رواية فصلية الضابط الفصل الرابع 4 بقلم زينب نور

٠٠٠٠٠٠٠ وجان يجي يوم الاثنين وهذا اليوم الي راح اودع بي اهلي ومدينتي وحياتي وكلشي يخصني واروح الغير محافظه ولغير ناس ما اعرفهم

ومنو راح يكون زوجي وشنو شكله وطبعه

وشنو راح يكون وضعي هناك 

اول ما فتحت عيوني من النوم هاجمتني الافكار وشعور مخيف احساس بالغربه واني بعدني يم اهلي 

دعيت ربي بكسرة خاطر

ان يكون وياي بكل لحضه ويساعدني بكل خطوه اهناك نفضت افكاري 

وگمت طلعت من غرفتي شفت اهلي كاعدين وشكلهم منتظريني اكعد صبحت عليهم لكيت البنات مسويات ريوك 

كعدت وياهم تريكت بدون شهيه 

و ابد ما رفعت عيني للموجودين اعرف بيهم يباوعولي ومكسور خاطرهم عليه حاولت اتصرف طبيعي خلصنه ريوك وكمت جهزت اغراضي الي اخذهم وياي ما اخذت اهوايه مجرد جنطتين ملابس واحتياجاتي الضروريه البنات يمي رقعت راسي شفتهم يبجون بالسكته ضحى وتبارك اجن عليه حضنني احس سولي مجال للبجي 

لما شفت ماضل وقت كدامي رحت دخلت للحمام اريد اسبح بس اخذت الحمام مهرب حتى ابجي براحتي من عيون امي وابويه ماريد اكسر خاطرهم اكثر  

ادموعي ويه الماي ينزلن لما طلعت اعيوني وارمه الكل انتبه لعيوني وساكتين أمي اشوفها تبجي بالسكته اتخاف من ابويه ايعيط بيها لان ايخاف عليها لا يرجع يصعد ضغطها مره ثانيه 

دخلت غرفتي جهزت نفسي لبست قميص وبنطرون لون اسود 

البنات ما قبلو بس اني عاجبني واصريت ابقى بالاسود احسه راح ايكون بلون حياتي وايامي الجايه 

شويه واتصل عمي على ابويه كاله جاينكم ندى جاهزه بعد نص ساعه ونطلع البغداد باوعلي ابويه وگام اجه كعد بصفي وحضن راسي على صدره باسني وصاني اكون صبوره واتحمل الخاطر اعيون حسام وشنو اشوف اسكت لان ما نعرف العالم شنو معدنها هوايه حجه وياي وامي بصفي كاعده اباوعلها تبجي ابد ماوسكتن اعيونها واخواتي وياها 

وجان هذا اليوم من اتعس ايام عمري مليان حزن ودموع اندك الباب طلع وسام فتحه دخلو عمي وحازم اجو عليه حتى ياخذوني سلمت عليهم وتوادعت وياهم وطلعت مشينا الطريق كوله اني الافكار خبلتني كلش احساس وشعور اعجز اوصفه بحيث انتبهت على اديه ترجف ما متعوده اصلا اطلع الوحدي بدون امي كيف هسه رايحه الشي مجهول وكلشي اتوقع ايصيرلي من عالم اخويه قاتل ابنهم من بين هل افكار فزيت من سمعت حازم التفت عليه وگالي يله خويه ندى انزلي 

جان وقت الضهر ولجو بارد ما اعرف اني مثلجه من الخوف ولارتباك الرجفه ما تركتني 

نزل عمي وحازم وشيخ الي اجه ويانه نزلت وياهم يم باب جان لونه اسود جبير اتقدم حازم دك الجرس شويه وانفتح الباب طلع ولد شاب تقريباً عمره بكد حسام كال:- تفضلو 

