رواية لقاء مع الفراشه الفصل الثالث بقلم أميرة خيري
قررت أحكيلها كل حاجة حاسة كأني هتخنق لو ماتكلمتش
- رامي ابن خالتي واللي كان خطيبي اتخطبنا لمدة سنتي في الأول مكنتش موافقة لكني بدأت أخد عليه وأرتاح معاه كان كويس جدا في الأول أو دا اللي كان بيحاول يقنعني بيه كان في خناقات بسيطة زي أيه اتنين مخطوبين عادي لحد ما كملنا سنة وكنت للأسف حبيته،بدأ يتغير جامد وكل شوية يتحجج على ميعاد الفرح وكتب الكتاب وللأسف أكتشفت أنه مش بيصلي بدأت اتكلم معاه في الموضوع وأنصحه وهو استجاب التزم بالصلاة شوية كدا حلوين لمدة شهرين بعدين رجع تاني زي الأول بل واكتشفت أنه بيشرب سجاير وأنه كان بياخدني على قد عقلي وقعد يتأسف ويحاول يستعطفني طبعا الموضوع كان صعب حتى لو بحبه وعايزاه بس موضوع الصلاة والسجاير دا كان أهم حاجة قولته أننا ننفصل وأني مش مرتاحة حاولت وعدني أنه هيتغير وأنا خلاص هيبطل سجاير وهيرجع تاني لربنا والكلام دا ومرت أسابيع وشهور لغاية ما وصلنا ليوم كتب الكتاب وسط التجهيزات لاقيت واحدة جايالي ومش بأيد فاضية لا معاها صور واسكرينات ساعتها حقيقته كلها أتكشفت طلع بيخوني ومع مين مش واحدة لا مع خمسة والله مش عارفة كان بيوفق بينا الستة إزاي بس ماشاء الله عليه كان محترف وعارف إزاي يقسم وقته...المهم قولت يمكن بتحاول توقع بينا بس للأسف كان كلامها كله حقيقة ساعتها يوم كتب كتابي اتحول لضرب وزعيق بين أبويا وعمامي والبيه وأهله واللي كان مصر يستغفلني برضو ..بس ياستي من ساعتها وهو انقطعت كل أخباره من أخر مرة شوفته فيها ووشه مليان كدمات وجسمه مليان كدمات من محمد وعلي حبايبي اللي بهدلهوه لغاية من فترة بسيطة بدأ يرن عليا وبقى يضايقني تاني و النهاردة كلمني تاني
خدتني في حضنها وساعتها أكتشفت أن دموعي كانت بتنزل مع كل كلمة قولتها
-إنسان حقير ،معدوم الشخصية ،أعمي البصر والبصيرة الحمدلله أنه غار بعيد عنك ،أنتِ جميلة أوي يا أميرة تستاهلي كل حاجة حلوة في الدنيا وأنا متأكدة أن ربنا يكرمك قريب بإنسان يسعديك ويدواي قلبك بدل الحقير دا
مسحت دموعي بعدين قالت
-عيونك حلوة وأنت بتعيطي تعالي أصورك كدا وأنتِ قمراية
ضحكت جامد فكملت وهى بتقول
-فكك من الواد الخايب دا مايستاهلش دمعة واحدة من عيونك الحلوين دول،وربي لو رن عليكِ تاني أو ضايقك لهمسح بكرامته الأرض
-عيب عليكِ أنا عملت كدا من غير أي حاجة ومش هيقدر يتكلم تاني
-جدعة تربيتي،الا بقولك يا أميرة بما أن محمد أخوكِ متجوز ،على مش ناوي يخطب؟
ضربت في كتفها بخفة وهى قعدت تضحك وتنادي على البنات نقعد شوية نفرفش
ـــــــــــــــــــــــــــــــــــــــــــــــــــــــــــــــــــــــــــــــــــــــــ
بعد أسبوع كنت رايحة لكافتريا المستشفي أطلب قهوة لاقيته واقف بيتكلم مع دكتورة تقريبا أول لما دخلت بصلي وهي كمان بصتلي بس نظراته كانت متغاظة تجاهلتهم ومشيت طلبت قهوة وبسكويت ليا ولرِقة وطلعت تاني ركبت الأصانصير وهو طلع على السلم بسرعة جري ،دخلت لرِقة أديهت القهوة لاقيته واقف معاها وبيشوشها بحاجة ما شاء الله عليك
أيه والسرعة واللياقة دي!
-تعالي يا أميرة
ابتسامتها بسماجة
-أخوكِ المستفز بيعمل أيه هنا
رفعت حاجبها بمكر
-جاي يطمن على حبيبته
-نعم!
