رواية بنات الحجي السعيد الفصل الرابع بقلم شمس العراقية
ليال ـ واكفين بالحوش وأصوات عاليه وابويه طلع الهم وأمي ادك وتلطم ولازمه باسل من صدره تمنعه يطلع هو يدفع بيها وأجانا صوت ليث يصيح عليه من طابق الثاني
ليث ـ وين مولي وين تطلع تريد تموت انكبر بالبيت
باسل ـ مو مره أضل مكبور بالبيت شو دوخروا هي روح وحده وموته وحده خل اطلع وشيصير خل يصير من انعل هيج عيشه زقنبوت ردت اتزوج مطلقه لو كفروني بالاسلام طلعوني من ديني .
هيفاء ـ ولك يمه اني أمك وأتوسل بيك ليش هيج تسوي بيه
باسل ـ يمه عوفيني لخاطر الأسلام دعوفيني .
ليال ـ دفع أمي وراح باب الحوش أمي قافلته باوعلها وهو صاير نار شمر موبايله على جنات وركض گبل صعد وطفر من الحايط وكبت العيطه وصارت هوسه وصياح وكلشي ما فهمنا وأمي ادك وتلطم واحنا نتراجف وميتين خوف .
لقاء ـ أمشن نباوع من زرف الباب .
ليال ـ تعاي ولج وين نباوع كعدي وسكتي، أمي جرتها وكفنا بس نسمع صوت
ـ والله أشرب من دمك ، ولك خسيس أني جتالك اني وين تروح مني ، خاتل بظهر أبوك وعمامك بس توكع بيدي الزمك الزمك الا اكطعك وصل لك أدنس شرفي وعرضي لك ساقط والله مايبرد گلبي الا بدمك والله
سعيد ـ أبني خل ندخل البيت ونتفاهم وگلشي تريده يجرالك بس بالسلاح والصياح ما تنحل المشكله
ـ شتحجي عمي وين تريدني أكعد على فراشك وأبنك داخل بيتي وبعيني شفته بالكاميرات بس وشاربي وشرفي لوثه أبنك ، اني جتالك يا ناقص لك نذل تلعب على أعراض الناس ما عندك أخوات ترضى العب على أخواتك .
ليث ـ شتحجي أنت صم حلكك لا أصلمك بالقندره وأحجي حجي زلم ولمم فضيحتك وأستر على أختك الشريفه وأمشي ولي منـا ولي .
ـ أنتوا الظاهر تردون دم واني حاضر .
ليال ـ صارت هوسه وأطلاق نار وشوي وگبت العيطه يا ساتر أسترنا شگو شصار بهل الأثناء لقاء تباوع من زرف الباب عاطت شگو ولج شگوو
لقاء ـ ليث أنصاب بطلقه صخام هذا راح يكومهم كلهم .
هيفاء ـ اني طالعه وخرن من الباب وخرن .
ليال ـ يحجن واني بالگوه واكفه ابجي وميته خوف على ليث ياربي احفظه يارب أستر عليهم ، أمي فتحت الباب وطلعت بس نسمع صوتها تتوسل بي
هيفاء ـ داخله عليك أروح فدوه لطولك ولك يمه أني ام وهذا وحيدي لاتفجع گلبي عليه أندار صدقه وقربان لهل الوجه عوف السلاح من أيدك واحنا حاضرين باللي تريده شتريد يجرالك .
ـ گلشي أريده تنطيناه!
ـ عيوني اشلعهن الك بس عوف هالمصخم من أيدك
لقاء ـ عزا تعالن شوفن موجه السلاح عليهم يمه
صخام هذا مجرم وربي مجرم
ـ خاله أنطيني وحده من بناتج! أريد وحده من أخواتك مثل ما لعبت على عرضي ما يفگها دمك يفگها شرف أختك .
باسل ـ هذا أني كدامك فگ طلابتك بدمي .
ليال ـ بهل الأثناء سمعنا صوت سيارات شرطه وأطلاقات ناريه يارب أستر وابتعدنا من الباب وشويه وصار هدوء طلعنا هوسة سيارات عمامي بالفرع وأمي وعمتي سلوى ملخه نفسها وصعدن هي وجديتي بسيارة نائل ولجن شصار لقاء خل نروح نفهم أمشي تحرگي .
لقاء ـ أمشن اني طگ گلبي
ليال ـ طلعنا من البيت وصلنا بيت جدي هوسه وكل عمامي ولد عمامي موجودين وفارس يحجي عالموبايل بس أمي وابويه وباسل ما موجودين!
جواهر ـ شمطلعجن من البيت أكعدن وأنجبن فوك سوالف أخوجن والفضيحه والعار الجابه النا خزى أخوجن خزى من عمى العماه أي والله ، الا تصير دم اذا ما صارت دم تعالوا تفلو بوجهي .
فارس ـ عمه گولي يالله هم گمتن تفاولن عوذه حتى عوذه ، يله سجاد وين صرت نمت امششي يمعود
سجاد ـ انطيني مجال
فارس ـ غير عمي سعيد حرك الدنيا علينا ، يله امشي فواز زياد تبقون بالبيت وخطوه وحده ما تتزحون من مكانكم، لان هاي عدها أخوان صاحبيين مشاكل وطلايب مو بعيده يهجمون عالبيت، لما تجي دوريه ونشوف تاليها شون تفض
جواهر ـ شيفضها اذا من أولها سلاح وكع بيها أخوكم وأنصاب هسه يموت گرة عينكم من ورى سوالف أبن عمكم راح يروح أخوكم الجبير لا بيها لا عليها بعده شبيب ششاف من حياته.
فارس ـ عوذه فال الله ولا فالج گولي يالله أخويه ما بي شيء وطلقه وأجتي بجتفه جايه شطح سبع ما يهم الها وهذا أبن عمنا نفدي بدمنا وحجايه زايده ناقصه ما أريد الطمها على حگلها التحجي وتجيب معدل وطاري باسل منو ما يكون ، واني رايح ولا وحده تطلع من القصر اكسر رجلها التطلع يله كلجن كدامي يله داخــــــــل .
ليال ـ صاح بينا وصعدوا السياره وفواز فتح الهم الباب وكعدوا هو زياد ولاحظت زياد شايل سلاح!! أنرعبت
ومشينا دخلنا كعدنا بصف عمتي نجاح
جنات ـ عمه أهلي وين فدوه ما فهمتي وين راحوا
نجاح ـ راحوا المركز لان الشرطه أخذوهم وأبوج وعمامج لحگوهم وأمج راحت ويه ليث هي وعمتج سلوى وجديتج .
ليال ـ ضلينا كاعدين وعايشين بقلق وبخوف وتأخر الوقت وولد عمامي كاعدين ودخلوا علينا فارس وسجاد
نجاح ـ ها عمه بشروا .
فارس ـ أنحلت بالمركز وطلعوا باسل بس بعد ورانا كعده شوف شون تفض ، ياقوت أمشي حضريلي ملابس
لـ ليث .
ياقوت ـ أي هسه بس فدوه طمني عنه شلون صار
فارس ـ لاتبجين فيروز ياقوت يابه والله ما بي شيء مثل الحصان ودزني يريد ملابسه يله أمشن .
ليال ـ بگلبي ليش بس هنا اني گلبي مات عليه اخذله ملابس وراح وضلينا كاعدين ماكو أحد ومحد بين علينا وتأخر الوقت ودخلوا علينا ابويه وباسل منزل راسه وراهم نائل وفارس وسجاد وعمي كريم وسليم .
كريم ـ سعيد أخذ أبنك على صفحه لا كدام ولد عمامه وأخواته وأفهم منا كل السالفه .
