رواية قصة وجدان الفصل الرابع 4 بقلم انين الليل

الخوف سيطر علينه واحنه نشوف اختنا راح تنكتل وما نكدر نسوي شي خصوصا وايمن ما اتحمل كلام

بيت ابو ناصر وابنه

وقررو يقتلون نظيمه لكن ابوي كله عوفنا يومين خلي الناس بعد تلومنا حتى من يعاتبني السيد والشيوخ اكللهم الناس

صارت تعايرني بيها وهيه ما طالعه بيوم الاجتكم لا صار يومين ندور عليها واخوها فار دمه وقتلها

لذلك غنيه كتبت الورقه وانطتها الاخوي حسين يدزها الخالتي

انا بالبدايه ما اعرف شنو كتبت بيها لكن بعدين عرفت غنيه طلبت من خالتي تروح للولد الي يحب نظيمه

وتگله خلي باجر يدز اهله يخطبوها لان ابوي موافق

ام احسان // شلون هيج اتصرفت

• لان عرفت اذا نظيمه ما تنخطب وتتزوج راح تجني على نفسها وابوي راح يكتلها فسوت هالشكل

حتى يجي الولد يخطبها وحتى ما تجني علينه

ام احسان // انتي مو كلتي ابوج ما موافق ع الولد

• اي بس من يجي هالمره اكيد يوافق حتى يبين للناس انو بته ما بيها شي

• وشصار بعدين ؟

   من راح حسين ورجع كلنه انطيت الورقه الخالتي وهو راسا رجع ما انتظر الرد لان يخاف من ابوي يساله ولان ابوي

بذاك الوكت صار انسان ثاني يتراولنه اي وحده من عدنا يلزمها يكتلها خلاص حتى يشفي غليله

ام احسان // دادا هو هم حقه اختج غلطت

اتحسرت //. اي غلطت

• وشصار تالي ؟

• بقينا نترقب خو غنيه مرتبكه وتقلم اضافيرها باسنانها من الخوف وما تعرف خالتي راحت للناس لو بقت ما ندري بس الظاهر

اخوي حسين مسولف الها بسرعه على الي صار والي سوته عمتي وانا كاعده بزاويه ولامه رجليه على جسمي واترقب كل حركه

والليل كله ما نمنا رغم التعب والخوف اتصوري ابوي وايمن نامو بالهول لان ابوي يكول

خاف اروح للغرفه وينهزمن

وحسين بقى كاعد ع الدرج خاف يرحون يكتلون نظيمه

• هلكد ايحبها ؟

امي هزت راسها وهي تتذكر // اي لان هيه ربته وجانت تاخذه للطبيب

• ليش هو شبي

   • دووم مريض وشفتي لحد هسه هو ضعيف وصحته على گده من غير لمن هو زغير سويناله عمليه وصار

يمشي على عكازه

• شفته احسان يگلي خوش ولد

• اي حسين حباب وحنين

•. وشصار نجاة

امي بابتسامه // يمعوده قصه ما بيها فايده

•. لا دادا كملي شصار بعدين

• ثاني يوم الصبح طلع ايمن وجاب صمون وابوي كال الامي:سويلي جاي خلي اتسمم

امي خايفه ويمكن عيونها عمن من گد ما بجت وما تكدر تحجي ولا تدا فع راحت سوت الجاي وجابته الابوي هو وايمن

صارو ياكلون بعدها ابوي گللها // وكلي بناتج وانتي اكلي بس ذيج العايقه اليوصل الها ارمي

ام احسان // زين ام هشام انتي مو اخوج الچبير ناظم بهاي الاحداث هو وين

  ناظم بوكتها جان مسافر وزوجته عد اهلها

  ام احسان // • وتالي شصار

   بقينه ناكل واحنه خايفات وغنيه صارت اتطمن باامي

  • يمه ماكو شي لاتهتميين محد راح يحاجي نظيمه

  امي وهي تبچي // شلون محد ايحاچيها شوفيهم شلون متحلفين بيها

    غنيه // ما عليج فورة دم من وره الحيه اخت ابوي اهم شي احمي بتج بس اليوم

  امي بدون حيله // شلون احميها ما شفتيني محتاره حتى انتن اخاف عليچن

غنيه هزت راسها // اي ابقي انتي وحسين يم الدرج وشوفي هسه تنحل

رفعت اديها للسما // الله يسمع منج بعد ما بيه حييل هالچلبه عليمن سوت هيج

غنيه بدون اهتمام // يمه ما تريد حاتم قابل گوه

  هزت راسها // ادري افتهمن مو كل البنات ماخذات على.راده شسويلچن ياريت ظالين بالعشاير ولا صار