شفت عمو وحازم ولشيخ دخلو للاستقبال مالتهم 

واني بعدني واكفه ما اعرف شاسوي 

گالي هذا الشاب تعالي خويه منا فوتي مشه كدامي مشيت ورا بممر نهايته باب دخلني منه جان مطبخ صاح 

:-وينجن بنات اجت البنيه وحده منجن تجي تفوتها جوا

اجن اثنين بنات ومريه وياهن اتصير بكد امي لو شويه اصغر سلمت عليهن ردن السلام بس كوه ويباوعلي من فوك ليجوه بنضرات استحقار

گالت المريه:- وينج نورس اخذيها الغرفة بيبيتج 

باوعت للبنيه الي اسمها نورس اشوفها اتباوعلي بشمأزاز 

كالتلي تعالي وياي رحت وراها دخلتني بغرفه جبيره وبيها مريه جبيره بالعمر وجها سمح ومبين بشوش عرفتها هي هاي جدتهم سلمت عليها من بعيد ردت عليه السلام وسئلت البنيه عليه الي اسمها نورس 

:- خايبه بيبي منو هاي البنيه

كالتلها:- بيبي هاي الفصليه جابوها اهلها 

كالتلي:- انتي اخت الموت ضرغام باوعت عليها ورجعت نزلت راسي واحس گلبي ايدك ابلعومي ما اكدر انطق حرف

رجعت كالتي

الحجيه :- اخوج المجرم ضحى بيج وشرد بله انتي شنو ذنبج ادفعين ثمن اغلاط غيرج

مسعت كلامها بجيت ما تحملت 

كالت النورس روحي جيبيلها ماي خطيه جايه من طريق 

كالتلها نورس:- اجيبلها سم احسن ختولي ماتستاهل اجيبلها اخت المجرم

                                            

              

                    

صاحت بيها الحجيه

:- ولج انتي شو ما تستحين وصلفه اني صخرتج تجيبين ماي تردين بوجهي يجي ابوج لو لا الع اكوله عليج

طلعت مزعوجه ودردم بصوت خافت. جابتلي ماي بكلاص شمرته كدامي وتخوزر بيه ماشربته 

كالتي الحجيه:-اشربي بيبي ادري انتي مالج ذنب بس حظج جابج هنا من هسه اكلج الله يساعدج 

وهي تحجي وياي سمعت صارت هوسه بلبيت وعياط مره تبجي بصوت عالي واحس الصوت يقترب للغرفه دخلت امريه اتباوعلي بعيون غضب وكره 

اباوعلها بخوف

يطلع عمرها تقريباً 36- او اكثر ما اعرف شو هاي هجمت عليه غلط وشتايم وتريد بس تلزمني 

اني اجتني حالة الجمود

بقيت كاعده بمكاني من الخوف وبس اباوع عليها شلون الولد شاب لازمها ويهدء بيها يكلها عمه شجاج موهيج عمي هو هيج يريد روحي احجي ويا هاي شعليها وجايتها 

تكوله 

:- ولك اعرف عمك هيج يريد ابو النسوان ماصدك ابن اخو مات حته يلكه حجه ياخذ مره وطلب فصليه

وهو ايجاوبها:- عمه ترا مو هو الطلب الشيوخ هيج فرضو وسدو السالفه بيها

وهي مستمره تصرخ 

:- ولك عوفني خليني املخها ابرد گلبي بيها اخت المجرم تصير ضره اليه والله ما اضل بلبيت ساعه خلي عود تفيده الفصليه اني بنت علوان هاي تصير ضرتي و وارث هيج يسوي وياي وحتى ما كلف نفسه ينطيني علم بهيج موضوع 

كالت الها الحجيه:- ولج شو استهترتي فردنوب لا حيا ولا حشيمه الي وبهذا صوتج العالي ولسانج الطويل بس وارث يعرف شلون يكصه الج امشي طلعي بره تهوسين فوك راسي

