رواية عشك أل فراس الفصل الرابع والثلاثون بقلم زينب نور
علي:رميت لكن انسحب السلاح من ايدي مباشرةً الطلقة لاحتني لكن شخط
ضربني راشدي وسحبني لـ حضنة
الشيخ:تخبلت شبيككك تنتحر علمود مراة هذا انتَ الجبير والعاقل چا شخليت للزعاطيط
اكتفيت بالسكوت الدم وكع على خدي مسحة بـ الشماغ مالتهة كعدت حيلي مهدود
الشيخ:شجاك فهمني شجاك مو هيج تنحل الامور مو هيج هذا مو حل
علي:وشنو الحل تعبت وأنا اكلكم انطوني فرصة وحدها افهمكم اللي صار حتى سَحر واختها البرابيك اختفوا من الوجود انطوني فرصة خل اشرحلكم ماكو فايدة وجدي وابوي واكفين وياها شدكول هيَّ خلص المهم ترتاح وأنا ضاربيني بالعرض الحايط شهرين صارلي احجي محد سمعني وبالاخير الوالد العزيز يكول مدري شوكت يصير زلمة
الشيخ:الحل صار بيدي أنا ما تارككك كل هاي الايام احنه وياك بس ردنا دليل وجبناهم أنا جاي حتى اكلك تعال انزل واسمع انتَ هم الكاك مخلي المسدس براسك وعاين دمك تريد ادمر نفسك ودمرنا وياك
علي:دليل شنو؟
الشيخ: يثبت كُلشي كوم وياي امسح راسك من الدم واضمده الك وانوب انزل
بدون ما احجي شيء كمت غسلت وبس مسحت الدم انقطع ونزلنا الكُل كان موجود
الشيخ:استريحوا ليش واكفين
ابو فؤاد:شعندك شيخ
الشيخ:بناتك وين
ابو فؤاد:صيحي بناتج
راحت ام فؤاد تصيحهم ضليت واكف بـ مكاني اجت سَحر وراها زينة
ام فؤاد:ذني البنات
الشيخ : تحبون نحجي على مسمع الكل لو يكون هذا الشيء سري من باب الستر
الجد:لا بوية خلي الكل يسمع حتى مايضل واحد شايل ذنب الثاني
الشيخ:اي زينه اكعدي وسولفينا عن تخطيطج انتِ واختج
زينة :أني معليه بشيء
الشيخ:احجيييي
صاح بيها صوت خلسها
زينة :من يوم خطوبة علي وقمر وسَحر كانت ادكولي ما اخليهم يرتاحون علي أني احبه قبلها شلون تجي وتاخذة ضلينا ايام نفكر شنسوي حتى سحر ردنا نسوي لكن من عزمنا جدو استغلينا الفرصة من عرفنا قمر راح تجي
سَحر:اجت الفرصة
زينة :شلون
سَحر:ملابس نوم موجودة عندي ناخذهم ويانة وأني اصعد للغرفة واكملها انتِ عليج بس من اصعد وادخل الغرفة تصيحين قمر
زينة :ماجنه نعرف انُ علي كان بالدوام من عرفنا وعرفنا انُ جاي ونايم كملت ويانة حيل لبست سَحر الملابس ودخلت للغرفة وأني نزلت صحت قمر وبعدهي رحت لغرفة البنات
الشيخ :وانتِ
سَحر:من حبي اله هيج سويت اخوكم بعمرة ماقدر حبي اله ومن سمعت يحب قمر ماضل عقل براسي لبست الملابس ودخلت وصرت يمه هوَّ كان نايم حتى ما حس عليه وابين تعبان لكن من دخلت قمر فز وانصدم بيه وحتى ضربني
امير:بنات الملاهي اشرف منجن على الاقل نعرفهم برابيك
سَحر:اللي يحب كُلشي يسوي
ياسر:باع الصلافة
ايمن:لو منج اطم روحي أنا ولد واستحيت
الشيخ:اذا ابوج عندة غيرة هوَّ يربيجن من جديد وهسة بيتي يتعذركم انتم من عدكم واحنه من عدنا لا توصلنا ولا تشوفونا وجهكم كلشي بينا وبينكم انتهى الله وياكم
اخذ بناتة ومرتة وطلع باوعت على الموجودين
الجد:علي
بدون ما احجي باوعت عليَّ وطلعت من البيت صعدت السيارة ورحت للبيت الثاني راهب ونمر موجودين
نمر:يابه هلا وكل الهلا
علي:هلا بيك
راهب: شبي راسك
خليت ايدي على مكان الشخط دم
علي:محاولة انتحار فاشلة
نمر :شنو
راهب:شتحجي انتَ انتحار شنو تريد تموتنا
علي:فشلت شبيكم
نمر:وفرحان يمصخم تخبلت انتَ مراة هيج تسوي بيك
علي:طركاعة مو مراة
راهب:شصار على السالفة
حجيتلهم اللي صار
راهب:مع احترامي الك لان كرايبك بس ذني برابيك من العيار الثكيل
نمر:صوج ابوهم ولو هوَّ هم بربوك وهسة شراح تسوي
علي:مادري
راهب:عندك بس باجر وراها عدنا دورة ست اشهر
علي:حتى نسيتها
نمر:ترجعها
علي:كرامتي ما تسمحلي
راهب:ااخخ بالكرامة
علي: هانوني هواي مسحوا بيه الكاع ذهابًا وايابًا
نمر:هو حقك بس انتَ تحبها يعني تتركها تروح لـ غيرك مثلًا
علي:لا طبعًا الي مو لـ غيري هيَّ بس اريدها هيَّ تعرف وحدها وتندم
راهب:رد الصاع صاعين يخوي بس باجر كمل امورك وخل نولي
علي:هو احنه باجر بليل نطلع عندي صبح وعصر فقط راح اخلصهم نوم
راهب:لا حول ولا قوة الا بالله علي اسمع الكلام وعوف كُلشي صلح الموضوع من جهتك ورا ست اشهر من ننزل عود اذا نزلنا كمل موضوعك لكن لا تروح وانتَ كالب خلقتك