هذاالصار بينه عود كلت نجي اهنا ونرتاح تالي خوش سوت بيه نظيمه وعمتچن

غنيه //. يمه ان شاالله تنحل

ان شاالله

     اتقربت من امي // يمه ونظيمه شلون بيها

   • حسين غافل ابوج وصعد حاچاها گلتله نايمه

وصارت تبجي اتقربت منها غنيه وهيه حاضنتها // يمه بس هالصبحيه احميها

  • راح اودي حسين على خالج كاظم

  غنيه // يمه جاي اكلج ديري بالج على نظيمه تكولين اودي على خالج كاظم عايزين فضايح

  • چا شسوي من حلاة روحي

• جاي اكلج ان شاالله تنحل بس اصبري

امي راحت يم ابوي الي كل ساع وعض ايده وهو يتحلف بينه وب امي ويكللها // هاي تربيتج بس اشيل اله اذبح نظيمه

وهذني اذا ما اكتلهن ازوجهن الاي واحد مسودن شايب وانتي اشمرج شمرة الجلب

امي ساكته ما ترد وانا خايفه ويتهيا الي اشياء تخوف بس اشوف غنيه ما مهتمه ذاك الاهتمام اسالها تكلي بعدين تعرفين

المهم خالتي راحت للناس وفهمتهم انو ابوها وافق وخلي تجي النسوان ويتفاهمن على امور الخطبه والمقدم والمؤخر

وابوها بس اليوم موجود. راح يروح شهر معايشه ولازم اليوم يجون لا يغير رايه

ام احسان // عفيه زين سوت والناس اجوي

هزت راسها // اي اجن واتفاجئنا كلنه لمن العصر اندك الباب وراح حسين ورجع كل الامي نسوان رايداتج

امي كالتله // اتوازيت كتلهن اهنا

ابوي // اطلعي شوفيهن شيردن اكيد جايات يستفسرن على بتج الطولت ركبت ابوها

حسين جاوبه // بويه نسوان مو من منطقتنا كالن نريد امك حتى مبدلات وشلونهم

   غنيه طلعت من الغرفه وكالت لحسين كدام ابوي // فوت دخلهن للديوانيه شنو واكفات بالباب

  امي غسلت وجهها واجت للغرفه لان غنيه اشرت الها واتقربت منها وشاورتها

    • يمه رحبي بيهن وابقي يمهن لا تطلعيين تره ذولا اهل عاطف

امي باوعت الغنيه وصارت ترجف عبالك سعفه بين الخوف وبين الفرحه

   غنيه ابتسمت // تره. فهمت خالتي تروح وتكللهم ابوها موافق

امي صارت تضرب على خدها // ولچ ابوچ يمته موافق ولج سويتي مصيبه احنه عايزين هسه يموتج

  • ادري يمه بس صدكي ابوي راح يوافق وانتي هم اثكلي عليهن

  هزت ايدها // شثكل من وره عمتج والسوته علوا ياخذونها اليوم

• لا يمه احجي وياهن وكليلهن احنه ما نلكى احسن منكم سالنه عليكم وانا قنعت الحجي وهو قبل

امي //. ياهو الحجي ؟

  غنيه //. يمه ركزي الحجي رجلج ابوي هذا الكاعد يريد ايكتلنه

  امي سالتها // وابوج اذا عرف ؟

  غنيه // لا تكليله خلي يطلعن ويوصلن بيتهن واحجي ويا كليله بتك لو بيها شي ما دز النسوان

هسه يكلج اي دز النسوان لان جانت عنده

انتي كليله لا انا خابرت اختي وكتلها تروح اتكللهم ابوها راضي

امي // ولج غير يجرم بيه

   غنيه هزت راسها // ما يحاچيج بالعكس اصلا راح يوافق وشوفي

• شلون يوافق ما تشوفينه عيونه براسه

• من وره حجي اخته وابو ناصر انتي فهمي كليله خابرت ام فلاح وگتلهم الحجي سال عليكم وطلعتو والنعم منكم وهو قبل

وراحت امي وحسين راح جاب عصير هديه خلته بكلاصات وحسين اخذه وابوي يتافاف وكل شويه يحجي