جاوبتها:- وينه هو خلي يجي واني اشوفه سهام شتسوي

طلعت شايطه ولكل جان واكف بلباب يتفرج عليها دفعتهم وطلعت تهدد وتغلط فجئه اختفه صوتها وسمعت صوت رجال خشن يرعد بالبيت ايصيح ويهدد بيها ولباب انركع مرتين

اباوع للمتفرجين الجانو بالباب يتفرجون اختفو بسرعه ضلت واكفه بس المريه الي كالت النورس فوتيها جوه عرفتها ام نورس كالت للحجيه :- والله عمي حقها تسوي هيج بله هاي تصير ضره السهام هسه وارث السوا شنو جايب فصليه ابدال دم ضرغام تخبل شجا

صاحت بيها الحجيه:- بله انتي لا تدخلين ومعليج خليج بعيده بهل سالفه مالج بيها لا يسمعج وارث وتعرفينه شيسوي

وخزرتها 

هزت ايدها ام نورس اباوع عليها ما عاجبها الوضع باوعتلي وهي عاقجه وجها وطلعت

من هل موقف عرفت مصيري شنو الضاهر راح اصير ضره والهاي الي اسمها سهام امبين عليها ماتنجرع وحتى عصبيتها تخوف عبالك حيوان مفترس الولد جان كوه مسيطر عليها

شويه و اندك الباب اجه نفسه الولد الفتح النه الباب من اجينه باوعلي وباوع للحجيه وكال:-الشيخ اجه وراح يعقد الهم وينج يمه تعالي جيبيها يم باب الاستقبال

اجت ام نورس كالتي:- شو كومي يلعروس وتعوج بحلكها وتباوع عليه صفح

گمت بس اعيوني مليانه دموع ولعبره ذبحت بلعومي احسه رحت وراها كالتلي اتقربي هنا اكعدي يم الباب سويت مثل ما كالت وجانت يمي واكفه نورس تخوزر بيه 

اسمع صوت الشيخ بده ايردد كلمات وبعدين سمعت صوت رجال خشن نفس الصوت الجان يرعد بالبيت على سهام 

            

              

                    

اسمعه ايردد ورا الشيخ الكلمات

ورجع الشيخ ايردد الي كلمات وسئلني

:- قطرالندى احمد هل تقبلين ب وارث جابر زوجاً لكِ؟

ساكته ما اكدر انطق احس بشي خانگني 

رجع كررها مرتين اني اسمعه بس مو بيدي گلبي يرجف ونفسي ضاك عليه

صوتي ميقبل يطلع بس ادموعي تنزل وكل جسمي يرجف ما اكدر اسيطر علي اريد أمي اريد اشرد تمنيت اختفي من الوجود بالثالثه كرصتني ام نورس واكفه يمي كال

:-شنو هل عياره جاوبي وفضيها 

كوه طلع صوتي يرجف ولعبره خانكتني كوتله

:- نعم وانتَ وكيلي 

اسمعه اتبارك للي اسمه وارث الصار زوجي واني ما شايفه شكله ابد بهل لحضه اجاني احساس مثل الحكمو عليه بالعدام هيج احس رجعتني ام نورس يم الحجيه اول ما دخلت للغرفه شفت الحجيه تبجي كعدت بنفس المكان الجنت كاعده بي انتبهتلي ورجعت مسحت عيونها وكامت طلعت شويه وسمعت صوت رياجيل دخلو للبيت وصوتهم مسموع بس من الهوسه ما ينفهم الحجي العرفته سهام طلعت من البيت وما مخليها تاخذ البنات وارث

 ولصوت يعلى ويختفي وافتهمت هاي الحجيه اتصير ام وارث يعني ام زوجي لعد الي اسمه وارث شكد عمره اكيد شايب لان امه كلش جبيره بالعمر

