رواية نقش بارد الفصل الرابع 4 بقلم فدك فاطمه

#

.

أنا المَايَدرِي وَين يرُوح مِن دُونَك

..

غـــنوة 

بين الواعية و النايمة حسيت بضل فوك مني گلبت

اسحب الغطة ايدي جمدت من حسيت المخدة من يم راسي نزلت جن واحد يضغط عليهة 

گلبي نخمش و روحي راحت خايفة عصرت عيوني قوي مغمضتهن اخاف افتحهن تسلل ضوة لعيني

دلهم بگلبي جنت خايفة منة لايسوي مثل ذاك اليوم الغصة تحجرت بلعومي گـلبي صار يـدك بخوف 

فتحت عيوني جسمي كلة عرگ من حاوطتني ظلمة الغرفة بس احس بشخص قريب علية فوك مني 

لان الباب مفتوح يدخل ضوة قليل يعكس عليه 

رجفت عيوني توسعن من لمحت بطرف عيني دلهم 

واگف بالباب مخلي اصبعة على شفتة يأشرلي اسكت ما اطلع صوت 

كلشي صار بثواني ماعرف منو اليمي جان مغطي وجهة ايدة تتلمس بشعري صوتة خشن يحجي كلام 

مو حلو عصرت البطانية علية كل الخوف تجمع بنظراتي عيوني متوسعة تباوعلة برعب و رهبة 

رفع حاجبة وين ما أجة يلتفت لان حس بنظراتي وراه

صارت ايد دلهم على حلگة لزمة من ورة ايد ضاغط بيهة على رگبتة و الايد الثانية يمنعة يحجي 

جراه هو يقاوم و يحاول يدفعة لحد ما وصل الباب لطخ راسة بالحايط عطت برعب رفعت ادية اسد 

حلگي اباوعلهم بخوف من صارو واحد يضرب بالثاني دفعة برة الغرفة صوتهم عالي يتصايحون

سديت أذني تكرفصت بمكاني لامة رجلية لبطني دموعي تجري مرت لحظات بين سب و ضرب الى أن صار هدوء ماسمعت صوتهم بعد

نزيت من صارت ايدة على راسي رفعت عيوني الة ما اشوفة من كد الدموع و الرجفة الازمتني صدرة يصعد و ينزل من تنفسة القوي 

وخر ايدي گعد بصفي حجة يرفع راسي :سوالج شي 

رديت برجفة:لا مـ.منو

دلهم: حرامي 

عگدت حواجبي ما فاهمة شلون دخل شعدة فوك راسي رفع ايدة عني گام رايح للشباك نفض البردة

دلهم: لو سادة الشباك ماصار هيج 

عصرت اصابعي متوترة:نسيتة 

دلهم: بعد ماريد تنعاد

هزيت راسي بفهم سد الشباك و البردة تحرك يريد يطلع نزلت من الجرباية امشي وراه خايفة و اتلفت

أندار الي عاگد حواجبة:ها 

غنوة: خاف يـ..يرجع 

دلهم:مايرجع امشي نامي 

ضليت بمكاني هو مشة لغرفتة سد الباب لميت ملابسي علية رجعت للغرفة شغلت الگلوب عيني على الشباك بقلق 

                                            

              

                    

مسحت شعري من تذكرت شلون لمسة نفضت الغطة دخلت جواه عقلي كل شوية يخيلي اصوات 

لو احس شي يمشي على رجلي صرت اوهوس

حسيت الضوة طفة گبل فزيت اجاني صوتة يحجي برود:نطمري ماكو شي 

صارت الخوفة خوفتين اباوعلة ضوة قليل يجي من الباب اشوفة منة فرش فراشة شمر المخدة وتمدد

لفلفت روحي بالغطة ضليت الليل كلة افكر و خايفة لحد ما أذن گمت اوصل للباب و ارجع اخاف اروح اتوضى اباوعلة نايم 

گعدت يمة ايدي ترعش بس جمعت شجاعتي ندستة بجافة اكثر من مرة بدون صوت حسي راح من الارتباك 

رفع راسة بضوجة حجة بنتر:شتردييين 

غنوة:صارت الصلاة اريد اتوضى و اخاف 

تأفف شمر الغطة عنة بلعت ريگي وگفت اعصر بملابسي اشرلي امشي مشيت كدامة اشوفة من المراية مرتكي على الحايط مغمض عيونة

نزعت الشال خليتة على جتفي رفعت رداني اتوضى 

كملت التفت الة جفلت من نظراتة بالظلمة يخوف

رفعت الشال ارعش طلع عايفتي لوحدي

دورت على التربة براسي احجي على روحي شبية اخاف هو من گاعة يخوفني نوب متحامية بي تصرفات المزعطة كون ابطلهة 

تذكرت موقف و ضحكت جنة برمضان الناس تسمع دعاء و صفية اتابع مسلسل هندي زويا و اسد جانت تسوي هيج حركات تخاف و تلبد 

فزيت على صوت الموبايل يدك التفت للغرفة رحت شلتة ماعرف شنو مكتوب ركضت برة گبل لاينسد 

الاتصال لاگاني بالباب 

اخذة من ايدي طلع بالحوش يخابر رجعت للهول صليت كملت رحت للمطبخ مترددة بس اعرف بي يروح للشغل هيج وكت

خليت القوري على الطباخ و طلعت البيض گليتة دخل من وجهة واضح منزعج دفع الباب حيل طك بالحايط طلع صوت طفيت الطباخ من الخوف 

شوية رجع مغير ملابسة بيدة اغراضة ماحجة اي شي طلع عايف البيبان مفتوحة ركضت خايفة لباب الحوش حتى اسدة جان هو صاعد على الدراجة 

ضليت واكفة احس ببرودة الحديد جوة ادية حجيت متوترة : انتظر بس گلي اكو قفل للبيبان اخاف وحدي 

مد ايدة بجيوبة طلع مفاتيح مجموعات بميدالية اخذ واحد منهن الباقي شمرهن لجهتي لزمتة بسرعة

قفلت باب الحوش جان حديد بي قفل رجعت جوة 

هم قفلت باب الممر البيت اول ما ندخل يصير ممر صغير من لجهة اليمنة مطبخ و وراهة يطلع للهول

ضل الريوك كعدت اني تريكت رجعت افتر بالبيت كل ما اسمع صوت اجفل منة ماعندي غير الشغل 

نظفت الثلاجة و الكاونتر عزلت كلشي مخربط بالبيت لميت الهدوم علة جهة لحد ما صارت بالتسعة سمعت اصوات الناس بالشارع

فتحت باب الهول طلعت للحمام غسلت الهدوم و شريتهن افتر بالحوش الهوة بارد بس حلو هدوء 

گعدت يم الباب لامة ملابسي جوة رجلي 

            

              

                    

اباوع للشارع من الزرف لو جهال يمرون لو نسوان بس گبال الباب اكو محل و زلم كبار بالعمر كاعدين

حاولت اسلي روحي بكلشي لحد ما أذن صليت خليت المخدة بالهول متغطية بعباتي غمضت عيوني من النعاس راسي يوجعني 

ماحسيت بنفسي شكد نمت اوعى و ارجع اغفى لحد

ما سمعت صوتة يخابر فتحت عيني قابلني السـگف

تثاوبت اگلب على صفحتي اصعد العباة فوك جتفي شباك الهول گبالي البرد مفتوحة و الجو اضلم 

درت وجهي للحايط حسيت بوجع غمضت عيوني اسب بروحي اتذكر موعدهة غطيت راسي ماريد تجيني و اتورط 