ويه حسين // شوفهن ما راحن شعدهن شيردن

وحسين ايكله بعدهن لمن ما اجت امي وهيه خايفه وغنيه اشرت براسها يعني احجي

امي //. ابو ناظم

  • ها ذني شيردن جايات ينشدن على بتج ويامن مهزومه

  • صلي ع النبي يارجال النسوان جايات يخطبن بتك

     ابوي گعد على حيله وهو يخزر بامي // منين ذوله وليش ما صحتيني

   • عليمن اصيحك نسوان مو زلم ذوله اهل عاطف

   • هلا هلا وداهن مو ( وكف على حيله ) اله اذبحها

امي لزمت بي من رجلينه // لا حميد انا خابرت ام فلاح اتكللهم ابوها قابل وهو سال عليكم وگلوله خوش

ناس واتشرف بيهم

  ابوي شويه هدأ // وانتي ليش هالشكل تسوين ؟

• ردت اتاكد اذا بتك اذا بتك انهزمت وراحت الهم وسوى. ياها شي مو زين ما راح يجي بس اذا طلعت

رايحه الخالتها يعني بتك بريئه ما رادت ابن عمتها وخافت تكبرها وراحت الخالتها وهلشفتها گدام الناس

رضت تاخذ ابن عمتها بس كون انت تسامحها واختك ما قبلت وما قصرت صارت بيت يصدها وبيت

يردها فضحتنا على كل السان

•وشكالن النسوان ؟

• اتشكرن وكالن نتاني منكم خبر يمته تجي الزلم

ابوي // باجر باجر خليهم يجون باجر

امي بفرح // صار باجر باجر

• وعلوا ياخذونها بنفس اليوم

  امي هزت راسها // لا عليش ياخذونها بنفس اليوم بتنا ذهب صافي براحتهم بس انا افهمهم ابوها ما يقبل طبه وطلعه

كملو شغلكم واخذو مرتكم

منصارت الدنيا مغرب وابوي صلى وانا اشوف الفرحه بوجهه لكن بعده حزين ومقهور

ومن كمل صلا اجه ايمن وابوي كله وهو يباوع الامي ايمن نفخ وكال // واختك راح تسكت

•...هيه والنعال السكتت والما سكتت

• بويه بس الناس

امي // شتريد ايمن تكتل اختك وهيه ما مسويه شي بس حتى ترضي عمتك

  ايمن //. يمه شنو هالكلام هذا

• هو هذا الكلام شني ماادري انت تريد بيداء تره كل شي اعرف

ابوي رفع ايده // اوكفي شني شني

• اي مثل ماسمعت ابنك يريد بت اختك وهو وياها علاقة حب رسايل ودخله وطبه وبعد اكيد ما راح ينطونها

لان اختك ما تاخذ بتي الابنها هل ايريد يكتل بتك حتى يرضي عمته

  ايمن // لا متوهمه شنو يمه انتي راضيه ع السوته بتج

• بتي ما سوت شي وعمتكم من زمان تكرهني وشنو عبالك هي تريد وحده من بناتي الابنها لا حباب لو تثالث الدنيا

   ما تاخذ بت من بناتي بس حاتم جبرها وحتى لو تاخذها شهرين وتطلكها

  ايمن // ها يعني يمه انتي راضيه على سواية بتج

امي هزت راسها // لا ليش الجذب ما قابله بس ما طول هيه راحت البيت خالتها هذا هو خلوها تتزوج وتنستر

وتروح الحال سبيلها بدل ما ننفضح والفضل العمتك من بيت البيت تمشي وتحجي

رحت الصبح وما لگيت بتهم ما ادري وين شارده تالي لصمجوها كالو جانت عد خالتها عاد خلوها تمشي على عين الناس

ما دام الولد شاريها وعايلته زينه وابن اوادم وهلشفتو بعينكم حجي ناصر من وره ام حاتم شكال حتى انا ما اخذها

وهو رجلينه متسرسحات للگبر

وثاني يوم اجو اهل عاطف وجاب جاهه وشيوخ وابوي حضر اقاربنه ومن ضمنهم حجي ناصر واولاده

وتمت الخطبه والعقد وقبل ما يجون كلنه ما نمنا ولا شفنا الراحه خفنا خاف يسمعون حجي

منا منا ويبطلون

ام احسان // واتزوجت ؟

  • اي اتزوجت وره عشر تيام واذكر بيوم العرس ابوي لزمها وكللها

بيج بخت واجو خطبو وعقدو تره انا ابالي اذا بطلو اخذج واذبحج اسمعيني وكلامي خلي ترچيه بااذنج لو شيسوي بيج

