رواية بنت الكهوجي الفصل الخامس والثلاثون بقلم احمد
تميم : اخذ السويج .. زياد متعارك الحگني بسرعة
ياقوت : گامو ركض وراحو واحنا جنا خايفين على زياد لان وحدو ونخاف ان ينجمعون عليه اكثر من واحد قبل ما يوصلون اخوانو
بقينا نتتظر الى ان اتصل علينا زيد گال زياد مابيه شي واخذوه الشرطة هو والولد الي متعاركين وياه للمركز وتميم دا يحجي ويا اهلهم علمود يحلوها
من گال هيج تطمنا على زياد وبعد ما سكرت الحجية من زيد گالت ياسمين عمة زيد گالو متعاركين وياه لو متعارك وياه
اية : متعاركين وياه
ياسمين : يعني اكثر من واحد
- اي بس لحظة خاف زيد يجذب علمود ما يخوفنا
الحجية : خليني ارجع اخابرو اتطمن
اية : تمام
زيد : هلا يمة
- كم واحد متعاركين ويا زياد
- ثنين
- متأكد مابيه شي اخوك
- اي والله اصلا جاعص الولد فد جعصة من هاي التمام
اية : اروح فدوة لاخوي البطل
زيد : تربيتي هههههههههههه
الحجية : ايمتى ترجعون
زيد : دا يحجون اهل الولد ويا تميم وابوي وجدي ما نطول إن شاء الله
الحجية : تمام واذا صار شي وياكم انطينا خبر
زيد : تم
ياقوت : سكرت منو وجنا كلش فرحانين ومفتخرين بنفس الوقت ان زياد وحدو وهم ثنينهم وماگدرو يسوون شي وتقريبا ساعة ورجعو تميم وزيد
الحجية : ها يمة وين اخوكم
زيد : هسا يلحگنا راح يطمن امي
- الله يطمن بالكم
- واياج
- شنو الي صاير
- هسا يجي يحجيلج لان ما فهمنا السالفة بالضبط
زياد : السلام عليكم
الكل : عليكم السلام ورحمه الله
الحجية : ها يمة خوما ضربوك
زياد : افه عليج حجية زياد على سن ورمح ينضرب .. وصار ينفخ بجسمو
- تعال تعال احجيلنا شصار بدون فيكات
زياد : گعد .. جنت دا امشي بالسوگ واقرا الطلبات بالتيلفون وطخيت كتف واحد بيهم بدون ما انتبهلو وكملت طريقي طبيعي
قبل ما ابتعد اندار هو وگال شبيك اثول ما تشوف گدامك ورجعتلو گلتلو عليمن تحجي جاوب الثاني گال عليك هو اكو جحش غيرك هنا
حطيت التيلفون بجيبي وخبزتهم خبز واجو اهل المحلات صارو بيناتنا وقبل ما يجون تميم وزيد وصلو الشرطة واخذونا للمركز
حققو ويانا وحجيتلهم الي صار واجو اهل الولد تنازلو عن القضية وگال خلاف شباب ما تستاهل سجن وخلافات بينا احنا واهلو
- وشلون قبلو يتنازلون
تميم : حجيت ويا اهلهم وبعض اصحاب المحلات شايفين الي صار وحجولهم ان ولدهم تحارشو بزياد ومن عرفو تفهمو الموقف
زيد : مشكور زياد عالمشكلة
تميم : شجاي تمضرط
- بعدك صغير على هاي السوالف
- احد فاهم هالمطي شيحجي
- لا تتعب نفسك محد يعرف بس اني ولو ادري هيج جان رحت تعاركت وياه
- يا تحجي بوضوح يا تسد حلگك
- هههههههههه خلي الفضول يكتلكم
اية : هاك زياد حصتك (الموطة)
زياد : اي والله عاشت ايدج
ياقوت : بقى زيد متمدد عالقنفة ويباوع للسگف وماعرف صدگ اكو شي ببالو لو مجرد يتحارش بتميم وزياد علمود يشوف ردة فعلهم
على نص التعليلة غفى وهو بمكانو وراحت اية جابتلو غطى وسحبت الشماغ الي على راسو وباوعلها ورجع كمل نومتو