حسيت بصوتة قريب مني ايدة صارت على جتفي فزيت بدون وعي الملم الغطة علية اباوعلة بخوف

حجة يخلي موبايلة بجيبة:دخلي للغرفة لاتطلعين منها لحد ما اگلج 

هزيت راسي گمت متلفلفة بالعباة دخلت رحت للشباك تأكدت منة مسدود سحبت البردة عدلتهة

كعدت على الجرباية فتح الباب خلة علاگة يم الحايط و بطل ماي شمرة بصفها رجع سحب الفراش البرة دخلة للغرفة

حجة مرتكي على الباب:عدج هدوم برة 

غنوة:علة الحبل

دلهم:امشي لميهن 

تنهدت بضوجة بس لا هاي البنية تجي يحبسني خوش حبسة گمت طلعت برة غسلت وجهي من الحوض بالحديقة الماي سيح من الماطور بارد 

لميت الملابس منعسة وگاعدة الغروب گوة اتحرك اعضامي يوجعني من نومة الگاع عيني غنوة تعودت على التختخة علة الجرباية الله يذكر ايام گبل 

ابتسمت بداخلي اتذكر نومتي المعلعلة وجهال اخواني يمي بس يكبرون شوية يذبنهم علية اضل سهرانة وياهم يحبوني اكثر من امهاتهم 

دلهم:مـــطولة 

فزيت علة صوتة متخوصر فوك مني سبحت الثوب طاحن الداخليات بالگاع تمنيت تنشگ و تبلعني 

دنگت اخذتهن ما اباوعلة من المستحة ندك الباب تحرك مستعجل لم الملابس الثانية كومهن بيدي 

حجة يدفعني للباب:امشيي جوة قفلي الباب 

هزيت راسي رحت للغرفة شمرت الهدوم على جهة 

سحبت المفتاح سديت الباب قفلتة من جوة وخرتة عن القفل حتى تضل فتحة صغيرة

گعدت على اركبي بفضول اشوف منو الي اجة مرو من صالة ثنين زلم ماشفت وجهم بعدهة هو اجة ناحية الباب وخرت بسرعة

حرك السرگي يتأكد منة مقفول و مشة كعدت يم الباب افتح بالعلاليگ لفتين فلافل و قوطية ببسي 

اكلتهن جوعانة كلش عضيت شفتي بندم لان ماتوضيت شربت ماي خليت العلاگة جوة ايدي توضيت حتى الماي مايطيح بالگاع 

ماعرف يمتة تجيني الدورة بس احس بألامها واكلت طن هوة شسوي ضميت وجهي بين ادية فشلانة 

گمت شريت الهدوم بعدهن رطبات لان الجو بي برودة اشر بالهدوم واسمع صوت غريب متعودة اسمعة هنا شلون صوت الثلاجة من تشتغل 

            

              

                    

عضيت شفتي بفضول لفيت شعري خليت العباة فوك راسي شالي برة نسيتة وگفت لفيت الردان فوك المفتاح حتى من افتح القفل ماينسمع صوتة

فتحتة بهدوء سحبت الباب صار فراغ قليل اباوع منة الهول فارغ البيت بي قليل ضوة يجي من المطبخ غرفتة الي ينام بيهة ضلمة وثانية مضوية

سديت الباب انهي نفسي عن الطلعة افتريت بالغرفة صار عقلي كلة يم الصوت اريد اعرف شنو

رجعت فتحت الباب بية عادة من اخاف اضحك اريد اضم ضحكتي ماكدر حلگي مبتسم من الاذن للاذن 

طلعت اتلفت باوعت للمطبخ هدوء محد موجود نحنيت يم الباب جان مفتوح شوية منة مردود رد 

شفت ظهرة بس كدامة شخص تبين بس رجلي بس 

دلهم واكف مايتحرك مدنگ بنص جسمة صوت صار اقرب وقوي هنا بالغرفة 

زفرت نفسي بتوتر گمت بهدوء ارجع خايفة وين ما التفت صار كدامي زلمة توسعت عيوني رجلية خدرن من الخوف كعدت بمكاني 

ادية على حلگي خايفة اشهگ و دلهم يسمعني هو يباوعلي بتفحص من حركتي زلگت العباة طاحت على جتفي بلعت ريگي مرعوبة

جان ضخم و بشرتة هواي غامقة مو سمار عادي عيونة وساع شكلة يجيب الرهبة للگلب و مو مريح

تلمست الگاع ايدي ترعش هو عيونة علية من فوك 

مبتسم نظراتة ماتطمن باوع للغرفة رجع باوعلي 

تلمست الحايط وراي گمت حجة بهمس يقرب علية :شعدج تختلين 

عرگت ايدي من الرهبة صوتة خشن تقرب اكثر مايفصلنة بس خطوات قليلة رفع ايدة خلاهة على الحايط بصف راسي توسعت عيوني برعب

بدافع الخوف منة تحركت بسرعة دفعت باب الغرفة دخلت على دلهم صوت الباب القوي خلاهم يلتفتون باوعلي و امتلت ملامحة بغضب و صدمة

عيوني غوشن من الدموع سمعت بس صوت الاشياء الي بيدة هو يعوفهن يطيحن نص على الميز نص على الگاع تحركت بسرعة الي رفع عباتي سحبني 

طلعني من الغرفة ايدة على زندي كسرت اعظامي 

فتح باب الغرفة دفعني تعثرت بخطواتي وگفت منطيتة ظهري اخاف التفت واشوفة

سمعت صوت الباب نسد قوي وطگة شي من برة 

درت وجهي لگيتة طالع گعدت من خوف رجلية بادن 

فزيت من مكاني من سمعت صوتة يحجي بغضب و يتجادل واضح طردهم همة رفضو يطلعون بالنهاية ابتعدت اصواتهم صار هدوء

ما استمر هواي نرفس الباب دخل غطيت وجهي بالعباة ماعندي غيرهة احتمي بيهة اذا طگاني استاهل اني جبتهة لروحي 

جر العباة من وجهي گنبص گبالي كاعد دنگت منتظرة الطگة على يا خد بس كون مايطگني على خدي اليم رحاتي لتوجعني 

دلهم: هو اجاج لو انتي طلعتي و شافج

رفعت راسي حسيتة نطاني عذر حجيت برجفة:هو هو اجة 

دلهم:دك الباب 

غنوة: ها

دلهم:اجاج دك الباب و شردتي 

            

              

                    

هزيت راسي بأي هو وياي يهز راسة و يحجي بهدوء 

تدنة بجسمة علية ابتعدت عيوني بعيونة گوة اباوع

مد ايدة بجيبة طلع الموبايل شوية گلب بي خلاه گدامي بلعت ريگي اشوف تصوير گبالة كلش اني كاعدة الباب مفتوح شوية مبين مني 

دنگت اعصر بأدية بطني مغصتني و احس جسمي اشتعل نار من الفشلة عرگت حتى حسيت ماي بگصتي اكدلي احساسي من مد ايدة مسحهة 

حجة يرفع راسي :هذة ماي المستحة لو الجذب

غمضت عيوني كمل يحرك وجهي:فتحي حتى او غمضتي و تغطيتي بعدني اشوفج سوالف الجهال هاي عوفيهة 

غنوة:بـ.. بس 

دلهم:بس شنو مدام شگتلج قفلي الباب و گعدي بعد حركات البزازين و تختل شلج بيهة حلو الصار هسة شافوج و فوگهة مغطيتلي شعفتهة و عايفة الرگبة و الصدر للرايح و الجاييي زعطوطة انتييي اهلج مامعلمينج زلم غربة بالبيت المن طالعة الهم 