علي:اي الله كريم
رجعت للبيت بعدهم كاعدين اول ما فتحت باب الصالة كال جدي
الجد:ادري بيك زعلان وحقك لچن بالايام الجاية نصلح كلشي وان شاء الله الجمعة نرجع كلشي مثل ما جان
علي:لا تعبون نفسكم باجر بليل أنا رايح عندي دورة بالاردن
ام فهد:الاردن انوب
علي:دورة مو قتال المهم كلشي صار انتم عرفتوا وصلوا السالفة الها اذا تقتنع اهلًا وسهًلا واذا لا غصبًا عليها تقتنع
ابوفهد: البنية لحد هذا اليوم هيَّ تعبانة
علي:وأنا صاحي
ابوفهد:بابا افتهم البنية عدها قلب على لحظة لا سامح الله تموت
علي:الف اسم الله عليها
ابوفهد:مادام الف اسم الله عليها روح صلح الموضوع
علي:الله كريم
صعدت فوك غراضي أنا محضرهم بس طلعت الجنطة شمرت نفسي على الجرباية حيرة بين كلبي وكرامتي وعزة النفس
راحت عيني على المسدس ابتسمت لو ميت شنو راح يصير ؟
فتحت تيلفوني شفت الناس شصاير بيها هيَّ ماكو
خليت التيلفون بيدي ومن بعدهي نمت فزيت الصبح على وكعت شيء رفعت راسي أمير
علي:استغفرك ربي واتوب اليك شعندك من الصبح
امير:شني عمي شبيك نام نام ماكو شي
علي:تخلي الواحد ينام شكسرت
امير:شني عطر
علي:كسروا راسك شغل الضوء
امير:تخاف علية انجرح مو
علي:انتَ تجرح ماتنجرح خايف على نفسي وراي دورة
امير:ماتاخذني وياك
علي:اخليك تنطيهم ايعاز انجب يلا وشيل الكزاز
اخذ عطر ترس نفسة وفتح الكنتور اخذ فلوس واخذ ساعة ونضارة
امير:من ارجع اشيلهم في امان الله انا ذاهب الى الدوام
عاف الكزاز مطشر وراح كمت غسلت ولميتة وبدلت ونزلت بس البنات جوا والجهال
علي:امي والحجية وين
وردة:راحوا يم بيت ابو مهيب
علي:اها
صكر:يمه أنا رايح يم ابوي لـ ديوان
وردة:يمه خطار
صكر:اي چا واذا غير أنا زلمة
وردة:يلا روح
علي:مُتيم اليوم ماكو
صكر:اكيد بعده نايم بعد شوية يجي
راح صكر لـ ديوان رغم عمرة الصغير لكن عقلة اكبر نسخة مصغرة من الشيخ طلعت للبستان كعدت جوا شجرة صافن بالدنيا اجاني راهب
راهب:حالف وين ما تروح وراك
علي:هوَّ أنا شعندي غيرك
راهب:بعد عيني اشتاقيتلك
علي:باين الاشتياق بـ عيونك
اجه كعد يمي وكال
راهب:شنو الاخبار
علي:ماكو شي هدوء
راهب:تحرك بروح الحمزة
علي:اريد اتحرك بس احسها صعبة يخوي مو سهلة
راهب:شوف احنه عايشين بـ مجتمع البنية ما تبادر لو تلزك راسك بالحايط
علي:هي غلطانة مو انا
راهب:اذا نجي للواقع صعبة منو يتوقع
علي:هي تعرف سَحر شنو واكثر من مرة تسوي مشكلة بس بنت عمك متسرعة حيل وخاصةً بهيج قرارات وهسة عايش بتناقض بين الكلب والكرامة هذا الخرا يكلي بادر والكرامة ادكلي اكعد وانجب
راهب:هههه محد لعب بينا غير هذا الخرا
علي:الله كريم
كعدنا هدوء البستان كلها اشجار وصوت العصافير وكان الجو حلو
راهب:أكلك شي
علي:غرد
راهب:بصريح العبارة وبالخط العريض
علي:احجي شكو
راهب:أنا احب اختك
علي:شني
راهب:انطرشت اكون صريح وياك صارلي اكثر من اربع سنوات أنا احبها وهايم بيها لا تباوع هيج الحب لا عيب ولا حرام وأنا حبيتها
علي:لا تخاف ولا تستحي
راهب:منك لا لان اعرفك شنو وراح تفهمني لهذا السبب حجيتلك والله يشهد ماعندي شيء وياها مرة وحدها راسلتها بس ما جاوبت حضرتني
ومن اجيت وخطبتها كنت راسم انُ اخلي كلشي رسمي قبل اييي شيء بس هي رفضت رفضًا قاطع
لهذا من ننزل نجي نخطبها واذا رفضت اخلي الدم لـ رچب
علي:شهد عمرها صغير ترا وعقلها اصغر مو مال زواج وحب وهاي الخرابيط ولا مآل مسوؤلية بهذا العمر لذلك أنا من هسة اكلك اذا اجيت وخطبت راح تنرفض لان لا هيَّ تقبل ولا اهلي يقبلون شهد صغيرة لهسة تبچي على الاندومي
راهب: مستعد انتظرها سنين بس كون تصير الي
علي:الله كريم
رأهب:والنعم بالله
من بعدهي رجعت للبيت اجت امي كالت البنية متغيرة حيل وعرفت اللي صار سكتت ماحجيت شيء العصر طلعت مريت على بابهم كان مفتوح قليل وهيَّ واكفة تغسل وتغني فتحت الباب ودخلت
علي:قمر
ندارت عليه وكانت صدمة على وجها بس شافتني نزلت دموعها تقدمت عليها مسحت دموعها
علي:ذني ماينزلن بعد
كانت تعبانة بـ شكل مو طبيعي
علي:ليش هيج سويتي
قمر:اللي صار مو سهل
علي: ما أنطيتيني فرصة احجيلج اللي صار وحققتي إللي تريدة