مر الوقت بين سالفة وضحكة الى ان صارت الساعة 5 العصر يلا گعد زيد وجانو تميم وزياد طالعين واني گاعدة بالصالة باوعلي زيد ورفع حاجبو وضحك
ياقوت : صح النوم
زيد : صح بدنج .. شگد الساعة
- الساعة 5 العصر
- راح اگلج شغلة بس بيناتنا
- احجي
اية : نزلت من فوگ .. تعالي شوفي الصدريات بسرعة
ياقوت : هسا اجي
اية : يلا اشرب ماي وارجع
ياقوت : يلا احجي بسرعة
زيد : خلص خليها لغير مرة
اية : يلا ولج گومي
ياقوت : اشرلي بعيونو وحسيتو ما يريد يحجي وعفتو وصعدت فوگ ويا اية وبقى الموضوع ببالي اختاريت اي صدرية ونزلت
جان دا يصلي العصر واجن الحجية وياسمين من غرفهن وعفتو ورحت للمطبخ ويا ياسمين وگلت بعدين من تصير فرصة اخليه يحجيلي
مر الوقت الى صلينا العشاء واجن ام حازم وبناتها وكلش فرحنا بجيتهم بس لاحظنا ان كلهن وضعهن مو طبيعي والبنات ما اجن يمنا بالمطبخ
وما اقصد هنا انهن ضايجات مننا بس يبقن صافنات ومبين عليهن مشغول بالهن او خايفات من فد شي وما نعرف شنو هو
من كمل الجاي اخذناه اني واية وياسمين ورحنا عالصالة وقدمتلهن اية الجاي وحجيت الحجية ويا ام حازم
الحجية : ام حازم خير إن شاء الله شو وضعكم اليوم مو طبيعي
- والله ماعرف شگولج يا خية
- احجي ام حازم احجي بلكي نگدر نساعدكم
- للاسف هالمرة ما تگدرون تساعدونا
- احجي وإن شاء الله كلشي ينحل
- عم البنات اجى من ايران
- اي وشنو المشكلة
- يريد ياخذ اديان لابنو قبل ما يرجع لايران ومن رفضنا صارو يهددون ان ياخذوها غصب عننا وعلى شوية جانو راح يتعاركون ويا حازم
اني اعرف حازم مستعد يموت ولا يخليهم ياخذوها بس بنفس الوقت هو هالواحد وهم اكثر منو وما اريدهم يأذوه ولا اريدهم ياخذون اديان
وتالي ابنهم نهى عليها وحازم متخبل بسببهم ولولا سمعنا بمشكلة ابنكم وحبينا نتطمن عليكم جان ما اجينا اليوم
- شنو هو الموضوع بكيفو البنية ما تريدو على اي اساس يجبرها شنو هالعقلية
- والله يا خية قافل لو اخذها لو محد ياخذها
- لا تشيلين هم خية من يجي ابني تميم احجي وياه وإن شاء الله يگدر يساعدكم
- لا خية ما نريدو يتورط وياهم ذول يحبون المشاكل هم وابوهم
- ماكو كل مشاكل إن شاء الله.. تعالي يمة اديان يمي
اديان .. راحت گعدت يمها
- سحبتها لحضنها .. تطمني بنيتي إن شاء الله منا لباجر تسمعين الخبر الي يسر گلبج وخاطرج
ياقوت : اديان صارن عيونها يدمعن وحضنت الحجية وانفجرت بالبجي وامها واختها صارن يبجن من خوفهن عليها
اني عرفت ان تميم إن شاء الله گدها فجنت شبه مطمنة وما جنت اعرف ان الشغلة معقدة لهاي الدرجة لان مشكلتهم ويا عمامهم مو غربة
وتعرفون انتو بين العشاير ما يصير واحد يتدخل بعشيرة ويفرض رايو على احد بيهم مهما كانت مكانتو ومهما كان مهم الهم
لازم دائما العشيرة تنحل مشاكلهم بينهم فقط المهم بقن يمنا لل 11 وام حازم خابرت على حازم علمود ياخذهن وجان رايح للمستشفى لان صاحبو مسوي حادث
الحجية گالتلها خلي يبقى يم صاحبو وتميم يوصلكم ووافقت وسكرت من حازم واتصلت الحجية على تميم وگالتلو
