رواية فصلية الضابط الفصل الثالث 3 بقلم زينب نور

.......... كاعدين ننتظر على احر من الجمر يرجعون ابويه وعمامي ونعرف شصار طلعت حته يخلص الوقت گمت طلعت للكراج غسلته ورشيت ماي للحديقه 

سمعت الباب اندك رحت ركض فتحته دخلو ابويه و وسام وعمامي فاتو للاستقبال بس مبين عليهم اعصاب وينترون بالحجي وابوي معارض على فدشي مااعرفه شنو اسمعه ايكول الهم

ابويه:- يعني اضحي ابنتي واكسر رگبتها 

بمزاج واحد شايف روحه ويحجي ويانه من ورا خشمه وبكيفه ايكول ما اتنزل ولقانون ياخذ مجرا 

بعد عليش نفصل خلي تبقى على القانون وانتو ساكتين وهذوله الاخذناهم لا دفع ولا نفع خلصوها بس حقكم وحقكم 

هيه هاي الي تردونها مو

وعمو ابو حازم يكوله

:- ما سمعت شيخهم اشكال مو كال اني اقنعهم يتنازلون بس بالاول افصلو وهم ما يردون افلوس لو حسام لو فصليه 

جنت واكفه قريب باب الاستقبال اسمع ويمي ضحى وتبارك وزهور گمزنه على صوت ركعة الباب بقوه باوعنه دخل تقي يرعد ويرجف من العصبيه باوعلنه ودخل عليهم ايكول الهم 

تقي :- عود صدك السمعته وانتو من كل عقلكم تنطونها لا اتفكرون بيها اصلاً واني صار سنين منتضرها من صغرها ومتحمل اعذارك كل مره عمي هسه تنطيها فصليه اني شنو محد فكر بيه وبمشاعري ولكم احبها لا تكسرون گلبي 

 وعمي ابو هشام يرده ايكوله

:- انته انجب وسكتتتت لو يردوك جان انطوها الك من اول ما خطبناها

 وابوي ايرده

:- ليش اني اعرف راح يصير هيج وما انطيته اله بس جنت خايف عليها اكول بعدها اصغيره ما متوازين وعزيزه عندي كلت تكبر وازفها بيدي التقي

 اني هنا استوعبت هاي كاعدين يحجون بيه اني المقصوده شنوو يعني اني اروح فصليه معقوله اهلي يضحون بيه وينطوني باوعت الضحى بعيون مدمعه وامي من سمعت لبست عباتها وفاتت من يمنه دخلت عليهم باوعت الابويه وكالتله 

امي :- ابو وسام هسه الفتهمته منكم اهل الميت طالبين فصليه مو 

يعني بنيتي ياخذوها شلون تقبلون تنطوها وليش ما انطيتوهم فلوس 

 جانت تحجي وحتى صوتها مبين يرجف 

  صاح بيها عمو ابو حازم كال الها

:- الحجي ميفيد ولوم ميفيد الصار صار وما قبلو بالفلوس ويردون راس حسام ايكولون دم بدم بتواسيل ولشيوخ كلها ادخلت يله قبلو ابفصليه وياريت يتنازلون عن القضيه مطلوب لدوله همين معتبرينه ارهاب مجرم وحنا هذا الطلع بدينه بعد ما بليد حيله شنسوي 

وعمو ابو هشام ايكولهم 

:- هيه هاي تالي تربيتكم ودلالكم لحسيم مخلينه على حل شعره وبكيفه يلعب 

اتصايح ويا وسام وصوت تقي يرعد ايكول انتقم منكم لو انطيتوها فصليه ولا تكولون مال كال 

                                            

              

                    

طلعو ايدفعون بي حازم وماجد 

لشارع وهو مستمر يغلط عليهم اشلون يقبلون ينطوني فصليه

ولكل يحجي ويصيح 

 اني انصدمت اباوع ابضياع

حسيت ضحى سحبتني من ايدي ودخلتني جوا للغرفه واني الدمعه نشفت بعيني ما مستوعبه الدايصير اني راح ادفع ثمن غلط اخويه وياخذوني بمكانه 

 وياريت حسام يسلم منهم ويتنازلون قانونياً

 فزيت من صفنتي وافكاري على صوت ابويه وامي تمشي ورا وتحجي دخلو للبيت

 اني دم ماباقي بيه ريگي ناشف واباوع لشفايفهم اريدهم يكولون 

 ماراح يصير شي ولا ننطيج فصليه اجه ابويه كعد بصفي رفع ايده على ضهري وسحبني علي حضنته حسيت طلعت شهكه من نص گلبه ونحب 

رفعت راسي باوعتله شفت ادموعه وكعن بحضنه گالي 

:- نداوي انتي تعرفين شنو معزتج بگلبي؟ انتي روحي انتي صغيرونة گلبي ولج بويه خيروني لو انتي لو حسام خيروني بروحي وگلبي 

