رواية نارا حيدره الفصل الثاني والأربعون بقلم نمارق رحيم
صرخت وگع الموبايل من ايدي دخل سالار ومصطفئ مخرعوين وهمه يگولون احچي شبيج ولچ؟؟..
-حيدرة مسوي حادث سااالار!!!..
سالار:- لطفك يالله صدگ منوو گلچ؟؟..
شال الموبايل بسرعة والولد يصيح احد يجاوب..
جاوبة.. هلا خوية احچي شنو شبي حيدرة حادثيش..
-صاحب هذا الرقم مسوي حادث..
-ايييي ومنو انت؟؟؟..
-اني الضابط قيس..الموبايل اخذته واتصلت عليك لان آخر مكالمة منك انت تقربله شيء؟؟..
-اي اخوي.. هسه اني بأربيل شنو حالتهم خوية احچي لا تجلطنه فدوة لعمرك؟..
-اي تعال لبغداد لعد.. ما ادري بالضبط بس حالتهم كلش خطيرة لان مو بس حادث سيارة لاااا معترضين لطلق من اشخاص مجهولين بعدنه ما نعرف تفاصيل اكثر وصارله بحدود الساعة من صار القتل
وهو متأذي لان هو الي يسوق، و وياا طفلة صغيرة ومره الحچية يمكن والدته،
لحسن الحظ من نقلناهم للسيارة الاسعاف شفنه اكو موبايل يشتغل، فاا دگيت عليك اخي حتئ اخبرك هسه احنه متوجهين للمستشفئ ان شاء الله نلحك عليهم..
-اي خوية هسه جاي بسرعة الله وياك مشكور حبيبي مع السلامة..
نهئ الاتصال وآني اصرخ ودموعي على خدي ياااربي لاا دخيلك لاااا تفجعني بي فدواااتك..
سالار:- حضريلي ملابسي نبراس رايح اطلع اجهز سيارتي واجي البس وارروح لبغداد
نبراس:- الساعة بـ5 إذا تروح توصل بليل على الاقل اصبر يطلع الصبح احنا هم نخاف عليك من الطريق!!!..
سالار:- شبيج انتي اگلها رايح للزلمة لايموتون اشوفه وهاي اتگلي انتظر للصبح امشششي طلعيلي ملابسي..
نبراس:- ماقصدي ماتروح اي خوش شلقصة..
رحت ورا ابچي اريد اروح وياك فدوووا اخذني سالار..
سالار:- لااا ابقي اهنا ورح يبقى مصطفى وياچن رايح اشوف شصاير بحويدر..
-رح اموووت يااربي دخيلك احفظة ياااربي لااااا يمووت اموت وراه والقران احس گلبي رح يوگف..
لبس ملابسة بسرعة واخذ سويچة وطلع رحت ركض دگيت علئ حسن مغلق مايجاوب تخبلت بالزايد تالي خابرت نور گالت رائد قبل شوي راح للمستشفئ اتصلوا علية يعرفونه الشرطة وخابروا جماعته وراح..
بقت تبچي وياي وتصبرني بوقتها اني انتهيت فكرة اني اخسر حيدرة ما استوعبها بسبب هلحادث ويموت! ينعصر گلبي..
وما اتحمل شلون لو مات؟ ياااربي بجاه كلمن عنده جاه يمك احفظه واحفظ خالتي وبنته..
صبر ما ضل عندي بدي اجر سيارة توديني لبغداد واطمن على حبيب روحي..اچذب لو اگول نسيته من طلگني لو قل حبي اتجاهه.. بعدني محافظة على حبه بگلبي اصلا اني عايشة لأجله إذا يموت اموت بعده ماعندي بهالدنيا غيره..
سالار صارله 6 ساعات طالع گلت اكيد هسه واصل من زمان .. للمستشفئ ..ادگ عليه يرن بس ما يجاوب..
ماخليت شخص مادگيت علية وخابرته تالي آخر شيء رد علية حسن..
گالي :- بس ادعي لأمي و اخوي وبنته، إذا يموتون صدك ينكسر ظهري بهل دنيا .