قمر:المنضر الشفتة مو سهل عليه
علي:بس ماجنت ادري بيها ولا حتى حسيت الئ ان دخلتي
قمر:بس انتَ نومك كُلش خفيف
علي:بـ وقتها جنت تعبان ومادري بيها
سكتت ماحجت شي نزلت دموعها
علي:قمر
قمر:ها
علي:كافي بچي أنا ماراح اتركج بعدني رايدج بعدني احبج خل نطوي ذيج الصفحة ونفتح صفحة جديدة بيضة مابيها سواد ننسى كلشي راح انسى كلشي
ضحكت وبچت بـ نفس الوقت سحبتها لـ حضني وهاي اول مرة
علي:خايبة شلعتي كلبي كافي
قمر:ماتصور شكد تعبت ذيج الايام
علي:انتهت ذيج الايام وجايتنا ايام حلوة أنا بليل اروح لـ بغداد ومناك للاردن عندي دورة ست اشهر ومن انزل يرجع كلشي كما كان
قمر:ست اشهر
علي:اي ست اشهر ديري بالج على نفسج
تركتها وطلعت رجعت للبيت مادري شنو كان الشعور بالضبط من شفتها تعبانة نسيت كُلشي نسيت انُ انا كلت ما ابادر هيَّ لازم تتنازل لكن ماكدرت
اسد:شبيك
كعدت بالحديقة وكتله انُ حجيت وياها بعد ماكلت انُ ما ابادر
اسد بـ أبتسامة: طبيعي جدا لان هوَّ هذا عشك ال فراس اذا عشكوا بـ خبال ينسون كلشي الكرامة وعزة النفس والتوعد بـ عدم المبادرة وكره الحبيب هذا عشكنا عشك معدان
علي:هههه بالضبط اذا هوينا هوينا واذا قفلنا قفلنا
اسد:الله يسعدكم ويقدم اللي بيّّ الخير
من اجه جدي عرف بالموضوع كال هسة ترجعون تعقدون يجي سيد يعقدلكم بالبداية رفضت بهل السرعة وأنا مبدل اريد اروح لكن اصر عليه بالضبط عقدنا وطلعت لـ بغداد نمر وراهب راحوا كدامي
راهب:الوجهه يضحك
نمر :الغمازة ابينه يارب خير
علي:ردينا يالربع
على ضحكتي ضحكوا وفهموا الموضوع نمر سديت حلكة يريد يهلهل
خلصنا كل الاجراءات بكل حب وحماس اشتغلت وراها توجهنا للاردن مكان التدريب
هناك ما اتواصل ويَّ اهلي بشكل يومي كل فترة وفترة اتصل عليهم مرة بسبب الدورة التدريبية
من بعد ست اشهر رجعنا للعراق استقبلنا احد القادة خلصنا الاجراءات ببغداد ضليت اسبوع ومن بعدهي رجعنا للبصرة
امير:هلا بالاردني
علي:انجب عراكي انا
امير:ههههه كواك الله
علي:كوه حيلك
دخلت لـ جوا ولا بشر البيت هدوء
علي:شو محد
امير:راحوا وخلونا يم بيت خالي خطوبة ادم
علي:ها اليوم وانتَ شعندك هنا
امير:اجيت ابدل وانتَ تروح
علي:لا
امير:شني بكيفك والحسين تروح
علي:تعبان عود بعدين اروح اسلم على ادم
امير:اممم رايح انا دير بالك على البيت
علي:دروح روح شبيَّ هسة هو البيت
صعدت لـ غرفتي شمرت الجنطة هلكان طلعت ملابس دخلت للحمام جاي اسبح وسمعت تيلفوني دك خلصت وطلعت
علي:هلا بالعريس
ادم: هلا بيك بدل وتعال بدون كلام والله اذا ماتجي بعد لا اعرفك ولا تعرفني
علي:خرا بلشتك امير
ادم:يلا بسرعة تعال
سديت التيلفون طلعت ملابس بدلت ورحت حتى نوم ما نايم شنهاي
وصلت هناك لكيتهم واكفين برا هواي ناس سلمت وكالوا يلا نروح نعقد
تم العقد على خير من التعب اريد بس ارجع دخلت لبيت خالي سلمت على امي والموجودين ورجعت للبيت مباشرةً نمت حتى بـ ملابسي كعدت ثاني يوم بليل
بعد فترة جدي كال انُ لازم تزوج خلص طولت هواي وهذا حد صبري وياك
علي:براحتكم ماعندي شيء أنا
ام فهد:نشوف البنية اقل شي يرادلها شهرين او شهر ونص تشتري وممكن تصبغ شعرها
علي:لاااا شعرها ما تصبغة
ام فهد:يااا يمكن هي عاجبها غير لون
علي:لا ممنوع يبقى نفس ماهوّ لا تصبغ شعرها ولا تخلي عدسات
ام فهد:يمه عرسها من حقها
علي:عرسي هم
الجد:هههه هاي هي همَّ متفاهمين بينهم
خابرني راهب كلي تعال يمنا الولد رحتلهم لكيت يمه نمر وفهد وماهر
علي:ابن بغداد هنا السلام عليكم
الكل:وعليكم السلام
فهد:ابن البصرة يخوي لا تسويلي سالفة
علي:صارلك شكد ماشايف البصرة
نمر:اخذته بنت بغداد
ماهر:شيخلصك بعد
علي:وانتَ كل ساعة مطلعلك عذر
كعدت يمهم ضلينا لـ12 وطلعنا بالسيارة
ماهر:وين نولي
نمر:ندور ايچات
ماهر:ماتريد نعالات
افترينا ورجعنا رجعت للبيت لكيت امي تنتظرني
علي:ها شو كاعدة
ام فهد: منتظرتك يمه تأخرت
علي:جنت ويَّ الولد
ام فهد:ابوك يريدك بالغرفة
علي:خير ان شاء الله
دخلت لـ ابوي كاعد بـ غرفتة
علي:ها بوية
ابو فهد:تعال اكعد بوية عندي چلمتين وياك
كعدت يمه كعد كبالي وكال