دنگت دموعي امسح بيهن و يطيحن غيرهن اخذ موبايلة و طلع غطيت وجهي ابجي عضيت اصبعي بقهر احجي على روحي و ألوم بيهة 

ضليت بمكاني كل ما اسكت اتذكر رزالتة و انقهر بس مو من حجية مني المن بعد اصلي اذا شافوني هيج

گمت اطحن بروحي من الحرگة توضيت و صليت استغفر مسحت دموعي شلت التربة خليتهة على الميز سحبت المخدة مرتكية عليهة بضوجة

ضليت اتصفن بالحياطين تنبهت من غفلتي على صوتة يحجي بنتر ضليت كاعدة بمكاني ماتحركت

اسمع صوت المطر من برة صنتة البيت خلتني اتيه بأفكاري ارجع أسأل نفسي لو ما الي صار هسة اني وين ابلع ريگي مرتبكة 

احسب الايام المرت علية هنا لو ضالة بيت اهلي جان هسة اني متزوجة هلال أبن عمي يدرس بالحلة 

عمي حاجزني الة من جنت صغيرة گالولي تتزوجينة 

بس ماكو لا خطوبة ولا عقد بس حجاية أهل و گرايب

جانو مخططين من يكمل يجون يكملون خطبتنة و نتزوج جنت متأملة جيتة بس اريد اطلع من بيتنة 

و متحمسة ارتبط بي لان اختارني و عاف بنات عمي جانن هنة يضحكن علية بس جنت اخاف اگول هيج 

من گالو اني لهلال بعدهة ابد ما طبيت بيتهم و شفتة ولا طلعت بحياتي بس مرتين رحت مشاية من كبرو جهال سالم صرت أضل يمهم 

ابتسمت اتذكر مرت عمي ام هلال حبابة و تحبني 

تجي تبات يمنة اخجل من اشوفهة هي بي تبتسم 

غمضت عيوني زفرت انفاسي اتذكر اخر مرة شفت هلال جان بالعيد اجة يعايد اخواني صدفة لمحتة من الشباك واكف بالحوش 

هسة هو وين يدور علية يدري بالصار هم تعارك وية سالم شلون سدو السالفة شگالو لهلنة خايفة ارجع ماريد اواجهم يجوز هلال مايصدگ اني بريئة 

            

              

                    

مسحت وجهي بضوجة المن افكر بي شجابة لعقلي هسة من شفت هذة الولد تذكرت هلال هم اجلح مثلة لونة اسمر طوخ بس اضعف 

گمت شلت الهوسة طلعت برة غسلت وجهي فتحت الثلاجة اباوع بيهة جوعانة طلعت الصمون ماكو 

غيرة و قوطية معجون مدري شعجب جايبهة 

من اليوم لطبخت بي صار يشتري مسواك كامل 

هسة الثلاجة فارغة طلعت الماعون ثردت الصمون بي صغار رجعت اخذت الجدرية خليت زيت قليل

ثرمت بصل و انتظرتة شوية خبطت معجون خليتة من فار خليت الصمون فوگة نقصت الطباخ تانيتة

لحد ما شرب الماي شلت الجدرية خليتهة بالگاع طلعت خاشوگة كعدت اكل ماعندي غير أكل و انام

رفعت راسي من سمعتة يصيح بأسمي رجعتلي الغصة اتذكر رزالتة دنگت ضايجة و مقهورة 

حجة يرتكي واكف بالباب :وين الترواكة

غنوة:بالغرفة

دلهم:گومي جيبهة 

تأفتت بضوجة گمت عينة علية رافع حاجبة دخلت للغرفة ادور عليهة لگيتهة بعدهة رطبة الكبوس مبلل و طروف الردان طلعت خليتهة بيدة رجعت 

حجة يلبس بيهة :اعصابج صرتي تخرمشين

بلعت لگمة انتبهت لروحي ضليت مدنگة اگلب بالاكل حسيت بي من وكف يمي و گعد گبالي

اخذ الخاشوگة سحبتهة بسرعة:اكلت بيهة

حجة عيونة على ايدي الازمة الخاشوگة:وخري

غنوة:خـ..خاشوگتي

دلهم:ايــدج

بعدتهة اخذ الخاشوگة رفع گلاص الماي خلة شوية عليهة مسحهة و رجع اكل بيهة ضليت اباوع لأدية 

منتظرتة يوخر و بگلبي احجي بس كون مايخلصهة

دلهم: المفتاح على الميز بالغرفة جيبي

غمضت عيوني زهگانة كل شوية مگومني باوعلي مقلص عيونة سكتت گمت بهدوء دخلت للغرفة 

ادور على المفتاح اخذتة رجعت مديتة الة جان واكف بالباب مالت المطبخ يلبس ببوتينة شد القيطان و نزل التراك دار وجهة ماشي

حجيت اطلع وراه :المفتاح نسيتة

وگف بصف الدراجة صعد يشغلهة حجة :فتحي الباب 

فتحتلة باب الحوش مطر قوي و هوة عالي لميت ثوبي لايطير حرك الدراجة طلع بدون ماياخذة

سديت الباب حيل بضوجة رجعت جوة انفض الماي عني قفلت الباب مال المطبخ تأكدت من كل البيبان

كملت اكل غسل المواعين رجعت لغرفتة فتحت الباب لميت الهوسة فرشت الفراش بمكانة من الملل كلشي اسوي حتى ما اخاف

بس جذابة اقل صوت افز موقفين صارن وياي البارحة و اليوم ثنينهن خلني اخاف اضل وحدي

گعدت يم الباب رادة البردة و بيدي سجينة

            

              

                    

باب الممر مقفول و هو جام نقاط الماي تطيح عليه 

مطر قوي همزين لميت الهدوم لو ضالات ولا اطلع بعد حشگت روحي يم الحايط من طفت الكهرباء

ضلت هواي طافية ما اشتغلت سندت راسي على الحايط بعقلي اقرة سور و أدعية بس گلبي مقبوض بخوف لامة العباة علية كتلني البرد

لحد ما سمعت صوت الدراجة فزيت امسح بالجامة كلشي ما اشوف بس الضوة عكس عليهة عرفتة رجع

سمعت طگة باب الحوش من نطبگ فتحت القفل 

و الباب صار بوجهي متنگع بيدة غراض و علاليگ

دخلهن طلع موبايلة حجة يمسح الماي من 

شعرة : جيبيلي هدوم 

باوعت وراي ظلمة بس ضوة الدراجة مشغلهة بالحوش فتح موبايلة شغل الضوة خلاه بيدي 

اخذتة رحت لغرفتي شارة الهدوم هناك جبتهن الة رجعت شفتة من فات للحمام خليتهن على جهة 

كعدت بفضول اگلب بالعلاليك حلويات و ياهن كارتونة مرسوم عليهة موبايل و سماعات مال أذن

هيج شغلات عادية خليتهن على جهة ضليت اباوع لشاشة موبايلة بيدي تجي رسائل ماعرف اقراهن

من حسيتة اجة درت وجهي رحت للهول لحد ما بدل 

رجعت اباوعلة من الباب اضوي بالموبايل عليه 

خلة ايدة گبال وجهة و حجة:عميتيني 

عبست اباوعلة بضوجة لو ما طالع جا هسة نايمة 

وشابعة نوم خلاني لوحدي و خايفة بالة طب علية واحد شسوي هو ماكو

اجة سحب الموبايل من ايدي خلة العلاگة حجة يطفي الضوة:من يمتة طافية

غنوة:صار هواي من مطرت حيل طفوهة

دلهم:هم ندك الباب اجة واحد

غنوة:لا حتى لو ندك ما اسمعة من المطر 

همهم بدون مايرد عينة بالموبايل يحرك اصابعة بسرعة ارتكيت على الحايط اباوعلة جفلت من دار عيونة علية عدلت وگفتي 