مسح وجه وعيونه بيده

:- شوفي بويه اني ما اجبرج ولا اضغط عليج انتي بكيفج تردين تحمين اخوج وتقبلين تردين ما تقبلين ابراحتج 

وخلي حسام هو يتحمل الغلط مالته وياخذون ثار ابنهم منه 

فكري ورجعيلي جواب 

من سمعت يقتلون حسام شلون گلبي ينطيني ما اقبل الخاطر حسام 

 جاوبته:- اسم الله علي عمري على عمره هذا رويحتي موبس اخويه

 حضني اكثر وباسني بگصتي 

گالي 

:- اعرفج حنينه وگلبج طيب وما تقبلين يتأذه اخوج

 امي اتباوعلنه وساكته تبجي كالت

:- ربي شسويت عندك وهيج تجازيني بضناي لو ابني لو بنتي ولك يمه حسام ليش هيج سويت بينه وين جانت مضمومه اليه هاي المصيبه

 واخواتي يبجن وياها واني الدموع ناشفه بعيوني وگلبي معصور ويوجعني حته الحجي ضاع مني بقيت ساكته بس اباوع واگول ابداخلي اهم شي حسام بخير وميصيرله شي صار اليل امي ولبنات طلعو للمطبخ ايسون عشا 

واني رحت توضيت وصليت وعقلي عاجز حته ما افكر شراح يصير وشلونوراخ اعيش يمهم دخلت بحالة جمود دموعي وعقلي وگلبي عاصرني دخلت تبارك كالتلي 

:-كومي تعشي

باوعتله و كلتلها :- ما اشتهي

لحت عليه جبرتني اطلع وياها كعدت وياهم على السفره واباوع عليهم واكول شلون اكدر افارك اهلي وهاي جمعتهم وحنيتهم زين اهناك منو اليه واخوي قاتل ابنهم شنو ردت فعلهم اكيد يموتوني رفعت راسي شفت ابويه وامي يباوعولي وعيونهم ملاينه دموع ومياكلون يجذبون علينه كاعدين ويانه بس جسد ارواحهم ممروده 

گمت قبل الكل للمطبخ سويت چاي واخذته الهم صاح عليه ابويه اجي اكعد بصفه رحت يمه ضل لازم اديه وصافن بفراغ ديفكر بشي ولقلق مبين علي گالي

:- بابا انتي من كل گلبج موافقه 

جاوبته :- اي 

باوع بوجهي وگالي

:- بابا بعد يومين ياخذج عمج الهم البغداد وهناك يعقدولج على ابنهم 

 هزيت راسي وگمت طلعت للحديقه وطلعن ورايه ضحى وتبارك وزهور كعدت وكعدن يمي كالت زهور

:- باجر نطلع اني وتبارك نجهزج تجين ويانه تختارين التردينه لان ماكو وقت يومين وياخذوج بس باجر ولورا عدنه يادوب نشتريلج الضروريات 

            

              

                    

جاوبتها:- لا ما اروح ولا اريد شي اروح مثل ما اني

 گالت ضحى:- شبيج ندى انتي عروس لازم ناخذج صالون ونجهزج ترا راح تزوجين مو تموتين تريد تضحكني 

گلتلها :- المنو اتجهز ؟ ليش اني اعرف منو الي راح اتزوجه شاب شايب مخبل عاقل! 

 مالي خلك ولا نفس الله يخليجن عوفني بحالي 

كالت تبارك:- مو بكيفج باجر اخذج غصباً ما عليج

 سكتنه من دخل وسام من بره سلم علينه واجه باتجاهي كعد بصفي سحب راسي باسه وحضني گال 

:- والله يا خويه مابدينه شي انسوي عاجزين وحاولنه انحل السالفه بفلوس بس ماقبلو يردون راس اخوج وانتي اكيد متقبلين يتأذه حسام بس والله شايل هم بكد الدنيه ولو بيدي شي ثاني جان سويته وحميتج انتي واخوج حسيم اوففف صغيرونتنه راح نفاركج راح يفرغ البيت

 ذب حسره بعد ما تحملت انفجرت بالبجي بجيت لما خوت روحي ضلت الشهكه بصدري عفتهم ورحت الغرفتي دفنت راسي بالمخده ودموعي تجري الحد ما غفيت فزيت ثاني يوم شفت موبايلي يم راسي باوعت الساعه ب-9-الصبح طلعت غسلت وجهي وخليت قوري الچاي عالطباخ علكت النار وطلعت شفت امي كاعده بالصاله وتباوعلي من بعيد الضاهر ابويه طالع ويا وسام للمحل رحت يمها صبحت عليها

 كلتلها:- يوم تردين بيض سلگ لو جبن

 كالتلي :- بس چاي انطيني كلشي ما اريد

 رحت سويتلي لفه جبن وصبيت چاي الي والها ورحت كعدت يمها أكل وهي تباوعلي بنضرة قهر ومليانه حزن 