سعيد ـ أمشي كدامي لا بارك الله بيك من ولد أمشي
ليال ـ أبويه أخذ باسل وطلعوا راحوا البيتنا وأحنه كاعدين وعمامي كعدوا يحجون وعمي كريم صافن ورجع عمي سليم يحجي
سليم َـ مو أكول الكم باسل واحد مسقط ومرخين اله الحبل محد يصدكني أستلموا نام وياها وأهلها شافوا عابر من الحايط واكو كاميرات ومشاهد موثقه گلشي والله وشاربي باسل الا يطيح حظنا اذا ما كعدنا على الحديديه گولوا سليم ما گال ، وأهلها مبين عليهم شنم هما واضحين من الأخ جاي يهوبز بشرف أخته عايفها وملاحك العار أبننا .
كريم ـ مو وگته الحجي خل تفض وبعدها بيك خير وأحجي هسه دايخين
سليم ـ لعد شوكت وگته گولي شوكت، شو العينتين أبن هيفاء دخلنا مراكز شرطه وأنفضحنا بين الجيران وليث أبنك بالمستشفى وأنت كاعدلي وأعصابك بارده وادفعلي لواحد ساقط أمه ما مربيته .
كريم ـ تحجي عدل لا أكوم أكسر حلكك وليث وباسل نفس الشيء وماكو مشكله ما الها حل وعندك حجايه بيها خير أحجيها ما عندك صم حلگك وأسكت
فارس ـ عمي سليم شُنو هالحجي والتحجي عنه أبن أخوك محسوب عليك وعلينا كلنا ، وبهيج وضع نتكاتف ونوكف وياه ونحل مشكلته مو نزيد المشكله ونكعد نحاسبه هسه مو وگت حساب .
نائل ـ هما وين راحوا شو عافونـا ومشوا لا هواي مهتم لمشكله باسل أفندي .
كريم ـ أب وأبنه أنتوا شگو صموا حلوگم وسكتوا گافي عاد ما أسمع ولا حجايه .
ليال ـ سگتوا وأحنه ضلينا كاعدين وخايفين ودخل أبويه بس باسل مو وياه أشر لعمي كريم وطلعوا وكفوا بالباب ونائل اشر لعمي سليم ويضحك بهيج وضع ويضحك! عجيب هالأخ .
نائل ـ وشرفي هسه يطلع محبلها ، ماطول بيها إشارات أستلم جايينا حفيد نغل!
فارس ـ نائــــل
نائل ـ سگتنــا عمي سكتنــا .
ليال ـ أبويه وعمي تأخروا ، وأشروا النا ندخل ودخلنا غرفة عمتي نجاح فرشتلنا ومنين يجيينا النوم واجتني جنات بيدها موبايل شگو شبيج هذا مو موبايل باسل!
جنات ـ أي موبايله من طلع شمره عليه ، وهاي عُلا من ساعة الصارت المشكله تتصل وهو مخلي صامت اجاوبها لو لا شتگولن
لقاء ـ الله يأخذها عوفيها لاتجاوبينها هسه تطلع متفقه هي وأخوانها ووكعوا باسل بهل المصيبه ما سمعتي عمي سليم شيحجي راح تنلاص علينا .
جنات ـ لا مو لهل الدرجه هي تحبه هواي وكلنا ندري وحبهم من زمان ما اظن تغدر بي
لقاء ـ وليش ما تغدر بي شو هو الأخ صار يغدر بإخوه تردين عُلا ما تغدر بـ باسل والله أنتِ على نياتج بابا شتحجين وهيج واثقه منها ما تغدر بي ما جان تكدر تنبه باسل البيت بي كاميرات دام تعرف بأهلها منصبين كاميرات ماكو وحده غبيه لهل الدرجه لاتقنعيني .
ليال ـ وباسل وكع على عمى عيونه على حبها وما أهتم للعواقب الله يستر من تاليها شلون تفض .
_____________________
محافظة ديالى ـ بعقوبه ـ القرى الأطراف
( عائلة الحجي أسكندر والحجيه غنيه )
عصماء ـ انا عصماء من محافظة ديالى خريجة سادس أعدادي كملت الحمدلله بس ما قدمت على جامعه بسبب الحاله الماديه وأبويه فلاح وأمي ربة بيت عدنا محل داخل البيت كلها تگول الدلاله أم سجاد جان عدنا أخ أسمه سجاد بس غرق راح ويه أصدقاءه يسبحون وغرق وضلت أمي على بنات أثنين أني عصماء وأختي بيداء طالبة سادس أعدادي ...
نايمه ومتغطيه بالجودليه وأمي تصيح عليه
غنيه ـ عصماء گومي يا بنتي ما ضل وگت هسه يجن النسوان يشترن ومحلنا معزل شو كومي ورتبي المسواك الجديد
ـ هسه أكوم
ـ گومي يله اني رايحه على بيت جدج مو يدكن عليه الباب وأنتِ متوثه، كومي النوم يطير البركه
ـ نفضت الغطا وكمت باوعت ماكو احد وبيداء رايحه لدوره لازمه دروس خصوصي غسلت وجهي ورتبت شالي ودخلت المحل فتحت الباب المحل داخل البيت بس الباب عالخارج بابه لونه زنجاري خليت القطعه محل ام سجاد لـ الاكسسوارات والحاجات المنزليه والنسائيه والمكياج .
رشيت كدام المحل والجهال گبالي يلعبون طوبه خليل سمير دير بالكم الطوبه تطفر على باب وتخبلوني .
خليل ـ تدللي بس اذا أنشگت طوبتنا تنطينا وحده بلاش
ـ لا والله هذاك اليوم انطيتكم وحده أبلاش قابل يوميه شنو مفتحه محل أوزع خيرات
ـ أنتِ كريمه
ـ لا والله انتوا تعلمتوا على البلاش، ضحكوا وهزيت ࢪاسي ، دخلت بديت أرتب الأغراض بالمحل ودخلت عليه خاله أم سعد عدها خمس بنات ودائماً تأخذ مني
ام سعد ـ ولج معصومه شلونج سمعت متسوكه مسواك جديد واجيتج والحبايب كالن عصماء شون جايبه مسواك يخبل كلشي وكلاشي تعاي شوفينا شجايبه ما جايبه اني وهم شيء عندي مسحگات البنات وغريضات البيت
ـ عيوني خاله المحل كله كدامج وشوفي والله بعدني نصه ما معزلته هسه وياج افتح واخذي اليعجبج .
ـ اي ما شاء الله خوش مسواك ، هاي القراصه بيش
ـ الف خاله
ـ ولج عصماء شدعوه غاليه وبالسوك بخمسميه
ـ خاله هو ربحنا بيها قليل والله وأنتِ تأخذين بالدين بيش أبيعها الج .
ـ يله راح أخذها صُدك ديني شگد صار
ـ كملي وأجمعهن ويه الدين القديم بس خاله ام سعد هالشهر تحسبين حسابنا
ـ اي بس أستلم الراتب أنتِ أول وحده أجيبلج
ـ اي فدوه لان بعد اريد أتسوك للمحل والنسوان موصيني على شغلات لازم اجيبها الهن.
ـ تدللي ، أمج وين ما شفتها اليوم
ـ يم بيت جدي هسه تجي
ـ ها يله شوفيلنا شكد صارن وصُدك اريد اوصيج للبنات وصوني على خبطه مال وجه ما تجيبليهن وياج نفس مالت امج قبل جانت تجيبها من بغداد تخبل .
ـ لا والله خاله ما أشتغل بالخلطات ، أمي جانت قبل تشتغل وتبيع ، بس من أستلمت الشغل قطعناها
ـ ليش يولي شبيها تخبل والله كلنا جنا ناخذ منها وخبطات أمج تسوي الوجه كيمر وبناتي يردن منها وصني لان هاي جارتنا تسوي بس ما بيها شغل حرگت وجه بنتي .