مشة سحب المخدة تمدد بالهول فاتح جهازة يگلب 

رحت يمة ادور ضوة ظلمة البيت وحشة فارغ اخذت

المخدة الثانية خليتهة بمسافة عنة

سحب العلاگة من گبالي فتح جيس طشرة بنصهة عرفتة حَب گرزات عدل نومتة مرتكي علة الحايط

بيدة جهازة يباوع بي و الفلاش مشتغل يضوي الهول سحبت العباة تغطيت بس بردانة مجرشة

حجيت اوخرهة عني:اريد ضوة اجيب بطانية

حرك الموبايل يضوي لغرفتي گمت جبتهة رجعت اركض تلفلفت بيهة افكر اباوع للموبايل صافنة

جريت البطانية رحت يمة حجيت مترددة:ءء أكلك

رد يشمر الگشر من ايدة:گولي ام الـءء 

غنوة: اريد هذة تعلمني شلون اگص صورة بالموبايل 

رفع حاجبة يباوعلي مستغرب: شتسوين بالصورة

حركت ايدي ابررلة:مو الي والله يعني مو صورة الي لوجهي اريد اتعلم بس لشغلة ثانية 

            

              

                    

قلص عيونة حرك نظراتة علية دار وجهة حجة بهمس: استغفرالله 

حجيت ما فاهمة:ها

رد يحرك ايدة يأشرلي:تعاي هنا

تقربت بينة مخلية مسافة طلع من الجان يتابعة بدة يگلب بالشاشة علمني و طلعلي صورة گصاهة للمخدة خلاه بيدي اخذتة متوترة كصيت صورتين

حجة ياخذ الموبايل:هاي علمتج شتردين بالصورة

غنوة:هيج بس الصبح اخذة حتى اصور

دلهم: انتي ماتعرفين تقرين كلش ولا طكة

هزيت راسي فشلانة:كلشي ماعرف 

دلهم:اهلج محد دارس 

غنوة:ابن اخوي بالاول طاح بكلهن گوة ينجح

ضحك هز ايدة عضيت شفتي امنع روحي اضحك وياه رفع ايدة يأشر بحواجبة فتحت ايدي خلة بيهة كرزات رجع فتح موبايلة يتابع 

جان مسلسل مافتهم شنو تطلع اكتابات جوة گعدت اكرز حب و اتابع بدون فهم بس اشوف الممثلين

طك الحباية بين سنونة حجة يشمر الگشر :تفتهمين لتابعينة

رديت بصراحة:لا 

حجة يأشر على واحد منهم: هذة اسمه داني قاتل بس مو خسيس رجع يشتغل غصب لأن خطفوا صديقه القديم

هزيت راسي بفهم يحجي و يفصلي كل لقطة تطلع ندمجت وياه بس هواي يطلع لقطات كلهة گتل و دم

مدينة ادينة سوة للعلاگة واحد لزم ايد الثاني سحبت ايدي بسرعة باوعلي بدون اهتمام أخذ

حب فتح ايدة گدامي جانن ذني اخر شي 

اخذت شكم وحدة متوترة گعدت اگرز و مندمجة لحد ماحجة ينفض فانيلتة :حتى بشعري شمرتي گشورج مو هاي العلاگة هنا 

وخرتهن من شعرة نفضتة ساكتة اباوع لوجهة خاف معصب الحمدلله جان بعدة بمزاجة الهادئ الحباب

نعست تمددت مخلية ايدي جوة خدي اشوف الحلقة وصلت للنهاية ماعرف غفيت متدفية بالغطة

فزيت على صوت الموبايل انتظرتة لحد ما نهض من فراشة گمت اشوف روحي مددة بمكاني لنمت بي

اخذت الموبايل رحت للغرفة مديت ايدي جوة الجرباية طلعت باكيت الفوط ضالة بس وحدة 

صورت الجيس رجعت الموبايل لفيت راسي امثل النوم ضليت اسمع بس اصوات حركتة لو حجية

لحد ما طلع تأكدت منة گمت وجهي عرگان من الفشلة احوس مستحية ماكدر اگلة جيبلي عيب 

نفضت الفراشات عدلت البيت سويتلي ريوك تريگت 

مر اليوم كلة بهدوء مارجع فترة النهار كلهة هو ماكو

لحد ما صارت الساعة بالاربعة جو مغيم و ظلمة هدوء ندك الباب بس مو دگة قوية مثل كل مرة 

اني واكفة اباوع من البردة مال الهول اسمع الصوت 

لحد ما شفت ادين ثنين متعلگات بالحايط وراهة 

رجال يباوع لداخل البيت حركت البردة خاتلة وراهة

گلبي يدك بقوة و خوف ركضت لباب المطبخ تأكدت

            

              

                    

مقفول اخذت السجينة من الكاونتر رجعت اباوع للحوش الباب يدك و الرجال نازل من الحايط بس بعدة اشوف خيال رجلي من جوة

هواي ضل مل و مشة كعدت ايدي على گلبي انتهة من الهبطة مر الليل كلة دلهم ماكو واني نطيت من 

البجي ماكدر اسكت خايفة اوهوس بالليل هم 

سمعت حركة بالحوش ظلمة ما اشوف مطفية كل الاضوية وراهة سمعت رجال يحجي

قربت من باب المطبخ سمعت صوتة گال:خوية انة صاحب دلهم ودة بيدي هذة المسواك عدة شغل مايكدر يرجع 

فتحت حلگي ردت احجي تراجعت مانطقت سديت

سنوني مانعة صوت شهگاتي گلبي صار يرعد مثل الجو شلون مطير و عاصف 

نفس الصوت اكدر احفظ صوت اي واحد من اول مرة هذة جان صوتة خشن و كلامة غريب اكو احرف يلفظهن بغير شكل مو مثلنة 

عرفتة سكتت حجة هواي لح كل شوية يبدل كلامة 

ساعة يگول مسواك ساعة فلوس حاول بكل الطرق

ضليت ساكتة ولا نفس حتى حركتي صارت زحف دخلت لغرفة دلهم الشباك هناك بي شبك أأمن

لفيت التشيرت على القفل و طگيت المفتاح حتى مايبين صوت سحبت البطانية تمددت متغطية 

الآيات ما فارگت لساني كل ما يندك الباب اجفل حسيتة يريد يدخل بأي طريقة و لمت روحي ليش

طلعت گبالهم هو گالي حتى هدوم لاتخلين بالبيت 

معقولة يعرفة راح يدخل اذا يعرفة ليش عافني 

عصرت البطانية مرعوبة خاف هو دزة لو هو نطاه المفتاح كافي اشك بي الرجال حذرني اني ما سمعت

مسحت دموعي ضليت سهرانة و متقيدة حتى بالنفس لحد ما ندك الباب دگة قوية جان الفجر توهة الشمس طالعة وصلني صوت دلهم يصيح 

گمت معصبة حسيت نار اشتعلت بصدري فتحت البردة مال الهول لازمة السجينة بيدي مايشوفني