هوه واهله ديري بالج تفكرين تجيين زعلانه تره صدكي الما سويته اسوي ومن تردين تجينه زياره تعاي بالوكت الي

انا ما موجود وممنوع اتباتين تجين صبحيه وترحين افتهمتي

واتزوجت نظيمه وبعدها امي قنعت ابوي نرجع للمدرسه وانا واختي شايلين البيت وندرس رغم مو هلكد شاطرات

بس شنسوي معبراتها

• يعني ابوج ما بطلجن ؟

• لا بعد الي صار جان يتمنى نحصل شهايد

• ايي لعد لويش ما كملتي

• حظي وقسمتي

• شلون ؟

• غنيه دخلت معهد تمريض من الثالث المتوسط رغم كل اقاربنا اعترضو على دخولها لكن الوحيد الي وافق ابوي

وشجعها حتى شكم مره ايمن تعارك ويه ابوي بس حتى ما تداوم لان يسمع حجي لكن ابوي جاوبه بالحرف الواحد

عاجبك عاجبك ما عاجبك طك راسك بالحايط

ام احسان // وليش ابوج هالشكل صار

• بعدين عرفت انو بسبب اقاربنا

• بسبب اقاربكم شلون ؟

من وره كلام عمتي وكلام حجي ناصر

ام احسان //اووف وشصار

• ما صار شي من تزوجت نظيمه وشاف رجلها زين وياها وهيه مرتاحه ابوي بدا يهدا ويفكر بينه خصوصا وامي

تحجي وتكله // شوف الناس الغربه سترو بتك واختك فضحتنا وكرايبك محد وكف ويانه

لذلك ابوي حتى من اجه

حجي ناصر وابنه على اعتبار هو الكبير من اقاربنا وبلغه انو هو ما يقبل غنيه تشتغل بمستشفى

ابوي رد علي

• انتم ما عليكم بناتي وبكيفي وين ما يتوظفن بكيفهن

حجي ناصر // بس ما وارده عدنا. بنيه تشتغل بمستشفى وتبات بره

ابوي جاوبه // انتم ما وارده عدكم انا وارده عدي

• ليش انت مو من عدنا قابل انت غريب

ابوي باستهزاء // انا من عدكم اذا اكو فصل طلابه بس غير شي لا ،

• شنو هالحچي ابو ناظم

• اي هذا الحجي

• من يمته

• من لمن كتلك بتي ما مسويه شي كتلتها وخافت راحت الخالتها واذا ما مصدك اخذها الواحد من ولدك انت جاوبتني

محد يقبل ياخذ من بناتك وره ما فضحتك اختك حتى انا الشايب ما اقبل اخذ وحده منهن سمعتو كلام مره وصدكتوها

لان بيها فضيحه وانا محد سمع كلمتي امشي وتتشاورون عليه ردتو اذبح بتي وهي ما مسويه شي بس حتى تتفرجون

وتحجون شي صار وشي ما صار

—• بس

قاطعه ابوي • بس شنو ابو ناصر بناتي وعايلتي محد اله غرض بيهن تريدون اكتبو بيه بروه من العشيره

ومن وكتها ابوي ابتعد تقريبا عن اقاربنه وباع البيت واشترى بيت بمنطقه شويه بعيده عن منطقتنا القديمه

    • ليش ؟

     — ما اعرف بس البيت جديد والمنطقه حلوه وهادئه وانا انتقلت المدرسه ثانيه وهناك اتعرفت على بنات

  جدد بيهن اكبر مني وبيهن ازغر مني وبعمري

وبذاك الوقت صحيح كعدنا ابيت جديد والمنطقه حلوه وهادئه لكن بنفس الوقت صار التشدد اكثر علينه هلمره مو من

ابوي لا من امي صارت تخاف يمكن من الي سوته نظيمه فصرنا نهائيا ما نطلع يعني من البيت للمدرسه وبالعكس

وصار دوامي هو المتنفس الوحيد لان كنت اقضي بي اوقات حلوه ويه صديقاتي لكن سرعان ما انزويت عنهن

ام احسان // ليش ؟

• حالهن حال البنات كل همهن هذا باوعلي وهذا غمزلي وذاك شمرلي رقم واليوم وره الدوام راح اقابل حبيبي

وكل سوالفهن بهذا الشي

  • وانتي نجاة ؟

   هزت راسها // انا شنو ؟

ام احسان // انتي وحتى اني بذاك العمر حالنه حال البنات نتمنى نسمع كلمت غزل او نسوي علاقه