ابوفهد:شوف بوية انتَ شغلك خطر وكلنا نعرف بهذا الشيء وانتَ بعد ابوك لا يلزمك خوف ولأ شي اللي اريدة منك راح تصير عندك مراة وان شاء الله جهال يعني عائلة بركبتك امانة بركبتك تفكر بيهم قبل لا تفكر بروحك وتحطهم دوم على بالك مو عبالك مثل هسة وعادي لا تفكر بروحك ولا بينا هسة صارت عندك مراة افتهمت بوية لا تخلي ذنب بركبتك المايخافون الله هواي وهالتشوف ابن عمك شصار بيَّ بسببهم وشلون ادمرت حياتة
علي:ان شاء الله بوية
ابو فهد:اخذ راحتك وفكر بالكلام عدل
علي:تصبحون على خير
ابو فهد ،ام فهد:وانتَ من اهله
صعدت لـ غرفتي بدلت ملابسي ونمت وهيج مرت الايام بدوا يحضرون لـ عرسي وقتها التهيت بالدوام كانت فترة تدريب بالكلية وفترة تخرج دورة فـ كلش تعبت الى ان اخذت اجازة ونزلت حتى اتفرغ لـ زواجي
امير:اجه العريس صاير دبس
علي:مووجنت حليب
سلمت عليهم وكعدت يمهم حددوا موعد العرس
علي:الغرفة جبتوها
اسد:بليل توصل
الجدة:غرفتك جديدة ليش بدلت
علي:لا غرفة عرس
امير:اخذت غرفتك جنها العافيه
علي:اشبع بيها
بليل وصلت الغرفة قمر انشغلت بـ نفسها ماضغطت عليها وانا هم التهيت بالتدريب قبل العرس بيومين
قمر:أجل العرس
علي:ليش شكو
قمر:مادري احس خايفة
علي:شبيج تخبلتي خايفة شنو باقي يومين من شنو خايفة فهميني
قمر:من كُلشي ماادريي
ضليت احجي وياها الى ان اقتنعت نزلت الصبح صارت بـ وجهي اختي غزل طشت جكليت وهلهلت
غزل:سبع سعادات ياروحي
علي:فدوة لكلبج
بيوم الحنة الصبح كعدت على جكليت واغاني سطرتني سطر
امير:وين اكو عريس نايم لـ 11:00 الضهر كوم يلا يلا
علي:احلف بـ 11
امير:والعباس ابو فاضل
علي:چا شلحك لا محلق لا جايب الملابس
امير:سهلة هسة أنا احلقك والملابس جدي يكول عربي
علي:حتى المراة تشرد اروحلها مطبر
نزلت كلها يمنا سلمت على عماتي وبناتهم وكعدت اتريك اجه الفهد كعد يمي
علي:وين ابوك
الفهد:راح لـ سوك هوَّ وخالو صهُيب
ام فهد:يمه كلهم خل يجيبون ثلج
علي:ليش لهسة محد جاب
ام فهد:ماكو صار ساعة اصيح على امير وماكو
هزيت راسي وكمت طلعت برا صحت على مهدي
علي:الثلج وين
مهدي:راح نجيب هسة
الحنة سوا صارت كلها بليل رحت حنيت قمر ورجعت كانت لابسة بدلة ماروني وجمالها يسطر
من رجعت ماشفت لا راهب ولا نمر ولا واحد منهم
علي:راهب ونمر ما اجو
ماهر:لا ماقبلوا كالوا فشلة
علي:خابرهم كلهم خل يجون والا قسم بالله الساني بعد فلا يطخ السانهم
ماهر:هههه هسة اخابرهم
ناس كُلش هواي وتعال سلم عليها كلها محد قصر لا بالركص ولا بالوكفة
ماهر:راهب يكول خل ينجب بالعرس نحضر
علي:أنا الهم
الضوجة صارت على وجهي واضحة الكل كان موجود بس ذول الاثنين غير نص ساعة اجو باوعت على ماهر ضحك
ماهر:ههههه مفاجاة
علي:حيوان مثلهم
راهب:هههه مبروك ضلعي بالرفاء والبنين
نمر:النمر الاسمر حبيبي الف مبروك منك المال ومنها العيال زواج الدهر
علي:يوم الكم وافرح بيكم
انتهت الحنة وثاني يوم العرس رحت اجيب عروستي الزفة صارت من الصالون اصدقائي اللي بالدوام كلهم زي عسكري والبقية زي عربي الوحيد أنا اللي لبست رسمي
دخلت كانت لابسة البدلة واكفة مغطين وجها رفعت عن وجها حتى اشوفها هيَّ ضحكت وضهرت الغمازات عدها ثنين بـ خدها الايسر وحدها بالايمن
علي:طركاعة الله ولج شطالعة وين اضمج اشك كلبي واضمج بيَّ عايزة جمال ولج يطركاعتك يعلي وين اضمج،عمه هذا لا ترفعوا عن وجها
ام مهيب:عمه تختنك
علي:چا شنو يشوفنها لا غير يلزكنها عين سنة ماتصحى
اخذتها وطلعت والولد برا ما قصروا بالهوسات
صعدتها بالسيارة وهمَّ علكوها جدي صعد بالسدر وابوي اللي يسوق
علي:اذا تختنكين ارفعيها شوية السيارة مضللة ،عمه تصعدين ويانة
ام مهيب:لا يمه هاي سيارتنا
علي:چا يلا اصعدن يلا بنات
وياها امها ونسوان اخوانها ثنين وثنين نسوان بعد وتلاث بنات
علي:هاي سيارة وسيارة ثانية
اسر:اصعد لـ عروستك انتَ احنه نكمل
علي:النسوان ذني غرب مو اتيهونهون
اسر:هههه دروح روح
صعدت بالسيارة وذول حركوالدنيا نزلوا على الجسر قطعوا الشارع
ومن بعدهي الزفة صارت للبيت مو لـ فندق نزلت من السيارة انصدمت بـ وجود احد القادة حضر العرس
_تستاهل نحضر عرسك والف مبروك بالرفاء والبنين