ـ بيها أضرار أكثر من ابمنافع لهذا تركناها اجيب منتجات وكريمات أصليه بس غاليه ، اجيب على كد اليوصوني
ـ بيش هذن كريمات
ـ من ٢٥ وفوك واكو بعشره يعني گلشي بسعره
ـ لا اذا غاليه ما أريد شلحك وحده اثنين يله شوفيلي شكد صار ديني
ـ ويه حساب اليوم صار ٨٥ الف
ـ خير ان شاء الله يله سلمي على امج
ـ الله يسلمج خاله يا هلا بيج ، راحت ورجعت ارتب ورن موبايلي أم مصعب هلا خاله
ام مصعب ـ شلونج معصومه
ـ عيوني خاله بخير الحمدلله
ـ يولي وصيت أمج على مصافي ثلاجه جابتلي علمود ادزلج مريم تاخذهن
ـ اي خاله جبت كميه كم واحد تردين
ـ أربعه وعندج هاي تقفل الثلاجه والله جهال أبني ما خلوا عليه ثلاجه نعلوا أهل اهلها
ـ اي عندي خاله دزيلي مريم وادزلج
ـ شكد فلوسهن
ـ سته الالف
ـ هسه ادزلج مريم
ـ ماشي خاله وأنتهى الاتصال حضرتهن واجتني مريم هلاو مريوم هاج اغراضكم
مريم ـ خاله عصماء
ـ ها حبيبتي شو صافنه
ـ اريد صبغ اظافر وأسيتون بس لاتكولين لأمي لان ما تقبل لان بالمدرسه ما يقبلون نصبغ وما تشتريلي
ـ أي تدللي وهاج الصبغ وهذا الاسيتون
ـ سجليهن عليه اني اجمعلج واجيبهن الج
ـ ما يحتاج حبيبي هذن هالمره مني بس من تروحين المدرسه مسحي احسن ما يحجون عليج وبعدين أمج ترجع عليه .
ـ ميخالف والله ، شكراً خاله
ـ العفوا ، راحت فدوه للبنات شحبهن هاي دائماً يجوني وانطي وامي تضل تحجي عليه وبهل الاثناء دخلت عليه امي اجتي من بيت جدي صايرين بصف بيتنا حايط على الحايط .
غنيه ـ ها شبعتي ما بعتي شوفيني
عصماء ـ مسجلته بالدفتر وعن الحلال والحرام ترة انطيت لـ مريومه صبغ أظافر
ـ اخ منج ولج امها موصيتني لاتبيعن الها شلون بيج تاليتنا المحل كسر وخساره من وراج عوفيلي البنات اخ من گلبج شكد رهيف عليهن
ـ يمه خطيه صغار وهالنواعم لعد المن صانعينها والمن احنه جايبينها وعارضينها لمحل غير لمريومه وربعها .
ـ اي يمه ميخالف مره مرتين مو هيج يتعودن عليج
ـ ميخالف خل يتعودن أصلاً كلت أذا أنوب نروح نتسوك أجيب شغلات ونواعم بنات أخلي بكارتونه بالمحل كلما تجيني وحده منهن أفرحها ولا تكولين لا.، هذا هو گلبي رهيف على البنات وأحبهن عوفيني اني وگلبي وبناتي .
ـ الله يسعدج وينطيج على گد نيتج وحبج لهل البنات يله أكوم أسوي عشه قبل لا يرجع أبوج من الزرع وأنتِ رتبي غريضات المحل هسه بالليل يجن عليج ويخبصنج طلعي كله المسواك لاتخلين والأسعار هم كتبيها على الحاجات .
ـ ماشي يمه ، راحت ورجعت گملت شغلي وصار وقت العشه وأجه ابوي واجتي بيداء من الدوره تعشينا واني مشيت لمحل واجن نسواين وبعت الحمدلله بيهن بدين بيهن لا نقدي ما يحبن الدين .
كاعده بالمحل وأصبغ بأظافري وفزيت على صوت أبويه
أسكندر ـ گافي گومي عزلي الوقت تأخر
عصماء ـ بس يابه بعد وگت هسه يله صارت بالعشره والنسوان جاي يجن يشترن .
ـ لاتراددين يا بنت گلت عزلي يعني عزلي ولشوكت تضلين كاعده والباب مفتوح عالجول لو تعلمتي الهنكمه من أمج يله .
غنيه ـ شبيك علىها شعندك تصيح
أسكندر ـ أنتِ محد دايس على ذيلج امشي منا ومنا وهيج المحل بالليل ما ينفتح من المغرب يعزل يا ويلها وسواد ليلها التكسر كلمتي وتفتحته ، خوش باب فاتحات المحل عالجول وهالشباب فايته راده ، عندي عرض سينما بيتي .
غنيه ـ بس هذا رزقنا وعايشين عليه
ـ واني ما گايل شيء رزقجن بالنهار مو بالليل هم .
ـ خلف الله عليك هاي بدال ما تكول الها رحمة الله والديج يابه وبارك الله بتعبج عافت دراستها لاجل تدفع اقساط الدورس الخصوصيه وتوصل اختها، وكل مصرف البيت طالع من هالمحل والزايده والناقصه وهسه واكف تصيح عليها ، امشي يمه عزلي شنسوي نتحمله والي البيت ما عدنا غيره .
عصماء ـ ما حجيت شيء گمت قفلت المحل من الخارج والداخل ودخلت غرفتنا ، سبحت ولكيت أمي تفرشلي فراشي عوفي يمه أني أفرش
غنيه ـ أنتِ تعبتي عشه مثل الأوادم ما تتعشين ويانا واكفه على رجليج بهل المحل وعتبي على هالثور ما تكومين تفرشين لأختج
بيداء ـ شگو رجعتي عليه هو فراش شنيراد اله اسحبي من البوفيه وفرشي ، لو الا ترجعين عليه ، ترة جاي ادرس هذا سادس مو لعب جهال عصماء من جانت سادس يا ويله يفتح حلگه ويسوي صوت بس بيداء لا عادي صوتكم واصل لـ أخر القريه .
غنيه ـ غضب على يومج ولسانج هذت تگول مسنيه وما تدرسين منو لازمج وعوفيلي هذا المهجوم
بيداء ـ هم رجعتي عليه ترى اراسل صديقاتي لا تكرهيني بعيشتي اني بدون شيء طافره روحي .
غنيه ـ خلص سگتنا گمتي تتبجين .
عصماء ـ أمي طلعت وكعدت امشط شعري وبيداء تتصور بالموبايل!! شتسوين وگت صور هسه
بيداء ـ أنوب عليه أنتِ الثانيه شگو ترى هي صوره وين عايشين بعصر الحجري .
ـ عوفي لدراسه وساتر عليج مو لصور وسوالفج أنتِ وصديقاتج أنتبهي لدراستج محد يفيدج لا صور طايره ولا صديقاتج طايرات تلحگين عليهن .
غنيه ـ لا يبوي هي بس ملتهيه بهل الصديقات ليش تكول امي وأختي ميتات علمود يجمعن اليه فلوس دورات ومصرف وروح وتعال هذا كله مو بعينج بيداء افندي ، حتى موبايل من الزينات جبتلج بس أريدج تجبيبن معدل وتريحيين گلبي .
بيداء ـ أهوو يا سالفة الموبايل الما تخلص اليسمعج يگول جابتلي أيفون أخر إصدار وهو مستعمل
غنيه ـ شتردين لعد مو زين كظبتج موبايل محد من ربعنا جايب موبايل مثله منو من بناتنا شالت موبايل بي كاميرا بس أنتِ .