غلقة مني، نبراس تبچي ومصطفى يصبرني ..ويگلي ان شاءالله مابيهم شيءء
مااعرف شسوي ،،،ابچي لو ادعي لو ابقئ كاعدة انتظر ؟؟
رحت توضيت وطلعت قرأن، كعدت اقرا شوي ..وصلت لأيه بيها سجدة
.......ماتحملت وسجدت علئ التربه ميته بچي وانسحلت روحي علئ السجادة
نبراس :- شلتها مخروعه بس لا انجلطت هلبت من البچي بسبب الصدمة بالخبر ..
خليتها علئ القنفه، غسلت وجها بالمي، تالي فزت وكعدت حضنتها حيل ،، وضلت تبچي بحضني
بچيت وياها ..ما ادري ابچي علئ حالتها التكسر الگلب
لو علئ حيدرة وامه وبنته ..
- ياعمري نوينه گولي يالله صلي على محمد ان شاءالله مابيهم شيء
- لچ من طلكني ما بچيت هيچ، لچ هذاا روحيي تعرفين شنو روحي واتأذت ؟ لچ رحح امووت هذاا حبيبي وكلشي بالنسبة إليه شلون تريديني اصبررر
آني جذابةةة مو قوية وضعفت بدونه، ومن ابتعد عني اسبوعين ...انييي احبببه الله شاهد قسم برب العالمين ما نسيته لحضه لج حيدرة روحيي ودنيااييي شلوون اتحممل نبرااااس دخيل الله
- لا اله الا الله، ان شاءالله يلحگون عليهم لانخافين ان شاءالله مايصير عليهم شيء بس اهدي ولچ رح يوگف گلبچ من البچي ...
ناردين، :- ساعات مرن، وطلع الصبح ماكو اي خبر ولا احد اتصل ..
تالي صارت الساعة ب6 الصبح، خابرني سالار
كتله :- كول عليك الله كول شبي لا تجذب عليه هو عايش مووو فدوة احچي
سالار :- حضرو ملابسكم جاي اخذكم
- لييش احچي هووو مابي شيي مووو
- اني بالطريق رح اوصل جاي هسه تحضرن مع السلامة
سده مني، صرت ادگ والطم وكلشي فكرت بي
شلوون يربي تعععبت، مابقى حيل بيه،
لبست بنطرون وقمصلة علئ السريع اني ونبراس
اجاا ورحنه كلنه، طول الطريق ساكت وبس يتصل علئ جماعته ويدليهم المكان ..
ما كال شيء النه ..
دخلنه لبغداد الساعه تقريبا ب10،
فتنه للمستشفئ وهو يمشي بسرعة ماينطينه مجال انگله على شيء ..
صعدنه بالطابق الفوگ، التفت يمنه يسره ولازمة گلبي وحالتي حاله ..
كلمه وحدة قادرة علئ تنزع روحي بدقيقة ..
ناس زلم ونسوان، تركض وهذا اليصرخ ويبچي وهذا جايب واحد مصاوب لو ميت ..
مشينه بالممر بي 3 غرف، وكاعدين علئ الكراسي رائد وحسن وكم واحد مااعرفهم يمكن اصدقائة
اجاا حسن وكفنه علئ صفحة وگال لسالار :- لك المن جبتهن اهنا ماتشوف امه محمد كلها ملتمه
سالار :- ماگدر اروح لأربيل إذا صار شيء لا سامح الله جبتهم هسه احسن لحتئ ماينشغل بالي عليهم وهنه وحدهن
..دايحجون عفتهم وكفت يم رائد سلمت عليه، وسئلته، :- عليك الله شنو وضع حيدرة ؟؟
باوعلي وماجاوب ...
صحت - تره مايصير هيچي رح يوگف كلبي اجدي كلمة منكم گوولو رايدة اتنفس براحه احچوو مو رح يطك گلبي ومحد حاس بيه
رائد :- صوتچ ناردين احنه بمستشفئ مو بالبيت
خزرني سالار سكتت انتظرهم يحچون..