ورا 10 دقايق اجى زيد من خارج الصالة گال يمة اذا جاهزين الجماعة السيارة بالحوش گالتلو اي يمة جاهزين وودعناهن وراحن
بعد ما راحن بكم دقيقة اجى تميم واستغربت الحجية گاللها زيد اخذهن گالت تعال اگعد اريد احجي وياك گاللها احجي
الحجية : حجتلو الموضوع كامل
تميم : حجالي حازم قبل ما يروح لصاحبو بس اجاه اتصال قبل ما يكمل وما فهمت الموضوع منو
- المهم شنو رايك
- والله يا يمة ماعرف كل الي اگدر اسويه ان احجي وياهم على امل انهم يستوعبون الموضوع ويتراجعون عن قرارهم بس ليش البنت رافضة
- ماعرف بس خلال حجي ام حازم گالت يحبون المشاكل والضاهر البنت خايفة لا يضربوها من تكون يمهم
- الله كريم يمة خلي افرها بعقلي واشوف بلكي اگدر اساعدهم
- الله يرضى عليك ويوفقك
- واياج
ياقوت : بقو يحجون تميم وامو واني رحت للغرفة اخذتلي دوش وبعدها نمت ومر يومين بدون اي احداث تذكر واجى موعد الدوام
قبلها بيوم بالليل جهزت نفسي ومن گعدتني اية گمت صليت الفجر وبدلت ملابسي ولبست العباية ونزلت تحت جانت ياسمين مجهزة الريوگ
گعدنا تريگنا ويا تميم ومن خلصنا توجهنا لدوامنا بس لان اول يوم ولان راح ابقى وحدي جنت كلش متوترة والي موترني اكثر ان لازم انزع الخمار والعباية
من وصلنا المدرسة جانن البنات دا يتجمعن بالحوش طلع ورقة تميم كتب عليها رقمو وانطانياها گال اذا صار وياج شي خلي اي وحدة من المدرسات تخابرني
اخذت الورقة منو ونزلت بين البنات وما جنت اعرف كلشي فبقيت وحدي واگفة الى ان اجت المديرة والساعة 8:01 سكرو باب المدرسة
ولان اول يوم سوو اصطفاف وصارت تحجي المديرة عن القوانين كالعادة وگالت اليوم ماراح يكون اكو دراسة او قوانين بس من باجر الي ما تلتزم بالقانون تشوفلها غير مدرسة
بعدها دخلنا للصفوف واني صرت بالرحلة الثالثة بالوسط وبلشن يجن علينا المدرسات علمود يتعرفن علينا ونتعرف عليهن
البنات اكثرهن جانن يعرفن المدرسات بس الي مثلي جايات نقل ما يعرفنهن فجانن بحجة يتعرفن علينا يگضن وقت
من صرت بالصف رفعت الخمار اني والبنات الي لابسات خمار وصرنا نتعرف عالمدرسات وبداية الدرس الثالث بلشو يوزعون الكتب والزي المدرسي
ونظامهم جان كلش حلو اجت يمنا المديرة وبايدها سجل الشعبة وتصيح 5 اسماء يروحن يستلمن ومن يجن يروحن 5 غيرهن
واني لان بحرف الياء صرت اخر اسم رحت استلمت الكتب ووياهن زي مدرسي وجنطة ورجعت للصف وبقينا نضيع وقت لل12 لحد ما اجو تميم واية
اجت اية گالتلي انهم اجو واخذت الكتب والزي ورحت للسيارة وجان كاتلني الحر ووجهي صاير احمر من گد ما احتريت
تميم : الله بالخير
ياقوت : هلا بيك
- ها شو الخمار ماخذ اجازة اليوم
- يااااااااا وربي نسيتو
اية : عفية عليج باجر تنسين العباية
ياقوت : لا والله اخذني الواهس ونسيتو لان كل تفكيري عند الحر
تميم : شلون المدرسة والبنات الي وياج
ياقوت : بعدنا ما اخذنا كلشي اليوم بس استلمنا كتب وزي وجنطة والبنات ماعرف عنهن شي
- حاولي تتعرفين عليهن علمود تتونسين وياهن
- إن شاء الله بالايام الجاية
- اليوم عود نروح نشتري ملابس
- تمام
