رواية ندوب الذكريات الفصل الرابع 4 بقلم سحر السحرتي

*طارق كان عامله في قاعه متوسطه بس كأنه فرح اميره 

*هي اتغ-اظت جدا لانها بتفرح لي و الغي-ظ ركبها اكثر لما لقت فستان الفرح طارق اشتراه ورفض يأجر رمت كلمتين قدامه 

:على ايه المصاريف دي هما ساعتين انتم اولى بالفلوس 

*رد عليها رد خلاها كانت هتموت 

:الفلوس اتعملت عشان تتصرف على نادين ومش خساره فيها المهم تبقى اول اميره تلبس الفستان ممكن بعدها اي حد ثاني يلبسه انما هي لها معامله خاصه

 *فرحت قوي بالكلمتين دول وقررت اعوضه وتبقى اول ليله لينا مع بعض من اجمل ايام حياته 

*زاد اعجابي لما تطفلت وقالت

 :هاجي ابارك لكم بكره 

*رد عليها بضحكه صفراء عشان تط-ق مننا

 :معلش خليك لما نرجع احنا مسافرين نقضي شهر العسل اسبوع و مخليين بكره الصبح للقرايب هيجوا ساعه وبعدين هنسافر 

*و شها قلب الوان الطيف و طلعته على بابا 

*طبعا شفتها وهي بتكلمه و توقعت بتقول له ايه بس كنت مبسوطه تستاهل 

*بابا ادى لها اكبر من حجمها وطارق حطها في حجمها الطبيعي سالته

 :هو احنا مسافرين بجد 

*رد قال لي

 :اه كنت عاملها مفاجاه بس المستفزه دي اجبرتني اقول ... ايه رأيك 

*مفاجاه حلوه طبعا من قبل ما نشوف خلقتها واحنا ما سافرناش 

:عارف و هعوضك عن كل شيء  ... غير اني مبسوط منك انك رفضتي تقلعي الحجاب من نفسك وما رضيتيش تقلدي كل البنات اللي بتقلعه وتقول اهو يوم في العمر

بقلمي سحر السحرتي 

*كان في دماغي طبعا انن رافضه عشان ح-رام بس قلت اكسب نقطه عنده بما انه كسف مرات ابويا 

:بصراحه حسيت انك ممكن تزعل 

*لقيته فرح جدا 

:بجد يا نادين وفكرتي فيا و رفضتي عشاني 

:طبعا ليه مستغرب

 :اصل بحس ان مشاعرك دايما مش بتكون معايا 

:النهارده كل مشاعري معاك لانك بقيت حلالي

 :بجد هو ده اللي كان منعك 

:طبعا امال مفكر ايه

 *فكرت فعلا ان لازم اكسب نقط معاه عشان اعرف اعيش مبسوطه دي نصيحه ماما قبل الفرح لانها حست اني مش بحبه وقعدت تتكلم معايا

: اه يا ماما مش بحبه ولا بحب غيره بعد ما شفت الحب اللي بيذل معاكي انت وبابا

 :و هتتجوزيه ليه 

:عشان ما اسمعش كلمه عانس او كلمه اختها الصغيره اتجوزت وهي يا عيني لسه ... سمعتها قبل كده 

:عموما احنا دخلنا في الجد وما فيش مجال نرجع خصوصا ان ده هيخسرنا خالتك اللي بتحبك اسمعي بقى نصيحتي ... الراجل هيحس انك مش بتحبيه فلازم تمثلي الحب 

:و هيعرف منين

 :هيعرف يا نادين خصوصا لما تبقي معاه جوه حضنه ... رغم حبي لابوكي كنت ساعات ببقى رافضه اوقات من التعب والارهاق واوقات كنت ببقى زعلانه منه ... والحاجه دي بتخلي الراجل يتجنن فبلاش يحس ده لانه لو شعر انك رفضاه رغم حبه ليكي معاملته هتبقى وحشه والحياه لا تطاق  ....وبما انك لا بتحبيه ولا بتحبي غيره مثلي و تمثلي كويس لدرجه انك تاخدي اوسكار فيها فهمتي 

:حاضر يا ماما فهمت

 *فعلا نفذت من اول يوم بعد ما اتقفل علينا باب شفت في عينه نظرات حب وفرحه اكثر من اللي كنت بشوفها في عين بابا لمراته 