جان واكف يم الباب صحتة اجة عاگد حواجبة مبين

من شكلة لو تعبان لو خلگة ضيگ فتحت الشباك 

حجيت اباوعلة بقهر:ويـــن جنت

دلهم:شعليج افتحي الباب 

غنوة: الولد لأول امس جان هنا و شافني اجة دك الباب و گال انتة وديتة اجة العصر ما طلعت و بالليل طفر الحايط ودك باب المطبخ 

وية كل كلمة تتبدل ملامحة للصدمة لزم حدايد الشباك حجة بنبرة مهزوزة:فتحتي الباب

درت عيوني متجاهلتة عاط يمد ايدة :احجييي وياجج فتحتي الباببب 

وخرت عن الشباك صار مايكدر يلوحني مسحت دموعي مشيت عايفتة غسلت وجهي و توضيت

طگ الحدايد بيدة حجة بغضب:بتت الزمااال احجييي وياجج فتحتييي الباب دخل للبيتتت 

باوعتلة بدون اهتمام لفيت شعري وگفت اصلي هو يفتر بالحوش جهازة على أذنة يخابر مبين مايرد 

            

              

                    

رجع يم الشباك من شافني خلصت حجة عيونة ناطة بعصبية:غنوووة احجييي وياج لاتكفريني من غبشة الله شگالج فتحتيلة البابببب شنوو حجة 

غنوة: صح اهلي باعوني عليك واني بت قرية مامتعلمة ولا دارسة بس مو غبية ادري غلطت ذاك اليوم من طلعت بس مو لهدرجة مطفية افتح الباب لرجال غريب علية ادخلة لبيتي 

زفر انفاسة يمسح على وجهة حجة مخلي راسة بين أديه:افتحي الباب 

غنوة:ما افتحة

دلهم:افتحي وصيري خوش مرة لا ابتلي بيج

غنوة:ضل صيح لباجر ما افتحة 

خزرني ولا قلدتلة بس دخلت الغرفة تكومت بالگاع من خوف صوتة يرعد رعد ركضت للشباك تأكدت

مسدود هذة الشباك يخوف مابي حدايد بس اطار يگدر يدخل منة صدك بعدني اعدل بالبردة و اجة

دفعة ما افتح وخرت خايفة منة حتى وهو برة بعيد

عطت مصدومة طحت ليورة من كسر الجام لم البردة شمر البلوكة من ايدة دخل للغرفة 

زحفت برجلية اباوعلة بخوف نفض الكزاز منة ركضت شاردة مالحگت ادخل اقفل الغرفة لزمني

سفطني على الحايط حجة يرفع وجهي :شو خنستي مساع تصيحين و تستريحين 

بللت شفتي بتوتر درت عيوني اباوع للگلوب ضواه اصفر حسيت بأيدة على خدي رجع وجهي لجهتة

دلهم:احجي وياج

غنوة:أنتة انتة ءء ليش مارجعت اني وحدي اخاف مرتين صار وياي موقف يخوف و البارحة مرة ثالثة 

دلهم: شگالج من اجة 

عبست بوجهة رديت:گال عدة مسواك انتة موودي وياه نوب گال فلوس قصص وروايات عراقية كرار صلاح بعد عفتة يحجي وحدة رحت نمت 

هز راسة باوعلي مقلص عيونة يگول أسد حاصرلة فارة تذكرت هذة الدرس بالقراءة مال ابن اخوي 

جنت اشوف الصور البيهة و وحدة منهن اسد لازم فارة من ذيلهة هي تريد تشرد منة ماتكدر خطية

دلهم:عليمن تضحكين

انتبهت لروحي رديت ابالع:مو عليك

حجة رافع حاجبة:يعني علية

غنوة:وروح ابوي مو عليك

رفع ايدة مبتعد ضلت ايد وحدة طلعت من جواهة طلعت من الغرفة شاردة اسمعة يخابر بصفوان

خليت الجاي على النار فتحت الثلاجة ادور الريوك 

طلعتة صبيت كعدت اكل اجة گابلني كل شوية يعيد 

السالفة حجيتهة عشر مرات بعدة يسأل زهگني عاد

حجية يلوم بية لان طلعت نزلت الكلاص قوي على 

الكاشي طلع صوت باوعلي ما عاجبة صبيت جاي رجعت اكل هو ساعة يحجي وياي ساعة يراسل 

غنوة:بعد ما احجي لاتحاجيني 

دلهم:صايرة تراددين

رديت مدنگة:مو مو ارادد انتة سألت هواي

دلهم:وطار نصج

اخذت نفس زفرتة اهدي اعصابي الدلال طلع عيني 

جانت صفية تدوس ببطني و سالم يكفخ بية ابلعهن 

            

              

                    

و اسكت خاف احجي و يكتلني الجوع وراهة هسة

ادري بروحي شكد ماحجيت راح يسكت بمزاجة

دلهم: كملتي گومي طبي جوة صفوان اجة

نظفت المطبخ هو واكف يهز برجلة منتظر اخلص مشيت للغرفة سحبني من ثوبي دخلني لغرفتة

حجة بنرفزة يسد الباب:شكد فاهية تشگين الگلب

سكتت خليتة قفل الباب وگفت يمة اتصنت بس ما سمعت صوتهم اريد الگف حجاية ماكو حس الهم

افتريت بالغرفة بضوجة اخذت باكيتات الجكاير طلعتهن من التكة مالتهن اسفطهن أبني عمارة 

فزيت على صوت رگعة الباب واحد حجة بعصبية:انتتتة مسودن بعدك وية جَبر مصاحبة تعرف هذة وراه عشاير و ثاراتهم گابة للستااار تريد تتورط وياه وية مصايبة

تقربت اسمع دلهم يرد عليه بصوت عادي بدون انفعال:اني شعلية بعشيرتة اريد المعلومات العدة

صفوان:معلومة يعني انتة مستعد تبيع راسك گبال كلمة من حلگة ترة انتة مافاهم وين تدوس هاي الثارات تاخذ البيهة و العليهة محد يسأل عنك من تصف وياه ياخذونك بثارهم

دلهم:خل يجون

فزيت على ضربة قوية شي طاح رجع صفوان يصيح:ناسييي مني انتتتة شرفك و بيتك ومرة عندك هنا لو تريد تضحي بالاكو و الماكو

دلهم:ما ناسي لدخل ذاك اليوم مو جبر لاتجيب طاريهة على لسانك

صفوان:ليش مو صارت جوة بيتك و دخل بنص الليل 

إنت جنت وين؟واحد داس گاعك و واصل لمرتك 

إنت تگلي هذا ما الة علاقة بجبر ليش ما صار هيچ إلا من دخلت ويّاه ها؟ ليش؟

دلهم:إذا جاي تحاسبني ارجع من الباب

صفوان:ما احاسبك أفندي بس اگلك هذة ما وراه بس قلة شرف و دم لاتتورط وياه باجر عگبة تطلع العشاير لتطلبة ثار و تنجر رگبتك وية رگبتة

دلهم:لا جبر ولا الاكبر منة يسحلوني اعرف شسوي وفر نصايحك

صفوان:لا ماتعرف تريد تجازف على حساب الناس الوياك 

دلهم:الوياي اعرف احميهم لاتدخل 

صفوان:يعني هاي هي ناوي تكمل 

دلهم:اي لبديتة اكملة

صفوان:ليش هو شنطاك شوية حجايات عن نعمان ركضت صرت ظلمة 

دلهم:گتلك استخدمة لحد ماحصل لأريدة بعد لو اشوفة يموت گدامي ماتدخل

صفوان:شفت بعينك من رافگتة شصار ذاك اليوم طلعتك بالموت اجيت تروح بشربة ماي و وبيتك نداس هذة شراني ماكو خير وراه هسة صار ذيب يحوم على بيتك تريد تجر شرفك و ناسك على الخالي بلاش 