- صدگ شوفن شنو تحتاجن قرطاسية علمود ناخذهن من السوك ماطول احنا رايحين
- هم كم دفتر وشوية لوازم
- اعرف بوية بس اقصد ان تكونن جاهزات للدوام من باجر
ياقوت : رجعنا للبيت وتغدينا ونمنا شوية والعصر رحنا للسوگ والحجية وياسمين ما جان ناقصهن شي فما اجن ويانا
بدينا نشتري اني واية سوا الي يعجب وحدة بينا تاخذو فاخذنا اول شي الملابس اني اخذت صدريتين مثل الي استلمتها واية اخذت تنورات وقمصان وسترات وجبب
بعدها اخذنا الاحذية والجنط واخذتلي جنطة احتياط ولان ممنوع المكياج فما وعندنا كلشي نحتاجو فما اخذنا مكياج
بعدها رحنا للقرطاسية اخذت 4 دفاتر وجنت لاول مرة استخدم السجل لان قبل مگضيتها على الدفتر ابو المية ومن ينترس ابلش بواحد جديد
واخذت اقلام رصاص وقلم جاف ومساحات وقطاطات (مقطاطات + شنو تسموها انتو) واخذلي تميم ورق ملاحظات
ومن رفضت گال هاي تسجلين بيهن ملاحظات تفيدج وتلزگيهن عالدفتر او الكتاب واقتنعت بكلامو واخذتهن
وبين ما كملنا مسواگنا قرب الوقت عالمغرب واتصل تميم على ايناس علمود يسألها اذا يجيب اكل وياه لو لا گالتلو بكيفك گال لعد لا تسوين شي
وطلعنا للمطعم اخذ تميم سفري كباب وتكة ودولمة وبرياني واول ما صعدنا بالسيارة اتصل على زيد تيلفونو مشغول واتصل على زياد
زياد : هلا تميم
تميم : وين انت
- بالمضيف
- وين زيد
- ماعرف ليش
- جيبو وياك وتعالو لبيتي تعشو وياي
- شنو المناسبة
- ماكو مناسبة بس جبت عشى واشتهيتلكمياه
- تمام هسا اشوف وين زيد ونجيك
- تمام
ياقوت : من رجعنا للبيت اني نزلت غراضي واية نزلت غراضها وتميم نزل الاكل ودخلنا كلنا ويا بعض للبيت وبعدها بشوية اجى زياد
تميم : وين زيد
- ما يجي يگول ما يشتهي
- عوف الشقى وينو
- والله ما يريد
- مو من عوايدو حتى لو ما يريد ياكل يجي يتونس
- ماعرف عنو اني هم ما لحيت عليه
- هسا اخلص صلاة مغرب واتصل عليه
- تمام
- بعد الصلاة اتصل على زيد
زيد : هلا تميم
- ها وين انت زيد
- بالسوگ
- ليش ما اجيت للعشى
- ما مشتهي غير مرة إن شاء الله
- صوتك مو عاجبني احجيلي صاير وياك شي احد مضوجك
- لا يخوي بس گعدت العصر كاتلني الحر ومزاجي متخربط
- تمام عود من ترجع تعال نتعلل
- إن شاء الله
- يلا حطو العشى ماراح يجي زيد
الحجية : شبيه
- مابيه شي يگول گعد العصر محتر ومتغير مزاجو من الحر
زياد : بس هو ما نام الضهر اساسا
- متأكد
- اي والله اني وياه بقينا بالمضيف للعصر
- اخابرو مرة ثانية
الحجية : لا عوفو يجوز اكو شي مضوجو وما يريد يحجي بيه هسا اكيد من يحتاجك راح يحجيلك
- تمام
ياقوت : تذكرت كلامو من گال اريد احجيلج شي واجت اية حسيت هذا الموضوع الو علاقة بكلامو بس ماگدر احجيلهم خاف يزعل مني
لان اكيد راح يلحون عليه لحد ما ينجبر يحجيلهم الموضوع كلو فبقيت ساكتة وتعشينا وبقينا نحجي لبعد صلاة العشاء واجى حازم
جان جاي علمود يكمل لتميم موضوع عمو وجاي بدون اهلو فراحو زياد وتميم للمضيف وبقينا احنا نحجي بمواضيع مختلفة