*يومها حس بالسعاده وان مشاعري كلها له مكافاه لكل حاجه حلوه عملها معايا 

*مرات بابا فكرت انها ممكن تكيدني وجت مع بابا تبارك لي الصبح مع القرايب 

*هي كانت عايزه تيجي تشوف الجهاز و تشمت اني ما قدرتش اجهز نفسي زي اي بنت 

*طارق اول لما شافها ما اتكسفش 

:هو انا مش امبارح قلت لك ان اول يوم للقريبين مننا قوي 

*وشها اصفر بقى ليمون

 :اصل عمك هو اللي اصر عشان المشوار

: كان المفروض تحفظي كرامتك و تأجلي حضورك وخصوصا اني كلمتك مباشر ... بعد كده لما تحبي تزورينا ابقي كلميني اقول لك ينفع او الوقت غير مناسب 

*وبص لبابا قبل ما يتكلم

 :اسف يا عمي كل واحد حر في بيته يستقبل الناس اللي تريحه انت طبعا مرحب بيك في اي وقت لانه بيت بنتك يبقى بيتك لكن هي ضره خالتي وانا مش ناسي ده 

*بابا ما قدرش يقول غير 

:خذ راحتك في بيتك يا ابني 

*مراته اتنرفزت 

 :ده بدل ما تقول له انا رجلي على رجلي مراتي 

*طارق بص لها بغض-ب 

 :صوتك ما يعلاش في بيتي وعايزه تمنعيه يدخل بيت بنته لمجرد انه غير مرحب بك وهو فعلا رجله هتبقى على رجل مراته اللي هي خالتي وواسكتي بقى عشان باقي الناس بتخبط لانك لو قلتي حاجه قدامهم هرد عليك برده قدامهم 

*سكتت وانا كنت سامعه الكلام ده كله من جوه و بتزيد فرحتي 

*وبعد ما قلت له مش هطلع و اقابلها خرجت وكلي فخر بيه 

*و شافت لبسي اتغ-اظت بزياده 

*كان نفسها تقوم تتفرج على الشقه طارق كبسها

: خدي طنط يا نادين و فرجيها على اوضه خالتي انما اوضه النوم دي خصوصيه ماما وخالتي بس هم اللي يتفرجوا 

*قال بصرامه :فاهمه

 :فاهمه يا حبيبي طبعا كلامك يمشي انت راجل البيت 

*لو اقول ماما وخالتي وانا راسنا طولت لفوق كم سنتيمتر و مرات بابا اللي كانت جايه تغي-ظني و تتريق على عفشي قصرت كام سنتي و خافت تتكلم طارق يديها على دماغها 

بقلمي سحر السحرتي 

*بعد ما مشيوا هي وبابا سالته قدام ماما وخالتي عشان يعرفوا ان مش انا اللي قومته عليها

: انت ليه عملت معاها كده دي عدوتنا احنا المفروض ترحب بيها في بيتك 

:اسكتي يا نادين انت ما تعرفيش حاجه خالتي ياما جت عندنا وكانت بتعيط وصعب جدا اني كنت هتدخل وقتها واجيب حقها هي بتدفع دلوقتي ثمن كل دمعه خالتي نزلتها ... غير اني فاهم ان مش من حبها فيكي جايه تبارك لا دي جايه تبخ سم-ها وكانت ضامنه ان ما حدش هيكلمها قدام ابوك فحبيت اعرفها ان لا لحد مراتي اللي بقت على اسمي واقفي عندك 

*قد ايه وقتها كبر في نظري و في نظر كل اللي قاعدين 

*سافرنا و قضينا اسبوع عسل بجد كل واحد فينا حاول يتحكم في نفسه والحلو بس اللي كان بيطلع 

*رجعنا وبدأت غيرته و عصبيته اللي بقت لا تطاق 

*ماما تحاول تتكلم معاه او خالتي ما فيش فايده وياما زعلت وسبت البيت رغم ان ماما اكدت عليا ان ده غلط بس ما كنتش ببقى طايقه ابص له 

*وفي يوم وهو بيزعق فقدت الوعي واستقبلت اسعد يوم في حياتي وانا حزينه اني هبقى ام لطفل منه 

*هو كان سعيد جدا و فاكر ان كده ضمني 

*بالرغم من اني اكدت عليه انه معاملته دي هتكرهني فيه ومهما هيكون عدد اطفالنا انا مش مضمونه لكن اللي فيه طبع مش بيتغير عكس خالتي ما فهمتني 

*مشاكله كانت غيره عميا لو سمع عن زميل اتعين جديد تعليمات في التعامل معاه 

*رغم اني معروف عني بعدم الاختلاط مع الرجاله من قبل ما اتجوزه وان الكلام معاهم على قد الشغل وبس

 *كان يجي الشغل ويسال عني ودي حاجه مهينه بالنسبه لي كان بيقول 

:بطمن ان ما فيش حد بيض-ايقك عشان اخد حقك 

:لو حد بيض-ايقني هبلغك لكن تيجي تسال انا مش عيله صغيره و بشتغل من قبل ما اتجوزك وعارف اخلاقي خلي عندك ثقه في نفسك 

