- بعد شوية .. انت اخوها لو شتكونلها لان ابوها متوفي 

- لا ست ابوها حطها امانة يمي قبل وفاتو بدقايق 

- الله يرحمو 

- ويرحم موتاج 

- احنا راح نسجلها يمنا بس باجتماع اولياء الامور ماراح تگدر تحظر لان كل الي يحظرن نسوان 

- مو مشكلة اجيب امي بالاجتماع 

- اذا هيج ماكو لعد اي مشكلة .. اممممم الاوراق كاملة ماعدكم اي نقص راح تستلم الكتب والزي المدرسي ببداية الدوام 

- تمام .. ياقوت انتظريني يم السيارة 

ياقوت : تمام 

طلعني علمود يبقى هو يتفق ويا المديرة عالقسط وهاي الاشياء اني ما جنت اعرف السبب فبدون اي جدال طلعت يم باب المدرسة انتظرو 

جنت افكر بالزي المدرسي وخايفة انو يمنعوني من العباية وگلت من يجي تميم اسألو وانتظرتو لحد ما اجى وصعدنا بالسيارة 

- هسا كملنا 

- اي كملنا محتاجة شي 

- شنو الزي الي جانت تحجي عنو 

- سألتها گالت زي عادي مال بنات محتشم بس يوزعوه هم علمود يكون مثل اللون كل الطالبات مو كل وحدة لون شكل 

- والعباية والخمار 

- سألتها گالت العباية والخمار تلبسيهن بالبيت ومن توصلين المدرسة تنزعيهن داخل المدرسة لان الي وياج بس بنات ماكو ولا رجال واحد وقبل ما تطلعين تردين تلبسيهن مرة ثانية 

- شنو هالدوخة هاي 

- كلها كم شهر تحمليهن شلون ما كان 

- وعلى فرض توسخ الزي او انشگ 

- الاحتياط يكون علينا بس لازم نشتري نفس اللون علمود ما يكون مختلف واذا اجيتي بلون مختلف ترجعين للبيت فورا 

- تمام 

- تجين وياي للجامعة 

- شيوديني للجامعة 

- عندي شغلة بالجامعة اكملها ونرجع سوا 

- سكتت بين الي مشهية اروح واشوفها وبين الي اشوفها عيب اروح وياه 

- من الاخر ترا متكاسل ابقى رايح راجع نكملها عالسريع ونرجع 

- تمام لعد 

رفع قوة التبريد وشغل اغنية بالمسجل وانطلق واني صرت استطلع المدينة كعادتي بالسيارة واسمع الاغنية الي هو مشغلها لحد ما قربنا عالجامعة 

اول ما وصلنا البوابة وشافوه تميم حتى ما طلبو هوايانا فورا دخلنا جان گراج الجامعة كلش جبير بس ما وگف بيه كمل طريقو 

وگفنا گدام عمارة جبيرة وقفلنا السيارة وكملنا طريقنا مشي وجان تميم ما يكمل دقيقة ساكت من گد ما يسلمون عليه الناس 

اني امشي وراه وعيوني مثل الرادار يمين ويسار اباوع للجامعة وكلش عاجبتني رغم بعد مابيها هواي ناس ويمكن عجبتني لان مابيها ازدحام 

تميم : شرايح تنتظريني بالكافيتيرية 

- ليش ما اجي وياك 

- اذا تجين وياي يكتلج الملل ابقي بالكافيتيرية جو بارد وهم اونس من الداخل 

- تمام 

بگلبي جنت اگول ارتاحيتي هسا من البداية ارفضي وانتهى الموضوع هسا شيبقيني بالكافيتيرية وحدي ياربي عديها على خير 

رحنا للكافيتيرية وفعلا جانت باردة وبيها طلاب وطالبات بس قليل كلش واخذني تميم لطاولة بطارف الكافيتيرية وبين ما گعدت اجو الطلاب يسلمون عليه 

واستغربت كلش من اجن الطالبات هم سلمن عليه جانن بنات ثنين بس الشي الحلو بيهن لبسهن محتشم صحيح مو لابسات خمار بس محتشمات 

من راحن سكت شوية تميم كأنو جان دا يفكر واندار وراه گال اگلج رقية وباوعت عليه وحدة من الطالبات گالت تفضل دكتور 

- مطولات هنا لو لا 

- فد شوية بين ما يجي ابو الخط 

- ما تبقن ويا ياقوت اول مرة تجي هنا وادري بيها خايفة وماگدر اخذها وياي داخل الكلية 

- اي اكيد دكتور اخذ راحتك واحنا نبقى وياها 

- مشكورة رحم الله والديج 

- ووالديك دكتور 

اجن گعدن وياي وراح تميم ماعرف شنو حجى ويا ابو الكافيتيرية وطلع ووجود البنات ريحني رغم غريبات بس احسن ما اكون وحدي 