ـ ترى التطور ما واصلكم وعقلهم وسخ هو موبايل شبي يعني تخافون منه وبس الزلم تشيله والنسوان ضاحكين عليهن بهل الصرصور .
ـ لما بي بلاوي محد خاف منه ، ديله درسي
ـ لا راح أنام وين تخلن واهس واحد يدرس أكلت ࢪأسي
ـ دنامي لعد ، عصماء عود خاثره مخثره اذا كعدتي صليتي شوفيها وخليها بالثلاجه نتريك ييها الصبح
ـ أن شاء الله يمه ، راحت نامت وأني نمت وبيداء ضلت كاعده تقرأ ، لنص الليل رن منبه موبايلي وبيداء صاحت بيه
ـ طفي المنبه مالتج نريد انام
ـ نامي منو لازمج ، طفيته وگمت توضيت وصليت بالهول سبحت وأستغفرت وكمت طلعت الخاثره خليتها بالثلاجه ورجعت گملت نومتي للفجر أمي كعدتنا على صلاة الفجر أني كمت وضلت بيداء متعاركه هي وأمي .
غنيه ـ شو گومي صلي ما تردين الله يوفقج مو أنتِ بشده والصلاة خط وصل بينج وبين رب العالمين يباوعلج ويسهل أمرج ليش عاله گلبي يوميه اضل اصيح شو گومي
بيداء ـ ما أكوم عوفيني منطمره يوميه فوك ࢪاسي واذا أصلي اصلي لنفسي ما الج شغل بيه عود لاتخافين ما تدخلين لجهنم بمكاني كلمن يتحاسب على ذنبه
ـ ولج يمه اني علمودج ليش هيج هامله صلاتج يوم تصلين وعشره الله ولج الله ما يباوعلج ويوفقج .
ـ يمه لخاطر الله عوفيني نوم ما شبعانه وراي دوام وصخام براسي عوفيني اني أصلي بعدين
ـ لا واصل تصلين بعدين نامي هسه بعدين أيبس العصا على جلدج اذا ما تلتزمين بصلاتج مخربطه
عصماء ـ طلعت تتوضى واني صليت وكعدت أسبح وأستغفر ودعيتلها الله يوفقها ويسهل أمرها گملت وكمت غطيتها .
بيداء ـ هم أنتِ أريـــــــد أنام
عصماء ـ لا اجيت اغطيج
ـ اي عفيه خلوني أنام والله تعبانه وراي قرايه عود الصبح اصلي
ـ ماشي يله نامي .
ـ أدعيلي بصلاتج اطلع من هالمهجوم غضب الله علينا مو سادس
ـ ماشي ، رجعت نامت واني ضليت كاعده وكمت نظفت البيت وغسلت الحوش ورشيت باب الحوش وشغلت الماطور ترست وخليت القوري عالنار وصبيت الريوك خاثر (روبه) ومربى تين ودبس ودهن حر شلت الصينيه خليتها بالطرمه واجه ابويه شايل سبحته ولاف الشماغ الاحمر وكعد وشغل الراديو يحب يسمع اغاني قديمه واجتي أمي من يم الحلال الهوايش والدجاجات وبيدها سلة البيض ، غسلت وغيرت ثوبها واجتي
غنيه ـ أبراهيم يگول اليوم لايسگي الخضرة
أسكندر ـ أدري ، صبي جاي
غنيه ـ هم أعاونك لو تشتغل وحدك
ـ اي لعد شنو شغلج وجيبي وحده وياج انظف الجوه عليها دغل وحشيش .
عصماء ـ تريگننا وهو أخذ الگرك ولبس القندره الجوبلس
ولف الشماغ والحزام وصعد المكينه مالته وراح .
غنيه ـ بيداء بيداء هاي لحد الان ما كعدت مو عدها دوام يمت تكعد أكوم اكعدها وانتِ يمه لبسي نروح نعاون ابوج يضل يصيح علينا ويفضحنا بالقريه .
عصماء ـ ماشي يمه ، گمت كملت شغلي وطبخت الغده واجني نسوان دگن الباب بعتلهن ورجعت قفلت المحل ولبست وطلعنا اني وأمي وبيداء راحت مدرستها
وصلنا الزرع ولكينا جدي وعمي أبراهيم وزوجة عمي جايين قبلنا ، بيت جدي وجديتي ما عندي بس عم واحد عمي أبراهيم وزوجته شهلاء عنده ثلاث ولد احمد وايمن وأيوب وبنيه ليلى وعمات اثنين ساجده وهاله متزوجات ...
گملنا شغل وتعبت حيل نزعت الجفوف ورحت على ماي البير غسلت واذن الظهر ومشينا للبيت واحنه نمشي بالسياره مر من يمنا ابو الخط ولمحت وياه بس طالبه وحده باوعت الساعه بموبايلي بعد وگت على الحله !! حاولت أركز مشت سريع والباقين ملتهين يحجون .
وصلنا البيت وأمي دخلت بيت جدي هي وأبويه واني رحت البيت ولكيت بيداء بالبيت من شافتني نرعبت
بيداء ـ وگعتي گلبي خفت وجهج
عصماء ـ أنتِ جنتي ويه أبو الخط مالك
ـ أي وصلني ليش
ـ بس بعد وگت
ـ لا حلينا من زمان
ـ هـــاا
ـ أي شگو هيج تباوعيلي أكو غده جوعانه .
ـ اي أكو طبخت الصبح
ـ يله صبي جوعانه
ـ ماشي عفتها بالغرفه وطلعت باوعت الشارع فارغ وين الطالبات اذا حلن غير يجن لاهلهن واني من الشارع اشوفهن كل يوم ، گلبي لعب معقوله منهزمه من المدرسه!
صبينا غده وتغدينا وسمعت هوسة وضحك بنات عرفت هسه يله حلن الطالبات ، أهلي جوعانين يأكلون ما مركزين ولا مخلين بالهم بس اني ما مرتاحه گلبي لعب گمت من الغده وفتحت الباب وشفت الطالبات صحت وحده من بنات أم سعد ثريا ثريا تعاي .
ثريا ـ ها عصماء .
عصماء ـ شوگت حليتوا
ـ قبل شويه هسه وصلنا ابو الخط
ـ ماشي عيني ، راحت ورجعت وبيداء باوعتلي حست بيه ورجع ابويه گال
أسكندر ـ شعندج گمتي من الأكل .
عصماء ـ يابا بنت أم سعد موصيتني على شغلات كالتلي من تطلع من المدرسه تمر تأخذهن .
ـ رجعي كملي غداج وأنتِ يابا بيداء شونها دراستج
بيداء ـ الحمدلله يابا زينه
ـ شدي حيلج وجيبي معدل زين
ـ ان شاء الله
عصماء ـ گام غسل وخزرني كعدت يم أمي وكامت تحجي على بيداء
غنيه ـ شعندج جايه من وگت!! والوياج هسه حلن
بيداء ـ يعني شعندي وين أولي ترى جان عدنا درس شاغر وطلعونا من وكت شوكت تبطلن اسلئتجن
ـ تعاي وين كايمه كملي غداج
ـ ما اريد تسممت
ـ وشحجيت اني بسرعه كبيتي بيه مثل أبوج ما تبطلون هالكبه نار وتشتعلون .
ـ اي نار ونشتعل
غنيه ـ لسانج هذا اكصه اذا تراددين أدبسزز، امشي غسلي المواعين خوش لاكيتلج خدامه مو مال عيني وخطيه ما ركع بالنعال على حلكج علمود تعرفين شلون تحاجين أمج .
أسكندر ـ شگو شبيجن متناكرات
غنيه ـ مو أدمي
ـ شبيج وياها مخليه ࢪاسج براسها .