دلهم:اريد اجر نعمان اريدة يطلع و اشوفة ماكو سبيل الة جبر هذة داهية عدة ايد واصلة يمهم اذا على الثمن اني دافعة من اليوم لندفن بي حاتم 

            

              

                    

صفوان:حقك اخوك و ثاير دمك عليه بس مو تشرب السم من ايد عدوك

دلهم:گلي شسوي اكعد و انسى الصار لا تدخل بأي شي بعد هاي لا حياتك ولا قرارك 

صفوان:الله يساعدك على روحك بس لاتگول ما حذرتك 

تثاوبت منعسة عفتهم يتجادلون ساعة صفوان يزمخ ساعة هو نوب يهدون يسولفون بصوت ناصي

سحبت المخدة و الغطة لفيت راسي نمت على صوتهم تمنيت بلحظتهة دلهم يقتنع بحجية لان 

هذة يخوف اذا رجع مرة ثانية للبيت ماضل بي ارجع لهلي بشرفي ولا يصير بية شي و واحد يدخل علية

من گعدت راسي يوجعني جسمي مبهوت وجع بجهة بطني و ينزل جوة ظهري احسة صاير نصين

ردت اتحرك ماكدرت نايمة على صفحتي وجهي للحايط اشوف قبضة ايدة گبالي مثبتهة بالگاع 

محاوطني احس بحرارة جسمة وراي الغطة كلة علية

بلعت ريگي گلبي يخفگ بخوف حبست حتى النفس

اريد اگوم ماريدة يكعد عضيت شفتي لزمت طرف الغطة ماكدر اتحرك ايدة فوك مني حصرتني البجية

مديت ايدي مترددة أدعي بگلبي كون مايفز لزمت ايدة قشعر جسمي من ملمسهة رفعتهة عني بعيد

تحركت على كيفي گمت من الفراش طلعت برة شاردة انفض بهدومي امسح بأدية لميت شعري 

رحت للغرفة طلعت الاحتاجة مشيت للحمام كملت 

وطلعت سديت باب المطبخ وراي اباوع للساعة 

بالوحدة الظهر هواي نمت تنحست من نومتي بالنهار مزاجي كلة خرب فتحت الثلاجة شربت ماي

طلعت بتيتة اگليهة طفيت الطباخ لفيتهن بصمون

و حميت الجاي مال الصبح كعدت اكل و أصفن 

سمعت صوتة يخابر باوعت من باب الغرفة المراية گبالي اشوفة نايم الموبايل بيدة و الأيد الثانية على 

عيونة مغطيهن سداه غطة وجهة بثنين اديه ضل فترة هيج لحد ما دار عينة للمراية يشوفني وخرت

من طلع عفتة رحت لغرفتي سديت الباب عيني للشباك شفتة مخليلة جامة و الگزاز كلة ملموم 

تمددت على الجرباية اكمل نومتي للغروب يالله كعدت الوجع مگطعني حتى بجيت منة طلعت

عثرت بعلاگة يم الباب شلتهة لگيتة جايبلي لأحتاجة يعني شاف الصورة ضليت الطم متفشلة ضميتهن 

وية هدومي دفنتهن جوة الثياب عدي ثنين و الباقي تراكات استحي البسهن ضالة لازگة بالي يوالمني

غسلت و كعدت بالمطبخ اكل اسمع الصوت نفسة

لدوم اسمعة من الغرفة الثانية بس هدوء لو احد 

موجود جان قفل الباب ما اهتميت ضليت ماخذة راحتي لحد ما طلع مر مني يباوعلي بتفحص مركز

ومقلص عيونة حسيت بية شي غلط حركت هدومي

عدلت گعدتي متوترة تغيرت ملامحة لضوجة راح

            

              

                    

وكف يم المغسلة ايدة بيهة مدري شنو اسود يطيح بي اخذ الخاولي نشفة باوعتلة مشمأزة من منظر 

ايدة كلة خطوط و رسم ماكو جلد مبين واضح جان لابس نص ردان ذراعة كلهة مرسوم عليها لحد الجف

هزيت ايدي ما عاجبني المنظر رجعت اغسل المواعين نضفت السنك و الطباخ غسلت ادية 

گبل لا اطلع حجة يصيح وراي :اكو أكل

التفت الة اجيت اكلة لا بس ماكدرت گلبي ما نطاني 

هزيت راسي رجعت للمطبخ الموجود بالثلاجة 

حضرت منة صار تبسي مرتب سويت وياه خيار خليت الخبز و ماي نزلت الصينية بالگاع و صحتة

اجة كعد گبالهة عفتة رحت انظف بالمغسلة كلهة صبغ اسود كملتهة غسلت ادية مدنگة شلت ماي 

رشگتة على وجهي و باوعت بالمراية ألف بشعري عگدت حواجبي مستغربة اباوع لرگبتي اتلمسهة

تقربت اشوف عدل شنو هاي الصبح مابية معقولة تمرضت مرة ثانية لو لان جايتني الشهرية اول مرة 

تصير برگبتي كلة مرة اشوف زراگ برجلي لو بأدية ما اتذكر شنو لطگاني عفست وجهي بضوجة غسلت 

وگفت يم الباب اسمعة يحجي وصوت صفوان واضح يصيح و يزمخ شكد شتمة و غلط عليه بحرگة

رد عليه برود : كافيي مصختهة ماگتلك اعوفة بس مو هسة 

رد عليه بنتر:يمتة من يدخل لمرتك لو تريد تفتحهة گو..." بيتك أمدة الشوارب لبوجهك اعزمة على مرتك 

حشگت روحي يم الحايط من دفر الصينية طيرهة اخذ الموبايل رد عليهة بغضب:اوزن حجيك صفوان لا تدوس بي 

صفوان: والله من بعيد هيج اشوف واحد طاب لبيتك و يتوسل مرتك تفتحلة الباب وانتة بعدك تماطل

دلهم: اكل خـرا ماگتلك راح اسكت عنة بس خلي يحجي يطلع الدرة وراهة الزمة من ايدة لتوجعة

صفوان: لاتدخل روحك بالعشاير

دلهم:ما أتدخل بس اگلك هو عدة بيت بالاطراف 

غاد من الوحدة الميكانيكية و ثاني بالنهظة هذا قليل يروحلة 

رد عليه بضحكة:ها مو تگول اريدة وصار عزيز گلبك

دلهم:اي بعدني احتاجة بس اريد اضيگ الوسيعة عليه اخلي مايلحگ يحك راسة 

صفوان:اشر اني تحت اشارتك

دلهم:وصل خبر لأي واحد يريد راسة حتى لو تجمعهم كلهم هسة ادزلك رقم شكم صاحب يثق بيهم هم طيحهم وياه 

صفوان:تم ماعندي شي نطيني اگرزهم

دلهم:دير بالك تجيب اسمي لاعرفك ولا تعرفني

صفوان: ماصاحب نغولة

دلهم:اكل خرا 

سداه منة اباوعلة من ورة الحايط ارتكة ليورة بيدة موبايلة يدندن و يكتب گام مر مني واضح مستمتع

كعد بالباب بيدة دفتر يصور بي رجع حجة جهازة قريب منة: هذولة جماعتة الثقة لگطهم و بعدين ابدي بي حتى مايشك ملعوب 

            

              

                    