سلمت عليَّ والتهيت بعد ويَّ المعازيم العرس كان مهيب وناس كُلش هواي الولد كُلش تعبوا وراهب ونمر وماهر ماتركوني لحظة وكفولي وكفة خوة واكثر بروحي ما اجازيهم
علي:تعبتكم اردها الكم بعرسكم
ماهر:تعبك راحة يخوي تستاهل ماي العين
راهب:ان شاء الله الشهر الجاي نسمع راح تصير اب
نمر:شني ولك حبها وحبلت
لـ 10:30 كال جدي زفوا العريس
امير:كللوووشششش تونس خوية تونس نزل البردة وسد الباب
الشيخ:الله يطيح حظك
ياسر:والجرباية الك والعب جولة
الشيخ:وعلي اللي يهوس بعد انزع العكال واطيح حظكم
زفوني للغرفة دخلت لكيتها كاعدة احلى يوم من العمر
علي:اليوم المنتظر الله يقدرني واكدر اسعدج اروح فدوة لهاي العيون
تم عرسنا على خير وتحقق الحلم المنتظر واخذت البنية العشكتها من سنين
وكنت كد كلمتي امام الله وامام نفسي وامام الناس اللي شهدوا على حبي الها
علي:ضي عيني يلا كومي صلي صلاة الليل ونامي
مشيت كدامها وهيَّ ضلت كاعدة بـ مكانها التفت عليها مدنكة راسها وتفرك بـ ايدها
علي:شبيج
قمر:اكُلك شيء بس متزعل
فهمتها ابتسمت وتقدمت عليها رفعت راسها وكتلها
علي:متعرفين تصلين صلاة الليل مو
قمر:لا لان ممصليتها
علي:سهلة هسة اعلمج عليها يلا تعالي وياي
توضينا وكعدت اشرحلها
علي:صلاة الليل تبدي من 12:30 بليل الى الفجر
أولًا نافلة تكون مثل صلاة الصبح
ركعتين وتسليم
ركعتين وتسليم
ركعتين وتسليم
ركعتين وتسليم
الى أن تصير 8 ركعات
والنية :نويت أن اصلي صلاة نافلة قربتًا الى الله تعالى
ثانيًا صلاة الشفع تتكون من ركعتين فقط
الركعة الاولى تقرين بيها سورة الفاتحة وسورة الناس
والركعة الثانية تقرين بيها سورة الفاتحة وسورة الفلق
النية :نويت أن اصلي صلاة الشفع قربتًا الى الله تعالى
ثالثًا صلاة الوتر
تتكون من ركعة وحدها فقط
النية :نويت أن اصلي صلاة الوتر قربتًا الى الله تعالئ
تقرين بيها سورة الفاتحة وسورة الاخلاص 3 مرات
وسورة الفلق وسورة الناس وبعدها القنوت
دعاء الى اربعين مؤمن تكدرين تكولون (اللهم اغفر للمؤمنين جميعًا )او (اللهم اغفر لـ فلان )
استغفر الله 70 مرة
هذا مقام العائد 7 مرات
والعفو 300 مرة اذا تردين
وتقرين الدعاء كذلك اذا تحبين
(اللهم اهدني فيمن هديت وعافني فيمن عافيت وتولني فيمن توليت وبارك لي فيما أعطيت ،وقني شر ماقضيت ،فأنك تقضي ولا يقضى عليك ،سبحانك رب البيت استغفرك واتوب اليك وأومن بك واتوكل عليك ولا حول ولا قوة الا بك يارحيم)
وكذلك التسليم على صاحب العصر الزمان (عج)
بعد ماتخلصين تكدرين تدعين اييي شيء تردينه
قمر:احم عادي سؤال
علي:جواب
قمر :شلون يعني التسليم
علي:بكل ركعة نية وشهادة وتسليم ادكولين السلام عليك يا أيها النبي ورحمة الله وبركاته السلام على عباد الله الصالحين هذا يعني التسليم
قمر:والقنوت شنو
علي:الدعاء مابين الركعتين
قمر:يلا نصلي
علي:يلا
صلينا صلاة الليل وخلصنا
قمر:تنام
علي:لا راح اضل اقرا قران الى صلاة الفجر روحي نامي انتِ
قمر:كعدني
علي:اكيد
راحت هيَّ وأنا بقيت كاعد لصلاة الفجر كذلك كعدتها صلينا ونمنا كعدت على صوت التيلفون ماهر
ماهر:صباح الخير
علي:صباح الورد هلا
ماهر:كعدتك من نومتك بس أنا بالدوام والوالدة متخربطة حيل بس اريدك تروح للبيت لان مااكدر انزل
علي:سلامتها هسة رايح سهلة
ماهر:الله يجزيك الخير
علي:بـ خدمتك
قمر:شكو
علي:ام ماهر متخربطة
غسلت وبدلت على السريع اخذت السويج ونزلت صبحت عليهم بسرعة وطلعت وصلت لبيتهم دكيت الباب فتحته بنية
دخلت جوا يمها ابو ماهر رجال جبير وبعد موت ابنه تعب اكثر
علي:سلامتج
ام ماهر:يامن عمت عيني كون يايمه راح اتعبك وياي
علي:اسم الله عليج يمه كومي وياي يلا
ام ماهر :لا يمه مااريد اتعبك مابيه شي هسة اصير زينة
علي:تعبج راحة كومي وياي لا نتخارب
ام ماهر :كل ساعة ثاعتكم انا
علي:لا ثاعتنا ولأ شي يلا
اخذتها خليتها بالسيارة اجه. ويانة ابو ماهر خابرت ماهر
علي:يادكتور تراجع
ماهر:لا يخوي بس اخذها للمستشفى من اجي انا اخذها
علي:خلصت تمسلت
ماهر:اي خلصت
علي:عفية انطيني اسم الدكتور يلا بدون لغوة
ام ماهر :شلونها مريتك يمه بعدك عريس سودة عليه
علي:الحمدلله بخير واسم الله عليج
ابو ماهر :ما اعرف شلون اجازيكم يابوية فضلكم جبير عليه