*الكلمه دي كانت بتعصبه قوي بس كان لازم ارد الاهانه لما كان بيجي يسال عني 

*بصراحه عمر ايده ما اتمدت علي برغم عصبيته لكن كلامه كان كرباج بيج-رحني بيه 

*ولدت ابننا و سميته ايمن وكان فرحان قوي انه ولد 

:مبروك المره الجايه عايز بنت حلوه شبهك

 :الحمد لله على كده ربنا يقدرني واعرف اربيه 

:معناه ايه كلامك ده 

:اني تعبت قوي في الحمل والولاده ومش ناويه اكررها 

*طبعا مش ناويه اكررها عشان هتبقى منه رد عليا 

:هو انا بقول لك هاتيها بكره خدي راحتك سنه اثنتين خمسة بس اعملي حسابك هنجيب ثاني 

:نبقى نشوف الموضوع ده بعدين 

*مش هنكر انه كان بيساعدني وماما حبيبتي هي كمان كانت حنينة عليا و مقدره انها قاعده عندي ومش مخلياها محتاجه حاجه 

*مرات بابا عرفت ان اغلب الوقت ماما قاعده عندي اقترحت نسلم الشقه لصاحب البيت وناخذ منه مبلغ بدل الايجار اللي بيدفع من غير لازمه 

*وطبعا المبلغ ده هم اولى بيه *غلطه بابا انه فاتح ماما في الموضوع قدام طارق فطبعا رد عليه بحسم عشان يقفل الموضوع وما يفتحوش تاني 

:طبعا انا يشرفني استقبل خالتي البيت بيتها ...بس افرض وحصل ان ندى او نادين زعلوا هيقعدوا فين اظن انت شايف البيت ما يستحملش مراتي وحماتي واختها ... لو هتستقبلهم عندك نسلم الشقه من بكره ... وطبعا لو نادين هي اللي زعلت هتستقبلها مع خالتي  ... وفي اعتبار سلمنا الشقه تبقى فلوسها من حق خالتي في حاله حبت تأجر شقه ثانيه ولا ايه يا حمايا 

:طبعا كلامك صح 

:انا لو عندي بنت احب يكون بيت ابوها دايما مفتوح والايجار اللي بتتكلم عنه ده يعتبر جنيهات مش آلفات عشان تشيل همه بالشكل ده 

:عندك حق يا ابني استاذن

 :معلش يا عمي اعذرني ... تفهم صاحبه الفكره لما تحب تقترح تلف الفكره من جميع الجوانب مش من الجانب اللي ينفعها بس 

*بعد بابا ما مشي ماما زعلت وتقريبا عيطت طارق حضنها وفهمها وقال كده ليه 

:يا خالتي انت امي بس هو كان هياخذ الفلوس ومش هيدي لك جنيه انا كان غرضي تبقي براحتك قاعده عندي بمزاجك زعلت مني تديني بالج-زمه وتقولي غور انت و شقتك غير ان من حق ندى ونادين يفضل بيت ابوهم مفتوح ... بالرغم من اني بتمنى ان نادين تزعل هنا في بيتها 

:انت مفكر اني زعلانه عشان قلت له كده لا يا ابني انا زعلانه عشان رماني خالص ويوم ما افكر يدخل علينا و يزورنا كان عشان يرميني بره بيتي اللي عشت معاه سنين عمري كلها  ... عارف يعني ايه تحس انك ملكش لازمه 

:باسها من خدها 

:انت ما لكيش لازمه ده انا اللي مصبرني علي بنتك انت .... انا متجوزها اصلا وسيله عشان اشوفك كل يوم انت في قلبي ناسيه انك انت اللي ربتيني امي اصلا ما بتعرفش تربي 

*ضحكت : اه واضح التربيه بلسانك اللي عايزه قصه ده 

:اخص عليك يا سوسو تعالي نخرج في موعد غرامي ونسيب بنتك لوحدها هنا

: و تأكلني ايس كريم 

:ورز باللبن اللي بتحبيه كمان 

*بصيت لهم وضحكت

: بقى كده وانا وايمن ما لناش نصيب

 *طارق قال لي 

:عندك سعاد لو وافقت هناخدك معانا 

بقلمي سحر السحرتي 

*ماما حضنتني وردت 

:وانا ما استغناش عن حد منكم 

*صفاته الحلوه ما كانتش قادره تشفع له عندي لما لسانه بيطول بشكل فوق الوصف 

*بجد تعبت نفسيا وتعبت اكتر لما عرفت اني حامل كمان مره رغم اني كنت حريصه 

*حسيت بخنقه وقررت انزل الجنين