تميم : رغم اريد اساعد حازم بكلشي اگدر بيه بس الموضوع هالمرة صعب لان صعبة اروح اگول لواحد لا تتزوج بنت عمك
وابسط شي اذا يگول انت شدخلك بيناتنا ماگدر اجاوبو المهم رحت للمضيف لگيت زيد گاعد ويا حازم ودا يسولفون عليهم عليهم وگعدت وياهم
صار يحجيلي حازم الموضوع بتفاصيلو والولد مو طالب فزعتي مثل ما نگول بس دا يستشيرني شنو ممكن يسوي علمود يخلص منهم
تميم : حازم قبل كلشي ليش مو موافقين انتو
حازم : تخيلو امهم يتجاوزون عليها ويضربوها لعد اختي شيسوون بيها
- تريد نروحلهم اني وياك نحجي وياهم بلكي يقتنعون
- خاف اجيبلك وجع راس انت بغنى عنو
- افه عليك اذا ما اوگفلك لعد منو اوگف
- الله يحفظك والله افضالك كثرت كلش علي
- لا هيج راح ازعل منك يلا خلي نروح
زيد : اجي وياكم
- لا خليك هنا بين ما نرجع
- اقنع نفسك ما تروح وحدك لو تخرب الدنيا ما نريد يصير مثل ذيج المرة
- تمام تعال بس ممنوع تدخل بالموضوع
- تمام
تميم : رحنا ثلاثتنا واعرف زيد خايف علي فما گدرت امنعو وجان حازم يدلينا الى ان صرنا مقابل البيت ونزلنا دگينا الباب
فتحلنا واحد من الولد گالو حازم اخذ طريق للشيخ تميم ومن سمع بكلمة شيخ تغيرت ملامحو واخذلنا طريق ودخلنا للاستقبال
رحب بينا ترحيب عادي وراح ينطي خبر لابوه وبعدها بشوية اجو الولد وابوهم گعدو ويانا وترحيب الاب جان شوية احسن من ولدو
الاب : مساكم الله بالخير
تميم : مساك الله بالنور
- تشرفنا بزيارتكم
- النا الشرف بصراحة اجينا بطلب وإن شاء الله ما تردونا
- احجي شيخ تميم وإن شاء الله ما نردك
- سمعت انكم خاطبين اخت حازم الي هي مثل اختي واعرف مو من حقي اتدخل بس حازم الو معزة خاصة يمي وماگدر ابقى ساكت
فاليوم اجيت اشوف اذا اكو فد طريقة او حل يخليكم تفكون النهوة عن البنت
- والله يا شيخ هذا الولد (ابنو) گدامك حجيت وياه وگلتلو نخطبلك غيرها بس هو قافل لو هي لو ما يريد اي بنت نهائيا
- اي ابو الشباب ما بيها مجال نهائيا
الولد : لا بنت عمي اني احق بيها من الغريب
- اخوي الموضوع ترا مو موضوع احق ومو احق الزواج قسمة ونصيب والبنت رافضتك
- اذا قسمتها مو وياي فما الها قسمة ويا غيري
- ترا زحمة تفرض نفسك على بنت ما تريدك حتى لو جانت بنت عمك
- الموضوع يخصني اني ومستحيل تقنعوني اعوفها
حازم : عمي انت تعرف اني واهلي كلنا رافضين هالزواج وتعرف راح تصير مشكلة بسببو
الاب : شنو يعني تريدني اكتل ابني مثلا علمود اختك
حازم : مدا اگلك اكتلو احجي وياه وخلي يحط عقلو براسو لان نهاية الموضوع ماراح تعجبكم
الاب : شنو يعني تهددنا يا حازم
حازم : لا عمي ما اهددكم بس مو حازم الي يشوف اختو تنجبر ويبقى ساكت
الولد : گلتها وارجع اعيدها اختك الي لو اعرف اكتلها بايدي وما اعوفها تروح لغيري
حازم : تخسى تلمس شعرة منها الا ادفنك تحت سابع ارض
الاب : حازم اوزن كلامك
حازم : وزنت كلامي هواي واحترمت وتحملت هواي بس انتو ما يفيد وياكم الاحترام
الاب : احترم يا ولددددد
حازم : شيخ تميم اشهد على كلامي والي اخذ ابوي وحرمني منو ان حاول ابن رجال يجبر اختي لخليه يلحگ ابوي