رقية : اي يا حلوة شلونج 

- الحمدلله 

- شبيج متوترة ترا احنا بنات مثلج 

- لا مو متوترة 

اخلاص : عادي حبيبتي كلنا جنا مثلج اول ما اجينا هنا واذا انتي بعد شوية تروحين احنا بقينا من الصبح للظهر بحيث شوية ونبجي من الخوف 

رقية : لج وربي اني بجيت باول يوم من الخوف 

اخلاص : ههههههههه انتي من يومج ام دميعة 

رقية : المهم حبي شيقربلج دكتورنا المشهور 

ياقوت : باستغراب .. مشهور 

رقية : اقصد يعني الجامعة تقريبا كلها تعرفو لان دكتور وشيخ 

ياقوت : ما يقربلي شي اني امانة يمو 

اخلاص : امانة شنو قابل انتي فد غرض ويبقوج امانة يمو 

ياقوت : لا اني يتيمة وماعندي اقارب نهائيا وبابا عافني امانة يمو قبل لا يتوفى .. بقن ثنينهن ساكتات مايعرفن شنو يحجن 

رقية : انتي الي قبل سنة توفى ابوج مو 

ياقوت : باستغراب .. شعرفج 

اخلاص : سمعنا القصة لان انتشرت وتوقعنا مبالغين بالموضوع وفد فترة ويطلعلج اقارب وتروحيلهم 

ياقوت : لا ماعندي اقارب بابا وماما وحيدين لاهلهم وثنينهم تيتمو ببداية شبابهم وهسا اجى دوري 

رقية : زين ماعندج اخوان خوات 

ياقوت : جان عندي اخ واحد وتوفى بعد ماما بعشرة ايام وبعدهم بسنة توفى بابا 

صارن دموعهن ينزلن لان كلش تعاطفن وياي وبسبب فضولهن بقن يسألن هواي بس اني اخذت اسألتهن برحابة صدر وجنت اجاوب على كل الاسئلة 

اجى ابو الكافيتيرية نزللنا گلاصات عصير وجنت ادخل القصبة من تحت الخمار واشرب واحجي ويا البنات وجان عمرهن مقارب لعمري اكبر مني تقريبا بسنة لو سنتين 

رقية : ارفعي الخمار خلي نشوفج 

ياقوت : ماگدر 

اخلاص : اي اي امانة ماطول ماكو احد بالكافيتيرية 

ياقوت : تميم ما يقبل 

اخلاص : تعالي تعالي بمكاني 

ياقوت : ليش 

اخلاص : بس تعالي 

ياقوت : وهاي صرت بمكانج 

اخلاص : هسا محد يشوفج بس احنا وهالحايط لو مستحية من الحايط 

ياقوت : هههههههههه .. بخباثة .. خليها حسرة بگلبج 

رقية : ياااااااا شوف شلون لوتية قبل شوية جنتي خايفة من صدگ الخوف كلو من المسكين 

ياقوت : ههههههههه تمام لخاطركن بس .. ورفعت الخمار وقبل ما يطلع وجهي نزلتو 

رقية : هاي شنو ترا نريد نشوف وجهج مو حنچج 

ياقوت : لعد الحنج وين برجلي 

اخلاص : وربي راح ازعل عليج من صدك 

ياقوت : ههههههههه خلص هاي هي .. ورفعت الخمار لحد ما شافن وجهي زين ورجعت نزلتو 

اخلاص : خرب حظي 

رقية : صدگ من يگولون الحظ كلو للزرگ 

ياقوت : ما فهمت 

رقية : فوگ حظج فاهية هم الله يعينج على ما ابتلاج يخية 

تميم : منو ابتلى منو 

رقية : هلا دكتور الحمدلله ماكو بلاوي 

تميم : وين الخط مالكن 

رقية : ماعرف........ ذاك وصل ابو الخط 

تميم : محتاجات شي قبل ما اروح 

رقية : مشكور دكتور 

تميم : يلا في امان الله وشكرا لان بقيتو يم عصفورتنا 

رقية : العفو دكتور محظوظ الي يبقى يم هيج عصافير 

تميم : هههههههههه 

ياقوت : بسبب كلامهم احس وجهي صار مثل النار من الخجل 

اجى ابو الخط گال للبنات يلا نروح گالت رقية بس نحاسب ابو الكافيتيرية گاللها تميم توكلي بوية مو ناقصين مشاكل (يعني هو دفع الحساب) 