 بقيت ساعات بمكاني تعبت وحتاجيت حمام واستحي احجي واكول شافتني الحجيه احوس كالت

:- انتي شسمج 

جاوبتها:- اسمي قطرالندى 

:- وشكد عمرج 

جاوبتها:- 18سنه 

كالت:- بعدج صغيره هزت راسها كالت

:- كومي بعد البيت صار بيتج كومي غسلي ادخلي للحمام جوعانه تردين اصيحهن يجيبلج آكل

جاوبتها:- لا شكرا ما اريد بس محتاجه حمام 

صاحت ابنيه اسمها استبرق كالتلها

:- دليها على الحمام ونوميها يمجن بلغرفه ابين ما اشوف وارث وين يخليها بيا غرفه

 كالتلها:- صار بيبي

 باوعتلي وكالت

:- تعالي ويايه 

رحت وياها للحمام غسلت وجهي وجنت من صدك جوعانه بس استحي اكول جوعانه ما ماكله من الريوك وهسه صارت الدنيا غروب فكرت اكيد عمي وحازم من زمان رجعو الكربلاء واني بقيت هنا وحدي كمت ابجي حسيت بشعور ما اتمنى الاحد وزدت بجي من الجوع بطني كامت 

تطلع صوت واستحي طلعت وياها كالت

:- تعالي وياي الغرفتنه 

 صعدت الدرج وياها جان البيت جبير وحلو بي هوايه غرف ولطابق الثاني هم مثل تصميم الجوه كلش حلو الاثاث حلو يعني مبين ذوله ناس الله مفضل عليهم ولضاهر عائله جبيره دخلتني على غرفه كالت

:- هاي غرفتنه اني واختي نورس 

مبينه حبابه ومحبوبه عكس نورس بس تذب حجي وتخزر بيه كالت

 :- تعالي هنا على سريري انتي اسمج قطرالندى صح؟

 هزيت راسي كالت 

:- مبينه بعمري شكد عمرج جاوبتها كالت اكبر مني بسنتين بس وجهج طفولي وبي برائه 

ابتسمت بوجها 

:- جوعانه اجيبلج اكل

 كولتلها:- اني وياج ناكل سوه 

:- اوك انتظريني هسه اجيج 

طلعت واني بقيت اباوع بالغرفه مرتبه بيها سريرين واثاث بناتي حلو اذكرت غرفتي وتحسرت دخلت نورس شافتني كالت 

نورس:- خير شكو جايه بغرفتي شنو اني رجلج وما ادري

 كولتلها:- مو وحدي اجيت استبرق جابتني هنا 

كالت:- اطلعي بره 

كمت ردت اطلع فاتت استبرق كالتلها

:- شبيج نورس خير بلشتي من هسه وياها خطيه تره خلي نفسج بمكانها

 ونورس تخبلت

:- شنو اخلي نفسي بمكان اخت المجرم وانتي ممنوع ادافعيلها 

استبرق :- خلي انزل اكول البيبي لو العمو وارث هو يحجي وياج 

ذيج سكتت وطلعت من الغرفه ادردم 

 اني كمت ابجي كلش انهضمت من حجيها وهاي بس البدايه 

 استبرق:- معليج بيها ختولي هاي تحجي وتسكت الوحدها تعالي خلي نكعد ناكل

 نزلت الصينيه بالكاع وجبرتني اتقرب يمها كالت 

:-اكلي وشدي حيلج تره انتي اجيتي بمكان بي بس العداوه الج فـ اتحملي اسمعي وسكتي وهسه كولي بسم الله واكلي

 اني انسدت نفسي اكلت بس لكمتين كوه ابلع ورجعت ليوره لحت عليه اكل ما قبلت جنت محتاجه مكان الوحدي وابجي براحتي كولتلها

:- عفيه بس اريد ملابسي جوا جنطتين اريد اغير ملابسي

 استبرق:- اي هسه انزل اشوفهم وين واصعدهم الج 

وشالت الصينيه وطلعت 

اتمددت بمكاني وخليت ايدي جوا راسي وما اعرف شلون غفيت ...........

شكرا لزيارتكم عالم روايات سكيرهوم