علي:انتَ مثل والدنا والفضل لـ الله محد اله فضل عليكم
وصلنا للدكتور كان ماعليَّ هواي ناس كال السكر والضغط ما مستقرات وعندج عجز كلوي وممكن تضربج جلطة
سواها سودة مصخمة كتب علاج رحت لـ صيدلة اشتريت العلاج وطلعنا صدمني حيل
ابو ماهر:عجز كلوي
ام ماهر:الله كريم
علي:لا تسوين غسل كلوي استمري على العلاج وكلام الدكتور والله كريم بس غسل كلوي ماتسوين
ابوماهر:ليش بوية
علي:يدمرها اكثر خليها على العلاج احسن
وصلتهم للبيت ورجعت لـ بيتنا
أمير: اجه الزنكيل
علي:انجب وجهه الفكر
امير:أنا وجهي كله خير وبركة أصلًا بيَّ نور
صكر:نور لو ريم
امير:اكطع النعال هسة
علي:بعد عمك
امير:معقد مثلك تكاثروا المعقدين
بعد مرور ست اشهر على زواجنا كنت بالدوام كاعد بالمكتب اشتغل على قضايا انفتح الباب بسرعة جنونية ودخل ماهر حالتة حالة
علي:ياستار ياربي شكو شبيك
ماهر:تعبت والحُسين تعبت وطاح حظي من ورا هذا الحقير ابن الحقير
علي:ادخل وسد الباب وتعال فهمني شكو
ماهر:انتَ مو تعرف أنا احب بنية من بغداد واكثر من مرة اتقدملها
علي:اي
ماهر:وهذا المغضوب العدها اللي اسمة ابوها يرفض وهسة وصلني خبر باجر خطوبتها
علي:حظكم بالحب بيا طينة نايم
ماهر:طينه كشرة
علي:باجر الخطوبة العصر
ماهر:اي العصر
علي:كوم حضرلي الرتل
ماهر:شراح تسوي
علي:ماتصير لـ غيرك حضر الرتل وانطي خبر لـ راهب ونمر كـ واجب رسمي يلا
ضل صافن بوجهي ضحكت وكتلة
علي:يلا يمعود شبيك
ماهر:بيش اجازيك
علي:روح مابينا هالحجي
رجعت اكمل شغلي دخلوا راهب ونمر
راهب:وين
نمر:شكو بغداد
راهب:شصاير بيها
نمر:ورتل كامل
راهب:وبغداد
نمر:واربع ضباط راح يطلعون
راهب:واجب رسمي
نمر:وصخام والطام
راهب:ماتحجي
علي:انطوني مجال وأنا احجي
نمر:يلا احجي
علي:نخطب لـ ماهر
راهب:هاااا هنا السالفة
طلعنا بليل وصلنا بـ 6:30 الصبح
نمر:غباشة
علي:مو هذا وقتنا انتظروا
خلصنا كم شغلة والعصر وقت الخطوبة توجهنا الهم دخل ماهر اول واحد كان لابس زي عسكري
ماهر:السلام عليكم
الكل:وعليكم السلام ورحمة الله
ماهر:لمة خير ان شاء الله شكو
احد الكاعدين : عدنا خطوبة بوية
ماهر:خطوبة ؟منو لـ منو
_خطوبتي
ماهر:اها انتَ
_اي
ماهر_ماعدهم بنات لـ زواج هيَّ وحدها والي
_شتحجي انتَ شنو وحدها والك
ماهر:لا دوخنا وحدها وصارت الي
ابو البنية:اطلع برا بكيفك هيَّ شنو
علي وهوَّ يدخل:اي طبعًا بكيفة صار سنين احنه نمشي على مزاجك وصبرلك هواي البنية لـ ابنة مو لـ غيرة
ابو البنية:بكيفكم هيَّ شنو
نمر:اي بكيفنا واذا تريد ترفض وتبقى مصر على رائيك براحتك السجن يرحب بكم والبنية ناخذها
بعد مدة قصيرة اقتنع عقد ماهر على البنية بـ حضور نفس الناس وطلعنا بسرعة لان تأخرنا
ماهر:مادري شلون اجازيكم فضلكم شلون اردة
راهب:خدام لطيبين يابه صدك جذب مابينا هالحجي اذا ما نوكفلك نوكف لـ منو
علي:نمر نطلع كبل لـ اهل المرأة
نمر:لا يخوي خيولي هذا مصركع خليني أنا هسة تفرج
يومين ونزلت لـ اهلي كلهم موجودين كاعدين بالصالة
علي:چا مرتي وين
الجدة:هسه صعدت يمه
هزيت راسي وترخصت دخلت للغرفة لكيتها بالحمام طلعت ملابس وهيَّ طلعت
قمر:الله يساعدك هاي شوكت اجيت
علي:يساعد بختج قبل شوية اجيت
تقدمت عليها شعرها ينكط مي والوجه احمر
علي:وين اضمج
أشرت على كلبي وكالت
قمر:هنا مثل ما أني مخليتك
علي:ميفيد اريد اضمج من عيوني الكل حتى من روحي اغار عليج ما اريد احد يشوفج
سحبتها لـ حضني وبستها بخدها
علي:شكد احبج شسويتي بيه
قمر:ابو عيون الملح چا انتَ هم شلعت كلبي
علي:شحلات الچا بحلك البغدادية
دخلت سبحت ونزلنا لـ جوا وراها بـ فترة قصيرة التحقت للموصل وياي ماهر ونمر وراهب كالعادةة بوقتها كان واجبنا تفتيش لكن قبل لا ندخل المنطقة كدامها منطقة على حسب علمنا المنطقة أمن وأمان وكلشي تمام
لكن بيها صار علينا تعرض
قاومنا قدر المستطاع لكن خلال ما احنه نقاوم قناص ضرب ماهر طلقة بـ كلبة وكع بـ حضني
علي:ماااهررر
ماهر بـ صعوبة : أهلي امانة عدكم ديروا بالكم عليهم مالهم احد بعد الله غيركم وحبيبتي كلولها حبيبج راح شهيد عرسنا هناك بالجنة اذكروني ولا تنسوني اذكروني
نطق الشهادة وأستشهد ماهر !