-أيه جاي يطمن عليا مش اخته تؤامه حبيبته
عدلت طرحتي وأنا برفع أيدي بربكة ورديت زي الهبلة
-أه طبعا
أيدي وقفت في لحظة وبصتلها بعيونة بتضيق بإدراك
-لحظة أنتِ بتستهبليني
ضحكت بصوت عالي فلقيته بيبصلها بغضب بعدين بصلي فملامحه رقت وعيونه ارتاحت وابتسم ومشي قبل ما يبصلها تاني بتحذير
-أخويا حلو أوي يا أميرة
-يا سلام
-وكمان محترم ومتربي وكيوت وعيونه حلوة ووسيم والبنات بتجري
-يا حبيبي!
-شوفتي حتى أنتِ حبيته أهو
ناديتها بعصبية خفيفة
-رِقة!
قرصتني من خدودي الاتنين
-ياتي قمر وأنتِ متعصبة..كيوت!
-زي أخوكِ كدا
-لا دا أنتِ واخدة بالك من الواد الحيلة القمر
-هتشليني
-وماله يا قمر اتجوزي الواد الأول دا خلل جمبي بعدين شوفي حالك
سببتها ومشيت بسرعة فلاقيتها ورايا تاني وبتضحك
-خلاص خلاص هسكت
خدت نفس عميق بعدين قولت
-ما تفتحيش الموضوع دا تاني
-عيوني يا قمر
ضحكت على ريأكشن وشها
-طيب يلا قدامي الحالات زمانها فحمت
-يا سلام كل اللي تؤمري بيها يا ميرو يا مرمر يا أمورة
-والله أنتِ نكتة
بصتي بأنبهار
-اومال لو شوفتي يُونس حبيب قلبي خفة دم وفرفشة وهيضحكك على فكرة،وقمر وبسُكر كمان
ضحكت باستسلام
-رِقة
حركت أيديها قدام بقها وكأنها بتقفله
-اتخرست رِقة اتخرست
-يلا ياخرسة هانم
روحنا ووزعنا الحالات واشتغلنا طول اليوم واللي ماخلصتش فيه من رغي رِقة ومميزات سي يُونس..يارب عفوك..منك لله يا رامي.
-طب بزمتك مش شكله كوتي خالص وهو بيجيبلنا الأكل ،حمش كدا مش عايزانا نتعب أد،أخويا الراجل السبع الجامد.
-كوتي وحمش!
يارب يسمعك ويجي يشدك من شعرك كدا ويريحك منه
-بصي يا رِقة قلبي هو راح يجبلك أكلك أكل ليكِ أنتِ بس وأنا مش مسؤلة منه عشان يروح ويجبلي أكل ويصرف عليا أنا مش مشلولة فهمتي يا قطة
-بس أخو القطة مافهمش
لفيت بابتسامة مستفزة
فلاقيته واقف وفي أيده الأكل والأيد التانية في جيبة مش عارفة أيه التناكة دي
-ولا عمره هيفهم
سيبتهم وروحت لشهد كانت مستنياني في الجنينة ومعاها الأكل،قعدت جمبها وبدأت أكل بشراهة غير طبيعية
-هيشلوني يا شهد
مدت أيديها بالعصير
-خدي بس روقي على قلبي
-مابيبطلش ينط في كل حتة
-أرنب يعني
-بيظهر في كل حتة
-شبح يعني
-وقال أيه دمه خفيف!
-هيضحكك يعني..طب والله لذيذ كملي كملي
بصتلها بتريقة
- حمش أوي يا شهد
-حلو دا..ابننا راجل يعني
دخلت في السندوتش التالت
-دا بتقول عليه كوتي يا شهد
-ومالو هيبقي كتكوتك يعني
-يع..يُونس كتكوت...فين باقي السندوتشات يا شهد؟
-لا بقولك أيه يا حبيبتي أنتِ عمالة تكلي من الصبح كل الكل وأنا سكتالك وبع...