رائد :- حويدر حالته مدري شلونها
-يعني شنو زين لو لا فدواا گول وريح گلبي
-نص ونص
-هوو شنوو نص ونص مو فطرتوا گلبي احچي عااد
- يعمي بعدنه ماندري بس اعصابچ جايه تهدين بيه تعاي اخذيلج راشدي بعد
- رويد تره والله مابيها مجال للشقه احچي شبيك
- خالتي و بنته رغد حالتهم صعبة
- شلوون صاار الحادث ؟؟
- ناردين رغد متصاوبه طلقه هيه وخالتي وهسه هما بعدهم بالعمليات مانگدر نسويلهم العملية بسرعة لان رغد صغيرة ماتتحمل عملية قوية وخالتي مره جبيرة ..وتاهت علينه
- قصدك ماكو آمل يعيشون
- ماندري اسكتي انتي وكعدي انتي واختچ اهناك ،الزلم ماجاي تگدر تعبر لان واكفات اهنا
جرتني مبراس وكعدت علئ الكرسي مخليه ايدي علئ خدي ..
ياربي طفلة صغيرة بعدها عمرها مامتجاوز 5 سنوات وتسوي عملية وتصاوب طلقة ..دخيلك ربي سترك
بعد مابيه اتحمل گلبي خلص، اجاا سالار انطاني بطل مي شربت شوي وانطيته لنبراس ..
وعيني علئ الغرفة صايرة كبالي بيها حيدرة ..
گعد يمي سالار انتچيت علئ چتفة لزم ايدي غمض عيونه ..
- يعني هو مامتصاوب ؟
سالار :- اي
- احچيلي شلون صار الحادث
- طالع حيدرة هو امه وبنته بسيارته وهنه كاعدات ليورا وصار هجوم سيارتين عليه ويرمون رصاص وطاحت طلقتين بيهن وهو مرجع سيارته ليورا واندعم وهو اكثر شي متأذي راسه وايده انلوت
شهگت :- عززه يممه يالله وبعدين ؟
- اي نقلوهم وخطية هلرغد خاسره اهواي دم هي وامه ..بعد ادعي لألله
حيدرة حالته يگدرون يسيطرون عليها مامتأذي اهواي لان بس اندعم ..
سكتت طبطب علئ ظهري وگام ..
.....يااربي داتخبرني ب3 اشخاص عزيزين علئ گلبي
رغد الدكاترة يطبون ويطلعون منها اباوعلهم هذا الي يوقع وهذا الاجه يتبرع بدم
لو تجي دكتورة بيدها ابر وعلبه بيها اداوت لو ادوية ..
بعد ساعتين دخل الدكتور دگ جرس الانذار وحالة طوارئ واعلن علئ فقدان مريض
كلنه نصيح ويگلوله :- احچي دكتووور شصاارر
وگف يمنه وگال والخيبة مبينه علئ عيونه
:- سوينه كل النگدر عليه لكن !!! للأسف خسرنه الطفلة رغد
شهگت بصدمة وصرخت :- لااااااااااااااا
رحتله اصيح بي :- عليييك الله لااااا فدووة دكتور شنوو ماتتت رغد !!!!
حسن خلئ ايده علئ وجهه وگال :- انا لله وانا الية راجعون
لزمتني نبراس وآني اصرخ وابچي ...
- عليكمم الله رغدتي عزيزة گلبي ماااتمووت لك هاااايي حبيبه ابوهاااا وطفلتتهههه شلوون ماتتت !!!
اجه حسن حضني وسالار يصبرني ...
بهاي اللحضه طلع دكتور و 3 دكتورات
گالو :- خسرنه المريضه الثانية توفت .
خليت ايدي علئ حلكي وشهگت صدمة وره صدمةة
گام حسن ركض بسرعه للدكتور :- لك شجااي تحچي امييي
- الله يصبركم سوينه كلشي نگدر عليه بس للاسف توقف قلبها الله يرحمها ويصبركم علئ خساره الوالدة والطفلة
حسن صار يدگ علئ صدرة كلش انتهئ چان شوي لازم نفسه من گالو رغد كانت بس هسه كل حيله انهد
انگلبت المستشفى عزا والكل كاعد علئ صفحه وراسه بحضنه يبچي ..