واصلا اني غلطان سويت الكم قدر وجبتلكم الشيخ تميم يحجي وياكم
الولد : اكل نعال لا تخليني ابتلي بيك هنا
تميم : باوعت للاب .. اذا واحد من ولدك تقرب من حازم راح نتخارب
الاب : عوفو ابن عمكم
الولد : اريد اشوف شتسوي
مد ايدو يريد يضرب حازم ومسك ايدو زيد وبالايد الثاني خنگو من رگبتو لحد ما دمعن عيونو يلا عافو والاب يعرف ما يگدر يتورط ويانا فوگف بوجه ابنائو
اني خليت زيد يعوفو وسحبنا نفسنا وطلعنا من البيت بس همزين زيد مسكو مو حازم لان بذيج اللحظة لو ماسكو حازم الا يقضي عليه
تميم : من ركبنا بالسيارة باوعت لحازم .. لا تشيل هم ماراح يگدرون يسوون شي
- إن شاء الله يحاولون علمود اهجم بيتهم فوگ راسهم
- اكيد ابوه راح يحجي وياه ويقنعو
- ترا ابوه انذل منو بس دا يمثل گدامك اگص ايدي اذا مو هو گايلو يحجي هيج اصلا هو اول واحد حجى بالنهوة وحطها براس ابنو
- انت عوف الموضوع هالكم يوم لحد ما نشوف شيصير وياهم
- تمام
- راح يبقون هنا
- لا بس ماعرف ايمتى يروحون اعتقد يتأخرون
- لعد الموضوع راح يتأخر فحاول تشيلو من تفكيرك بالوقت الحالي
- والله ماگدر يا تميم تخيل اسمع او اشوف اختي تبجي بسببهم وماگدر اسوي شي لان عمامي
- توكل بالله كلها كم يوم ويغيرون رايهم اني متأكد من الموضوع
حجينا وياه اني وزيد علمود شوية يهدئ ومن وصلنا للمضيف ترخص واخذ سيارتو وراح واني وزيد رجعنا للبيت لان عندنا دوام من الصبح
ياقوت : ثاني يوم رحت للمدرسة وباول درس انطونا الجدول الاسبوعي وبلشنا ندرس بس للامانة جان تدريسهم كلمة ممتاز قليلة بحقو
شرحهم يخبل والمدرسات اطباعهن تخبل مو من الي يبقن يتعنفصن ويصرخن على الطالبات وابد ما يضوجن من الاعادة للبنات
وهالشي يخلي البنات يحبنهن ودائما الطالب من يحب المدرس يفهم عليه بكل سهولة وهن استغلن هالنقطة لصالحهن وخلن البنات يحبنهن
اني تعرفت على كم وحدة من البنات بس مثل ما نگول معرفة سطحية لان جديدة بينهن اني بس مبين عليهن حبابات وخوش بنات
گضيت باقي اليوم بشكل روتيني ماكو احداث تذكر الى صارت الدنيا ليل جنا گاعدين بالبيت وصاح زيد من خارج گال يمة اجوكم ضيوف
تميم وزياد طلعو عالسريع ودخلن نسوان ثلاثة غريبات اول مرة نشوفهن استقبلناهن وگعدن ويا الحجية واني وياسمين واية رحنا للمطبخ
اية وياسمين هم ما يعرفنهن شوية واجت الحجية گالت عود جيبي الجاية وتعالي اگعدي يمي گلتلها تمام واني مستغربة من كلامها
ومستغربة انها اجت للمطبخ علمود توصيني باوعت لياسمين ملتهية بالجاي واية مثلي مو فاهمة شي ومن كملت ياسمين الجاي اخذتو الهن
وزعتلهن ومن انطيت الحجية جايها گالت اگعدي يمي بنيتي وگعدت يمها وباوعت علي وحدة من النسوان وگالت بسم الله مشاء الله تخبل
وصارن يحجن بينهن بس من الخجل ما جنت مركزة وياهن وصحيح متعودة عالمديح بس يبقى طبع الخجل مستحيل اسيطر عليه
من خلصن جاي اخذت الستكانات ورجعت عالمطبخ وانطيتهن لاية وگعدت گدام ياسمين
ياسمين : ها شلونهن
ياقوت : منو
- ماتعرفين ليش جايات مو