ـ أي خبلها عليه فوك خبالها
ـ مو جاي تدرس شتردين منها ، أمشي درسي مـا عليج من أمج ، عصماء وين الجاي
عصماء ـ اي يابا هسه أجيبه كمت اخذتله الجاي وغسلت المواعين وبيداء دخلت نامت وامي كعدت بالطرمة تشرب جكاير يمه دعوفي ياعيني .
غنيه ـ شيبرد نار الگلب غيره ، كملي وفوتي نامي والمحل اني أفتحه لو نروح السوك شتگولين اكو كم شغله وصني عليها .
ـ لا مو هسه خل نجمع الدينات رأس الشهر نروح علمود نمر ناخذ مكياجات ومواد عنايه للبشره اريد أجيبلي كم قطعة .
ـ براحتج يمه .
ـ گملت ورحت الغرفه أي بيداء هسه نحجي براحتنا
ـ خير شعندج تكملين عليه الما گملته أمي
ـ لا ما عليه بإمي هاي بينج وبينها وقلة الاحترامات محسوبه عليج يالفيهمه وهاي أمج ، اي نجي لموضوعنا طلعتج من المدرسه قبل الطالبات وعدكم درس شاغر ما دخلت دماغي أحجي شمطلعج من المدرسه .
ـ أهوو يا طلابة الما تخلص بابا شبيج أنتِ صايره مثل أمي وأبويه لما قبل سنه جنتي طالبه وتعرفين هالشيء..
ـ أي صح جنت طالبه وگلشي أعرف بس مال اطلع قبل الطالبات هاي ما أعرفها واني وأنتِ ندري بالمديره ست مديحه شگد متشدده على الكل بس گولي نهزمتي أكولج اي ، لان اعرفج أختي تعلميني بسوالفج .
ـ وهسه شتردين
ـ شريد! شو أنتِ ما خايفه
ـ من شنو أخاف ترى طلعنا قبل الدرس الأخير وگبل أبو الخط جابني للبيت هالتحقيق هذا شوكت يخلص .
ـ جابج وليش ما أنتظر الباقيات لو عنده خدمات مجانيه
ـ اهوو عصماء فضـينا عاد
ـ شوفي بيداء يا تتنبهين لدراستج وتعوفيلي حركات المزعطه وسوالف التعبانه يا والله هسه امشي لأبوي واخليهن بأيده وتكعدين حالج من حالي تبيعين لنسواين وتتوسلين بيهن على الربع والالف .
ـ بدينا
ـ اي بدينا مو أني عفت دراستي ومستقبلي وكاعده بالمحل متحمله النسواين وكلامهن وملحتهن علمود اني وامي نجمع كم فلس ونوصلج وندخلج جامعه وأنتِ حضرة جنابج الكسيف مأخذه الوضع على حل شعرج ..
ـ خلص والله هاي أخر مره
ـ أني مـا جاي أخوفج ولا أعاقبج أني أنبهج وأحذرج وأريدج تتنبهين على دراستج ومستقبلج كدامج ينتظرج وخرابيط العمر والصديقات ما تمشي خطوه بمكانج والحياة فرصه يا نعيشها بطريق صح لو نغلط ونضل طول عمرنا طريقنا مو صح حتى لو كعدتي تصلحين تتعبين ، ليش من الأول ما توفرين على نفسج جهد وتعب وتشتغلين على نفسج ومستقبلج وأكيد الله يوفقج .
ـ أي فهمت والله شايفتني كدامج سالبه ناهبه
ـ الله يهديج ، عفتها ونمت وأعرف بيها ما تأخذ بكلامي وتريد تعيش حياتها مثل ما هي تريد مو ما أحنه نريد هي من النوع ما تحب التحكم ولا تحب واقعها حتى دراستها گوه عليها من الثالث رادت تترك بس أمي ضلت وراها ومنعتها ، لازم واحد بالعائله يطلع مخربط وبيداء شگلها راح أتعبنا وياها رغم مـا شفت شيء عنها ملموس بس مَا مرتاحه وأختي وأعرفها من جنت ادرس واعرف كل حركاتها وتصرفاتها عنوديه بشكل ما أكول غير الله يهديها ويوفقها بدراستها .
_____________________________
بيداء ـ أنا بيداء أصغر من عصماء حياتي راسمتها شيء وواقعي شيء ثاني دائماً أشوف نفسي بغير مكان بغير عالم لان ما اريد الأنتماء لأهلي على رغم حبهم وعطاءهم وحنيتهم وخوفهم وحرصهم عليه بس جنت أريد شيء ثاني شيء مختلف ، روحي تريد تكتشف عالم غير عالمنا تطور رقي لبس طلعات موبايلات تصوير صديقات عالم ما يشبه عالمنا فلاحه وتعب وكد وحالة الماديه صفر كلشي بهذا العالم اني ما أنتمي اله
أركض بهل الدنيا وناسيه نفسي وأهلي رايحه بعالم ثاني وما جنت متوقعة نهايتي تكون مأساويه !! ..
كاعده اني وياه بالسياره بس بالكشن ليورا وهو يباوعلي بالجامه بس مزعوج رجع أندار وعاگت الحواجب شبيك هيج تباوعلي شگو شصايرلك اليوم فوك ما طلعت قبل الكل .
مالك ـ مسويه فضل حضرة جنابج ترى طگت مرارتي من هالوضع كلشي يالتختل من الخامس أركض وراج واكولج يا بنت خل نتزوج وراح اجي أخطبج ، لا أصبر خل اخلص الخامس وخلصتي الخامس وبعدين بيداء وبعدين
ـ خل أخلص السادس يله
ـ شطلعت هاي ، أنوب تخلصين السادس!
ـ أي
ـ وأني أضل أنتظرج
ـ اليحب ينتظر مالك ، شسويلك ياحبيبي يعني حتى لو نفرض اجيت تقدمتلي أهلي مًا ينطوني الا اخلص دراستي بالأخص أمي راكبه ࢪاسها الا اكمل دراسه .
ـ صارلي سنتين أحبج وأريدج شكد انتظر بعد
ـ بس أدخل كليه والله تعال تقدملي بس هسه سادس ويني وين الزواج بس أتزوج اترك والله، واني واهسي بسرعه يروح انوب أنت تشغلني
ـ حبيبتي ترى هواي بنات تزوجن وهنا طالبات وگملن بيت رجالهن ودخلن جامعات ، ليش أنتِ مستصعبه الزواج .
ـ مو هيج
ـ لا هيج وأزود بعد ، بيداء گوليلي جاي تكظين وگت وياي بس تردين حب وغراميات ما تردين زواج وأستقرار
ـ هيي شدور حب وغراميات أحترم نفسك
ـ مو هيج قصدي بس تأجيلج هذا تعبني وأني احبج وأريدج يمي مو والله شلعتي گلبي ..
ـ شوف مالك مـا جابرتك تحبني وتتنظرني وشفت نفسك تعبت تكدر تروح تشوف غيري ترهملك زوجه ليش مضيع عمرك ووقتك وياي .
ـ لاتگومين تخربطين
ـ مالك وصلني البيت
ـ خل ننتظر باقي الطالباات ونولي ، أنتظري هسه يحلن
ـ وصلني البيت
ـ وجع على گيفج راح أوصلج من مصيبه صابتج
ـ وصابتك وخلصتني منك
ـ بيداء لسانج لا أكصه والله .
ـ أبتسمت وباوعتله لأتضوج حبيبي
ـ هي ضوجتي بس منج والله محد مضوجني غيرج
ـ هـا رجعت عليه دشغل السياره ووصلني البيت ومن ترجع عليهن لاتضل تباوعلهن لا أطلع عيونك والله
ـ ما مباوع بس لجهرتج الزفره
ـ ماطول جهرتي زفره شگو ساحل نفسك وراي
ـ گلبي منعول اللشه ساحلني ومبهذل أحوالي خل يخلص السادس وأجيبج يمي الا اطلع قهري كله بيج أصبريلي!