علي:مو يومك ماهر والله مو يومك امك وابوك شكلهم خطيبتك منتظرتك جاي يحضرون لـ عرسك من تنزل يزفونك لعروستك مو للمكبرة خوية والله تعبت وأنا أزف بيكم للمكابر
حضنته حيل وأنا ابچي اجه نمر سحبة من حضني وصار يكعد بيَّ بكل معنى الكلمة انصدم وماتقبل الخبر
نمر:مااهررر عوف الشقة مو وقتة هسة كوم محتاجينك مااهرررر حاجينييي افتحح عيونككك مو جاي احجي وياككك مااااهررررر امككك منتظرتكككك والله توكف بالباب شنو نكولها هسة ابنج مات ابنج راح ماهر امك مريضة لا اتعبها اكثر ابوك مالة احد غيرك بعد ياسر راح وانتَ هم حاجيني بروح كل عزيز على كلبك
سحبت نمر عن ماهر واحد حضن الثاني وبچينا خابرت الشيخ كتله ينطي خبر لـ اهل ماهر واحنه جايين هذا الحجي المغرب ويّّ الاذن
خلصنا كلشي وطلعنا للبصرة وصلنا بـ 8 الصبح
حالة ابو وامة حيل تعبانة ولدهم ثنين راحوا
ياسر بحرب داعش ويَّ الحشد الشعبي استشهد
وهسه ماهر استشهد
امهم صارت تبچي وتهلهل
ام ماهر:عفية ابني البطل ماخاف سواها هاي الرادها وهاي التمناها
ثالث يوم الفاتحة دخلت لـ بيتنا صار كدامي ابوي التعب والحزن والصدمة كانت باينه على وجهي سحبني ابوي لـ حضنه
ابو فهد :شهيد بوية هنيئًا أله ادعيلة بالرحمة ادري صعبة عليك وبعدك بجرح ذولك اخوتك بس شنسوي يابوية هذا حال الدنيا هم السابقون ونحن اللاحقون
صعدت لـ غرفتي بليل سئلت عن خطيبت ماهر اجت للفاتحة او لا كالوا ماحضرت لا هيَ ولاواحد من اهلها
ورا 10 ايام من استشهاد ماهر كاعدين برا دك تيلفوني رقم غريب من جاوبت انصدمت صوت بنية تبچي عرفتها خطيبت ماهر إللي افتهمتة من كلامها انُ ابوها ميخليها تجي بعدهي تحجي وياي وسمعت صوت ابوها يرعد
والتيلفون انغلق مباشرةً صعدت السيارة وتوجهت البغداد بدون تردد او تفكير نمر وراهب وادم وفهد صديقي اجو وياي بدون ميفهمون شيء وصلنا بغداد الصبح
لكن من وصلنا انصدمنا صدمة ماكانت على البال أبدًا انُ ابوها قتلها موت !!
شنو السبب وبيا ذنب قتلت زنت ؟عار لو شردت ويَّ شخص ؟ هذا مجتمعنا لهاي الاسباب تنقتل البنية اما هاي شنو ذنبها ؟
كان ذنبها انُ حبت شخص ورادت تشوف كبرة او تحضر فاتحتة لكن ابوها كان شخص ضالم وقاسي الى ابعد حد شخص لا يعرف الله ولا كتابة
شخص جاهل وهمجي
وجزاه القاتل القتل
وبشروا القاتل بالقتل !
سلمتة للقانون ودفنا البنية يم ماهر بالضبط
وضليت متابع القضية الى ان تصدر الحكم والقتل كان متعمد وهوَّ اعترف انحكم بالحكم اللي يستاهلة
رجعنا بليل صار ضوء السيارة على مراة
ادم:منو هاي
فهد:ام ماهر
نزلنا يمها كاعدة على الرصيف وصورة ولدها بيدها
نمر:شعندج هنا خالة الجو بارد
ام ماهر:هلا يمه هلا منتظرة الولد يمه
راهب:لا حول ولا قوة الا بالله كومي خالة كومي الوقت متأخر وباردة
ام ماهر:لا يمه انتظر ياسر وماهر كالوا مانطول ونجي اكعد انتظرهم هنا روحوا انتم يمه تعبانين
ادم:كولي يالله خالة وكومي ويانة ادخلي لـ بيتج والولد الله يرحمهم
ام ماهر:يايمه ولدي عايشين وراح يردون
علي:كومي وياي ادخلي جوا وهمَّ يجون مايصير تكعدين هنا
ام ماهر:همَ صدك والله ما يرضون اطلع يضلون يحجون سودة بوجهي يلا يمه تصبحون على خير
الولد:وانتِ من اهله
علي:خرا بـ داعش
كانت الساعة بـ 3:00 الفجر الباب مقفول اتصلت على امير مايجاوب اتصلت على الشيخ نزل فتحلي الباب
الشيخ:كواك الله
علي:يكوي حيلك
صعدت لـ غرفتي قمر نايمة صليت ونمت فزيت على دكت التيلفون صرت اخاف من التيلفون اذا يدك لازم مصيبة
.............................