سداه خلاه بصفة التفت لدكة الباب تنهدت بضوجة

گبل لايگوم دخل ولد صغير للحوش اشوفة من الشباك يركض للدراجة  

نهض بسرعة اخذ مفتاح لغرفة الثانية دخلني مالحك يقفل الباب سمعت صوت بنية تسلم عليه

خليت أذني علة الباب اتصنت سلمت و كعدت تسولف وياه الولد الصغير هم يحجي يلح يريد الموبايل هي تصيح عليه اباوعلهم من فتحة الباب 

بعدهة ذبت عباتهة گامت حجت مستغربة :ليش المواعين مطشرة بالمطبخ 

دلهم:بعدني ما لامهن 

أسراء:عبالي الگاك برة اتصلت عليك طلع مشغول گلت انظف البيت و اطبخلك و اروح مقصرة وياك هلفترة 

اباوعلة مرتكي على الحايط مكتف اديه رد عليهة:لا تفكرين بية مدبرهة مايحتاج تعبين اكل برة 

أسراء:ميخالف هم الواحد يضيگ خلگة من اكل المطاعم وانتة صاير ما تمر علية ولا تشوفني وجهك 

دلهم: مشغول طريق رجعتي بعيد عليكم ارجع تعبان مايصيرلي واهس اروح للسوك

أسراء: معذور حبيبي ما اعتب عليك اني هم مقصرة 

بس تدري عمتي مدمرتنة بسوالفهة هسة تريد نشيل

دلهم: هو رجلج منيلة و يشيل اشو گوة مدبرهة

صارت قريبة عليهة اشوف بس جتفهة صار عندي فضول اشوف وجهة عرفتهة اختة لان الجاهل يصيحلة خالو مبين علاقتهم قوية هي ويا 

أسراء: يدبرهة هي عمتي عدهة بس كاتلهة البخل 

دلهم:خل يبوگهة هو حلالة راتب ابوه 

حجة سمعتهة تضحك:هي هاي تاليتنة حرامية

حجة يتقرب من باب الغرفة : ضلي للعشة لاتطبخين هسة اجيبلكم جاهز 

رجعت ليورة فتح الباب دخل حجة بتحذير:ديري بالج تطلعين راح اقفل الباب

رديت بضوجة:لازم اطلع خاف تبات هنا

دلهم:ماتبات ورة العشة تروح سوي لگتلج عليه لاتضلين تتختلين مثل البزونة

هزيت راسي زفرت نَفسي بأنزعاج وخرني عن الميز فتح الجرار اخذ منة فلوس حسبهن خلاهن بجيبة

التفت الي باوعتلة مستغربة عينة علية و صافن تحركت مامرتاحة اعدل بثوبي مسح وجهة وطلع 

ضليت كاعدة ارسم على الورق الموجود مجمعة الاقلام بيدي اسمع سوالفهم من برة گاعدين بالهول

فترة نگطعت السوالف بس صوت اغاني مال اطفال و حركة صوت المكناسة السعف مالتهة يحتك 

بالگاع عرفتهة تنظف بالبيت كيفت لان مابية حيل 

انظفة باجر الهول و الدرج كلهن تراب و اتعاجز

گمت فازة من سمعت صوتها صاحت :يـمـه لحگيلي دلــــهـــم شنـــو هاي هدوم نسوان انتــه تطبب لبنـــات لبيتك 

            

              

                    

خليت ايدي على صدري مبهوتة من صوتهة العالي 

ركضت للباب ايدي صارت ترجف اسمع صوتة قرب

فتحت الباب شوية تمنيت الگاع تبلعني شايلة هدومي الداخليات بيدهة واگفة و تصيح و تنتر بي 

ما اشوفة بس اسمع صوتة حجة بنتر:لاتصيحين بوجهي عوفيهن وين مالگيتيهن شعدج تدورين بالغرف 

أسراء:شنوو ادور بالغرف هاي الملابس شتسوي بغرفتك يا محترم جان خفت الله تجيب بنات لبيتك صدك ماتستحي 

دلهم:دعوفيهن معليج لاتدخلين بحياتي 

شمرتهن حجت بحرگة:هسة اشوف ياهي هاي المستخفة وييين معيشهة وياااك اگول ماتخليني اجي تگلي صاحبي بايت عندي والله گلبي نغزني بس طلعت صدك ماتستحي

دفعهة بعيد عن الباب حجة يسد حلگهة:شبييج نهديتي فرد هدة محد هنا جانت البارحة موجودة و مشت لاتدخلين بشي مايخصج

ردت حسيتهة تبجي من صوتها:شلون ترضاهة على روحك انتة تغيرت ولا جنك اخوي الاعرفة بعد طبة لهذة البيت ما اطب الة تعدل دربك الاعوج 

ضل ساكت مستغربة ليش مايگللهة علية زفرت بضوجة اجيت افتح الباب و اطلع خل تشوفني بس 

خفت گبلهة طلعت و تورطت على روحي هاي اختة ماعرفهة شنو من مرة بالله ما رضت بية و طردتني 

اكيد يختار اختة علية عصرت ايدي فوك السرگي اباوع من فتحة الباب هي كل شوية تخطف كدامي

اخر شي وكفت اشوف ظهرهة تلبس بعباتهة تحجي وياه : العتب مو عليك علية ضال بالي يمك وانتة .. استغفر الله هسة انتة مقتنع بالتسوي حرام ترة سكتت عن وشومك طلع اكو اضرب منهن لو تسبح بماي زمزم هم بعد ما تنظف

دلهم:كافي گتلج لا تضلين تلوصين بالحجي هاي حياتي وانتي مالج علاقة بالاسوي كل واحد حر بنفسة لاتجاوزين حدودج

أسراء: اي مو غريبة اني بت الجيران و تخليلي حدود انيي اختك من حقي اتدخل لتسوي انتة حرام و فوگ منهة تگلي حياتي هاي قذارة مو حياة

دلهم:گعدي خل ادور سيارة ترجعين بيهة 

أسراء:لاتدور ولا تتعب اروح وحدي

دلهم:تروح وحدهة هيتة هية گعدي لا تتسودنين علية بهل الليل 

ابتعدت اصواتهم هي مبين طلعت ماردت عليه 

فتحت الباب طلعت شلت ملابسي ارجف من القهر 

هي محترك گلبهة و تحجي بقهر و هو يريد برود يخليهة تشعوط نقهرت عليهة اجت فرحانة و طلعت ضايجة و تبجي 

دخلت لغرفتي قفلت الباب سمعت صوتهة مرة ثانية بس بعيد مبين واكفة برة بالحوش اخذت نفس 

اعصر بأدية اوصل للباب و ارجع خايفة على روحي 

اذا طلعت و گلتلهة شيسوي بية ليش مايحجي هوة

تراجعت عن قراري فات الوقت البيت صار هدوء فتحت الباب طلعت ضايجة رحت غسلت وجهي 

ارتكيت على المغسلة اباوع لوجهي صارت عيني على الباب مفتوح ركضت سديتة خايفة سديت كل الشبابيك افتر بالهول ادعي كون يجي بسرعة 

            

              

                    

الحمدلله ما تأخر دخل گالب جهرتة عفتة ماحجيت شي ولا هو ، راح لغرفتة طبگ الباب قوي نهز هز كلة

ورة هاي السالفة رجع لأسلوبة القديم لا يباوعلي ولا يحجي يطب و يطلع ساكت لو حابسني بالغرفة