ـ ما جاوبته بس أضحك وصلني البيت سبحت وتغديت وتمددت أرتاح والجنت ما متوقعته هو شك أختي عصماء بيه كرهتني بعيشتي فوك ما اني كارهتهه بسوالف أمي الما تخلص وعصبية ابويه على أتفه الأسباب بس الواحد وين يولي واقعه ما يكدر يغيره يكعد وينجب .
طول الوقت عيونها عليه وبالأخص من الزم الموبايل وأراسل مالك تضل تباوعلي كأنما عارفه گلشي بس منتظرتني أني أحجيلها ، بس تجاهلتها لأن مالي واهس أحجيلها عن علاقتي بـ مالك أبو الخط وتضل تحجيلي حكم ومواعظ تأكل ࢪاسي بسوالفها ونصائحها
واكفه أرتب بحجابي گملت وخليت مرطب شفه وكحل ومسكارا ودخلت عصماء بأيدها حجاب الصلاة ضلت تباوعلي بشك شگو هيج تباوعين ما تبطلين نظراتج تخلين الواحد يشك بنفسه عوذه .
عصماء ـ حمرتج طوخ خففيها لايشوفج أبويه ويضل يحجي عليج مثل هذيج المره بالگوه وافق ترجعين لدروسج
ـ ترى سحريه ما تبين
ـ حتى لو وأنتِ رايحه تدرسين شله داعي المكياج
ـ بس الترتيب حلو
ـ اي رتبي محد مانعج شالي لبسج ريحتج طيبه بس مو مكياج طوخ عمي خلي بس لاتبرزين جمالج بالمكياج
ـ أهوو عصماء فوك الزفت العايشينه انوب كلامج مثل السم ، شمخليه قصص وروايات عراقية كرار صلاح لخاطر الله هي حمره سحريه وكحل دروحي شوفي البنات شيخلن والله عبالك طالعات من الصالون واكفتلي مثل الشيخ تحاسبيني اهوو دوخري
دفعتها وشلت موبايلي والملازم والجنطه وطلعت
واني طالعه لمحت أمي طالعه من بيت جدي أنطيتها ظهري احسن ما تكملها عليه كافي محاضرة عصماء
وصاحت وراي .
غنيه ـ بيداء يمه رايحه
بيداء ـ أي مو جاي تشوفيني أمشي
ـ أوكفي أنطيج مصرفج عندج لا
ـ عندي ما أريد ، تحجي واني منطيتها ظهري مشيت وشفت البنات واكفات ينتظرني لان المدرسين بعيدين نروح بالخط ، دزيتله رساله شو تأخرت
مالك ـ واكف أخلي عطر دقايق وأطلع
بيداء ـ ما يحتاج تخلي لو عمداً تريد تحرك گلبي وعطرك كلها تشتمى شگد خبيث
ـ اي عمداً لج أموت على غيرتج
ـ ديله تعال عاد مكياجي ساح من وراك
ـ والمكياج المن مخليته
ـ لنفسي .
ـ يعني مو اليه
ـ لا أنتَ شگو اخليلك مكياج
ـ عابت جهرتج الزفره الأحبها يله جايكم ..
ـ ضحگت ورفل ويانا باوعتلي وكالت
رفل ـ ضحگينا وياج منو هالسعيد الحظ الضحكج
بيداء ـ وأنتِ شگو ليش اذا اضحك الا أكو سعيد حظ يضحكني.
رفل ـ واني شحجيت شگد نفسيه
ـ رفل
رواء ـ سكتن يمعودات لاتتعاركن وأنتِ شبيج شكالتلج قابل ما تتحملين .
بيداء ـ والله اني هيج طبعي ما أتحمل لحد يثكل وياي .
رواء ـ يله سگتن رفل صمي حلگج .
بيداء ـ واكفه على أعصابي وأجه وصعدنا ردت أصعد ليكدام رفل كعدت وهو باوعلي أشرلي يعني لاتسوين مشكله أستغفرت ربي ، وكعدت ليورا وطول الطريق أباوع الشارع والبنات شلابسات والحياة اني احب حياتي مثل ما أريد هواي أحلامي وأمنيات وأشياء احب أعيشها ، أحس تفكيري مختلف عن هالناس ..
وصلنا ونزلت معصبه حتى ما باوعتله هاي كل ما اجي الدوره ارجع گوه اتحاجى، لان حياة المدينه حلوه بكل تفاصيلها لبسهن كشختهن موبايلاتهن وحبيت مالك لان عايش بالمدينه وحياته حلوة عايش ويه والدته وأخوانه وأخواته متزوجين وأبوه متوفي وشغله لازم خط يوصل طالبات القريه لمدرسه ودروس خصوصيه ، وكل ظني هو اليخلصني من واقعي المر الما حبيته ولا راح أحبه ...
خلصنا وطلعنا للبيت وصلهن واني بقيت أخر وحده لان بيتنا نهاية القريه لان عدنا زرع وفلاحه
فرغت السياره وباوعلي صديت وجهي على الجامه .
مالك ـ هم ضجتي
بيداء ـ لا ما ضايجه
ـ لا ضجتي وكلما نروح هذا وضعج گتلج خل اجي اخطبج .
ـ أهوو هم رجعنا لنفس السالفه
ـ خلص سديناها تعاي يمي ليش بعيده
ـ لا خليني بمكاني شنو ما شايفني قابل
ـ لا شايفج بس ما شبعان منج!
ـ أبتسمت
ـ وهذا المطلوب مشكلتي أعرف نقطة ضعفج
ـ شنو نقطة ضعفي بله
ـ أني وحُبي
ـ لا حبيبي غلطان اني ما عندي نقطة ضعف
ـ خبيثه
ـ مو أخبث منك يله وصلنا باي
ـ دزيلي صوره بهذن ملابسج طالعه تموتين
ـ مو شفتني شتسوي بالصوره بعد
ـ أخزنها بعقلي
ـ بطل كلاوتك ماكو صوره يله باي
ـ باي يا حماره
ـ بس حبيتني
ـ لج أنتِ شنو
ـ ضحكت ونزلت وعفتة معصب وشفت عصماء فاتحه المحل دخلت عليها من الباب ويمها نسوان وصايره هوسه هلاو
عصماء ـ هلا عيني إذا ما عندج شيء تعاي ساعديني كتبي نقوصات بينما امشيهن .
بيداء ـ شمعرفني أني
ـ مو علم الذره أفتري وشوفي شنو نقص وكتبي بعدين أني ارجع اشوف بس هسه نسوان اريد امشيهن
ـ ماشي ، اخذت الورقه والقلم واسجل عصماء هاي الحمر كوبي .
ـ سجلي ولاتضلين تلغين ، اي خاله هذا بخمسة الالف وهذا بإربعه وهذا بالفين، أسجلهن بالدين لو تدفعينهن
ـ لا أدفع
ـ ماشي عيوني خاله
بيداء ـ طلعن وكعدت هاج سجلت هالكدامي
عصماء ـ ماشي مشكوره
ـ ليش تردين تروحن السوك بعقوبه
ـ أي باجر الصبح .
ـ أروح وياجن
ـ وشعندج رايحه
ـ هيج أفتر ضوجه طاگه روحي
ـ گولي لأمي
ـ أنتِ گوليلها ما ترفضلج طلب
ـ ماگو روحه التهي بدراستح ، گومي ىدلي وسوي عشه
ـ شسوي
ـ أي شيء.