سالار حاضن حسن بقوة يحاول يصبره ويهدي وهو يگوله :-
لك هاااي امييي ضحيت بيهاا علمود شغلي وشغل حويدر ضليت سنتين مااحچي وياهاا لك من كون الله ماخذ روحي قبل مااخذها منييي
طلعوهن مخليهن علئ سديه ومغطينهن بچرچف ابيض، خلئ راسه حسن عليها وضل يبوس براسها وحاضنها ويبچي وسالار واكف و حاضنه من ظهره ويبوس بچتفه
ويبچي وياا ..
نقلوهن للثلاجة وطلعو اثنينهم بره المستشفى تالي اجاا سالار يركض ويصيح للدكتور :- حسن واگع من طوله بالحديقة جواا
طلعوو كلهم نزلو خلو علئ سديه وضربو ابره ..
مرتفع ضغطه
تالي گعد وخلصو الاجرائات الكامله، واستلمو الجثث ..
سالار حاير گال شلون ندفن امه وبنته وحيدرة ماودعهن
بس حسن كال اكرام الميت دفنه مايجوز نتأخر ..
رحت وياهم للمغيسل واجن اقاربهم ماشايفتهن ولا اعرفهن بس هنه يعرفن خالتي ...
وصار المغيسل عبارة عن صريخ نسوان
تذكرت بيوم الاجيت وغسلو ابوي وچفنو ..ماتحملت وطلعت رحت لسالار وآني ابچي
- ماگدر رجعني فدوة شوي ويوگف گلبي واموت ماعرف شلون بعدني صابرة ..
رجعوني للمستشفئ وسيارات محملات تابوتين واحد چبير واحد صغير متت بچي طفلة ماشافت شي من دنيتها تابوتها علئ كدها
ان شاءالله طير بالجنه،
الله وملائكته يتلگوها ويرحبون بيها الليله
صرت ابچي ياربي شلون تتحمل طفلة وحشه الگبر ..
امس نايمه بچربايتها و اليوم بقبرها، صبرك يالله ...
كلهم راحو للنجف لمراسم الدفن، بس رائد بقئ يمنه علمود حيدرة والمستشفئ انترست جماعته وحمايته وضباط وشرطة واقربائه
عرفت اثنين من اصدقائه بالشغل واحد اسمه عثمان ولخ اسمه عباس ..
كلش حبابين وطيوبين كل شوي لو يسئلوني خوية شمحتاجة يصبروني لو يجيبولي مي و اكل ... واحنه اخوانچ موجودين لانخافين ..
رائد كالي امشو اوديگم للشقة تسبحن وترتاحن وابقن يم نور شوي لان خابرتني لوحدها وخايفة ،،،،
لا يصير بيهاا شي ..
بدون ما نحچي رحنه وصلنه للشقه وكلنالها توفن بقينه نبچي لساعات ثلاثتنه نحب خالتي كلش طيبة دائما تسولف ويانه وتضحكنه وتحبنه
تنهدت، الله يرحمها ..
سبحت طلعتلي نور عباية لبستها علئ ملابسي لان ملونه وماگدر اطلع بيهن ،خابرت علئ رائد رايده ارجع ،،كال هسه اجي اخذج
حاچيت نبراس تروح وياي گالت :- لا اريد ابقئ اهنا بالشقة ،، الشفته بالمستشفئ وبالمغيسل مو شويه مارايده بعد قهر خليني اهنا يم نور وانتي روحي
اجاا رائد اخذني، بقيت بالمستشفئ لازمة كتاب القرأن اقرا وابچي
طلع الدكتور راح لغير غرفة تالي
اجاا حاچه رائد گاله :- بشر دكتور شنو صار علئ حيدرة
- الضربه براسه مأثرة حيل و دخل غيبوبه
- لاا دخيلك دكتوور غيبوبتيش لا اله الا الله
..چان هذا الناقصني والتم حسيت روحي انتهت مو مال حمل هيچي صار رائد يگلي غيبوبه ماتطول ان شاءالله
دگيت رجل الا اروح اشوفه، خلوني ادخل بعد مالبسوني كمامة وعقموني ..