  • اي صحيح وهذا الشي خلاني انزوي اكثر

  • )شلون تنزوين

• يعني مره سمعت اثنين يمشون وراي واحد ايكله اول مره اشوف يابانيه شعرها مكنكر

ويرد علي صاحبه والرشاقه فد شي معصجله عبالك ما تاكل

ومن حليت اشوف الشباب يم المدرسه ومن شافوني واحد كال هاي تشبه الممثله لبلبه

هذا الشي خلاني احس بنفسي مو حلوه ولا مرغوبه عكس امي واختي نظيمه الي ايگللي يوم عن يوم تحلين

اكثر بس لو شويه اتسمنين لان بوقتها الناس تحب البنيه تكون شويه سمينه خصوصا وجهها

ام احسان تبتسم // ااي صحيح

• تتذكرين اكثر البنات ياخذن حبوب الدكسن بس حتى ايسمنن وانا بقيت على حالي ونفس شكلي

لان كل شي محسوب علينه وامي كانت تراقبنا من نطلع للمدرسه خاف مخليه شي الوجهي

كل هذا خوف من ابوي ومن ايمن الي اتغير اتجاهنا بعد ان عمتي رفضت تنطي بنتها

ام احسان // هاي عمتج شلتو وما افتكيتو منها

•. لا هيه ابتعدت عنه فتره وبعدين راح الها ابوي واتصالحو بعد ان ابنها خطب واتزوج

باوعت ام احسان الامي // نجاة والحب

• ياحب هذا ؟

• يعني احنه البنات لازم ايصادفنه اعجاب وحب

• هههههه والله بطرانه

• يعني اكو

   تنفست بقوه • بيوم جابولنه للمدرسه مدرس فنيه وكانت بنيه ويانه بالصف كالت هوه صديق ابوها وهو فنان

اتصورته رجال چبير بالعمر وعده سكسوكه بوجهه او مخلي بحلكه من هذا الي يخلونه الفنانيين الي نشوفهم بالتلفزيون

ومن كالت فنان عرفت انو يااما يكون عازف على احد الالات الموسيقيه او يكون مطرب

والكل اتفاجا من دخل النه واخذنه اول حصه چان عمره تقريبا تلاثين سنه او يمكن اقل چان انيق بشكل

وم مبين مغرور

والبنات حاولن ان يتقربن منه بشكل او بااخر الا انا بقيت برحلتي وما اهتميت لوجوده يمكن خوف من الصار او عدم ثقه

 

ام احسان //. خوف عرفنه من ابوج وامج واخوج بس عدم ثقه منين

• لان اعرف بنفسي انا مو حلوه ولابيه شي مميز واساسا خوفي من ابوي وايمن خلاني اكون مبتعده عن الجميع

اله القليلات من صديقاتي

ام احسان //. اي وشبي هذا المدرس

  امي // چان انسان جدي الى ابعد الحدود وراقي واسمه صلاح

طلب ان نحضر قصدير يكون ثخين من هذا الي نخلي للطباخات اما لونه نحاسي او فضي ونحاول ان نرسم علي

اي صوره بمخيلتنه اشوف عنده جنطه طلع منها القصدير وبدا يرسم ويحاول يطوخ باماكن الى

ان طلع لوحه حلوه وطلب منه ان نسوي مثله بالدرس القادم الي كل الطالبات ينتظرنه بفارغ الصبر

واجه الدرس بعد يومين وكلنه محضرات الرسم انا اختاريت صوره صقر وحاولت ارسمها لكن ما اجت وياي مضبوطه

وبديت اطوخ ومن اجه الاستاذ شفته جر رحله وكعد وهو يطالع رسومات الطالبات ويثني عليهن

الى ان وصل السرى اليه اخذتله الرسمه واعرف ما راح تعجبه باوع الها وباوعلي انا نزلت راسي بعدها كال

• انتي رسمج حتى الي بصف الاول ابتدائي ما يرسمه

شفت البنات وهنه ايضحكن والي ابيناتهن يتبسبسن باوعلي وكانه يريد اجابه مني

جاوبته // استاذ انا ما اعرف ارسم لان ما احب الرسم

رد // اكو واحد ما يحب الرسم

هزيت راسي // اي انا

لملم حلكه // ارجعي

رجعت المكاني وانا اشوف الطالبات كل اثنين ابيناتهن ايضحكن وهو وكف وكال

• اي انسان ما يحب الرسم هذا انسان جامد ما يعتبر عايش بالحياة لان الرسم هو يحاكي الافكار الي حوالينه

اتقرب مني وانا كاعده وكلي // هسه افتهمتي يا ...