ـ عفيه عصماء سوي أنتِ
ـ مـا أكدر اعوف المحل وأمي راحت ويه أبويه منو يكعد بي والشغل بس العصريات بس يأذن اعزل .
ـ ليش ما تفتحين بالليل
ـ لأ أبويه ما يقبل
ـ وشگو عود هذا شغل شنو ما يقبل شكد نفسيه ابويه
ـ شنسويله مـا يقبل يله گومي بدلي
ـ ماشي كمت بدلت ولكيته دازلي رساله
ـ أشتاقيت
ـ عاد جذب لاتجذب توني عفتك
ـ اتصل
ـ لا
ـ ليش
ـ أختي بالبيت مو قبل شويه جنت يمك شكو الأتصال
ـ أهوو بيداء هسه شعليه بأختج
ـ ما جاوبته صاير هواي يلح ، عفت موبايلي عالشحن وشفت موبايل عصماء الصرصور بله خنشوف هم تحب لا ههه ضحكت وفتحته گلبت بي كله ارقام نسوان القريه ، عمي نيالج ما تحبين بس اني گلبي معلعل بمالك والسادس شلون أثنين يوغفون على المعده .
رحت سويت عشه وأذن المغرب وأجه أبويه من الباب نزل من المكينه ورگع الباب بكل قوته وأمي وراه دخل على عصماء گتلها داخل المحل وأمي تجر بيها وهي شگد نقهرت عليها مخنتله مثل الحمامه وأمي تفازع وجرها وضربها وياها ويصيح صوته شعلوا عفتهم ودخلت الغرفه وسديت أذاني ما أريد أسمع أي شيء .
_________
عصماء ـ تأخرن النسوان يمي والتهيت أعزل وراهن بعدني بالمحل دقايق وأعزل سمعت صوت المكينه أجه أبويه طين على ࢪأسج عصماء أنخبصت ومــا أحس غير أبويه دخل عليه مثل العاصفه وجرني ويضرب بيه يابه والله هسه أريد اعزل وگام يصيح بعـلوا صوته وأمي أجتي تفازع وضربها وياي أنقهرت عليها أكثر ما أنقهرت على روحي شليتها بالكاع وشعرها طلع وملابسها كلهن تراب وهو عصبي نار صار ورجع يحجي علينا بصوته العالي
أسكندر ـ مو گلت المحل المغربيات ما يضل مفتح اني خراع خضره بهل البيت ما تسمعين كلامي الا ادگج أنتِ وامج من انعل أبوجن لابو الحواجن بيته تف عليجن .
غنيه ـ بصياح گــــافي گــــافي محاربنا بهل المحل أنطينا فلوس الدورات مالت بنتك انطيني المصرف مالت البيت شو انت تجمعهن تصرفهن على الجكاير والعلاجات ششايفين من فلاحتك متگولي ششايفين
أسكندر ـ شتردين لعد مو معيشج أنتِ وبناتج تاكلين رأسي من صركاعه تصركعج وتخلصني منج .
غنيه ـ شمعيش من عدنا شو كظيت عمري الملم وراك متت عمر هذا عمر جبته بالعوز والهضم وعيشتنا سم وزقنبوت من وراك من ورا بطرك وعصبيتك بس كاب على الصغير والجبير تعثر بالكاع ترجع على غنيه وبناتها گبل سجاد كليته كليته جوحته بالدنيا يوميه مشاكل انت وياه سكطته مرمرته تالي أجته منيته وشال راسه ولحك جماعته وسبح وغرق وخلص منك ومن النگ مالتك مو يكولون النگ لو الفراك لو قلة أرزاق واني الاثنين جرن ؏ گلبي الأثنين ، بس عايط ليل نهار بطيت جبدي تالي ما تالي رجعت على بناتي عوفننا بحالنا ما الك شغل بينا عوفنا .
اسكندر ـ الله ياخذج أنتِ وبناتج شتردين كلها هذا وتگولي شمعيش من عدنا تردين أكعدج بقصر ام حلك الخايس عود هي معيشتنا بهل المحل وتمنن عليه والله من انعل ابوج لابو الرباج .
ـ ما ردت قصر ما ردت عساني اكعد بخيمه بس اخلص من لسانك مرمرتنا ومن يوم مات سجاد گتلك يا رجال امشي نكعد بالمدينه احنا كعدتنا بالقريه ما تفيدنا بعد وما توكل خبزه وجز گلبي منها من مات سجاد ما ضلتلي نفس أعيش بيها وهالبنات اثنين ندرسهن ونوصلهن ونعيش لا انت ركبت راسك شون تعوف الفلاحه ومن فتحت المحل اريد اعيش واوصل بناتي صرت ام حلك الخايس رحمه الله والديك ، امشي يمه امشي النا الله ابو خيمة الزركة يباوعلنا ..
عصماء ـ عافنا ودخل الأستقبال ورگع الباب وراه بقوه أمي كعدت بالكاع تبجي واني عزلت المحل وبستها من راسها كومي يمه كبي ماي على جسمح يله عيني يمه
غنيه ـ لخاطرجن متحملته هو وخبالاته
عصماء ـ گامت راحت الحمام واني رحت صليت وصبيت العشه بيداء گومي ودي العشه لابويه ، اخذته اله كاعد بالطرمة دفع الصينيه وكلب الأكل وكعد يشرب جكاير عفنا وطلعت امي من الحمام شافت الهوسه رادت تحجي بس منعناها ، وكعدنا تعشينا وكعدنا شفنا مسلسل اني وأمي وباوعتلي وگالت
غنيه ـ باجر نروح السوك نطلع على برد الوكت عود خابري أبو زينه يجينا .
عصماء ـ ماشي لفت ࢪاسها ونامت كمت للغرفه دگيت عليه وجاوبني مرحبا عمي شلونك
ابو زينه ـ هلا بنيتي عصماء الحمدلله بخير أنتوا شلونكم
ـ الحمدلله ، عمي عود الصبح تعال النا نروح السـوك نتسـوك للمحل .
ـ أن شاء الله عمي الصبح أني يمكم
ـ هذا هو عمي مع السلامه
ـ الله وياج بنيتي .
ـ أنتهى الأتصال وبيداء لازمه تلفونها أنتِ شوگت تنامين
ـ ليش شتردين مني
ـ مـا أريد منج شيء بس عوفي هالموبايل لايدخل علينا ابويه يشوفه بيدج يسولنا سالفه ستري علينا
ـ ماشي تصبحين على خير
ـ وأنتِ بخير ، نامت واني هم نمت ومن الصبح كعدت بيداء جاي تبدل تروح المدرسه وأبويه طالع وامي كاعده باب المطبخ غاسله الحوش ومنظفه وطابخه بس كعدتها بيها الف حسبه صافنه وأيدها على خدها .
غنيه ـ عصماء بنيتي تجهزي أبو زينه بالطريق جاينا
عصماء ـ اي يمه دخلت لبست جبه وعباية راس رتبت شالي وخليت مكياج خفيف ولبست جواريبي وشلت جنطتي .
بيداء ـ جنج علويه شگد حلوة طلعتي .
عصماء ـ شكراً
ـ عود جيبلي وياج نفس الكريم الأستخدمه لان خلص
ـ ماشي ، هذا مصرف
ـ فديتج
ـ أنتبهي على نفسج، يله يمه ودگ هورن اجه ابو زينه سايق متفقين وياه من زمان من يوم فتحنا المحل اي طلعه عدنا بس نخابره يجينا ورجال جبير كلبه طيب ثقينا بي الحمدلله ..
وصلنا السوك وأفترينـا أني وأمي هواي محلات وأخذنا النحتاجه وكملنا وأيدينا تملخت اخذنا عربانه وصلنا السياره ويم السياره واكف رجال منطيه ظهره يحجي هو وابو زينه .