 عفت الفه من ايدي وتمددت خليت راسي على رجلها وغمضة عيوني اريد اهرب من واقعي بحضنها حسيتها تبجي و تلعب بشعري واسمع شهكاتها فتحت اعيوني واني آكابر كوه 

كلتلها:- يمه شبيج تبجين اني وحسام زينين ماراح يصيرلنه شي واهم شي حسومي زين وخلي يسافر يطلع من العراق يعيش حياته ويكون نفسه واني قويه لا تخافين عليه اني بنتج طالعه عليج 

ابتسمت بوجها هي تسمع وتبجي وتندب بحضها سمعت صوت جهال ضحى وتبارك كعدو صحتهم يمي وگمت سويتلهم ريوك عاد كعدو البقيه ولبنات كالن خلي نحجز يم صالون حفافه وتنضيف بشره ما قبلت بس سكتني واصرو البنات ياخذوني لصالون لما صارت الساعه ب- 2 - اخذتني ضحى وتبارك وجهالهن بقو يم امي وزهور دخلنه لصالون كل لهفه ما عندي عكس ما جنت اتمنى احف وانظف وجهي بس هسه احس مجبوره 

بلشت بيه الكوافيره احفافه شمرت حواجبي ونظفت وجهي وتنيظف بشره وصبغت لون شعري تمري ورتبته اليه جان طويل يوصل الحد الورك

من خلصت باوعت النفسي بالمرايه شفت نفسي طالعه وحده ثانيه شكد جان الشعر مغيم على وجهي ولبنات يردن يسولي جو حلو يتغزلون بيه وبجمالي مالي واهس ابد ولا فرحت خلصنه ورجعنه بالطريق نزلنه يم مجمع ملابس نسائيه ضحى وتبارك اختارن شكم لبسه الي وملابس للبيت وعطور ومكياج واكسسوارات ورجعنه للبيت جنت كلش تعبانه حته ما قست الملابس عليه ولا فتحت العلاكه ذبيت نفسي على السرير ونمت نوم عميق الحد ما كعدت الساعه ب-2- بليل حيييل شكد نايمه طلعت للصاله الكل نايم حسيت نفسي جوعانه طلعت جبن وسويت جاي وكعدت اكل حسيت اكو حركه بالكراج خفت وطفيت الاضويه ودخلت الغرفتي صايره متنعرف وين الراس وين الرجلين اخواتي نايمات هن وجهالهن يمي بغرفتي كعدت على السرير واكل خلصت شفت الموبايل مالتي شكد اكو مكالمات فائته من ارقام هوايه صار يومين مافاتحته بس اخلي على الشحن شفت ايمان دازتلي كومه رسائل تريد تعرف اخباري ماتدري انطوني فصليه وراح اكون ضحيه بلا ذنب

 شفت الوقت متأخر مارديت عليها رج الجهاز بيدي المتصل تقي عرفت رقمه ما الرسائل الدازلياهن طلعت لصاله وجاوبته اول ما فتحت خط

اجاني صوته بدون ما احجي 

حسيته ذب حسره وكالي

تقي:- شلونج ندى 

ندى:- هلاو تقي اني زينه الحمدالله 

تقي:- يعني انتي اتقبلين تروحين فصليه 

ندى:- اي اقبل الخاطر حسام 

تقي:- واني شنو وهاي السنين المنتظرج بيهن وين حوبتهن 

 بقيت ساكته شجاوبه وهو حبه الي بس من طرف واحد موبيدي ماعندي اله مشاعر 

رجع گالي

تقي:- يعني راح ترحين من بين اديه وابقه ساكت اتفرج مو ولج والله انتظرتج تكبرين يوم يوم ومنتظرج تحسين بيه وبحبي الج ومنطيج مجال ما لحيت عليج تالي هيج بغلطه من اخوج اتصيرين الغيري 

احس العبره بصوته بينت كسرگلبي من سمعته هلكد يحبني ومتأمل اصير اله 

 كوتله:- مو من نصيبك جوز الله قاسملك احلى واحسن من عندي ماتدري شنو مكتوبلك 

گالي

تقي:- وهذا گلبي شيقنعه وينساج

ندى :- بمرور الوقت تنساني ان شاءلله ولا تعذب نفسك اكثر 

قبل لا يرد عليه ما انتظرت 

سديت الخط 

 وضليت افكر بي اول مره احجي ويا هيج عرفت اشكد ايحبني ومن سمعت صوته هلكد مقهور وباقي منايم الهلوقت يفكر بيه وجعني گلبي علي 

تعبت من التفكير گمت رجعت المكاني وضليت اتگلب بمكاني ما اكدر ارجع انام واكول معقوله بس باجر يم اهلي..........

الفصل الرابع من هنا 

شكرا لزيارتكم عالم روايات سكيرهوم