- لا والله
- تبقين فاهية
- ههههههههه ليش
- جايات يخطبنج يالفاهية
- جنت اضحك ومن سمعت يخطبنج اختفت الضحكة من وجهي .. مو وقت شقاج
- يا شقى هذا يولي لعد ليش عمتي طلبت منج انتي تقدمين الجاي الهن وليش بقيتي گاعدة يمهن
- واني شعرفني
- ولج علمود يشوفنج اذا حلوة ولا لا
- دكافي كافي
- هههههههه ولج شبيج يالخبلة قابل مسوين جريمة الناس ترا مصيرج تتزوجين قابل تبقين عانس طول عمرج
- فدوة سكري عالموضوع
- تمام
ياقوت : سكتنا ثنينا وما احجيلكم عن التوتر والخوف الي جنت عايشة بيه والتفكير الي جان كاتلني كتل حتى راسي صار يوجعني
جان كل تفكيري انو شنو اسوي لا اگدر اوافق ولا اگدر ارفض وابقى طول عمري حمل على تميم واهلو وشلون اتزوج واني دا ادرس
زين معقولة يرفضون تميم وامو بس اذا يريدون يرفضون ليش الحجية خلتهن يشوفني اووووف ياربي والله ماعرف شسوي
بقى هالتفكير براسي الى ان راحن النسوان وجنت مترددة اروح للحجية خايفة تگولي راح نوافق بس مجبورة اروح واعرف شنو حيصير
گعدنا ويا الحجية بالصالو بس الغريب ان الحجية بقت ساكتة ما حجت كلشي الى ان اجى تميم سلم وگعد ويانا وباوع علي
تميم : ياقوت ابقي اريد احجي وياج وانتي اية روحي للغرفة وانتي هم ياسمين
اية وياسمين : تمام
ياقوت : احجي
- اعتقد تعرفين ليش اجونا الناس اليوم
- اي حجتلي ياسمين
- باوعي اقسم بالله بقائج يمنا احلى من العسل على گلبي بس واجبي اخذ رايج بموضوع الزواج
- اني ماعرف كلشي القرار الكم بس اني دا ادرس
- اني حجيت ويا الولد بهالموضوع گال دراستها اني بنفسي اوديها وارجعها واي شي تحتاجو بدراستها من خصوصي او ملازم او اي شي اني جاهز
والجامعة تكملها لحد ما تتخرج وبعد ما تتخرج هي حرة تريد تتوظف او تريد تبقى بالبيت بس اذا تتوظف لازم ما تقصر بواجباتها المنزلية
واحنا قبل كلشي راح نسأل عن الولد ونشوف شيگولون الناس عنو وعن اهلو فانتي خلال هالفترة شاوري نفسج وشوفي القرار الي يناسبج وانطيني خبر
وبالمناسبة اذا صارت قسمة انتي تحددين موعد العرس بالتاريخ الي يعجبج
- تمام
- يلا تصبحون على خير
- وانت بالف خير .. شنو رايج انتي
الحجية : حاليا لا تنطين قرار ولا تهتمين للموضوع نهائيا خلي تميم يسأل عن الولد بالبداية ونعرف شنو من شي بعدها نتشاور بالموضوع
- تمام
- يلا بنيتي روحي نامي وراج دوام ولا تبقين تفكرين بالموضوع علمود تنتبهين لدراستج
- تمام .. تصبحين على خير
- وانتي بالف خير
ياقوت : رحت للغرفة لگيت اية نايمة وحطيت راسي عالمخدة وبديت افكر هواي افكار بالموضوع اخير شي تجاهلت التفكير ونمت
مرن 4 ايام جان الوضع طبيعي كلش يوم الجمعة بعد الغدا جنت دا اساعد البنات بغسل المواعين وتنظيف المطبخ وصاحتني الحجية
رحت يمها جانت وحدها وتميم صاعد ينام گالتلي تعالي اريد احجي وياج بموضوع الولد الي خطبج گلتلها احجي
الحجية : اليوم سألت تميم عنو گال سألنا عنو وعن اهلو بالمنطقة والناس كلها تمدح بيهم وباخلاقهم والولد كلش مدحو بيه
شكرا لزيارتكم عالم روايات سكيرهوم