قمر: مرت فترة وأني نفس الحال حالتي يوم عن يوم تسوء وخاصةً بعد كلام راهب حيل أذاني وصرت أفكر بيَ ليل مع نهار
رنا:ياحبيبي خلص ميصير هيج تسوين بـ نفسج
رياهم:قمر كومي ويانة محد يستاهل هيج اتعبين نفسج ليصير بيج شيء
قمر:ماكنت متوقعة هيج والله متوقعت وسَحر سَحررر ياربي
رياهم:إهدائي يروحي
من بعد فترة على هذا الحال قرابة الثلاث اشهر
ابو مهيب:اليوم عمي حجه وياي بموضوع قمر وعلي
ام مهيب:خير ان شاء الله
ابومهيب:يكول الولد ماعليَّ بشيء ملعوب من سَحر واختها
ام مهيب:وسَحر واختها هالكد بدون تربية ويسوون هيج سالفة مثل هاي يعقلها العقل ؟
ابومهيب:كلامج صح بس من تسمعين سوالفهم راح تصدكين يجيكم الخبر بالتفصيل والولد هم تعبان واتوقع تسرعنا جدًا بالقرار واتخذنا خطأ بحقه
مافهمت القصد بالضبط اكتفيت بالسكوت ثاني يوم اجت ام فهد وبيبي يمنا سلمت عليهم واجيت اصعد كالت بيبي
الجدة:اكعدي يمه احنه جايين علمودج
كعدت يمهم وبدأت تحجي
الجدة:من صارت السالفة احنه كلنا صرنا وياج ضد ولدنا وجنتي شدكولين انتِ احنه نكول تم الى ان وصلت فسخ الخطوبة ومشينا على كلامج لكن بعد الكلام الحجتة سَحر واختها تغير رأينا
ام مهيب:شلون يعني
حجت الموضوع من البداية الى النهاية
ام فهد:انتِ من دخلتي الغرفة كان نايم لو غير شيء
باوعت عليها تجمعت الدموع بـ عيني
قمر:كان نايم بس هيَ كُلش يمه ومنضر صعب
الجدة:انتِ كلتي نايم چا شمالج بعد انچلبتي فد مرة
قمر:من شفتهم سوا ماضل عقل براسي
الجدة:هوَّ هذا الاستعجال المايراد ااخخ منج ااخخ
راحوا همَّ وبقيت افكر بـ كلامهم ثاني يوم كعدت من الصبح خلص كافي الى متى أبقى هيج اللي صار صار والله كريم نزلت تريكت ويَّ اهلي والعصر نزلت سحبت الصوندة وغسلت الكراج واغني
أجيتك من بعد غربة
اجاني صوتة من ورا ما انكر كنت حيل مشتاقتلة كان تعبان بشكل وايدة بيها كانونة جوا عيونة صاير سواد واضح يعني التعب باين
بعد الكلام اللي سمعتة منه ومنهم تأكدت
تسرعت بهذا القرار
بنفس اليوم بليل اجه ابوي كال السيد راح يرجع يعقد
بسرعة بسرعة صارت بس رجع العقد وهاي هيَّ
رجعت الضحكة على وجهي وتفهمنا اللي صار
التسرع ميفيد ويخرب كُلشي هذا اللي اخذتة من هاي الغلطة
وبعد فترة تحددد العرس وتم على خير
حياتنا كانت كُلش حلوة وهادئة بعيدة عن المشاكل وعن كُلشي ورا ست اشهر كاعدين بالصالة كلنا دك تيلفون الشيخ
الشيخ:أنا لله وأنا اليه راجعون شوكت
ماعرفنا منو بالضبط سد التيلفون
الجد:شكو بوية
الشيخ:ماهر استشهد
الجدة:يمه صخام الصخمني
ام فهد :يايمه عمت عين كلبي على شبابة
شهد:هو مو قبل كم يوم خطب
اسد:اي ومن ينزل عرسة
الشيخ:لا حول ولا قوة الا بالله ترحون وياي نكول لـ ابوه الله يساعدة ياسر راح وهسة ماهر
الخبر كان صادم حيل راحوا كلهم وحتى عمتي وبيبي بقينا أني والبنات والجهال
شهد:خطية يمه القهر
اقل ساعة وصار صياح بالمنطقة
رسُل:ياامي الله يساعد اهله
وردة:قمر شبيج
قمر:بالي يم علي هسة شنو حالتة هو اسمر وهمام وعمر وعمار بعده عايش بـ يومهم وهسة ماهر شنو حيصير بيَّ
شهد:الله يصبرة
عدنا الرمي ممنوع بس لان شهيد رموا بيومها لـ صبح احنه كاعدين ورحنا للفاتحة امه وضعها كُلش تعبان وخواتة
ثنين ولد وثنين بنات الولد استشهدوا والبنات وحدها متزوجة والثانية مخطوبة
امه طلعت قاط العرس وتعاتب بيَّ
حالتها كانت جدًا صعبة بس مبيدنا شيء هذا حال الدنيا ورا الفاتحه يلا كدرت اشوف علي كان كُلش تعبان
اجه نام وكنت كاعدة يمه وهوَ نايم كال
علي:ماهر ارجع امك تنتظرك
حجه هذا الكلام بكُل تعب بچيت على كلامة اذا صاحبة هيج امه شلون
ورا وفاة ماهر بـ 10 ايام فقط كاعدين على الريوك كلنا بس علي بـ وقتها كان نايم دك تيلفون صهُيب طلع برا يخابر شوية ورجع
ابوفهد:خوماكو شيء
صهُيب:حسن ومسلم بالمستشفى صار وياهم حادث لازم نروح قمر اصعدي كعدي علي
علي:كعدت يلا امشي
أني بـ نفسي ما استوعبت مستحيل يعني قبل كم يوم راح ماهر يارب لا تفجعه بيهم مسلم وحسن اصدقائة ومن يمنه بالمنطقة ودائمًا يجون
ورا كم ساعه كالوا توفوا ثنينهم راجعين من النجف وصاير وياهم الحادث على طريق الناصرية_البصرة
ام فهد:ياربيي دخيلك خلصت الشبان يمه شحال كلبك هسة سودة بوجهي
الفاتحة صارت بالباب صعب انُ نطلع لازم نفتر من غير شارع ثاني يوم الصبح اجه علي استقبلتة عمتي بالباب
ام فهد:الله يعين كلبك
علي:ماضل عندي كلب وأنا كل ساعة اشيع واحد والله ماضل مليت من درب النجف مليت
حالتة كانت تعبانة صعد للغرفة صعدت ورا بدون كلام اخذ ملابسة ودخل للحمام سبح وطلع لبس الشماغ حتى وجهه تنكب بيَّ
علي:اذا ترحين للفاتحة روحي العصر او بليل
هزيت راسي وهوّ نزل وطلع ورا فترة كُلش طويلة
جنت كاعدة جوا يم البنات وصعدت اريد اخذ تيلفوني علي كان نايم فوك فتحت باب السويت ودخلت سمعت علي يخابر اجيت افتح باب الغرفة
استوقفني كلامة وهوَّ يكول
علي:يروحي بابا ان شاء الله الخميس يمكم ...
شكرا لزيارتكم عالم روايات سكيرهوم