عرفت يريد ايكلي ياغبيه او اي كلمه ثانيه وضجت من نظرات استهزاء البنات وگفت وجاوبته

• استاذ الفن مو فقط رسم كل انسان بهذا الوجود هو فنان

فتح عيونه كنوع من الاستهزاء وكلي // شلون خلي اسمع نظريتج يابروفيسوره

جاوبته رغم شكد حقدت علي بسبب استهزائه // استاذ ممكن اسالك

• اهنا انا الي اسال وانتي تجاوبين

هزيت راسي // اي سؤالي هو الدخول الجوابي

  • اسالي

• حضرتك انت خريج كليه فنون جميله مو صحيح

هز راسه // اي صحيح

• وقبلها انت كنت طالب مثلنه تدرس علميات وادبيات

• ايي وبعد

• يعني اكيد من لمن كنت بالاعداديه انت تكره بعض المواد وخلي نكول العلميات لان لو كنت تحبهن ممكن تكون

طبيب او صيدلاني او مهندس

• لا انا كنت احب كل المواد لكن انا شغفي بالفن هو الي خلاني اختار هذا التخصص الجميل والي مايعرفونه

ويجهلون بي هواي ناس واولهم انتي

عضيت على شفتي // • صحيح يعني حضرتك بالكليه خو مو بس درست الرسم يعني اول ما كالو جايبين مدرس فنيه

انا عبالي تعزف على آلى موسيقيه. او تغني بعدين عرفت حضرتك رسام

• انا مو بس رسام ونحات همينه واشتغل بالخزف

• حلو وانا هم صحيح اكره الرسم بس عندي هوايات فن

• مثليش ؟

• مثل احوك بالسناره وشويه اطرز وبعد اسوي اعمال فنيه من النمنم والبلك

    -ها !

• اي استاذ وعندي فكره اسوي العاب اطفال

• هاي كلها

• اي كلها

رجع وصل الاول رحله بالسطر الوسط وضرب على الرحله والطالبات الكل باوعن اله گال

• انتبهن. الدرس القادم راح انشوف اعمال شنو اسمج

الطالبات قبل ما اجاوب ردن نجاة

    • نجاة خلي نشوف اعمالها تكول تسوي العاب وتحوك سناره

گامت طالبه وسالته // يعني استاذ بس نجاة احنه ما نجيب

• لا الكل تجيب دفتر رسم والوان

وصارن يجن يمه بس حتى يسالنه

ام احسان //يعني انتي تعرفين تحوكين

• ايي اعرف قبل بس هسه نسيت او يمكن اذا ابلش اجيب سناره وخيوط يمكن ارجع اعرف

ياا بعددهالعمر

•اكلج خوله انتي دختي

• لا الله عليج كملي

• شكمل يمعوده سوالف قديمه

- الله عليج نجاة عمرنا ما كعدنا هالشكل

• امري ال الله اخذت الحياكه وياي كنت باديه اسوي وجه كوشايه واخذت البلك وكرات نايلون وصمغ وكانت

عدنا الحصه الرابعه بالفرصه اجني البنات وسالني ها شنو جبتي الاعمال الفنيه

جاوبتهن اي جبتهن

وراويتهن حسب طلبهن وبعدين ضميتهن بالجنطه بالجيب الثاني وطلعت للحانوت اشتري

وبالحصه الرابعه اجانه استاذ صلاح وبمجرد ما اجه للصف طلب من الطالبات وانا وحده منهن ان نطلع دفاتر الرسم

وصار يرسم جره على السبوره بالطباشير وبعدها لزم ورقه وصار يرسم بقلم الرصاص ويبين بيها شلون نظلل

اماكن غامقه واماكن فاتحه وطلب من عدنا ان نبدي نرسم وصرنا نرسم الى ان اجه واتقرب مني وسالتي

• جايبه الاعمال ؟

انا ابتسمت بهدوء وهزيت راسي بثقه وجاوبته // نعم استاذ ،

- طلعيهن خلي اشوفهن

فتحت الجنطه واتفاجات انو الاعمال ما موجودات انا خالتهن بعلاكه بس ماكو دورت الجنطه ماكو جاوبته والدمعه بعيني

- والله استاذ انا جبتهن وياي حتى اسال البنات

رفع حواجبه وكلي // ع شنو اسالهن

• اسالهن انا جايبتهن وهنه شافنهن

• ايي وبعدين اختفن بقدرة قادر

• است...