دخلت شفته متمدد ومخليه اوكسجين وصدرة عاري وكانونه بيده وجهاز براسه ..
واسمع صوت الجهاز النبض ..والغرفه دافيه وهدوء
كعدت يمه بسته بخده، ودمعت برطمت شفايفي
همست - حبيبي ياروح نارك صدك هسه انت بغيبوبه ماتريد تگعد واكحل عيوني بسلامتك ياگلبي ياعافيتي اگعد لا تطول بنومتك منتظرتك منتظرة اسمع صوتك ..من روحي علئ روحك لاا تعوفني ماعندي غيرك انت و اخوية بهاي الدنيا
اعرفنك قوي گووم فدوووة
صرت ابچي سمعتني الدكتورة اجت وهي تگول :- خلص الوقت مايصير تبقين اهنا اكثر .
مسحت دموعي وطلعت ...ثاني يوم اجوو من النجف وحسن حالته يرثئ لها، كلش تعبان
واجتي نلراس جابتلي بدله سوده عاديه مثل الدشداشه وقمصله وشال ..رحت للحمامات بدلت ورجعت كعدت ايدي علئ خدي ..
و الشال مخليته علئ نص شعري
لان رائد گال لبسي لان الضباط تجي اهنا توگف اهواي وزحمة يشوفونچ ،،،،
...واخذت بكلامه
بقيت 3 ايام بالمستشفئ ..باليوم الرابع چنت كاعدة بغرفة الصلاة
اصلي المغرب ..وغفيت لان ما نايمة
حسيت علئ صوت ابوية يمي مسح علئ راسي وگال بصوت حنين ،،
اطمئني بابا وريحي گلبچ حيدرة الله ما ياخذ روحه لان يدري يتيمه منتضرتة
يابنتي قوي گلبچ واصبري ان شاءالله مابقئ شيء وتعيشين حياتچ براحة ابدية والمشاكل كلها تنتهي ..
فزيت وآني اصيح بابااا بااباا ..
شفت نفسي علئ السجادة ما مستوعبة السمعته حلم عبابك صدك چان كاعد يمي ويحچي ..
گمت وطلعت خائفة كعدت علئ الكرسي اطكطك باصابيعي واردد كلماته الكالها إليه ..
شفت من بعيد دخلوو ..رائد وسالار وحسن بالزي العسكري يمشون و وراهم 6 ضباط ..
ابتسمت من شفتهم كلهم هيبة ..
دخلو يحچون وياا الدكتور تالي طلعو واجت شرطة ..
خفت شنو شصاير ..!
سئلت رائد ،،،، گال :- ماكو شيء بس القينا القبض علئ الهاجمو حويدر
- اي الحمدلله نزعوهم العافية الله ينتقم منهم دنيا واخره ويحرگ گلبهم مثل ماحرگو گلبنه
- لا رح نعدمهم هسه
- صدك عود
- وداعتچ ..شعبالچ هاجمين علئ الضابط وكتلو انه وبنته
ورح ينجون عادي لو بس حبس ؟ ..شيء اكيد اعدام
- بعد هذا شغلكم شعرفني بي.. الفاتحة يمتى تسووها ؟
- حسن چان ناوي يعتقلهم ويعدمهم يلا يسوي الفاتحة وهسه همه بيدنه ،،،، ان شاءالله احاچي
... ثاني يوم
ما نصبو چادر گال حسن يگعد حيدرة يلا يسوون فاتحة...
بعد 8 ايام ..
چنت كاعدة اجاا الدكتور فرحان ...
گال لي :- حيدرة كعد من الغيبوبه
طرت من الفرحة ...وصحت لحسن ورائد وسالار اجوو
وكلنه رحنه للغرفة بلهفه
فتحنه الباب وانصدمنه من شفنه الغرفة فارغة
وحيدرة ما موجود ! ........