غنيه ـ ابو زينه افتح النا الصندوك نخلي الغريضات
أبو زينه ـ أي حجيه .
عصماء ـ أنزل الأغراض من العربانه والتعب أكل جسمي وبهل الأثناء أنداريت صارت عيني بعينه لكيته صافن أبتعدت على صفحه وصفطنا الأغراض كلهن وما ضل مكان والرجال بعده واكف مره يباوعلنا مره يحجي هو وابو زينه هذا شعنده واكف خاف مأجر ابو زينه
أبو زينه ـ ها يابه خلصتن نتوكل
غنيه ـ أي حجي اتوكل يله يمه عصماء صعدي
ابو زينه ـ علي تجي وياي لو ترجع ويه جماعتك
علي نجم ـ لا خالي أروح وياك جماعتي راحوا
أبو زينه ـ خوش لعد نوصل الجماعه ونروح البيت .
عصماء ـ يحجون وشو هذا هز ࢪاسه وصعد بالصدر!! وأمي باوعتلي أستغربنا بالعاده محد يصعد ويانا لان مأجرينا خصوصي!
غنيه ـ منو هذا
عصماء ـ ما أعرف والله ورجعوا يحجون ومبين تربطهم صلة قرابه .
أبو زينه َـ خوما ابالك ترجع
علي ـ لا خالي بعد هسه باقي كم يوم أن شاء الله
ـ أي غير جو شعندك راجع من هسه
غنيه ـ اكول حجي هذا الولد يگربلك؟
أبو زينه ـ أي حجيه هذا أبن أختي علي نجم جاي من البصره لديالى جاي علينا زياره بس هو من ولد أختي حنين .
غنيه ـ أي يمه شگو هلا بيك من البصره لديالى
علي ـ بالمهلي حجيه رحمه الله والديج .
ـ ووالديك يمه .
عصماء ـ مـا اعرف ليش الجو عندي توتر ، كلما يحجي صوته بإذني ووصلنا فتح الصندوك ونزلنا فتحت باب المحل وهو گبالي انخبصت اني وعبايتي وطلعت وأخذت الأغراض من أمي وهو بالصدر كاعد أيده على حنجه يباوع لبيت ولمحل ويخطف نظراته عليه تجاهلته وعمي ابو زينه صاح عليه..
ابو زينه ـ علي انزل أبني ساعد خالتك خطيه
علي نجم ـ أي خالي تأمر
عصماء ـ نزل وشگله طويل وأسمر جنوبي وبصراوي بعد
نزل الاغراض واني وگفت بصف امي وطلعت الگروه انطيتها لأمي .
غنيه ـ الله ينطيك يمه ويحفظك لشبابك .
علي نجم ـ بالخدمه خاله ، رحمه الله والديج .
عصماء ـ صعد وعيونه بالجامه الأماميه عاكد الحواجب ومصغر عيونه نظراته عليه وأمي انطت الكروه وابو زينه گال .
ابو زينه ـ مع السلامه
غنيه ـ الله وياك حجي كثر الله خيركم .
عصماء ـ دخلنا البيت محد موجود همزين أبويه مو هنا والله لـو شايفه جان تخزينا هو بدون شيء بسرعه يگب يريد الزله علينا وعلى هالمحل .
" دخلت الحمام غسلت وجهي مصخنه نار رجعت غسلت وجهي ونفضت راسي أريد اصحح، ولكيت أمي صابه الغده وبيداء بملابسها كاعده تتغده جوعانه أبويه وين لعد .
غنيه ـ بيت جدج زعلان وشايل راسه صغير شاب مراهق
عصماء ـ ما حجينا وگملنا الغده وكبل رحت تمددت تعبانه صايره خرابه للعصر رتبت المسواك وأسترزقت الحمدلله خوش شغل ومرت أيام عاديه نفس الروتين
شغل البيت وشغل المحل .
كاعدين أني وأمي وفاتحين القاصه ونجمع ونحسب أرباح المحل ودخلت علينا بيداء وشهگت گولي ما شاء الله .
بيداء ـ ما شاء الله ما شاء الله ، من شراً حاسداً إذا حسد ، كملن گبل لا يدخل عليجن أبويه ويخمطهن
عصماء ـ يمه خاف صُدك يجينا
غنيه ـ بكيفه يخمطهن غير اطينه تعبي وتعب بنتي أجمعن فلس على فلس ويوم أخذج ونروح لبغداد ونشتري بيهن كسرة ذهب وأنتِ الثانيه شدي حيلج وراج جامعه اذا مـا جبتي معدل براسه حظ ابيعهن وادخلج أهلي بلكي يطلع براسج خير وتزيحين عني تعب السنين .
بيداء ـ الله كريم بس شو تروحن لبغداد ليش بعقوبه مو بيها صياغ لذهب شعجب الا مناك .
غنيه ـ لا أشتري من بغداد أروح على واحد عرف خوش رجال يخاف الله ويعرفني .
بيداء ـ ها يمه ها
غنيه ـ وجعا شگو عرف من كرايب أهلي .
بيداء ـ ها صدك من جنتي قبل تتسوكين من الشورجه صدك يمه شعجب ترگتي گمتي تتسوكين منا مو مناك .
غنيه ـ اي من جنت اروح الشورجه اتسوك ومره رحت السوك اني وشهله مرت عمجن ابراهيم وسلمت عليه وجنا كلما يصير عدنا فلس ناخذ منه كسرة ذهب لان عمجن وابوجن ما يخلون علينا فلس ، بس من مات أخوجن ما ضل بيه هذاك الحيل اضل افتر .
بيداء ـ عود من ترحون بغداد أخذوني وياكم ما شايفه السوك مالتها
غنيه ــ الله كريم منا لوگتها ، يله يمه عصماء ضميهن يمج وعزلي منهن للمسواك
عصماء ـ أن شاء الله يمه كمت ضميتهن وعزلت منهن للمسواك المحل ، واجه أبويه ومبين عليه دايخ أمي باوعتلي وهزت ࢪاسها
غنيه ـ شم ريحة فلوس راح يهلسني ويأخذهن لو مكينه عاطله لو اشتري كيمياوي ادري بي گلبي متعلم على سوالفه .
عصماء ـ ما حجينا گمت صبيت العشه وتعشينا وگام وشوي وصاح أمي وأجتي اخذت المفتاح من رقبتي
بيداء ـ راحن الفليسات ماكو روحة البغداد حظي وأعرفه لان كلت اروح وياجن فگر والقران فگر بنت فگر .
عصماء ـ سگتي لسانج غضب الله على يومج ، سگتنا واجتنا امي ضايجه
غنيه ـ مـو گتلجن يهلسني
بيداء ـ أخذهن ، يبووي راحن الفليسات .
غنيه ـ أخذ نصهن ، يگول المكينه عاطله وعطلت عين جدي اي والله أبتليت عمر كظيته أصلح عطلات وراك .
عصماء ـ تحجي بقهر حتى واهس بالشغل ماضل الها واني أشتغل وأبيع الحمدلله زرقنا نعمة كريم وخلص الشهر وأحتاجينا مسواك قبل رأس أستلام الرواتب لازم نتسوك وتجهزنا باجر نروح ان شاء الله
غنيه ـ عود خابري أبو زينه يجينا .
عصماء ـ أن شاء الله يمه ، گمت الغرفه وطلعت رقمه وأتصلت عليه رن مرتين وفتح خط الو السلام عليكم عمي أبو زينه .
ـ وعليكم السلام خالي أبو زينه مـا موجود وياج علي نجم !! .
شكرا لزيارتكم عالم روايات سكيرهوم