• اكعدي

گعدت وانا مدنكه وبوقتها اتمنيت الكاع تنشك وتبلعني لان اتفشلت حييل ودموعي ينزلن على خدي

وهو راح گعد ع الرحله وبدن الطالبات يتوافدن علي ايراونه رسمهن ما عدا انا بقيت بمكاني الى ان دك الجرس

وبالفرصه مجرد ما طلع انهاريت بالبجي اكثر وانا اگول

• اي وحده مدت ايدها واخذت اعمالي ان شاالله ياربي تنشل ايدها

طلعت ما انتظرت اي وحده ترد عليه انزويت بالساحه بمكان بعيد وصرت ابچي حييل ورجعت للبيت وانا محبطه

الى ابعد الحدود بوقتها كان تلفزيون الكويت يشتغل عدنا والبث من الصبح للساعه وحده بالليل ومن نكمل شغلنه

ودراستنا نكعد انا وغنيه نباوع ع التلفزيون بيومها ما الي خلك حتى اتابع المسلسله اتمددت بالصاله وهديه وامي كاعدات

وحسين يمهن مره يسولف مره يسكت

الى ان سمعت الممثله اتكول

- هو تحدي يااما انجح وابدع يا اما اسلم وانهزم

بقت هاي الكلمه ابالي الصبح بدلت عادي ومن طلعت امي انطتني مصرفي لكن انا جاوبتها جيبيلي خيوط وسناره وبلك

امي سالتني مو اخذتي وياج

اي بعد طلبو من عدنا وسنارتي وانا اشتغل بيها ما اعرف وين خليتها

دا اخذي المصرف وانا اجيبلج

وداومت ثاني يوم الخميس وما شفت الاستاذ برفعة العلم ومن رجعت لكيت امي جايبه كل الي وصيتها علي ومن اخذتهن گالت

شفت ام علي جارتنا وسالتني المن الخيوط وكتلها البتي وهيه هم اخذت خيوط وهواي شغلات ومن سالتها كالت البتها مديحه

سالتها // مديحه الي تشتغل موظفه بالمصرف ؟

• اي تكول هيه تحب تشتغل اعمال يدويه وحتى صارت تبيع على صديقاتها الموظفات

اتقربت من امي وحاچيتها برجاء // فدوه ماما كليلها خلي اتعلمني

  امي باستغراب //- شتعلمج ؟

• تعلمني مثل شغلها اقلها ابيعهن واستفاد هاي انتي جبتيلي شوية الخيوط والبلك وما اريد تنطيني مصرف لمدة اسبوع

• وليش كل هذا

• احب اتعلم

زين اروح واشوف

وفعلا راحت امي والبنيه گالت الها مي خالف تجي واعلمها

ىثاني يوم امي سوت جدرية حلاوة جزر اخذتها ورحت وبدت اتعلمني شغلات صدك حلوه وبيها فن وانا بسرعه اتعلمت

بيوم السبت اجه وانا ما اخذت شي وياي بس الرسم والالوان اتقرب مني وگال شنو ما جايبه اعمالج اليدويه

هزيت راسي // لا

ليش

ما جاوبته بقيت ساكته هو رد // اسمعن يا بنات الاربعاء الكل تجيب اعمال يدويه راح نسوي الصف ورشة عمل يعني

اخذ درسين او تلاثه ما اريد اعمال مشتغليها بالبيت لا اريد اشوفكم شلون تشتغلون اهنا كدامي

ومن راد يطلع دار وكال //. يابنات من تجيبون اعمالكم حافظو عليهن لا ينباكن

وثاني يوم غبت من المدرسه بس حتى احاول اسوي كل الي اتعلمته من مديحه اضافه الى الاشياء الي انا اعرفها

خليتهن بجنطه وشلتها ويه جنطت كتبي وشكد حاولن البنات ان يشوفن شنو جايبه لكن انا بقيت حاضنه الجنطه

الى ان اجه الاستاذ وطلب من عدنا

ان نجيب اعمالنه ونجي ورا وفعلا رحنا للمختبر لان مدرستنا ما كان بيها مرسم

وهناك طلب من عدنا ان نطلع اعمالنه الي جايبيها ونبدي نشتغل والنه مطلق الحريه نكعد ع الرحله او بالارض

وانا طلعت السناره ولوحة الخشب الي داكه بيها مسامير وجايبه خيوط ذهبيه امررها بيها بعد ان رسمتلي مديحه على الخشبه