جانت تريد تناقشو گال دا اگولج توكلي لا تصير بيها عمام وخوال وابتسمت وتشكرتو هي واخلاص وراحن واني وياه رجعنا للسيارة 

تميم : ها خوما ضجتي 

- لا همزين موجودات البنات 

- ادري بيج ما جنتي تريدين تبقين وحدج بس داخل موجودين دكاترة وطلاب وعيونهم زايغة ولازم تبقين تنتظريني بالممر 

بس بالكافيتيرية تبقين بعيدة عنهم ولولا البنات جان وصيت ابو الكافيتيرية انو محد يتقربلج 

- عادي ما صار شي .. بس صدگ من وين يعرفن بقصتي البنات 

- شيعرفن بالضبط 

- انو بابا توفى قبل سنة واني بقيت يمكم 

- اني حجيت گدام الناس بعزا ابوج 

- ليش 

- لان بوقتها من اخذناج بالليل جنتي تبجين وتصرخين علمود نرجعج لابوج واكو بعض ناس من المنطقة شافوج من اخذناج 

واني علمود محد يحجي من يمو ويتهمنا او يتهمج حجيت گدامهم ان انتي بنت ابو باسم وبقيتي امانة يمنا وتعرفين الكلام ينتقل من شخص لشخص 

- هيج احسن 

- اي اكيد 

- والشيخ الي جان بابا يمو يعرف بهالشي 

- اي جان موجود من حجيت وانصدم من سمع 

- وابنو جان موجود 

- لا اجى هو ووياه زلم ثنين كبار اعتقد اخوانو 

- تمام 

مشى بالسيارة وصرنا نحجي بمواضيع مختلفة وقبل ما نوصل البيت نزل يم محل اخذ منو علاگة موطة ورجعنا للبيت 

من وصلنا نزلت واخذت العلاكة وياي وانطيتها لياسمين علمود تحطها بالمجمدة قبل ما تموع وصعدت علمود ابدل ملابسي 

من بدلت ونزلت جان موعد الغدا وحطولنا الغدا وتغدينا وساعدت البنات بالمواعين وجنت مقررة اتابع التلفزيون الضهر وانام العصر لان اكره نومة الضهر 

تميم : اية تحظري انتي وياقوت العصر نروح نشتريلكن ملابس للمدرسة 

اية : بفرح .. صدگ والله 

تميم : إن شاء الله 

ياقوت : بس مانعرف لون الصدرية الي راح استلمها 

تميم : ناخذلج احتياجاتج ونعوف بس الصدرية تلبسين اي وحدة من اية اول يوم وبعدين ناخذلج صدرية مثل الي تستلميها 

ياقوت : ليش ما نأجلها مرة وحدة لبعد ما استلم الصدرية 

تميم : شنو رايج اية 

اية : لعد نأجلها احسن ليش كل شوية رايح وراجع للسوگ هم نتأكد شنو نحتاج منا لوقتها 

تميم : يمة انتي وياسمين هم الي تحتاج شي اخذها ويانا 

الحجية : اني مو محتاجة شي وعود من احتاج تاخذني وحدي او اروح ويا زيد 

زيد : شنو اشتغل عند ابوج اني 

الحجية : لا تشتغل عندي اني 

زيد : اي عبالي اشتغل عند ابوج 

الحجية : لعد وين خويك (زياد) 

زيد : راح للسوگ مرة ابوي محتاجة غراض 

تميم : ترا هاي مرت ابوك مو ذيج 

زيد : وشنو ذيج صاحبة ابوي غير هم مرتو 

اية : هههههههههههه والله صحيح حجي زيد 

تميم : العتب على الي يحجي وياكم 

اية : صدگ ياسمين وين الموطة 

ياسمين : بالمجمدة 

زيد : لك هلا والله روحي روحي اية جيبيها وجيبيلي حصة زياد ما بيناتنا موطة 

تميم : خابرو واذا وافق اخذها 

زيد : تمام .. خابر على زياد مرتين وما جاوب 

تميم : لعد تحلم تاخذها 

زيد : شبيك شگد نحس هي موطة 

تميم : ابد 

ياقوت : جابت الموطة اية ووزعت النا وشالت حصة زياد وبين ما اكلناها اجى اتصال لتميم 

تميم : الو 

-- شيخ تميم اخوك تعارك بالسوك 

تميم : وين بالسوك 

-- (العنوان) 

تميم : ثواني واكون يمكم 

زيد : شكو 

تميم : اخذ السويج .. زياد متعارك الحگني بسرعة 

ياقوت : گامو ركض وراحو واحنا جنا خايفين على زياد لان وحدو ونخاف ان ينجمعون عليه اكثر من واحد قبل ما يوصلون 

شكرا لزيارتكم عالم روايات سكيرهوم