-جعانة يا شهد وعايزة أعيط..منك لله يا رامي
-يا حبيبة قلبي احلي سندوتش كبدة على قلبك
قطمت قطمة كبير من السندوتش
-أنا حزينة يا شهد
- ياكبدي يابنتي
-أنا جعانة أوي
حرفيا كانت بتشد في شعرها
-تعالي كوليني بالله
عيوني دمعت
-أنتِ زهقت مني
-أنا مت خلاص
-منك لله يا رامي يا ابن خالتي
دموعي نزلت وأنا باخد العصير بتاعها من أيدها
-لا بجد أنا زعلانة أوي
قعدت جمبي بعد ما كانت وقفت مسحتلي دموعي وقالت
-طيب مضايقة من أيه طيب
-منه
-طب وهو عاملك أيه
-عمل كتير أوي يا شهد ..دا بيوقعني فيه
-ووقعتي ؟
-لا بس على وشك
-طيب وأيه المشكلة
-المشكلة أن قلبي بدأ يميل والمشكلة اللي بجد أني مش عايزة أحبه..أنا خايفة يا شهد بل مرعوبة ،من ساعة اللي حصل وأنا رابطة على قلبك ماسكة عليه جامد ركزت في شغلي والموضوع دا شايلاها من دماغي..منك لله يا رامي عقدتني من الرجالة كلهم
- طب ماتديله فرصة
-بقولك خايفة تقوليلي أديله فرصة
-يعني الواد بيحبك من زمان وعايشة على ذكرياتك وكان بيبكي عليكِ من سنين وبقي يظهرلك ويحاول يلفت نظرك دا مايخليكش تديله فرصة
-مش يمكن كنت بالنسباله تحدي صعب وعايز يكسب بيه
-أميرة ماتبقيش غبية تحدي أيه ونيلة أيه بقولك رِقة حكتلي كل حاجة دا حتى...
سكتت شوية
-أيه في أيه؟
-لا مش هقدر أقول رِقة قولتي ماقوليش لحد خصوصا أنتِ
-شهد أنتِ قلقتيني
-مفيش
-شهد
-طيب بصي ماتتعصبيش
-ها اشجيني
-فاكرة لما دكتور محمد قالك أن كان في مشكلة في النقل بتاعك وأنتِ جيتِ بدل حد تاني؟
بصتلها بترقب وأنا ضغطي بدأ يرتفع
-ايوة بقى
-ووقتها يُونس كانت شكله غريب كدا ومضايق ،طلع أبوه دكتور محمد كان مبهدله ومتخانق معاه....
سكت شوية
-كملي
غمضت عيونها جامد وحطت أيديها على وشها وقالت بسرعة
-يُونس هو اللي بدل ورقك عشان تيجي هنا
فضلت بصالها دقيقتين يستوعب
-يُونس مين
-يُونس بتاعنا الكوتي..السبع
سبتها وودخلت بسرعة وناديت لرِقة
-رني على أخوكِ خليه يجي حالا
-أيوة بقى هتعترفيله بحبك وكدا
-رِقة أنا مش فاضية للهري دا رني عليه حالا
اتخضت من عصبيتي اللي أول مرة تظهر قدامها
ورنت على يُونس بزعل دقيقتين وجه
-أيه يا رِقة في حا..
وقفت قصاده وكأنت أول مرة أتعصب جامد كدا
-مفيش حاجة غير أن عايزة أقولك إزاي تدخل في حياتي كدا يا دكتور،مين أدالك الحق أنك تتحكم في شغلي وحياتي من غير ما يكون ليك دخل ولا صفة
-أهدي بس
-أنت فاكر نفسك مين ؟ أنت مين أصلا ؟ تعرف عني أيه بحب أيه بكره أيه؟
مجرد واحدة شوفتها زمان عجبتك حبيت تتحكم فيها وتمشيها على مزاجك وكيفك؟
تظهرلها في كل مكان وتضايقها وكمان تبعت أختك تقنعك بيها
-أنا مكنش قصدي اللي فهمتيه
بصلي بنظرة غريبة وحزن عميق
-مبقتش فارقة لو سمحت ملكش علاقة بيا ولا بعيلتي ولا أيه حاجة تخصني أنتَ فاهم
-اسمعيني بس يا أميرة
-دكتورة أميرة وياريت يكون فيه حدود أكتر من كدا وتنساني ولا اقولك أنا همشي من المخروبة دي وأريح قلبي
طلعت من الأوضة وخدت إذن من دكتور محمد وخرجت روحت السكن دخلت أوضتي وقعدت أعيط كتير أوي مش عارفة ليه حاسة كأن روحي بتتسحب مني فيه حرقان في صدري، معرفش بعيط علي أيه بالظبط لكني كنت مضايقة جداً شوية وقومت غيرت هدومي وصليت لاقيت شهد ورِقة رنوا عليا كتير قفلت الموبايل ونمت على السرير وأنا حاسة راسي هتتفرتك من الصداع.........
شكرا لزيارتكم عالم روايات سكيرهوم