عرفت من سوالفة الاسمعهة وية صفوان هو يسوي وشم هذولة الي يجون هو يرسملهم و صوت 

الاسمعة من شغل الوشم ليسوي حتى صار هواي يجون اختنگت من كعدة الغرفة متقيدة كلش 

ـ عــزيزي المـواطن عزيزي الفقير

أمالك في بكرا بتنقص كتير

بتنقص بلادك اراضي و بيوت 

و تنقص ولادك تابوت فوق تابوت 

وعيت على هذا الصوت صداه يتردد بالبيت لشفت العجائب و الغرائب هنا وخرت الغطة اخذت الربطة لبستهة طلعت اعدل بملابسي 

اطكطك بأصابع ايدي متوترة الصوت مزعج رغم اللحن و الاغنية الي ما اعتاديتهة لگيت روحي 

حافظتها و اغنيها مثلة من كد ما سمعتها بهاي الايام 

لو يشغلهة لو يغنيهة فوكهة صوت مكينة الوشم 

وگفت باب المطبخ هو يدندن بصوت ناصي :تمـوت البراءة و تحيا الكلاب وتصنع مهازل و تهدم منازل

غنوة:دلــهم

التفت عيونة ماتتغير النظرة الباردة بيهن حجة يرجع يكمل شغلة: گتلج اليوم لاتطلعين

غنوة: سمعت صوتك طلعت هسة ارجع

بس گلت اسويلك ريوك

دلهم: مايحتاج روحي لفراشج لاتطلعين

لأول مرة اتجرئ اقترب منة اوگف بصفة اشوفة يحضر بأدوات الوشم اباوع لأيدة مضمدة و مبين واشم توة لان دم واضح يمسح بي 

غنوة: اساعدك 

دلهم:ساعديني بسكوتج غنوة صوتج يستفز اعصابي 

حسيت ايد عصرت گلبي عصر وجهي گب من الفشلة دموعي نزلت بسرعة بللت خدي ماكدرت اكتم صوتي و اخفي حزني

حجيت برجفة:ليــش 

التفت عيونة علية رغم باردة بس تحرگ الاعصاب عاف الي بيدة ارتكة على السنك تنهد تنهيدة طالعة من گلبة عصر الحديدة بيدة 

گال بجدية:امشي غنوة لاتراويني وجهج ماتحملة

اني واحد گـ****" انتي ماتدرين الله وين ذابج ستري روحج 

رديت بقهر و نرفزة :موو صوجك شكد غثيث

التفت متفاجئ عيونة متوسعة اني أذني صفرت 

من الخوف اول مرة اغلط على واحد اكبر مني 

رجعت خطوة ليورة ركضت شاردة سحبني من زندي رجعني گبالة عاصر ايدي قوي عضيت شفتي بوجع

دلهم: هذة ياهو الغثيث

هزيت راسي بنفي رديت:مـ. مو عليك 

دلهم:اذا بيج خير عيديهة

غنوة:لا لا مابية خير اني عوفني

رد يعوف ايدي:امشي منا يالله اذا عدتهة اگص لسانج خوششش

هزيت راسي بخوف طلعت للحوش صاح وراي:وييين

            

              

                    

انتبهت لروحي درت وجهي رجعت عيونة علية لحد ما دخلت للغرفة ماتحملت اضل اختنگت گعدت

بالباب هو كل ما يمر يگلي طبي للغرفة عاندت ما اسوي ليگلي عليه لان مليت و طگت روحي صار 

اسبوعين خانگني خنگ خلاني اتحسف على بيتة على الاقل جنت اكعد بالحوش مو محبوسة بالغرفة 

وگف گبالي حجة بملل:وتالي 

غنوة:ربة عالي 

طگاني برجلة على كيف و حجة:لسانج ليش صاير طويل و تنترين ماعاجبج

عصرت اصابعي رديت بصوت ناصي:اي مايعجبني انتة حابسني بالغرفة كل ما كعدت تكلي دخلي قفلي الباب لعبت روحي بعد معلية اكعد هنا ما اگوم

حجة بسخرية: بكيفج مو هو بيت الخلفوج

حجيت ادير وجهي : بيت رجلي 

سحب ردان تراكة گعد گبالي مد ايدة رفع وجهي خلاني اباوعلة كسرت عيني خجلانة من حجايتي 

دنك صار قريب علية حجة بهمس :بيت منو

رديت متوترة :بـ..بيت بيتك 

تقرب رجعت بظهري للحايط گلبي يدك بقوة عرگت

غمضت عيوني برجفة من خلة شفتة فوك خدي 

جسمي كلة رجف و استحريت ايدي عرگن حسيت بنغزة لحيتة على جلدي عصرت ملابسي بين ادية

حجة بهمس : دخلي جوة تحملي بس اليوم

رديت روحي رايحة من گربة:مـ..ما والله تعبت

حضن خدي بيدي حجة : لاتعانديني 

كبر راسي ضليت معاندة هزيت راسي برفض عض خدي توسعت عيوني احس بسنونة نبتت بجلدي

رفعت ادية متوجعة دفعتة من جتفة وخر واني من الصار ذبلت اريد رجلية تعيني و اگوم ماكدر خدرن

بعدة على گعدتة حاشرني بكوسر الحايط لايرضة ادخل ولا اگوم طلع موبايلة يخابر گاللهم لاتجون

موبايلة على أذنة ايدة بشعري يخلي ورة أذني اصابعة تتلمس جلدي مشاعري تخربطت وية لمستة ماعرف شصار بية كل جسمي بهت 

دلهم:الة اخليج تندمين على هذة العناد

بجيت ضامة وجهي بين ادية خايفة الوم بروحي شجاني حسيت ايدة فوك أيدي يريد يوخرهن 

دنگت ضميتة راسي بين رجلية حجيت اناشغ: والله اطب بعد ما أعاند ولا احجي بس لاتسويلي شي حبابب اروح للغرفة ما اطلع

لزم راسي رفعة اباوعلة يضحك مد ايدة مسح دموعي حجة: تگرصين و تضمين راسج كافي بجي كلشي ما اسوي اشاقة وياج

غنوة:گول والله 

حجة يلزم ايدي:ما احلف جذب

باوعتلة ما فاهمة عطت بصوت عالي من شالني

و اني على گعدتي دخلني للغرفة شمرني على الجرباية زحفت لنهايتهة الملم بملابسي علية 

لزم رجلية ايدة باردة فوك جف رجلي جلدي كش سحبني لنهاية الجرباية صرت جواه لازمة الثوب 

عصرتة بين ادية لازمتة بخوف 

حجة يثبت اديه يم راسي :تعاندين بعد

هزيت راسي :لا وروح ابوي

دلهم:تغلطين

غنوة: لا لا حتى حتى ما احجي 

دلهم:تدرين شكد خسرت من ورة عنادج

غنوة:شـ..شگد

عصر خدودي يحجي ببتسامة مو مريحة:هواي

غنوة:الله الله يرزقك غيرهن 

صارت عينة بعيني اباوعلة بخوف وخر عدل تشيرتة 

ردتلي روحي من شفتة مشة گعدت اعصر بركب 

رجلية الماتن من الخوف گمت مستندة علة الجرباية والله مابطلت غلط بگلبي حجيت عليه 

رجع فجأة طفرت صاعدة حجة بنبرة غريبة:اني رايح بشغل اذا اجاج جَبر فتحيلة الباب

توسعت عيوني بصدمة رخت ايدي جسمي كلة خمل من أثر السمعتة رجعلي صوت صفوان من گالة

ـ أعــــزمة علـــى مرتــــك 

الفصل الخامس من هنا 

شكرا لزيارتكم عالم روايات سكيرهوم