اما اللوحه الثانيه والي شفت بوجهها المفاجىه انو مديحه رسمتلي عليها صورة اليس في بلاد العجائب صوره كارتونيه وانا صرت احركها بالكاويه وشاف شغلي بالسناره فصار يروح يم الطالبات ويرجع يمي وهو يباوع الي شلون اشتغل

بعدين طلب من عدنا نطلع دفتر الرسم وكل طالبه انطاها درجه وطلب ما نفتح الدفتر اله نروح للبيت ونخلي الدرجه

سر بيناتنا يعني ما وحده تراوي الصديقتها ومن وصل اخذ دفتري خلى الدرجه وكلي ضمي كلش زين

انا بذيج اللحظه اخذته وخليته بالجنطه ويه اعمالي اليدويه حسيت كاتبلي شي غير عن البنات وبس رجعت بوجهي

للغرفه وقبل ما اغير ملابسي طلعت الدفتر وقريت الي كاتبه الي

  ( راح ارسمج ياجميلتي )

من قريتها استغربت ليش بس هالشكل كاتبلي شنو راح ارسمج وشنو كلمة جميلتي

‏هذا شبي ثاني يوم داومت والبنات كل شويه تسالني شكد انطاج

جاوبتهن هو الاستاذ كال لا وحده اتعلم الثانيه بدرجتها

شذى جاوبتهن اكيد ما منطيها 100 لان رسمها يفشل

سالتها انتي شكد منطيج

82

قسمه انا 85

لينا // اني منطيني 78 (باوعتلي ) وانتي نجاة

جاوبت تلقائيا 75

شذى //زين هيج انطاج درجه خاف ناسي قصده 57

ضحكن انا رديت عليهن // بس لاتنسن انا اكثر وحده جبت اعمال فنيه

جنان // اوو شخبصتنا وهو هم خابص نفسه كله درس رسم ما معقوله نرسب بي

باوعت الها وابتسمت //على كولتج كله رسم

بقيت افكر معقوله استاذ صلاح انطى للطالبات درجات ما عدا انا كتبلي راح ارسمج شنو يقصد بكلامه

بقيت اليوم كله مصفنه ولا ويه الدروس خصوصا وانو الاستاذ ما اجه اريد اساله ليش هالشكل كتبلي

ثاني يوم اجه للصف وهو لازم اب ايده علبه وكال

• يابنات بما انه انتو اشطر شعبه عندي ومتجاوبات وياي كلش راح اسوي معرض رسم وراح ارسم طالبه منكم

واخليها بالمعرض الي انتو هم تشتركون بي من خلال اعمالكم الي شفتها امس والي حازت على اعجابي

خصوصا فكرة نجاة وهيه تنحت ع الخشب بطريقه حلوه لكن حبيت اسالج نجاة كومي

وكفت باارتباك هو كال // انتي مو ما تحبين الرسم كيف كدرتي ترسمين اللوحه

شذى ردت // مبين مو هيه مسويتها

هو جاوب بعد ان خزرها // اتصور شذى ما يصير تجاوبين من مكانج ولا اهنا مكان استهزاء (باوعلي ) اي جاوبي

- الصراحه استاذ انا نسختهن

- شلون

يعني خليت ...بين الصوره والخشب كاربون وطوخت عليهن وبعدين اشتغلتهن

هز راسه وكال // انا احيي صدقج استريحي المهم يابنات بهاي العلبه كاتب اسماءكم كلكم وراح اسحب اسم

الي يطلع اسمها انا راح ارسمها وبالتالي راح اخليها بالمعرض مال الرسم والحقيقه انتو كلكو حلوات وتستاهلن

انو الواحد يرسم لكل وحده منكم لوحه

ان شاالله هم راح ارسم صوره جماعيه الكم تمام

وهسه نريد وحده تجي تسحب ورقه وخلي نشوف منو يطلع اسمها

طبعا اهنا انا اتفاجأت مو كال اريد ارسمج مو انطى الكل الطالبات درجه وانا ما انطاني وهسه كاتب كل اسماء

الطالبات بقيت افكر والكل مترقب لمن ما طلب من شذى ان تسحب ورقه بعد ان هز العلبه اكثر من مره وراحت

شذى والكل مترقب الى ان سمعت صوت شذى يكول بامتعاض. (نجاة )

الفصل الخامس من هنا 

شكرا لزيارتكم عالم روايات سكيرهوم